رواية كتوف مائلة الفصل الثاني 2 بقلم نور الشمس

اكتف مائلة وهموم مثقلة

.....

چنت اسمع الها بكل تركيز وحتى جوعتي راحت ونسيت احضر عشا واكتفيت بالرگي وخبز التنور الباقي من الصبح

الحزن واضح على نبرة صوتها

..مو بس حياتنا اختلفت انهارت حياة الناس ابو سمير رجال يحب مرته وحبه ودلاله واضح الها مو بس سوالف

بس ماهانت عليه نفسه ينطرد من بيته وكلمتها صارت چبيره

من اول كلامها وياه بعد ماخيرته بين طردنا او الطلعه ويانا صعد وطلب من ولده ينقلوله غراضه فوگ بالغرفة المقابيلنا چانت مخزن الهم طلب مني ومن امي نتساعد ونفرغها وشگد امي حاجته وهدأته وحلفته يعتقها من ذمته ويمهلها يومين تروح اي مكان وگالتله

..احسبني چن ماداخلتكم ولا عارفيني وخل اخذ بنتي واطلع

جاوبها بعصبية

.. ديري بالج تسوينها ساعتها اگلب الدنيا والگيج واعاملچ معاملة الناهبة لاتختبرين صبري انتِ هم

وخلي المضموم مضموم البنت مو حمل قهر بأول عمرها ومنو يضمن توگعن بيد اوادم

بيومها انگلب حاله والشرار يطافر من عينه وامي مانشفت دمعتها اضطرينا نكمل شغلنا بتوجيهاته وانه اطرش بالزفة بس قهر امي اموتني ومااعرف شلون اعينها غير عيوني تراقب نظرتها وتوجهني بنظراتها صارت حتى حچي بطلت تحجي

لليل وفجر قنبلة بالبيت من بلغ سمير وگله تروح البيت خوالك وتبلغ امك وتكلها

..ابوي يگول البيت صح سجلته بأسمها بس بهبة مشروطة بعد موتي يلا والحمدلله اني مو كمش واسلم لحيتي بيدها وايد غيرها وبلغها گلها يگول من اليوم فراشچ بارد مني واذا تحب ترجع الاولادها تجي مثل ماطلعت واكلكم ومصرفكم يوصلكم

وچان كل ظنا كلام السان ووكت عصبية وينتهي بس الي صار فعلا هجرها اشهر طويلة وهي زادت عليه بكلامها تنفره اكثر من يدخل البيت ويصعد تشيل البيت وتهده

بالحجي والصراخ

وصارت وين ماجان يم گرابته يم الجيران تگول لم اثنين دايحات من الگراجات وهجرني وكل شويه وصاحت الامي

.. ام الگراجات ام الزلم ماتتهنين بي ولاترتاحين

امي اصلا من صعد فوگ وغرفته مقابيلنا خاف چانت تذب الشيلة بالليل گامت تنام بيها وحتى جواريبها ماتذبها بس اكله وشربه منه اني اطبخ الموجود وهو يتسوگ مامقصر ابد

وولده وبناته يصعدوله على طول وماكرهني منهم الا حسن

حسن توه بادي يراهق متأخر بدراسته بس چان قريب العمري فرق بينا سنة لو سنتين بس انه مدري ليش يعاملوني معاملة شابة وهو يعاملوه معاملة طفل ومدلل هم من امه وصار يخبث علي بكل حيله

اشر هدوم ع السطح الگاهن مگصصات لو ملطخات بماي المجاري مدري شلون اله خلگ بقوطية يغرف من الشارع ويصعده يرشه ع الحبل

معاناة وقهر امي تموت باليوم الف موته مو على تعاملهم بس

لأن حست نفسها خربت بيت عامر بدخلتها تاكل باصابعها اكل ورادت تجمع كم فلس بس حتى يكفنا ونطلع بدون رجعه ويعمر البيت ورانا

ودوم على السانها كلمة تگول

مشلوع الگلب مايستراح والماتهنى عند اهله مايتنهى ببيوت الناس

الحد مابيوم ابو سمير اتخربط بليلة ويوم الرجال انتهى من طبيب الطبيب اخوانه سكنو يمنا لا هو مرتاح ولا احنا ولا هم اخوانه وامه قررو ياخذوه يعالجوه يمهم وكالو من مشاكلجن سكره ماجاي ينزل

وطبعا كلامهم مايخلى من الملامة النا بالخصوص لأن رجال جان مرتاح رغم مشاكلها وي اهله بس مريحته هي وماشاكي منها واحنا مجرد عالة عليه مو اكثر مامستفاد منا بشي بس وجع الراس لاحه

چان كل مايحجون يصيحني يرضيني بكلامه الطيب ويحذر امي تطلع خطوة بدون علمه

هنا امي رجعت تطلع للشغل وقررت ترجع تاخذني تخاف من تهديد ام سمير يومية تدعي عليه تخلي امي تفور تفور

تشگ ثوبها من قهرها وخنگتها بدون اي صوت بس تردد ربي لاتسمع منها طالبة الستر منك الهي

كل دعوه منها احس جسمي يكش رغم ماافهم شتعني بالضبط وانه مو صغيره كلش بس بسبب قلة الاختلاط هواي امور اجهلها

