رواية كتوف مائلة الفصل الثامن 8 بقلم نور الشمس

ريم..

اتصل بينا ابويه راجع هو وغزوله رحنا اني ورشا گلبنا البيت فرحانين بجيتهم وسلامتها چنها طابه علينا عروسة مو عملية مسويه غزولة صغيرتنا الماشافت حنان امنا هوايه

ومالحكت عليها نحاول نعوضها رغم نعرف ماكو شي يعوضها حرمانها

مو بس فقد امي الوحده مأذيها.. الاثر الي انترك بيها ماينسي ونرجع ونگول الحمدلله بلطف الله وكرمه بقت عايشه

ورغم صخر عنده دوام بس مانساها ابد موصي عمار وعزام يشترون ذبيحة ويذبحوها الها بجيتها

صاحني عزام نسولف على جهه يشرحلي اليوم شراح نذب من مواد وشنشتغل البيتنا

وعمار يتصل بالحديقة بعيد عنا

وخالتي صاحتني رحت للممر اشوف شعدها هي جانت ادور جدي تحاجيه وجدي طالع وي عمي الفاتحه المعارفه ابغداد

..ها خالة صحتيني

ردت وكل ملامحها مقتضبة

..منو جاب الخروف

..عمار وعزام جابوه

..كالولج شگد حقه ترى العندي ماانطي منهن لمن ابوج يكلي يلا لاتتصرفن بكيفجن

استغربت اسلوبها الماله داعي

..ترى صخر موصيهم وحتى لو هم جايبيه ماينتظرون تنطيهم فلوس ولا احنا ماعدنا وننتظر ناخذ منج الحمدلله ابويه شمخلي يمج مخلي يمنا اكثر

وهي فعلا خزنة ابويه وفلوسه كلها عد رشا وغزاله مايخلي يمها الا كد مصرف البيت وشيحتاج

..انتن لازم تبينن اني لاشيئ عدجن ولا عد ابوجن

..خاله فدوه اروحلج مانريد مشاكل بجية بابا اليوم اعتبري نفسج لاحجيتي ولا سمعتي

بصوت مسموع ومليان قهر ردت

بصوت مسموع ومليان قهر ردت

..يحقلج تحجين هيج مقوين شوكتج ابن عمج وابوج ومنو كدامهم عزام ؟ينطونه اوامر وينفذ لگيتوه على گد ايدكم

توني اريد ارد وعزام گال

..اوامر شنو علميني بيها شنفذت؟ وليش ماخذه هالنظرة عني وعنهم من الأساس

باوعلي بنظرات شك وعتب كل ظنه اني من ذني اليتكشخن ويسولفن بطولاتهن على زلمهن التنگاد بأديهن وهنه مفتخرات

بدون اي رد انسحبت وخلتني بمواجهته مااعرف شحجي وشگول

..معليك بيها تحجي الحالها والله

..الله كريم

گالها وطلع صحت وراه احاجيه مارد

وعمار اشرلي شكو

بقهر وحسرة حجيت

..خالتي بلاء والله سلطها عليه اجت معترضه على الخروف منو جابه وماعدها فلوس تنطي حقه جاي اوضحلها محد رايد فلوس حجت حجي ماله داعي يمس كرامة عزام وسمعها هسه اباله اني اقلل منه بغيابه

ذب جكارته من ايده وسحگها

..لايظل بالج اني احجي وياه بس اذا بيج خير خليلها حد اليرضيه

بكل فهاوة استفهمت..واني بلحظتها اريد توجيه فعلا

..ابسطها يعني

..لا مو هيج شبلاچ .. بس لاتضمضيلها احجي العمي وخلي يرد كرامته ويحس بروحه غالي عنده وعندچ ترى عزام مايستاهل هو مضغوط عليه امي ماتحاجيه وتلوم بيه وابوي مره وياه ومره عليه وتعبان ابعدكم هم وخالتج هالايام متصاحبة وي طيور السلام العدنا ديري بالج

..ادري والله وهذا المضوجني هو ماناقص قهر وهاي الصحبة من زمان تكلك بنات عمي وكرابتي ومامأثرة على احد

..بس بدت تتأثر وتأثر ..ع العموم سهلة تنحل ان شاءالله

فتت للبيت افور لكيتها يم رشا ادردم ورشا ماساكته ترد

..على اي اساس ابو البيت ماكو وماخذين راحتهم هم

ورشا مستمره تجاوب

..منين هم ترى ولد عمامنا مو غربه وبيت ابوي بيت الكل لأن جدي بي والكل يفوت بالوكت اليعجبه شنو هسه صارو عزام وعمار غربه

عزام مو بس ابن عم نسيب واخ النا

..انتن منو الشفتنة وجلبتن بي وصحتن اخ

تريد تكمل واني لأول مره اطلع من طوري

..بسيطة قسم بالله على السويتي الا اگل الأبوي ودوريلج عذر غطي بي خراب بيتي

شو صايره فد مره انتِ تسعين للخراب بأديج ورجليج

..ياادبسز هاي ويايه هيج تحجين

..بعدج ماشفتي من حجيي شي

جنت اصيح بقهر ورشا مستغربة لهجتي والنبرة الاحجي بيها ولا مره هيج حاجيه باوعتلي تريد تفهم

