رواية عرين الصياد الفصل الثاني عشر 12 بقلم شذرة العدوان

الفصل 12

بقلمي شذرة العدوان

ديالا: عيون مهره الي جانت صبره دوم تعيرها بيهن

اليوم خلن ابن الشيخ يدوخ بيهن

يدحگ عليها مكيف امنيته ياخذها من هسع ويروح ضيع علومه ونسه روحه حضنها من خصرها وجان تفز مهره وهو انتبه على نفسه ودنگ راسه وامه ادحگ علي وتضحك مكيفه بي تگله صارت حلالك شحده الي يسولف

شد على شفايفه ببتسامه وعيونه تلمع

مشعل اكبر ولد الشيخ علوان گالو عنه جان قافل ما يريد يعرس الا البنت الي تاخذ عگله ويقتنع بيها وبيوم الي اجو وگطعو علينه الطريق بالفلكه جان هوه موجود ويه الوفد الي اجه وشاف مهره رغم جانت بوكتها متلثمه بشماغ وبس عيونها تبين عشگها من ذاك اليوم

ومن سألو وفترو يروحون موگفهم بنص الطريق وراجع يمشي ورانه من بعيد لحد ما عرف احنه بهاذ البيت وتأكد البيت نفسه بيت الملا درويش

وتعمدو يجيبون النسوان بيوم اجو للصلح تا امه تشوف مهره وراحت وصفتها اله مثل مجان متخيلها

وعرفت عنها كلشي من خلال صبره

وامه الشيخه جوريه تصد عالنسوان ومكيفه تأشر على مهره وتگول مثل ما وصفها الي والله عرفتها من اول ما سلمت گالي يمه جانت واگفه عالفلكه مثل الجبل گايده الفرس وخواتها محتميات وراها جنها الدرع وما طولت بالحجي وما خلت بگلب الزلم شك

ولا خلت احد ياخذ غيبتها ويجيب طاريها

هاي البنت اريدها يمه هاي الي تصلح تكون جنه عد الشيوخ وكت يغيب رجلها تصير رجال البيت وكت يحضر تصير انعم من الحرير

والنسوان تگللها عز الله مبين عليها اخت رجال ومهره واسمها عليها تستاهلونها يا شيخه جوريه

گالت اي والله طيرت عگل وليدي واكثر من مره يروح على ابوها ويطلبها مجان يدز ابو الشيخ خاف لا يتفشل وجان تضحك گالت والحمد لله تمت القسمه

كلها ادحگ على مهره ومشعل

عبالك لوحه گبالهم الكل مكيف مبين يريدوله الخير وتهمهم سعادته

امه الشيخه جوريه الزوجه الأولى للشيخ علوان تريد اطير من فرحتها تهلهل وطش جگليت

مبينه انسانه طيبه وراح اداري مهره

ليال:الناس كلها مكيفه بالخطوبه وتغني الا اني

مخنوگه واداري دموعي مجاي استوعب مهره تروح من بيتنا كل شوي اطلع ابجي وامسح دموعي وارجع

فات مشعل تا يلبسها الحلقه مكيف ويدحگ عليها

هوه حلو احسن من اخو الوحش ابو شوارب مفتوله كل ما اريد اطلع برا اشوفه واگف و شايل سلاح ويمه ماجد الحولي عوذا شگد اكرهم

وبصفهم استاذي الجميل حاط ادينه بجيوبه واگف بثبات وما يحش جگاير مثلهم

الشي الوحيد الي خلاني اغير نفسيتي هو المسجل الي جابو بي اغاني حلوه اشو مسجلنه مابي غير القرأن والمديح وهاذ بي اغاني حلوه وتخلي الواحد يرگص ويفرح

رحنه عالمطبخ نخلط الشربت

فاتن ترست الترمز الجبير مي وحطت الشربت بي وخلطته بالجمجه ثنيت يمها گلتلها فاتن شفتي المسجل شحلو بي اغاني اشتريلي واحد امانه

مدنگه تصب شربت گالت اي ميخالف

من تنجحين اجيبلج واحد

صفگت بيدي وكيفت

فاتن اخذت الشربت وطلعت ظليت بالمطبخ اصب واشرب فززني صوت ماجد گال تردين مسجل

خفت منه طلعت بساع بدون ما اجاوبه

ديالا:خلصت الخطوبه وانطو موعد 4 شهور ويزفون عبن ينتظرون عمتهم مزوجه بالسعودية

راحو وفاتت مهره عالحجره تبجي ولحگنها بنات خالاتها يحجن عليها يعبالن مهره تبجي عبن راح تفارگ اهلها