كل يومية تشهك وتصيح

..ربي هيج واشوف موشة حبله ومشگگه بطنها وتلبسين ثوب الشهيرة ياسعاد واشوفج مفضوحة وراسج مايعلى بيوم

امي ماترد بس من قهرها مره شفت الدم نازل من اصابعها گد ماعضت اديها بقهر

واسألها بكل فطارية

..هو انه متزوجة واحبل شبيها هاي

..ماعليج منها يابعد روحي اسم الله مدخلتج على الله اليستر علية وعليج مكتوب عليه الخوف عليچن

بس بيوم امي سمعت بي دعاوي عليه ناحت لمن طر الفجر انام واكعد وامي تنعى بصوت ناصي وتشهگ

چنت احفظ بسرعة ويظلن ابالي كل بيته تگول وهالبيت هذا البچت عليه نص من الليل وهي تبچي وتگول

هنا يديرة اهلي الموحشتني حوت الغريبة وماحوتني

هنا يموشه يسباح گلبي ولچ يمه شلون عفتچ وماغسلتچ وين گاعچ يبعد امچ وين الگاج انتِ وعزازي

فزيت افتح عيوني بقوة امي تنعى عليه وانه عدله لو تتحلم امي

..اسم الله يمه شبيچ

..هايبعد امچ مابيه ذكرت ابوچ وبچيت

وبفطرة وبدون ماادقق وازيد بالسؤال عن السمعته اعتبرته شي عادي او ظل ابالي امي تخاف تفقدني مدري تحضر روحها الفقدي خفت على روحي وعليها بس اتناسيت خوفي وفضولي اخذني الباب ثاني

..يمه شنو شكل ابوي لو شنهي صفاته احچيلي عنه

..بعد روحي طوله ابوچ نصار النشمي شگول عليه اگول الگالته فدعه بأخوها

ابوج الثلاثة مرافجاته ..الكرم والمراجل والثباته

ابوچ جاراته خواته ابوچ العبد والضيف اغاته

..مافهمت يمه

..تكبرين وتفهمين ابوچ نشمي واخو خيته سبع حيد حفظ القرآن بصغره وچان الأول بسبوگ الخيل

ابوچ شاع صيته وعله اسمه على اربع اخوان يكبرونه الناس تتركهم وتتناه

شحچي عنه قليل

سكتت ماگدرت اسأل اشوف عيونها تشرح اكثر

وبعد مانشفت دموعها فضولي ماخلاني اطول السكوت

..شني شكله

..لون عيونچ اله بس هو طويل چنه بيرغ هيبة من يطر الزلم وعمامه چانو يسمون الرمح من گد ماطويل وشكله مهيوب وچان هادئ لو حچة الكلام مايعيده بس يسولف سالفته وفن اليغيرها لو يگلوله عيد

ابوچ ماكتله الا غيرة النسوان نسوان ابوه حالن اخوانه وهم امچ اخذها وعليها العين منهم بس ماچان طمعان بيها نقذها من حچيهم ومكايدهم وعد عليها واخذها بدون مايلتفت التشويهم ولا الرادتهم لأن الرادها جبان جان يخاف من امه ياخذها

..مافهمت يعني اخذج من امه الچانت تكرهچ

بحسرة گالت

..اخخخخ اي يمه تكرهني ومارادتني لارادتها هدومها ويحرمها شم الجنة مثل ماحرمتهم شم الهوا بحيلتها ومكرها

ورجعت الواقعي وياها وگطعت سوالف شهلة وذاكرتها وانه اريد اتأكد

..شلون كل هالتلميحات وماشكيتي هي مو امچ ونوحها على امچ اكثر من نوحها على روحها وعليچ

..ولا مره شكيت لأن امي امي وعيت عليها وهي امي وريحتها ومحنتها تگلي ماعندج ام غيرها

..ليش ضمت عنچ الحقيقة

..ماادري رغم لو حاچيتلي يمكن احبها اكثر ولا بيوم اتغير عليها احبها لأن في سبيل تحميني عافت وراها اشياء تخلي جبال من الهموم بظهرها

..تعبتي يمه نكمل سوالف باچر بأذن الله

..بعد روح امك اي والله تعبت

..تعاي افرچلج راسج

..خلت راسها ع المخده والمخدة بحضني نصيت بستها احسها بسبب وسواسي تتقيد حتى تلمسني براحة الا اطمنها

الوسواس اتعالجت منه بجزء بس ظلت مشاكله ملازمتني كرهي للزواج اشمئزازي من البس او يلبس متزوج مني واكلي منهم لو اموت مااكل الا من ايدي وهذا بوكتها حجو عليه هواي رغم جدي عمامي من يشتهون اكله مرات يسووها مايستنكفون من الطبخ وعزايمهم هم يطبخوها عادي بس من وصلت للخبز اتعلمت اني اخبزه هنا كلها اعترضت وحجت ومااهاميت حاجيتها مشتت ذاكرتي

..احبچ شهلة

..يابعد روح شهلة

خليتها تهدأ وگمت عجنت بخمرة قليلة يختمر للصبح

وبعدها فتت نمت لگيتها كاوية ملابسي ومعلگتهن

الصبح گعدت على نفس الاصوات وروتينا اليومي ومثل مااحب طلعت اسمع دعاها وبعدها اتريگنه واتوجهت للمستشفى وي المهيب على مااشتريلي سيارة

وهناك بدوامي مثل يومية

اتوجهت الداخل قاعة هادئة بمركز التأهيل، عيني على أشعة الشمس تدخل من النوافذ وتنعكس على الأجهزة المعدنية تبين لمعتها

وأرضية المكان الي تنبعث منها رائحة المعقمات بعد مسحها وغسلها من المعينات .

