رواية كتوف مائلة كامله وحصريه بقلم نور الشمس

عدنا والعود احمد

لحد الآن التنزيل كل شگد مااعرف ان شاءالله مااقصر وياكم

.....

اكتف مائلة وهموم مثقلة

.....

احيانا نجد اعمارنا فاتورة تدفع ثمن أخطاء لم نرتكبها

ثمن لأختيارات قامت على رغبة وقتية دون الأخذ بالأعتبارات المترتبة على هذه المشاركة الغير متكافئة فكريًا او طبقيًا .

...

(ريف اطراف بغداد او مناطق حزام بغداد)

ولأني ابن ريف متعود ان الصباح مايطلع دفعة وحده ولا نگعد على ضوء الشمس او بعد الشروق

اجمل مراحل تبديل الوكت نشاهدها الفجر عدما نشاهد اول خيط الشروق الشمس وكأنها تشق طريقها بشكل انسيابي بدون اي صعوبات

بالأرياف نبدأ يومنا بسماع صياح الديچ وكأنه يعلن ابتداء يوم جديد

الديچ هنا منبه للطبيعة حتى حفيف الشجر بعد صياحه يتحرك بشكل وكأنه يعيد نشاطه بعد سبات الليل الطويل

والحمام يهدر يخالط صوته زقزقة العصافير واصوات باقي الطيور مع خوار البقر ونباح كلاب الحراسة للمزارع والمواشي

وصباحي ويومي يبدأ بنشاط مفرط عدما اسمع دعاء امي المعتاد

..اصبحنا واصبح الملك لله

نصبح ونمسي بحماك يخالق الأكوان يارازق الأحياء والأموات برحمتك

رزقي ورزق ابني عليك ومنك والك بلا منية من خلقك ولا تحوجنا اللئيم

ماخجل سائلك يارب وانه على بابك ذليلة وبس الك ذلتنا تلوگ والغيرك مهانه وعيب

من گد ماحافظه صرت اردد وياها بگلبي واسترسل

..سألتك يارب اعطيت واكفيت احمدك واشكرك بعدد ذرات الرمل الهي امانتك وليدي نجيه وعلي بخته وازرع محبته بگلوب الناس واحميه من شر كل كايد وحاقد وحاسد وشر الماصلى على النبي وشر الهافي والمتعافي وشر المتبطر على رزقه ..

جليت صوتي وحاجيتها

.. الله لايحرمني دعائج.. شهلة الحنينة الماكو مره بقوتها ومحنتها صباحج خير يوجه الخير

..تروحلك فدوه شهلة وگلبها ..هلا بهالصباح

..انه گلبچ غير هيچ تكولين المن بعد تفدينه

..اي والله مو بس گلبي انت دنياي كلها وعوض ربي انطاك الي.. انت واحد صدگ بس تسوالك عشيرة من الزلم

..اربات ايدچ وزودي لچ

..يبعد اهلي الماشافتهم عيني

ولأني غريب اطوار مثل مايسموني اهلنا من العمام واولادهم بطبعي مااكل من ايد احد حتى أمي ولا اكل من مطعم او مخبز لو اموت من الجوع مااكل غير من ايدي ولهذا عندي وجبتين اساسيات الريوگ والعشا ووجبة الغداء ملغية بحكم الدوام

رفعت الغطا عن العجين مختمر طلعت اشجر التنور ورجعت اكمل الشنگات ومثل كل مره اتغاضى عن حسرات امي وقهرها لأن مااكل من ايدها لأن بروحي تتزاحم الحسرات اكثر وهايه الحالة سببها نفسه الماخلانا بيوم نرتاح

ومتعود اول گرصه تطلع الها مخدر وياها الچاي ومهدره وهي سالگه بيضات الها والي تگشر البيضة التاكلها وتفور گلاص على گدها من الحليب تصبه وتخلي الباقي انه احضره حتى اكل براحتي واگوم الدوامي او اشغالي تريگت وسبحت وطلعت

طريقي طويل من اليوسفية المستشفى ابن القف تعييني الجديد بأختصاصي المميز بين ربعنا وبديرتنا الأغلب يحددون اختيارهم بين الكلية العسكرية والسلك العسكري يحبون الانضباط والرتب او الطب العام والقليل منهم للتعليم شقيت طريقي بعيد عن كل اعتباراتهم وصار الخيار على دراسة العلاج الطبيعي وحاليا اني معالج بمستشفى ابن القف

الأيام والمواقف علمتني الصبر وعلمتني التكبر صفة هادمة الكل صفة جميلة ممكن يحملها الأنسان

وعلمتني الكرم ماتجود به النفس من مال واحترام وسلام لائق بينا كأسلام ماتختصر على صواني اللحم والتمن الكرم اهم خصاله اكرام الناس والترفع عن اهانتهم

أول ايام تعييني دمار نفسي وصراع تعيش بظروف تخلق منك انسان اما متجرد من كل مشاعر او شخص عبارة عن كتلة مشاعر تخفيها بداخلك لتبين قوتك وتتعايش مع الحالات بشكل وقتي عدما تطلع منا تشمر كلشي هنا واباب هالمستشفى تدخل شامر كل هم وثقل يميل اكتافك ويبدد قوتك

مو سهل تشهد اصعب مراحل ضعف الأنسان وهوانه

وتتناسه الامه واوجاعه وينطلب منك تركيز عالي على هدفك بعيد عن كل توسلات المرضى وصرخاتهم

حتى تقدم نتيجة تشوف بيها الفرحه بعدين

مستسفى ابن القف

مستشفى حكومي تابع لصحة بغداد الرصافة، متخصص بإصابات الحبل الشوكي والتأهيل الطبي.

