رواية كتوف مائلة الفصل الخامس 5 بقلم نور الشمس
يسعد صباحكم حبايب 
شكرًا للحبيبة ترانيم على تصميم الغلاف وكل التصاميم النزلت
..كتوف مائلة..
.....
رجعت بذاكرتي الذيج السنين
منطقتنا او ديرتنا ديرة العز مثل مانسميها
( اليوسفية )مناطق جنوب بغداد چانت من أكثر المناطق شهدت توتر امني وخطورة بين سنة 2004-2007، وخصوصًا بعام 2005.
وكتها العراق كله چان يمر بمرحلة انفلات أمني كبيرة بعد سقوط النظام، لكن اليوسفية تحديدًا صارت معروفة ضمن ما كان يُسمى لاحقًا بـ"مثلث الموت"
بسبب كثرة الهجمات والخطف والاشتباكات هنا
المنطقة چانت تعاني من عدة أمور
بالاضافة العمليات مقاومة المحتل وتفجير الارتال
كنا نواجه انتشار الجماعات المسلحة والتنقلات السرية بينهم بداخل اراضيها الزراعية
وكثرة السيطرات غير الرسمية والخوف من الطرق الخارجية.
عمليات خطف وقتل على الهوية بدأت تتصاعد تدريجيًا.
ضعف سيطرة الدولة والشرطة على بعض المناطق الزراعية والطرق.
خوف دائم عند الأهالي، خصوصًا بالليل أو أثناء السفر بين بغداد والمحافظات الجنوبية.
هواي من الناس بوكتها چانوا يتجنبون السفر بعد المغرب، وبعض العوائل نزحت أو انتقلت لمناطق أكثر أمانًا. احنا بقينا بمناطقنا وعمي بوكتها رجع للجيش وصار الخوف عليه اكثر خاص امي معروفة غريبة وممكن اكو ناس تستغلها وتشعل الطائفية اكثر
الوضع ماجان يخصني بس الكل مهدد بس بوضعي اكثر خطورة
حتى المدارس والحياة اليومية تأثرت بسبب خوف الناس العيشة صارت بحذر .. اما اصوات الأنفجارات أو إطلاق النار صار شيئ شبه يومي ما عدنا نستغرب الي يصير بعموم العاصمة
وبعام 2005 تحديدًا چان عمري 12سنة ومقبل على دخولي بسن الثلاث عشر عام بدأت التوترات الطائفية ترتفع بشكل واضح في بغداد ومحيطها، مع زيادة التفجيرات والهجمات المتبادلة بشكل مكثف ومتكرر على مدار اليوم الواحد
بالأضافة الى تصاعد عدد ضحايا التفجيرات الأرهابية وعمليات الخطف والقتل على الهوية صارت اكثر
ماچنا نگدر نعبر البغداد براحتنا ولا هم يجونا ابوي هنا بطل سهراته وكلمن لزم بيته من العصر حدهم اشغالهم وبس بدت تضيق عيشتنا اني وامي بسبب تواجده المستمر
امي متجاهلته بس من تشوفه يشد وياي ويستخدمني بحربهم تخفف عنه وتظل تماشيه كل ظنها مااشعر بس بداخلي اصارع صراع نفسي وعقلي.. ووجودي
تجيه ايام يقرر يكعد يمنا اسبوع مايوصل بيته الثاني الا بمسواك وسؤال من ساعة او ساعتين ويرجع
بهالأسبوع اما شارب ويتغزل بأمي كدامي بأنواع الغزل يخليني مااعرف شنو من شعور يجيني.. اضوج لو افرح.. صح هالتصرف لو خطأ شي يتلابس بشي
