رواية كتوف مائلة الفصل السادس 6 بقلم نور الشمس

البارت بدون تعديل لأن مافارغه والله جاي نراجع

.....

كتوف مائلة...

....

الدنيا لا تميل دائماً للأقوى بل لمن يعرف كيف يثبت قدميه حين يميل كل شيء.

....

الساعة تجاوزت الثالثة فجراً...

والبيت كله غارگ بصمت ثگيل، حتى صوت المروحة صار كأنه أنين بعيد ..يقطع سكون الليل ببطء.

چنت گاعده قرب النافذة.. مرفقي على ركبتي

وعيوني متعلگه بالشارع ..هذه الغرفة شهدت طفولتي اختارتها امي بالطابق الثاني ..

وهذا مكاني المفضل عيوني تراقب وتترقب

صوت بكاء امي يفزز خلايا بروحي غلفتها بالبرود مجبره.. كنوع من انواع الدفاع النفسي خوف من لحظة الانهيار ..

رؤية الشارع فارغ وكأنه ينتظر شيئ لا يعرفه

انه وهو نتشابه ..

جوالي بيدي مطفي ..مااريد اقرا رسائل صديقاتي راح اخلف الوعود الي رتبناها بعد الامتحانات شنو نسوي ووين نروح ونتراسل وندز نشاطاتنا

مااعرف شلون اصارحهم واگلهم راح ابقى ذكرى عابرة بطريقكم ..ذكروني بخير وبس !

رأسي كان أشبه بمدينة لا تنام.

كل فكرة تجرّ ثانية وراها .

مستقبل غامض، وجوه رحلت، طرق لم امشي بها، وأشياء كنت اتمناها لاتمنحني الحياة فرصة تحقيقها

أشعر أن عمري يمضي أسرع من قدرته على الفهم،

وأن الأيام تدفعني دفعاً نحو مصير لا ارى ملامحه

رفعت نظري نحو السماء،

الليل بدأ يخفّ تدريجياً.. والسواد لم يعد حالكاً كما كان

خيط باهت من الضوء ظهر بعيداً خلف البيوت..

كأن الفجر يحاول التسلل بهدوء دون أن يوقظ أحد.

تحسرت بقهر..جبل جاثم على صدري

سهرت هوايه بس فرق هواي بين سهري وهذا السهر

انا الليلة اودع حياة اعتدت عليها ...

امي وحبيبتي چنت اتمنى ابقى رفيقتچ العمر كله ..لكن شعوري وكأني ثقل على قلبچ الحنون شعور لايحمله قلبي

گمت ابدل واجهز نفسي كالمعتاد

ماحبيت يشوفون انكساري لا أمي الي قررت عني ان تجيبني مره وترجعني ثانية

ولا ابوي يستحق يشوفني مكسورة اترجى منه القبول

بحكم سمعي عنهم اعرف ان هم مجتمع عشائري حاولت يكون دخولي الهم غير مستفز ولبست لبس مقبول ومستور بشكل يليق بأجوائهم بنطلون وهاينك وعباية كتف مفتوحه

رتبت وجهي قليل واهم شي الكحل الي مااستغني عنه

ايدي تخط بعيني وابالي اكول شگد قوية اني وويني وين الكحل والميكب

رتبت نفسي وشالي اخذت حقيبتي خليت بيها جوالي الشاحنة بطاقتي الشخصية وكم حاجة ضرورية الباقي بالجنط الجبيرة خزنته

الأنتظار صعب وسرعة الوقت تمر بشكل اصعب

رن جوال امي

جاوبت بصوت شبه مخفي من كثر بچيها

هلت بيهم ورحبت واشرتلي ننزل

وقت گعدة جدو وبيبي

نزلنا و رفعو روسهم الصوت اقدامنا المخلوط بصوت الجنط

ماحبيت اشوف ردة فعلهم اريد مااهتم بس بالحقيقة مهتمه وروحي تحترك

اني احبهم ومتأكده من حبهم بس اكيد يحبون ابنهم وام ابنائهم اكثر

چان ودي يكون الوداع مختلف لا هم بادرو وسألوني الي ولا اني رحت اخذت منهم اخر احضان

جدي حاجه امي

..سحر بنتچ وين رايحه

جاوبته بغصة

..لحظة يابه اوصلها وارجع ونحجي

بالباب سيارة عالية حديثة

لونها اسود داكن بلمعة تجذب الانظار

نزلو منها شخصين رجل متوسط العمر وسيم بشكل نفسه اليجينا على طول اعرفه ابن عمه

وشاب حلوو ايضا رحبو بأمي ترحيب حار امنتهم عليه

بستها واني اسحب اخر نفس محمل بعطرها

فشلت كل جهودي بحبس الدموع

صعدت ناسيه اسلم

صوته اجاني

..حياج الله عمي ..كل الهلا تنور ديرتنا بيچ

هزيت راسي بصوتي غصة مااگدر أحچي

..امچ مو بعيدة شوكت ماترديها تجين

...ان شاءالله

كلتها بعبرة خلت البصفه ينتبهلي من المراية مركز

ماكو شي يدل اني مجبورة غير هذه العبرة ولا اكو شي يخليهم يعتقدون رايحه بدافع محبة

هم يجهلوني مثل مااجهلهم

الجو كئيب بادي يشتي

والطريق طويل حسيت بطوله واحنا بعدنا بمحافظتنا الحبيبة ام الخير العشت بيها اجمل ايام عمري