يعالج حالات معينة مثل

الشلل الناتج عن إصابات العمود الفقري

وإصابات الحوادث والسقوط التي تؤثر على الحركة

تتخصص

بالتأهيل الحركي والعلاج الطبيعي

علاج وتأهيل ذوي الاحتياجات الخاصة

وجلسات العلاج الحرفي والعلاج الفيزيائي

رغم أحباط الي يسموهم اهل بوكت قبولي عدا امي وكم نفر گدرت اكون من اوائل الطلاب بمجال اختصاصي على مدار اربع سنين من مراحل الجامعة واتعينت بأول دفعة للتعيينات بعد التخرج والحمدلله

ابتديت يومي بعلاج عدة حالات عملي يطلب مني اكون جاد قليل كلام وتركيزي كله يكون على نقاط بدن المريض وكيفية العلاج

ابتديت اتابع علاج ام لأطفال ينتظرون منها تكمل علاجها بممرات المستشفى يلعبون.. غير مدركين لصعوبات حياة امهم الي ممكن يدركوها متأخر وعند ادراكهم تنسرق منهم هذه الضحكة وتتحول حسرات وألم

دعيت ربي اكون قادر او سبب بسيط على احياء روح امهم الي ارتهنت بأقدامها گبل لايدركون عجزها وتعجز ارواحهم من الصغر

عالجتها بكل مااملك من خلگ ومعلومات واجهزة بمراقبة دقيقة متناسي توسلها والامها چانت مستعدة تبقى عاجزة ولا يستمر هذا الألم دقايق اكثر

..انت ليش ماعندك رحمة

..لأن عندي رحمة اريد اشوف ضحكة اولادچ تستمر وهم يشوفون امهم متعافية اتحملتي اشكال الم وعمليات اتحملي هالدقايق ميخالف خيتي

اشرت الزميلتي تكثف مساج منطقة عضلة الساق واضح ضمور العضلة وانكماشها

عجزت تحجي شي ودموعها انسابت واعتلت شهگاتها

واخذ گلبي صوت المرأه مرافقتها وهي تهون عليها بنعي يشبه طريقة امي بتعبيرها الكل مصاعبها هذه الطريقة الخلتني احب كل من اله صلة بأسم ولون الجنوب لون امي وحنينها

(ريت الألم والتهيسينة يندار لأم افعال شينة )

بلحظات ابحرت بصورة هالبيت وتوظيه معناه عميق وصادق وبلحظة تشتيت الأفكاري حاچيتها اهون عني وعنهن

..حجية امها انتِ ..الله يفرحچ بسلامتها وتشوفيها تمشي على طولها ..بس صبريها لاتزيدين عليها بنعييج

وبنبرة صادقة ردت

..هذا صبرنا يمه

اتحسرت وكملت

..وانه عمتها ام المگير رجلها العاف الأصيلة وركض وره الكدش

اتنهدت وكأن اليوم مواقف تتزاحم بي تتحول عصف ياخذني للراح من ذيج الأيام وماادري هي راحت لو باقية ملازمتني كل الظروف نفسها ماتغيير شي

ورغم ذكرت شنو يطلب مني من قلة كلام ماگدرت اسكت وردت افهم اكثر

..وينه رجلها ثالث جلسة وماجاي نشوفه ..هذه المواقف تطلب رجال حقيقي يشيل الحمل زلم عليها العتب ماتحمل تكون الحالها بهيج جلسات

..مو كل زلمة زلمه انه مااتيهه يمه وياها و ويانا الله الاكبر من كل احد وهذوله اولاده مبهذلين ويانا وماسائل عنهم

وي هذا الحديث شفت طاقة تحمل المريضة زادت وضعفها وهوانها اتحول المصدر قوة

غريب الأنسان وتركيبته يستأنس احيانا بآلامه ويوظفها كبوابة للصراع على البقاء

وي كل نفس تسحبه وتزفره تدفع بحسرات وهموم وتحولها طاقة للصبر وكأن الألم هذا لاشيئ وي الم گلبها

ختمت الجلسة ووقفت الاجهزة واني اطلب من زميلتي تساعدها بالنزول وتقرب كرسيها وترتاح

طلعت للممر انرطم بيه احد ابنائها اتراجع متأسف مسحت راسه ومديت ايدي للسلام

..اسف دكتور

..حبيبي خو ماتأذيت ..معالج اني مو دكتور

ابتسم دايخ من هذه الألقاب واختلاطها هوايه يخلطون وكمل سؤاله بحماس

..امي شلونها دكتور شگد بعدلها وتمشي

..مابقى هواي وتمشي ..امكم قوية بس انتو قوتها خليكم دايما يمها وكل مصاعبها تهون

انتقلت الحالة ثانية تأهيل شاب مصاب بالحبل الشوكي بعد سقوطه من بناية چان يعمل بيها بعرق جبينه وچانت الجندي المحارب باصابته زوجة اقل وصف ممكن نوصفه بيها بنت اصول بكل ماللكلمة من معنى