بوقت فترة تشهد انتقالات مرحلية بين الطفولة والادارك بهذه الفترة الي الأهل يحذرون منها بتعاملهم امام ابنائهم
هو يضرب كل مسؤولية وشعور بالابوة اتجاهي ويتصرف وكأني عدم
اكثر من مره ادخل للمطبخ جوعان او عطشان مايهتم الوقع اقدامي او صوتي الاعليه بأي سؤال متعمد اتلافى هذا المنظر
مره منهن امي دفعته بقوة تنبهه
ابرود رد لأن چان رايق مزاجه
..سهله ام عيون شگ الخنجر شتسوين سوي يحقلچ
تدللين ادفعين تتعززين كلشي يحقلچ
هنا بدون اي تفكير عرفت ابوي شارب ومو واعي النفسه
لأن لو دافعته وهو صاحي بسبب وجودي راح يجاوبها غير جواب او يحملني المسؤولية
ماانسى مرة بصحوى جاوبها
..ان شاءالله يتحسس ابن النغـ.لة وتخافين على شعوره ؟ شنو يغار مني عليج لو مستخدمته عذر وعبالچ يوگف بعيني
بلحظتها عيوني بعين امي صارت حاوطتني غمامة من الهم
شعور التحقير من الأهل صعب.. صعب كلش خاص من اني احمل بداخلي امل وبروحي رهان يجي يوم واكسبه چنت مثل اليبني درج يوصل اخر باية وياه وبكلمة وحده ينهد
عيني تراقب عيون امي الدمعة بطارف رمشها
وچنت اتمنى ترد ماتبقى بهذا السكوت وماخيبت ظني من قررت تحجي كدامي وماتنتظر تختلي بي ويتعاتبون وتتحول ساحة معركة
ردت بقهر وعينها عليه تبعث منها رسائل بلا بوح تطلب مني الصمود امام اب ظالم يثأر الكرامته من كرامتنا
..هاي النغـ..لة جابت راسك وخلتك تنسى اهلك وعشيرتك وقوانينها ونستك مره واولاد وخلتك توگف بوجه ابوك وعمك وتتزوجها وانت تلاحگها الأكثر من سنة رغم لامحاجيتك لامنطيتك مجال ولا محاولة وياك اجيتك مغمضة وتعرف كلش زين وعيت عليك وكبرت بين اديك
هاي الاهانة ادفعك ثمنها غالي ويجيك يوم والله وجلالة الله وجهي ماراح تشوفه
ابتسم بحقارة وبرود ورد بمتعة
..تموتين اموت وياچ والحگج حتى بگبرچ
..المن لاحكني تعزني لو ثارك وياي للموت مايخلص
..احبچ بطريقتي اتعودي عليها
..والله ياابراهيم مااتعود لو يظل يوم بعمري وتصحلي فرصة مااخليك تشوف وجهي بعد
..والله والقسم القسمتيه مااخليج اطلعين من طوعي وجناحي ولا تتحررين من قيدي مادام اني بالحياة الحب الحبيتجياه مااستغني عنه والغدر الغدرتينياه انتِ والجابتچ من الشارع اطلعه بيچ
شافني مركز بي اريد اعرف واني اجمع كل تركيزي اريد شي او طرف خيط يطمن گلبي وناره التلهب ويگلي هو يحبها يمكن الغاز هذه بينهم
اريد اعذره واحس بشعور وجو حلوو يجمعنا حتى لو چان وهمي!
صاح بيه صوت طلعني من كل احلامي وشوفني واقعي الماكو هروب منه ..