بصرتنا الغالية يصعب عليه اودعچ

گلبي فقد السيطرة على نبضه ودموعي ماگدرت احبسها

صمت غريب.. صوت الهواء اليجي من الجام الجنب السايق الشي الوحيد الكسر هذا الصمت

فاتحه وايده طالعه من الجام بيها جگاره يسحب منها ويرجعها بره وينفخ الدخان بالهوا

بداخلي خوف يخليني اراقب كل حركة وهمسه منهم

شغل اغنية مااعرف موال.. غريب واول مره اسمعه بس خله دموعي تزيد وتنزل بغزارة درت وجهي للجام اغطي على منظري المو محبب

وصوت عذب مامسموع الظاهر اليغنيها من الجيل الجميل بس ولا مار عليه وي كلمات خلتني اتلوع اكثر

"انه ذمة برگبتك خليني من اموتن للنجف وديني"

هاي ذمة برگبتك مد العمر انت الي جناز لو حل الامر

وخل على اهل الحلة تابوتي يمر وهاي هي طلبتي وتكفيني

چان يسمعها ويدخن بشراها عيني على جمرة الجگارة تمشي بيده اسرع من المعتاد

وصوت الي وياه يگله

..انت منتقم من روحك كافي ادخن هالگد

قطع حديثه اتصال ومن جاوبها

..هلا حبيبتي مسافر وي ابراهيم اني رحنا نجيب بت عاصم من نرجع افهمج لايظل بالچ

مممم هذا الشاب متزوج غير اعرفه منو وشيعودلي

ورجع بالي يم الكلمات اللامست احساسي وخلت قشعريرة بجسمي تسري حبيت الكلام والصوت بدون لحن وحنين هاج بروحي اكثر واني اسمعها بتركيز

"ومن تصل ياصاح يم حضرة علي سير دون المگبرة وجمعة هلي

وبيدك احفر حفرتي يمدللي وعلي بتراب اللحد واريني"

گلت هذا المسكين اشايف ومأيس من الحياة هيج

الحد ماصدمتني سوالفهم الوياه سأله

..اقتنعن نسوانك لو بعدهن عالنات الحرب

..واذا مايقتنعن هنه يتعبن لوا قتنعن يشترن راحة بالهن بالأخير هم يصفن وياها عليه ويتأدبن تأديب جماعي

ضحك على رده وگال

..وشلك بشلعان الگلب ماتگلي

..بلكي ارتاح ماجاي ارتاح

..من ايدك ماجاي ترتاح

..اي ادري لاتتفلسف عليه انت هم

ضحك مارد عليه

سكتو ومافهمت شكوو الحد اتصالاته وهو يحضر ناس تمشي وياه تخطب باجر والصدمة من عرفت اله

گلت بگلبي چا والتابوت والنجف واتذكرت هم اصلا مقابرهم مو بيها الظاهر مجرد صوت حبه مو كلها تعيش الاحساس مثلي

رجعو اتصلو بالولد الشاب وعرفت المتصلة خطيبته مو زوجته لأن گلها من اوصل اجيج اشوفج ورجع كلها بنت عاصم اخوي اي مثل مافهمتج

واااااو هذا عمي

غميت روحي بداخلي شكد حلوو اني وين وذوله وين بس ابوي اني سامعه من امي يميل للسمار الخفيف بحسب وصفها جان كلش حلوو

بالطريق وگفو السيارة وطبگوها يم مطعم طلبو مني انزل اكل مااشتهي بس استحيت منهم هم صرو واني مااريد اجادل بعدني اول يوم لازم ابين لطيفة

طلبولي كباب ماكدرت اكل منه شويه واكتفيت معدتي مسدودة واحس نفسي غريبة بشكل

كسر الصمت صوته

..هجوره عمو اكلي ترى اهلج احنا مو غربا لاتستحين

اني عمج ابراهيم ابن عم ابوج اكيد تعرفيني ..وهذا عمج عثمان وهناك تتعرفين على اهلج اكثر

..مااكدر اكل والله مااشتهي

وسكتت ماكدرت احجي بعد

غفوة اخذتني من افكاري وكعدت على صوت الاسمه عثمان يتصل ويگلهم قريبين وصلناكم احنا ويأكد عليهم مستفسر

..عاصم موجود لو لا

مااعرف شردو عليه

..خل يجاوب ابراهيم يحاجيه

ولا يطلع وصلنا ترى

وصلنا الظهر فتحت عيوني على اجمل منظر ممكن اشوفه بساتين وخضار وريحة رطوبة الگاع وي الزرع فد شي ياخذ العقل اصوات الحيوانات و الطيور