چانت تحاول تراقب كل خطوة بعلاجة حتى تكررها بتعليمات منه يزهگ منها تصير حايط لاينطق ولا يشعر

يتألم تتحول اله كتله من المشاعر تهون عليه الامه بأجمل العبارات الي ممكن الانسان يشتد بيها ورغم اكره الزواج وكل علاقة زوجية العلاقة الوحيدة الشدتني بحياتي علاقتها بي صار اكثر من جلسة نفس الأصرار عدها

ويمكن لأن بعد معرفتي بي اكتشفته وحيد بلا اخ واب چانت هي واهلها نعم السند عرفت ان الله سبحانه ممكن عوضه بيها وراد يشوفه النعمة العنده شنو من خلال هذا الابتلاء بس المتأكد منه ان الرجل هذا يستاهل تعبها وزارع طيب عدها وعند اهلها

واضح من تعاملهم

ورجعت افكر ممكن بيوم اغير فكرتي عن الزواج

مستحيل !

اني اشمئز من فكرة الزواج ومن گد ماغريب اطوار ومتعقد قميصي هذا اذا طلبه من اولاد العمام اعزب انطيه والبسه وراه اما المتزوج انطيه واستغني عنه ومستحيل اخليه على جسمي وهالشي كل اهلنا يعرفوه ويلوموني على هاي افكاري واطواري والعقد العندي متناسين اسبابها او يجهلوها من الاساس

بس مااهتم الملامتهم ولا تهمني نظرتهم بكل الاحوال انه بالنسبة الأغلبهم ابن زبيبة بالرخاء وعند الحاجة ابن الأطايب

الشغلة الوحيدة الممكن مريحتني بابعاد فكرة الزواج من بالي نهائي ان مراح اضطر بيوم اطلب من عرقهم السامي

وانه ابن( الشروگية) او انتظر منهم فضل بمشية يمشوها على ناس يشوفوهم من مستواي اكثر من بناتهم .

هذا اليوم والحالات المرت عليه خلتني ارجع وافكر شگد فاتني من اوجاع امي وجنت العب مثلهم وهي تتألم زاد اصراري اعرف منها كلشي بالتفصيل وادون هالمآسي تامايحن گلبي بيوم

گطع افكاري اتصال المهيب ابن عمي مروان

..وينك يول صخر تسمعني

..حيك يالحبيب وياك اسمع

..قريب منك اني انتهى دوامك ترجع ويايه

..ماعندك خفر اليوم ؟

..لا ماعندي شوي وانزل تلگاني منتظرك

..تمام اشكرك

اتصلت بالشخص القريب من گلبي الي يوصلني للگراج ومناك اجر تكسي لليوسفية

..حبيبي ابو علي اجاني ابن عمي اليوم اريحك مني مايحتاج توصلني

.. تدلل اشهل تعبك راحة يمعود غالي عليه انت ابن اختنا وخالتنا

..وكفو منك و من خالتكم سلملي على الأهل

نزلت شفته منتظرتي وكالعادة صوت سيارته يدوي بصوت اليسا

..اليسمعك يگول ماكو هيج رومانسي وحساس حل مشاكلك عيب عليك عمامك يشتكون منك والولد بخاطرهم منك بس الخاطرك مايدخلون وعلى تصرفاتك هاي مااضمنلك راح يسكتون عن زعل اختهم ويتغاضون اكثر

...اهووو شبلاني ومريتك

..دروح احمد ربك مااخذت من خواتي

..ليش عزام منين ماخذ صاحبك واخوك مو ماخذ اختك ولايوم اختلفتو بخخخخت

..مامعتبراتني اخ الهن وعدهن اليغنيهن عني ماشاكيات ولو شكن ياويله لو قصر صدگ هو وباقي ارجالهن بس اسأل عمار شلون مسلط عليه

..الله لايسلطكم انت وعمك ويساعد نسابتكم عليكم بس ليش هيج انت تفرق وحاسب بنات عمك خواتك وذنيج مبعدهن مالهن ذنب بدگايك ابوهن وامهاتهن

..جاوبتك مامعتبراتني اخ الهن عكس بنات عمي ابو

ريم ذني خواتي صدگ ربن وياي وخوفهن عليه واضح ومعزتهن كذلك وعوف هالسوالف خلينا بسالفتك ...انت ليش ماتراعي الله بحرمتك

..شرايح منها گلي مقصر وياها اني

..مايفيد الكلام ..طلعلي الاغاني الاحبها وغيرلي المسجل يرحم اهلك رطن اليسا مو مودي خاص وياك مااحب اخفي من شخصيتي ولا يهمني نظرتك الذوقي هم

..صريح الله يسلمك ..شي واحد معجبني بعلاقتكم انت وعمي ابوك مختلفين بكلشي ومشاكلكم ماتخلص بس ذائقتكم نفسها

..للأسف الهجع الصفة المشتركة الوحيدة الماگدرت استغني عنها واكرهه يااخي من اسمع الهجع اروح بغير عالم شگد حاولت اكره كلشي يحبه وبس هاي ماگدرتلها

ولا لا ولك من علمك رگص الهچع

..بوية الهچع

..اندمجت بسرعة اليسمع طگ اصبعك هسه لايصدگ انت طبيب وبطور التخصص ولا يصدگ شلون چنت مسلطن على اليسا قبل شويه