ما يدرن هيه ما تريد الزواج عاد كلها باركت وراحت

لليل وهيه تبجي وفاتن حاضنتها وتبجي وياها

مهره طلعت رسائل حامد وتشم بيهن وتنحب

تگول انتهيت يا فاتن انتهييييت

راح اصير لغير حامد رجال غيره راح يواسدني شلون بيه اني شلوووون دابريني طول الخطوبه واني اتخيل مشعل حامد شسويي فااتن محد يحب عيوني بگد حامد اني ملكه مو ملك غيره

هاذ شلون گلبه راح ينطي وياخذني واني ملك غيره اموت روحي ولا اخلي يلمسني اموت روحي

عاطت بيها فاتن اي عفيه اصگعينه خلي روسنه بالطين تا يگول الرجال هاي بيها شي مزالج مو قويه ومو گدها عش وافقتييي

جاوبت مهره وهيه تشاهك مدري بروحيي مدري اول مره ابويه يطلب مني طلب ما گدرت ارفضه ما گدرت ما دحگ ابويه على گلب بنته مشتعل ما شاف النار الي بيه ما يدري بيه صابني العشگ لاهو مرض واروح دكتور ولاهوو شي حلال ومو عيب واشكي للناس همييي

اااخ ينار گلبي ربي ليش زرعت بگلوبنه العشگ اذا هالگد عيب نحجي بي ونخفي ليش ربي تبجي وتلطم على وجها تگص الگلب

گالتلها فاتن استغفري ربج لا تكفرين

قدر الله وما شاء فعل هاي ربج راح يعوضج

شگد عشگتي حامد بس خليتها بگلبج وما غضبتي ربج بيوم وختليتي بي

جاوبت مهره وهيه مثنيه بالگاع

ترجف ودموعها صب

گالت ايي والله ايي والله عشگنه 12 سنه

وما ختلينه يوم ولا غضبنه ربنه

والله ثوبي ما يلمسه 12 سنه شعري ما شافه

الا بهذاك اليوم النحس من نهبني الا بهذاك اليوم النحس حضني والله صنت حبنه تاگول ربي يجازيني ويجمعنه حت لو متأخر حت لو وراه سنين تأملته

بس شسوه يفاتن وزه الشيطان واجه نهبني وبعثر حبنه الي سنين واحنه محافظين علي والله ما خنته بنظره ولا خنته بصوت

عشت بغيابه مثل الأرمله

ثوبي نيلي

وما لاح شعري الملفع الزين غير شماغه الي خلا وراح مبهدله حالي اااخ يمشعل اشفت بيه وحبيتني تخسه والله واخذت شماغ حامد تشم بي وتصرخ

فاتن گابلتها وگامت تنحب وتنعيلها

يمه گولي لأبويه ماني على راده

فراشي عگارب صفر عربيد الوساده

يمه گولي لأبويه واني استحي منه

زمن نهود الصدر جديد الثوب شگنه

گامت مهره تلطم حيل وشگت ثوبها على طوله وتصييح

اجن عليها امل وهاجر يشيلنها نهرتن فاتن گالت عوفنها تبرد گلبها وخرن

وگفن بصفحه وحطن الملفع على وجوهن ويبجن وياها

وفاتن كملت تنعيلها

اووف يابه ااوف وحامد يگول

حبيبتي وبنت گلبي مهره عليه جوار منطيها

ولو صار طگ الفشگ مجفي واخليها

ومهره تعض اصبعها وتصرخ وتضرب صدرها

لحد ما نهارت اعصبها وجان تگع

التمينه عليها ونصيح فاتن تنفض عليها مي

ومهره ماكو على السانها بس كلمة حامد يروحي

حطتها فاتن بحضنها وغطتها

ظلن بالحجره ثنينهن ينحبن واحنه على بجيهن نبجي ورمن عيونه

ليال:كل خطوبه شفتها جانت العروس تريد طير من فرحتها الا مهره ملخت روحها تبجي وتصرخ وتصيح حامد ابن روحي شلون اعوفك شلون گلبي انطاني وافقت شلوون

اذن العشه وهيه على وضعها من لعصر

حت حيل ما ظل بيها گمنه نسمع بس صوت انينها

الحمد لله ابويه والولد محد هين معزومين على مولد لو هين جان حميد سوالنه طلبه

رحت بالهول صافنه بالكتاب وعيوني مغوشه ما اشوف من البجي وديالا گاعده يم الصوبه وهم فاتحه الكتاب ودموعها تنزل من طرف عينها

اجه ماجد من شفته خفت ولميت نفسي

سلم وجان بس ديالا ردتله السلام

گال عجل الملا و الولد وين گلتله ديالا معزومين على مولد

گال وفاتن وينها

ديالا:گتله يم مهره

گعد يمي تك ركبه ويدحگ على ليال وعليه گال خير شبيجن تبجن

ديالا:مسحت دموعي گتله على مهره

گال هاا ترا بعد 4 شهور من العرس خوما من هسع تنحبن طبطب على جتفي وراح

ديالا:استلمت الشهادة وطلعت ناجحة الحمد لله

بس الصدمه ليال راسبة بكل المواد

محد استوعب شلون هيج ترسب وهيه حيل شاطره وذكيه تخبلت گامت تبجي وتصرخ وتملخ بروحها نحمست حمس