..شصاير

..لج لا احد داز عليها على فلوس لايوم كنالها احتجنا سوتلها سالفة من الماكو اجت معترضه ع الخروف شكو جايبيه تكول ابوجن ماكال وصيت خروف وماانطي فلوس من حجيتلها منين ومانحتاج احنا اتحسست وظلت تبسمر تكلي لاكين عمار على كد ايدكم ينفذ اوامر سمعها وكام يفور عباله اني احجي

رشا دارت عليها

..انتِ ابالج سالفة سولفيها كولي هيج اريد بدون لف ودوران لأن مو طبيعي الوضع ابد المشاكل الداتثيريها نهايتها شنو گليلي نختصر الموضوع ونلمه مانريدها تطول

مثل عادتها استخدمت سلاح الدموع

..اني اريد مشاكل وين راحت اختي امانتج ثكيلة وحطمتني بناتج مايعجبهن العجب شاب گلبي وراسي بسببجن شكلت شحجيت شصار كليله فهمت غلط وخالتي طيبة ومو قصدها

..لا والله مااكول لأن ادري بيج مو بطيبة حجيتيها وادري قصدج كلش زين ..اني هالمره مااسكت ودبري عذر لأبوي عود

رشا غمزتلي اسكت

..لا هي خالتي هسه تحجي اكيد اكو شي موترها سولفي خالة خل نتفاهم بينا احسن

..والله يارشا انتِ فاهمه ..عزام ماعنده يكمل بنيان ليش توازي رجلها خلت ابوجن يقرضه ذاك المبلغ

واني متأكده انوب يوكعه... مجبور ابوجن يصرف كده وتعبه ع الرجولة

ولو ابن اخوه مستغلين ماعنده ولد ومكيفين يسلبون بي المفروض انتِ متقبلين تگولين تعب ابوي هذا شنو رجال ع الجاهز ياخذه

رشا اشرتلي اسكت حتى ماابجي وجاوبتها هي

..ومنو اولى منا احنا بناته ومن ولد اخو بامواله ..انتِ؟ لو اه‍لج الماوگفولچ يوم

عبالج غافلة عن تخطيطج شلون تردين تزوجين غزالة الأبن اخوچ بحجة هي عين وحده وهو اخرس

والله لو يبقى بس هو

اظفر مايحصل منها مو لأن اخرس لا مايعيبه شي

الي يعيبه تربيتچ ومخططچ الجاي تسويه تزوجيه غزالة وتجيبيه يمچ وتكوشون على كلشي هذا الي ابالج انتِ واخوچ موو

ردت بعصبية وارتباك

..وليش عيني متقبلين شبي ابن اخويه خلقه واخلاق ويبقى ابن خالچ لو يم عمامچن تفرحن بس خالجن لا

..والله جنا نموت على امي وكلشي من ريحتها الحد ماجيتي انتِ خربتي هالنظرة ويوم عن يوم نكتشف النظرة الاخيرة هي الصح ..غزالة شيليها من بالچ وفكري تفكير زوجة بعيد عن اي اطماع ابيت ابونا احسن النا والچ عيشي ويانا ووياه على حب الله الله مايتركج ولا احنا

..طبعا تردن ابوجن بس الجن ومنتظرات اليوم الاطلع بي منا اني ماعندي ولد بس هو الربيته وغزالة تناسبه يجي يعيش ويانا هنا لو حتى اختجن انتن ماتردلها الخير

..حافظي على بيتج ولا تخلينا نعجل هذا اليوم مايفيدج لا ابن اخو ولا تخطيط واختنا احنا وهي نعرف مصلحتها

طلعت ترجف احس برد گلبي بيها اتصلت بعزام

وبس جاوب متحسر حجيت

..هيج تطلع وتتركني بناري معقولة مصدگ كلامها اني احجي عنك هيج

..ختولي طلعت ماردت اتصادم وي عمي احترام اله انسحبت ترى حجيها مثل السم نخر جسمي نخر

..هي هاي غايتها تسممني وياك

..اني اريد اعرف جدي بيش طلب عمي بهالزواجه سبحان الله البطن الوحدة تشيل اصناف هاي وين عمتي ام ريمة وين

..سودة عليه ماتشوف امي ماظلت بهالدنيا الله سبحانه اختارها شهيدة على ايد اقذر ملة

..الله يرحمها ..لايظل بالج اني واعي التصرفاتها تريد استعجل واخذج يمكن تتنحس من ظلتج هناك واني والله ماراح اتهاون بيه ومااستعجلت

..توها صايره هيج قبل من جوه الجوه وكلها تتعجب ليش متوالفون خالتكم بس هسه تركت التمثيل والعاطفة وجاي تكشف عن نفسها

