رواية شمس الدوار الفصل السادس 6 بقلم مصطفي جابر

في الدوار

في المندرة كانت صابرين قاعدة وحاطة رجل على رجل وبتبص لحبيبة ببرود

حبيبة بتريقة وغل: أدي الست شمس رجعت تتدلع تاني ولا كأنها انطردت ولا كأنه حصل حاجة واصل وسراج بيه لسه شايلها على كفوف الراحة وإنتي يا حزينة قاعدة تتفرجي

صابرين ببرود وابتسامة خبيثة: خليه يتدلع وخليه يشيلها كل ما العلو زاد الوقعة بتبقى أوعر إنتي فاكرة إني زعلانة عشان رجعت لا يا حبيبة ده أنا اللي عاوزاها اهنة تحت عيني عشان لما أحرق قلبها أبقى شايفة النار وهي بتاكلها حتة حتة

حبيبة بذهول وشهقة: وه إيه السواد ده يا صابرين دي أختك شقايقك أني قولت أنك غيرانة عشان سراج بس متخيلتش إنك عاوزة تدمرّيها للدرجة دي

صابرين بتريقة: أختي اللي تاخد الراجل اللي قلبي اختاره متبقاش أختي وبعدين إنتي عاملة فيها الخضرة الشريفة ليه ما إنتي كمان مش طايقاها وعاوزة تزيحيها من طريقك عشان تلهفي الدوار بس الفرق بيني وبينك إني بشتغل بدماغ وإنتي بتشتغلي بلسان طويل مبيجبش غير الكفوف

حبيبة بغل: أني ما اسمحلكيش تغلطي فيا واصل أني مرت عطوة وليا مقامي اهنة

صابرين بضحكة استهزاء: مقامك اللي جوزها بيجري ورا سراج زي ضله اسمعي يا بت الناس إحنا لازم نحط يدنا في يد بعض شمس وسراج لازم يتدمروا والدار دي لازم تفضى لينا إحنا الاتنين وإلا لا أنتي هتطولي ملك ولا أني هطفي ناري

حبيبة ببرود: وأني هستفيد إيه ما أنتي عينك على سراج يعني لو شمس غارت أنتي اللي هتركبي وتدلدلي رجليكي وتتحكمي فيا أنا وعطوة

صابرين مايلت عليها وهمست بتهديد زي فحيح الحية: تستفيدي إن سرك يفضل مدفون في بير ولا تحبي أروح أقول لعطوة إن مرته المصونة الحكيمة قالت لها إنها مابتخلفش واصل وإنك بتخططي وتدفعي فلوس عشان تطلعي العيب فيه هو وتصغريه قدام النجع كله

حبيبة بتوتر ورعب: وه عرفتي منين الحديت ده إنتي بتراقبي سكتي يا صابرين

صابرين بتريقة: أني أعرف دبة النملة في الدوار ده يا حبيبة قولي هاه نكون يد واحدة ونخلص على شمس وناخد الدار ولا أروح لعطوة دلوقت وأخليه يرميكي الرمية اللي رماها لشمس بس من غير رجعة

حبيبة بلعت ريقها وبصت لصابرين بمكر وغل: ماشي يا صابرين يدنا في يد بعض بس افتكري إن اللي يغدر بدمه يغدر بصحبته قولي لي هنعملوا إيه في المصيبة اللي اسمها شمس دي

صابرين بابتسامة خبث: الصبر طيب شمس دلوقت مفكرة إنها ملكت الأرض بس متعرفش إن الأرض دي هي اللي هتبقى قبرها

في المستشفى

كان الدكتور واقف بخوف

سراج بزعيق: إنت يا دكتور البندر إزاي تسمح لنفسك تتطاول على شمس في الطريق وتحدف لها فلوس وكأنها شحاتة إنت عارف دي تبقى مين دي شمس المحمدي ست الصعيد كلهت ومرات سراج الدمنهوري اللي إنت واقف قدامه دلوقت

الدكتور بتوتر: أنا أنا مكنتش أعرف يا سراج بيه الطريق كان ضلمة والمنظر كان غريب وأنا اعتذرت لها بره حقك عليا يا فندم مكنتش أقصد الإهانة ابدا ده سوء تفاهم

سراج بتريقة: سوء تفاهم ده لو مكنشت دكتور وشاطر في شغلك كنت قطعت اليد اللي اتمدت بالعشرة جنيه دي إحنا اهنة في الصعيد بنعرفوا مقام الحريم زين والظاهر إن البندر نساكم الأصول غُور من قدامي عاد مش عاوز أشوف وشك في الأوضة دي تاني والتقرير سيبه للممرضة

الدكتور بأسف ووشه جايب ألوان: حقكم عليا مرة تانية حمد لله على سلامتك يا سراج بيه وألف سلامة يا ست هانم

الدكتور لف وخرج بسرعة شمس بصت لسراج بامتنان وابتسامة هادية نورت وشها

شمس بابتسامة: كتر خيرك يا سراج رجعت لي حقي وبردت ناري منيه مكنشت مصدقة إنه هو اللي هيعالجك سبحان مغير الأحوال

