رواية غرباء ( لقاء بعد الموت ) الفصل الثاني عشر 12 بقلم اساورالموسوي

اللهم صلِ على محمد وآل محمد

تفاعلكم بعد راح التزم بالنشر اريد تفاعل، ومصمماتنه شوي حركوا ايدكم تصعد القصة

لا تنسون تعليقات عالفقرات+متابعة لحسابي+تصويت

---

مو شرط مرات اللي يبچي موجوع

مرات اللي ساكت شايل كارثة بصدره.

---

"حروب"

باوعت لامي والعصبية ترستني ترس..

:- يمااااا لا تصدگيها مو صحيح! هي اللي...

ماكملت حچايتي امي هجمت على عذراء بطراگ قوي، وثاني اجه بنص وجهها لأنها دارت، خالتي لزمت امي وتصيح.

:- عتبااار شبيييييچ؟!

امي بصياح دفعت خالتي..

:- ماتسمعين بتچ العيارة شتگول عن بتي؟! تموتون وما تلحگن اظفر من بناتي

عذراء ظلت تبچي..

:- خالة شبيچ ضدي، بتچ جايبة رجال طفر الحايط عليها، اذا ماتصدگين سأليها شتسوي هنا بهالليل جابتني احرسلها لحد يجي، وهي وياه محاضن وبوس من الحلگ...

امها لزمت حلگها حيل...

:- الله ينتقم منچ يا چذابة، بحضچ وبختچ ابو فاضل يسطرچ كون تتبلين عليَّ

هجمت امي عليها مرة ثانية، لزمتها من شعرها بعنف وهي تصيح بوجهها..

:- تاكلين خرا وتنچبون بناتي مايسون سوالفچ الخايسة هاي، روحي شوفي تربيتچ قبل لا تتهمين غيرچ

عذراء ظلت تبچي وتصيح..

:- والله العظيم خالة حروب هي الچانت هنا، انه بس طلعت وراها

:- جذابةةةةة وتحلف بالله بعد! يمه والله مو انه، هي طلعت كل ليلة تتواعد وياه هنا كلما تجي، البارحة هم شفته طافر الحايط وحذرتها منه

خالتي شهگت بعصبية ودفعتني..

:- سكتييي انتِ! لا تتبلين على بتي حتى تطلعين نفسچ بريئة

امي دفعت خالتي دفعة رجعتها ليوره..

:- لا تمدين ايدچ على بتي لطيفة ترا اكسرهاااا! بناتي اعرفهن وحدة وحدة، وهاي السوالف مو تربيتهن

عذراء تبچي وتمثل الخوف..

:- خالة عتبار دخيلچ صدگيني، حروب جابتني احرسلها

صحت وانه ارجف..

:- ولچ كافي چذب! مو البارحة گتلچ اذا تعيدينها افضحچ؟! مو واعدتيني ماتعيدينها واستر عليچ؟!

خالتي التفتت لعذراء..

:- شنو تعيدينها؟! تستر شنوووو؟!

عذراء ارتبكت بس بسرعة لحگت عمرها..

:- تقصد سالفة ولد بالمدرسة تحارش بيَّ سولفتلها

:- جذابةةةة! خالة والله وابو فاضل ماحلف بيّ چذب شفته بعيني يبوس هنا وهي واگفة وياه والبارحة هنا

اشرت على حلگي ورگبتي.

امي التفتتلي عيونها نار..

:- حروب متأكدة من حچيچ؟

:- والله العظيم يمه، والله لو اموت هسة ما اچذب واتبلى على احد، كل ليلة تطلعله والبارحة خذتني احرسها ومادري وشفتهم هيچ... لو شايفه احد لو اخواني تصير دم، جبتكم حتى تتلاحگون الموضوع

خالتي صاحت بعذراء..

:- عذررررراء احچي صدگ؟ لا افلگ راسچ بطابوگة واموتچ هنا

عذراء بقت تبچي وتلطم..

:- والله العظيم مو صحيح، هاي تكرهني من البارحة گلتلي اذا تحچين اگول انتِ سويتي هيچ

امي رجعت هجمت عليها..

:- صرتي بريئة وانتِ بنص الليل طالعة للحديقة؟! شنو طالعة تسگين الزرع؟!

خالتي لطيفة لزمت امي..

:- عتبار هدي شوي، يمكن اكو سوء فهم، لا يسمعون بالشارع توصل للزلم مصيبة هاي

امي التفتتلها بعصبية كامتة صوتها بين اسنانها..

:- سوء فهم شنو؟! رجال يطفر الحايط بنص الليل على بيتنا وبتچ تجيبه سوء فهم؟! وبتچ تتهم بتي حتى تنجي نفسها!

عذراء ظلت تصيح..

:- خالة والله حروب متواعدة وياه، وگالتلي اوگفي حرسيلي

امي كفختها بطراگ قوي وشلعت شعرها..

:- بت ال**** صوتچ تتهمين بتي وهي اشرف من شكلچ الزفر

عذراء ظلت تصرخ بصوت اعلى..

:- ماتبله بتچ ****** ومتواعدة ويه رجال يطفرلها من الحايط والله العالم شمسوي؟!

حسيت صوتي اختنگ من القهر، العالم كلها سمعت بالشارع، امي طاحتلها كتلبلا رحمة حتى نعالها نزعته، وهذيچ تصرخ.

خالتي تحاول تفك بتها من امي ماكو، امي تحچي بعصبية وغضب موطبيعي.

:- انچببببي لچ حيووواااانة بناتي ما يطلعن صوت عالي عالشارع مو يواعدن زلم بنصاص الليالي وانتِ شنو تظنين مثل سوالفچ؟!

خالتي عصبت اكثر..

:- عتبار لا تضربين بتي حتى لو غلطانة مو هيچ

:- لا والله اضربها، وهسة اضربچ تربيتچ الخايسة، دللتيها زايد حتى صارت تطبب الزلم للبيوت

:- بتي مو هيچ

:- چا شنهي بتي؟! ومنين اجه هالرجال ملك من السما نزل؟! حروب ماتچذب منا ودرب

عذراء تبچي وتصيح اعترفت..

:- والله يحبني، ما لاعب بيَّ...

ماكملت امها لطمت حلگها قوي بحيث شفتها انبطت وظلت تنزف، وهي تبچي بصوت.

امي بعصبية :- هااا طلع الحچي اويييلي على الحب، بعدچ بطول النعال ادورين حب، ويا حب هذا يطفر حايط بنص الليل؟! هذا مو حب هذا خزي

خالتي لزمت امي :- كافي عتبار راح اخذها واروح باچر وما تعيدها بعد

امي :- ولچ بلا احساس انتِ بتچ مواعدة واحد ابيتي وتتهم بتي وهاي كل قوتچ، وخري انه اربيها

ملختها تملخ امي وماگدرتلها خالتي بس ظلت تصرخ عوفيها وخري، البنات گعدن عالصوت وخالاتي الباقيات يسألون شكو.

اجه حتى تيجان يمكن چان طالع للحمام واجه عالصوت.

تيجان :- يمه شكووو ليش هالصياح؟! خالة شبيها عذراء؟

امي دفعت عذراء..

:- ماكو شي يمه ارجع لغرفتك ارتاح

خالتي :- سلامتك خالة، روح لعروستك ماكو شي

رشاش دخل للبيت..

:- شبيكم؟! يمه عندچ علم صوتچ واصل للشارع؟!

امي عصبت :- ماكو شي روحوا يلا

صفگت ايديها وطردت البنات حتى ودفعتهن داخل، گالت كلمن لفراشها، مارادن يرحن بس يخافن من امي.

تيجان راح للحمام ودخل داخل، حتى رشاش راح امي صرفته، بس ماراضين بعيونهم شك، بس بعد القائد عتبار أمر وياهو يخالف.

امي باوعت لخالتي بتحذير..

:- بعد ماكو مبيت ببيتي باچر من الصبح تطلعون لبيتكم ما اريد سمعة خايسة تنذكر ببيت سيد أكبر، ترحون بيتكم وتصخمون هناك، واذا امچ ماتوبتچ وشگت حلگچ انه اتوبچ

خالتي صاحت..

:- عتبار عيب عليچ احنه خوات اطرديني من بيتكم؟!

:- اختي على عيني وراسي، بس السمعة قبل كلشي بناتي طول عمرهم مرفوع راسهم وابوهم يتباهى بتربيتهم، ما اخلي وحدة تجيب الحچي لبيتنه، تجين انتِ بحدچ بلا بناتچ هلا بيچ، بس هالنغلة بعد ماتدخل بيتي اشگها نصين

عذراء ببچي..

:- خالة والله ماسويت شي...

امي صفگتها طراگ قوي وتحچي على كيفها..

:- اكلي خرااااا ولا كلمة ادبسزز، ولچ بعمرچ لازمة كتبي ادرس مو احوم عالزلم، طايحة الحظ سگط، يلا ولي خمدي وان سولفتي لاحد والله وبالله احطچ وصلة مسح بيدي

خالتي اخذتها وطبت داخل وهي عصبية وادفع ببتها اللي موتت نفسها بچي، عقلها على گدها شهالتفكير ياربي.

