رواية عرين الصياد الفصل الحادي عشر 11 بقلم شذرة العدوان

مــــهــــره

‏أخفيــتُ عنهــمُ دمعتِــي متعمِّـدًا

والحــزنُ رغــمَ تَوجُّعــي مــا بانَــا

أخفيـتُ كسـرًا فـي الفـؤادِ ببسمـةٍ

عمَّـــن أُحــــبُّ كأنَّــــهُ مــــا كانـــا

وبكيتُ فِي اللَّيلِ الطَّويلِ ودمعتِي

كالغيـــمِ .. تهطـــلُ قـــوَّةً أحيانــا

لشاعرها

ديالا: ملتمين كلنه جاي نتغده

ابويه گال حرام هالغده ولا بي طعم

عبن ماجد مو هين كلها گالت اي والله

عبن تعودنه على وجوده صار كل ما يجي من العسكرية يجيبلنه هدايه ويا

و24 ساعه مگابلنه

ما يروح لهله بس وكت يسبح ويبدل

عبالك من ضمن العائله انوب يتشرط اذا اكله ما عجبته يگول لا تطبخوها وكل ما شاف الگعده هدوء والكل ساكت يگول لعماد اشفت بأمل واخذتها ويخلي امل تشيل روحها وترگعها ويفتن بينهم

العصر اجه محمد وهو مخطوف لونه سأله ابويه شبيك

گاله الخدامه مال فاتن بايگه الذهب مال فاتن كله وفلوس وشاعله نار بالمخزن ومنهزمه

صبره بساع گامت تلطم وتصيح ابويه گال فاتن وابنها بيهم شي گاله محمد لا يابه الحمد لله زينين

گام ابويه خابرهم عالأرضي ما حصلهم

گاله محمد هاي الوايرات مال المخزن كلها مايعه خاف بيتهم مابي كهرباء

ابويه گاله عجل منين سمعت گاله صديقي جيرانهم واليوم اجه وحجالي ابويه اخذ محمد وراحلها

المغرب جابو فاتن وياهم خطيه حالتها حاله وجها شاحب وگوه تمشي حاطيلها كانوله وگعدت يمها صبره بدال ما تشكر الله بنتها بخير جاي تسألها شلون انباگ الذهب من يمج شلووون يالفاهيه

وين جنتي عن خدامتج زلمتج وين

جاوبتها فاتن بتعب يمه الي صار صار يولي الذهب وتولي الفلوس اهم شي ابني بخير حجي حسين گالي اجيبلج احلى منا فدوه لج

صبره گامت تصفگ بأديها گالت زين الحراس ما شافوها من انهزمت

جاوبت يمه هاي مخططه لكلشي باگت الذهب والفلوس ورت المخزن تا نلتهي بي ومحد يلحگها كافي تسألين رحمه لله اگحزي ديالا اريد امدد علوا تطلعون عني تعبانه

عفناهه وطلعنه

بالليل اجو ماجد واهله كلهم يشوفون فاتن گعدنه بالهول كلنه راحت ليال يم استاذ صائب گعدت رافعه راسها مثل الطاووس ومبتسمه

واستاذ صائب منتبه على ابويه يحجي ويا

وماجد عن غير العاده ساكت مرجع راسه عالحايط ويدحگ على ليال

ثاني يوم الضهر گاعدين بالطرمه عبن شمس

فاتن حاطه ابنها وتدهن بي زيرگون عبن امشگ

ومهره جانت تخيط شليف للتبن

واني حاطه كتبي عندي دروس

اجه ماجد گعد يم الدنگه وبلش كوان ويه فاتن

ليال جانت تسبح اجت گبالنه بالطرمه تنشف شعرها ومثل العاده تگلبه ودنگ تنفضه

جاي اكتب

فاتن تحجي ويه ماجد

ما جاوبها

مهره گالت مااجد فاتن تحجي وياك ما تسمع هيي

وهم ساكت ما رد

صديت علي ادحگله

جان حاط المخده بحضنه يدخن ويدحگ على ليال مركز بيها وهيه تنشف بشعرها

بحيث يحجون ويا و ما يسمع

لحد ما عاطت مهره لياللل امشي ولي عالصطح نشفي شعرج راحت ليال

وجان ماجد فز گاللها وجع مهره هاذ هم صوت مال انثى گطعتي الخلفه مني شبلاج

رجع راسه عالدنگه غمض عيونه بحالميه ويدخن جگاره ورا الثانيه

فاتن گلتله خيرك ابن خالتي عسما شر

جاوبها خير ان شاء الله خير اگوم اني اترخص تردون شي گلوله لا وراح

رجعت اكتب وذبيت انبطاح فاتن ومهره يعبالن ما اسمعهن زعم گاعدات بالطرف

فاتن گالت شبيج مهره تنافخين يجوز احنه متوهمين

جاوبتها مهره لو متوهمين مجان فتهمتي عليه بدون ما احجي ما شفتي شلون يدحگ عليها يريد ياكلها تعبالين بس هالنوبه كل ما يجي ينبت عيونه عليها ويظل يراقبها ومركز بيها

