رواية كتوف مائلة الفصل التاسع 9 بقلم نور الشمس

البارت بدون تعديل

اليوم خطار وكتابة ومراجعة اجتماعيات احس عقلي صار يفصل وحده

.....

صخر...

احب اجواء الشتا الباردة بس اليوم مدري ليش حسيته متعب ومالي خلگ اتحرك بيه الجدي وعمي ماوصلت بحيث گوه سويت اكل باجر

بعد ماطفيت الأكل بالشتا متعود اسويه من الليل

وطفيت الصوبة الي بغرفتي ورحت اتأكد من غرفة امي خاف تنساها زدت غطاها ورجعت انام توني اتعمق بنومتي

اتصل بيه عبد الإله مامتعود اتصاله بهالوكت خفت صاير عليهم شي رديت وبالي كله يم جدي

..ها عبد خو ماكو شي

..وينك عمي عاصم اتوفه تعال احنا يمهم وابوي واخوانه وعمامي راحو يجيبوه.. شتگول نبقى لو نلحگهم

..على كيفك وياي شويه شويه ..وين توفى وشنو السبب ومنين يجيبوه ؟

..رايح للبصرة الظاهر وبطريق الرجعة مسوي حادث بس هسه صديق ابوي هناك مخابر ابوي وگايله ترى سيارته مضروبة طلق قبل الحادث ماادري شصاير وياه يمكن متعارك

..يعني مكتول قصدك؟

..ماادري والله هو مهدور دمه لو طب هناك وممنوع من الروحه شيسوي رايح ماادري

..لك مهدور دمه شنو سالفة صارلها سنين معقولة يكتلوه الهالسبب طالعلك اني وين انت هسه

..متجمعين يم بيته جدي ابو عاصم من سمع الخبر انتهى ونقلوه مستشفى مهيب وعزام واحمد الاخذوه

..اخوان عاصم وين عثمان والولد

..مابقى واحد منهم ..كلهم لحكو ابوي هو اول واحد راحله منا

..ابووك شلون اتحمل هالخبر ماجاي استوعب الله يرحمه ويغفرله خل اقفل البووب واجيك

فزت امي على حركتي

..يمه اسم الله وين رايح بهالليل والدنيا تگص گص

..عاصم اتوفى

..يااايمه عاصم ماغيره ليش شنو السبب

..مامعروف حادث لو كتل ..قفلي بابج يمه خاف اتأخر هناك

..ابوك يدري

..اول واحد داري

..الله يصبره عاصم روحه مو بس صاحبه

سكتت وابالي افكر بموقف امي من عاصم سنين ماخلتني اطوول بفكري

بحسره گالت

..مبري الذمة ومحالل وموهوب مالي وگفة وياك ياعاصم اني باريتك گدام الله

طلعت وگلبي معصور ضايج عليه وهم باقي بگلبي منه

ماادري مااحس مثل امي اكدر اكول مبري بساع ولا اگدر اگول معليه ومايهمني موته لأن شفت الموضوع مأثر بيه اضوج من هذا الاحساس اصير بين وبين

بيت عاصم مسافة منا مو هوايه كلش بس مو قليلة

طول ماامشي مشغول بالي بالحادث وضجت عليه اتوفى غريب شعجب مااخذ ابوي شعجب مامنعه من الروحه هناك مثل عادته ويظل هو الوسيط زين هو رايح الهم لو بشغل حتى لو شغل اكو غيره يكفيه

وهذه بنته شنو موقفها بعد الصار وشراح يخلصها من حجيهن اكثر شخص اعرف القال والقيل هنا وشنو نتائجه عشت وي امي كل تفاصيل حزنها

وحشة الليل بالشتا والاصوت بالارياف ابد ماكو هدوء بالليل عكس هدوء بالنهار

رغم الليل سبات الكل المخلوقات وبالشتا بالذات بس اصوات الاشجار الوحدهن الهن حفيف وي نباح الچلاب المايهدأ خاص من يمرهن غريب مثلي بقرب بيوتهم

سرعت بمشيتي من شفت الشباب ملتمة من بعيد

سلمت وبقينا ننتظر مانعرف شنقرر بس نصحتهم نبقى هنا افضل

وهم اتصلو هم يردونا نبقى بمكانا والصبح يجيبوه

ساعات طويلة مرت

اتصلت برشا ابلغها اني بره لو احتاجت شي ماجاوبت دزيت رسالة انطيها علم

الفجر طلعتلي عيونها وارمه من البجي عزيتها بمصابهم هي تحبهم وجنتهم وعاشت وياه صح مو هواي بس مأثر بيها وصيتها على نفسها وشتحتاج تگلي

راحت والتهينا بالتحضيرات الحد ماجابوه عيني لا اراديا اتوجهت الأبوي بحياتي ماشفته مكسور هالكسرة شفته محني لأول مره ينحني ويبين عليه قهره

ورجعت بذاكرتي المواقفهم مااتذكر بيوم ابوي افترق عنه لا بمناسبة لا بعيد لا بتجمع او عزيمة هم الاثنين على طول مكانهم سوه