نزلنا وهجم علينا هاسكي خلاني ارجع للسيارة بخوف

بس جان جاي يستقبل عثمان الظاهر ظل يم رجله يلعب ويتودد وهو يرحب بي عبالك واحد من اطفاله

البيت بناء حديث وجبير باب البيت واسعة رغم الاجواء الريفية البيوت فارهة وحلوه عيني عليها انفتحت بوسعها فتت وراهم حسيت الواگف ابوي من نظراته وهو يشوفني المطلوب مني اروح احضنه واني مااعرفه اصلا اترددت

وهو اتقدم باسني جمدت بمكاني

الشباب هوايه والبنات الظاهر البيت يضم اكثر من عائلة

بنات بعمري سلمن ورحبن بيه واكو بيهن مامقتنعات ولا حابات وجودي من نظراتهن حتى من الكبار

دخلونا البيت وصاح ابويه وحده من الصغار

..دلال بابا وصلي اختج الغرفتها تبدل وترتاح وتنزل تتغدا ويانا

وعرفني بيهم گبل لا اصعد ياشرلي

..ام احمد خالتج ان شاءالله وام اخوانج حرمتي هاي وذني نسوانن عمامج

دلال وهدى خواتج

عمچ عثمان الجابج عرفتيه اكيد هو وعمچ ابراهيم هذا اخوي وصديقي واكثر

عمامچ بدوامهم من يجون تعرفيهم

اخوانج بالدوام يجون وتشوفينهم

قدرت عمرهم يكون صغير لأن خواتي تقريبا باعمار رابع اعدادي او متوسطة واكيد هم اصغر

صعدت الغرفة بسيطة حيل حتى سرير مابيها بس نظيفة كلش وريحتها طيبة فارغة بس كنتور نفرين بيها وفارغ هم

بداخله فراش وبطانية ومخده بدلت وجريته اتمددت واخذتني نومه الحد الليل گعدت على صوته

..گعدي يابه اكليلج شي خلينا نشوفچ

......

ريم

بيت الأهل شگد ماجان واسع وشگد ماچان الأب حنين ابويه مامقصر وكلش حنين ويحبنا بس بارده حيطانه وفارغة من دفو امنا

احس البيت يكون بيت اهل فعلا للبنية بوجود الأم وبس

وبعدها نصير خطار مهما كان اكو اهتمام وترحيب من تلزم البيت مريه غير الأم مهما كان قربها من تحسه بيتها الها ينتهي شعورنا بذاك الارتباط بي

بناتي متعودات يتريكن ويلعبن براحتهن

خاله عصبية متريد شي يتحرك من مكانا واليحرك روحي متملكه البيت الاثثته امي بحب وفرح وهي تاخذ راينا بيهن رغم چنا صغار

ركضت للمطبخ اصيح بسارة تفتح الكاونتر وتسده

..تعالي ولج سورانه العرمة شجاي تسوين

عوفي الكاونتر تعاي شوفي خاله روشا شجابتلج

اخذتهن للغرفة

رشا سوده عليه تحس بيه

البارحه من رجعت من دوامها جابتلهن العاب يلتهن بيها

خديجة حبابه تسمع الكلمة بس سارة عرامة بيبيتها وعماتها كلهن بيها وبيني وبين نفسي اكو بيها من رشا حصة جبيره

خليتهن وطلعت اكمل تنظيف مكان غزالة العملية ماخذه فكرها وكتلها مادامني هنا معليج انتِ ارتاحي وبس

طلعت وراي ساره مدري شلون مغافلتني وراجعه للكاونتر جاره ماعونين وواگعات منها

اجت خالتي گلبت الدنيا

..شنو هالوكاحة وين وكتج مكضيته ومامعلمه بناتج الكعده علميهن تعبي عليهن مو خلفه وشمر

صفنت والدمعة بطرف عيني

اني اخلف واشمر والله شكد تعبانه عليهن كلهن يدرن مطوله خلكي واعلم واحاسب وافهم بس هي هاي الجهال يعني محد ينولد مايتحرك من مكانه وفاهم على مايكبرون نشيب من التعلوم قبل امي هيج تگلنا مايكبر راس الا يشيب راس

زادت بحجيها واني ساكته

..وفوكاها ماراضيه على عيالج زين ومتحمليكم اكيد هناك اوكح بعد

..خاله ترى طفلة ماتفتهم هسه اني اعلمها ماتوصل هنا بعد

..لا والله هوايه تتربى اذا تنتظرين تفهميها راشدي فري وجهه فر كون كل متذكره بعد متعيدها

..مامعودتهن على الضرب على طول وخاص كدام احد بيني وبينهن احاسبها هيج احنا تربينا

هزت ايدها ماراضية استفزتني

رديت بهمه

..ترى المواعين يعزن عليه اكثر منچ مواعين امي ذني ومو سهل عندي السوته بس اني اتصرف وياها

