رواية كتوف مائلة الفصل السابع 7 بقلم نور الشمس

يسعد اوقاتكم بكل خير حبايب..

...

كتوف مائلة

....

درت متراجع عليه اريد افهم اقترب مني

..سمعت تريد تروح الخوالك

..اي والله ردت اخذ شهلة واروح

ابتسم اول مره اشوف هاي ابتسامته بوجهي

..انت حتى امك تسميها بأسمها ليش ماتحشم ولك

..من الدلال شهلة صاحبتي و ادلعها

ضحك

حسيته مرتاح مو بس هو اصيحه بأسمه من اصيحه بأسمه يتخبل كل مره

..اريدك وياي هالفتره اجلها روحتك

..وياك؟ واني!

..ليش لا مو ابني انت؟

لأول مره اركز بعيونه مستفزة بلكي يتنرفز وينسى اني ابنه ويرجع يغلط حتى اشوفه النتيجة بدون جواب

يباوعلي ساكت منتظر مني جواب

..سؤال سألت نفسي هوايه عنه ابنك اني لو لا ماادري ماجان عندي جواب واحساسك هذا متأخر

..يعني نظل احنا كل ما حجينا تذكرني ..غلطان ادري غلطان

..اني مانسيت يوم حتى اذكر واذكرك ..اعذرني مااگدر الولد خير من الله اخواني موجودين ومايقصرون ..اني اجلت روحتنا الخاطر ريمة يمنا هالفتره على مايرجع عمي

درت وجهي وهو ماعلق بس متأكد هسه هو بلحظة غضب لو طلعت يهجم بيها البيتين العنده اعرفه من يكتم وبعدها ينفجر

صاحني عثمان متجاهل الجدال الدار بينا بعد ماراح ابوي هم

علاقتي بعثمان مو كلش قوية اهل عاصم مااحبهم من اني صغير لأن امي ماجانت اطيقه واني هم اضوج منه

واخوانه الصغار عثمان وعلي بالمدرسة رغم اكبر مني بسنتين وتلاثة بس عرايكنا ماتخلص لأن هم يعرفون حياتنا بحكم قرب ابوي الهم واي مشكلة تصير بينا وبينهم من ادخل يصيحوني ابن الشروگية

هاللقب هذا الي چانو يشوفونه سبة بينما اني اشوفه فخر

خاص من كبرت وبديت اقرا واعرف عنهم وعن عاداتهم الحبيتها هواي وتاريخهم من ايأم الحضارة السومرية الى الآن... مع اعتزازي هذا چنت ادميهم واضرب وانضرب لو حجوها

لأن اعرف القصد من خلال الكلام الي يهيني ينهان ومااعبرها اله

واليگولها بغير قصد غايته يعززلي هم افهمه مثل عمي سليمان ومروان من چانو يگولوها الي يگولوها بمديح

خاص بعد ماعرفو عن خوالي كلشي گامو يربطون من صفاتي بصفاتهم

بس من كبرنا الولد اتغيروا ومحترمين واني هم محترمهم ومحترم روابط الدم البينا بس ماگدرت انسى واندمج وياهم حيل مثل اخواني وولد عمي بقت حدود او حواجز ماگدرنا نتخطاها

الا بخطوبته الرشا هو معلم وياها وحسيت بيها تميل اله ورايدته ومقتنعه بي مارفضت والا لو خطبة عاديه ماانطيها الهم بيت عاصم مااطيقهم ابد

وگفت منتظره يحجي وياي

..ولو تعبان انت وجاي من الدوام بس عندي كلام وياك ينفع هسه لو اجيك غير وكت

..عادي حبيبي يعجبك هسه نسولف يعجبك بعدين كل الهلا بيك بكل وكت

..الله يسلمك متقصر ..اني جاي ابني وتعرف السلفة اتأخرت ماجاي تطلع بالوقت القريب وموضوع خطبتنا طال مابقالي الا قليل ويكمل بس مااريد الشغل تلزيگ

صفنت اريد افهم هو جاي محتاج فلوس اقرضه لو شنو ومخلي بالي بكل الأحوال مارده لعيون رشا

لأن تقديره من تقديرها وهذا الي جاي يدور بينا يترتب عليه عمر اذا قدرته يوگف بعينه واذا لا راح يعيرها على طول

لحظات هو يحجي مركز وياه وخانة بعقلي ترتب وتخطط

سألت بأستفهام

..شگد محتاج انت

..لا لا ..فهمتني غلط مو هيچ

..فهمني لأن اني هذا الفهمته تعال نتمشى هنا وسولف براحتك

..الاريده نتزوج هسه ابيت اهلي كلها كم شهر ونكمل بناء وننتقل بس التأخير ماله داعي واحنا بمجتمع العالم تفتح عيونها حتى لو بينا ارتباط واحنا بدوام الحجي يزيد وانت تعرف ابوي مريض وتعبان ويريد يشوف زواجنا اني وعلي