استاذ صائب مصدوم اكثر من عدنه متعصب عيونه تريد تطلع مختنگ گال ليال جاوبت بكلهن واني رشحتها الأولى شلون هيج صار

تمرضت ليال من القهر والحمس اكل معد تاكل

وانوب ساره كل ما تفوت من يم بيتنا تصيح ليال الكسولة تخلي ليال تفرفح

سبوع وهيه اكل ما تاكل وطريحة الفراش تبجي وما تريد تشوف احد عبالك مسويه جريمة جابلها ابويه هدايه وعماد اشترالها لعابه صوف جبيره وما تفعل تقتنع تبجي بنفعال عيونها ورمن گامت ادوخ وتگع عبن متاكل

الكل تأثر عليها ابويه گام يروح عالشغل ويرجع بساع تا يشوفها والولد اول ما يرجعون يسألون عليها

ومن نگعد عالوجبه يسولها لفات تصفطهن گدامها ما تاكل ودموعها صب

وكل ما يجي استاذ صائب تا يشوفها تنهزم منه خجلانه وهو خطيه متأثر حت وجهه شحب

وما مقتنع برسوب ليال حت عالتربية راح وسأل

وحقق ويه كل المعلمين الي متحنوها وما وصل لحل

بيوم الجمعة سبحتها مهره واخذتها عالصطح مشطتلها وتحجي وياهه ميخالف وتعوضين

بس ليال ما تسمع

منهاره صعد ماجد عالصطح من شافته جلبت بأيد مهره وگامت تبجي اجه يمها گعد تك ركبه جابلها

مسجل خلا بصفها وجان تدفعه گالتله ولي ما اريد منك شي

خزرتها مهره عيب لياال شنهي تگليله ولي

دنگت تشاهك گالت ما اريد كلشي عوفوني بحالي

گاللها ماجد ميخالف عوفيها براحتها

سحب المسجل وجان يحط كاسيت

وطلعت اغنيه حلوه

ليال سكتت و گامت تستمع عالأغنيه

ماجد عدل گعدته خلا المسجل گبالها گاللها هاي الدگمه اذا دوسينها ينطفي المسجل

وهاي الثانيه اذا دوسينها ينفتح مكان الكاسيت اطلعينه وتحطين كاسيت ثاني لو هوه نفسه تگلبينه وتعيدين الأغنيه

وهاي الدگمه ترجع الشريط وهاي تشغله

وهاي الدگمه تسجل الصوت خاف عندج نيه تصيرين مغنيه

ثنت على ركبها گالت يعني شلون يسجلني من اغني واصير مثل هذول المغنين بالكاسيت

گاللها اي بس انتي محد راح يسمع اغنيتج عبن صوتج مزنجر من البجي وبلاعيمج مورمات

لزمت رگبتها تحسست بلاعيمها وجان تگول اي والله مورمات وجان تگول لمهره ودوني عالطبيب بلاعيمي مورمه

گالتلها خايبه صارلج سبوع ونص تنحبين بس سمعتي نفسج راح تغنين فرفحتي يالله گومي اوديج

وجان تگودها واخذوها عالطبيب اجت شايله العلاج

اخذت العلاگه منها فتحتها شفت الكبسول رايح منه گلتلها شنهي منطيج علاج مستعمل

گالت مهره لا يمه غير ليال بعدنه يم الدكتور واخذت من العلاج تگول تا اطيب بساع شفتي العرامه

احنه نحجي وليال مگابله المسجل

ولا بالها يمنه ما عدها غير شريطين اغاني يخلص وتعيده

ليال: ما توقعت نفسي ارسب والله ادرس وشاطره

تخبلت من اجت الشهادة وشفتها تمرضت انهاريت واكثر شي خجلانه من استاذ صائب گمت الطم اكثر من سبوع اني طريحة الفراش

ما كيفت غير من جابلي ماجد المسجل رغم كاره ماجد وشكله بس حبيت المسجل مگابلته ليل ونهار ادمنت بس ما عندي غير كاسيتات ثنين اني شلون اطلب منه يجيبلي غيرهن