بصياح ردت

..الله اكبر عليچن خالتجن اني شمسويتلجن وتكرهني تردن تكللي هذا البيت ماالج بيه هيج قصدجن كله الامجن والجن واني لازم انچب واسكت واخلي بناتچ يهجمنه

لازم مااحجي مااوجه... النصيحة من عدو تاخذنها ومني لا

..خاله بس اني الحجيت ليش تجمعين البنات شعليهن واني ابد ماقصدت هيج بس انتِ تحسسيني قابل متعمده اني وبناتي نخرب هالبيت وهو يعز عليه اكثر من اي شخص

انهارت تحجي وتبجي وعلى صوتها اجه ابوي وجدي

شكد موقف صعب انخليت بي رغم محد لامني بس احساس اجاني هسه يكولون علكتها ابيت عيالها وراح تخرب البيت هنا

راح يشوفوني ام مشاكل اريد مكان يغطيني يخفيني من الوجود ابوي صاح بيها

..صوتچ لاتعليه شكو شصاير احجن

سكتت محتاره شريد احجي وجدي يكلها

..عيب ياعمي شجاجن عليمن هالمشاكل

تركت ابوي واتجاوبت وي جدي تعرفه مايهون بيها

..والله ياعمي ماسويت شي بس نصحتها تعلم بناتها البنت لازم من الصغر تتأدب وتتعلم وهنه الله يسلمهن مايعرفن الكعده شنو بس صرت مو زينة وطلع البيت بيت امهن واني لاشيئ هنا

تحجي وتبجي جدي باوعلي

..اعتذري من خالتج جدي المشاكل مو حلوه

دموعي اريد يوگفن اريد يطلع صوتي واحجي اني بهيج مواقف معروف عني جبانه كلش ولو ماصخر واگفلي جان اندست من زمان

..والله ياجدي ماكلت شي

بحزم گال

..اعتذري

گلت

..اسفة

ابوي صاح بناتي باسهن واخذهن وطلع

واني شبعت بجي

ماادري شگول بس تندمت ظليت هنا لو راجعه احسن الي على الاقل من تصير مشاكل اطالب عزام بمنة يوكفلي هنا مااكدر احجي شي

خواتي كامن يفورن

رشا مااتحملت الا تروح تحاجيها مشيت اجرجر بيها

وهي انهدت

..انتِ خالتنا لو عدوه اجيتينا شاده حزامج تشوفيها بوضع يستاهل عرك هي ناقصة البيها كافيها ريمه ليش تتعمدين تقهريها وتشكين منها ليش وفوكاها يجبروها تعتذر على غلط مامسويته

اجر برشا جر وهي تفلّت ايدها مني

..ولج رشا تعاي اسكتي لاتكبرينها

..عوفيني اگلج ..ترى هنه ماعونين ماكسرن كنتورج ولا جربايتج مواعين بدل ماتكليلهن فدوه واطمنين خوفهن جهال تسويلج قصة وفلم

..انتن تكرهني ومايصير بعينجن شي اي احجي واعترض وبكيفي بيتي هذا وكلجن خطار هنا وهالمره رأفة بيها سكتت غير مره اسوي الاكثر

وبصوت عالي ردت

..شنوو ! بيتچ انتِ ؟ ههههههه ضحكتيني مااريد اجرحج شلج بي البيت انتِ

هسه عرفت نسوان خوالي ليش يطشن جكليت بعرسج هالگد رغم العرس سكيتي الظاهر خلصن

جريتها اسد حلگها رشا ماتسكت

اجر بيها وذيج تحجي وهاي تتهدد

دفعتها للغرفة بقوتي

..ولچ انچبي انچبي خليني اولي سكتي ابوي مايستاهل مشاكل طلع بالبنات يرضيهن كافي الخاطره سكتي

رشا تفور فلت شعرها ولمته ماتعرف شتسوي تريد تشغل روحها

..لچ تگلي خطار انتن والبيت بيتي ههههه والله ياربي تريدني گوه اجرحها ولد تلد هي والها البيت عود الها ربع

..سكتي يمعوده خليني اولي حتى عزام ماكو بس خل يجي ارجع والله بطلت مااريد راحه منين تجي الراحه ماتكليلي

انتبهت غزالة تبجي

..شبيج غزولة منو وياج

گامت تشهگ

..لو امي عدلة يصير بيج هيج شنو ماعونين انكسرن فدوه ماتكسر البيت كله شكم حفيده عدنا ترى اطفال هنه ليش هيج تسوي

رشا صاحت بيها

..لاتسوينها دراما عاد ويومين تعتزلين اي اكو امهات يسوون اكثر ع الماعون عادي احجن الموضوع بدون حساسية

..اذا هيج فاهمه شبيج هديتي اجر بيج وولايمج

..اني مااتحمل تنقهرين من احنا صغار حتى لو امي عمت عيني عدلة وهي مسويه هيج تلكيني بوجهه ولو ماتسويها بس القصد اكو امهات هيج هم