..نزل عينك حيواااان لاتباوعلي هالنظرة
صاحت امي
..لاترجع عليه وتذب قهرك بيه خليك وياي واشرتلي اروح
بدون مااحچي اتحركت واني اجاهد الم غريب مافارگني بعدها
الم اشبهه بحجر متراصف يسدلي مجرى الهواء حتى ريگي ابلعه بصعوبة
بهذه الليلة اتسائلت بيني وبين نفسي هواي
..ليش؟
وليش اذا يكرهنا مايعوفنا.. عنده عائلة ثانية تغنيه عنا ليش يحقرنا شنو الي مسويته امي وياغدر يحجي عنه وليش زوجته وخواتي يصيحوني ويعيروني بيها وبأصلها
صرنا نتضارب بينا واذيهن الهذا السبب صرت عدائي بسببهم هذا الكتم اتحول وكاحه ووحشية اتحجج ع المشاكل من اطلع وبالدوام
ليش ابوي هيج
شوكت افهم اخذ هالتفكير حيز بروحي بحيث صبح الصبح وعيوني مااخذت نوم الصبح طلع هو الشغله واني گاعد
وامي طلعت تسد وراه الباب تمشي بوهن وبتعب
عركتهم استمرت
النصف الليل طلعت عيونها طافية اكو اثار ضرب عليها
ليش تصبر ليش تسكت ليش تمنع ادخل ..عادي انضرب مكانها المو عادي الاستمرار على هالحال وسكوتها
تعبت ودماغي تعب دراستي اسبوع كامل اداوم وكتبي على حطتهم رغم هوايه تلح عليه امي اقرأ ادرس كونلك مستقبل بيومها اجت عمتي ام ريم الله يرحمها
وسألت امي
..ليش اشهل متغير عمه يكول متصلين بي اساتذته مستواه نازل
شكتلها امي وضعها لا مرتاحه من ابوي الشاد وياي ولا اني مريحها حتى دراستي مامهتم بيها وتشرح شكد هي تحاجيني شكد متحمله على مودي وماكو تقدير وبقلة صبر وثورة ماالها اي مبرر رديت بصياح
..ليش تتحملين اصلا منو رايد تتحملين محد رايد تتحملين محد دمرني غيرچ
صدمة اعتلت وجه امي بسبب صوتي الأرتفع عليها الاول مره وكدام عمتي
بلعت ريگي بصعوبة واكو رجفه غريبة اتمكنت مني وبهدوء عمتي حجت
..عمه اشهل ليش هيج تعلي صوتك على امك هذا مجازاها ومجازه صبرها
رديت بارتباك وعبره اتكسرت بروحي اني احبها امي مااريد اذيتها
..علمودها اني يطبني مرض لاتتحمل شي
سكتت ماردت اكول الليل كله جان يعذبها ويضربها لأنه صحى
بسكره يعيشها وكأنها محبوبته وبنته وبصحوه يشوفها الويل واني لساني جاهل واعرف ان الواقع للصاحي وتعامله بسكره وهم شوكت تصحى هي
طلعت بره مشيت بعيد عقلي مشوش مااعرف وين تريد
وعلى صوت عمي مروان التفتت وكفني ناهرني ويحذرني مااروح بعيد يخافون عليه حتى من ابعد بالبساتين لأن جانو عمامي يلزمون عليها حراسات ليل ونهار خوف من دخول جماعات مسلحة يتخذوهن مقر او مضافات بداخل اراضينا دون ماندري لأن كيعانا واسعة حاجاني عمي مستفسر
..وين رايح اشهل تعال عمو تعال لاتبعد
رجعت وياه وعيني على عمي قادر من بعيد يدگ بقوة يكسر بالصخر جدحت من الصخر نار من قوة الدگ وبلحظة گد مااحس بضعف استمديت القوة من الصخر وبدون اي تفكير درت على عمي متجهم
..اسمي صخر من اليوم صيحولي صخر
ضحك عمي
..اسمك احلى يول اشهل وين صخر وين شعاجبك من اسماء القدامى
..لا مو حلوو مااحبه
رد مسايرني
..هذا هو صخر صخر شكم صخر عدنا ..ابوك وين اليوم
اتجاوبت وياه فرحان مافشلني وكتله من الصبح طلع
..وليش عيونك حمر سهران تدرس لو مريض
..لا ماسهران يمكن متحسس
خيب ظني من رجع يأكد عليه بحزم
..اشهل لاتبعد عن امك خليك يمها عمك وصاني عليك