الله لا يربح كل وحدة تستهين بالشرف والسمعة، قبل لا الناس ماترحم الحرام وين والحلال، والبنية اذا طاح الحچي عليها بعد ما يسقطه ذهب الدنيا كله.

امي دفعتني بعنف من صدري..

:- وانتِ شعندچ تفترين بنصاص الليالي؟

:- والله خفت عليها فقدتها وطلعت اشوفها، شفتها وياه استغفر الله، ماردت افضحها بس ماگدرت اسكت حذرتها، وراح يحچون علينا

:- لو ساكتة وصارت فضيحة قبل چان موتچ على سكوتچ

:- والله ماقصدي فضيحة، بس ردت تتعض ردت تشوفونها حتى تلحگون الموضوع

:- الوضع ماينسكت عنه، منو هذا السگط تعرفينه؟

:- اي طالب ابن شمخون

:- هم ابن سقطون، الله ينتقم منهم ماظلت وحدة تعتب عليهم، انه اله السگط ابن السگط ان ما لقنته درس للتاريخ ماكون عتبار

راحت لبست عبايتها..

:- وين رشاش،"طلعت بالشارع وصاحت" رشاش

رشاش چان گاعد على الصبه اللي على الشارع يم صاحبه سلطان، مديت راسي وبسرعة دخلت لا يعصب رشاش، بس اسمعهم من الباب.

رشاش :- هااا يمه

:- وجعااا گول نعم

:- نعم يمه

:- نعم الله ضلوعك تعال

:- يا ساتر معصب القائد عتبار الليلة

:- تعال وديني بيت شمطون

:- شنوو؟ منو هذا يمه؟ ماكل اكل حار ومشمط؟

:- مالي خلگ شقاك، وديني يلا تعال

:- منو هاي؟ قصدچ بيت عمي شمخون؟

:- عمه اليعميك هنوب صار عمك هالسقطون!

:- اي غير احترام يمه شبيچ؟! شتردين بيتهم نص الليل؟

:- وديني واسكت

:- يمه صبري اوگفي احاچيچ، شتردين منهم نص الليل هسة

رحت درت ويه دورتهم لركن الحديقة، صعدت بلوكات ثنين اطل من الحايط اكو سدرة عالحايط كلش وكلش مفرعة، بحيث اطل محد يشوفني بالليل، باوعت بيت شمخون بصف بيت ابو سلطان.

هالحچي وصلني من رشاش بعدين ماسمعته بس اشوف حركاتهم.

امي :- اسكت ودگ بابهم لا اهجمه على روسهم بهالليل المصخم

رشاش يحاول يحاچيها بهدوء..

:- يمه زحمة شنو نص الليل واندگ الباب

:- دگه وانلصم گتلك

:- يا ياااابه غير افتهم شكو

:- شكو سنون بحلگ طالب النگس تكسرهن اله، كون تعوج فچوچه اله، اريد تكسره تكسر كون باچر الصبح حمام مايگدر يدخل

:- لييييش؟ شصاير شمسوووي؟!

:- ادفر الباب وطلعه احاچيه، واگلك كلشي بعدين

:- يمه فهميني حتى اعرف شحچي شگول

:- السگط لاعب بعقل عذيره ويطفر الحايط ابيتنه بالليل ويحاچيها

:- اياااا ناقص من شوكت وشلووون؟

:- البارحة والليلة حروب شايفتهم، ربيتها الخايسة بقه هذا الحيوان

قبل لا تسمع رد رشاش دفرت الباب برجلها حيل.

:- يمه عن الفضايح خل نتفاهم بس مو بهالوقت

:- ولك انتَ شتحس خواتك وسمعتهن مو بس عذيره، ما انام الليلة ان ماربيته

ويه حچيها انفتح الباب، وطلع طالب وهو مشوحب يعرف شكو وره الدگ نص الليل وهو توه شارد من بعد ما صحتلهم.

طالب بلع ريگه..

:- تفضلوا

امي جابته بطراگ قوي..

:- نتفضل وين يا سگط، وابو فاضل عندي زلم يكسرون ظهرك يخلوك معوق وحق هو علي دافع الباب، يكسرونك تكسر

رشاش لزمه من ياخته..

:- ولك بيمن اندگيت نگس، حليب امك اطلعه من خشمك

كسر عظمة وجهه ببوكس خلاه يترنح ويرجع ليورا، ماخلاه يطيح رجع لزمه وهشم وجهه بعصبية.

طالب يمسح بدم خشمه..

:- شبيكككم شصاير!

رشاش بعصبية..

:- لا تصيح ولك، ولا تغشم نفسك ياحيوااان

طالب :- هو غير اعرف شكوووو؟!

امي :- لا تسوي نفسك بريء بتي شايفتك

طالب :- بس ماتردون فضيحة، هدوا نحچي شوي بتكم هي صاحتني...

ماكمل اجاه بوكس محبس رشاش كسر مابقه من خشمه، انخرط بالگاع، ويه طلعة ابوه.

شمخون :- شكووو ولككككك رشاش ليش تعتدي على ابني؟!

رشاش بعصبية..

:- حضر عمامك وعشيرتك نسويها گوامه، واسأل ابنك ليش ومنو اللي اعتدى على الآخ

شمخون :- ام تيجان شكووو شمسوي طالب؟

امي :- ابنك تحارش ببت اختي، والقرآن اهلها ينگطون شر، والله يسوها دم للرچاب، وغير طافر حايطنا عليها، انه لهسة ماوصلتها للزلم، اذا حابين ماعدنا مانع وتدفع دم گلبك على افعال ابنك السگط، لا عبالك نصير ضدها لأنها بنية ابنك العايل

شمخون :- طالب ابني؟!

امي :- لا ابني انه، لا والله حشه ولدي عين مايرفعون على حرمة، تربي لو احنه نربيكم كلكم؟!

رشاش :- هذا تعدي على شرف بتنا، وبيها اكلان طين، لو تكسر ظهره وتأدبه لو ينكسر ظهرك انتَ

جر طالب من فانيلته من وره وهو يدفع برشاش يريد يضربه، رفعله قبضة ايده.

شمخون شهگ وهو يشوف الدم نازل من خشم ابنه..

:- رشاش بسسس لا تكتله، يمعودين شصاير خلي افتهم؟

طالب دفع رشاش..

:- والله ما مسويلهم شي هي صاحتلي بنفسها...

شمخون لفاه بطراگ يمكن طرش ذانه..

:- انچبببب لا تفصم ياسرسري، عرض ناس هذا مو لعب جهال

رشاش رجع لزمه من ياخته بعصبية..

:- ولك انتَ شتظنها سايبة؟ تطفر حايط بيوت العالم بنصاص الليالي؟!

طالب :- والله احبها...

رشاش دفعه عالحايط رگعه..

:- هذا حب هذا نعل على راسك، تروحلها من الباب مو مثل الحرامية تصعد فوگ الحيطان، البيوت الها حرمة وستر

امي :- ابنك لو شايفينه ولدي وعمامهم الليلة چان دفنوه بالحوش، احمد ربك الموضوع وصلني انه مو للزلم الكبار

شمخون حرفيًا نشف ريگه..

:- ام تيجان دخيلچ لا توصلوها الهم، تعرفين ابو تيجان شيسوي، والولد همين عمامه ما يرحموه، ماعدنا فلوس فصول، نعرسهم ونفضها ونستر السالفة

امي :- وحق الزهرة لو تدري عشيرتها هسة يصير بيكم عزا مو عرس، انتوا ماتعرفون شمسويتوا

طالب تمرد رغم خوفه..

:- بس والله هي همين تريدني

شمخون رجع ضربه طراگ..

:- گتلك انچب! تريدهم يكسرون ظهرك الليلة؟!

رشاش :- اسمعني زين، من هسة اذا اشوف طيفك يدور هالفرع ويم بيتنا اكسر رجليك بيدي، وتگعد معوق طول عمرك

طالب ظل ساكت وهو مدمم وجهه.

شمخون باوع لأمي بخوف..

:- انه اعتذر منچ خويه ام تيجان، ما يعيدها وانه بيدي اربيه

امي :- التربية هسة تذكرتها؟ بعد ماصار يطفر الحيطان على بنات الناس؟!

شمخون :- غلطان وانه اتحملها، ازين شاربه، بس لا توصل للرجال دخيلچ، راح تصير كارثة

رشاش بعصبية..

:- لا تخاف على ابنك منهم، خاف من عندي انه، لأن لو عادها ما اوصلها لأحد انه انفرد بي بحدي، ابتر رگبته

طالب ظل يبلعم بريگه.

امي :- اسمعني شمخون، بت اختي هم غلطانة وراح تتربى، بس ابنك اذا اجه يم بيتنه مرة ثانية والله ما يطلع يمشي على رجليه

شمخون هز راسه..

:- لا لا ابد اعتبريه مات الليلة، ما يخلي رجله يمكم، احشها حش

شمخون دفعه..

:- يلا اعتذر

طالب :- آسف...

رشاش :- مو النا تعتذر، لربك حتى يغفرلك

امي جرت عبايتها بعصبية..

:- يلا رشاش خلي نرجع، قبل لا يحسون الزلم ويصير دم من صدگ

رشاش ظل يخزر طالب..