اني وياج ثنينه نعرف نظرات العشگ يا فاتن وهاذ نظراته عشگ وهيام من يشوفها تضيع علومه بعد ما يسمع الي حوالينه ذايب منتهي الزلمه بس يشوف ليال عيونه تلمع ويتوتر يضيع حت الحجي

فاتن گالت گولتج يعشگها صحيح لو يدور لعب تدرينه ابو نسوان

جاوبتها فاتن انجان صحيح ولا لعب لازم اوگفه عد حده ويحترم البيت الي يثق بي

فاتن گالت اذا يريدها من صدگ ليش نوگفه

عاطت بيها مهره خايبه شبييج من كل عقلج الضاهر الخدامه باگت عقلج ويه الذهب ما ادحگيله ما يرهم منين ما اگلبه

ليال طفله شجابها على ماجد ما ترهم لا عمرها ولا شكلها دشوفي شضخامته هاذ ما تطلع ليال من جوا عايشه

فاتن تنهدت گالت مدري اني ذايبه روحي وما اعرف شحجي الله يستر گلبي ما مرتاح اشوو

ليال:جنت بالصف مركزه واكتب بالي كله يم الدرس لحد ما ايد لزمتني من حنجي رفعت راسي فزيت

گتله ها استاذي

گال شبيج صافنه ليال صار ساعه اصيح عليج

گتله اسفه استاذي والله ما سمعتك مركزه بالدرس

حط ادينه عالرحله گال بنيتي الشاطره من هسع اگلج انتي الأولى عالصف

ابستمت ورجعت اكتب حيل فرحانه كل ما يمدحني استاذ صائب انتفخ واحس بالفخر احسه عبالك ابويه شگد احبه

كملنه الدرس وطلعنه وهو حاط ايده على جتفي وينبهني عالدروس ويريد اظل بهاذ المستوى

وگفت برا انتظر ديالا تطلع ولازمه الجهال طلعت ديالا ومشينه وصلنه باب المدرسة تلاگينه ويا ماجد جان لابس بنطرون وقميص لونهم اسود طالع حلو يلوگله احسن من الدشداشه گرصني من خدي ونفش شعر ديالا اجه استاذ صائب يدحگله وعاگد الحواجب وگفو بعيد يحجون وجان ياخذه ويروح

ثاني يوم من خلص الدرس استاذ صائب گلي ظلي بالصف لا تطلعين عندي حجي وياج

طلعو الطلاب واني ظليت حاطه ايدي على گلبي شصاير لو موضوع يخص الدراسة جان حجه گدام الطلاب

اجه گعد بصفي واني توترت حاط عكسه الرحله وكف ايده على خده گال ليال تثقين بيه وتصدگين الكلام الي اگوله وتنفذينة

هزيت راسي بقبول وگلت اي استاذي انته قدوتي اصدگك واثق بيك ابتسمت وگتله اريد اصير مثلك

حگ حاجبه وابتسم لزم ايدي گال عجل اسمعي ليال وبدون ما تسألين ليش

ماجد ابتعدي عنه انصحج لا تثقين بي لا تگعدين يمه ولا تاخذين منه هداية لا تحجين ويا ولا تضحكين وذا گالج اريد اوصلج عالبيت لا تفعلين ولا تنادينه ماجد گليله عمو تمام هالحجي

استغربت كلامه ليش والله ماجد حباب صح بگد الحولي بس حباب والله ودمه خفيف بس مزال طلب مني استاذي هاي تم هزيت راسي بقبول گتله تم استاذ

مسح على راسي وگال عفيه الذيبة ما يلام الملا من سماج ذيبة

ابتسمت وطلعت شفت ماجد بالباب ما سلمت عليه عفته وطلعت ظل صافن مر اسبوع واني اطبق نصيحة استاذ صائب من يجي ماجد للبيت مااگعد يمه ولا احجي ويا وذا يجيبلي هديه ما اخذها