..صخر عمي صخر
حجيتها بنتر ومشيت
ضحك ومارد وظلو فتره يضحكون كلهم من اكلهم اسمي صخر الحد مااتعودو ومشيته عليهم وصلت مرحلة ضرب اضرب اخواني وولد عمي لو صاحولي اشهل وامي مااكلها ها لمن تصيحني صخر يلا
وهيج غيرت اسمي بس مو بس اسمي اتغير اتغيرت كل مشاعر اتجاه ابوي اعتبرت نفسي يتيم بس ماكرهته ماجنت اكرهه مجرد بطلت انتظر منه اهتمام وماكرهته الا بذاك اليوم صرت اكرهه صدگ
و احسه يشوفني عدو واني احسه عدو فعلا من اسمع يصيح بأمي لو يأذيها
بيوم اجه وشكله غريب طاير من الفرح
حضني وباس راسي من الباب من صدمتي ماانطيت اي رد فعل وهو طول حاضن وجهي ورجع باس عيوني
مشاعر غريبة غلفتني شي مو معتاد.. مو مهضوم.. مو مقبول
صاح الأمي
..شهلة وينچ تعالي حبيبتي فرحي
طلعت امي مستغربة نبرة صوته الكلها فرح
وگفنا منتظرين
..يافرحتي بيچ اليوم والله لعوضج كل يوم مر بحياتج والله لدللج الدلال الأخذت على نفسي ادللج بي من اول مااخذتج بس الظروف عكست واكو ناس ماتخاف الله
بنبرة استهزاء واستغراب ردت امي
..شني شارب بالنهار اليوم؟
..لا ..شبيچ تعالي فوتي خل نحجي
فاتت امي ووگفت بالباب اباوع البنات عمي يلعبن وخاف يضربوهن دقايق مرت وركضت على بچي امي وصراخها
چان يحاول يهديها بس هي عبالك محمله كل الماضي والامها والايام الكتمت بيها عتب وصراخ ودموع كلها طلعت
..هسه جاي تكلي انتِ بت ناس هسه وينهم الناس
امدا الناس النسوني وخلوني ملطشه وتاليها صفيت جوه ايدك
امداهم وامدا الأصل الماعرف عن فرعه شي يا اصل يافصل تسولف عنه شتحجي انت عگبيش هسه تگلي شبقالي اني شبقا
ماجان مصدوم جان متوقع الاكثر ويتعامل وياها بشكل طبيعي مو مثل كل مره يتنرفز
..فهميني مابطلت سؤال اني مابطلت عن امج اسأل وهم وصلو الابو سمير ووصلولنا وانطو خبر رغم الخطورة يردون يجوج يشوفوچ بلغت سليمان يأمن دخولهم من السيطرة لهنا
والله لأسويلهم استقبال لاصاير ولا يصير
دار عليه
..ولك تعرف خوالك منو
مصدوم مااعرف شرد اباوع ساكت منتظر افهم اكثر واتعودت بوجوده مااحجي حتى صوتي ينرفزة وعيوني لازم انزلها
دار على عتب امي
..تستقبلهم !بياعين ؟
برد گلبك من عرفت وراي عشيرة اصيلة مثل ماتگول مافكرت بيوم اني الأعيش جوه جناحك مو عشيرتي ..زين بدون عشيرة ماعندي احساس اني
وهسه اكتشفته ..بدون عشيرة ماانحكم واطلع من طورك وهسه ضمنت طاعتي وراح تشوفني مرباية وتأمني على بيتك ونفسك وگبل لا ..اني شهلة نفسي
دمرتني ودمرت نفسك وابنك ليش ..ولك ايام وليالي وانه ابجي واسب بأهلي لأن صدگت روحي بت حرام ..امي اكرهه بالليل وارجع الصبح ادعيلها بالرحمة ماادري شصارلي حتى بيها شككتني گلت لو من الشارع جايبتني مستحيل تتحمل الشافته علمودي
شكيت بيها هي الغلطت وشردت بغلطها وجابتني بخطيئة شالت خطيتي وياها للگبر هسه تگلي طلعولج اهل بروح امك تريد تذلني وتضحك عليه لو صدك تحچي
..بس اهدي لا يوگف گلبچ واستوعبي وياي اني اكثر منچ فرحان اني اتعيرت وانهنت واهلي نبذوني ونسو تعبي وشغلي وخلوني بلا شي جردوني من كلشي
كل ظنهم اخضع الهم واتوسل بس والله لو يموتون محد يكسرني .