اجه ماجد يسلم علينه قبل لا يلتحق

گال ها ليال اشوفج مورده

دنگت ما حجيت

من حركة شفايفي حس عليه اريد شي

گال ها ليال گولي شرايده

دحگت على مهره خفت منها ترزلني

گلت كلشي ما اريد

مهره گالت گولي شرايده

عصرت اديني گلت اكو اغاني غير هذول

ماجد ابتسم گال يبوو شكثر اشكال مصري سوري هندي كل ما تحب تسمع اذنج

بدون ما احجي گال بس ارجع اجيبلج ادللي

سلم على اهلي وطلع واني رحت اگمز مكيفه

لحگتني مهره گالت ليال بعد لا تطلبين من ماجد شي عيب

دحگت عليها بحزن گلتلها والله بس هذني بعد ما اطلب مسحت على راسي وراحت

خلصت عطلة نصف السنة ورجعنه للدوام

اول يوم ما فعلت اروح حيل ضايجه گوه قنوعني ورحت اول ما فتت تلگتني ساره تعيرني

كسول گاعد بالبلم ما يگدر يغط القلم والطلاب تضحك ما خلتني ديالا اسحلها گالت عوفيها تولي هيه جم نوبه رسبت اخر من يعير هيه

عفتها ورحت انهضمت

گاعده بالصف ومدنگه راسي

اجه استاذ صائب حط ايده على جتفي گال ليال الشهادة تگول انتي راسبه واني اگلج انتي ناجحه واني متأكد درجاتج ترفع الراس اكو خطأ بالموضوع

وان شاء الله تبين لا دنگين راسج انتي ما مسويه شي غلط وطبطب على جتفي بقهر

ديالا: اليوم ليال عن غير العاده تنتظر ماجد اليوم يجي عبن راح يجيبلها كاسيتات كل شويه تگف بالباب ادحگ لو تحدر من الصطح تسأل اذا اجه

جنت گاعده بالطرمه اكتب

مهره وامي يم الخيول وصبره مدري وين فايعه

امل وهاجر كلمن بحجرتها والولد كلمن بشغله

وجفت ماجد امنيتي يدگ الباب گبل لا يفوت انوب خطواته سريعه من طوله محد يلحگ يلم روحه واني مبطوحه اكتب وثوبي مرفوع

لميت نفسي گال هاا ديالا شلونج گمت سلمت علي گتله زينه الحمد لله اليوم عين غير العاده لابس دشداشه بيضه وغتره لافها جراويه

ردم سؤلاته بثواني سأل حت عن جدي السابع وين اخر شي گتله وليال عالصطح گال خوش عجل هاج

انطاني علاگه وراح شايل علاگه ثانيه

گعدت فتحتها بيها گلاده ومحبس وتراجي بيهن فصوص اسود شگد حلوات

وساعه سوده وسير مال تنوره

حطيتهن بصفي ورجعت اكتب

ليال: اني ما انتظر ماجد على حوره

انتظر الكاسيتات يجيبهن

ملل وضوجه ما عندي غير ثنين اسمع بيهن كل ما اشغلهن يعيطون بيه گالو حت بالحلم كمنه نسمعهن

جنت عالصطح اسجل بصوتي من اغني اشو من اسمع نفسي صوتي حلو ومن اسجله يصير يلعب النفس حسيت اكو احد بالباب سمعت خرخشه

گمت وجان اشوفه ماجد حاط الغتره بأثمه وحاصر الضحكه سمعني من اسجل بصوتي واغني

من الفشله والخوف صخنت ومعد اعرف شسوي

گتله الله والله السلام عليكم وبركاته

فحط من الضحك انوب

زعلت وردت احدر گتله وخر عن الباب اريد اروح ضرب صدره بأيده گام يگح من الضحك رفع ادينه وهو شايل العلاگه

گال ما اضحك عليج اضحك على ديالا فززتها

گتله جذاب

گرب مني گال وداعت صائب الي ما احلف بي جذب

حطيت شعري ورا اذني وادحگ على علاگة الكاسيتات هاذ امت ينطينياهه ويروح

بودي اخمطها من ايده وانهزم

مد ايده گال سلمي عليه يالله

حطيت اديني ورا ضهري

رفع حواجبه گال يالله شبيج لو والله احط علاگة الكاسيتات وادبج عليهن امردهن

شديت على شفايفي انعصر گلبي

گرب مني خطوات واني اگحز ليورا

گتله لا تجي امانه والله اخاف منك ختنگت گمت ابجي

گال ليش تخافين مني

مسحت دموعي برداني گتله هذاك اليوم بالحنه مال غازي انته صرت مو خوش انسان

صد بصفحه گال هذاك اليوم جنت زعلان منج ومعصب عبن ما تسلمين عليه وصرتي تكرهيني

گتله والله ما اكرهك بس استاذ صائب گالي هيج

شد على شفايفه گال اي اعرف وهسع اني مو زعلان منج وعد مني بعد ما ازعلج لا تخافين مني تعاي تنصالح مد اصبعه الخنصر للصلح

واني حطيت اديني ورا ضهري ودنگت

گال يالله خن نتصالح مو احسن ما تظلين خايفه والله بعد ما ازعلج

مديت اصبعي بتردد وصلاحته

ابتسم وجان يروح يگعد عالجودليه

فتح العلاگه گال تعاي اسمعي شجبت

فتح المسجل وشغل اغنيه مصريه حلوه

اني على وگفتي واعض بشفتي اتحسر

طفاها وشغل غيرها وهم حلوه ظل يشغل ويغير بالأغاني واني شوي شوي رحت گعدت على طارف الجودليه ثنيت على ركبي واعصر بأديني