..خلو عمي هو يتصرف

..مل ابويه من المشاكل يريد يرتاح بس تجبرنا على تصرفات مو رايديها ..مادام انت فاهمني شنو وتعرف السبب بالصار الباقي مو مهم انت المهم عندي

حسيته ضحك من نبرة كلامه التغيرت

..اني المهم والله ؟

..ومنو اهم منك عندي ..روحي انت ونبض گلبي

..يابه فدوه الگلبچ اني وكل من يغثچ ..لايظل بالچ عمي وصل وهاي احنا قريبين اطلعو اتلگوو

ركضت اني ورشا اخذنا الجكليت وهلاهل رشا طرشتنا

عيني على غزوله من الباب اجت تركض وابويه وراها يمشي براحة مبتسم فرحان الفرحتها

طلعنا وخالتي ورانا راحت الابوي باسته ورجعت تتحمد الغزالة

گعدنا وفصلت عن هالهوسة كلها واني افكر ابلغ ابوي بسالفتها وي عزام لو اسكت مادامه متفهم. .. ابوي تعبان وتوه جاي ومااريد اقهره

سكتت وهي هم مترقبه بس الصار ابوي الزهر وره ماراحو عمامي بعد الغده صاحها ومااسمع بس صوته العالي نهرها وطلع

طلعت تمسح بدموعها وتشكي الجدي منا بس هالمره الظاهر جدي عنده علم وعرفت عمار مامفوتها وبحجة شقى كايل الابوي ندير بالنا على بناتكم نبتلي بالعار والنار من بيوتكم يقصد نفسه وعزام وموصل الابوي الحجي بهيج طريقة حتى جدي مارضا عليها

بعدها يومين ماطلعت من غرفتها وراها رجعت مثل اول چن ماصاير شي

بدينا تجهيز العرس رشا وانشغلنا بيها متناسين كلشي

...

صخر

يوم متعب بالدوام طلعت ارتاح العصر يم الولد بگاع جدي چانو مخلصين شغل وگاعدين وبنص الگعدة دموع ام الشاب ماراحت من بالي وهي تترجاني وتريد تبوس ايدي وكأن اديني بيها لمسات سحرية تسوي المستحيل الأبنها ووحيدها

بلغتها يحتاج صبر وجهد واهم شي ايمان حقيقي من المريض مريضهم يعاني من تيبس العضلات بعد شلل فتره طويلة العملية نجحت ويحتاج تحريك وتنشيط للعضلة والاعصاب ولأول مره اتمنى فعلا امتلك لمسة سحرية اخليه يركض مو بس يمشي بس حتى اشوف فرحتها وتنشف عينها من الدموع

عندي حساسية من دموع الامهات تأثر بيه حيل

اخذتني صفنتي من سوالفهم انتبهت العمار يعيب على ذوق مهيب وحارث

حارث ابن عمي اخو عمار وعزام الاصغر طالب صيدلة مرحلة اخيرة

ومهيب طبيب معترضين على ذوق عمار بحبه للرشاقة ويعتبرون معيار الجمال عنده مو صحيح وعمار مصر سر انوثة المرأه الرشاقة والباقي عبط

..ماعدكم غير هالموضوع تسولفون بي

مهيب رد

..هو استفزنا من اعترض على ذوقنا اني وحارث

اكو عاقل يگول المربربة مو حلوه

وحارث رد

..اذا مو سمينه خدودها ريانة وتهتز مثل الجلي مو قبول

عمار رد

..تريد خدودها تهتز يول على هالحسبة ماتمشي ع الگاع تتشقلب

ضحكت ع التشبيه ومهيب رد

..تفيدك بطة بت عمي

..لا ياناقص هذا اليخربنا وي الصديج على كولت امي ..مو گاعد وياكم ماتخجلون انتو مواضيعكم كلها سخيفة ومتحمل بس تجيب طاري اختي كدامي مااقبل لا بضحك ولا صحيح وانبهك اخر مره هاي اسمحلك صدك بعدها كلشي يختلف

..هوووب ترى بطة جاهله بس دبدوبة اضحك عليه اني لاتتحسس ..بعدين اختك اختنا هم ماقصدي شي شبيك

..ادري جاهله شجابها على سخافتكم ..ومادام حجيت هم خل احجيها فد نوب مااخليها بگلبي راجعو اذواقكم عدكم خلل عمار عسكري وذوقه مال اطباء وانتو العكس ذوق العسكري يمكم

صاحو الطرفين معترضين ورجعت الگعده اتحولت ضحك اتعاونو على مهيب طلعو سوالفه شلون يلمح لمحة ويكعد يفصل جنه مركز بيها ساعة

رد هو مبرر

..هاي مواهب تفتقرولها عمار يصفن بالوجه ساعة مايعرفها امكيجه لو لا

..مو غشيم نسيبي بس مليانه عينه

صاح عمار

..لا والله اني غشيم لاتسدلي

ضحكت وكمت ادردم عليهم

..لو رايح يم جدي مو احسلي من سوالفكم هاي انوب ترستوني دخان لعبت روحي من ريحتي شگد ادخنون نسوانكم لو بيهن خير يدفرنكم على ريحتكم المتشبعة بالدخان