بس انتِ كسرتيني بس حبچ كسرني ..والله من اذيج اتأذى اضعاف والله نار تسعر بروحي من سنين اليوم يلا طفت لچ بكل نقاش بيني وبين اهلي وحتى مرتي يذكروني شلون تقشمرت
اني نار بروحي تاكل مو بس انتِ
..وناري ماتطفى ابد ماانسى السويته بيه وكل كلمة هدمت روحي بيها
تشهگ وتحچي حسيت على ساعة يوگف گلبها خلص
بس اتنوعلي شوفني انت هيج اخذتني؟
لو كبرتني سنين اني المراية كرهتها گد ماعاتبت روحي وين راحت موشه القديمة
شوف وجهي والتعب شوف راسي الشيبته هاك شوف الشيب غزاني وكلها مو مثل گلبي
گلبي متفسر اني
..اعوضج عن كلشي والله اعوضج بس حضري روحج وبيتج اخوانچ جايين
ضحكت هي بدموع ..مسحت دموعي تنزل وي دموع امي بدون مااحس اول مره اوصل للسبب الحقيقي الشعل هذه الحرب بينهم
وردت مستفسرة مامصدگه
..اخوان؟ وين چانو
..سالفة طويلة توهم گدرو يوصلون ابو سمير من خلال ابن البدوية الرايحتلهم امچ بغيبتها طلعت صديقة الهم البدوية چانت مجاورتهم من متأكده من اعدام عمامج وصاير السقوط يلا مبلغتهم بوجودج ووين صرتي
امج مأمنتها ماتحجي الا يكبرون وتتأكد من عمامج انتهوا وامهم ونسوانهم بعد شرهم
..امي ؟..هي صدگ امي
مسج وجهه بتعب
..لا مو امج.. ام امچ الربتچ..بيبيتج مو غريبة
مزوجة بتها الأبن اخوها الي هو ابوچ
بچت بصوت عالي
..چانت تحبه حيل ابوي زين امي وين
..امج مكتولة وياهم.. الله يغفرلها ويرحمها بيبيتج لو حاجيتلي الصح والله بنص عيني اخليچ ومااتغير ولا اهتم الحجي احد بس ظنيت اني مغدور ومضحوك عليه وحتى بيج ماجنت اصدك من تكولين ماادري
خلي ابالج
مو بس انتِ تأذيتي اني حتى عن طريقي زليت جنت صايم مصلي بعد الصارلي بس الشرب يخليني انسى واعيش العيشه الاحبها وياج
بتعب ردت وهي تلقط انفاسها
..اوووو هم جذبه جديدة هاي تعبت من عيشتي حرام عليكم يومية قصة عيشتيش هاي
صاحني
..تعال بابا اسند امك وياي
كلمة انتظرتها سنين الحد مافقدت طعمها وراح وكتها وماصارت تهمني حسيتها من عمي احلى وانقى ومست شعوري مااتحرك شعوري من سمعتها منه بالعكس حسيتها مو من گلبه
اتحركت انطتني اديها اثنيهن وگفتها وهو بظهرها صار گوه يخلي نفسه يريدها تحس بقربه وترضا عنه
وكمل كلامه
..باچر هم هنا
اخوچ ابو مسلم جبير اهله وعمامه هسه مواليد 69
واخوچ علي مواليد 75
وعندج اختين وحده بعمرج وحده اصغر منج بسنة
..منين عرفتهم
..صار ايام يتواصلون وياي حصلوني كتلج عن طريق ابو سمير وهو الراح يجيبهم
..لايجون مراح يغيرون شي لايتكتلون من وراي وابو سمير مااريده يوصل بلاوينا كلها منا لو مخلينا بالگراچات بكرامتنا جان هسه اني مامفارگه امي ولا ماتت من وراي
..لا تحجين هيج كلشي مقدر ومكتوب وابو سمير الرجال ماله ذنب من درا اتخبل ..واهلچ راح يأمن سليمان جيتهم بقوة عسكرية وباجر كل الاهل والعمام معزومين على شرفهم
بقدرة قادر اتحول من ابراهيم الرجل صالح