اخر شي حط اغنيه

جانت هادئه مو طربگه

گتله مو حلوه حط غيرها

صفن بوجهي گال هاي مو حلوه دورين طربگه

گال هاي اغنيتي المفضله هيه وهاذ الكاسيت وشال كاسيت جان كاسيت ابيض كاتب علي معذبتي

گال اني ما احب الطربگه

احب الأغاني الرمانسيه والي من اسمعها اتخيل حبيبتي يمي

ما فهمت شنو رمانسيه وما سألته

بلش يحجيلي عن نفسه لونه المفضل واكلته المفضله شنو الي يحبه وشنو الي يكرها

گمت اخذ بالكاسيتات اصفط بيهن واستمعله

بعفويه گتله تمام هسع عرفت كلشي عنك خن احجيلك عن نفسي

گال شي واحد اريد اعرفه

گتله شنو

گال تعرف ترگصين

ابتسمت گتله اي والله اعرف بس ديالا تعيب عليه

تگلي بس تهنطزين

ضحك وگال الي يسمعج مشغله اغاني طربگه يگول محد يلحگها بالرگص

گتله والله اعرف

گال خوش خوش تعلمي

بكلامه واسلوبه خلاني اغلس عن عملته والتهي

بالمسجل دحگ على ساعته وجان يروح

ثاني يوم بنفس المكان والساعه هم اجه

وجايب ويا كاسيت ثاني شغله وجان اطفي گتله غدي مو حلوو

صفن عليه گال انتي ما عندج ذوق اذانج بيها تلوث تفقدين بس عالطربگه

غلست عنه گال احم ليال اريد اگلج شي

اصفط بالكاسيتات گتله شنو

گال تدرين منو سبب رسوبج بالمدرسة

رفعت راسي وصفنت گتله منوو

گال بس توعديني ما تحجين لأي بشر ترا الي ما يوفي بوعده يحطه الله بالنار

حطيت ايدي على اثمي گتله والله ما احجي

گال حميد اخوج هوه سبب رسوبج

ختنگت گمت ابجي گتله جذب

گال وداعت صائب

گتله ليش هيج سوه

گال يريد يرسبج تا ينطيج لأبن الشيخ الثاني

ويحرمج من الدراسة وبعد لا تدرسين ولا تتعلمين

كورت نفسي گمت اشاهك وامسح دموعي برداني

گتله راح احجي لأبويه واخلي يضربه

لزم ايدي گال لا ديري بالج

يروح يجبرونج تصير مشاكل

اني عندي حل احسن

تكملين دراسة وتتخرجين وانتي مرتاحه

بدون مانية حميد وتهديده

گتله شنو الحل

گال وافقي بيه تزوجيني واخذج لبغداد تدرسين بأحسن مدرسة واحسن جامعة وتصيرين دكتورة

وحميد ما يگدر بعد يحاجيج

لزم اديني گال ها شگلتي

تجمدت بمكاني اني شون ازوج بعدني ما صرت بگد مهره وفاتن وگفت گتله اني بعديني زغيره

مهره تگلي الا تصيرين بگدي يالله تزوجين

وگف گبالي سد عني الشمس من طوله گال اول وتالي تكبرين بس الفرق تكبرين يمي وبمدرستج احسن ما تكبرين يم حميد وحقارته

وهو من هسع يريد يزوجج بوده كلجن تعرسن ويخلص

رفعت اكتافي حطيت ايدي على بطني گتله ما ادري

لزم ايدي گال مو ما تدرين وافقي ليال تا احجي ويا ابوج

گتله زين وديالا تظل وحدها

گال ناخذها ويانه

زين وامي

گال هم ناخذها

وابويه

گال كلهم حت زمال الجيران ناخذه

بس گولي اي مو شلعتي گلبي

عصرت اديني ودنگت افكر

ما اعرف شنو احجي

مسح على راسي گال انتي مكانج تدرسين ابغداد احسن هناك يعلمونج زين مدارسهم حلوه ومرتبه

گام يغريني بكل مكان صورلي بغداد جنه من خلال كلامه ووصفه

گال هاا شگلتي

دحگت علي واعصر بأديني وابلع بريگي

هزيت راسي بقبول

ابتسم لزمني من كتوفي گال موافقه ليال

گتله هاا ايي موافقه

لزم اديني عصرهم بلع ريگه بفرح گال اني اروح هسع ديري بالج تحجين لأحد خاصة خواتج تمام

هزيت راسي اي وجان يروح

رحت گعدت كورت نفسي گلت احسن والله اتزوج وادرس وما اظل ويه حميد اخذ اهلي كلهم ونروح وهوه يظل بالبيت خلي مگابل الحيطان شلون يروح يرسبني