..جينات هاي مو بالأيد هي ..اهلنا كلهم يحبون يسمعون الطرب بشبابهم

..هم صح

وصلنا وقريب مانوصل لديارنا من بعيد مبين بيت جدي صلال وعمي اللواء سليمان ابو الريم الغالي

وباقي بيوت العمام قريب منه وحواليه منهن بيت الي يسموه اب الي وبيتي بركن بيت عمي وجدي من الجهه الثانية بس اقل بيت مساحة وبناء ضايع بينهن رغم هذا ماارتاح ويهدالي بال الا بيه وبذاك الحضن الشاف ويلات وماتركني رغم العروض بشرط التخلي والصعوبات بظلتها وظلت

..يمك يالغالي ماقصرت

..حييك ابن العم تدلل على هالشارب

..يسلم شاربك هو شظال بي بذمتك شكم حرمة مچلبها بشاربك

..طاح حظك انزل ولي ذاك ابوك ابابك

درت وجهي مستغرب وگفته نزلت

..اليوم ذاكر بابي شعجب تدري بيه بالدوام وگفتك شنو هنا

..الله يطيح حظك يانذل تشرف على حصاد گيعان عمك وتترك گاع ابوك شو گاعي اصغر واخوانك ملتهين شيروح منك لو موجه الفلح الهن وولد عمك مايردولك طلب لو ردت منهم عونه

..سليمان ابوي مو عمي واديت واجبي والگاع هاي اكلت من خيرها وكبرت ودرست هذا واجب رديته اني مو فلاح الك واطالبني ولا الك دين يمي تااوفيه

..عاق وعديم تربية واصل

..تمام مو جديد هالوصف اتوكل ولاتوگف هنا بعد ترى اعرف غايتك ماتخطاني

..لو رايدها على شاربك اسحگ واوصلها بس مارايدها اني خلي هالشي ابالك

..كل ماتريد تسولف علي هالسوالف خلي عينك بالمراية وشوف الاثر الخليته واني اوعدك ثمن عبرة هالباب روحك لاتنسى ذكرها الروحك على طول

..عاق ومخولك مجهول ونجس

..هذا كلام مستهلك يكلفك هواي بأتصال واحد الهم الظاهر صابك فقدان ذاكرة جزئي راجع حساباتك وعوفك من القديم حدث

صحت

كماااال تعال اخذ ابوك منا لو خليك يمه وسليه الظاهر مهوجس واني تعبان ارد ارتاح مو مال وگفه

وگبل لايرد كمال فتت وسديت الباب لگيت امي واگفه وايدها على خصرها وگصيبتها الحلوه مخالطها الشيب وملامحها الباگت منها الأيام بريق الوجه الا جمال عيونها الچان يوصفهن ابوي( بشگ الخنجر )

مفتوحات بشكل ملحوظ وبيهن لمعة غريبة والنفس السبب يكره لون عيوني اليشبههن رغم تختلف برسمتها العين بس هويتخبل لو حاچاني وظلت عيوني موجهه عليه

اتعودت من يحجي وياي اما انزلهن او اخفيهن عنه مرات بكاسكيته خاص اذا چان عصبي ومتوتر ويريدله حجة وياي

رغم مايهتملي ولا اهتمله بس يعز عليه نتمشكل على طول گدام اهلنا ويبقى اب محد يلومه رغم تقصيره وظلمه الملامة توگع عليه بأعتباري شاب ولازم مااعصي واطيع واني مستحيل اطيعه

..ها متحضره للعركة شهلة

..شعده المسودن

..يتحجج على طلابة وكل غايته يوصلج وحلم ابليس يلوح اظفرچ والله

..لارده الله

الجو حار رحت اسبح وانام ساعة واطلع للبستان

ومن ارجع الي وي امي جلسة اعرف بيها كلشي فاتني يومية توعدني وتخلف

المغرب رجعت وبيدي رگي وبطيخ مبردهن بالساگية من مي ماطور الزرع لگيت امي تدعي

امسا المسا وامسينا وعلى بابك ياالهي ارتجينا

سور سور والنبايا حضور

على وليدي ووليدات خلگ الله تحفظهم وتسهل امرهم وترد كل ولد الأمه وترزقني بر ابني وترزقه رضاك ورضاي

ابتسمت واني اسمع دعائها المعتاد بالمساء

امي امية رغم بوكتها المدارس چانت بذروتها وتعليم البنات منتشر والمدارس موجودة مع هذا خبرة الحياة صقلت منها انسانة قوية مثابرة ولو على حساب سعادتها وصحتها الأخذت منها الهموم مأخذها وتقرا وتكتب وهي ماداخله المدرسة بيوم

اتوضيت وصليت وجبت صينية وسچينه گصيت الرگية ارد اكل بين مااسويلي وجبة زينه جوعان حيل حچيت وياها مثل ماتحب

..شهلة رايد تحچيلي عن موشه القديمة من اول ماوعيتي لليوم الوعيت بي اني

غمضت ماتريد تذكر ذاك اليوم وصعوبته وشلون حولني من حال الحال

تونا بدينا نسولف واندگت الباب قوي

وصوت نسوان عمي وبناته خلاني اطلع حافي اشوف شصاير لگيت المهيب وفرسان متلازمين وواحد چاتل الثاني بدون مايحچون عرفت الي حذرت منه المهيب صار

صحت بفرسان وبعدت المهيب رغم اكبر منا بس بعمره مااخذ دور الأكبر چان بينا ومثلنا بسيط ومرح ومايحب يتكلف ابد