..سكتن يلا لايجي بابا والله عيب منه شلون سمعة راح تطلعلي ام مشاكل

شويه اتفاجأنا بصوت ابوي يصيحنا

..تعالن بنات خلي افهم

انصدمت من شفتها مجمعة جنطتها تريد تزعل

..شصاير بابا وراي

رشا حجت

..ماصاير شي بابا بس ريم انقهرت واني عاتبت خاله جان تاركتهن المواعين ولو انكسرن اشو تنظيف احنا انظف حتى الطبخ شالته منها ريم

..بناتك يجذبن عليك يدرن ماتهتملي ولا ميت عليه تريد تسافر الاربيل وحدك ولاتكول عندي مره اخذها اونسها

..رايحين سفرة لو علاج

..وعلى اساس مااعرفك اني وي العلاج تخلصوها ونسه خو تاخذني هم اتونس واراعيها

..مثل كل مره تتمرضين هناك واحتار بيج كتلج غير مره اخذج واعوضج بسفره وحدنا ..بعدين هاي شعليها بهاي شعدجن انتِ والبنات صغار انتن والمواعين شنو نمونه ولو اتكسرن العصر روحي جهزي مكان الاثنين كارتونه كلشي عندج الا مشكلة

..اني اشتري واجهز لا والله ولا الي شغل اني شلي بهالبيت مخليني للخدمة وبناتك يتمنن عليه

رشا ماسكتت طفرت من يمها

..ياخدمة ترى بس جدو عليج انتِ تحبيه عمج وتكولين اخدمه مثل ابوي والا حتى ابويه احنا قايمين بواجبه ..بعدين انتِ مو تكولين هذا بيتي وانتن خطار عندي ومصيرجن ترحن كلجن

دار عليها ابوي

..منو الخطار بناتي خطار عندج؟

..اقصد ابيتك بيت الابو شكد ماطالت كعدة البنيه بي تبقى خطار

..كلنا خطار عدهن فوتي هدومج وصيري عاقلة اذا اطلعين منا بعد ماترجعين وهالمره حتى لو اجيتي وحدج اطلعج وافشلج لأن طلعت من ماعونها زعلاتچ بدون معنى

جدي صاح على ابوي يحجي يكله اهدا وهم صاح بيها وكلها ياعمي عقلي كافي

خيم الصمت بالبيت بعد الهوسه والمشاكل

بس نار تفور بيه مابلعت الموقف ابد وبعدني احس اني السبب

بيومها العصر اجه عزام ردت اروح وياه و اتذكرت كلام صخر ماردت اكسره

خليت رشا تطلع وكالتله اعذرني ابو خديجة ترى ابويه مو هنا ولا جدي وبس احنا وريم ماتقبل تطلعلك زعلانه

موصيها افتح تليفوني وهم مافتحته

ثاني يوم صخر وعزام اجو الجدي وابوي وانحلت مشكلتنا اتصورت ابوي يتلافى المشاكل خاص خالتي شادة راسها وزعلانه ماطلعت من غرفتها ابد كلت هسه يكله اخذ مرتك ..وابني بس ابويه كايله تبقى يمي الحد مايكمل بيتكم حسيت بفرحه ماجنت ثقل عليه

بالليل مر علينا صخر

ملاكيته خالتي ماراده السلام اشرلي مستغرب شكوو

خالتي هي هيج من تزعل من احد تزعل ع الكل هذا طبعها ولازم من ترضا كلنا نرضا وننسى وياها

..مشكلة صارت من وره بنات اختك الوكحات كسرن المواعين وخبصن الدنيا

..وليش المشكلة هنه مواعين

..سوء فهم ورشا ادخلت ادافعلي وعلگتها

..الله يعين عثمان عليها الا اطلعله گلب بصف گلبه خاف نسوانهم مقصرات تجيهم هي زيادة

ضحكت

صدگ على طاري عاصم رشا مدري شجانت تحجي وي خطيبها يمكن جايبين بنته هو وعمي ابراهيم

..يايابا الحنين عمچ مايدخل الا بالزينات

ضحكت

..فوت يم جدي اصيح البنات ونجيك

..مو تتأخرين ارد اسولف وياچ على عزام

..صار

..تليفونج فتحي يابه كتلج من تنحل حاجيه مو تنتظريني احجي

..ارد استشيرك قبل لا احاجيه

..كولي

..اريد ارجع ماابقى هنا احس بروحي ثكيله

..ثگيله شنو رجعه ماكو حتى عمي حاجيته وفهمته ليش نريدج هنا ..اذا كلش متضايقة تعاي وياي شكم يوم غيري جوو يم شهله ..بس عزام خطيه هنا ياخذ راحته اكثر