التحق ورجع واني نفس الوضع

وبيوم الجمعة اجو استاذ صائب وماجد وابن عمهم غازي وعمامه الكل اخذو ابويه تا يروح يخطبون بنت اخو الشيخ علوان طلع غازي يريد عدهم من زمان وما صدگ صارت هالسالفه ومن اجو علينه طلبها وگالوله حياك الله انفتحله باب فرج خطيه والا هذول الناس ما ينطون بناتهم للغربة اابد

لليل ورجعو گال ابويه الحمد لله انطو ورحبو بينه

كيفنه سألنا امت العرس گال من يلتحق ماجد ويجي

يزفون ان شاء الله

ماجد جان واگف ورا ابويه ويدحگ عليه واني اصد بصفحه عنه وهاذ متعصب عاگد الحواجب ناداني گال ليال ما تجيبيلي مي گتله خلي ديالا تجيبلك وعفته ورحت ظل صافن شد على شفايفه سلم وراح

وبيوم التحاقه مثل كل مره اجه يسلم علينه وجان شايل هديه بأيده اني جنت انشر بالملابس برا وگف يمي گال ليال تعاي راح التحق

سكتت ما حجيت ويا بس شايله السله واگفه بعيد

گرب مني وجان ينطيني الهديه گال هاج هاي الج

ما اخذتها منه عفته واگف بمكانه وطبيت جوه ركض

دحگتله من شباك الصاله واگف بمكانه وصافن يدحگ عالهديه وجان يروح حت ما فات سلم على اهلي

ديالا: نزل ماجد من دوامه واليوم گاعدين من الصبح مكيفين عبن معزومين على حفلة الحنه مال غازي صادف نزوله الأربعاء گالو عجل نسوي الحنه وباجر العرس

حت ما ركزنه بالدرس هالگد ما نفكر بالحنه والعرس رجعنه بساع عالبيت نثرنه الحجره نثر وليال تبجي حايره شتلبس گلتلها البسي الفستان الي جابه ماجد برطمت ساعه وهيه تفكر

اجت مهره گالت ترا الحنه بالليل وانتن من هسع متحضرات حت غده ما تغديتن گنالها نتغده ويا فاتن من تجي

اجت فاتن ورحنه تغدينه واخيراً قررنا شنلبس وليال اقنتعت تلبس الفستان نحسب دقيقه دقيقه نريد الشمس تغيب صار النهار شطوله

اجه الليل حت ما تعشينه رحنه نبدل مهره كوت شعر ليال بالأوتي واني ما كويته عبن. گصير ما ينكوي

طلعنه نخبل بالفساتين وفاتن گامت تقرا المعوذات واتفل علينه تا تطرد العين

رحنه مشي مكيفين وصلنه بيتهم بصف بيت استاذ صائب بينهم بس اشجار الرمان الحفله ترگع مال الشباب بالثيله خطيه غازي شگد مكيف

يرگص ملخ روحه

شافنه گاال هااا عماااد حبيبي تاج راسي وباب الفرج تعال راح عماد واحنه ظلينه واگفين اندحگ

غازي يرگص ويحضن عماد وكل شوي يبوسه يگله باب الفرج انته تاج راسي انته اذا جاني ولد اسمي عماد وذا بنيه عميده ويضحك ويهز جتف طاير من الفرح ويصيح راح اخذ حبيبتي ويهلهل

ماجد مجتف ادينه ومرتاج عالدنگه يدحگ علينه وعاگد الحواجب وكل شوي يسحبونه تا يرگص ويدفعهم عاط بيهم اااحد گاللكم اني راقصه گوا* وخرو عني

اما استاذ صائب گاعد عالكرسي مرجعه ضهره ليورا وحاط رجل على رجل محد اجه يمه عبن يندلون لو تنگلب الدنيا ما يرگص

دخلنه عالبيت البنات بالهول نغني ونرگص ونصفگ وليال بس تگمز مثل الكنغر ما تعرف ترگص شفت كريمه شاورتها وراحن مدري وين ظليت اصفگ ويا البنات وارگص ،،،

ليال: ما جنت اريد البس الفستان الي جابه ماجد بس ما عندي شي مناسب اطريت البسه

جنت ارگص ومكيفه رگصي يخبل اجت كريمه گلتلي تعاي على بيتنا اشوفج شي

ما فعلت گلبي يم الحفله گلتلها خليها بعدين بس اصرت ورحت وياها طلعنه من الباب الوراني گلتلها ليش عود گالت تا بنات خالي ما يلحگنه وصلنه بيتهم