..بيتكم بيت عاصم قصدك

..اي هو عاصم ابونا الثاني مو بس اخو ولامنا كلنا ابيته وتعرف بيته جبير قصر يوسعنا ويوسع عائلتين بكدنا بعد

..بس الاعرفه هو عاصم تعبان ويشكي من كثرة المشاكل الي تصير من مرته والبقية ..رشا ماتتحمل اعرفها وعصبية هم.. انت منو يگول تتحمل خاف انوب تلومها وهذا رايك تعرفه هي لو لا

..اعرفها ماتتحمل تسكت عن حقها بس اني وين رحت عنها كلها فترة السنة مادور واحنا وياهم وهذا وعد

..اسألها هي وعمي واردلك خبر

..هي وسليمان حاجيتهم هي وافقت بس ابوها گال جان شرط اخوها بالخطوبة السكن مستقل ومن الاصول تحاجيه هو

واني اجيتك اعرف هي اختك فعلا وشكد انت تعنيلها

..الله يسعدكم ويوفقكم مادام هي مرتاحه اني وياك اخف من النسمة ولو سامح الله وصار العكس ساعتها اتدخل اذا متفقين على كلشي بالتوفيق..

اني شرطت هالشرط لأن اعرف رشا ماتسكت والعائلة الجبيرة لازم تصير بيها مشاكل وهذا معروف عن الكل مو بيكم خلل ولا قصور بس الوضوح يراد من البداية افضل

..هذا هو ماقصرت بعد هالكلام نحدد الزواج بعد شهر ان شاءالله

..موفقين

عيني على رشا اجت من البستان وي البنات اتجهت البيت اهلها

اللوتية ام السان موديته تدور واسطات شموازيج ع العرس والله لو يفتهمون ولا واحد يخطي بي خطوه مو انوب خساير وتنازلات

فتت للبيت ريمه تغسل مواعين الغده

..خلي من ايدچ وروحي بدلي اطلعين وي رجلج منتظرچ

درت على امي

شهله المزيونة من لگه احبابه نسى اصحابه صار شكم يوم ماتنتظريني ع الأكل

..والله گوه ابلع اللگمة وانت ماماكل الخاطرها لو مااكلت تظل وياي تنشتل الجيتك ومامتعودات هنه يتأخرن ..شو تأخرت اليوم

..اي مهيب اتسوگ بطريق الرجعه الجهاله وابراهيم رادني هم وخطيب رشا جنت هنا بره

..شراد منك المسودن ..وراك شسوه بصياحه على اخوانك ظل بالي يم حميزة بس لا اذاه

..ههههههه عزيزج لوتي ماعليه يطلع منها ..خاف وسام ومرته وهو ادخل يخبصها عليه اكثر

..مدري بعد ماگتلي شراد

..والله اني ماادري شراد كال اريدك وياي ورفضت

سكتت امي ودارت وجهه تمسح بالكاونتر تخفي ملامحها عني وحتى لاتشوف ردة فعلي لو مارضيت حافظها اني عرفت شراح تگول

..ليش مافهمت منه يمه الحقد مو زين الله يمسح على گلبك ويبرده يظل دوم ابيض يابعد عيوني انت سواد الگلب العدوك مو الك

..شهلة جنچ ناويه ترديه الحضنج خاف غرتي من سمعتي بطاري العرس

..غدي منه ومن حضنه ومن شوفته هم مو صوچك صوچي منطيتك عين تسولف هيج وياي

..بعد لاتقربيني اله بس اتقربيني اشيل المنع عنه

..يمنعه الله وملائكته المسودن هم خلفلي مسودن مثله

..سبيني ولاتشبهيني

..نفس يباس الراس والعناد والخلگ الطويل للمداهر مامجذبه انه

..يعني هذا العناد مو الچ

..لا مااعاند انه منيلي العناد

..ماعاندتي وگطعتي الخلفه متعمده ؟

..مو عناد هاي فهم ووعي انت حبلت بيك بساع وبعدني بنص الخير

واكتشفت وراها هو مايريد مني جهال سنين كل ظنه مااعرف

وجان مستمر يخلف من رزق.. يمكن يعتبر الخلفة مني منقصة الحد مابيوم رجع طبيعي وهنا اني اتخبلت عليه حتى وجهه خرمشته يريد بس يسكتني وعباله اني ساكته واظل ساكته انفجرت وطلعت الي بگلبي كله وحتى عليه اتجاوزت

بعدين صارت روحه بالخلفه مني واني موصية المرحومة ام ريم تجيبلي علاج الله يرحمها ولا قصرت ونست يوم تجيبه بوكته الحد ماالله منعه عني وارتاح بالي