وگفت بصف مريض شاب أُصيب بإصابة بالحبل الشوكي، ثبتت حزام الدعم بخصره بعناية وصبر.

ماچان مشهد عادي ولا مجرد جلسة علاج، چانت معركة صغيرة ضد العجز واليأس بالنسبة اله وألي

المريض حاول يوگف بخطوات متعبة، واديه ترتجف وهو يتمسك بالعكازات

بينما اني اراقب كل حركة بعين الخبرة والدراسة ، مستعد أسنده قبل أن يسقط بلحظة.

(ممتاز... عاشت ايدك خطوة ثانية٫خطوة وحدة.. لا تستعجل)

حچيتها بصوت هادئ مليء بالثقة الناوي ازرعها بي من خلال هدوئي وصبري وتركيزي

قطرات العرگ اتجمعت على جبين المريض، وأنفاسه ثگلت ، بس عيونه تحمل شيئ ما ينكسر بعد... تحمل الأمل الي عايشين بي كلنا والي هو من مضامين ايمانا بالله عز وجل

بزاوية القاعة چانت أجهزة التحفيز الكهربائي وصفارات الأجهزة الخفيفة تملأ المكان،

بينما احنا مستمرين بعلاج المريض

مرت الممرضة تدفع كرسي متحرك لمريض ثاني.

كلشي بالقاعة يوحي بأن الشفاء هنا مايجي بسرعة، يجي بصبر وارادة وتحمل وتكرار

ووي كل خطوة ينجح بيها المريض، چنت ابتسم بفخر حقيقي، كأني اشوف إنسان يعود للحياة من جديد، مو مجرد عضلات تستعيد حركتها.

..بطل انت اليوم.. الجلسة القادمة اشوفك افضل ان شاءالله

بينما يستراح المريض استراحتي نفس عميق وبداية جديدة وي مريض ثاني بعد مااشرب كوب چاي من الترمز الي محضره والخاص بيه

شربت كوبي واجيت

اتمشى بالممر الطويل صوت المرضى ونقاش الكوادر ياخذ حيز من هالمكان ويكسر الهدوء والصمت والاجواء الكئيبة

داخل غرفة العلاج، گعد شاب ثلاثيني على طرف السرير الطبي،

رجليه ساكنات من وكت الحادث، وعيونه متعلگه بالگاع حسيته يخاف يرفع النظر حتى لايشوف مستقبل معدوم

بيدي ملفه الأزرگ اراجع المطلوب مني بعلاجه قدمتله كوب ماء بارد يشربه گعدت گباله بدل لا اوگف على راسه كمشرف مكلف بمهمة هو مكره عليها

مابدأت بالأجهزة أو التمارين... بدأت بالكلام.

..شلونك يابطل ..اليوم نحاول نوگف عشر ثواني أكثر من أمس.

رفعلي راسه بتعب بصوت مكسور گال

..وإذا ما كدرت؟

ابتسمت بهدوء، سامع هذا السؤال عدة مرات من قبل رغم مداوم من اشهر مو هواي

..عادي نعيد المحاولة

بعد دقايق، ثبتت الأحزمة الداعمة بخصره وصدره، وبدأت بتشغيل جهاز التدريب على المشي وبصوت ازيزة الخفيف صبينا تركيزنا اني وهو

قدمه اتحركت ببطء شديد فوگ السير العلاجي

خطوة ثگيلة والثانية أثگل منها.

كل عضلة بجسمه چانت ترتجف من الجهد، واديه تضغط بقوة على المقابض المعدنية للجهاز حتى ابيضت اطرافهن

أما اني چنت اسير بجنبه تمامًا، اراقب وضع الركبتين، واعدّل توازن الحوض، وأمنعه من السقوط گبل لايحدث بلحظة.

..عفية.. ظهرك مستقيم... لا تباوع للگاع ..استمر ..تمام

توقف المريض، تنفس بسرعة، اتمكن منه التعب

هدوء وصمت قليل ماواضح منه الا خطوات المرضى المراجعين بالممر

حاچيته بهدوء

..تعرف شنو الفرق بينك اليوم وبين أول يوم أجيت بيه

بتعب اشرلي

..لا

..أجيت وانت تشوف الكرسي نهاية الطريق ..واليوم انت تحاول تمشي اكثر واسرع

واجيت بوكت توني جديد اشق طريقي بصعوبة واتعلمت منك هواي ومن باقي المرضى

اتعلمت كل خطوة بصعوبة تتحقق بداية الحياة جديدة بقدرات اكبر

..ممنون منك

..اني الممنون ..مشافى معافى ان شاءالله

نهاية هاليوم مرضية رجعت بعد ماوصلني علاوي للگراجع. مناك رحت للبيت لأن المهيب خفر

لگيت امي غالبها النعاس وغافية وبأول خطوة الي بالبيت فزت رغم هوايه منبهه تكمل نومتها لو شافتني

..ها يمه هلا بجيتك

..هلا بحسچ شهلة المزيونة ..علاوي يسلم عليچ هو وخالتي

..