اخر مره شفتهم سوه بعرس عثمان ابوي چان يكله

..عاصم احمد ربك عليه وين تلگه مني شكم مره عندي شكم ولد ماشغلوني عنك يوم

وهو يشهدله يگله لا والله اخواني لحمي ودمي ينشغلون عني وانت لا

كلها اتقدمت تعزي ابوي بعد مافوتوه البيته يودعوه الوداع الأخير حتى اخوانه راحو الأبوي يحضنوه ويواسوه ويواسون نفسهم بي ..اخواني عمامي ولدهم الكل الا اني بقيت متردد

وعلى مدار هذه السنين الراحت شگد چنت اتمنى اشوف ابوي بضعفه وانكساره

بس الموضوع مؤذي مو مريح الي ابد مو مريح

حركت خطواتي ناحيته وكأن جدار هلامي مبني بيني وبينه ماگدرت اتجاوزه بقيت بمكاني اديه بجيوب قمصلتي واراقب من بعيد

الكل داير ماديره يصبروه وهو يباوع للعدم.. حتى كلامهم مامركز بي الحد ماطلعوه بچه بثقل روح وتعب وكلامه وياه هزني خلاني ابتعد عنه وابتعد عن تفسير ملامحه وانعكاس آلامه ولوعته

..مو تدري ماعندي صاحب غيرك وين رايح

مرت ايام العزاء امي كلشي يصير احزان افراح ماتواصل احد بس لعيون رشا قررت تروح ومثل عادتها لبست النقاب وطلعت وياي وصلتها ووصيت رشا عليها وماطولت ورجعتلها ارجعها للبيت

ومن رجعت چانت تشكي غربة بنته ومصابها

...

رشا..

بزواجي ودعت ابويه وجدي والبنات وغصة بگلبي عليهم بس مأمنه ريمه يمهم اني اكثر الشاغلني غزولة ووصيت عمتي شهلة عليها تخلي صخر يجيبها الهم على طول وعثمان وعدني مااشتاقلهم الا اول اسبوع العرس وبعدها يومية يجيبني وفعلا ماقصر

عرسي چان من احلى الاعراس عشت كل تفاصيله بحب رغم العرس چان مزدوج بأعاتبارنا اثنينا عرايس اني وزوجة علي

بس گدرت اعيشه وكأنه الي وبس بدون ماافكر بأي تفاصيل تزيد توتري.. منو احلى.. منو تجذب انظار ..منو مكياجها ارقى.. منو بدلتها انزك هذه التفاصيل المملة التشغل البال وتعكر صفو الروح اذا چانت تنقاس بندية

ورغم هذا طلعت اجمل من مامتوقعة بهوايه

واحس الفرحة الحلتني اكثر بريق بوجهي وعيني حتى اني استغربته وبعدها استوعبت هذه فرحة حبنا ..الحب النقي الجمعنا بكل احترام ومشاعر صادقة اطرناه وتممناه جماله بشرع الله وعلى حب نبيه وسنته

كلشي چان مثل مااتمنيت واجمل

جند الترتيبات چانن خواتي والبنت القربتها مو بس الي صارت قريبة الروحي

هاجر الحلوه الطيبة چانت حديث الحفل من صديقاتي والأقارب الكل استغربو شلون گدرت تجمع

مواصفات الجمال بهذا اللون الداكن لأن للاسف الأغلب يظنون ان من اساسيات الجمال البياض او لون البشرة الفاتح وهذا مو صحيح وگدامنا هاجر مثال حي

چانت اشبه بالأميرات مختاره فستان جميل بلون احمر كاسرة كل قاعدة تحدد هاللون الأي نوع من البشرة يرهم

حتى المامقتنعات باختيارها من الحضور ماكدرن يگولن مو حلوو عليها

وهي مرتبته بترتيب ملفت وي مكياج ناعم متقن وشعر سرح طويل بطول نازل شبر من خصرها

وبوسط فرحتنا البسيطة العفوية اخذ اهتمامها بينا واهتمامها بينا منحى اخر

بعد العرس بأيام العروسة الجديدة وزوجة عاصم وبعض الحبايب الي هم يتنحسن من علاقتنا بعمة شهلة وقربها النا صارن يطلعن كلام على علاقتنا بهاجر مسوياتنا حزب

وصفنها اتحاد متحدين والي تكول ولواكه ومن هالكلام

اني بطبعي الكلام الورايه مااهتمله والتحجي كدامي مااسكتلها نهائيا وشفت هي هم بيها هذا الطبع مااهتمينا ابد اني مشغولة بفرحتي وهي همها غير هم المسكينة مو بحالهن من الأساس