بالگعده چان كلام عابر ماظنيت اواجه بي واحد من اولاد عمي بالمستقبل واضطر اوگف ضده

بيومها اتصلو بأمي خوالي زواج واحد من ولدهم وعازميني اني وامي اجت بوقتها واحنا ناوين الروحه من الاساس

اخذت اجازة للخميس بس ورحنا الأربعاء العصر مرينا بخالتي ام اسعد وطلعنا وياهم سوه

وكالعادة من اشوف امي كاشخة ومرتاحه روحي تنتعش واحس روحي ماكو اريح مني وكل هم بگلبي ينزاح

خالاتي ماگطعن تواصلهن هنه وخوالي وي امي ويعتبرنها اختهن وجبيرتهن اكتشفت صفة الاحترام حلوه عدهم الجبير جبير مهما كان رايه ومحبته تختلف وهنه يعتبرنها اختهن الجبيرة

والصغير عدهم لو عمره اربعين يعاملوه وكأنه اصغرهم ويحتاج حنان

خالتي ام اسعد نفسها ام صديقي والقريب الگلبي عن بعد ارواحنا مرتبطة

وخالتي الاصغر ام كرار وهذه مسكينة مواليد سبعة وسبعين بس منفصلة واولادها عد زوجها يجوها بالشهر يومين شكد وسطو ناس رادوهم يمها ابوهم قافل وهم يميلون الاهلهم هم

فباقية هي تتنقل بينهم صح مدللة بس ميينه مكسورة بجهالها

الطريق طويل من بغداد المناطقهم خلصنها الحبايب سوالف وكل شويه وحده منهن صاحت

.. يااا

تفززنا نريد نفهم تطلع سالفه عادية وماتسوى هالتفاعل

الطريق ملل مامتعود عليه هواي.. وعلي امه تحجي عليه مايرضا يتزوج واخوه الصغير يريد يخطب وهو بعده

امي كالتلها براحته رجعت سألت وليش اشهل مايعرس

جاوبتها اني

..مااريد خالة مو ابالي الزواج

خالتي من ذني اليحجن كلشي يجي ابالهن

گالت

..ولكم خاف انت وهو مابيكم خير

باوعتلها مصدوم والضحكة غصبا عني انرسمت بوجهي مااعرف شجاوبها

..والله خالك گالها وهو صادق گال العنده راتب وبيت وكلشي متوفرله ومايريد عرس هذا مابي خير للعرس ويعرف روحه

ضحكت من گلبي

..هو اني مابيه خير كلامه صح

دارت على امي

..هذا حظنا اني وياج اني اهون خيه علويوي خليه بس البقيه معرسين انتِ شعندج غيره اخذي زوريه ربطي بشباك اهل البيت

..شنو خاله مسودن وتربطني بالشباك عرس ماحاب اعرس

..ولك هو اكو احلى من العرس ويصيرولك عائلة ومره تتلگاگ انت تدري ابن خالك الرايح العرسه توه طاب العشرين

..بعد مانخلص مادام رايحين العرس تردن تزفنه وي العريس گوه

..ظلو ياكلكم العث

علاوي انفجر يضحك

..يمه ليش ياكلنا العث شنو حسستينا اني واشهل فرشة مشمورة بمخزن بدون غسل هو عرس شراح يأثر

وصلنا اتلكونا خوالي هم وعكلهم وعبيهم وامي بس شافتهم من بعيد گالت

..بعد روحي عگلكم

وراهم طلعو شبابهم كلهم يتلگونا

ترحيبهم واستقبالهم يشرح النفس من اول خطوه من نزلنا

صاحو

..هلا هلا كل خطوة بألف هلا

هلا بالشيخة شهلة حياچ الله

..ام اسعد الغالية الف هلا بيكم

فرحتهم بجيتنا وطلعة نسوانهم للباب بعبيهن متلگيات امي وخالتي

وهلاهل امي وخالتي الشوفة العريس

اجواء حلوه والمنغص الوحيد اني اكيد وطبعي الماكو مهرب منه جابو الاكل انواع وصارو يعرفوني مااكل شي الا من ايدي من الروحات السابقة قدمولي فاكهة وخالي الجبير گال

ارتاح وشوايتك موجوده وعازلك معلاگ وصلة لحم مال تكة تلوگ الك واحسب حسابي وياك الاكل هذا مااريده

حسيته يرفع الحرج عني مع هذا بقيت محرج صح شويت وهو وياي وخوالي شاركوني ويمدحون بأكلي بس ماحبيت هالشعور وماردت اطوول يمهم اكثر

سألت امي شكد تريد تبقى اذا تحب تبقى وي خالتي وعلي واني ارجع لأن دوام عندي اتحججت بالدوام رغم مجاز