..لا مستحيل اخلي هنا يجي الاوضاع مدري شلونها

..تعاي وياي اني هنا راح احاجي عمي اكله امي تريدها واني اشوف البنات

..خاف يحس ويضوج مني

..حتى لو حس عمي تهمه راحتجن

رحت احاجي عزام

بس فتحت التليفون اجني الرسائل شكد

واني اقرا بالرسايل مودي كله انگلب وضحك گلبي قبل ثغري على كلامه

..يولي مشتاق المشتاق شيصبره

..حياتي بدونچ ماتنطاق

..تعرفين مااكدر ارتاح وانتِ زعلانة تغلقين جهازج ليش شلون اوصلچ اني

..دنيا بدون صوتچ وضحكتچ ماتنراد

بعدين كاتب بغلاة امچ لو قريتيها لاتوصلين للرسائل الأولى

صار عندي فضول اصعد اقرا وقسمه خلاني اتراجع

بس بدون اي شي كتبت

..ليش سابني بيهن لو شنو؟

..وهاي الرسائل كلها ماتردين الا على هاي خاتون

ضحكت بس رديت بجمود

..ماجاوبتني ليش مااصعد اقرا

اتصل جاوبته صوته تعبان كلش

..ياهلا بزينة البنات

..ليش مااقرأ

..بأسم الله ارقيج

ضحكت

..ليش صوتك تعبان مريض انت؟

عزام مريض !

..اي والله مريض وبس انتِ انتبهتيلي

والله بدونچ مااسوا شي وبنص اهلي وچني غريب صار شكم سنة متزوجين مامتعود بدونچ

..اني هم والله مشتاقتلك هواي وهسه طاگ گلبي عليك وظل بالي يمك عليك الله اخذ علاج لاتترك نفسك وتوگع

..هسه اوصي عمار يجيبلي

لايظل بالچ احچيلي شلون گلبچ ينطيچ تعوفيني هالگد بدون اتصال

..والله ماطلعت الا لمن حسيت گلبي راح يوگف من القهر انت ماتدري شلون يعاملوني وراك

..حقچ ميخالف هانت والله سهلها علينا انتِ شحاجيه العمي حسيته مقهور كلش عليچ وعاتبني شلون تتعير بأمها وهي ميته ومابيها عيب وگعد يفهمني الخلفة للزوج وتحديد الجنس اله كل ظنه مااعرف

..حچيت روس اقلام تايصدگوني مو اكثر

..المهم اني وعدته وعد وعدي والله مااخليچ توصلي زعلانه الآخر يوم بعمري

..عمرك طويل يابعد عمري

اخذتنا السوالف وبكلامه الحلوو نسيت صخر منتظرني اجت غزالة تذكرني

..صخر يكول ناويه تبات باتصالها اجيها باجر

ضحكت وهو استفسر

كتله ارد اروح يم عمتي كم يوم ماگال شي الوحيدين الي يخليني اروحلهم بدون مايسأل ويدقق

ورجعت كتله

..بذمتك احجيلي شكاتبلي وماتريد اقراها

ضحك

..گتلج ظلي بزعلتج اني بأربيل وانتِ بعد اعرف

..بذمتك هيج كاتب ..روح اعتبر الرضا ملغي

..تعاي لچ ملغي شنو ماكو الغاء عبالي باجر اجيج اشوفج بس مادام هناك استحي من عمتي ام صخر مااكدر

مر من الباب نشوفك

وفعلا مو زعله صارت عبالك رجعنا عشاق وندور مواعيد ولقاء

بيومها رجعت وي صخر

واول ماطبينا يم عمتي علگت ببيوت عمي ابراهيم چان خاطب من العصر وتوه راجع

اصواتهن عاليه وهنه يدعن ويحجن

وانوب الدعاوي انگلبت على عمتي لابيها لا عليها لا الها علاقة بشي فعلا بعض النسوان مريضة يتركن الرجال العايفهن وراكض وره وهم يدعن ع التاركته وعايفاته ويردله الرضا يرضا

من سمعهن صخر صاح

..ابو وسام اثنين انت ماگادر الهن الثالثة من تجيبها مشاكلك منو يحلها عمر موسى لو الجامعة العربية

ضحكت وعمي صاح من يمه

..لو تستحي انت ماتكلي ابو وسام بس انت حالك حالهن الله مخليكم شلعة گلب الي

..مؤمن ومبتلى الك الله ابراهيم

..الله يطيح حظك تربية سليمان هي هاي تربيته الي يزامطوني بيها ولد مايكل الابوه يابه

..صوجك ماعودتني عليها من الصغر ..ع العموم مبارك الا اجوبلك بعرسك

سكت عمي وهنه هم اصواتهن جوه صارت

يمكن حسن بشماته

ضحكت وبناتي يمي مافاهمات شي

سألني ابراهيم مستغرب

..اگلج ريمه ..شو مآرب سلامها وياي هالمره يختلف

..شعجب؟

..ماادري والله بس عبالك مو هي

...

سراب...