..وتكول مااعاند ..ماشك بيج هو

..لا ابد مامتوقع اني اوصي واشرب ومن يسأل شعجب جنت اكله من سعادتي وياك حالتي النفسية ماتساعد مره راد ياخذني الطبيبة كتله اخذني بلكي مناك. واشرد هو خواف وشكاك گال مخبله وتسويها ظلي هنا ولو الله راد يصير

بس بالحقيقة لو جان زين بتعامله وياك يمكن ماامانع اني احب الجهال وجانت امنيتي اشوف جهالك واعوض صبري بيهم

سكتت لحظات اتحول المكان الصمت مطبق وماردت اضوجها اكثر بسكوتي لأن تحس بيه متأثر

..يمه رجعيله وعوفي الزعل وخلفي هسه ولا تسولفين هالسالفة بعدكم اثنينكم بيكم حيل

..طاح حظ عدوك

بالليل رحت الجدي اشوفه وحاجيت جدي اخذ رشا يمنا بعد ماشفتها مزعوجه وضايجه

طلعنا من البيت درت البيتنا ريم توها جايه متسوگلهم ابوهم وطاشه مسواكها ملابس والعاب البنات ومن طبيت لمتهن

حاچيت رشا من اول ماكعدنا

..شبيچ گالبه الخلقة عثمان مزعلج

..لا

..منو وياج خاف جابرج ع شغلة العرس يم اهله

ضحكت

..لا والله لا

..لعد انتِ المستعجله طلعتي

..يا لا مو هيج شبيك

..روشه تعبان ووراي دوام احجيلي منو وياچ شسوتلچ خالتج ادري السالفه منها بس ردت ارطب الاجواء بعثمان واهله

..والله فشلتني خبلتني اني مستعجله ع الزواج مثل ماكلت صح مستعجله

بس حتى اروح واكفي ابوي الشر ومااسويلي مصيبة بيها

فزت ريم بعد ماجانت تضحك على مداهرنا

..ها اسم الله شكو شصار

..عثمان جايب بنت اخوه يريدها تحب الاجواء هنا يكول صار يومين ماطالعه من غرفتها معزوله وجاب وياها خواتها بنات عاصم

اني بعد ماطلعنا واتمشينا بالبستان اخذتهن للبيت هم عيب البنية اول طبتها محضرتلها جنت هدايا وردت اصادقها لأن غريبة هنا وكاسره خاطري

اجت خالتي واول ماشافتها گالت

..يا خطيه انتِ بنت عاصم السوده

ريم كالت

..هي مو ماتحب تكعد يم الضيوف شكعدها

..ولج حظي وشلون موقف صرت بي من البنيه ردت

..الحمدلله الله خالقنا بعدة اشكال والوان وخلق وي الوانا واشكالنا اختلاف الاذواق احنا مو خطيه من خلق الله ..نصير خطيه صح لمن مانعرف الله وطريقه وشنو الي يريده منا

اني متت بدمي غير خالتج تسكت

ردت متجاهله هذا كله وسألت

..امج اتزوجت لو محد اتزوجها بعد

البنيه كالتلها لا هي ماتريد علمودي

وردت تعلق

..عاصم جان يحبها بس صوجها ماكالتله عدنا رس من العبيد من البداية خلته ينصدم وعلى صدمته عاقبته وانفصلت

عاد اني هنا ماسكتت وادخلت

..خاله حرام هالحجاية

كلنا عبيد الله .. والله سبحانه ماخلق بينا كمال الكمال اله وبس وكل واحد منا عنده نقطة ممكن يستغلها بشر ويجرحنا بيها وهاجر جميلة وجمالها مميز

وحجيت هيج مو مدح مني البنت فعلا ماشاءالله اناقة وذوق واخلاق بس حسيتها انقهرت ومتت قهر اني ورديت

ومن طلعو كلبت الدنيا تكلي عيرتيني بالخلفة هيج قصدج وتكلي ادري بيجن تحاجن ابوجن تردنه يتزوج وتكولنله نريدلنا اخ انتِ وغزيلة كل البلا بيجن

اني هم كتلها هاي مامفكرين بيها راح احاجيه من يجي يفكر ليش لا

لاتشوفون البجي والدعاوي الدعتهن

حاجتها امي

..عاصم شگد عير وحفر لأبراهيم عود صديقه وخايف عليه من نسبنا وحتى گطع علاقته بي فتره ابراهيم وتأذه على صداقتهم وانعكس على تعامله ويانا هو واهله هواي اذوه ..بس الله سبحانه سگاه بنفس الكاس ومن صارت بنته عبالك مو بنيه اجته عبالك جريمة وخافيها اكلو وجهه اكل كرايبه واهله وتالي الوحيد الوگفله ابراهيم وشكد حاول يرجعها مرته بس هي رفضت