ماردت امي سألته بداعي الفضول
..يعني هسه اني عندي خوال وبعد مايگلولي ابن الشروگية
رد عليه مركز بملامحي الأول مره
..وشبيها لو گالولك ابن الشروگية مابيها انتقاص والنعم منهم الشروگ ناس غيورين عن نفسي احبهم عاشرت منهم سنين اهل غيره ونخوه وابد مايوم اهتنيت الكلام احد بخصوصهم
..وانت ماتگلي ابن النغـ.لة؟
بلحظتها الصمت غلف المكان وخيبة امل اعتلت وجه امي حسا ماكو جدوى بعد هالسنين
وابوي اختلفت ملامحه كلها بسرعة اتحول هدوءه النكران
..اني گايلك شوكت؟ ..انت شوكت مخليني اشوفك اصلا كوم يابا خليني اني وامك نحجي
طلعت من يمهم وبقيت قريب اسمع هواي من كلامهم فاتني
شرد بالي اراجع الصار
اني استوعبت لو لا اكو فوضى عايش بيها شوكت تخلص
شنو خوال شنو ابوي فجأه يحس هو ابوي ويعتذر الامي ويااعتذار هذا اليمسح دموع مر عليها سنين رسمت اثر على الخد
ويا كلام يهون خيبات متراكمة شراح يرجع الزمان
الزمن مايرجع ولا الايام التعيسة ترجع تنمحي ويحل محلها الفرح ماكو اختراع يرجع الزمن اتمنى ابوي يفهم هالشي
رجعت مخلي بالي يمهم
ضحكت بهستيريا واني اسمعه يوصيها تستقبلهم افضل استقبال وتلبس كل ذهبها الجابه الها بهذه السنين
الذهب الي مالبسته مره لأن مايجي الا بدموعها واثار اتعلمت ع الأدين والجسم يجيبه تكفير عن ذنب يرتكبه بدون رادع
ابوي من الاشخاص الي يظنون كرامة المرأه مرهونة ببريق الذهب ويشوفه يرهم المحي اثار تحقيره وتطاول ايده عليها
ياذهب وهو يدري امي ماخلت بكنتورها قطعة منه وكلهن يمه وبخزانته ليش يتصرف وكأن كلشي طبيعي بينهم
بهاليوم عمتي ام ريم اجت بوجوده متناسية مشاكل ابوي وي عمي علمود امي الي نساها هو وطلب منه تأمين طريق اهلها لهنا
ظلت تساعدها
حاول يخلي امي تنتقل البيت جدي الجبير وهناك تستقبلهم بس امي رفضت
البيت الي ماعزموها بي بزواج ولا بولادة ولا طلبو منها حضوره حتى بأعياد كالتله يحرم عليه للموت مااوصله
وفعلا هالشي الوحيد الخلاها تدخل بيت جدي وفاة عمتي ام ريم بعد سنة من هذه الاحداث الجانت اخت الها واكثر من اخت دخلته وهي توگف بعزاها وبعدها حتى البنات هنه صارن يجنها
بقت امي مصره ماتطلع وهم يجوها هنا
ومن الفجر بدت الذبايح تجر والطباخين واصوات تحضير الطبخ ديوان بيت جدي الأنفتح الهم
والضحى طبت السيارات جنت اظن سيارة وحده بيها اخوانها وبس
جيتهم جانت مو عاديه طبوو طبة مهيبة وعمامي استقبالهم چان اكثر هيبة خلوني يمهم عمي وجدي وبأول نزلتهم صاحو
..حيي خوالك
اتقدمت اسلم وابوي گبلي استقبلهم وهم بره وبعدي عمي وجدي وكل اهلنا
شعور حلوو اجتاحني كمية العز الحسيت بيها غمرت روحي واني اشوف هيبتهم وجمالهم لحظات حييت بيه جذور ظنيتها اتيبست وگلبي انزرع فرح بعد ماجان ارض بور
وبعد ماسمعت قصة ابوها الأمي
شلون چان شيخ عاقل راكز شاب كله غيرة مليان حياة