..خايب تروح فدوه الطولك شهلة وعيونها وكل نبض ودم يسري بجسمها ..والله يسلمك ويسلم خالتك وابنها

..شلون اني بسوالفچ الدافية اني اشكر ربي خلقچ ام الي .. وين اكو هيچ ام تنگرط

..جوعان يبعد عيوني

..هسه بين ماارتاح اجهز الأكل ماكله لو منتظرتني

..لا يمه واكدر اكل وانت ماماكل سويته وعلى حطته

..يمه فدوه اروحلچ اكلي لاتتعطلين وياي ..شمسويه انتِ

..شويتلي بيتنجانه وعندي روب

..لا هي هاي اكله وانتِ جوعانه اصبريلي اسبح الجو حار واسوي اكله نحبها اثنينا

انطيني هدومك اغسلهن مادامني واگفه ومحضرتلك تراكك تلگاه بغرفتك معلگ وره الباب

..بوسه الاديچ

بعد ماارتاحيت طلعت اللحم السالگه من الفجر قلمت الباميا وحمستها وي اللحم وي ثوم اعصر بالطماطه وامي يمي تسأل

..شلونه يومك اليوم شو جنك تعبان

..خير وبركة ..دعائج ملازمني مااشوف الا الخير ان شاءالله.. والتعب نوم ساعة كفيل يعيدلي نشاط جسمي

..ارتاح وروح الأخياتك اجت ريمه تسأل عليك تگول مشتاقتله بس شو تعبانه وماحجتلي بس گالت صار ايام ماشايفته واجيت اسأل عنه

صفيت الطماطة ودرتها بعد ما هدرت الباميا بچف مي بعد الحمس

..شبيها ريمة تعبانه مريضه لو زعلانه

..ماحچت شي بس وجهه ملبوگ

..عند عيالها هي لو يم اهلها شگالتلچ

..لا يم عمك سليمان

..سهله بعد الغدا اشوفها شعجب مااتصلت عليه

خليت التمن على النار نشفت اديه واخذت تليفوني اتصل بيها

..روما شلونچ ..مارتني اليوم

..اي والله جيت اشوفك وهم عمتي من زمان ماشايفتها مرلي عند ابوي مشتاقتلك

..على راسي امرلچ البنات شلونهن

..بخير ويسألن عليك

..ساعة واجيكم اتغدا واجي

..لا نام ارتاح وعلى راحتك تعال اني بعدني هنا مطولة

..ها؟

..والله

..وعلى كولة شهلة زايرة نايرة

..اثنينهن

..عزام وين ؟

..مدري بي

..اجيچ ونتفاهم ..عمي يدري

..لا ماگتله اريدك تجي تعرفني الوحدي جبانه اني

..خليها علي بعد اخوچ سهلة ان شاءالله

..عدها شي مو

..مبين هي وعزام لو امه

..عرفتها وجهه ملبوگ ..الله يعينها على ماابتلاها

..ابليه هو واهله الله شاهد اني اتحجج عليهم كلشي ولا خواتي

..الله يحفظك الهن شوف عمك وامشي بطوعه ..سليمان حگاني وحكيم

كمل الاكل صبيت الأمي والي وگعدت اكلت شلون ماجان بالي يم ريم

مدللتنا هاي عمي سليمان عنده تلث بنات ريم وغزال ورشا

وشگد رادوه يتزوج على امهن ماقبل يتزوج بسبب المشاكل الشافها ببيوت اخوانه من النسوان ولأنهم عجزوا يعدلون گدامه وهم لأن يحبها

بس للأسف امهن ماطولت وبأصعب فترة تركتهم بوكت القاعدة چانت تنشط بمناطقنا ومطلوبلها كل شخص بالجيش وعمي چان قائد بالجيش راجع توه بعد السقوط.

الجيش اتهيكل وبعدين رجعو القيادات العسكرية وهو منهم نفذو هجوم على عمي بحجة مرتد ومنتمي للجيش الوثني مثل ماچانو يسموه

چان هوعائلته بعد رجعتهم من بيت اهلها هو انصاب وشالوله الطحال وجزء من الكبد و هي توفت وغزالة خسرت عينها اليمنى چانت صغيرة وبحضن امها واتضربت وياها الله سبحانه نجاها بس خسارتها مو هينه

وهذه چانت اقوى انتكاسة العمي قربتني اله اكثر خاص هو عكس خوفه عليه وصار الدوامي من اروح اما هو يوديني ويجيبني لو حمايته لأن امي غريبة وچانت الطائفية بأوجها ومنطقتنا عالگة معارك طاحنه منا امريكا وضربها تضرب مواقع للقاعدة بس تتعمد تخطيها وتقتل ابرياء ومنا القتل على الهوية

بوكتها عمري 13 سنة ب2006 هذه الأحداث

وظليت اني بينهم والأقرب الهم لهذا هنه خواتي وشعوري بالأخوة وياهن حقيقي خوفهن علي ما ينخفي وخوفي وحرصي عليهن اكثر وريم من اول ماطلبها عزام اقرب ولد عمي الي گتله خوتنا اني وياك بجهه وريم وسعاتدها بجهه