بديت اقربها الابوها خاص بعد ماشفت اهتمامه وتضييقه على زوجته وبناته البالمتوسطة

صح صغار بس حذرهن يسمعن من امهن ويضايقن اختهن باي شكل من الاشكال

وياريت ممحاولة بأستمالتها الابوها ماطول هواي وفارگنا عاصم للأبد

چان البيت كله شايله

وأب لأخوانه قبل اولاده وبعد موته عرفت الناس من توصف احد وتكول فلان چان عمود الخيمة وبعده كلشي انهد

من اول ايام العزا الكلام ماوكف بدون مراعاة الصوت القرآن اليصدح بالبيت والنهي الله عز وجل عن كل حرام ومكر ومكيده ولا راعو اصول المناسبة

بدن يمكرن ويحجن وگالن هالبنية هي وجه النحس الابوها

القهرني طلع من بيته وهو وزوجته على خلاف من اول ايام زواجنا الحد وفاته جانو بزعل واساس هالزعل وجود هاجر بينهم ومحاولاته الرجعة امها قبل عقد امها على ابن عمها

گلت اكيد راح تضوج وتبتعد عن المشاكل بعده وتخس بشعور بالذنب بس للأسف زادت

وصار الكلام بعد اسبوع من وفاة عاصم علني وخاص ان الشكوك چانت ان خوال هاجر وامها وزوجها الهم ايد بالصار

لأن هو الله يرحمه رايد يحاجيها الاخر مره بعد استقرارها وزواجها بغيره ان كلشي يخصهم انتهى ورايدها تواصل بنتها وتقنعها تتوجه الدراستها بعد مارفضت التقديم والدوام الجامعتها

شاف بنته مو مهتمه النجاحها ولا المعدلها الچان زين نوعا ما

بس الظاهر هاجر صابتها خيبة المعدل متوقعته اكثر وحياتها تغيرت قفلت على الدوام ورفضت اتدام

شگد حاول هو واني وعثمان حجينا ماترد بغير كلمة مامستعدة وهو بظنه امها صاحبة التأثير الاقوى عليها لهذا رايح ومتصل بصديقه الي چان هو و عمي ابراهيم وسيط بينهم ياخذه الهم

ومااعرف شصاير من مشكلة بس الظاهر مهدديه ورامين عليه واكو بسيارته اثر للرمي

صديقهم اكد ماصارله شي بوكت المشاجرة

وبعد ماطالع من منطقتهم ومتفق وياه يرجع البغداد ويجي ويحضر اخوانه ويتخذ بيهم اجراء ع السووه

بس للأسف مالحگ والحادث چان قضاء وقدر وصاحب التريلة سلم نفسه للدولة مع هذا ظلت مشاكل بينهم وبين خوالها وانسجنو خالها وزوج امها وجرجرة ناس تروح وناس ترجع والحجي والملامة عليها هي من زوجته واقاربها ومجموعة من النسوان الي تموت ع القال والقيل

عمتي شهلة بجيتها النا فاجئت الكل وهيج صرنا احزاب بشكل رسمي لأن مجموعتنا گعدت وحد ومجموعتهن وحد

وهالمره بنات عمي ابراهيم ماتركنا ابد حتى عهود صح ماحاجت عمتي وجاملتها مثل مآرب هي وسراب بس هم ماتركنا

عمتي شهلة من المصايب الشافتها اكثر وحده تحس بهاجر هي

البنية جانت داخله صدمة وبنعي عمتي وهي تعد بصوت حنين خلتها تبچي بقهر وتستوعب الحالة طلعت كل قهرها ولعوتها وبجتنا كلنا

وبعد صلاتها وقراءة سورة يس ظلت تلوم بروحها ليش ماكلتله يابه ولو مره ليش ماصحته بيها وهو بلهفه چان ينتظرها مني

وليش ماحضنته الا بآخر يوم اشرلي فاتح اديه وخجلت اردها بس چانت حضنتي بارده بلا شعور

تحجيلي وتبجي

شگد اريد اصبرها اني مثلها ممرود گلبي عليه وعليها

بديت انصحها تتقوى الجاي هو المهم الراح نتركه وبعد السووه خوالها عمامها خلو اول شرط للتفاهم بين الطرفين على موضوع الشكاوي امها تنسى هاجر وماترجع اطالب بيها نهائيًا

ومنا مرت ابوها تريد تتخلص بكل طريقة وباقي زوجات حمويني صارن كل وحده تفكر شلون تطلع منا وبدت كل وحده تحاجي رجلها عن حقه وشلون راح يضمنون فلوسهم من شغلهم عنده

الاثنين الاكبر من علي وعثمان شغلهم وياه وبدت الخلافات تتصاعد وتطغى ومحد يعرف كل تفاصيله الا عمي ابراهيم

وعمي ابراهيم داخل عزلة تارك كلشي وعايش حزنه بروحه اما جدي ابو عاصم سبحان الله عجلو الزواج خوفا عليه خاف يموت بسبب السكر وقلبه التعبان بس الاعمار بيد الله وچان صابر محتسب يسأل الله سبحانه الاجر وكل هالهوسة ماله بيها