گاعده اثرم كباب للعشا امي ومرت ابوي زعلانات شادات راسهن ابوي قرر يتزوج الرابعة وبيتنا گايم مانعرف ليلنا من نهارنا واخواني الكبار والصغار براسي يمي بطة عود تساعد تاكل نص الاسويه

لمن الزم الچفچير اطردها

اكمل الشغل اني ولا اخلي مص بطاوة ونص الها

امي تحجي وتشكي وتبجي وتذكرنا بزواجه منها مارايدها من البداية

مارايدها وخلفت ثمانية لو رايدها تسويهم عشرين

ومرت ابوي مقصره خلفت خمسة نوره وحمزة توم والباقي مفرد

اشتغل وادردم هسه انتن الا تتخاون بزعلجن واطبگن بفد بيت شيوكل جهالجن مصيبة صابتني

خاف هي ناقصة واجتنا مآرب وراها شياطينها تلاثه

ومن الباب مبين وجهه مغضب وراها سالفة

عمت عينج سراب چانت عايزة وكملت

رحت اشوف شجايبه وياها من بشارة لكيتها منهده بأمي

..كله من وراچ ماخليتينا نكسبة يصيرلنا سند شوفي وگفته البنات عمي واگف سيف ودرگه

عندج اربع ولد كبار بكده واكبر مابيهم خير النا هايه ريم خلاهم غصبا عنهم يسوولها بيت

مو بس هيج عمي خابره يعاتبه اجانا فر راس عمي فر

وحتى اني لكيته يرزل عمار يكله رجعها واختي وماارضا عليها بيش فادنا الگطع لو كاسبينه شيصير

امي شادة راسها تولول وجابتلها هاي مصيبة اعظم وهي تسولف عن قدرته باقناعهم

عضت اصبعها امي بقهر

..اخخخخخ امدا حظي لاولد يبرد الگلب ولا بنت عبايه جايه تواسيني ابوچ الهالعمر وبعده يدور عرس

يگول ماارتاح الا بمثلها تشوفين قهر امج يا عزال ياصخام شبيجن ماتحسن بيه

مآرب ماسكتت ردت بقهر

..يمه ابوي عرس مرتين عليچ بعدچ تنقهرين منه المفروض گلبچ مات ..خليه يتزوج وخل فيحاء تضوگ اللوعة

فيحاء وي حظ مآرب اجت بخاي اللحظة ونصبتها مناحة

..تشوفين رزق بناتج متشمتات بيه

وامي ترضي وماكو هزيت ايدي ورجعت الشغلي جا عليمن تبجن من العروس غير حبايب انتن هسه

يمه والله عيارات اتذكر عركهن گبل الشعر يگوم يطاير بالحوش وابوي متونس ولا يمهن

اجت وراي مآرب تحچي

..سراب اذا بيجن خير لاتصيرن مثلنا اني وعهود

ماكسبنا اخونا بسبب امي وزنها ترى جدج وعمج الابوج ماكدر يكسبهم فارهم فر والاهم حقاني اتقربله وخل يوكفلچن اخوانجن بوجود ابوجن مالهم كلمه لاعليه ولا على غيره

..وين اشوفه اني شبيج هو جاينا شايفنا

..انتن بيجن خير فرضن روحجن عليه

..مااحب هيج اني ..صدك مااكرهه ولا الي شغل ودوم احجي ع امي وسوالفها وياهم بس صعبه اتلوك مااعرف

غمتني وراحت

..وين تعاي ايدج وياي خلي نلحگ نعشي هاي الافواج

عافتني وراحت كملت كلسي وصحت خواتي الصغار يفرشن سفرة وينقلن وياي المواعين

واول ماحطنها گعدن امي وضرتها ياكلن ويشكن ويدعن

ووحده تحلف للثانية شكد هي عزيزة ومن وراه يتعاركن

ساعة. طب علينا وصارت الهوسة الدعاوي صارنمطر بيمن يغثن ابوي يدعن على ام اشهل وادخل مناك اشهل وصار الحجي مرادد اشرت المآرب الي تريدنا نتقربله منين نتقرب

مآرب الاول نره تصير ضد امي امي طردتها وكوم ابوي واكتلهن يلا ارتاحن وهو بدل وكشخ وطلع

ورجعن يحجن وراه من جديد داخ راسي اخذتلي براسيتول ورحت شادة راسي من التعب وافكر بحجي مآرب

فعلا اخواني مايدخلون ابوي يتعامل وياهم وكأنهم صغار ومالهم حق يتخذون قرار وهو علاقته مو شي بجدي من الاساس واترتبت علاقتهم اخواني على هالاساس وياه حدهم وي جدي يشغل يكلفهم بسلام غيرها لا

خليتها للأيام بلكي يجمعنا موقف

....

يوم صاخب باصوات المراجعين والموظفين داخل المستشفى اتوجهت القاعة العلاج

والمطر يطرق زجاج النوافذ بخفة.

دخلت امرأه اصابتها تخفي شبابها تمشي بخطوات مترددة

مخليه طرف العباءة قريب الخدها وكأنها تحاول إن تخفي نصف وجهها. عينها اليسرى چانت تدمع قليل وابتسامتها مائلة بحزنٍ واضح.

اتذكرتها هذه الشابه ملتزمة ويانا بجلسات علاجية لشلل العصب السابع

راجعت ملفها ، ابتسمت بهدوء مااريد احسسها بشفقة لأن ماجاي تستجيب بسهولة.