ضحكت اني مستهزأ على التناقض العايش بيه

..گلبه ابيض وحنين مو بيده ابراهيم

..يعز عاصم هواي وبعدها مااتفارگو

درت على رشا

..وهذا المضوجج انتِ

..اي والله ضجت حيل موقفي كدام البنيه ابد مو حلوو

..الله يساعدها كافي عليها عاصم ابوها انوب اراء المتطفلين ..المهم مرت ابوج بديت اكرهه ترى ولو كرهتها اكرهه بعيشتهه وعمي اعزه لاتتصادمن وياها حتى لا اكرهه صدك

..تروحلك فدوه لاتهتم ..بس عثمان كال محاجيك

..شو ماتستحين انتِ كلشي تحبين تحجيه عادي

..بالله منين استحي يعني ع العرس لا مااستحي وعليك الله ارميلي بزفتي

ريم تصيح بيها تسكتها عود وهاي تزيد

..رشا شبيج ولچ هو شقى هذا

..لا موشقى معليچ ..وصخر الله عليك ارمي بزفتي اذا مارميت اني ارمي ترى

هزيت ايدي

..وعثمان يخليج اكيد

..اي والله يخليني

..طاح حظج وحظه اني ارمي بس مو رصاص..ارمي سبع حجارات وراج عمي عرسي همزين لكينالج رجل وماطولتي انوب شلون رجل عثمان امه متنسية بي بآخر جعبية بشيشة العسل

..الله خوش وصف راح اگلياه من نخلص غزل

كومي ولج كومي ولي من يمي لا اجرم بيج انتِ المفروض بنت ابراهيم بس مدري شجابج العمي سليمان

..تدري اكثر واحد من عمامي احبه هو

..ادري شمخبلج غير حبج هذا ..المهم زواجج راح يصير ابيت عاصم ومثل مارضيتي للرجال وخليتي يخطي بهالخطوة تحترمين وجودج بينهم

مااكلج دوسي على نفسج واتحملي بس حوصلتج كبريها واطلعو منهم بوجه ابيض والله يسعدج ويسعده

..احاول والله بس للاحتياط خلي تليفونك دوم شغال وجهزلي غرفة يمك هم للزعلات

..البيت كله الجن ياغرفة ..هسه تعالن يم شهلة وحاجن غزالة سوه

توني اتصلت بيها بعدهي تحجي واندكت الباب

انطيتهن التليفون وطلعت

صوت حمزة اجاني طلعتله

..ياهلا بحمزة ..ها شبيك منو ضاربك

..وسم وابوي ماحاجاه بس غلط عليه وطلع

..ليش ؟

..مارضيت اروح مكانه للكاع اني اليوم مو دوري وهاي اكثر من مره بدوره يذبها عليه ويروح يسد بابه وتطلعلي مرته وجهه بالطول تنطي اوامر

..يلا حمزة روح للكاع لاتلتهي بالتليفون

ضحكت على وصفه وتقليده عليهم

..ورحت لو لا

..لو يموت مااروح لو محترمني يدلل بس هو هيج يشمر بالحجي

..معليك وتعال هنا بالديوانية بنات عمك جوه مو تفوت وشهلة تسأل عليك گلبها حاسها اليوم تتأذه

هسه تجيك تونسك لايظل بالك من وسام اني اتصرف .. يعني مارحت وهم ابالهم رايح

..مارحت وضربني من درا بيه هنا

اتصلت بعبد الإله

بعد السلام حاجيته

..ليش وسام مأذي حمزة ومخلي بي اثر انتم مابيكم واحد يوجهه يعلمه اكو عاقل يضرب اخوه الهذا السبب وهو شعده مايطلع للكاع شمعطله صارت مرته عزيزة وكابلها هسه لو شنو

..والله سافل ومايستحي وماادري بي هيج ضاربه واذا ماراح البقية اخوانه يغطون عنه دور منو اليوم من البقيه هسه اشوف

..حمزة عاقل ومرتب لاتخلونه يتماده وياه هاي ثالث مره دزلي رقم ابراهيم احاجيه

..شوف الثاني انت هم اتعس من وسام ابراهيم شنو ولك

..ادلعه شبيك دزلي الرقم

..وليش ماتسجله شكم مره ادزه الك

..ذاكرة جهازي مقبطة

ضحك يعرف كلامي مو صحيح

..شتريد تكله مو تلوم بي ترى جان مهوس الصبح لمن مال

..اي وصلتني اخباره لا مااكله شي بس اكله حمزة يمي ذاك اليوم لامني ليش مااكله واخلي يدور