بس مشكلته ارتبط على راي اهله من الصغر من چان طالب وكرر اغلاط عمامه بدون اي اتعاظ وماكو اخ براسه غيره تهون عليه اخته وزعلها اتغاضو هواي ووصلو حدها بعد

بعدتهم واني ارزلهم

..ولكم حسافة الشوارب بوجوهكم اخوان انتو متستحون فرجتو العالم عليكم

رد فرسان وهو يسحب نفس بالگوه

..هو مو مال احترام داس علينا هواي وهانا گبل مايهين اختنا

رد مهيب ينفت قهر

..محد هاين اختكم ..معززة مكرمه هي كل ماتكبر عقلها يصغر وتخلي نفسها بمواقف تجبرني مااراعيها

..ام ولدك ولك استحي لاتحجي هيج وكافي فوتو جوه يمي لايجون عمامي ويطيحون حظكم الطرفين خوتكم حلوه لاتخسروها ..فرسان اني اتعهدلك كرامة ام ايهم من كرامتنا كلنا وابن عمها يشتريها ويغليها ع الكل والماضي مايكرره اعقل من غيره هو

حجيتها وخزرته منبهه فرك وجهه وفات

..اخر مشكلة عليمن

..مثل كل مره شكاكة وماتخلص لغاويها

طفر فرسان

..شكاكة هي ؟مو انت تتنفس نسوان مو هوا !

..شكاكة اي اتنفس نسوان شنو يول شو انت متخجل يعني اني اباوع مقطع بتليفون بي وحده معروفة للكل لايمي ولا بگربي تلگف جهالها وتگعد تتبكبك يمكم

..لأن تعرفك ماهاويها يمك وماتملي عينك

..گاعد بگلبي انت لو تريد تبرر دگايك اختك فوگاها بدون حيا تجيني تتهدد

..ولك انت ماخليت النا حل لا انت غريب ونتعامل وياك مثل الغريب لا انت مقدر الگربة ومعزز حرمتك ومدللها انت شيوجعك كول النا مقصره وياك

..وانه شاكيلك من تقصيرها لو هي الاجت ماگالت الكم عفت بيتي لأن شفته متابع وحده بهولندا اشمها عن بعد وخافت

..ذكرو الله وصلو على نبينا واله وهدو السوالف العفرته ماتفيد

..عليه وعلى ال بيته وصحبه افضل الصلاة والسلام

..فرسان باجر انه اجيبه الكم و ويانا عمي ابو ريم وتدلل على شاربي وشاربه بس لاتزعل المهيب ماله غنى عنكم واختكم فهموها مو كل سالفة تسوى زعل متابعة وعن بعد شتسوي

حظها وگعها بواحد على گولتك يتنفس نسوان خل ادوس بس ع الماينداسن تطلع

..شوف الثاني طاح حظك صخر

..هو طايح بينكم من زمان انه بأمان الله گاعد ومرتاح اندگ بابي واصواتكم شيلتنا كافي اعقل وبوس ابن عمك وارضيه

..ترى هو الجاي هادود ونسى اني اكبر منه وعندي بغلاة روحي هو واخوانه

..ميخالف انت مزعل اختهم ارضيها ويرضون

..محد سودن اختهم غيرهم انغرت بيهم وصارت ماتهتم لا الخصوصيتنا ولا الزعلي وصورتي گدامهم

..رضيها ميخالف واتفاهم وياها بهداوة وهم يعينوك بس خلي ابالك استقرارك واستقرار بيتك بيدك والباقي عوامل وهسه طلعو منا متصافين وخليني اروح الشهلة بالها يم الصار

..شوفها النا نسلم عليها

بگومتهم فاتت امي بعبايتها مغشاية وماطالع منها حتى العيون

..هلا بيكم يمه كل الهلا اخوان ان شاءالله يطبكم الرحمن ..ظلو عدنا للعشا لا اطلعون اتعشو وارتاحو والمشاكل تولي خوتكم لاتخربوها

رد مهيب

..حياج الله عمه الله يحفظچ ..بيتچ عامر ان شاءالله

وفرسان يگلي

..ماتتعلم منها الكرم شبيك تطرد

..روحو ولو اعوضكم غير يوم

سلمو وسألو عن صحتها وطلعو بعد ماوصلتهم للباب

رجعت گلت

..مهيب ابو النسوان مايتوب ايده بأيد عمامه

..لا يمه مو مثلهم مهيب.. بس هو مرته مصيحته لو مثلهم مايهتم الها والزعلها ولا الزعل اهلها عمك وابوك ماوگف بعينهم شي ولا اهتمو الزعل مره وولد

هو بيه رچه وتگدر تغير احواله

..مرته من خوفها يمكن شافت القصص الگدامها حقها تخاف اني اعذرها

..اي يمكن تخاف تنعاد السوالف الله لايعيدها

..سولفيلي شهلة الحلوه رجعتلج متفرغ

..شسولف

..كلشي ومن البداية

اتحسرت وحچت

.. چنت موشه وصرت شهلة وباثنينهن ماشفت راحه چان شهله بس بالجنسية امي تسميني موشه وليش ماادري رغم اسمي اشوفه احلى من الدلع بس ظل منسي سنين طويلة ..