رجال مايتحرك الا القضاء حاجته بمساعدة ولده

بعد شهر خال هاجر وزوج امها طلعو براءة من قضية الحادث وظلت المشاجرة والتهديد بشهود وكامرات اتكفلو بيها وطلعو بغرامة مالية

ووافقو على شرط عمام هاجر وامها خلتها يمهم جرينا نفس من المشاكل بس كسرة هاجر الله وحده يعلم بيها

وهنا انصدمنا من اهل مرت عاصم اجو وطالبو ياخذون بتهم تخلص عدتها يمهم وينطونا مهلة نطلع كلنا من البيت وتبقى هي واولاد عاصم بس

حتى عمها گالو ماتگدر اداريه مثل قبل مكسورة ومالها خلك يطلع وي ولده وهذا الخله الاخوة بينهم يتمالخون لأن همه هم رادو حقهم من عاصم وشغلهم وياه

صح اله الحصة الاكبر بس الهم هوايه رادو اوراقة وكلشي يخص شغله مالكوهن

شكو زوجته خافيتهن ودزو على ابوي يتفاهم وي اهلها باعتبار علاقته طيبه بيهم وكلنا هنا اخل

ابويه قبل لايروح الاهلها اتصل على عمي ابراهيم كاله انتظرك تجيني نسولف بشي مهم

واجه عمي انصدمت من شفته شگد متغير اخوانه مامتأثرين مثله احس المشاكل شغلتهم عن حزنهم وفقده

عمي ابراهيم گلهم كلشي يخص شغله وفلوسه واملاكه المحامي يعرفه محاميهم جان واحد اتفقو وياه يجي وفعلا اجه

البيت الجبير چان بأسم جدي مو بأسمه گايل مااگعد ابوي بمنية احد حتى لو من تعبي هو كله من خيره واني كلي اله

وباقي الاموال والاملاك تتوزع ورثه وبالعدل بين اولاده وزوجته بس مخلي وصية الهاجر وكلشي يخصها من بعده ابراهيم المسؤول عنها مو غيره

سبحان الله عبالك حاس بروحه يتوفى

الله يرحمه ماشبع منها ولا تهنت بي وبدلاله چان يتقربلها ورغم صدها بدت تميل القربه بس ارادة الله اخذ امانته وكلشي مسجل ومكتوب

بعد مابلغو اهل مرت عاصم بكلام المحامي مارضو واعترضو وكالو هذا امر مدبرله منكم

والا هو وين يعرف راح يموت من الاساس ويوصي لا مريض ولا شي ومحد اليوم يوصي قبل موته الا القليل وهو مو من النوع الي چان متزمت بدينه ويطبق الشريعة بشكل دقيق

اعترضو واعتراضاتهم مافادت چان كلشي اصولي

بعدها اجو براي.. جدي ابو عاصم يبقى يمها وهي اداريه مثل قبل والاخوان ماترهم ظلتهم بعد يطلعون افضل وهذا الصار ماگدرو يعترضون

اخوان عثمان الاكبر بسهولة گدرو يشترون لأن الله يرحمه ضامنلهم حقهم بشغلهم وجامعلهم فلوسهم

بس علي وعثمان ماگدرو بسهولة يبنون علي گعد ابيته وبعد بي نقص هوايه كال اكمله على راحتي وهم زوجته جانت مجبورة وماراضية ولا اهلها قابلين بس انجبروا

واني ماگدرت اگعد بي ع النص فضلت اگعد يم اهلي بين مايكمل البناء وبالگوه بابا قنع عثمان يگعد فترة شهرين وياهم

وقرر هو هم يساعدنا على ماتطلع السلفة بس عثمان رفض بشكل قاطع

بس الگعده انجبر بيها

وهالشي خله خالتي تموت قهر وتعكس قهرها بمشاكلها على بابا وعلينا هم

چانت ماصدگت تخلص من ريمة بعد ما كمل بيتها وسكنوه

اجيناها اني وعثمان يمكن هي حقها بس هو عثمان مامعتبرته غريب منا ابن عمها ومنا خالتها وعلى طول جانت يمهم ليش هسه اعتبرته غريب مااعرف

وچناة كلش حذرين نطلع للدوام ونجي الظهرية بس نتغده يطلع مايجي الا بالليل يروح

اما البيت اخو او يم ولد عمامي جماعته هم وصارو يطلعون وياه يشتغلون تأسيس كهرباء لو عمال يساعدوه ويعينوه اما ليش ماطلعنا ايجار ماكو بريفنا ايجار ابد الا نطلع من الريف وهذا بعيد عنا

بهالفتره ظليت متواصلة وي هاجر ع التليفون ومرات نروح نشوف جدي بالليل ونشوفها

تشكيلي اذيتها شكد اتوسلت بيها تجي ويانا هنا ماقبلت منتظرة بفارغ الصبر انتقل البيتنا واجيبها يمنا تسكن

...

سراب...