اتصلت بي وحمزة يأشرلي

..كله ليش ماتضرب وسام

..ابنه الجبير متزوج وجهاله يفهمون يضربه شنو بس هسه يطلع ضامله ضمه بس اصبر

جاوبني

..ها صخر كول

..مسجل رقمي ابو البراهم

..طاحظك سولف شعندك

..مشتاق ردت اسمع صوتك كالو رايح للحب الجديد يعيد مواويل الغزل

..شنو غيران انت بدال امك

..كالولي ظال بحسرة الغيرة كلت نسوانه متعافيات اني اقوم بالواجب

..لا صدك ترى مغثوث والله مايحتاج تغثني ..شعجب مخابرني مو عوايدك

..حمزة عندي ومايرجع الا ترضيه ليش ينضرب يمك وماتحميه

..هو السانه هم طايل اتجاوز على اخوه وذاك الحيوان دباره يمي شوكت يبطل انتكال من ينشمر ابيت وغصبا عليه يقوم بواجبه وواجب جهاله مادام ابراهيم يصرف يظل مثل الكديش

..اتربى على هالشي لو شمرته ماتصلحه بس تظلم جهاله ماعنده مانع يقصر بحقهم

..ارجع ونسولف خليه يمك..و گله هنيالك ياريت لو تستقبلني انت هم ازعل واجيك

نهيت الاتصال مامنطيه وجه بس ضحكت صاير ينكت

حمزة الوحيد من اخواني او من اهلنا كلهم يفوت البيت وبراحته وامي تتصرف يمه وكأنه واحد من اولادها وحاله حالي لأن من هو صغير محبوب وجنت جبير وواعي ماتحس بمنافسه وياه افوته وياي وهي حبته

..جوعان اسويلك اكل

..لا مااشتهي والله متضايق حيل ومقهور مامرتاح وارد اهج

..تعال هج يمي شرط ماتتزوج شتكول

ضحك

..لا شروطك صعبة بت خالي رايدها والله مااعوفها ابد

..ياملعون من انت صغير الهسه تصيح رايدها كمل اعداديتك وسولف بالحب وراك كلية هم

والسادس يرادله قراية وقرايتك مو مال همه ترى

..منين تجيني الهمه من مشاكل امي وعرايكها وي ابوي لو من مشاكل وسام ومرته لو وياي هو يشد لو مرته وي نوره وامي ملتهيه بغيرتها على براد بيت

..نوره شبيها لاتخلي احد يتماده على اختك بوجودك ماتكدر تحاجيها لو وسام مايسمع منك عبد الإله موجود ومايقصر وابوي مايرضا عليهن ترى

..اكلك شي نوره تتمنى تشوفك

..منو مانعها

..هي تخاف من امي وهالايام متصاحبات هي ومرت ابوي

..من تبطل خوف هلا بيها بيتي مفتوح

....

سراب..

عهود يمنا اليوم ..عهود متزوجة عند عيال خالتي متزوجه ابن حماها رجلها غريب يعني زوجها زين مامقصر عليها بس خسر فلوسه وحالتهم مو شي اخر سنتين

من تجي ماتتأخر هواي

امي وصتني اصعد للمخزن ومن كلشي اخليلها واحضرهن شوكت مايجي رجلها انزلهن

وعبد الإله ومرته اخذوها هي وجهالها اشترو ملابس الجهالها والها

عبد الإله الحنين من اخواني بس محنته بهيج سوالف يحب يدلل اما مشاكل مايدخل بيها ابد حتى من امي ومرت ابوي يتلكن ابوي بطلايبهن يصيح مرته وجهاله وماينزل الا المشكلة فاضه هو بطبعه هادئ حيل اجو متأخرين من السوك العصر

واني هم سويت كبة حتى اعزللها منها وازيدها شعدنا لحم لو دجاج

اجه زوجها ياخذها بالليل

صاحها ابوي بالمطبخ وهي زعلانه منه جي يريد يتزوج

عهود مرتبطة برضا وزعل امي ماعدها فاصل ابد امي لو ضاجت هي وياها ع الخط ولو رضت ترضا اقرب وحده الامي هي

ودوم جانت مو على صلح وي ابوي

من فات هي مو كلش هلت بي وحس عليها وماعلق

بس من رادت تطلع وي رجلها صاحها انطاها مصرف وباسها هي وجهالها وطلعو

وأول ماطلعو ابوي صاح وسام وكاله

..البيت الجهزته للعروس مااريده روح انت ومرتك وجهالك بي واكفيني شرك

..ليش يابه شصاير

..شيصير يعني عندك احترام انت الي النفسك الجهالك ..ومنا وجاي طلعه للشغل تطلع للبستان تطلع حالك حالهم

