رواية شمس الدوار الفصل الخامس 5 بقلم مصطفي جابر

انت بتطرد أختي من دارها بهدوم بيتها يا عطوه؟ جرا إيه لرجولتك ونخوتك يا ولد الدمنهوري؟ والله سراج لو عرف ليمحي اسمك من الدنيا

عطوة بسخرية: تعالي انتي كمان غوري من هنا إحنا اللي غلطانين من الأول إننا وافقنا نقعدكم في دارنا نسيتو إنكم يتامى مقطوعين من شجرة وشمس قعدت تتحايل على سراج وتتمسكن لغاية ما وافق يجيبكم تقعدو هنا بس لاه كفاية عاد لحد اهنة وجودكم بقى تقيل على كتافنا واحدة مطلقة و التانية ماشيه علي كيفها

شمس بصدمة: انت بتخرف تجول اي عاد لم لسانك ده لقطعهولك واياك تجيب سيرتي اني وأختي

رباب بجمود: عطوة معاه حق يا شمس الدار دي مابقاش فيها مكان ليكوا واصل اليتيم اللي يدخل دار ويخربها ملوش مكان وسطنا البيت اللي جيتوا منه لسه موجود روحوا اهناك وداروا فضيحتكم بعيد عن اسم الدمنهوري

شمس بصدمة: يا مري حتى أنتي يا حماتي بتطردينا في ليل ملوش آخر

حبيبة بسخرية: عفارم عليك يا عطوة كدة حق الكف اللي انضربته رجع لي تالت ومتلت اهم التعابين خلاص انطردوا والدار نضفت عاد روحي يا شمس روحي قولي لسراج بيه إن الهيبة اللي كان بيتحامى فيها وقعت تحت رجلين أخوه الصغير

صابرين بتمثيل الانهيار: اني مش مصدقة بتطردونا أني هاخد أختي ونمشي بس افتكروا إنكم ظلمتم يتامى والظلم ظلمات يوم القيامة

عطوة بزعيق: اطلعي أنتي كمان وراها مش عايز أشوف وشكم اهنة واصل

عطوة زق صابرين لبرا ورزع البوابة الكبيرة في وشهم شمس وصابرين بقوا في الشارع شمس سانده على الحيطة بتعب

شمس بكسرة: هنروح فين يا صابرين هنروح بيت أبونا إزاي وإحنا بالمنظر ده

صابرين بغل: هنروح يا خيتي هنروح وحقنا ده مش هيضيع هدر بس المهم سراج لما يرجع يلقى العش فاضي والخراب حل فيه هيعمل اي

بعد شوي

شمس وصابرين ماشيين في ضلمة الطريق وفجأة كشافات عربية قوية نورت وراهم وزمرت بجنون والعربية فرملت على آخر لحظة قبل ما تخبطهم

شمس بغضب وتعب: وه إيه العمى ده مش واعي للي ماشيين في الطريق يا واكل ناسك كنت هتموتنا

نزل من العربية شاب ما لبس بدلة

الشاب بتريقة: جرا إيه يا ست أنتي أنتوا اللي ماشيين زي التايهين في نص الطريق بهدوم زي دي وبعدين إيه المنظر ده لو عاوزين قرشين اطلبوا بأدب مش ترموا نفسكم قدام العربيات عشان تعملوا سبوبة

شمس بتعب : شحاتين في عينك يا قليل الرباية إحنا هوانم النجع ده وتاج راسك لولا الزمان غدار مكنشت وقفت قدام أشكالك غور من اهنة بدل ما لسانك ده يتقطع

صابرين ببرود: سيبك منه يا شمس ده عيل ميسواش بصلة وبكرة الدنيا تدور بيه

الشاب بسخرية: هههه هوانم ده منظر هوانم ولا غوازي هربانين خدي يا شاطرة أنتي وهي العشرة جنيه دي تجيب لكم لقمة وتبطلي صريخ يا ست أنتي بلد مفيهاش غير الفقر والجهل

رمى العشرة جنيه في الأرض وركب عربيته وطار بيها وعفرهم بالتراب شمس فجأة حطت إيدها على قلبها حست بنغزة

شمس بوجع : آآه سراج سراج جرا له حاجة يا صابرين أني حاسة بنار في صدري روحي راحت مني يا خيتي جوزي في خطر

صابرين بتريقة: وه يا شمس وإحنا في إيه ولا في إيه إحنا مطرودين في الشارع وأنتي بتفكري في سراج ده أخوه ضربك وطردك وأمه وافقت فكري في حالنا عاد

شمس بانهيار : لا مش قادرة أفكر في حالي قلبي بيقولي سراج مش بخير سراج حصله حاجة واعرة أني خايفة عليه يا صابرين خايفة يضيع مني وإحنا ملحقناش نشبع من بعض

صابرين بغيظ : سراج سراج ما هو ده اللي ضيعنا دلعه ليكي هو اللي خلاهم يكرهونا ويطردونا اتهدي عاد وشوفي هنوصل بيت أبونا إزاي وإحنا بالمنظر اللي يقطع الخميرة من البيت ده

شمس بزعيق : مش رايحة بيوت أني لازم أروح لجوزي القسم لازم أطمن عليه بقلبي ده اللي بينزف سندي وضهري محتاجني يا صابرين

صابرين بغضب : تروحي القسم فين يا مخبولة بهدوم البيت دي عاوزة تفضحينا زيادة الناس هتقول علينا إيه

شمس حست بتعب فجأة اغمي عليها

صابرين وقفت ببرود وحطت إيدها في وسطها: يا مري على الفقر وقته ده يا شمس قومي يا خيتي بدل ما نفضل مرميين في السكة كدة والكلاب تنهش فينا يووه مش عارفة هخلص منيكي ومن بلاويكي امتي