اني اگدر اتحمل اكل بس فاكهة وعادي عندي بس الاحراج مو حلوو

وراح ابقى محط انظار الكل بقيت وياهم ليلة الحنة اتونست هوايه وارتاحيت على امي متونسه بينهم

فاجأني خالي يحجي وياها خوالي نهائيا ميعرفون امي وابويه واحد هاجر الثاني كل ظنهم علاقتهم مستمره وهذا السر امي ماقبلت يطلع ابد والها اسبابها. محترمها

گلها قبل شهر صديق الأبو وسام داعم ولد منا من عشايرنا واجه وياه بتحويلة العشيرته

ابوكم خابرني واتوسطت للحل وطيحنا للخيرين وسادتنا نص والنص الثاني الابن اختنا اشهل

اتشكرت منه ومااعرف شرد ابراهيم وسوالفه حتى ماگالي اتشكر منهم

واني اتلافت الموقف وگالت

..بعد روحي يديمكم الأشهل ذخر وسند كال عدنا طلابه وانحلت بس ابراهيم مايسولف بالتفصيل حجاية ويشمرها

كالولها كلنا هيج مثله

ثاني يوم على طريقتهم شوبشت العريس وطلعت والشوباش هو دفع اموال واجب للعريس وتعبير عن الفرحة

رجعت للبيت خلصتها نوم وحدي العصر اتصل بيه حمزة

..صخرنا الاشهل اجيت بعدك مسافر

..هلا حمزاوي لا بالبيت

..جايك

. .هلا بيك

..جايبلك مفاجأه هم

..خو ما زعلان ولك

..لا مو اني

..ابراهيم جايني زعلان وياك

ضحك

..لا راح نجيك شبيك لاتستعجل

طلعت واني البس بتيشيرتي وگبل لايندك الباب فتحته

صار بوجهي حمزة ووراه نوره

..ياهلا الف هلا باليحبونا من بعيد ويخافون يوصلون

ضحكت ونصت راسها

نوره دوم تريد تجي وتخاف من امها

..شعجب شعتب نورتي البيت نوره

هي ساكته منصيه راسها وحمزة گال

..جاية زعلانه ومحد يدري بجيتها وحتى اني ماادري هسه من اطلع هناك انت تخابرني وتكلي

..ماعدك بعد اوامر ..ومنين تزعل منو مزعلها نوره العاقلة الأعرفه مدللة ابوها واخوانها هي

..امي جاي تضغط عليها تروح البيبي اداريها وهناك عد بيبي ابن خالي يجي

وامي تدري عينه عليها واكثر من مره يخطبها وترفض وماتجوز الا توديها هناك اكثر من مره نور اعترضت وشكت الابوي وابوي منع امي توديها بس اليوم سافر وتريد تجبرها ع الروحه مستغله غيابه ..عاركتها اني تكلي لاتدخل وغصبا عليك وعليها

اقترحت عليها تجي يمك محد يوصلها وامي اني ابلغها لأن حتى ابيت ابوي تلحكها امي ..وماتخلص تفر روسهم فر

..دتعاي ابوسچ لأنچ اوعى من امچ ..وخليج وياي محد يوصلچ ابد

هي خجلانه وبالبداية گوه تتجاوب ظليت اسأل بيها واحجيها شويه شويه اتعودت

..مو تضوجين لأن وحدي امي يومين وتجي تتونسين وياها اكثر

..واني ابقى يومين هنا ؟

..ها مليتي مني

..لا والله مو قصدي بس امي خاف ...

بعدها تحجي واجتني رسالة من حمزة يكلي اتصل

اتصلت وسوه روحه ماواصلني

..ها صخر هي عندك هااا غير تكول النا

..افتح مايك خل تسمع امك

..اي اي براحتك

..نوره يمي هاليومين لايظل بالكم عليها وممنوع تنجبر على شي وممنوع تروح الاي مكان غيرنا احنا اخوانها فاهمني حمزة لو لا من يجي ابراهيم ترجع

..فاهمك فاهم خليها يمك تتونس

وهو يحجي صاخ

..اخخخخ

..يلا اخذ راحتك ..هم تدري ابويه وين

..يمكن سافر بمرته وباجر يجيبها ويجينا

..عادي ندبجله خل يفضها و العنده يستقرن

نهيت الاتصال شويه واتكسرت الباب عرفتها امها اتجاهلتها السانها طويل اعرفها واني من النوع مااصبر ومااريد ازعل اخواني بامهم

دارت على بيت ابوي يم اخواني تصيح

..بأي حق ياخذها منين صار اخوها منين عرف ولف

وصوت احمد رد عليها

..اخوها واخونا بيت اخوها ماترضين تروح بس لبيوت اخوانج تجبريها ممنوع توصل هناك نوره وصخر مو غريب وجايه توجهينا عليه