اول ما فتت عالصاله گالت اروح عالحمام هسع اجي طلعت وشويه واجه ماجد توترت ودنگت راسي مشيت تا اطلع وجان يجلب بيه من عكسي

گال اگفي ليال عندي حجي وياج

گمت افالت منه خفت گتله عفيه عمو هدني خن اروح فتح عيونه ضحك گال عمووو

گام يحجي بهدوء ولازم اديني گال اركدي يابه ما راح اكلج بس اسألج انتي ليش ما تسلمين عليه وما تگعدين اذا اني موجود وذا احجي وياج ما تردين وما اخذتي الهديه ليش احجي اسمعج

ظليت ساكته ومدنگه راسي وابلع بريگي وكل ما احاول افلت يلزمني

گرب راسه يمي گال ليال شو دحگي عليه مو احاجيج گليلي ليش هيج تغيرتي

ظل فتره يحجي ويايه ويحاول بكل هدوء ويسايسني يريد يفهم مني ليش تغيرت واني ساكته ساكته لحد ما انفجر وعاط بيا ليالللل مو زمال جاي احاجيجججج

ضغط على اديني وخضني گال احجييي

گمت ابجي ارتعبت وحدنه بالبيت وهاذ يصيح عليه گتله عفيه عمو بس هدني اروح والله بعد ما اعيدها

حضني بكل قوته شالني من الگاع وشم رگبتي واني ابجي وخايفه وادفع بي اضرب بصدره همس يم اذني گال ليال احبج احبج

شنهي تگليلي عموو لخاطر ربج

شسويتي بيه بهدلتي حالي انتي وين واني وين شوگعني هالوگعه لزم وجهي بأدينه ثنين وباسني من اثمي تخبلت گمت اضرب بأيده وادفع وما يفعل يهدني جان ملهوف ما صدگ يحصل هاللحظه

خرمشته من ايده ومن اذانه ولا عبالك يحس

جتف اديني ورا ضهري من

مسحت اثمي لعبت نفسي وابجي هدني خليني اروح ابجي واحاول افلت ادينه لافهن على خصري حتى الدم طلعته من ايده اشيل روحي وارگعها وهاذ مجلب گمت اصرخ بعلو صوتي ياباا مهره وينكم

فرني بتجاهه لزمني من رگبتي ورجع يبوسني من اثمي

وحاضني من خصري ويشم بيه من رگبتي ويهمس احبج اخذتي عگلي حت النوم سلبتي مني

ليال: تذكرت كلام مهره من حجت عن حامد اول ما حضنها بعدين نهبها خفت رتعبت گمت اصرخ بنفعال ضربت راسي بصدره اريد افلت گتله والله انته مو خوش انسان هدنيي هدنييي عيب هالحجي هاذ اليش مو حلو عيب هدنييي

والله احسن استاذ صائب منعني احجي وياك والله احسن انته مو خوش انسان هدنييي لا تنهبني اكرهك اكرهك

بس گلت هالكلمه عبالك نار وذبيت عليها بنازين لزمني من كتوفي گال صائببب صائببب هيج گلجج حذرجج مني

امسح اثمي ورگبتي وبصوت عالي گتله اي اي عبنك واحد مو خوش هدني يالله هدني

انته مو خوش وخر عني اكرهك

لزم اديني وهو يفح من العصبيه ويحاول يهدئ نفسه مركز بعيوني من شاف حالتي نهاريت واني ابجي وارجف وخايفه هدني وجان انهزم

واسمع صوته گام يكسر بالبيت ويصيح صائبببب صائببب ليش لييييش

رجعت ركض وگفت بالباب گلبي يطرد اريد انفاسي تهدئ اديني يرجفن رجليه خدرو گعدت بالگاع فتره ابجي وشفايفي ترجف نفضت نفسي وگمت فتت جوا مسحت دموعي عدلت شعري واحجي ويه نفسي اگول احجي لمهره احجيلها

رحت گعدت يم امي لا رگصت ولا رحت يم البنات لازمه عباة امي وگاعده يمها وخايفه كل شويه افز صابني رعب

امي گالت شبيج گلتلها اغفي

گالت عجل عش اجيتي حرجتي علينه تعاي نامي على رجلي حطيت راسي لا رجل امي ومكوره اديني على صدري

ديالا: خلصت الحفله و ليال ماكو اشو ختفت سألت عليها گالو يم امج بالحجره رحت شفتها نايمه على رجل امي ومتغطيه بعباة امي عماد دز خبر گال يالله نروح امي گالتلي روحي گليله ليال نايمه ما نگدر نروح مشي