وشهم يصلح امور الناس وشگد حاول يصلح البينه وبين اخوانه كل موقف يبنيه وياهم يتقابل بخذلان الحد ماهجرهم
والهجر زادهم حقد صاروله مثل اخوة يوسف واكثر كتلوه بليلة ظلمة هو وعائلته ولو لاكين عمتهم وبنته الي هي امي مايترددون بقتلهم لأن اساس الحقد موجود ومغذى بحليبهم عليه وعلى زوجته الثانية بالذات
الحضور من عمامي صعب عليهم استيعاب القصة وشلون ممكن اخ يكتل اخوه وعائلته بوكت ماجان اكو انتشار للجريمة مثل اليوم
ورجعو بالزمن القابيل وهابيل وعرفو ان الدنيا كلشي بيها وان الارض انسگت بدم اولاد انبياء الله كيف باقي البشر
بديت استوعب واراجع حقدي
اگدر اسوي السووه عمام امي بأبوها
اگدر اذي اخواني
اكرهم اني مااحبهم بسبب تفرقة ابوي وتعامله وياهم
وهم يكرهون امي لأن يشوفون ابوهم هامل امهم بسبب امي
نبقى هيج ونوصل الهذا الحال مااكدر مااسويها
ماصبرو يتغدون قررو يشوفون امي ويرجعون للغدا مثل ماجدي راد
وهنا چان اللقاء اكثر من استيعابي
كأنما اباوع مشهد من مسلسل او مسرحية
الجاي اشوفه مو واقعي ابد
شنو زلم غربا بعگل وشيوخ يبچون بمجرد شوفتهم الأمي الغريبة سنين عنهم
شنو امي تحضنهم بدون ماتفكر هم صدگ اخوتها لو لا
شنو ابوي يبجي وياهم وتنزل دموعه منين اجاه الاحساس فجأه
لحظات غرت على امي منهم وسحبتها من بينهم خليتها وراي
گعدو يحچون شنو الجرى والصار
حچي ماله معنى بهالوكت خلص وانتهى وراح كلشي وياه
مااتأخرو گد الغدا وطلعو خوف عليهم من الطريق بعد العصر مو امان
وعدهم ابوي ياخذلهم امي وعزمو وياهم عمامي وجدي
وفعلا بعد اسبوع راحولهم محملين من خيرات الارض مثل مااجو خوالي محملين باصواغ وهدايا
اخذوني اني وامي وياهم وكلشي غريب عليه رحت ورجعت بدون اي شعور شعور واحد فرحت بي لحظات واتبدد حضور ابوي ويانا والي يشوفنا يكول ماكو اسعد منا
بس من تذكرت صار اسبوع امي رافضته ورافضه تستقبله وهو يحاول ودخل عمي وجدي وياهم وصار موضوعهم حديث الكل بطلت افرح
لأن الكل لام امي ليش متحاول تصلح
على اي خراب تصلح ماادري
جنت الوحيد مساندتها
بعد استقبال خوالي ورجعتنا ابوي خله الامي تليفون تتواصل وياهم امي تعرفه شكاك من ايده التليفون الايدي كالت الصخر اني مااريده ريحت بالها
بس بقت محاولاته ورفضها واعتراضها
شفت امي قويه مارضخت ابد ولا نست وكعدت تذكره بكلمه كلمة وشكد وعدته يجي يوم وينتهي سكوتها گالتله جنت محمله نفسي ذنب يجبرني ارضخلك هسه الصار ذنبي بركبتك وماابريك الذمة ابد
وهنا بدت مرحلة جديدة من المشاكل
ابوي يكلها كولي اريد فلان شي يرضيني لاتكولين لاتوصلني هالطلب انسيه
بقى شهرين يحاول اخر شي رجع مثل اول مشاكلهم اتحولت عرك الحد اليوم الذكرته
الفجر صار وماخلصت مشاكلهم صراخ امي ورفضها الضربة زرف گلبي
رحت افزعلها واكله اتركها كافي
لحظات ظني ضرب بس مااهتملي ولا عبالك يسمعني بس الشفته شي اكبر امي الشجاعة القوية شفتها بمنظر الذليلة بمنظر اموت وماانساه منظر يفسر روحي كل مااذكره