:- تذكر حچايتي، المرة الجاية ماكو حچي

دار وجهم عنهم واجوي للبيت، ركضت نزلت بسرعة رحت داخل لا احصلي رزالة، جسمي كله يرجف، خفت تصير سالفة چبيرة.

چنت اسمع صوت خالتي ماهتميت، بقيت اباوع لامي ورشاش، هسة دخلت خالتي مگطعة عذراء كتل، حتى املخ وجهها.

تيجان لازم خالتي..

:- خالة تهدي بالله على كيفچ

خالتي :- عووووووفني ولك اشلع لحمها اللهاااا

تيجان :- شنو ماصاير مو بالضرب خالة اهدي شوي

خالتي ظلت تبچي وتملخ بشعرها..

:- تريد تموتني هالخايسة، يبووووووو خليني احرگها ولك تيجان عوفني

تيجان :- گولي لا إله إلا الله خااالة

خالتي :- يبوووو ولچ بت الحيوان بت القنادر، انعل ابوچ الا اگله يصلخ جلدچ

تيجان :- خاااالة كافي راح تلمون العالم بنص الليل

آية واگفة خايفة وترجف بباب غرفتها ولابسة دشداشة بيت كودري، مكياجها ممسوح باقيله اثر، بس تسريحتها ما مفتوحة عدل عالنص.

عذراء شافتني هجمت عليَّ..

:- انتِ السبب فضحتي كلشي

اريد احچي مالحگت سطرت خدي ولزمتني من الحجاب تجر بشعري، البنات وخرنها وتيجان صاح بأعلى صوته.

:- بسسسسسسس كااااااااافي هاي ليلة حولتوها لنكد ومشاكل عليَّ، امشي انتِ بالغرفة طبيييي

يأشر لعذراء، وهي معصبة وتصرخ، اجه ابوي ويه دخلت امي، يصيح شكو شصاير، امي لزمت عذراء من شعرها.

:- اذا ماتنچبين لا اخليچ تصيرين وصلة لحم هالليلة ويدگوچ دگ الگهوة، "دفعتها لبعيد" امشي ولي خمدي، تنامين بصفي واربط رجلچ برجلي

ابوي :- عتباااار شصاير يمكم

امي :- لا تخاف ابو تيجان عرايك بنات بينهن، الله يگطعهن مو بنات دياچة

ابوي :- هالصياح كله بين البنات؟!

:- اي شنو ماتصدگني؟!

تأفف :- صوتكم شوي بلا مصايب، عرس ابني حولتوا مشاكل

امي :- هو بس ابنك كل احنه انصرعنا، من صرع اليشلچن كون

تنهد هز راسه وراح، تيجان ركضله يودي، ماخلاه يطلع وهو عريس بس ماعافه، يمكن چان ابوي عابر يروح للحسينية وسمع.

ماهدأ الجو للفجر البنات گرگة وحچي،لهسة مايدرن شنو صاير، خالتي تكسر الخاطر شبعت قهر وبچي.

امي نومت عذراء يمها وگلتلها اذا نفس اسمعها اكسرلچ راسچ، الفجر صلينا ونمت بعد مابيَّ اگعد كلش.

گعدت بالسبعة خالتي تلم بغراضها، باوعت وانه ساكته، خذت بناتها وطلعت، خالتي لطيفة ماتسوي مشاكل مثل خالتي سلاسل هاي اول مرة هيچ يصير.

خالاتي راحن دگن الباب على تيجان وآية باركوله وكلمن خذت بناتها وراحن، بنات عمي همين مشن لبيوتهم.

گمت بتعب ونعاس بس انظف انه وشامية خطية آية همين ماتگعد ويانه، يجون ناس تباركلهم وينطوها نگوط.

اجت مرت ابوها، تسأل عن النيشان، بما ان هي بالشهرية گلولها ماكمل زواجهم غير معذورة البت.

هاي السالفة اجت تبحوش بيها مرت ابوها وإلا احنه ماعدنا هيچ محد يدخل بخصوصية احد، هيچ علمنا ابوي.

للعصر مانمت غير هالساعات القليلة وانه تعبانة ونعسانة وقبلها مانمت، رحت بيت جدي امي دزتني اجيبلها روبة.

من بعيد لمحت زلم جاين يم بيت جدي، غطيت وجهي بالعباية حتى محد يشوفني عبرت ودخلت.

اخذت الروبة طلعت ونفس الحالة غطيت وجهي، اسمع صوت تيجان يگول.

:- هلااااااا منتظر نسيتني ياخاين العشرة

ماسمعت الباقي مشيت للبيت، اللي اعرفه شالو من هنا راحوا للمدينة، هو ابنهم منتظر صديق تيجان بس اكبر منه ما مركزة بشكله ولا يوم بس من انطاني الچكليته وماذكره.

باوعت لبيت عمو ذياب، لو تدري بيَّ امي تشنقني، لازم اتحذر بتصرفاتي يمها حست وراح افتح باب ماينسد.

بنفس اللحظة اللي باوعتها لبابهم، طلع هو وباوعلي بنظرة غريبة، بسرعة نزلت عيوني....

**

قبل ساعات من الزفة...

السادة والاهل والجيران مجمعين بالحسينية، العريس گاعد بقاطه وطالع اليوم غير شكل حتى تسريحته مغيرها الحلاق.

كلهم لاهين بالسوالف، دخل رشاش بدشاشته وهيبته، گعد يم شرار..

رشاش :- هااا مدسم شبيك صافن على حلوگهم

شرار :- منتظر واحد من السادة الخيرين يتبرعلي بمرة وزواجة مرتبة

كلهم انفجروا ضحك.

سيد ناصر وهو يحرك بسبحته..

:- المرة يمي بس تكبر تدلل اخذها بعبايتها

شرار :- هلا بالنشمي عمي والله على راسي، بيض الله وجهك تجمع راسين بالحلال الك قصر بالجنة

سيد ناصر يضحك..

:- بس هااا شرط تكون باخلاق ابوك واخوانك وعمامك وجدك

شرار :- طارت المرة

ضجت الحسينية بالضحك.

يوسف :- تيجان شبيك شكلك خايف عبالك رايح امتحان وزاري مو عريس

تيجان :- اسكت اسكت خايف من شنو بلا؟

علي الزكي :- لا والله صدگ وجهك مصوفر شبيك؟

تيجان :- طبيعي من الصبح واگف

شرار :- طبيعي شنو؟ هو شسويت انتَ مدلل اليوم، حتى گلاص ماي ماشلت، ومن الصبح ليهسة كل خمس دقايق تباوع بالمراية

خنجر :- حتى العطر تلث مرات يحط وينسه هو راش

عقيل :- ولكم صدگ حط عطر ونساه ورجع حط فوگه

رشاش :- الليلة خطية اول مرة يصير رجال

تيجان :- ولك چا شني چنت قبلها؟

يوسف :- چنت مواطن صالح هسة حصلت على ترقية

ضحكوا كلهم.

سيد عباس :- تره العرس مو بس ضحك، مسؤولية يبا

شرار :- بدت المحاضرات

سيد عباس :- ولك شرير اسكت لا اشلع اذنك

شرار لزم ذانه يضحك..

:- حاضر عمي العزيز

سيد محمد بيده سبحته يفر بيها..

:- تيجان اهم شي لا تبين مرتبك يم العروس

علي الزكي :- اي ولا تسولف سوالف دين من اول ساعة

خنجر :- خايف لا يگعد يشرح فقه الطهارة بليلة العرس

رشاش :- والله اتوقعها تصير

يوسف :- اي ويگولها هسة نفتح باب التقليد

انفجروا كلهم بالضحك.

تيجان :- عاجبني احچي بالدين شعليكم

سيد مهدي :- يابه مو كلشي تضحكون عليه، مسوين اخوكم للضحك

شرار :- شيخنا اذا ما نضحك اليوم باچر يگعد يباوعلنه بحسرة

تيجان :- وليش بلا بحسرة؟

عقيل :- لأن راحت الحرية بعد

تيجان :- شنو مسوين الزواج سجن

يوسف :- هسة مو سجن بس بعد فترة، ماتگدر تطلع يم اصدقاءك، تلتهي بالمزعطة

رشاش :- اي بس عالاقل ماتگعد ادور دشداشتك، اكو من غاسلها وكاويها ومعلگا

علي الزكي :- بس كلشي يصير مشاركة بالنص، العطور مالتك كلهن يتحولن اشتراك عائلي

خنجر :- حتى البطانية تصير بالنص

شرار :- حتى النفس بعد تستأذن عليه

تيجان :- الحياة الزوجية تفاهم ورحمة ومودة، مو منو اقوى ومنو يسيطر

سيد سعيد :- مو كلها هيچ تفكر مثلك، من تجرب راح تفهم مرات معنى كلمة الحرب والعدو ينام بصفك هههههه

تيجان :- لهالدرجة هههههه

سيد نعيم :- يلا لا تخاف يمعود كلها يومين وتتعود على القفص الذهبي

شرار :- سمعوا الحكيم المجرب

سيد نعيم ضربه على علباته..