رحت وكتله وجان يرجعني گال گعدوها وخن نروح

رجعت على امي وگعدنا ليال الا عجزنا وما تفعل تگعد كل ما نگعدها تگول اني كتبت وحافظه وترجع تنام وتلف نفسها

رحت على عماد انوب جان واگف يم ماجد گتله ليال متفعل تگعد فطيسه

اجه ويايه تايشيلها شال اديها واجه ماجد گاله وخر عماد متگدر انته شالها ماجد وطلع راسها صار يم رگبته وصلنه الطرمه وجان ينادي استاذ صائب گال اگفو اوصلكم بالسياره

ماجد خزر عيونه وعگد الحواجب اخذها وراح عالسياره صعدت امي وجان يحط ليال بصف امي نامت على جتفها وصلنه استاذ صائب لبيتنا وشال ليال نزلها گال هاي على هاذ نومها شلون تگعدوها الصبح عالمدرسة

گناله گوه الا تفزع العرب گام يضحك

ديالا: ثاني يوم جان الخميس واليوم يعرس غازي تريگنه وتانروح عالمدرسة اجت ست رافده

اول مره تجي گبل الدوام خير شفتها فاتت عالهول ونادت فاتن ومهره رحت وگفت بالباب اتصنت

فاتن: خير رافده خوماكو شي

رافده: منين يجي الخير متگليلي البارحه علگت بين ماجد وصائب ماجد فلش البيت علينه الا صائب ضربه وماجد يگله احمد ربك انته اخويه الجبير يعني جان هم ضربه

مهره: يهالعثره ليش شبلاهم

رافده: بسبب ليال

فاتن:دهر ليال شحاجتها يمعوده احجي عربي

رافده: ماجد يحب ليال ويريد يزوجها وصائب ما يفعل يگله طفله شجابك عليها

وماجد يگله اخذها وذا طفله اول وتالي تكبر انوب حاجي لحميد وموافق گايله تعال اخطب

مهره: هاذ ماجد تخبل مو شبلا لو يطگ ما تصير شنهي اعمه ما يشوف لو متزوج جان هسع ليال بگد جهاله وحميد لحاله يحجي حت مفتاح التبن مو بيده

رافده: اني ما اگدر اتأخر عندي طلاب المهم

توصلون هاذ الحجي لحميد اذا غايته ينطي ليال لماجد عود تا ماجد يگله تعال انطيك رافده

خل يگطع نفسه ولا يتأمل اني محد يگول عليه من اخواني حميد اذا يصير ملك ما اتزوجه

و صائب وصاني احجيلكم ماجد يريد يجي يطلب ليال من الملا گالي بلغيهم يرفضون ترا اذا انطو تعلگ بينه

مهره: والله يابه زين فاتن جاي تسمعين عمايل حميد روحي رافده على طلابج هاذ ماجد لحاله يحلم ويسولف

ديالا:طلعت ست رافده وشافتني وفاتن وراهه

لزمتني فاتن من اذني گالت سمعتي الحجي مو

هزيت راسي اي

گالت اياااج يطلع هاذ الحجي من هين اياج ليال تعرف اصگطج

ليال: ما فعلت اداوم عايشه برعب من البارحه حت ما تريگت وبس افز لحالي وروحي ذايبه

ابلع بريگي واحجي لنفسي احجي لمهره يربي لو اسكت اوف يربي انجعلك يا ماجد بالعثره

ديالا: ما فعلت ليال اداوم واجه استاذ صائب سألني عليها گتله مدري شبيها يمكن مريضه

گوه قنعنه ليال تروح عالعرس تريد تظل وحدها تگول روحو انتو استغربنه وضعها

لحت عليها مهره تحجي وجان تگول ها اني بيه صخونه كفختها مهره گلتلها كلنه راح نروح خوما تظلين وحدج امشي بدلي وتعاي اكوي شعرج واحطلج كحل

بس سمعت بيها كوي وكحل كيفت راحت ركض تبدل

لبست فستان نيلي گصير جانت فاتن ضامته ما طلعته للعرس خافت نتكاون علي عبن بس واحد جايبه