بعد وفاة عمي الله يرحمه ..ابويه ماگام ينزل ظل على طول بغرفته فوگ

واليوم من وكت بدنها من الصبح على الريوگ اجت فيحاء مغبشة .. واني ايدي على خدي وصافنة على خلگ امي ونسوان ابوي للمشاكل من الصبح

توها نزلت حلا حاجتها امي وفيحاء تأيد كل كلمة الها

..لا هله شگلتي الروحج من فگرتي الرجال وموتيه

..اي والله گلبت حالنا گلاب سودة عليه ماله خلگ كلشي من خذاها لليوم وجه الشؤم شسوت بينا طشرتنا

وظلن فيحاء وامي وحدة تكبس وحدة ترفع

بعد ماسكتت هوايه طگت روحها و ابرود ردت

..فگرته شعليه طابه البيته اني ...الله يرحمه لو ميته وحده منجن ميخالف اگول طبتي عليجن مو زينة بس رجال عود ابن عم زوجي وصديقه شنو تأثيري عليه ..بعدين عفيه شماكلات من الصبح وهالگد تتمشكلن گعدن على ذكر الله بسالفة طيبة بأبتسامة تظلن شباب وطاقتجن تتجدد هسه عرفت سبب التجاعيد بوجهجن شنو

نزلت ايدي من خدي ضربت بيها رجلي

اي والله هسه حلت وصارت حفلة من صدگ حلا اليوم هم ناويه عليهن ومثل مااتوقعت

بس جابت طاري التجاعيد صاحت فيحاء

..احنا تجاعيد بوجهنا عود عجايز احنا وانتِ شابه

خل يطلع ابراهيم وسهلة الا ندور عليج دوره نعلمچ التجاعيد شلون تصير

اشرتلها تعوفهن ولا مهتمه هايه مثل طبع ابويه الظاهر مستفزة وجانت تغلس عليهن تريد تشوف النهاية شنو وملت

امي حاجت فيحاء ماراضيه

..يا متانيه ابراهيم يطلع لچ هو شيطلعه احنا لو بينا خير جا بناتنا هسه علمنها شلون هيج تحجي بس كل خير مابينا

..اي والله امدانا على خلفتنا الولد ميتين على ذيج وابنها ونوره غسلت ايدي منها اخذت رجلها عليهم وكل جمعة تگضي يومها هناك وشحدي احجي.. ابراهيم كيف لكاله بنيه تشوفها وتوصفها ومكيف ع الوصف هو

وبناتج اتعس بعزا عاصم رافگنها وسراب هي وهاي حبايب

كلت عمت عينچ سراب اندارت عليج اكوم اشوف شغلي احسن توني شلت الصينية وصاحت امي

..تعاي ولچ تعاي ..صدگ انتي گايله حقه ابوي ماينساها على جمالها وهدوئها

عضيت اصبعي ماكو غير مرت وسام السولفت الها

..لايمه مو هيج ماگايله بس هي صدك حلوه

ودخلت حلا ع الخط خاف اني ماجفصت هي تزيدها علينا

..اي والله حلوه تجنن وحتى گلت الابراهيم گتله احلى وحده بزوجاتك الكبار هي وگالي بهالكون كله ماكو بحلاها

عادي شو ماغرت شبيجن انتن

امي صفگت اديها بقوة وغمتها

..امداچ مكيفه كايلتله وهو ابو النسوان شايف الكون كله ومگلبه ومالاگي مثلها ..وولده ضايجين يگولون ابونا الدنيا مو بعينه حزين خل يسمعون سوالفه عنها ويشوفون حزنه

گومي ولج ولي صعدي يمه ولاتنزلين تتمخطرين كلساع ترى على ساعة تصعد عندي املص رگبتج والله

..مااصعد اتعودي وخلي نصير حبايب افيدج اني اصبغلج شيباتج اداري صحتچ اخدرلچ نومي الضغطچ

خزرتها لأن گامت تقهرها متقصده

اجت ورايه واني اخلي اللحم ع النار

..والله مو قصدي اقهرها بس صار اشهر متحمله عارهن الي وحجيهن

..والله اني مايعجبني حجيهن وتعرفين بس فدوه كبري عقلج انتِ والله مليت من المشاكل وكرهت البيت وابويه اصلا ماله خلگ البارحه اني احجي للولد والخواتي شلون انتِ متجاهله كلامهن ومستوعبه ابوي والدليل مرتاح يمج وباقي فوك لو يمهن جان هج

..لايظل بالج الخاطرج راح اعدي حجيهن بس مااوعدج اسكت دوم اني هم ماله من المشاكل ولو ما المشاكل بحياتي مااتزوج والله المثلي فرص الحمل عندي شبه معدومة شسوي بالزواج بس انجبرت من مشاكل الحبابات

..الله يسعدج يارب وان شاءالله ابويه يعوضج واذا ع الجهال بس هوستهم كافي كعدي وياي هنا وكرهي الحلفة كلها

صحت بطة تشوفلي نوره محتاجتها

من الحايط حاجتني

..امي يمج مااكدر اجيج تريدلها فرصة ترزلني يم احد وعيب من مرت ابويه احافظ على برستيجي هنا