ابتسمت برضا وفتت مامهتم بس هي خايفه

..لايظل بالچ ..هسه عوفي كلشي واحجيلي عنج

.شحجي

..شلونج بالدراسة

..زينه والله اشطر من حمزة اني

..عفيه سباعية ..نخابر بنات عمي يجن تتونسين وياهن

..ياريت غزالة صار هوايه ماشايفتها

اتصلت بيهن واجن فرحانات مدري بيها مدري الي لأن وحده من خواتي اجت ورايده القرب مني فرحانات اكثر مني الجيتها

اندمجن ضحك وسوالف اتعشن وكملن راحن البيت عمي وبقت هي راسلني حمزة يبات هنا هم

كتله تعال وقبل لايجي سألتها

..انتِ بس لأن محاول اكثر من مره يخطب ترفضين ترحين هناك لو مسويلج شي اذا مسوي احجيلي وبيني وبينج واني اتصرف

..لا لا والله شحده يسوي بس امي تريد تخليني تحت الامر الواقع تفرضه فرض عليه واني مااريد لا هسه ولا بعدين

..تمام هذا هو ارتاحي

اجه حمزة ومن بعيد صاح

..توأمي المالي غنى عنچ فدوه الخشمچ لچ البيت بدونج مايسوى اني شلون بيه خاف اتزوج ومرتي تغار منچ وتكلي لو اني لو هي

..دفوت فضحتنا تصيح ..فرضا خيرتك شتختار

هو حاضنها يبوس بوجهه واخذ ايدها يبوسها من باطنها مبين صدگ متعلق بيها مثل مايسولف كل مره اقرب شخص اله هي

..اختار مرتي طبعًا

..طاح حظك ..وخر عنها مادام هيج.. تبقى يمي اني ماكو مره تفرقني عنها

..خاف انوب هي تبيعك

..شكو اجيت مابقيت يم امك

..امي زعلت عافتنا نبجي وراها وراحت البيت اهلها وصلت بطة والولد السراب واجيت

..لأن نوره يمي ؟

..لا مو بحال نوره بعد ..سلكت ابو نوره من المغرب الهسه ابوي طلع رايح يتمم زواجه مثل ماشكينا ويومين ويجينا هو ومرت ابونا الجديدة

نور شهگت متأثره واحنا نضحك

..ابوك من يطول الغيبات يجيب المغانم عرفته مو خالي هالفترة شلون خدعنا وكال الزواج بعد شهر

يريد يخفف الضغط عنه

..ماتدري بالمصيبة

..شكوو

..العروس هنا ابيته الجبير بالقاط الثاني وراح تصير المناورات بقربك حضرلك خوذة

..خل نتونس شورانا

درنا على نوره ضايجة

..ها نورة شو ضجتي هم تغارين ع ابوج

..اي والله اغار واضوج شسوي مو بيدي بس مااحب اضوجه

..والله عمي هنيال ابراهيم بيجن ..لو ياخذونه كعيدي يمهم مااضوج

ضحكت هي

..هو هم يدري الوحيد الماتهتم انت

ثاني يوم جمعة ارقى ريوك سويتلهم

وخلصنا يومنا ضحك وسوالف طلعت للبستان العصر ووصيت حمزة يبقى يمها واي احد يجي يخابرني

المغرب اتصل بيه كال امي تريد نوره واخواني كتله نوره ماتطلع الحد جية ابوي انتهى وبلغها جوابي

يوم السبت اجه ابراهيم والولد مبتلين بغداه والترحيب وعمامي كلهم اجوه عبالك اول عرسه

الظهر هدن نسوانه كلبن الدنيا مخليهن جوه وماخذ مرته فوك وعافهن يتناطحن جوه

واكثر الحجي على امي وهي ماتدري بي اصلا ولا جاي ابالها

طلعت العصر هو وعمامي وولد عمي واكفين بالباب الظاهر مباركيله وطالعين باركتله ونفذت وعدي من چوبنا اني والشباب

يمچفن السلمان احا چفنه بهباري

ومن الضواري ..وخوفي على ابراهيم احا ومن الضواري

وچفنه بجلد بز يمچفن السلمان احا چفنه بجلد بز

ومن نومته يفز ..وخوفي على ابراهيم احا بالمگبرة يفز

..تريد تموتني انت

..وعدتك اچوبلك ونفذت وعدي ويدلل ابو البراهم

..انت وذني الجوه انخلقتو عله للچبد

..هذا الي يسوي زين خل يشهدون عمامي والشباب شكد اني طيب وفرحان الك

...

هاجر..

چان البيت ممتلئ بالأصوات...

ضحكات تتداخل، فناجين ترفع، وأحاديث تتشعب

كأن الجميع يعرف مكانه تمامًا... إلا انا

گعدت بطرف الغرفة بعد ماذب كلامه بوجهي وفتح الباب انطاني اوامر ونهاني من غلق الباب يظن ان الباب الحاجز الوحيد بيني وبينهم ...