:- انچب انتَ ولك، حتى لو ما مجرب تسمع نصيحتي غصبًا عليك

شرار :- الله يعين التاخذك ايدك كربة نخل

سيد نعيم :- لو تجرب عگالي تنسه ايدي

شرار بلع ريگه..

:- لا بروح جدك إلا العگال

سيد سراج :- هذا حصري لغويث وقويسم وزويد

غيث :- انه مظلوووم

قاسم :- مضطهدين من عمي

كلهم ضحكوا.

سيد سامح ضحك..

:- اهم شي لا تتفلسف عليها چثير من اول ليلة، خليك بالمفيد بعد عمك

يوسف :- لا عمي شكله راح يطلع دفتر ملاحظات الها

علي الزكي :- هسة بالبداية خليها ترتاح، بعدين بعدين الفلسفة والتعلوم

رشاش :- صدگوا هسة كل دقيقة يگللها تدرين ابوي شيگول

تيجان:- انه هيچ؟

خنجر :- لا بس من تباوعلنا نحس اكو درس تربوي ورا هالنظرة

عقيل :- :- اي والله العظيم

سيد أكبر اجه يتلمس الفراغ، تيجان گامله ورشاش سوية فزعوله، جابوه، گعد يمهم..

سيد اكبر :- شكو الهوسة والضحك؟

شرار :- جاي يحضرون تيجان نفسيًا، وجسديًا عليك يابه، انتَ تعلمه

سيد عباس :- احسن واحد لازم يعلمه هو محمد

سيد محمد :- هو زلمة بالفطرة، وشخص متدين ومتربي عدل يعرف شيسوي زلمتنا

سيد أكبر :- بس لا تخرعون الزلمة مايحتاج تعليم، كلشي يعرف معلمه اسودي كلهم

سيد ناصر :- تره تيجان من صغره مؤدب وهادئ، ونعم التربية كل ولدك، خاص علي الزكي

علي الزكي :- رحم الله والديك عمي، لهذا مستلمينه اليوم ههههه

خنجر :- هاي فرصتنا الوحيدة

عقيل :- باچر يصير رجال متزوج ما نلگاله مجال

تيجان :- الخوة ماتغيرها لا زوجة ولا اولاد، ماكو شي يبعدنا نبقه دم واحد واخوان للموت، اهم شي صلة الرحم

شرار :- سمعوا سمعوا هاي الخوة الاصلية

يوسف :- هذا حچي باچر اول ما تصيحله مرته يركض ويخلينه

سيد محمد ضحك..

:- هاي سنة الحياة يمعودين

شرار :- لا عمي هاي سنة الزوجات مو الحياة

الحسينية ضجت بالضحك.

رشاش :- هااا عريسنا هسة جاهز لو نشردك؟

تيجان :- اشرد شني، مو رايح للاعدام

يوسف :- مبين عليك حافظ هالجملة من الصبح

خنجر :- لا والله شايفه من المغرب ديستغفر اكثر من اي مرة

تيجان :- احسن من سوالفكم السخيفة

سيد محمد ضحك..

:- خلو الولد بحاله، تره كل رجال بهاي الليلة يتوتر شوية

رشاش :- اي بس مو لدرجة تيجان جاي يحاسب نفسه على كل نفس يتنفسه

سيد ناصر :- اسمع مني يابه، المرية بهالليلة بس تحتاج تطمين، مو سوالف وتعقيد خليك طبيعي والباقي يجي بحده

تيجان هز راسه..

:- ان شاء الله، اكيد

سيد عباس :- والزواج يبويه عشرة عمر مو ليلة وتخلص، اذا اكو مودة ورحمة كلشي يهون

يوسف :- هااا سمعت لو بعد تريد محاضرة؟

تيجان :- لا بس اريد اعرف شلون اسكتكم

رشاش :- مستحيل، الليلة انتَ الضحية الرسمية

كلهم ضحكوا، سيد اكبر تدخل.

سيد اكبر :- اسمعوا يابه، مو بس تيجان، كلكم اسمعوا المتزوج والبعده ما متزوج، لأن هاي سوالف زلم ودين، مو سوالف ضحك بس

سكتوا الكل حتى شرار عدل گعدته.

سيد اكبر :- اهل البيت عليهم السلام ما خلوا شي بحياة الانسان الا وعلمونا آدابه، حتى الزواج وهاي الليلة الاغلب يستحي يحچي بيها، مع انها عبادة اذا صحت النية

سيد ناصر هز راسه..

:- صحيح، ولهذا النبي صلى الله عليه وآله گال ما بُني في الإسلام بناء أحب إلى الله عز وجل من التزويج

سيد اكبر :- صل الله عليه وآله، اول شي يا ابني لا تدخل عليها بعصبية ولا قوة ولا استعراض رجولة، المرة بليلة عرسها تكون خايفة، حتى لو مبينة قوية

سيد عباس :- صح لسانك بعد عمك، وعن أهل البيت عليهم السلام، مستحب الرجل يلاطف زوجته ويطيب خاطرها، مو يفجعها

سيد اكبر :- اي والإمام الصادق عليه السلام يوصي بالمودة والرحمة، مو القسوة ترى بعض الجُهال يحسب الرجولة شدة، وهو مايدري ممكن يخلي ببنية الناس خوف يظل سنين

وثاني شي لا تستعجل بأي شي، اكو روايات تستحب الوضوء والصلاة ركعتين قبل الدخول، والدعاء لله يبارك بينهم ويرزقهم الذرية الصالحة

الشيخ مهدي :- اكو رواية عن الإمام الباقر عليه السلام، من المستحب يگول "اللهم ارزقني إلفها وودها ورضاها بي"

سيد محمد ابتسم :- يعني لا داخل عبالك فاتح معركة

ضحكوا بخفة.

سيد اكبر :- المرأة يااولادي امانة، مو بس حق الك عليها، الك واجب تجاهها لا تخجلها ولا تعيب على جسمها ولا شكلها، هاي كلها تبقى بگلب المرأة

رشاش :- ايي والله هاي مهمة

سيد اكبر :- اي مهمة، لأن بعض الرجال لسانه يجرح اكثر من ايده

سيد ناصر :- خلي ازيدكم علم وعن أمير المؤمنين عليه السلام يگول، داروهن على كل حال، يعني المرأة تحتاج صبر واحتواء

سيد اكبر :- وبعد شغلة هاي العلاقة مو بس شهوة، اذا نويت تعف نفسك وتعف بنت الناس وتأدي حقها تصير عبادة وتؤجر عليها

سيد سعيد :- احسنتم عطر الله انفاسكم، ولهذا الروايات تأكد على التسمية وذكر الله حتى يكون البيت مبارك والنسل مبارك

سيد اكبر :- اي ومو بس بهالليلة، بكل حياتكم البيت الما بيّ رحمة واحترام حتى لو بيه فلوس ما يسوه فلس

يوسف :- خوش حچي والله ربي يطول بعمركم

سيد اكبر :- واسمعوها مني زين المرأة مو خادمة جبتها حتى تتحكم بيها، ولا ضعيفة تكسرها هاي شريكة عمر، وبنت ناس ربوها وسلموك ياها بثقة

حط ايده على كتف تيجان..

:- واذا يوم ضاقت بيها الدنيا، لازم تلگاك انتَ الأمان مو السبب بالخوف، الرسول صلى الله عليه وآله چان يساعد اهله ويلاطفهم، مو يستكبر عليهم

سيد عباس :- اهل البيت عليهم السلام حتى يوصون بالستر بين الزوجين، اسرار البيت تبقى داخل البيت

سيد اكبر :- واكبر غلط يسويه الرجال يسمع سوالف الشوارع والناس ويطبقها على بنات الناس، لا تاخذ دينك ورجولتك من سوالف الجُهال

رشاش :- وصلت الرسالة يابه، بارك الله بيك ويحفظك النا يطول عمرك ان شاء الله

سيد اكبر :- لا والله بعدني ما خلصت اذا الله رزقكم بنات الناس بالحلال، اتقوا الله بيهن لأن الدعوة المكسورة من گلب امرأة مظلومة تخوف

سيد اكبر ابتسم لتيجان حتى وهو مايشوفه..

:- واليوم ياابني مو بس ليلة فرح، اليوم تبدي بمسؤولية وعشرة عمر، فخلي اساسها رحمة حتى الله يباركلكم بكل خطوة

تيجان هز راسه..

:- ان شاء الله يابه نصايحك بگلبي تنحفر نيشان، مايوم وصيت ونسيتلك نصيحة، دوم تبقه محفورة ببالي

سيد اكبر رفع ايده يندعي..

:- الله يوفقك يابه ويوفق كل شباب المسلمين للحلال الطيب المبارك بحق صاحب الزمان

كلهم حطوا ايدهم على راسهم..

:- الله عجل لوليك الفرج

سيد أكبر :- اللهم صلِ على محمد وآل محمد وبارك لمحمد وآل محمد، اللهم بارك على إمام زماننا وعجل لنا ظهوره يارب، الله ارفع هذه الغمة عن هذه الأمة

ظل يردد" لا اله الا انت سبحانك اني كنت من الظالمين"

حتى مايحسد اي نعمة هذا الذكر.