وعيت على طفولة مااعرف شلون اوصفها لأن چنت اجهل معاناة امي بيها

بس اتذكر اشوف بعيون امي خوف.. الخوف اله هوايه اسباب وعلامات

ايام طويلة ماثبتنا بيها بمكان

ايام خلصت صح بس تاركه بيه اثر مخفي

وبوكت فهمي وادراكي وعيت على امي قريب للگراج تبيع چاي للسواق والمسافرين

وانه على طول وياها چنت اطلع وياها امشي فاتحه تك عين النوم بعده بعيني چنت اتمنى يطلع صبح وانه بفراشي

بوكتها امي مأجرتلنا غرفة ابيت بي بس نسوان مره چبيره وبتها الموظفة

ام ايمان الله يذكرها بخير مره من تمشي تدعبل اتنوعلها تروح يمنى ويسرا شيلتها بيضة وثوبها النيلي المدگدگ مريه ماعدها احد غير بتها

مرات ماكو اطيب منها ومرات معصبة وجن مكتولها احد وماطايقه كل البشر وتنفث بوجوهنا

امي ماتخليني بغرفتنا يمهم تخاف عليه حيل الا رجلي برجلها امشي وياها طافية ووين يلا اصحصح من صوت السواق وصياحهم بأسم المحافظات وهم يتحايلون ع العبرية يكسبونهم بكلمة عوزنا نفر بس وهي كلها السيارة فارغة

الصوت الهورنات وعركات السواق ع السره

امي من امهاتنا الأوليات الي يعلن النگبة للخشم وعصابتها تغطي الحاجب ولو حاجت واحد ماتتعامل وتسولف بغير اتفضل وعافيات يمه ..تخاف من الوكت والحچاية التطلع ماترجع ع گولتها وماتتصلح بعد

بوكتها امي تقريبا بمنتصف لو نهاية ألأربعين عمرها ومنظرها چان مألوف للناس

تونا طالعين من الحرب العراقية الأيرانية ونسوان الشهداء ينعرفن من عصابتهن ونگبتهن واغلبهن اتجهن للأشغال الحرة العيشة الأيتام كل وحده برگبتها ايتام تعيلهم

الي يشوفها يظنها ارملة شهيد ومايسأل ليش تشتغلين وشلون

العالم كلها فاقده ورغم كلشي امي حذرة رغم بعدنا هواي عن محافظتنا وعن بغداد الي اي شاردة يظنون اهلها بيها وهناك يدوروه امي بعدت عن كل ظنونهم

رحنا المناطق وسط العراق واستقرينا بالحلة تحديدًا

الحلة وناسها حلوه والي يعيش بيها ماينساها ابد ولاينسى جمالها وريحة هواها النقي وبساتينها وطبيعتها التاخذ الروح گبل العين

طفولتي رغم صعبة احبها ورغم احب لهجة اهلها الي تميل اللهجة اهل بغداد اكثر من بقية المحافظات القريبة الها بس بقت لهجتي لهجة امي كلمات منا بسيطة تخلي المقابل يحبها مرات ويضحك مرات لأن واضحة لكنة اللسان تگول انتن مو منا لو يشبهونه بأطرافها لو يعرفونه ضيوف عليها

مرت فترة وعلى گولت امي شبة البنات لمحة عين ماادري شوكت كبرت وصارت امي تخاف عليه اكثر

ورغم هذا اصرت تاخذني وياها بس خوف عليه من العين وحجي الشباب الينذب المسامعنا لبستني عباية وياها نگاب بس نگاب بالربطة مو بوشي بهذاك

الوكت البوشي عليها سمعه حشاك المو زينات يلبسنها

ويفترن خلن باقي البنات تتجنبها

جنت البسها هي وجفوف بحجة شمس وحر لو حماية من البرد بس الحقيقة حتى ماابين شابه بالگراج بين الشباب

وبهذا الوكت گعدتي يم امي الگامت تبيع كيك وي الچاي وانه اگعد بصينية الكيك بصفها چني وحده تبيع بس فن اليحاجيني تاكله وتشربه وهم اهل الگراج والعمال صارو يعرفوها ويحترموها حيل ومستعدين كلشي يسوون الحمايتنا رغم هواي ينصحوها تعوفني بالبيت بس عرفو البيها خوف مو طبيعي ورغم ماتحچي بس واضح للكل ماجاي من فراغ

بذاك الوكت چان البلد والشعب تعبان طلعنا من حرب ايران مالحگنا نرتاح وصار دخول الكويت وهم جرت جرارها ودخلنا بحصار

الچاي هذا البسيط العامل صار يحسب حساب تعبه وفلوسه عائلته اولى بيها ومايشتريه

والكيك شحاله كيك من اطحين الحصة ومتروس سودا بس شلذته الهسه ظال طعمه بحلگي مو بس لأن ذاك الوكت احسن لا عيشة الناس صعبة بي بس لأن بذاك الوكت ماچنا مهمومين هالگد وطبيعة البشر يحن الماضية مهما كان

بهالفتره عمي ابو سمير رجال عابر الأربعين لو نص من الخمسين مخالط الشيب لحيته وراسه

اكثر شخص چان يضوج من يشوفني وي امي امشي وين ماتروح ويشوفها محتاره ومالها احد بس كلش ماعاجبه وجودي هناك

سمير ابنه وياه بالگراج چان ابو سمير مسؤول عن دخول وخروج السيارات وتسجيلهم وياخذ گراجية الصالح وزارة النقل واله راتب هم