افكر بصمتٍ ثقيل، هنا عدا الحزازية والحرب الباردة محد معاديني بشكل مباشر، بنفس الوقت محد يلتفت إليه أيضًا. وهذا النوع من الوحدة أشد قسوة من الكراهية نفسها.

أن أكون حاضرة بجسدي، وغائبة في شعور الجميع.

كلما حاول الدخول في حديث، انقطع الكلام للحظة ثم عاد بدونه وكأن وجودي مجرد فراغ بين الجمل.

حتى نظراتهم ماكانت حادة... لكنها باردة. والبرود أحيانًا يذبح أكثر من التعامل القاسي

طلعت اتمشى واترقب بصمت بلكي احد يشعر بيه يلتفتلي لكن للأسف بلا جدوه

عيني اتعلگت بصورة قديمة معلگة لأطفال العائلة وي ابوي وعمامي وهم مجتمعين ، الكل ضاحك بيها ..الا اني مالي وجود ومااعتقد راح يكونلي وجود هنا

الكل مشغول .. كل اثنين يسولفون يضحكون يتناقشون بشغل .اني الوحيدة هنا ماعندي شي ولا هناك بقالي شي

اني ضايعة..احس اريد شخص بنتشلني

طلعت بره

صوت ابوي لحگني

..هاجر بابا تعاي نسولف

رحت وكأن ذهني يقودني بدون اي ايعاز روحي مني امشي خالية من اي احساس

..ليش هيج ساكته سكوتج يخوفني ..ضايجه على امچ رغم كلشي ماسوت غلط

ماردته يكمل واني اكتم عبراتي بصدري وخايفه باستمراره يثير دواخلي اكثر

..لا لا مااضوج ماقصرت صار سنين كافي ..وبعدين ماراح اتاثر اني بدونك عشت 18سنة مااعتقد راح يأثر عليه غيابها السنين الجاية

بس اني احس موجوده بمكان مو مكاني اتي مامرحب بيه هنا

..لا بابا البيت بيتج وكلنا بخدمتج لاتتوهمين بهالوهم

سكتت هوايه كلام ابالي بس السكوت اولى

اجه عمي عثمان وابويه صاحه بينا مأشرله علي

سويت نفسي مو شايفه وعمي اخذني وياهونجهز غرفته وفعلا شفت متعة بتجهيز العرس نستني واقعي واني ورشا صرتا نتواصل على التليفون بعد ماقيدت حسابات امي وبعضها بلكتها من شفت ناشره صورتها هي وابن عمها العريس

شي بيه يكلي حقها لتحجين شي

وشي يكلي ع الاقل مطمنه عليج مخليه ابالها ممكن ارجع ولمن تتأكد من راحتي يلا تتزوج

كل هالفترة تواصلي وي البنات ومرت ابويه ماجازت بس جانت متخوفه من ابوي خاص بعد ما بقى مركز بية وبكل حركة تصدر مني او منهم الي

بزواج عمي ابراهيم رحت وي بابا وسلمنا عليه بطلب منه يشوفني واكد عليه اذا ابوج سافر لو انشغل اني موجود اني وياه واحد

اجوائهم حلوه اطلع للبستان اتونس لو الاهل خطيبة عمي ومن ارجع انعزل بواقعي لأن تعليقاتهم ماتخلص

بحنة عمي عثمان رحت وياهن هناك انبهرن بالمكياج الاخليه وعرفن امي مدللتني من الماركات العندي وفعلا هي ماقصرت عليه بيوم وابويه هم مايوم اتعاجز من مصرف لو كال هواي بس كل هذا مو مهم عندي جنت اتمنى عايشه بينهم بابسط الاشياء او خل يفترقون بس يبقون معنزين بيه الطرفين جان هوايه تفرق حياتي

اجواء الحنة والعرس تجنن عشت كل تفاصيلها وصورتهم باجمل اللقطات وهذا القربني من رشا اكثر

وحتى غزالة اختها

العرس ابويه جان متحلف يسوي عرسهم اجمل الأعراس لأن اخوانه الصغار وصية امه عنده اتزوجو عمي علي وعثمان نفس اليوم بس اني الثانية مااعرف شي عنها كل معرفتي برشا وبس

تفاصيل حلوه وفرحة الكل يعيشهاوحتى البعيد عنها

اجواء الچوبي والكرم المبالغ بيه بس سبحان الله مادامت هذه الاجواء اقل الشهر وكلشي انقلب

وكأن مكتوبلي هذا البعد

...

سراب..