وللحفظ ردد" بسم الله الذي لا يضر مع اسمه شيء في الأرض ولا في السماء وهو السميع العليم"

"استغفرالله ﷲ الذي لا اله الا هو الحي القيوم، ذو الجلال و الاكرام، واسئلة ان يتوب علي، توبة عبد ذليل بائسٍ، مسكين مستكين، لايملك لنفسه نفعاً ولا ضرا."

**

اجه وقت الزفة، دخل تيجان للغرفة هادئة والهوسة الوحيدة هي بره، وبگلوبهم هي وياه، مو محبة او لهفة، انما حيرة وخوف من الخطوة.

سد الباب وراه بهدوء، مطفية الاضوية بس نور تيبلامب الخافت الذهبي ويضرب عالحيطان وعلى وجهها الجميل.

وگف لحظة يم الباب، ايده بعدها على المقبض، يحاول يستوعب انُ هاي الغرفة مو بس اله بحده.

رفع انظاره عليها، شافها گاعدة على طرف الدوشگ يم الچرباية، لامة نفسها بخجل، واضح الخوف عليها.

الفستان الأبيض مفروش حواليها بشكل بريء، رغم الضوا الخافت بس ملامحها مبينة، وجناتها الحُمر تلمع.

ارتبك بسرعة ونزل عيونه للأرض، حس روحه ما يعرف وين يباوع، حتى انافسه صارت ثگيلة.

تقدم چم خطوة بطيئة، غصبًا رجع رفع عينه إلها وانسحبت منه الكلمة بلا شعور.

:- ما شاء الله...

انصدم من نفسه اول ما سمع صوته عالي بالغرفة، ارتبك ، باوع لغير جهة بسرعة وكأنه يريد يتهرب من الموقف.

كل الگدر ينطقه هسة..

:- الله يبارك الچ

ماحچت ولا حرف رجع يلطف الجو..

:- لازم نگوم نصلي ركعتين قربة لله تعالى، حتى يتبار... سكت ماكمل كلامه.

وهي تگطع باصابعها وترجف، خايفة ومرعوبة، وهمين ماتعرف شلون تگله عليه الشهرية وماتعرف تصلي غير حروب علمتها چم شغلة وماحفظتها.

وگف مكانه محتار، وكل رهبة الليلة راحت من باله، وما بقه بباله غير شلون يطمنها.......

**

"صقيل"

صوت امي وراه خمش گلبي خلانه نلتفت ثنينه، واگفة بباب الهول، عيونها علينا ونظرتها حادة بطريقة خلتني ابتعد عنه بسرعة.

:- صقيل شنو وگفتچ بالطارمة ليهسة؟ ادخلي داخل

حسيت دمي صعد كله لوجهي من الخجل، تصرف امي طرده اله، رجع ليورا واحترم وجودها فورًا.

:- عذرينه عمتي چنه نتحاچه، اني اخرتها

امي ماجاوبته، بس ظلت تباوعلي بنظرة ضايگتني، كأنها تگول يلا داخل لا اگطع الشحاطة على راسچ.

طبت جوه ، بلعت ريگي احس نفسي صغيرة گدامه التفتلي وهمس..

:- شكلها ضاجت مني، يلا اني اروح احسن

:- لا تاخذ عالحچي، ما تقصد بس هي تخاف عليّ من حقها

باوعلي بنظرة هادئة ريحتني رغم الاحراج اللي صار.

:- اي من حق طبعًا، يلا اودعچ واروح

ابتسم بخفة، ماعرفت شجاوبه، بس هزيت راسي بخجل منه، هو هم بعده ما مستوعب شگد قربه يأثر عليَّ.

تشجعت وگلتها..

:- تگدر تبقى اذا تريد

ضحك بخفة وهو يرجع شعره ليورا..

:- لا عندي شغل تذكرته هسة، يلا رايح

مد ايده اخذ ايدي، باسها بهدوء وباس جبيني بسرعة خاطفة.

:- تصبحين على خير مرتي

غمزلي بخفة، گلبي دگ بعنف من الكلمة، حتى بعدني ما متعودة عليها، حتى مارديت ولا كلمة، راح طلع وهو يلتفتلي آخر نظرة، ظليت صافنة بمكانه لثواني، لمن صوت امي رجعني للواقع.

:- هاي بعدچ واگفة؟ ادخلي

دخلت وراها للبيت، اول ما سديت الباب دارتلي بسرعة، وجهها كله غضب.

:- هالرجال ما يستحي على شيباته شنو هالتصرفات؟!

انصدمت من حچيها..

:- يمه شبيچ شسوه يعني؟

:- عبالچ ماشفت والله فلا يستحي ولده بگدچ

:- شنو هالكلام ماما غير صار زوجي

رفعت صوتها بعصبية..

:- اييي زوجچ؟! هذا اللي فرحانة بي رجال كبير ويحضن بيچ ويبوسچ بالحوش؟!

:- ماما زوجي صار ومن كبره هو، لا تكبرين الموضوع

:- لا والله انتِ اللي مستخفة بعقلچ، من هسة هيچ شراح يسوي بعدين؟! هذا ما أمنچ دقيقة يمه

عصبت اني همين..

:- طبيعي ينكسر حدود بيننا، خطيبي صرت حلاله اني شبيها يعني؟

:- اي طبيعي عندچ لأنچ ماعندچ حياء بعد، خجل ماكو!

انقهرت من كلامها بشكل وجعني..

:- مااااامااااا

:- لا تصيحين فوگ ما كسرتي گلبي وجبتيلي هالشايب، وبعد تريديني اسكت على تصرفاته؟!

ضجت حسيت الفرح اللي قبل شوية انطفى كلش داخلي.

:- لا تغلطين عليه ماما صار نسيبچ عالاقل احترمي من سنچ، توه طردتي عيني عينك

:- وادافعيله بوجهي همين؟!

:- لأنچ جاي تظلميه

:- اي طبعًا اني الظالمة وانتوا العشگ الطاهر

عضيت شفتي حتى ما ابچي گدامها..

:- ليش كل مرة تخلين فرحتي تنتهي هيچ؟

:- لأن فرحتچ هاي راح تبچيچ بعدين

سكتت اباوعلها لأول مرة بحياتي حسيت الحچي بينا مايوصل، امي ماعادت امي.

هزيت راسي..

:- تمام

اصيل :- صدگ تگول ماما زوجها

عصبت اكثر..

:- انتِ اسكتي لا ادافعيلها

درت وجهي بسرعة قبل لا تشوف دموعي، ومشيت لغرفتي، صوتها وراي بس ما التفتت.

:- تعااااي وين رايحة مو احچي وياچ

ماهتميت دخلت الغرفة وصفگت الباب قوي سندت ظهري عليه، دموعي نزلت غصب حتى بيوم فرحتي امي ماگدرت تفرحلي.

گمت سبحت وبدلت، ما مشطت شعري ولا سشورته، فتحته ينشف من وحده وامشطه، واني ادهن ايديه بمرطب سمعت صوت مسجات.

رحت شفته هو، ظلينه نسولف، كل حديثنه عادي نتعرف واحد عالثاني، ظليت سهرانة ماگدرت انام، نمت الظهر كلش بعد ماگدرت اقاوم التعب.

بالليل حچينا مكالمة ماعرف شجاني بالخجل وياه، بس كلش محترم وشخصيته تجنن.

اصيل ازوجت وشبعت بچي عليها اني وفاطمة وامي كذلك، هي همين بچت هواي، بعد ما ودعناها رجعنا للبيت.

احسه صار موحش، امي ضاجت كلش عبالك اصيل ميتة گعدت تبچي بالصالة.

رحتلها شبگتها..

:- ماما فدوة لا تبچين يروحي، هي بيت زوجها ماراح تروح للأبد تعوفنه

امي ببچي..

:- ماعندي غيركم، مكانها فارغ، يمه ولچ انتِ همين راح ترحين، آخ گلبي يامعزتكم يمه لو تدرين شنو انتِ عندي

حضنتني قوي وظلت تبچي وهي تگول بحرگة..

:- ولچ صقيل گلبي مجمر عليچ، دعيت عليچ مو من گلبي، خفت عليچ تندمين وتدمرين، يكبر زوجچ وانتِ بشبابچ ويبرد شعوره وانتِ تحتاجين واحد بعمرچ يفهمچ

ظليت ابچي وياها بدون ما اجاوبها، صارلها شگد محملة عليه، وخرتني امسح بدموعها وفاطمة تبچي ويانه.

اجه خليل ضايج راح لغرفته، نفس حالنا احنه ربينا بدون اب وتعلمنا واحد يحن للثاني ونفدي ارواحنا لبعض.

واليوم اصيل مكانها فارغ، سريرها راح يبقى مرتب والليلة بحضن زوجها، بالگوة نمت.

يوم ثاني اتصل عليَّ من مكتبه بالشغل، سولفنه شوي وقفلته، واعدني نطلع ونسولف لأن عنده شغل.

بفترة الخطوبة بديت اتعرف عليه اكثر، مو كلشي چان سهل بيناتنا، بالبداية چنت متوترة وكلشي جديد عليَّ، وهو همين يحاول يتعامل وياي بهدوء حتى ما يضغطني.