ماكو دبر مصرفك انت وجهالك كافي انتكال اخجل

بعمرك اني استنكف من الحجاية التنحجي ولك اني ابوي هددني وراد يساومني بماله عفت كلشي وبديت من الصفر وگمت احصل اضعاف الجنت اخذه من ابوي من ياطينة انت

غير تخليه امي يكمل طفرت من يمها وگالت

..لو وسام طلع اني اطلع وياه مااظل هاي كلها على ضربة المدلل حمزة لو اجاك باص من العزاز

الظاهر امي سمعت صخر من اتصل بعبد يعاتبه

ابوي جان مسافر وتعبان بدون نقاش دار عليه

..سراب لمي غراض امج تطلع وياه

فهيت ماجاي استوعب سنين امي وياه اشكال يحجون مامطلعها ابد

ورجع حاجه وسام

..الك للصبح وهذا سواد الليل تلمون كلشي يخصكم والله وياكم بلا مطرود ماقصرت وياك ولاشامرك بشارع بيت جديد وامك وياك شتريد بعد

امي گامت تلطم

..اني تطردني تالي عمرك تطردني بعد ذاك الصبر الصبرته تطردني ابراهيم هاي تاليها السحورة شسوت بيك سطرتك سطر خلتك ماتندل دربك من ذاك اليوم الهذا اليوم

..ابنج ماتفاركينه روحي وياه ولاادوخيني رزق.. جبتي عمرج كله تلطمين وتهذين اكو يوم طبيت ومااختلقتيلج عركه ياصبر هذا محد صابر غيري

..انت صابر ابو النسوان شتعرف من الصبر انت

ابوي بكل برود يدخن ويرد

..هو من اني ابو نسوان معناها ماكو بكدي يصبر والا ماعاشرتجن

قبل هالمشكلة جنت انظف وردت وحده تساعدني كلها طاشة دقايق من العركة وكلها التمت وامي لاهي ساكته ولا ابوي مكبر عقله وتاركها

غمزتلها تسكت عافت كلشي وتفلت عليه

واني والله استاهل المفروض ماادخل بس اخ مني

..امداج الجبانه مكيفه ماتبجين تلطمين تكولين مااكدر بدون امي

اتفشلت وسكتت مدري شرد خاف اجفص والوضع مايتحمل بس ابوي ناوي يحجي كلشي اليوم وجاوبها مكاني

..ليش ماتتحمل تموت لو ماتاكل وراج انطي الروحج لكمه ولاتنتكلين عليها وانوب احجي

امي ماخلت لادعاوي ولا حجي صاحني امشي وراه وهو يسأل

..فيحاء وين ابيتها لو هنا جانت

..خلصو عشاهم وراحو

..ممنوع تنطيهم اكل بعد تريد تتزقنب تروح البيتها وامج راح اوديها ايام تهدا امورنا ولو حبت ترجع هلا بيها

..خوش يابه بكيفك

..حمزة مارجع

..لا

نوره وين خو ماودتها امها الخوالها

..لا ماقبلت تروح

..اخوانج بغرفتهم

..لا طالعين

..راح انام بغرفتهم ولو اجو خلي ينامون جوه

سكتت يمكن ابوي يحجي صدك راح يطلع وسام وامي شو ولا عبالك تهديد

نزلت وسام زعلان يدردم وامي تبجي وتولول وزوجة وسام مكيفه لمت نص الكنتور تجيب وتعبي

فكرت بيني وبين نفسي شعور بالراحة اجاني مدري ليش

يراد احني بيت العروس الجديدة

هم بيت وسام خففو هم فيحاء انمنعت من الاكل هنا

الله خل ارجع خفيفة شيوكلها هاي العوائل

بس عبد الإله ومرته يطبخون النفسهم البنيه جانت تطبخ بس من صار بيتنا مطعم كالت مااكدر خاص هي مو على صلح لا وي مرت ابوي ولا وي مرت وسام

ثاني يوم ابوي ترك اني وهي قفلت تطلع اضطريت صدك اجمع غراضها استاحشت و هي فعلا ماتكدر بدون وسام وجهاله محد انطاه عين غيرها

بيتنا مخبوص ومهوس

ووسام مثل عادته راح البيته واخذ مرته. جهاله وكعد وخله اخواني محتارين بنقل الغراض

من الحايط حاجاهم حمزة وبيده صحن كيك وعصير

..كواكم الله

صاحوله اخواني الصغار

.. بخت المجنص صخر يوكلك موو

..صخر وشهله وبنات عمي هنا يسون اكل ويعزلن دلال ماشايفه

عله صوته وصاح

.. بيباي بيت ابراهيم

وي هاي حجايته واحنا نضحك وابوي طلع سمعه

.. هذا حمزة وين ولك شنو هالغيبة خوش لكيتلك سالفة تتحجج بيها للدلال زعلان موو

..هلا يابه

..مو جنت ابراهيم سافل مثل اخوك

ضحك خجلان وابوي سأل

..ولك اليشوفك تاكل ع السياج شيكول انزل عيب وتعال كافي ظله هناك بنات عمك ياخذن راحتهن