..ولج نويره ياابرستيج .. امج رزلتج غيابي عليج الله صدك البارحه هم رحتي يمهم

..منو يم صخر رحت وابوي گال كل جمعة روحيلهم والله تونس الروحه هناك ماتجين وياي شبيج

...لا مااجي فشلني وسد الباب بوجهي مايحبني والله مبين ..صدك اكله طيب

..يخبل والله غداني سمج واتعشيت لفات صاج من ايده تخبل

..الف عافية وهم غزالة اجت

..اي بس العصر اجت وجانت ضايجه من خالتها ماحجت بس من كلامه وياها عرفته

..اووي خالتها ولا تناسب عمي والله عمي شخصية وطيب مو مال وحده لئيمة

..صوجه مو مثل ابونا يحب ينوع

ضحكت وهي هم ورجعنا نضحك شكد شايفين الموضوع سهل

..ولج نوره تعاي باتي يمي مشتاقتلج الله عليج صار هوايه مابايته هنا

..جاي اقرا السنة سادس اريد معدل يأهلني الكلية زينه

..ان شاءالله ميضيعلج تعب

رجعت جوه ابويه نازل سلمت عليه وطلع بيده تليفونه يتصل ومن اتصاله فهمت هذا صخر

....

هاجر....

اتواجد بين ناس وكأني ظل منسي خلف صاحبه

اعيش بعائلة بدون انتماء

ام مو امي اخوة يشوفون وجودي عكر صفو حياتهم وقلب اوضاعهم رأس العقب

جد مابي قوة النفسه صرت اعينه واتواجد يمه اعوض ايام جفائي الوالدي الافتقدته وافتقدت لهفته وحنانه الماچنت اشعر بيها

عمام انشغلوا بنفسهم وعوائلهم

صرت اعيش الغربة بمعناها الحقيقي

الغربة مو غربة اوطان الغربة غربة الأنسان بين اهله

امي اتوقف كل حنين الها ومااعرف شلون گدرت تقبل مساومتهم بيه الحل قضاياهم

چان ابويه الي ومأمنه شنو اماني اليوم

الشغل صرت اشتغله بدون اي نقاش وتوجيه وماچان يفرق الي

وعادي الغدا الگاهم متغدين والجداري فارغة والمواعين تنتظرني كلش عادي

عادي اسمع ان وجودي ابينهم نحس

وعادي اسمع قلة احترام اخواني وهم يصيحوني

بهيووو ..ولچ

وعادي اسمع تحريضها الهم كلشي عادي المو عادي وجودي هنا ولشوكت

المو عادي جية اخوتها ..المو عادي عيون ابن اخوها الي تلاحقني وتجبرني اطلع انجز شغلي بوجودهم

واذا گلت خل يرحون تگعد تحقر بيه وبشكلي وشوفتي وتسأل بأستهزاء

منز ميت عليچ انتِ وخايفه على روحج منهم

بديت اضوج اختنك كل مايخابرني عمي ابراهيم يطمن توصل بيه ابلغه واتراجع عزة نفسي تمنعني شيسويلي يعني يجي يقنعها تخاف الله بيه لو غيرها هي لو خايفه ربها ماتنتظر توجيه

واذا گال تعالي يمي وين اجي وهو ماشاءالله عنده فيلق اولاد

الموت ارحم من منة الناس

شگد جنت اتصور حياتي بيها صعوبة ومنغصات بس مثل الشفته بهالأشهر ماظنيت اشوف

اصفن وافكر قبل سنة هم جنت افكر اوصل لهنا

دراستي اجلتها انقبلت اداب انگليزي مو طموحي ولا هذا الردته لا دراستي ولا حياتي

رشا مهونه عليه وتوعدني تاخذني من ينتقلون بس اني هم مامقتنعة ماشافو شي من عرسهم واني اروح اثقل عليهم مستحيل

بيوم طلعت اغسل بالگراج

بيدي الصونده ومكناسة الخوص ومدنجة اغسل بقهر گلبي الكليان اجلف بقوة وبالي يم مشاكلي وسراح يحلها

حسيت اكو خيال ورايه طفرت من شفته ابن اخوها

عدلت ثوبي وشالي وذبيت الصونده من ايدي صارت على رجلي الماي انحبس وارتد الوجهي برشه سريعة

فزيت متراجعه وبقهر صحت

..انت غير تتحمحم تكول ترى والله مايصير ندري اختك وبيتها بس مو هيج

..على كيفچ وين لاگيه واحد هيج يباوعلچ لاتمثلين انتِ رافضه فرحتج واضحه

..ادبسز وبلا اخلاق الا اخلي عمامي يخلولك حد

فتت بهمه للغرفة اريد اصعد اخابر عمي عثمان كل شويه يوصيني منهم ويكلي لو لحو بجيتهم ومااحترمو بلغينا