شي ورا شي صارت بينا احاديث اطول، مكالمات بالليل، ومواقف بسيطة خلتني ارتاح اله شوي شوي، رغم كل الخوف اللي بداخلي.

امي بعدها متأثرة وما متقبلة الفكرة بالكامل، بس بمرور الوقت خفت حدتها شوي، صارت علاقتي بيها ترجع تدريجيًا رغم الزعل اللي ظل بينا.

هو حاضر بكل التفاصيل، يدزلي كلام يشجعني واني ادرس، ومرات هدايا بسيطة تخفف عني ضغط الامتحانات، حتى لو ما اعترفله بمشاعري بشكل واضح.

بين زحمة الدراسة وخوف امي وضغطها عليَّ، بديت احس اني متعلقة بيه اكثر من ما توقعت، مو لأنه مثالي، بس لأن وجوده صار جزء من يومي.

مرت الأيام بهدوء ، لحد ما انتهت امتحانات نصف السنة، وبدينا نقترب اكثر من فكرة المرحلة الجاية وهي الزواج.

امي متحلفة بيَّ اذا ماجيب درجات عالية راح تملخني.

رحت اخذت النتيجة ناجحة والحمدلله، طرت من الفرحة اريد اروح افرح امي وهشام، طبيت للبيت وصحت.

:- مااااااامااااااا

امي اليوم راجعة من دوامها من وكت علمود نتيجتي..

:- هاااا ولچ صرعتيني! بشرررري!

:- راااااااااسبة يبووووووو

امي انصدمت..

:- صدگ تحچين والدرسته الچ راااااااح!

ضحكت بفرحة..

:- لا مااااااامااااا ناجحة ماراح تعبچ

حضنتها قوي تعلگت برگبتها وهي تضحك من كل گلبها، وخرت عنها وطرت للمبايل اخابر هشام.

اجاني صوته..

:- نعمتي الصغيرة

:- يااااااا الله هشاااام اني نجحت! نجحت! نجحت! سويتها! سويتها!

:- هههههه عفية عليچ سباعية هاي بنيتي القوية الشاطرة

:- اريد هدية

:- كل هدايا الدنيا اجيبلچ، تدللين

:- يالله اني كلش فرحانة، گدرت احقق انجاز هالمرة درست وتعبت، امي ماتركتني ولا لحظة

:- ان شاء الله من تفوق لآخر، شدي حيلچ لآخر السنة بعد

:- وانتَ ماقصرت شجعتني، شكرًا لكلشي حلو ولطيف سويته الي

:- ادللي عيوني الصغيرة

:- امووت على هالكلمة هههههه

:- واني بعد، يلا امتحانات اخر السنة ادرسچ اني وانتِ عندي ابيتي

اختفت ابتسامتي..

:- عزااااا صدگ تحچي؟!

:- اي صدگ احچي لازم نباشر بتحضيرات العرس، شهر صفر وخلص امتحانات وخلصتي

:- بس احنه اتفقنا اني وياك لنهاية السنة اخلص ونتزوج

:- صقيل خلينا صريحين، هذا عمرچ اللي ينتظر بس عمري لا

:- يعني اشهر بس عمرك راح يركض شنو هالحچي؟

:- ايي ولأن اريدچ عندي بأسرع وقت

:- اي بس اني ما راح اهرب

:- ادري بس تعبت من الانتظار

:- وهسه استعجلت عليّ؟

:- اي كلش

:- هشامممم

:- وشبيها الكلمة؟

:- احس جاي تضغط عليَّ شوي

:- مو قصدي اضغط عليچ، بس متشوق لحياتنا تبدي

:- وشلون تبدي بلا؟

:- اگعد والگاچ يمي، ارجع الگاچ بوجهي، اتغدا وياچ، اتعارك وياچ، كلشي وياچ

:- هههههه حتى العركة حاطها ضمن الأحلام؟

:- اكيد هاي اساس الزواج

:- لعد خوش مستقبل ينتظرني

:- لا تخافين، تجين مدللة عندي

:- اممممم

:- هاي الاممم ما مطمن الها

:- لأن بعدني اريد اكمل السنة براحتي

:- وتكملينها، منو گال لا

:- وانتَ كل يوم تگلي يالله يمته تجين لبيتي

:- لأن بيتي ناقصه روح

:- صاير شاعر اليوم

:- لا هاي الحقيقة

:- هشام

:- نعمتي الصغيرة

:- اذا تزوجنه وطلعت نكدية شتسوي؟

:- مستحيل

:- ليش بلا مستحيل؟

:- لأن حتى نكدچ يعجبني

:- كذاب

:- اقسم بالله

:- يبووو لا تحلف

:- تمام ما احلف، بس هاي الصدگ

:- واذا بيوم ضوجتك؟

:- اتحمل

:- واذا عصبت عليك؟

:- ادللچ

:- واذا صرخت؟

:- اظل اباوعلچ لحد ما تهدين

:- واذا بچيت؟

:- هنا اموت

:- هشاااام ليش تحچي هيچ؟

:- لأن هذا اللي افكر بيّ

:- ترا انتَ كلش متعلق بيَّ

:- متأخر عرفتي؟

:- لا من زمان ادري

:- وانتِ صقيل؟

:- هااا شنو اني؟

:- ما متعلقة بيَّ؟

:- يمكن

:- شنو يمكن؟!

:- لا تغثني هشااام

:- اريد جواب واضح

:- اييي متعلقة، ارتاحيت؟

:- كلش

:- غرورك صعد هسة

:- خلي يصعد، من حقي

:- لا والله

:- هههه صقيل

:- نعم؟

:- انعم الله عليچ، حبيت صوت فرحتچ اليوم

:- وانتَ هم فرحتك مبينة

:- لأن نجاحچ نجاحي

:- شگد حلو تحچي

:- احلى منچ ماكو نعمتي الصغيرة

:- هههههه باع شلون گلبها غزل

:- خلي تتعودين، هاي بس البداية

:- يمعود استر علينا شأكووو بعد

:- شنو مستحية؟

:- هواااي

:- ليش؟

:- مادري من اسولف وياك استحي

:- شسالفة رغم صارلنه فترة؟

:- اي

:- اممم حلو

:- شنو هو الحلو؟

:- هاي الرجفة بصوتچ تعجبني وتجذبني

:- هشام بسك كااافي عاد

:- لا مو بس

:- امي راح تسمعني وتكتلني

:- خليها تسمع، اگللها بنتچ تحبني

:- لاااااا

:- ههههههههه

:- ترا والله العظيم اسد الخط

:- لا يابه كلشي ولا ترحين

:- امممم ثگيل

:- وعاشگچ

:- امممم مغروووور

:- اي بسببچ

:- يلا روح اشتغل احسنلك

:- اطرديني؟

:- اي

:- بعدني ماحچيت شي

:- شنو شعندك؟

:- اشتاقيتلچ

سكتت ماجاوبت، عضيت راس اصبعي واني اسمعه.

:- هااا اشوف سكتي؟

:- واني هم

:- انتِ شنو؟

:- هشااام لا تخجلني

:- لا لا كلشي ولا خجلچ، صقيل

:- نعم

:- جايچ للبيت اليوم نتناقش بموضوع العرس

بلعت ريگي بتوتر..

:- تمام هلا بيك

:- يلا اخلص شغلي واجي

:- خوش بيباي

:- في امان الله

سديته منه وماعرف شيصيبني من احاچيه ارجف واتوتر، واخجل، مع ان الخجل هاي بس يمه.

بالليل اجه لبيتنا، امي رحبت بي بشكل طبيعي وخليل سلم عليه بدون تكشير، لأن شافوه شخص محترم.

بعد سوالف شوي گاعدين بالصالة التفتلي هشام..

:- ممكن احچي وياچ شوي؟

باوعت لأمي هزت راسها..

:- روحي

توترت بدون سبب، بس هزيت راسي گمت مشيت گدامه تبعني بلا كلام، توجهت لغرفتي اول مرة يدخلها.

دخل وسد الباب وراه، باوع حوالين الغرفة وابتسم..

:- اممم هاي غرفتچ اذًا

:- اي شبيها؟

:- تخيلتها غير شكل

:- شلون يعني؟

:- مادري يمكن تخيلتها اكثر فوضوية

خزرته..

:- عيب عليك ترا اني مرتبة

ضحك وگعد عالسرير، ظليت واگفة متوترة..

:- تعاي گعدي شبيچ واگفة شنو بالتحقيق؟

گعدت بطرف السرير بيني وبينه مسافة، ظل يباوعلي شوي وبعدين تنهد..

:- صقيل لازم نباشر بتحضيرات العرس

:- هسة يعني؟

:- اي هسة

:- هشام انتَ كلش مستعجل

:- لأن اريد يلتم شملنا بأسرع وقت

:- بس اني اريد اكمل هالسنة

:- تكملينها عندي

:- هشام لا تبدي

:- بشنو ابدي؟

:- سالفة انتِ عندي وادرسچ ومدري شنو

:- ليش؟ مو اني مدرس زين

ضحكت بخفة..