..راحن يابه من الظهر عمي اجه من اربيل و بس انه وامي هنا

..البيدك منو سواه

بعده ماكايل شهله

ابوي مد ايده بدون استئذان كله

..جيب

انطاه البيده يضحك

بس دار وجهه ابوي ماعونه.. بيده حمزة صاح

..يابه بيش تشتريه

دارله ابوي يضحك ولا جن الدنيا مشتعله يمنا

..شگد تريد

..على كل قطعة مية

..بدال الثلاثمية انطيك 4 بس تعال وروح الامك خبصتنا وراسي ثال

..خل اظل بعد يومين ابيعك كم طبخه

..انچب وتعال

بطه تاشرله

.. الا اگل الامي عليك

..روحي لچ ركضي داير مرتين وتعاي

صحت بي لأن سمينه يضحك عليها

..لاتقلد عليها ولك

..ماتشوفيها تخبث

اجتني ندستني واني الم بغراض وسام وانطي للولد وهي تدردم

..شتردين بطه

..خاف الاكل بي سحر وابوي يكره امي انوب

..انتِ مصدكه بسوالف امهاتنا ولج ياسحوره هي بحاله

صاحني ابوي اخدرله جاي

وصيتها تناوشهم

ورحت اخدرله الچاي ابوي مگابل الماعون وصافن

والله عجيبه هو يحبها لو ماندم لأن جانت احسن من العنده اله لأن سوالفه وياها حسب الكلام السمعته مو مال شخص يحب ..بس تصرفاته تكول الهسه يتمنى ترضا يترك كلشي ويروحلها وحتى مشاكله وي صخر لأن مانعه او يحسه ند اله

توني انطيته الچاي

وفاتت فيحاء

..انت تالي عمرك اتخبلت گول اذا تخبلت نمشي بيك ندور علاج

گال

..اوو گامت تمسلت ومن الراهيم يخبزها خبز يظلون يدورون براسه انسانية ومكارم اخلاق

هنه ذني ينفع وياهن غير الاهانه ماينفع ..شتردين هاده

..كل عقلك مشتري كيكات متروسه سحوره بهالكد فلوس واني ليش محتركه عليك اني الغبيه ابني وعزيزي وجبيري خسرته فرت عقله فر ظلت عليك

..وابنج شيسوون بي شوكت تعقلين انتِ بعدين فلوسي واني حر حارگه دمج ليش

..شگول الله ينتقم منها ويهد حيلها مثل مامرمرتنا عليك

..امشي طلعي بره ولي البيتچ بلا لغوة يلا مخليتلج بلابل هنا ينقلولج كلام ..مخبله وخبلي جهالج هم خاف ناقص عارات اني زوديها انتِ هم

..هيين ابراهيم هين

..ولي كلت ..وزقنوبتج هناك اكليه ضرتج الحبيبة راحت مالج ونيس هنا بعد

ضحكت على استفزاز ابوي وهي راحت مدخنه

طلعت الدلال

..ابوي بو دره بيج الا يطبطب خدودج ام خدود

..والله على حمزة فتنت مو على ابوي

..وحمزة وين ترحين منه

..لا مايحاجيني بس نوره اتحلفت بيه اليوم اظل يمج ولا اوصل هناك

مرت ايام وابوي ماباقي على عرسه الا ايام جهز الطابق الثاني اله ونزلت اني واخواني الصغار جوه

امي ماتدري بكل هذا لو تدري ماتبقى هناك

اجه ابوي حاجاني

..شطابخه اليوم

..طابخه باچا وكسور من البارحه وصيتني

..صبي ودوري الشهلة اخذيلها

اتعجبت مامسويها قبل

..اخوج ماياكل گليله الخالتي

لبست حجابي وعبايتي ورحت وبيدي صينيتي خليت ماعون جبير ثريد وكاسة سوب وبيها كسور وزلاطه ولبن وخضره صينية كاملة

كوه امشي بيها دكيت الباب ورجعت شلتها

طلع بوجهي صخر

اني مو دوم اطلع وصار هواي ماشايفته وهو هم ركز بعيوني متفاجأ اشرلي بحاجبه شنو من هبصتي ارتبكت كتله

..ابوي وداها الخالتي اقصد امك

قلص حواجبه مامقتنع

يكول

.. تحبه

..مشكوره اخذي وروحي امي مو زين عليها دسم الاكل وحرامات ينذب اكلوه انتم

حجاها وطبك الباب بوجهي فشلني النحيس

وتكلي مآرب قربنه طبيت عيوني مدمعه ابوي من شافني ماسأل ليش كال جيبي ناكل اني وياج اخوانج يتأخرون

خفف عني اكلنا وكمت بس ظل الموقف يحفر بگلبي

وابوي يسأل

..ماشفتيها

..لا ماخلاني اصلا لازم الباب بيده ولا اروح بعد مو انوب هم تكلي واتفشل

سكت وراح صاح حمزة ومن كد ما الموقف اثر بيه صحت حمزة وذبيت حركتي بي صدمني وهو يحجيلي اشايف منا صخر من سمعت عذرته

....