بيوم گاعده يم امي ومرو شباب اثنين عسكري ومدني شياكه وقيافة تجذب النظر

دنگ واحد منهم يختار من الكيك وركز بعيوني رغم يس هنه طالعات گصتي معانيي مخفية اشر للوياه عليه نصيت عيوني بخجل وخوف وفضولي خلاني ارد ارفعها لگيت المدني مركز بيه حيل

اتكررت جيته اكثر من مره مره الحاله مره وي العسكري الى ان صارو جدال يتجادلون بجيتهم النا رغم من الگراج نفسه يرحون ويرجعون بس لو مر من يمنا المدني يعصب عليه الوياه وهالشي خله ابو سمير ينتبه عليهم واكثر من مره يحاجي امي ماتجيبني بدون مايشرح اسباب وهي تحتار وتضطر تجيبني

تأثير الحروب ع الشعب بين وتعبت الناس وصار حتى شغل امي هذا مايسد ايجار الغرفة اليومية نتهدد نطلع منها مو انوب اكلنا وامي شاردة ماالها حصة بذاك الوقت واعتماد العراقيين كله على الحصة التموينية يعني بأشهر عشنا عيشة ضنكتنا ضنك امي القوية تعبت ومن سؤال وملامة من ابو سمير وهو يذكرها بجية الشباب وتكرار جيتهم گامت تصب عيونها

هنا هو بدا يلح على امي بموضوع ماتخليني اسمعه رغم شاكه بي يريدها للزواج

چنت ماافهم كلش بس احساس هيج ومن تلميحات وسوالف صرت اربطها واخيرا صارح امي وخطبها

وبصراحه حيرني بعد ماطلبها اكتشفنا هو يحب مرته ومحاجيها علينا وعلى وضعنا ومرته موافقة شرط يكون العقد مجرد وسيلة شرعية التواجدنا بينهم اما علاقة زواج لا

وبذاك الوكت اجهل هاي الشروط انه بس شفت امي وفرحتها بشخص يشاطرها المسؤولية چن گشاية وچلبت بيها بعد ماچانت رافضه اي زواج

وهم مانشفت دموعها وبدون تحضيرات ومو مثل العدهم اهل ناس تجي وناس تروح

هيج بليلة ويوم لملمنا هدومنا وانتقلنا من غرفة الى بيت بي عايلة مو صغيرة اربع ولد وبنات اثنين وامهن وچانو ناوين يچننون يعني سمير مو صغير امه ناويه تزوجه وابوه يشجع بيها

هم امي الشاغل ابو سمير وسالفتها الماحجتها الغيره وخوفه عليه خلاه يتنازل من بيته الزوجته بس حتى توافق بعقده على امي

وصدگ انطونا غرفة فوگ وحمام وهالحمام لازم مانستعمله كل وكت خاف تصير رطوبة الشرط نخليه بس لليل بس من اول يوم الدخلناهم ابوهم فهمهم انه اختهم وهم استقبلو هالشي بدون اي اعتراض وشلون مايعاملون خواتهم الصغار عاملوني

خواتهم جانن بعدهن ماداخلات ابتدائية وصارن خواتي وبناتي امشط وابدل واداري وامي تطلع تشتغل لأن رفضت تحمله مصرفنا فوك عايلته وكافي كفالته النا بهالظروف

صرت ابقى يمهم واتعلمت من ام سمير الطبخ والتنظيف الصح

ام سمير من هاي النسوان الي تحب تعتمد على غيرها وتسخر

تحب تعلم وتوجه وتكلف بس السانها حلوو ماتخليني احس بمنتها لو اشتغل مجبورة لا

تشيمني وتمدح ومالت الله چانت تعوضني وتشتريلي احتياجاتي الماتعرفهن امي امي بت عرب وهي بت مدينة واهتماماتهن تختلف

ظلت تحجي على امي شلون بس اتگات تجيبلي ومعالم جسمي متغيره جابتلي داخليات بيومها من لبستهن مانزلت استحي اطلع يمهم وصدري مبين بي شي يختلف مامتعوده الحد ماتعودت وصرت اتنوعلها هي وامي تقريبًا نفس العمر لو امي اكبر بثمن سنين لو سبعة بس امي جنها اكبر بعشرين سنة واكثر رغم ملامحها اجمل بهواي

گصايب امي من تفتحهن بيض على حالهن وجمالها مضيعته ومغطيته بالشيلة والنگبة والعصابة حتى بالبيت صارت ماتذبهن الا بوكت نومتها

اما ام سمير الحنة التعجنها بچاي الجگرات ودم الغزال ماتفارگ شعرها الحماره يموت وي بياضها وكحلتها مااطيح من عينها حيل مدارية روحها

ومتفاهمين هي وابو سمير الا بشغلة وحده ماتحب اهله يضيفون ومايجون الا وتسمعهم ذاك الحچي الي يسم وهنه هم امه وخواته مايسكتن گامن يحارگنها بأمي وماتسكتلهن وگامن يأثرن علينا بتعاملها ويانا

وهو طايح بيها يظل اسبوع مايحچي وياها وضغطه معلگ يلا ترجع وياه وچن ماصاير شي

بالأشهر الخلصتها يمهم حسيت توني خالطت بشر وگمت افهم بس اليقهرني وياكل بروحي مااعرف اقرا مثل ولد الحجي شيطلع بالتلفزيون عبالك عميه مااقراه ولا بالشارع اقرا