سراج بحب: مفيش مخلوق يقدر يهينك وأني حي يا شمس حقك اهنة محفوظ بالدم قبل الفلوس

بعد أسبوع

دخل سراج الدوار وهو ساند شمس اللي كانت ماشية راسها مرفوعة

حبيبة بتمثيل خبيث: نورتي دارك يا ست شمس كفارة يا خيتي والله الدار كانت ضلمة من غيرك والواحد قلبه كان واجعه عليكي قوي

شمس بتريقة: قلبه واجعه لاه يا حبيبة سلامة قلبك من الوجع أخاف ليموت من كتر الكدب والتمثيل اللي فيه وفري ترحيبك ده لنفسك عشان شمس اللي كانت بتطاطي وترخي يدها خلاص ماتت في الليلة اللي انطردت فيها

حبيبة بابتسامة باردة: وه جرا إيه يا شمس إحنا بنقولوا حمد لله على السلامة والمسامح كريم يا بت الأصول

فجأة ومن غير مقدمات شمس مدت يدها ومسكت حبيبة من شعرها بغل وقوة نزلت راسها للأرض حبيبة صرخت بذهول ورعب

شمس بغل وفحيح: أني فقت ليكي ولأشكال القرف اللي زيك يا حبيبة فاكرة الكف اللي أخدته والجرجرة في الشارع الكف ده هرده ليكي ذل وخدمة تحت رجلي فزي عاد غوري انضفي الدار دي من فوق لتحت مش عايزة ألمح عفارة واحدة وإلا والله يا حبيبة لأرميكي في الشارع زي ما عملتي فيا بس المرة دي هرميكي زي ما أمك ولدتك فضيحة بجلاجل يتحاكى بيها النجع كله لغاية يوم الدين

حبيبة برعب: سيبيني يا شمس أني مرت عطوة إنتي بتعملي إيه سراج بيه إلحقني

سراج كان واقف مربع إيده وباصص لهم ببرود وشماتة كأنه مش شايف حاجة

شمس بزعيق وهي بتزقها: عطوة ده ملوش كلمة في دار أني بقيت صاحبة نص أرضها يلا يا خدامة وريني شطارتك في المسح وإياكي لسانك يسبقك بكلمة واللبس اللي عليكي ده يتقلع وتلبسي لبس الخدم فاهمة ولا لاه

حبيبة قامت جريت بخوف

سراج قرب من شمس وهمس في ودنها بخبث ومكر: عفارم عليكي يا شمس طلعتي واعرة وبتاخدي حقك بيدك أني كدة أطمن عليكي وأني مغمض

شمس لفت ليه بدلع وحطت يدها على كتفه: تلميذتك يا سيدي اللي يعيش معاك لازم يتعلم إزاي يدوس على العقارب قبل ما تلدغه

سراج بإبتسامة: اللي يدوس عليكي دوسي عليه فاهمه وانا هاجي اكمل طول ما هم كارهينك اني في ضهرك اني مش اتجوزتك اهينك يا بت الناس

شمس بحب: ربنا يخليك ليا وميحرمنيش منك يارب يا سندي

في المطبخ...

حبيبة كانت واقفة في المطبخ بغل وهي بتقلّب السكر في كبايات الشاي بغيظ صابرين دخلت عليها وسندت ضهرها على الباب

صابرين بتريقة: وه إيه اللي رماكي على المطبخ يا ست حبيبة فين الخدم ولا خلاص شمس ركبت ودلدلت رجليها وبقيتي أنتي الخدامة الجديدة

حبيبة بغضب مكتوم: اسكتي يا صابرين أني جايبة آخري البنية دي اتجننت مسكتني من شعري وهددتني بفضحي في النجع كله وبتقول لي إلبسي لبس الخدم ونضفي الدوار دي فاكرة نفسها ملكت الدنيا عشان سراج كتب لها حتة أرض

فجأة الباب اتفتح ودخلت شمس ببرود

شمس ببرود: الشاي ده ليا يا حبيبة هاتي عاد عشان ريقي ناشف من حديت الصبح

حبيبة مدت ايدها بالكباية وهي بتغلي من جواها وبصت في عين شمس بكره: خدي يا ست شمس اشربي بالسم الهاري قصدي بالهنا والشفا على قلبك

شمس خدت الكباية وبكل هدوء وبرود مالتها ودلقت الشاي السخن كله على يد حبيبة وجلبيتها

حبيبة بصرخة وجع: آآآآه يا مري إيه اللي عملتيه ده يا مخبولة حرقتي يدي

شمس ببرود وتريقة: وه معلش يا حبيبة يدي فلتت أصلها تقيلة من لبس الدهب الجديد وبعدين ملوش لزوم الصريخ الشاي مش سخن قوي والغل اللي في قلبك كفيل يطفي أي نار تانية

صابرين بصدمه:

يالله احضرووووو ... لو البارت ده جاب تفاعل هنزل بارت كمان النهارده غير ده .. مستعدين؟

السابع من هنا