گلتلها اني ما ادير بال البس اي شي المهم مرتب ونضيف خلي ليال تلبسه

وليال خلال ثواني بدون ما تسألني اذا اريد لو لا بساع تصلخت ولبسته

اجت يم مهره كوتلها شعرها وحطتلها كحل

تخبلت ليال من شافن نفسها بالكحل

هيه حيل حلوه وعيونها كبار وبالكحل طلعت اجنن

كملنه ورحنه على عرس غازي طلعت العالم تا تمشي الزفه احنه واگفين برا يم ابويه كلنه

اجه استاذ صائب ويا شاب حلو ومرتب يشبه استاذ صائب سلم على ابويه

گله هلا بركات شلونك اخبارك الحمد لله عالسلامة

سلم علينه عرفنا هاذ بركات اخوهم الي يدرس ابغداد

گامت العالم تمشي

حرجت ليال الا اروح بالزفه وتسحل بأبويه عبن شافت البنات كلها تريد تروح

گامت تبجي اروح اخذوني وياكم

استاذ صائب گال ملا اذا تسمح اخذها ويايه خطيه سيارتي فارغه بس امي ورافده

گاله ابويه ميخالف اخذها

ليال طارت من الفرح گامت تگمز

گالي ديالا انتي هم تعاي بعدني ما گلت اي جرتني ليال وصعدنه بسيارة صائب والعالم كلها بعدها واگفه برا وغير احنه بالسيارة

گلتلها خن نحدر غير احنه صاعدين

گالت لا خاف من نحدر يبطلون لو حميد يشوفنه ويطبگن عنده لا تظلين خفيفه اركدي

ديالا: طلعت اني الخفيفه

صعدو العالم وليال تريد تطلع من شباك السيارة من فرحتها مجاي تركد بالسياره تصفگ وتفرك بأديها وتجر بفستانها تغطي رجليها مستحيه من استاذ صائب وتشد على شفايفها

وكل شوي تگلي ساح الكحل لو بعده عيني تحكني شون احكها خاف يروح الكحل

استاذ صائب حطلنه اغنيه وگال صفگن يبنات گمنه نصفگ وعاطتت شكحه گالت راسي كافي

جاوبها گال يمه عجل اذا راسج ليش ما ظليتي احد گالج جايين على فاتحه جاييين نزف يمه زفه هاي عرس

ليال: صح فرحت بالعرس وكشخت بس ما نسيت سواية ماجد

گمت انهزم منه ما خليته يشوفني لحد ما صعدت بسيارة استاذ صائب جان ماجد واگف عالممشا ويا الزلم لابس قاط وهو اطولهم كلهم

شايل مسدس گام يرمي فوگ غازي

گام يتلفت مدري شيدور صد علينه شافني وجان يخزرني واشرلي بحواجبه مدري شيريد صديت عنه بصفحه اجه استاذ صائب ومشينه

الزفه حلوه وكلها تمشي بنضام سيارة العروس گدامنه واحنه ثالث سياره

اريد اهلهل واغني وارگص بس مگدر مستحيه وخايفه شكحه تعيط بيه

لحد ما انطاني استاذ صائب الأمان گمت اصفگ واغني ويا الأغنيه وهاذ يدحگ عليه بالمرايه ويضحك

وصلنه بيت العروس بيتهم فخم جبير طابقين عبالك قلعه بس منطقتهم مو حلوه عبالك صحراء لا بيها اشجار ولا حديقه ولا زرع

دخلنه عالبيت جان مرتب وحلو

غازي فوتو ولد عمه كلهم وياهم استاذ صائب وماجد

وهل العروس استقبلو بالورد والجگليت

وادم جثيره ما گدرنه نشوف زين واگفه بالباب ما گدرت افوت من كثر الناس

اجتني مره جبيره حلوه مشنشله ذهب تذكرتها هاي الي گالت ما وراج تسلمين

گالت شلونج يبنيتي گلت هلا خاله

گالت انتي بنت من گلتلها اني بنت الملا درويش،

گالت شسمج

جاوبت اسمي ليال

بوستني وراحت

ما خلونه نطول غازي حرج الا يزف بساع يخاف لا يبطلون اهل البنت

طلعنه وجان اوصل الباب تلاگيت ويا الرجال الأسمر الي يخوف غدي هاذ شجابه دحگ عليه وجان يصد بصفحه سحب سلاح ويرمي فوگ العروس من طلعت والنسوان تهلهل وتهوس لغازي