نمت ساعة وگعدت درت على بيت جدي عمي ساكن وياه وبعد وفاة زوجته اجدادي قنعوه يتزوج اختها وگلوله ماتلگي احسن منها خاص هي منفصلة لأن ماتخلف

وتبقى خالة للبنات وترعاهن بس الي صار ماكو اتفاق ابد لابينه وبينها ولا بين البنات وخالتهن

هي مو قصور بيها ولا بيهم بس الظروف الجمعتهم غلط وظلت تحس ان حياته وياها هامش والبنات وعن على امهن وماگدرن يشوفنها عوض ظلن اقرب الابوهن وهالشي خلق حزازيات بس كل هالامور امشينها خاص جدي يمون ع الكل واله نظامه بالبيت وهي بنت اخوه وتعزه حيل تشوفه اب واكثر واطيعه شماراد

مديت ايدي افتح سرگي الباب من الداخل وصحت من الحوش

..السلام عليكم ..جدي هنا

بيت جدي جبير وبناءه حديث عمي جدده وحديقته احلى مابي تزهي ومداريها وكل كعداته بيها المغرب يصلي بيها بالصيف وهسه قريب للمغرب

اجاني صوته من تحت سقيفة العنب

نفض ايده واجه واني اتقدمت

..شلونك جدي

..ياهلا بالگاطع يول يومين والثالث ماتدور تشوف جدك وتسلم تريد تصير مثل ابوك انت مو اني اشوفك غير

..والله ياجدي وكت ماكو بين الدوام وشغلي بالبستان يادوب الحكي اكل وانام

..ميخالف الي حصة بيك وغالي عليه انت افرح بيكم انت وولد عمك من اشوفكم حواليه

..حقك ماگول مو حقك على راسي اجيك ادلل

ريمه وين وعمي هنا لو طالع

..اگول الجابك هالوكت منو طلعت ريمة

ابتسمت وصاح

..ريمة جدي اخوج يريد يشوفچ

..غزالة وين اقتنعت بالعملية لا

..عمك عجز منها حاجيها انت وشوفها

..الله كريم

اجني بنات ريمة خديجة وسارة

شلت خديجة ابوسهه ونصيت اشيل سارة هم

..امچن وين

اجاني صوتها

..هلا بيك صخر شلونك

..بخير الله يسلمج ..احجيلي شعدچ

..تعال ارتاح

..عزاله وروشه وين

..رشا فوگ تكوي ملابس بابا

نصت صوتها وتحجي بشفايفها

..وغزالة بغرفتها معتكفة

..ليش؟

..ابوي يقنعها تسوي العملية زراعة تجميلية وماتقبل تكول مااشوف بيها شنو الفايدة هذه المخليتها ماتفرق

. .وليش ضايجه اذا رافضتها بقناعة

..لا اكيد مامقتنعة وهاي القديمة ثابته واصغر بس الجديدة متحركة وشكلها طبيعي بنسبة جبيره متبين عين اصطناعية

..خلي احاجيها وارجعلج

.فاتت تبلغ خالتها بجيتي مريت من باب المطبخ نصيت راسي وسلمت عليها ردت باحترام ولا يوم قللت مني الهذا احترمها

اتخطيتها ودكيت باب غرفة البنات

..غزالة اني صخر فتحي الباب احاجيج

فتحت الباب عينها حمره دم والثانية شالعتها ومخليه عليها قطن لاصقته

..شلونج ولو زعلت عليج تسمعين بيه هنا ومااطلعين ليش

..لا والله ماادري

..ليش ماتجينا امي مشتاقتلج

ابتسمت

..اني هم والله بس هالايام ضايجة وماحب اطلع

..منو مضوج غزالتنا احجيلي واني اطلع حگچ

..محد ضايجه وحدي بس اكيد بابا مبلغك بعملية زراعة عيني التجميلية

..لا اكيد حجالي وشجعته سويها غزولة انتِ حلوه بكل حالاتج بس الطب اطور والله خلق العلم والعلماء رحمة للناس ومو بس احنا بحاجتهم هم بحاجتنا يعني صاحب الزراعة يريد يشوف انجاز يشوفه بيمن بمثل حالتج شي طبيعي لا هو عيب ولا حرام هذه الدنيا ناس تفيد ناس

..اخاف اني النتيجة ماتكون مرضية اني على الگزازة الجنت اخليها كوه اتعودت واتقبلت شكلي

..عوفي هالهواجس ماتفيد ولاتفكرين بيها سوي العقلج يكلج عليه صح والعواطف ركنيها خليلها وقت معيين تضعفين بيه الها وتنفظين الضعف وترجعين اقوى اما الاستسلام وهن ومااريد اشوفجن ضعيفات ابد لاتنسن بنات منو انتن بنات سليمان واخوجن اني لو مو بعينجن وماحاسباتني اخ الجن