..شلونج اليوم

گعدت مقابيلي وهي تتجنب النظر إلي واني لازم اركز بتفاصيل قليلة ممكن تنطي امل بالعلاج

..مثل كل يوم .. أحاول أضحك وما تطلع الضحكة كاملة.

سكتنا اثنينا لحظات

اكو صمت بليغ هذا النوع من الصمت الي يفهم بيه الإنسان وجع الآخر دون حاجة لكلمات كثيرة

قربت الكرسي وخليت أمامها مرآة صغيرة.

..اليوم راح نشتغل حتى يرجع الوجه يتذكر نفسه

باوعتلي باستغراب

..يتذكر نفسه؟!

هزيت رأسي مبتسم

..العضلات مرات تخاف بعد الإصابة... وتحتاج أحد يطمّنها.

بدأت العلاج ببطء.

حركات خفيفة بأطراف أصابعي على عضلات الخد والجبهة، وتمارين أمام المرأة

خطوات اطلبها وتنفذ

رفع الحاجب... نفخ الخدين... ابتسامة

لكن الزاوية المرتخية من فمها بقت ساكنة

نزلت عينها بساع

..شايف؟ ماكو فايدة حتى بالبيت شگد اكرر هالخطوات ميفيد

وگفت التمارين لحظة، حاجيتها بهدوء وثبات

..العصب مو حجر ولا يستجاب بلمسه اعادة تنشيطة يحتاج صبر ..وتكرار .. وثقة. الجسم يسمع لصاحبه أكثر مما تتوقعين .

گعدت اشرح الها شلون تستيقظ العضلات تدريجيًا

وشلون الدماغ يعيد بناء الإشارات ببطء.

ماچان كلامي طبي بمصطلحات غريبة عليها گعدت اشرح الها بتفاصيل اقرب الادراكها

شفت غزالة بيها نفس النظرة المكسورة

صعب ع الانسان يشوف جماله مشوه كيف اذا بنت

هالحالة ركزت بيها خاص وغزالة بعيده عنا ايام واتي على تواصل وياهم سووها العملية ونجحت الحمدلله وباقيه فترة نقاها ورقابة

وبكل مرة چانت تدخل المريضة احس غزالة گدامي الحد ماشفت خوفها قل

صارت تضحك من تفشل الحركة بدل ماتبچي

وصرت الاحظ اصغر التفاصيل التتغير

..اليوم الخد تحرك أكثر...اليوم العين أهدأ..اليوم الابتسامة بدت ترجع.

وبأحدى المراجعات بينما چانت تقلد حركة رفع زاوية الفم أمام المرآ.. توقفت فجأة.

تجمدت عيونها

الابتسامة... تحركت فعلًا.

صح بشكل بسيط .. لكن گدرت

خلت ايديها على فمها مو مصدگه تخاف ترفع ايدها وتشوف الحركة مختفيه

حاچتني متعجبه وصوتها يرجف

..رجعت

ضحكت ضحكة منتصر فرحان بأنجاز يضاف الي

..گتلچ الوجه ماينسى نفسه

طلعت فرحانه وفرحتي اضعاف بكل مره احس

بنفسي وسيلة احياء وفرح الناس سيطر عليهم اليأس والحزن

وارجع اسأل نفسي

شوكت الگه معالج لليأس الي مسيطر عليه وخافي

بدتت هذا الشعور واتلافيت هذا السؤال واني اتصل بغزالة اطمئن عليها طلبت منها صورة اشوف بيها التغيير الي يسعدني اكثر

وفرحت فعلا من شفت اجاني مقطع بيه تكدر ترمش وتغمض وادير العين

كلشي يشبه عينها الحقيقية بشكل تسعين بالمية

الا بتركيز عالي نلاحظ الفرق

اتصلت اباركلها واشرحلها التغيير

بفرح ردت ونبرة جديدة عليه حسيت جزء منها كان ميت واليوم حيا

رجعت للبيت وي مهيب

وبطبتنا للديرة

اشرلي

..شوف هالغزالة منين هاي اول مره المحها

..الله اكبر عليك شوكت تجوز

..يول بيها شي غريب الله يجعلها اختي مو من بناتنا من ضايفنا اليوم

..الله يزيدك ايمان بس لمحتها

..هذه بنت عاصم

..لا والله

..حسب المعلومات العندي هي ذوله عثمان ورشا وياها

..وهي هاي الهجر امها اشهر وهجرته العمر كله

..اي هي

..نزلنا سلمت على ابراهيم ورشا من بعيد واتلگني بنات ريام بالباب يردن يرحن الابوهن

وگفت احاجيه

..خاف تريد مرتك تاخذها مطعم سفرة كول اسمحلك

..انعم الله عليك وتسمح

..اي وياريت تتصل تاخذ موعد قبل الطلعه

..كمت تخربط يول شنو عليها طلب وتريد موعد

..هههههههه عمك ابراهيم ماعليك عتب ..اني المافرغلك يالناقص

بعدنا نحجي وصوت ابوي وگفني

ولأول مره يصيحني

..صخر تعال يابه هنا

يتبع ...