توني فتت لغرفة لحگتني هي

..ولج العبدة .. القردة انتِ اطردين ابن اخوي وتهددينه بعمامج ..ياعمام الراحو وعافوچ علة على گلبي ولچ هاجر والله لو سويتيها اگول اتحرشت بيه وماانطاها مجال اذا هم صدكو او لا تمشي عليچ هالسمعة وظلت بكيفج بعد

..والله انتِ متستحين وخافي الله عندج بنات هم ولاتنسين انتِ ارملة ومتعرفين يجيج واحد متعافي يذبله بلوه عليچ ..ابن اخوج ميخجل خليله حد وعلمي حرمة البيوت وبعدين هددي وترى مااخاف اني من تهديدج ماعندي شي اخسرة وماكو واحد بعشيرتج كلها يهمني رايه عدا عمي ابراهيم وبس واذا بلغته تعرفين شراح يسوي وشيصير

..شوكت الله يخلصني من ابراهيم ومنچ ..انچبي ولاتكبرينها ومصطفى مايجي بعد بس اسكتي مالنا خلگ مشاكل

..هذا هو بس يجي راح احجي كلشي ومااخاف لا من تهديدج ولا من جذبچ ودعاياتج

حجيتها بثقة ظاهرية بينما اني چنت اتفسر من خوفي وارجف

صرت ابد مااثق بيها وبالليل اقفل بابي وحتى بالنهار بس افوت اقفله تليفوني حرصت على قفله وتبديل الرمز كل فتره

ملابسي اشرهن بشباك غرفتي

عشت بخوف وحذر جني گاعده بنص عدو يترقب وگعتي بكل لحظة

جدو بدا يتعب وبديت اخاف فكرة يموت وابقى وحيدة فعلا رغم اني وحيدة مجرد وجود انفاسه يكفي للأمان الوهمي الأوهم نفسي بي

وبيوم بالليل سهرت للفجر مااخذت عيني نوم حسيت يدة الباب انفتحت واتحركت مره ومرتين وتلاثة

حسيت الخوف سل رجليني وگلبي يريد يطلع مانمت للصبح

تأخرت بگعدتي وگعدت على صوتها تصيح

كل ظني عليه بس القهرني صياحها چان على جدي لأن يريد تواليت ولاح عليها تاخذه وطول مااتجيله هي تحجي وتعيره بولده الشمروه ولا عبالك هي الطلبت تراعيه وتسكن بالبيت بدونهم

..عوفيه اني اخذه ليش هيج تحاجيه حرام عليج

..ان شاءالله هم حنيتي عليه وصار عزيز تعرفيه انتِ احن مني عليه ترى عمي هو بس يدري بيه ظهري تعبان هوايه لح وحجيت من قهري مو قصدي اعيره

سكتت عنها واخواني يلعبون يمها

رجعته لفراشه وانطيته علاجه رحت انظف

توني كملت مسح اجو اخواني ابايسكلاتهم البره فاتوو وطينولي البيت من جديد

صحت عليهم مارضت وصارت تهدد ولدي خط احمر وماعاش الي يغثهم

تركت المسح وصعدت گامت تصيح وتحجي تركتها وبالليل نزلت على گد اسوي لفة واصعد

لگيت مفتاح باب غرفتي ضايع

اتخبلت وين راح المفتاح چان معلگ

صحت دلال

گالت ماادري صحت البقيه گالو ماندري

هي هم حاجيتها ظلت تلمح وتبسمر

..وشلج بالقفل وانخبصتي عليه

شعندج وتقفلين غرفتچ

..ماامن انام الا اقفله

ضحكت ضحكة طويله

..حقچ تخافين على جمالچ

رجعت مقهورة شراح اسوي اتصلت بعمي ابراهيم

وگتله متعوده ماانام الا وبابي مقفول والمفتاح ضاع

جنت ارد اموت من الخجل واني احجي مشكلتي التافهه بنظرهم بس مستعده اسوي كلشي وماتبقى مفتوحه الغرفة

بعدين استوعبت هم بريف ودنيا ليل منين يجيب قفل ومفتاح

حس بخوفي وظل يسأل ويدقق اسبابه

ماعرفت شرد اتهربت گال اني اسهر بأي لحظة تحسين نفسج محتاجتني اتصلي ولاتخافين

مرت عليه هالليلة من اصعب الليالي كل حركة يتراولي بيها مصيبة

ثاني يوم من الصبح اجه وياه ابنه

غيرو القفل كله وانطوني مفتاح جديد وبس طلعو الدنيا انگلبت عليه تركتها تلغي ولفيت راسي ونمت واني مأمنه

....

صخر...