مرت الأيام وكل ما ينزل ماجد من العسكرية يجيبلي كاسيتات صار ادماني المسجل

وماجد كل ما يجي يعيد عليه نفس الحجي ويغريني وينبهني ما احجي لأحد

مع الأيام صرت اشتاگله وافتقده اذا ما يجي

واحب الگعده ويا ما اعرف صار عندي شعور مدري شنو من اشوفه اكيف ومن يگعد اظل ادحگله

گتله ليش ما تجي عالمدرسة مثل اول

گال لا ما اجي وذا سألج صائب گليله بعدني على وصيتك وما احجي ويا ماجد خووش

هزيت راسي بــ اي

احس نفسي تعلقت بي

گمت ابجي وراه من يلتحق

اربع شهور مرت جانت احلى ايام

ديالا: اليوم الأربعاء الحنه مال مهره

من الصبح التمن خالات مهره السبعه

ومنهن سعديه الي مزوجه بالفلوجه

وياها بنتها نظال

صبره گبل سبوع مگابله الأرضي وتعزم

فاتن راحت تساعد امل وهاجر بالغده وخطيه گلولها روحي انتي نفسا و تعبانه احنه نكفي عبن فاتن ولدت بعدها ما طالعه الأربعين

بس هيه ما يجيها صبر لازم تگف وتشرف على كلشي حت لو جاي تگف ادحگ شلون يسونه وترتب

ملتمات بنات خالات مهره كلهن ومنهن ست رافده ونظال مسويات شيره من الليل وجابنها المهره

احنه ظلينه گاعدين يم مهره ندحگ عليها ونبجي شلون راح تفارگنه لازمين اديها وننحب وهيه هم تبجي بعبره تگص الگلب

اجت نظال شايله المنگاش والخيط تا تحف لمهره

شافت المناحه وجان تعيط بينه

گالت اسكتن لا اهبطجن هسع شلون احفها وجها غرگ دموع من وراجن وجان تطردنه گمنه تنوسل بيها تخلينه ونسكت بعد ما نبجي

مهره گلتلها الله عليج خليهن تعالن

مشينه دموعنه وگعدنه يم مهره خلينها بالوسط وكل وحده لازمه ايد ونظال تعيط شلووون هسع احف يالله

مهره گلتلها خليهن الله عليج اريد اشبع منهم بناتي ذني

نتهدت نظال وحطت الخيط بأثمها وگامت تحف

مهره مغمضه والدمع يطلع من طارف عينها وما تحركت ولا انطت ردة فعل

نظال تحفلها وتحجي من بين سنونها گالت والله يا مهره ينخاف منج مسبطه ما تحسين بوجع الخيط ولا تحركتي خوش ابن الشيخ ما راح يتعب وجان تغمز لست رافده

وست رافده گالت عيب بنات گاعده واشرت بحواجبها علينه

گلتلها نظال عجل يخايبه اني وياج مو هم بنات

گالت ست رافده بس ذني زغار بعدهم

صدت علينه نظال گالت يبنات فتهمتن عليه شگلت

ديالا:گلتلها اي ابن الشيخ ما راح يتعب

ضحكت وجان تگول بشنو ما راح يتعب

جاوبتها من يحف لمهره

كل الي بالحجره گامن يضحكن

گالت نظال اي هاذ قصدنه عفيه عليجن

مهره ساكته ما حجت ومغمضه عيونها

ونظال تحف وتحجي گالت مهره خدرانه من هسع حلال عليك يا مشعل خايبه گولي اخ گولي شي جاي تحسسيني مجاي اشيل شعر واني هلستج هلس

مهره گلتلها بعبره والدمع ينزل

الوجع الي بلگلب اجتاح كل جسمي وقيده لو تشيلين مني لحم ما احس النار الي بيه ما تطفه الي گدامج مو مهره

وابن الشيخ راح ياخذ جسد بدون روح

نظال مستمره تحف وتحجي گالت ما الومج العشگ يمرد الكبود ويورم الگلب العشگ المرض الي مالو دواء

هدت الخيط من اثمها وگالت بحسره بس انتي على اقل الي تحبينه بادلج الحب وسمعتي منه كلام على اقل يظل ذكرى بس اني شگول حبيته بكل جوارحي ولابسني ولا جن بشر گدامه

الحب من طرف واحد يكتل يا مهره

يذبح يخليج تحسين بنفسج بيج نقص

نوبات اگول لنفسي خاف مو حلوه اني وما عجبته بس من اشوف الزلم تلاحگني تريد نظره مني اگول عجل ليش ربي ليش

گطعت الخيط وخلت واحد بمكانه مسحته بودره مال جهال وجان ترجع تحف وادحگ عليها عيونها مغورگات تريد تبجي ما گدرت اداري دمعتها وجان تنزل تجاهلتها وستمرت تحف لمهره