..انت اخونا وخليفة ابونا والأقرب اله هم كلامك صح بس قبل كلشي

نصت صوتها

.. اوعدني تقنع بابا يسفرنا للشمال اني وياه والبنات بس بدون خالتي

..خباثة هاي مااشترك بيها

..يعني من تسافر هي وياه الوحدهم عادي بس احنا ميصير

..هم زوجين وانتن بنات سفرتهم الها خصوصية بسفرتجن مالها داعي مع هذا عمي لو حاجيتيه انتِ مايگلج لا

..راح يكول لاتفكرين بخبث ومامتوقعج انانية وهي مو انانية خصوصية بينا وبس ارتاح بوجوده بينا الوحده اكثر

..ومخليتها بوجهي هاي الاوصاف من ابوج .. المهم مااردلج طلب احاول اخليه ياخذج تسويها هو وياج رشا ريم مااخليها اطول هنا ان شاءالله

..هذا هو احضر احتياجاتي اذا هيج

..خل نشوف الوالد فارغ لو لا وشوكت حاجزلج للفحص والعملية شنو الاجراءات بعدها احتفلي

نزلت رشا تلف بشالها

..ياهلا بالأشهل

..صخر لج

..صخر الاشهل

..وين وصلتي بدوامج تظلين لو بعدج مصره على النقل

..لا يمكن ابقى احسن الولد يكلولي اهدأ ويحترمون اكثر من البنات

..الوصلج هالمعلومة اكيد هو محترم ومشايف دكايكهم

..حجالي ابوي عن سوالفك

..انسي لاتفضحينا خليني مخوف الجهال ومصدكين بعقلي ..تعاي ريم يم جدي عمي اجه

..

ريم ...

امشي بظهره محتميه بي اهلي ماعدهم بنت تطلع من شور عمامها والتتزوج تتحمل كلشي وي زوجها يكبرون اطفالها يلا يطلعون ويستقلون بعد مايشيب نص راسها واني على كلشي مرت عمي تعايرني كل شويه وگالت مثل امچ ماتخلفين بس البنات

وياخوفي تطلع گصصهن عليجن ويموتنج لو يموتن ابني من غير الشغل تذبه علي وام الولد عدها مدلله وعبالك جايبتلها الوريث الشرعي للملكة

وصلت مرحلة تگل العزام امنع حملها لو ماتتقربلها الا ايام محدودة لاتجيبلك بنيه ثالثة عزام يماشيها ويحجي وياها كانه لاكيتله كنز مو معلومة صح كايلتزم بيها ويكلي اريد اطمنها وتسكت بس اتمادت وياي اكثر

هذا غير من يصفن عليه هي والجناين رغم كلنا بنات عم بس بسبب التفرقة تصير حزازية وناس تكيد الناس

واني تعبانه مامجبورة اتحمل هالعيشة ابوي دللني عمري كله مايوم واحد صاح عليه وكملها صخر من كبر خلانا فوك الغيم شنطلب وشنتمنى لأن وعينا وابوي من شاف عمي مستغني عنه اتبناه كأنه ابنه واخ النا على طول يوصيه بينا

جدي من لمحني محتمية بي من نظرته عرف اكو شي

وابوي هم باوسه والتهو بالسلام انتظرته وين يگعد حتى اصير گباله واركز بكلامي ومااخاف من نظراتهم

ابوي گال

..مبين ريمه موديه عليك ووراها سالفة ..خير يابه احجي

گعدت واتحمحمت

..اني ابيت عمي بعد مالي عيشة

حجيت وماخليت عيوني بعيون جدي

جدي حازم صعب عيونه تخوف من يخزر وجهه ابيض احمراني يبين عليه بسرعة احنا نشبهه ابهجت الجبوري حتى صوته يشبهه وعينه من يفتحها ويعترض يخليني اخاف واتراجع بس مصره هالمره مااتراجع ابد

اجاني صوت جدي وهو يگول

..موال جديد هذا

ابوي گال

..السبب انطگيتي عالو عليچ عليچ احد مزعلج عمج عزام اخوانه اتعدو حدودهم ؟

..لا مو..

..لاتكملين يجي رجلج وترجعين سوالف النسوان دوسيها

خنگتني العبرة ودموعي بطرف عيني

..يابه خلينا نفهم منها مايصير سديتو السالفة گبل لاتبدي

غير نفهم شيجرالها عدهم يعني عزام اذا مايصد الاذى عنها شفايدته خو ما الي نريده مايأذيها وبس مسؤوليته حمايتها

سكت ابوي يلاعب سبحته وبس صوت طگ الخرز مسموع

كمل صخر

..جدي گبل بعد ماتوني بديت اكبر وشفتني اتوحشت وظليت وياي انت وعمي وتهديني وتعلمني ..سألتك سؤال اعتبرته غريب بوقته وگلت متأثر من حياة اهله گتلك ليش المرأه تنظلم وليش لازم يكون الرجل ظالم گتلي مفضله عدنا مرتين

المرأه بدينا الها كرامة وتقدير وحقوق هذا بالاسلام وبالعرب المرأه تتقدر من راعيها وحظه وبخته ولحيته كلهن بديها والها ومؤتمنة عليهن الا القليل حشاك

بس اكو مثل ابوك يستغلون المالها احد يطلعون مراجلهم بروسهن وهذا الكلام ترسخ بيه

ومن ذاك الوكت اخذت عهد بنات عمي اني اخوهن والهن عشيرة ومستعد ازعل اكبر واحد الاجلهن عداك انت وعمي