شايف خير ومستاهلها

اهل غازي گامو يهوسون نشكر من گال اخذوها نشكر من عمها وابوها

صعدنه بالسيارات وننتظر سيارة العروس تمشي اول شي ماجد يزفله

وهاذ الأسمر بعده يدحگ عليه يربي والله يخوف

ارتبكت استاذ صائب گال شبيج ليال تحوبزين گتله

هذاك الرجال يخوف شعنده يمهم

گال وينه گتله ذاك المحترگ الي شايل سلاح ويرمي شعنده يمهم ليش ما يطردونه

ضحك گال هاذ الصياد ابن الشيخ علوان ويصير

ابن عم البنيه وهاذ بيت ابو شلون يطردونه

الشيخ طلب بنت اخو يزفوها منا

وها ترا هاذ هو الي صوب عماد

گتله والله غدي جعل ايده بالكسر كون

استاذ صائب ضحك وفر السياره مشينه

جانت زفه حلوه وصلنه بخير

العروس تخبل اسمها سُعاد حيل حلوه

مكيفه تريد اطير زفو غازي على حجرة العروس

وگامو الشباب تهوس بالباب ويغنون ظلو فتره ملخو نفسهم بالرگص الكل فرحان الا ماجد عازل زاويه يحش جگاير

طلع غازي لابس دشداشه بيضا وگام يهلهلون

واخذو الشباب وطلعو برا الكل

النسوان جفتو على حجرة العروس اني جنت واگفه عالدرج اصفگ حدرت بساع تا افوت وياهن ومهره تنادي عليه ارجعي مخبله لا تفوتيين لياااال

بس اني سويت نفسي طرشه ما اسمع جفتت عالعروس شفتها تبجي وشعرها منفوش خطيه ورگبتها بيها علامات ازرگ واحمر ونازعه البدله لابسه اتگ ابيض وكله دم وفرشة الجربايه هم بيها دم حطيت ايدي على اثمي خطيه هاي شبيها شنهاي الدم عيوني غورگن خفت اجت مهره جرتني من شعري وتكفخ بيه وفاتن جرتني من اذني وتگلي مخبله شودااااج

ادري شسويت مو كلها فاتت

شبعني تكفخ نفشن شعري گلتلها ااخ مهره هديني روحي شوفي العروس هم كاتلها غازي ملابسها بيهن دم

رجعت تكفخ بيه وتسد بأثمي تگلي اسكتي لا تحجين

اسكتيي ما تصيرلج جاره ابد

گعدت عالدرج مبرطمه ما خلني مهره وفاتن اتحرك من مكاني غافلتهن ونهزمت رحت يم البنات

اغني وياهن

ديالا:مر شهرين وبلشت امتحانات نصف السنه

ليل ونهار داحسين روسنه بالكتب نقرا

وما نطلع من الحجره بس وكت الوجبه

گاعدين بالحجره ندرس وصبره بالصاله تنفش صوف نسمعها تغني كلمن ضربها ال*** سواها مره واني ضربني يا يما وفلگحني ورا

سمعنها وحفضنها بساااع كملنه دروس طلعنه برا نلعب تكي بي ونغني بيها ونلحنها مثل صبره اجانه حميد وكل وحده حط عليها راشدي وجر اذانه يگول شهل حجي منين تعلمتن هالسوالف گمنه نبجي گناله هيه اغنية امك

راح على صبره جانت تشر بالصوف برا عالحصيره اسمعه يحجي عليها يگللها شتحجين البناويت تلگط من اثمج وهيه تگله برابيج كلشي يعرفن احنه ظلينه صافنين شنهي بيها الأغنيه والله حلوه

كملنه امتحانات الحمد لله اني جاوبت ومدري عن ليال

گالت جاوبت اني اعرفها شاطره وذكيه ابويه گال اخذجن سفره للشمال بس تجي الشهايد ترفع الراس

كيفنه وگمنه ندعي

ابويه جمعنه كلنه وحت دز على اهل استاذ صائب گال صائب وليدي بنواتي ما عدهن عمام بس انتو

ان شاء الله تعوضون مكانهم

ماجد گال عد عيناك

كمل ابويه گال يا جماعة الخير اجوني خطابه على مهره واني جنت ارفض اي واحد يجيني عبن ما اشوفه مناسب ومهرتي اسبع منه

بس هاذ الرجال ما گدرت ارفضه كامل والكمال لله الواحد محد غيره يصلح خيال لمهرتي

ماجد گال والله شوقتني ملا درويش على وصفك اذا مهره ما رضت اني اخذه

الكل گام يضحك

ماجد گال منين هاذ

جاوب ابويه گاله مشعل ابن الشيخ علوان شيخ عشيرة ال... ....