ست رافده گالت ثنينجن اخير من وضعي شايفات من يجيج اهتمام من الشخص الغلط يلاحگج مثل ضلج

بحيث يخليج تكرهين كل الزلم

امنيتي اجرب احب واحس روحي انثى

گلتلها نظال اني هم اجاني الحب من الشخص الغلط

بس ما انطيته مجال وحفظ كرامته وسكت

والي احبه مجاي ينطيني مجال

گامت تنگش بحواجب مهره گالتلها مهره يبنت الخاله

شدي حيلج وبادلي رجلج المشاعر لا تگولين ياخذني جسد بدون روح

هاذ ابن الشيخ يخايبه من ياخذج جسد بدون روح گبل يطگج بمره مثل ابو سمعت متزوج ثلاثه

ست رافده گالت لا بس ثنين الشيخه جوريه مرته الجبيره ام مشعل عدها اربع ولد وبنات ثنين ومشعل اكبر واحد

وخزامي مرته الزغيره عدها ولد واحد اسمه صياد ما خلفت غيره گالو مسويه حادث ومعد تحبل وعبن عدها بس الصياد مزوجته من عمره 15 سنه وعنده ثلاث نسوان

صدت عليها مهره گالت خايبه اني راح اصير جنتهم وما اعرفهم بگدج

ردتلها رافده گالت غير گعدت يمهن وعرفت سيرة حياتهم كلها ومن هسع اگلج الشور والگول ومفتاح الخزينه كلها بأيد الشيخه خزامي ام صياد

نظال گالت يهل صگعه بعده زغير ومزوجته ثلاثه

گالت رافده اي وتگول اذا يريد النوب اخذله وعنده 10 ولد يمكن مدري اكثر ونسوانه كلهن ختيار ابو وامه ما اخذ على حب

نظال گالت يبوو اذا مو على حب ومخلف 10 عجل شگد يخلف لو ياخذ على حب

ضحكت رافده گالت بس ما شفت هيج ضراير متصافيات وسالفتهم وحده الضاهر صاگرهن صگر

مهره گالت اشو ما شفتهن

ردتلها رافده شبيج البنات الثلاثه الي گاعدات جميع بصف خالتي شكحه

ديالا: خلصن حفافه وهنه يحجن عن العشگ والحب

وعن بيت الشيخ

گالن يالله يبنات اطلعن برا عاد اجه وكت الشيره

ليال: ما اطلع اني اعرف الشيره اعرف شراح تسون

نظال گالت يمه يمه

ضحكت مهره گالت اي يعرفنها علمتهن النضافه من وكت تا يتعودن ينضفن نفسهن

بس وجوهن ممنوع

نظال گالت هنه ما بيهن شعر ما شاء الله

ردتلها مهره اي طالعات على امهن

كملن رجلين مهره واديها شيره

عاد طلعنه

ليال: سوينه الحفله مال الحنه لمهره

خلصتها كلها بجي وبنوات خالاتها يغنن يريد يضحكنها اني حاطه مسجلي بحضني واشغللهن اغاني على ذوقي وما اخلي احد وحده تلمس المسجل كمت اتفيك

اجه جاهد شاورني گال ماجد بالمطبخ الغيداني يناديج انطيت ديالا المسجل گلتلها تحرسينه بروحج

دحگت ورايه اخاف احد يشوفني عبن هوه منبهني ما اخلي احد يعرف شگالي

رحت المطبخ الثاني صافطين بي غراض جديده ومحد يفوتله مابي ضوء بس الگلوب الخارجي مال المخزن يعكس عالشباك

لگيته واگف بصف الشباك يدخن

ابتسم من شافني

گتله ها شتريد

لزمني من ايدي گال راح اروح هسع اطلبج من ابوج

اذا صار وافق ان شاء الله

من يجي ياخذ رئيج لا تبعرينها وترفضين

هزيت راسي بـ لا ما ارفض اوافق اريد ادرس ابغداد

كيف وجان يضغط على ايدي وصافن بوجهي

گتله ماجد شنو يعني العشگ

ابتسم گال ليش تسألين

گتله امانه احجيلي شنو

بلل شفايفه گال العشگ

من ترتاحين الشخص وتشتاگيلة

وادحگين علي تتأملين ملامحة

تحلمين بي واذا شفتي تفرحين

وذا ما شفتي تضوجين

وذا غاب عنج تبجين وتحزنين

تنتظرينة وتعدين ايام غيابة سنين

تتلگينه بلهفة وگلبج يگوم يدگ سريع

ما خليته يكمل كلامه صرخت وحطيت ايدي على اثمي فتح عيونه گال شبيج

هزيت راسي بعدم قبول

گال شبيج ليال احجي عصرت اديني گتله اني من تروح اشتاگلك واكيف من تجي

ابتسم گال اي كملي

دنگت گلت ومن رحت ذاك اليوم بجيت وراك

گال تحبيني ليال شو دحگي عليه تحبيني

هزت راسي بـ اي

لزمني من وجهي وباسني من اثمي

ما اعرف بوكتها ما ضجت منه ولا عصبت

ظليت ساكته مجمده مثل الصنم وارجف

حضني وشمني من رگبتي

گال اني اعشگج حد الهيام معذبتي احبج

گامن اديني يرجفن شاف حالتي مسح وجهي وعدل شعري گال روحي لا تخلين احد يحس عليج اروح اطلبج من الملا ويوم عيد من يگلي اخذها