دموعي جانن يتحججن نزلن بس بفرحه غريبة وانه اسمع كلامه وابوي يباوعله بفخر

وكمل بكل ثقة وهو يباوعلي

..وريمه صيورة متأكد ماتطلع وتعلمني بزعلها وتريد مني ومنكم حل الا الي متحملته شي قوي

شهگت وابوي دارلي مستغرب شهگتي

..اگوم واگعد بأم البنات والعار اشكال اتعيرني بأمي بدون احترام الفقدها وتعتبرنا فگر وماتت بسببنا وبناتي مثلنا يوميه تذكر هالشي من غير كرهتني حتى ابنات عمتني تخليني اخدمهن واخدم ولدهن ع ابو هنه يجيبن ولد

..لو مثل امجن محترمات وفارضات احترامهن حتى على ازواجهن ماعيرن بالخلفة وانتن نعمة وباب رحمة الي الله يرضا عليچن مايوم شلعتن گلبي بتصرف مو زين اني هالشي مايرضيني ابد خلفة البنات احنا المسؤولين عنها عزام وين ؟

..ماادري اتعاركنا اني وياه وطلع بعد ماعرف مصره اجي واشكيلكم

..فوكاها يعاركچ هو هم

. يريدني مااتنفس واعترض واكول لا ولا اشكي اله وادوخ راسه يريدني اسمع واغلس واقدم خدماتي برضا وقبول ولا كأني بشر

حاجاني صخر

..عزام خلوه عليه احجي وياه واجيبه العمي واجي وهو غصبا عنه يحل كلشي هسه ارتاحي وجدي وعمي رخصوني

..اكعد يابه بعدنا نسولف لاتتعارك وي ولد عمك كلشي ينحل بهداوة

..لاتوصيني مو كلشي عرك

نصيت الجدي ابوسه وگمت صحت ريم تسد الباب وراي وارد احاجيها الوحدنا

..لاتزعلين خلي علي عزام وهو هم مضايق ترى من حجيهم على بناته ويموت عليهن

..ادري والله بس لشوكت اصبر ولشوكت هو يسكت

..هذا هو هاي الگيعان هواي جدي ينطيه مكان يذبله مواد ونتعاون ونبنيه بيت ع كدكم انوب كبروه

..والله بغرفة وحدنا راضية اعيش

..سهلة ارتاحي

..ماادري شگلك الله يحفظك ويحفظ عمتي الك ادري ها اكثر وحده تعزها

..ادللي لاتگولين شي واجبي هذا ..هاي فد يوم من رشا انضربت من حارث من جانو صغار وهديت افزعلها منه گلت الأمي شلون الأخت تكتفي بأخوها وتحس ماكو انسان اقربلها منه

گالت يخليها تگله

(انا بزودك احجي معلگ اگلك بطل وتگلي حگ )

مافهمتيه مو بوكتها هم مافهمته بس معناه جبير من شرحته گالت حتى حگ وباطل وياها ومايخليها تلتجأ الغيره لو تنكسر واني مااكلج ع الباطل اوگف وياچ لأن هم ماارضا بالمو زين بس بوجودي اني وعمي احچي معلگ ولاتخافين تنكسرين لا ابناتچ ولا بأي شي يمسجن

..اروحلك فدوه الله يحفظك ويخليك النا يارب

..ويحفظجن منا وارجعي ولو راسلچ عزام لاتجاوبيه ولا تفتحين خط عليه وممنوع ترضين منچ اله بعد ماصرنا طرف

..لا ابد اذا مو انت الي تگول ارجعي ماارجع

طلعت منهم لاگاني عمي ابو عزام جاي العمي سليمان

..حياك الله عني فوت محد يمهم توني طلعت

فات عمي ومتأكد جاي يرجع ريمه ويلم الموضوع مثل كل مره يمون عليهم بس بعد الانحجه مايخلونها تطلع وياه متأكد مايخطوني لاجدي ولاعمي ولا هي

اتصلت بعزام مايرد تركته يهدأ ونسولف

لگيت امي اتابع مسلسل مناوي باشا اعادة مدري شكم مره تعيده

..شهلة الچ خلگ نكمل

..مانسيت

..لا سوالفچ ماتنسي احجيلي بعد الليلة المانامت بيها شصار

..ريمه رجعت

..لا يجي عزام ونحجي ..احجيلي سالفتچ

..اي بعد هالليلة امي غبشت بينا سافرت منطقة بعيدة وخلتني يم مره بدوية وغطت عليه نهار كامل للمغرب بينت مانامن للصبح يسولفن بناس الله معثرهم ومره بسبب مكرها وحيلها راحو ولدها باخبارية للحزب وماظل منهم الا اولادهم بليلة ويوم معدومين وي مجموعة الانتفاضة لأن ماخذين الاسلحة للدولة وضامينها يمهم رغم مامشتركين بس راحو بيها وكلها تسولف بعثرتهم والدم العثرهم وماخله بيهم حي

..جانت تقصد كتال اهلج

..الظاهر تقصدهم بس بعدنهن بالسوالف حتى لا افهم واني اصلا مافاهمه سالفتهم هالوكت شني وبهاليوم عرفت امي مطلعتلي جنسية بواسطة من البدوي الشحص عرف اله بالنفوس