الايام الراحت كلها كل شوي امي تتصل تريد مني اخبار ماعندي جرأه اكلها ابوي جهز الطابق الثاني المرته

هي متأمله حتى اسامة يرجع والصراحة عقوبة ابوي مامنها فايده ماطول امي هناك كل شويه مخابره واحد من اخواني يدز مصرف الها وندري هي تصرفه هناك الهم والا شتسوي بي هالكد

حتى البستان بيوم الي اجه دور اسامة ابوي مسافر وماراح اضطر احمد وعبد يسدون مكانه واجو يحجون ويسبون بيه لأن مايجوز من عالطبع

اني مشغول بالي بيهم ونوره شغلته اكثر بطلعتها وهي تزعل عند صخر النحس

خلتنا بموقف مدري شنحجي امها اجت ماخلت حجي تريد اخواني يسحبوها بس رفضو ولا واحد قبل كلولها ماكو فرق بينا وبينه يجي ابوي ويتفاهم وياهم

بيومها بالليل واجتنا صور ابوي ومرته بالشمال والجو ثلج ومبينه مرته مو جبيره وهوايه اصغر من امي وفيحاء عبد شوفنا الصور وبطة ماقصرت راحت طايره الامها

يمكن لو جايبيلها خبر عزيز عليها ماتملخ نفسها هيج

ماتت المره فرفحت بدينا حتى اخواني ضاجو من طلعات ابوي المالها داعي بهالعمر

وقررت تزعل وتذب اخواني عليه

راحت وهم يبجون بعدهم صغار ابتدائية وبطة توها اول متوسط

كوه سكتتهم وعشيتهم ومتحلفه بنوره ليش هيج تتصرف وتروح وتخلينا بحيره لانكدر نوصلها ولا نبلع غيابها

اخذله يومين واجه ابوي وصارت الحفله ع اصولها

امي ومرت ابوي متفقات يجن بوكت واحد وطبن كلنا صحنا دخيلك يارب

شسون ماخلن حجي وترگع وهو صعد فوك وصوت المسجل من القاط الثاني واصل لهنا بأغاني الهچع

خلاهن يفورن ومثل العادة حجيهن على ام اشهل والمره ماتدري اصلا

جانت طبيعية الامور الحد ماسوو بالشارع الچوبي وهم يباركوله وواضح الصوت صوت اشهل

اعتبرنه شامت ماخلن دعاوي وحجي ومن فات ابوي ولكاهن متحضرات

گلهن

..يلا كل وحده البيتها ظله هنا ماكو ماشبعانين نوم ونريد انام ونرتاح وسراب تعبت البيها حيل منجن تحضر العشا لو ترحن هناك تتعشن

امي جانت مكيودة مني ماحاجيتلها ع المصيبة وهسه وصاها بيه كملت

بس صعد ابوي سحلتني من شعري وساده ايدها وتضربني بكل حيلها على متوني احسهن خدرن

..مكيفة تركضين وي ابوج ترتبين وتضمضميله لو جايبتلي جلبة ولا جايبتك

..اخخخ يمه اني شعليه على اساس ماتدرين بي متحضر

..ولج كيفت كلت ماراد العرس بعد ماانطى البيت كلت بطل تاليها هناك فوكي جايبها

..مبطل وانتِ مكيفه عايفته وزعلانه وي ابنج ماتعرفن تتصرفن وترجعين على سراب اني شكو

ابوي من الدرج صاح

..كافي كل وحده تروح البيتها يلا

طلعت امي عصبية ردت ابجي على قهرها بس شبيدي عليها هو مو بس ابوي غلطان صح هو يحب نفسه ومايهتم بس هنه هم مو مريحات

اخواني الصغار راحو وي امهم والكبار طالعين شاردين من الطلايب مرت عبد صاحتني تهون عليه

نزلت اريد احضر عشه ولو ماكو نفس لا كاني ابوي كال عشاكم جاهز يجي ارتاحي اليوم

وفعلا مرت اول فتره بحذر مني ومن العروس تريد تكسر هالحاجز واثنينه متخوفين

العروس منفصله بعد زواج خمس سنين بدون خلفة

بس مبينه كلش حبابه والله يعلم بالنوايا

وباليوم الي بدت تحجي وياي وتتقرب دارت علينا بطة

ومادام احنا كاعد انظف بالبيت ونجهز اكل هي تصيح

..يمرت ابوي يمرت ابوي

وين وليتي

اجاج ابوي اجاج ابوي لاتهنيتي

ضحكت بداخلي على سوالفها وبحرج اتعذرت

..عذريها بطة ترى بعدها طفلة

..يمعوده معذورة وحقها ابقى مرت اب ماتعرفني الميعرفك ميثمنك

وفعلا بعد معرفتنا بيها هوايه امور اختلفت الا عند امي وفيحاء ظلن مصرات على عداوتها وصارت تدخلاتهن ماتنطاق بس هي صابره والها اسبابها

ومرت ايام بهالأيام كلها ..عشنا الفرحة واتونسنا بزواج رشا ...و ابوي شكد جان مرتاح انكسر بخبر صدمنا

بيوم مطر قوي وبرد ثلج محد منا طالع ..وبوقت متأخر بالليل اتصلو عليه يبلغوه بحادث مسويه مقرب اله وحالته خطرة بسرعة طلع بدون مايبلغنا شي الولد طلعو وبعد اتصالات انصدمنا بخبر وفاة عمي عاصم بحادث على طريق البصرة وماوكفت لهنا جرت وراها مشاكل يابو مشاكل

يتبع .