حميد گال يابه اخو الصياد صاوب عماد وسكتنه مو معناها ننطيهم انته شفت الصياد من اجو حت ما منكسره عينه وعنده ولا جن مسوي شي

جاوبه ابويه ترضاها احد يفشر على خواتك

حميد دنگ راسه گال لا

ردله ابويه وعلااا عجل انصلم حسك ما اسمعه اني مجاي اخذ رئيك واني راح انطيها لمشعل مو للصياد

صد على گال مهره بنتي الرجال عاجبني من ساسه لراسه من يوم الي اجو گعده النسوان شايفاتج وعاجبتهن وخمس مرات يجيني واگله افكر تاشوفه يلح لو بس يدور نصيب

اني ما اجبرج مهرتي هاي يمج توافقين لو لا بكيفج

جاوبت مهره وعيونها مغورگه دموع گالت موافقه يابه

گاللها من گلبج

ردت اي من گلبي

الكل فرح لمهره وصبره جرتها هلوهله شگت اذاني

طش الخبر مهره خطبها ابن الشيخ وصل لخبر لحامد ودزلها راسله يهددها اذا وافقت يسوي جريمه

وگعت الرساله بيد صبره گامت تعيط انطتها لماجد عبن حميد مجان موجود وطلع يدورله

ثاني يوم اجينه من المدرسة لگيته مهره تبجي ومنهاره حالتها سألنه امل شبيها مهره گالت حامد متصاوب

ديالا: گلتلها شلون منو صاوبه

گالت كل الي نعرفه ماجد عرف مكان حامد وراح داهمه وحده ونهزم منه حامد وصاوبه ماجد برجله وهسع حامد محد يندله وين والرجال الي ويا حاطه ماجد يحقق ويا گايله ما اندل مكانه

وماجد مبلغ اهله يلزمون ابنهم ترا وين ما شافه يكتله ومهره تبجي لهاذ السبب

مر سبوع مر وحامد ما منه اثر وماجد يدورله ليل ونهار

اجت المشيه 14 سيارة هيبه بكل معنى الكلمه

اتفقو الزلم وفات العريس تا يشوف مهره

لبست دشداشه وتلفعت وما حطت شي على وجها

جابتله الجاي وگعدت گباله فقد من شافها گام يضحك لروحه جان رجال مرتب اسمراني طويل لحيته بيها شيب وشعره هم عيونه صفر تراسيم وجهه حلوه يناسب مهره

رضو الطرفين وجابو الشيخ عقدلهم وقرو الفاتحه

فاتن اخذت مهره لبستها فستان ماروني طويل مدلع معاني جسمها تخبل بيضه گطن

وفاتن كوتلها شعرها بالأوتي وحطلها زواقه طلعت اجنن ما شاء الله حيل حلوه النسوان خلو الجگليت عليها للرگبه جاهد وجوانه يلگطون ويضمون منجدونه عبالك ما شايفين جگليت

عدو سياگ مهره وجابو النيشان وعلگت الهلاهل والزلم طلعو برا يرمون فشگ علگوها علگ

فات الرجال تا يلبس مهره الحلقه

ظل يدحگ على مهره وما يندل دربه عبالك اول مره يشوف بنيه گامت ادينه ترجف وتوتر ومهره تبتسم بحزن وتحاول اداري دموعها شاورها وجان تضحك خليت ايدها على اثمها تفرك بأديها تستحي شگد مهره طويله بس تبين يمه گصيره حيل توصل لحد صدره شطوله ما شاء الله

الي يشوف مهره وهيه تركب الفرس وترمي بالسلاح يگول جذب مو هيه هاي العروس الأنيقه والي تستحي واگفه يم رجال

بلشت حفلة المهر شغلو المسجل وگامن النسوان يرگصن يخلص كاسيت يحطن الثاني اخر شي جابن الدنبگ واحده تعزف عالدنبگ وحده تغني والباقي يردن وراها جانت اغانيهن واصواتهن حيل حلوه

حبيت اكثر اغنيه جانت

نفرح وليوم لكيفنا

نفرح وليوم لكيفنها

هالمهمر المن تردونه

نفرح وليوم لكيفنها

لمشعل الصلفات عيونه

نفرح واليوم لكيفنها

كلكم يا ربعه تعرفونه وماكو بهالصوب احسن منه

نفرح واليوم الكيفنه

جانت اغنيه طويله وكلماتها اجنن خلص المهر وراحو لبيتهم وتشكرو من عدنه مكيفين عبالك منطينهم كنز ولو مهره اغلى من الكنز

فاتن وست رافده بساع جفتو على مهره تا يسألوها من شاورج شنو گلج دنگت مستحيه بحزن الدمعه تلالي بعينها گالت يگلي عيونج احلى ما خلق رب العباد

يتبع...... .