بس جنت متأمله يجي يوم واتعلم وگضيتها بالبيت وي ام سمير

فتره هم مدري شصار وياها واتغيرت صارت اعصاب وبدت تتعارك وي ابو سمير هواي وتطبگنا برزايلها انه وولدها والبنات

ومانعرف شني السبب وصارت تشوف الشغل الچنت اسوي عونه مني ومحبة واجب وشي مجبورة عليه وبدت تتنحس من امي واخر شي گالت ممنوع تطلع للكراج وياك وحاجت امي بقهر

...شوفيلچ گراج غيره چان يسرني وبطل چان يخلي فلوسه يمي وبطل احچيلي الي ابالج شني مالج احد ولميناج لو تردين تتفرعنين وتاخذينه فلاحة ملاچة

وامي بقهر ردت

..خية زلمتچ يمچ لا شايفته ولا شايفه سره ولا ماله انه وين اتلاگه وياه ويسرني كون ظنج بالشارع نحجي اسرار

ظل يحجي ويصيح هو سكتها وامي خذتني الغرفتنا وراحت ومنا وبدا مشوار ومسار جديد بهالحياة

سمير انطلب بالعسكرية التحق وامه التهت فتره تنوح عليه وخلت كلشي براسي

وصادق وجعفر يدرسون اعدادية يخلصون الليل يدرسون على لاله لو لمبة جانت الكهرباء مو شي

وحسن بعده سنتين ماطالع من السادس ابتدائي هذا مدلل وامه مطلعه عينه بدلالها والبنات سنة ويتسجلن بالأبتدائية

الم اوراقهم وراهم من يدرسون عيني ع الكتب مثل العمية ماافهم شمكتوب انقهر ليش انه مادارسه

ومن صارت امي وحچيت طلعت جنسية اصلا ماعندي من شاردة بيه بصغري ماعندي وتخاف تجددها مناك من مدينة اهلي چي مطلوبين

ومن عرفت اسبوع وانه ابچي اتمرضت وصخنت هم

خاص بعد ماگالت ام سمير حتى زواج مايزوجوج يعيني لو باقية ميته يم عمامج ولا هالقهر حياتچ عدم بدون اوراقج الثبوتية

حسيتها بدت تحرضني على امي ورغم اعرف اكو خطأ بديت اضغط على امي هم الهسه اتذكر اجت تعبانه ولافه راسها ومهمومه وانفجرت بوجهه ابچي

.. انه شني ذنبي ماادرس شني ذنبي بدون جنسية لشوكت اظل هيج انتِ ليش ماتگولين هالبنية خطيه وين تولي اظل هيچ انه اظل هيچ

.. يابعد روحي موشه شبيج ولچ شجاچ چا بيدي وماخليتج ادرسين عمت عيني كون هي بيدي محكومة وخوفي المانعني من الروحه هناك

..ولوين اظل هيج

..الحد ماالله يحلها

رجعت ابجي بهضم احس واهسها انكسر ودموعها صارت بطارف عيونها رحت الحضنها ابچي مااحب زعلها اموت لو امي حزنت انه بحضنها ابچي منها وعليها وهي تبچي من دنياها وهمومها ودوم ابالها حسبات

بليلتها احس همها زاد وانه اخذني المرض فزيت بالليل على كماداتها وهي تردد

..يارب دخيلك بنيتي وامانتها داخله عليك ومالي غيرك

فتحت عيوني بصعوبة

..يمه

..هايبعد روح امچ شيوجعج يمه گولي

..جسمي كله يوجعني

..يابعد جسمي ورسمي

شويه وصعد حسن گالها

..ابوي منتظرچ

ردت بتعب

..گله ماتروح اليوم ماتطلع موشه مريضة

شويه واسمع خطواته ع الدرج يتحمحم وصاح

..ام شهله وينچ شو خل اشوفها

..هلا بالحجى هنا فوت

فات وقرب ايده على راسي وباس گصتي احس بروحي انتعشت ومدري شني من احساس اجاني چن ابوي صدگ حابني براسي وحن علي

..موشه يابه شتحسين اخذج طبيب

..لاعمي مابيه شي بس مصخنة وعظامي مهدهده

ابتسم على حجايتي وارتفع طرف شاربه

..الله يهد عدوچ يابه طيبة ان شاءالله

ورد حاجه امي

..اكلت شي

..لا والله بعدهي هسه اريكها

..ظلي يمها وهسه اوديلها ريوك من السوگ ريكيها وانطيها علاج وعينج عليها بنيتنا هاي

..الله يرضا عليك

..الله يسلمچ

نزل وطلع وصوت ام سمير گلب البيت على اساس معصبه ع ولدها مهوسين وطالعين بس امي عرفتها على صعدته وحتى انه حسيت امي تگول حقها تنقهر بلوه وطحنا عليها بس لو تفهم وضعي ولا تخلي ابالها مني

ثاني يوم اتحسنت امي طلعت الشغلها وي عمي وانه نزلت واتفاجأت باقي شغل امس علي هم

هنا من رجعت امي قررت تعزللنا فوگ وماانزل بعد وعلى هالراي ام سمير قررت تطردنا وتطرد ابو سمير ويانا لو رفض طلعتنا وهذا الگلب البيت وبدل الحال

يتبع ..