اتصل بيه ابويه قبل لاتعدي اربعين عاصم يريد مني يشوف امي مره وحده يطلب منها براءة ذمة العاصم ويشرحلها موقفه الصحيح

گتله

..الموقف من راح وكته ماله معنى الشرح والذمة من اول دقايق من سمعت امي الخبر برته من ذمتها وحتى صلاة وحشة صلتله

ماكو داعي تشوفها وخل نطويها هالسيرة احسن

ضاج مني ومارد وحتى اخواني لاموني كالو تعبان جان خليته هو يرتاح مره وحده يشوفها شتأثر

تركتهم مايحتاج اشرح التأثير اني اعرفه وهم يجهلوه واليجهل مايفهم الا يجرب ويشوف

رحت البيت عمي بعد ماامي عاتبتني ليش ماتسأل عن خواتك هالايام رغم ادري امي تعرف شنو السبب ماصرت اروح بكثره بس حبت تمثل دور الماتعرف جاوبتها

..رشا عروس وعدهم ومااحب اثقل عليهم بروحاتي وعندي اسبابي هذه وغيرها مو كافيه عندج شهلة لو تحبين تحرجيني صايره

ابتسمت هي وعيونها اتهربت من الصد لعيوني الي تلاحگها

..لا مو هيج بس انت اخو ووالي وعمك ينشغل وتريد الصدگ اختك احسها مو مرتاحه

..غزالة لو رشا؟

..لا رشا غزالة سالفتها وحد ومكدور عليها بس رشا كلش ماجنها عروس

..عثمان سبب لو وضعهم ..اكيد وضعهم حقها هم

..زين انت شمعطلك ماتشتري سيارتك لوين ضام فلوسك

..مااشتري اذا مو زينه ورصينة ذيج فشلتني ويومية عاطله وتوبت اخذ سيارة بوزة مامتوازي عليها

..خووش يعني ضامهن انت مو هسه غير

..شهلة المزيونة كولي شعندج ؟

ومن ضحكتها عرفت

..ها هسه طخت گومي طلعيهن العندج ..رشا متوازيه على فلوس؟

..رجلها مدري شسامع ورافض اي مساعدة من ابوها

..اني العثمان ماانطي انطي الها وشحدها ترجع شوكت ماكملت سلفتهم يرجعوهن بين مايطلع اسمي الثاني واجملهن

..يابعد روحي هالوجه السمح ..واني هذا الردت اكوله بس فهمت كبل مااگول

..اني عيونج اقراهن شهلة الطيبة ادللي انتِ وخواتي تأمرن امر

..يايمه كون الله يرزقك من خيره الماينعد ويجعل العافية بابدانك ويجعلك سبب للعافية يبعد عيني وضواها

..احبج شهلة مااعرف ادعي مثلچ بس الله يعرف شتعنيلي انتِ وشنو الأريده منه

اخذت فلوسي واتمشيت البيت عمي

عمي طالع وجدي نايم چان

طلعتلي غزالة طلبت منها تصيحلي رشا وتجي ومن شافتهن بيدي حاجيتها

..لاتكليلي عثمان مايقبل ..عثمان بيش كيلو منطي الج اني صارن بيدج وطلعتيهن رجعيهن ذني فلوس سيارة اخوج اليجمعهن صار سنة وناوي يجمع عليهن سنة ثانية

ماصارن بيدج فدوه الج هنه وصاحبهن اهم شي ترتاحين وتكعدين ابيتج مستقره اوضاعكم مااجت عدلة وياج بس الله يعوضج ان شاءالله ازمة وتعدي لاتهتمين

دموعها بسرعة نزلن تريد تحجي ماتكدر غصت بحجيها

..مامتعود اشوف دموعج مسحيهن وانچبي

..والله ماادري شحجي حلفني مااكل الابوي واني هنا ضاكت بيه الدنيا مدري شجاي يصير وياه اتوقع موصلتله حجي خالتي والله العالم بس الموضوع مو عادي گام يبات بالبيت وهو هيكل والموضوع صعب عليه

..يمعوده الله يسهلها ماتضيق الا تفرج ..درت على غزل چانت تباوعلنا بفرح والابتسامة على وجهه

..خليج وياي بدون زواج بس تتزوجين تصيرين ام دميعة مثلها

..هو اني ام دميعه من هسه

..مو خوش شغلة هاي وباجر تعالن يم شعلة بالها يمجن اجيبلجن نوره هم

..عدها امتحانات هالأسبوع ع الاسبوع الحاي نتفق ان شاءالله

..يلا على راحتجن

سلمت وطلعت مريت بريمه فرحتلها مرتاحه هي وبناتها وعزام كلش راضي بطلعته

ثاني يوم طالع الدوامي ولاگاني ابويه وياه احمد گال رايحين البيت عاصم استغربت طلعتهم بهالوقت وماسألت اكثر

وبيوم راجع من دوامي وصوت هوسه وصياح من بيت اهلي وصوت وحده من البنات تشكي وتبجي بصياح

ولأول مره ادفع بابهم وافوت شفت عهود ثوبها املخ عليها وعبد واحد هدو على زوجها الجاي وياها من ياخته جروه يعتون بي منا ومنا

خلصته من ايدهم وردت افهم شصاير وبعد مافهمو الاسباب اعتذرو من زوجها وگلولها ترجع بينما اني احسيت زوجها هسه يرادله صدگ خنگه ومايستاهل ترجعله ابد

يتبع.

العاشر من هنا