:- مادري والله

:- ادرسچ واحاسبچ همين

:- لاااا ما ناقصة يابويه

:- متخيلة شلون؟ اني وانتِ وطاولة دراسة بالليل، نصير عبالك فلم رومنسي

:- لا عبالي فلم حياتي الجاية

ظل يضحك، سكتت صار يحاچيني عن ترتيبات العرس واني نص سمعي وياه ونصه الثاني ويه دگات گلبي.

كلما يگول بيتنا او غرفتنه ارتبك اكثر، فجأة مد ايده لشعري الملفوف.

:- ليش لامته؟

:- يعني شسوي اخليه مفلول؟

:- اي احلى

بلحظة فتح الربطة بهدوء، شعري نزل كله على ظهري، حسيت وجهي احترگ من الخجل.

ظل يمرر اصابعه بين الخصل ببطء وهو صافن بيّ..

:- اخخخ شگد احب شعرچ

ماعرفت شگول، ظليت ساكتة، احس روحي صعدت والنبض صار بلعومي، الحرارة شعلت وجهي..

:- تعرفين شنو اول شي شدني الچ؟

هزيت راسي بلا.

ابتسم بخفة وهو ياخذ خصلة بين ايده..

:- شعرچ، لا تفكرين يوم من الايام تگصين منه سانتيم واحد، يالله شنو هالشعر

ضحكت بتوتر..

:- ليش شبي؟

:- يجنن، وانتِ... انتِ... ماتخيلتچ بهالروعة من اقرب منچ! اتمنى كل يوم يمچ وكل لحظة، بس ما ردت اضغط عليچ، انتظر يوم تكونين الي وابيتي

سكتت ماعرف شگول، احس نفسي مو طبيعية من قربه، ومن طريقته وهو يلمس شعري كأنه شي غالي عليه ومن كلامه.

قرب اكثر عليَّ، مال على شعري ياخذ نفس منه بهدوء، تجمدت بمكاني.

:- ريحته همين تعجبني، شنو هالعطر؟

ماجاوبت بلعت ريگي بسرعة، حسيت نفسي جاي اتوتر زيادة، قرب من نحري ولفحة نفسه خلت جسمي كله ينتفض، شم ريحة عطري وهمس..

:- شلون هيچ كلشي بيچ يدوخ؟! شلون انسانة بعمرچ ممكن تكون بهالروعة؟!

انتفضت وابتعدت بسرعة عنه، گمت من مكاني مرتبكة.

:- اييي نسيت اراويك كرت شهادتي

رفع حاجبه وهو يباوعلي ويبتسم ابتسامة يعرف بيها شصار وشسوه بيَّ.

:- هسة تذكرتيها؟

:- اييي

رحت بسرعة جبتها من المجر، وهو ظل يباوعلي بنظرة غريبة شكله مستمتع بتوتري اكثر من اي شي ثاني.

راح بعد ما اتفقنا انُ العرس بعد اسبوعين، والتحضيرات ما اطول ان شاء الله، مدري شجاني وافقت بس گال؟ يمكن من توتري؟!

من بعد ما تحدد موعد العرس رسميًا، حسيت الدنيا كلها ركضت بيَّ فجأة.

كل يوم شي جديد قياسات فستان، صالون، دعوات، ذهب، قاعة، تفاصيل ماتخلص، واني بالنص بين كل هالركضة وكتبي بعدهن مفتوحات گدامي.

مرات جاي ادرس واحفظ، فجأة اتذكر اني بعد چم يوم راح اطلع من هالبيت كعروس لهشام، يضيع تركيزي كله.

حتى النوم صار مو طبيعي، يا اما افكر بالعرس، يا اما اخاف، مو من هشام، من الفرحة نفسها.

احس كل ما افرح يجي شي يكسرني، وكأنُ مو مكتوبلي اعيش شي كامل بدون ما يصير بيّ وجع.

هشام يحاول يخفف عني بكل طريقة، كل يوم يتصل.

:- صقيل شبيّ صوتچ مو طبيعي؟

:- متوترة

:- من شنو؟

:- مادري احس اكو شي راح يصير

:- شراح يصير يعني؟

:- ماعرف بس خايفة

:- صقيل حبيبتي كلشي بخير لا تفكرين

:- اتمنى

:- لا تتمنين، تأكدي

رغم كلامه، گلبي مامطمن، كل ما يقرب يوم العرس توتري يزيد اكثر، حتى امي لاحظتني.

اجه يوم العرس..

گعدت من النوم وگلبي يدگ بطريقة تخوف، حسيت جسمي مرهق رغم ما سويت شي.

من الصبح خواتي ثنينهن متحمسات ويحضرن ويضحكون ويتشاقون وياي، بس امي ضايجة شكلها.

اني ما مستوعبة، كل شوي اسأل نفسي، معقول اليوم راح اطلع من بيت امي؟ معقول اليوم راح اصير ببيت ثاني؟

معقول فعلًا هاي حياتي الجديدة اللي حاربت الكل علمودها؟

بالصالون الكل فرحان، وبس يمدحون شكلي وشعري والفستان، بس اني عبالك بعالم ثاني.

كل دقيقة افتح مبايلي اتأكد ماكو شي غلط، حتى هشام دازلي.

"هااا عروستي بعدچ عايشة لو اغمى عليچ؟"

ضحكت غصب ورديت عليه..

:- متوترة

رد بسرعة..

:- اني اكثر، بس سعيد ومحد بسعادتي اليوم

:- اصدمك لو لا ؟

:- شنو شصار؟

:- لا ماكو شي سلامتك

:- يالله ماتكون مفاجئة توجع گلبي

ضحكت وسديته، ابتسمت لأول مرة براحة، بس حتى هالراحة ما طولت، من لبست الفستان وگفت گدام المراية، حسيت رجليَّ ضعفت.

هاي مو اني وحدة ثانية، ماعرفت هالعروس الكاملةوالمثالية بالشكل بعد ساعات قليلة راح تترك بيت اهلها وتروح لحياة ما تعرف عنها شي.

بلعت ريگي وعيوني امتلت دموع فجأة مو ندمانة، بس من الخوف من كل شي جديد جاي ينتظرني.

خلصت آخر لمسة بالصالون، البنات ظلن يعدلن بالفستان وشعري، واني كل ما اباوع بالمراية احس التوتر يزيد مو يقل.

الفستان ناعم وطويل بلون اوف وايت، مو منفوش هواي، بس راقي بطريقة خلتني حتى اني ماعرفت نفسي.

ام الصالون :- والله عروسة مو بشر ملاك

ضحكت بخجل بس گلبي يرجف، لزمت مبايلي اشوف الوقت، واصلتني رسالة من هشام.

"جايچ حبيبتي الصغيرة، بعد ماعوفچ للأبد مانتفارگ"

حسيت معدتي كلها انگلبت، رجعنا لبيتنا، وماطولنا حتى مارتاحيت، اجن البنات ركضن عليَّ.

اصيل :- يلاااا اجه العريس

فاطمة :- رتبي الفستان عدل

نفسي انگطع فجأة، دخلوا خواته وامه بالهلاهل وهو يضحك، شافني وحرفيًا وگف صافن، حتى اللي وياه ظلوا يحچون وهو ولا كأنه يسمعهم.

عيونه ظلت عليَّ بطريقة خلتني ارتبك زيادة، ابتسامته البطيئة هاي ما فارگت وجهه، شكله ما مستوعب اني هاي فعلًا وصرت عروسته.

ضحك بخفة بدون ما يشيل عينه عني، تقدم الي، حسيت نظرته اكلتني من كثر ما بيها اعجاب.

گعد يمي همس بذاني..

:- ياويلي صقيل شنو هاي؟

ضحكت بتوتر..

:- شنو؟

:- هاي مو صقيل اللي اعرفها، طالعة غير شكل كأنچ حور العين

:- لا تخجلني فدوة جاي اتنفس بصعوبة هسة

بعد ما صورن البنات، گام وگف گبالي، اخذ ايدي، وگفني وباس جبيني وباس ايدي، احترگ وجهي من الخجل.

حطيت ايدي بيده، حسيت شگد ايده دافية وثابتة عكس رجفتي، لبسوني البرنص ولفوني، صعدني السيارة.

الجو بارد هواي لو اني ارجف زيادة؟ احنه بالشهر الواحد والبرد يكتل، بس السيارة دافية.

صوته زاد توتري..

:- صقيل

:- نعم

:- بس دا احاول استوعب، انچ الي هسة

لزم ايدي رجفتي فضحتني..

:- نعمتي الصغيرة ليش الرجيف؟

ضحكت بتوتر..

:- مادري

:- خايفة؟

:- ايي

قرب ايدي لوجهه باس اصابعي..

:- واني موجود، شبيچ تخافين؟

:- احس اني بحلم

:- لا مو حلم، واخيرًا صار صدگ

ظل لازم ايدي طول الطريق، كل شوي يبوسها او يضغط عليها بخفة كأنه يطمني بدون كلام.

وصلنا للقاعة وصارت دخوليتي على اغنية هادئة، انغمرمت بيها من اول لحظة، حاطيلنا اغنية خليجية.

القاعة مليانة، لمحت البنات اللي صادقني وبسببهن تعرفت هشام، كزبر جلدي، رهف مبتسمة ابتسامة كبيرة، ماكو تقويم شايلته.