هاجر ..

الدنيا المغرب والجو بارد حيل

وبهيج اجواء الحنين ياخذنا گوه الكل شخص غالي علينا شلون لو هالشخص امي

رغم زعلت وجوالي مافتحته وعرفت تتواصل وي عمي عثمان هي وحتى صور يصورني الها بس بعدني مجروحه

ابوي سافر بشغل

ومرت ابوي بعد ماجانت متجنبتني گامت تكول بعد قسمن الشغل بينجن مااريد خارمات ابيتي

هي تحاجي بناتها والجناين بس هي تقصدني

الشغل جان الثكال مقسم بين نسوان عمامي وهي بس غسل الحوش الحمامات المواعين خلتهن علينا البنات وبالذات المناور والحمامات وصتهن يكونن شغلي

واني اخذتها بحسن نيه ماعندي اشكال بس بعدين صارت تتحجج عليه الكاها ذابه تايت بالارضيه وره غسلي لو ترجع تذب منظف وتكلي جلفي الحافات زين وتستغزني بنظراتها وضحكها اخر شي كتلها

..اني اغسلهن مره باليوم وكلش كافي عليهن اذا انتي وسواسية وتحبين اكثر حاجي البنات

سوتلها مشكله شكدها

ثاني يوم گالت

..بعد حتى الحوش غسلي وياهن البنات تعبانات اليوم

..عادي بس اليوم وبس درت وجهي تاركتها وراي

صاحت

..العبدة تعالي

اتجاوزتها وكملت طريقي

..السويدة مو احاجيج

..عندي اسم من اسمعه اگلج ها

..والله وخوش علينا بنات العبيد بعد

..شوفي ابوي صاحب هالبيت والي بي اكثر من ما الج بي فأبوي ابو البيت واليخدمه ويخدمنا يلزم حده مااكلج انتِ عبده النا لا كلنا عبيد الله بس ع الأقل خادمتنا والخاطر الخدمة اتجاوزج هالمره لاتنسين الأكل انتِ تسويه

حجيتها وغمزت لأن جانت تعامل وهي تأمرني وكأن الشغل اهانة

..لا ياادبسز يامامرباية من مشت بيج بليلة ظلمة ماربتچ لو بس عرفت تشرد

..لا ربتني وقوتني لليوم الأواجه بي امثالچ شلون ماربت

مشيت عنها وبگلبي نار اسب امي وابوي والجابهم هم

هي المن خذتني والمن هسه رجعتني انه خوالي من يعيبون استهضم منهم مو عاد ذوله

لاگاني ابوي احسه مجبور عليه وكارهني

شلون صرت وبسبب لوني اضطرت امي تعوفه ومن اسم ياسمين المتفقين عليه هي وياه سموني هجران هجرني وانه يمه وبسبب هجرانه الي هجرت كلشي وراحت مارادت تعيد الماضي الصار وي اخوها وقاده للأنتحا..ر ينعاد بيه

مارحبت بي بالي مو يمه وهو صاح

..انتِ جايه هنا مجبوره جابرج اني ..ماردت احارب امج بيج خاف تكرهيني اكثر ليش هالنظرات واني ماجبرتج على شي ابوج اني ع الاقل جامليني

سكتت مااعرف شرد

..اسفة ماجنت منتبهه

استغفر ومشى على صوتها وكفت وهي تحجيله كلت راح يصيحني يهيني لأن زودت من يمها كلام بس الصدمني تركها تحجي وصعد وكأن ماله خلك يناقش اصلا

رجعت للغرفة

اني مااتحمل هالعيشة محد يحبني بهالبيت عدا عمي عثمان وبس وهو مو محبة استعطاف يمكن

واني اكل بروحي من القهر فات ابوي وسد الباب

عيني عليه ارد افهم جيته هنا شنو

..الباب هذا ماينسد بعد وحدج لاتختلين خلينا نعرف نتعامل وياج اتعودي علينا يابه راح تعيشين هنا مو يوم ويومين راح تعيشين عمر امج اليوم عقدت خلص ايسي منها بعد

..يتبع .