باسني من عيوني وطلع

ظليت بالمطبخ فتره استوعب نفسي

ورجعت عالحفله

ديالا:اخذت مسجل ليال ضميته البناويت كل وحده گامت تجر بصفحه خفت يكسرنه وتموت ليال

ضميته بالحجرة وجان ارجع شفت باب حجرة ابويه مفتوح رحت تا اسده وصلت الباب

واسمع ابويه وماجد يحجون

ابويه يگله كل عقلك ماجد

اطلب مهره هسع وابن الشيخ باجر من يجي يزف اگله ما الك مره يمي

وانته اخذ مهره بعبايتها وتدري شگد اعزها بس عبنها تناسبك جايني على ليال يا ماجد شجاك يابه شجابها عليك هاي طفله ما ازوجها مستحيل ما تناسبك يابه انسا الموضوع ظل ماجد يتوسل وماكو ابويه قافل طلع منه وهو متعصب ومقهور الدمعه تلالي بعينه

شافني بلع ريگه گال ديالا سمعتي الحجي

هزيت راسي بـ اي

گال امانه لا تحجي لحد وخاصة ليال

گتله ميخالف ما احجي

ليال:اليوم عرس مهره وماجد من الصبح ما شفته منتظرين الزفه تجي كل شويه اطلع برا تا اشوفه وماكو

مهره طلعت اجنن نصبتها نظال

اجت الزفه صوت الهورنات مدري وين يوصل

سيارات جثيره ومشعل بأول سياره مزورقها

حدرو من السياره زافينه اخوانه وابو الشيخ يمشي بصفه والهلاهل ترگع والجگليت واخو الوحش ابو شوارب طالع حلو اليوم يمكن سابح

شايل سلاح ويرمي ويهوس مكيف

اجه ماجد يمشي عليهم وتلاگهم هاذ منين طلع اشو ما شفته من اجه كيفت

فات مشعل مكيف لابس زي عربي گعد يم مهره شويه واخذو صور جايبين كامرا وكلنه اخذولنه صور

گادها وطلع وگف ابويه بالباب باسها من راسها حضنته وگامت تبجي گبعها بالغتره وطلع يبجي ما گدر يتحمل والولد كلهم يبجون عليها

زفها وگام يهوسون

هاي الرادها وهاي التمناها

بنت الشيخ لأبن الشيخ جبنها

ابويه حط ايده على راسه يتشكر منهم رغم هو مو شيخ حسينه بالفخر بهاي الهوسه

ظلينه واگفين بالطرمه عماد حاضني اني وليال ويبجي ومهره تلتفت علينه ما نشوف وجها عبن مگبعه بغترة ابويه بس احس بيها گلبها ينزف

جوانه الا قفلنا الباب عليها محرجه تريد تروح

احنه هم ردنه نروح بس ما خلونه گالو شموديجن انتن بناويت ما خلو بس خالاتها ثنين يروحن

گادها مشعل وگربو من السياره ومحمد وحميد وابويه وراهم ما اندحگ على واحد اذا ما يبجي على مهره حت استاذ صائب وماجد يبجون وما يخلون دموعهم تنزل يمسحون عيونهم ويصدون عن العالم

اندحگ عليها شلون تمشي وتتعثور بالبدله عبن طويله ومشعل گايدها ويرفع البدله على كيفه تا متطلع رجليها

ما حسينه الا صار الرمي عالزفه شاجور كامل السيارات تزرفت والناس تناثرت مثل الجراد صوت الصريخ يشگ الگلب لحظات وانتهى كلشي شفنه مهره امدده بالگاع وابويه بصفها تراكضنا عليهم جانت مگبعه والدم غاشي البرگع والغتره

وبطنها تنزف كشفت راسها جنب وجها متنثر ومفتحه عينها گلبتها بدون شعور مهره مهره اگعدي مهره

صديت على ابويه صدره متنثر مغمض عيونه لزمته من ايده يابه يابه گوم

التفتت بصفي عماد حاط محمد بحضنه ويصيح ومحمد يشاخط والدم يطلع من اثمه يشاخط ويدحگ على عماد

والصياد يصيح فوگ مشعل فاتح عيونه

وصدره مليان رصاص

يتبع…