ويافرحتي من رجعت والجنسية بيدي بس لگينه ام سمير لامه الدنيا على امي تكول نهبت ولأول مره اشوف امي تنضرب اول مافاتت ضربها ابو سمير كدام اخوانه وامه وولده ومرته مااتذكر امي صرخت لو حجت بس اني شبعت بجي وبدون وعي كمت اصيح

..كسر بيدك لااطگ امي ليش اطگهه

شكد جنت اعزه واحترمه نسيت كلشي من شفته مد ايده وهي كالتله بلغت ولدك يوصلولك خبر اطلع جنسية الموشة كلها محد كال وهم نكرو ماحجت ولا گالت بس بيومها صابتها رجفة للصبح تنفضها البردة نفض اغطيها وترجف حتى غطا ماظلي ازيدها ظليت الوب وهو راجع الغرفته فوك وبعده مريض وابنه يمه شافني محتاره محاجيه اجه بتعب يشوفها نسيت الصار واترجيته يشوفها شبيها

گال خليلها كمادات رحت ابلل الخاولي وهو ظل يحاجيها وهي بس تون شفته ندمان وابنه كال بس يطلع الصبح اخذها للمستوصف بس هي صبحت زينه واصرت تطلع للشغل

ومن حاجاها گلها عذريني انخليت بموقف مو حلو گدام اهلي وناسي محسوبة انتِ عليه مايصير اطلعين بغيابي گالتله

..حگك وعاذرتك انت هم اعذرني تعرف بالبية

..الله يعينچ

طلع بس امي من هاليوم اتغيرت

واتذكرت ليش ابداية مرضته جانت تحذرني بغيابه شيصير النا وبهذا عمري مو مال ركض شوارع ومدن

ولاتگدر المدينتنا توصل كلها ادور عليها حسب مافهمت

بيوم هي وابو سمير اتلاطشو من شاف شاب موصلها ونفسه الي يحذره منها وكالتله رايد موشه على سنة الله ورسوله وبلغته يجيب جبيره ويخطب بالاصول ورادها هنا شغله هنا مستقر

..شنو شغله هو

..عدهم تجارة هنا و كيعان وهو مستلمهن

..شعرفتي عنه وتنطيه البنيه

..العرفته رايدها صار سنة مامل من السؤال عنها ويتوسل شريد اشرط وهو ينفذ

..خل يحاجيني حتى اسأل عليه

واني سمعت بيها زواج مدري شجاني خوف بفرحه لأن جنت مأيسه من اثنين دراسه وزواج وهم اخاف افارك امي مااكدر

گعدت ع صوت امي وهي تنعى يمي جنها تلوليلي وتجيب طاري البنات تبجي من گلبها واكو بيت دوم تذكره يقبض گلبي ومااعرف معناه وليش!

بس احضنها قوي احس بحبها وخوفها عليه

..تعااي انا وياچ نگعد نشبع سمر وارواحنا ترد

تعاي انا وياج بس.. بيناتنا نلس الحچي لس

ويخاف الغريبة تسمع الحس هنا يموشه هنا ييمه

عبرات امي جنها مضيعتني ومالاگيتني احضنها حيل تهدأ وتفطن الي وتحضني اكثر تمسح دموعها وتسولف وياي

وغبية مثل عادتي بفطارية ماعندي غير هالسؤال المهرب الوحيد الاشرد امي من الي ابالها والمضموم بگلبها ماادري انه بهالسؤال اشعل نيران بصدرها ماتظهرلي سعيرها بس تعيشه

..يمه انه اشبهمن

..عيونچ عيون ابوچ من اروح فدوه لعيونه

..تحبينه يمه

..شلون مااحبه ابوچ شمااحجيلج عنه واكو نشمي وزلمه زين مااوصفه ياحيف راح بمكر ونحش النساوين وخسروه كلهم حتى الكاتله خسر

..ياهو الكتله يمه

..اخوه وولد عمه يمه ولو ظالين وماشردنا يكتلنا انه وياج

..بس هو انكتل

رغم ادري الي اخوه مكتولين بس اكو احساس يكلي اكثر من عيونها وكل مااعيده تجاوبني نفس الجواب

صفنت وبجت ولطمت گصتها بقهر

.. امده حظي الماحواهم مصيبة وطاحت عليهم طويت الناس والزمن طواني

اختج واخوج وياهم بس انتِ بليلتها يمي

..چا انتِ ليش مو يم ابوي واخواني غير انه وانتِ يمهم

سكتت وظلت بس حسراتها تسولف

انه مااحب الح عليها امي متعوبة متعوبه حيل وجبيرة ماهي صغيرة بس مدللتني

بس چانت تگلي لو ضامچ الضيم الچ اخوه كبرو هسه مايتبرون من لحمهم ومن الح تگلي اقصد اولاد عمومه مو اخوه كلش ودام انه وياج مايردونج خلينا نعيش الروحنا وارضي بقسمتج يمه لا اتعبيني الولد خوش ولد ورايدج وشاريچ والله يگول مااريد من الدنيا بس عيونها

ومنا وبدت قصتي وي ابوك اشهد الله عشت وياه ايام مامنها بس كلشي انگلب بعدين

يتبع ...