دانا لوحت بفرحة، ولين تصفگ بهدوء مبين بعدهن سوية، رهف عضت شفتها وسوتلي حركة قلب بيدها.

مدري ليش حنيت واشتاقيت لايامنا، لوحت الهم بخفة شوي هيچ رفعت ايدي من على الفستان.

الحضور والدخولية خلتني احس بروحي فراشة طايرة، بدخولنا هذا صرنا الأمير والأميرة.

القاعة كلها اضوية وصوت اغاني وهلاهل، والناس تفتر علينا كل شوي اجتني وحدة سلمت من اهل وباركتلنه.

كأنُ محد اكو هنا ما حاسة بس بيه، گاعدين يم بعض عالكوشة، ايده ما تركت ايدي لحظة وحدة، كل شوي يلتفتلي يباوع بوجهي كأنه ما مستوعب اني يمه فعلًا.

المصورة تحاچي وتصور، وهو ولا همه اي احد، كل شوي ويبوس بيدي.

مال عليَّ حتى حسيت انفاسه الدافية تلامس ذاني بروح عذبة ويكزبر جلدي بهاللحظات.

:- تدرين شنو اكثر شي عاجبني الليلة؟

بلعت ريگي..

:- شنو هو؟

:- انچ راح ترجعين وياي للبيت وبغرفتي

احترگ وجهي بالخجل، عضيت شفتي السفلية حتى ما ابتسم..

:- هشام عيب ترا استحي

ضحك بخفة..

:- بعدني ماگلت شي

:- واضح من نظراتك شنو جاي تفكر

:- من حقي افكر، هاي اول ليلة الي ويا مرتي

ظليت ارمش بعيوني من الخجل وهو مستمتع بتوتري بشكل واضح.

:- شبيچ حمريتي هيچ؟

:- لأنك ما تخجل واني رايحة بيها

:- هههههه لا بالعكس مستحي كلش

:- اي كلش واضح

خزرته وضحكت، قرب اكثر مني..

:- بس هم دا افكر شلون راح انام الليلة؟! راح تخليني گاعد للصبح واني يمچ، شلون انام وقطعة حلا يمي

هنا حرفيًا حسيت نفسي راح اذوب..

:- هشامممم

:- روحه وعيونه ونعمته

:- الناس يمنا

:- مايسمعون وخلي يسمعون، باباتي مرتي حلالي

ضحكت غصب، بس التوتر رجعلي فجأة، ترددت اگله او لا، ظل يباوعلي انتبه لسكوتي كأنه فهم اكو كلام عندي.

:- شبيچ؟

:- هاا ماكو شي

:- لا اكو احچي

بلعت ريگي بخجل..

:- ترا... هاي... احم... عندي عذر شرعي

ظل صافن بوجهي شكله انصدم فعلًا.

:- لااا صدگ؟!

ماگدرت الزم نفسي وضحكت..

:- اي والله صدگ

ظل يباوعلي بطريقة غريبة ما مستوعب، حط ايده على جبينه يضحك.

:- دتتشاقين؟

:- والله ما اتشاقه

:- الا اليوم وقتها هسة ليش ما اجلتيها؟!

ضحكت اكثر من ردة فعله..

:- شعليه هي قابل بيدي، لو مأجل العرس چان ماصارت بهالوقت

ظل يضحك بطريقة خلتني اضحك وياه، لأول مرة اشوف هشام هيچ مرتبك.

:- يمعودة اني من الصبح دا احسب لليلة بالدقيقة والثواني

:- هههههههههههه

:- وانتِ بكل برود والله عندي عذر شرعي

:- شسوي يعني؟

هز راسه وهو يضحك بعدها مال عليَّ..

:- يلا مو الليلة البعدها وراچ وراچ

:- هشام بسك عاد

:- آه بس حرامات هاي الليلة چانت الها طعم خاص بوقتها احلى

ضحكت بخجل..

:- عزااا صايير فاااسد كلش

قهقه بصوت ورفع ايدي باسها..

:- بالحلال حبيبتي، كله بالحلال

سوينه هواي فعاليات بالحفلة، رگصنا سوية، وكل شوي يهمسلي سوالف تضحكني غصب، حتى المصورة ظلت تگول.

:- عاشت ايدك استاذ هشام، اول مرة اشوف عروس تضحك هيچ بعفوية

كلش اخجل منه، مادري ليش بس هو لأن كل ما يباوعلي يبتسم وكأنه شايفني وحدي بكل القاعة.

التصوير استمر طول الحفلة، واحيناه كله تقريبًا، حتى خوفي وتوتري من المجهول اختفى شوي شوي.

لأول مرة حسيت يمكن فعلًا هذا اختياري الصح.

وصلنا لآخر وقت بالحفلة، الهلاهل زادت من گالوا زفة، والناس تتحضر، بقت ايده لازمة ايدي وكأنه خايف اضيع منه.

همسلي واحنه طالعين من القاعة..

:- يلا نروح بيتنه، وهناك نبدي اجمل الذكريات سوية

كلمة بيتنه رجفتني بطريقة غريبة، ركبنا السيارة واني تعبانة جسديًا ونفسيًا بس سعيدة، هشام هادئ بشكل مو طبيعي، كل شوي يبوس ايدي.

خبصوا الدنيا بالزفة لمن وصلنا بيته، اجه نزلني هو، ولزم ايدي رفعت البرنص شوي اشوف، واگف بصفي..

:- غرفتنه جاهزة من زمان

:- شگد واثق من نفسك

ضحك بخفة..

:- سنتين واني انتظر هاللحظة، اكيد جاهز لكلشي

غيرت الموضوع بسرعة..

:- ليهسة ماشفت اولادك

:- اليوم تتعرفين عليهم

گلبي دگ بتوتر، شلون راح يكونون راح يحبوني؟ هو گال مازوجت طول هالفترة لأنهم ماچانوا قابلين.

اجت امي ودعتني بدموعها، كسرت گلبي خلتني ابچي وياها، ودعني البنات وراحن همين بچن.

هشام لزم ايدي قوي..

:- نعمتي لا تبچين اني امچ وابوچ

زدت بالبچي، دخلني للبيت، شال البرنص بس ظل على كتافاتي، بيتهم كبير بشكل ملفت وفخم بطريقة مخملية.

دخلت ام هشام وراها دخلوا اثنين شباب لابسين قوط رسمي، من الشبه عرفته ابوهم، طوال بشكل ملفت، وسيمين بطريقة صدمتني لأن يشبهونه بشكل مو طبيعي.

نفس النظرات نفس الهيبة حتى الوگفة والابتسامة، واحد شعره اسود ناعم شوي وملامحه هادئة، والثاني نظراته اقوى وملامحه حادة.

هشام ابتسم واشر على ابو قاط الازرگ..

:- صقيل هاي اولادي لهيب وهذا شبيب، رحبوا بخالتكم

تقدم لهيب ابتسملي باحترام.

:- نورتي البيت

شبيب اجه صافحني بس بدون ابتسامة صوته چان هادئ بارد شوي..

:- بالمبارك عليكم

:- شكرًا الله يباركلكم بحياتكم

حسيتهم اكبر مني فعلًا، او يمكن نفس عمري تقريبًا، وهالشي رجع توتري مرة ثانية، مرتبين وانيقين وهيبتهم قوية بشكل يشبه ابوهم كلش.

هشام حط ايده على ظهري يحاول يطمني، امه واگفة تبتسم.

:- ها شنو رأيكم بعروسة ابوكم؟

لهيب ابتسم..

:- تفاجئت من عمرها، بس اختيار ابويه ذووق

شبيب بنظرة وترتني..

:- دائمًا ابونا ذويق باختيار النسوان

سكتت وابتسامتي زادت مجاملة، شبيب عيونه عليَّ بطريقة ما فهمتها! يمكن ما متقبل؟ يمكن مضايگ؟

توني احاول افهم الجو، وانفتح باب البيت، لهيب وشبيب التفتوا، دخلت امرأة بشكل غريب، لا سلام لا مقدمات، بس وگفت بالباب وعيونها علينا.

هشام تركتني ايده وتجمد بمكانه، صوته طلع متوتر بطريقة اول مرة اسمعها منه، باوعتله بعدم فهم، حتى امه واولاده ماحچوا.

:- رنا شجابچ؟!

:- اي رنا، جيت اباركلك زواجك

باوعتله بابتسامه..

:- منو هاي؟

المرة ابتسمت ابتسامة خفيفة وعيونها اجت بعيني مباشرة..

:- تردين تعرفين منو اني؟

قبل لا احچي ام هشام حچت بهدوء..

:- مو وقتها بس من حقها تعرف

هشام بارتباك لزم ايدي..

:- رنااا روحي من هنا

رنا رفعت راسها بثقة..

:- ليش اروح، خلي تعرف من حقها هاي بيتي مثل ماصار بيتها، اني مرتة الاولى حبيبتي وما عزمني عالعرس

حرفيًا انصدمت حسيت النار طفحت من ذاناتي، وطلعت من عيوني، لساني انعقد، ايدي ثلجت التفتت لهشام بصدمة ما مستوعبة، ايده اللي چانت لازمة ايدي فلتتها فورًا......

يتبع