صدمتي ووجوده ماخلته يفكر ينهي المهزلة اكتفى بطردي بحرگة گلب للمطبخ رحت جريت سجينه وهجمت ناوي اضربه بعينه الدم غرگ وجهه ولطم امي وصراخها شغله عني سكتها وشمر عليها جرجف تستر نفسها بي عبالك جان مغيب وهسه يلا لاحظ وجودي
حاجبه جان يفور دم وامي كل ظنها عينه خلص راحت
اتوعدلي يرجع ويشوفني الويل
هددته بس ترجع اكتلك خلص لاتجي هنا بعد
بهالوكت لافتت اشوف امي ولا امي الها عين وتطلعلي
رجع برجعته وكفت بالباب مانعه طبة بيتنا نهاني وصلني الموت واني اتوعد واقسم يمين اكتله خلص
ادخلو اخواني وفزعلي اسامة يحاميني منه
بس من عرفو ضاربه بعينه وهذا الخياط مني الكل لاموني وحتى ضرب منهم انضربت حجيت اسبابي ومصر اكتله
هنا هم يردون يستوعبون المشكلة عظموها اكثر من فهموني هالشي طبيعي بين الزوجة وزوجها
مادخل مخي هالكلام وبعد هوسه ووساطات امي قفلت ع الطلاك والا تاخذني وتمشي واني جنت معاتبها محملها مسؤولية الصار بسبب خوفها وخضوعها لمتها هواي شلون تخليه يتماده
وعدتني كلشي يتغير بس ابقى اني الها
ايام اني مافتت البيت انام بالحوش واتقيأ الليل كله الحد مااخذني عمي يمه جنت اكل ابيتهم احب اكل عمتي كمت مااتقبل اللگمة منها ولا من امي واخاف اصارحهم اخاف من الملامة .كمت اتحجج الحد ماحسو عليه هنا جدي وعمي ادخلو السلامتي بشكل حازم ضده
هو كالعادة قرر يثأر الكرامته وكال اني اصلا مااريدها بعد لو تبقى بس هي مره
وقرر بنفس الشهر يتزوج زواجه الثالث
وزادت طلعاته وسهراته بطل يخاف ويهتم
چان كل ظني امي طلع من روحها وگلبها بس ماانسى دموعها بزواجه
ولا انسى الصار بية ماطلع من مخي ذاك المنظر واجه ابالي يتكرر ظليت للصبح اتقيأ
بعد فتره من زواجه رجع النفس الطريق سهرات وونسة واعراس وحتى الخطورة والطائفية جدي جان بكل يوم يظن يجيبوله ابوي مكتول بس سبحان الله ماصارله شي
وبعد ماجانت بس رزق تكره امي وتظن هي سبب هجران ابوي الها
اجت فيحاء وهالمره ابدع
بيوم الي حبلت بي فيحاء طشت الجكليت بحوش امي مو حوشها
جابتلنا نوره و حمزة هذا الحبيب الماكرهته ابد لأن من كبر جنت واعي وجبير وعلاقتي بأخواني الاكبر مني والي بعمري متحسنه
بس البنات ظلن على گلوب امهاتهن وهالشي مايهمني مامأثرات عليه بعد ماكبرن بطلنا نتصادم والصغار مااعرف عنهن شي بس شكولهن اعرفها
طلعني من ذاكرتي والصفنة الاخذتني عمار اتصال عمر
..لك ناقص مو گلت اجيك بالليل
..والله انشغلت والصراحة حلوه نسيتك..شتسوي بيه ماترجع مرتك وجهالك لو الا تترزل
..قررت امشي بطريقك وارجع عزابي احلى
..اي مو هي على كيفك ناقص انت تسولف على اختي ترى الزم حدك وتأدب
ضحك
..هاي اختك يمي سمعتك شراح يخلصنا بعد
رجعتها لايظل بالك باجر سوي غده اجي اتغده وياك
..غدي منك ومن غداك ظل اتغدا انت وحرمتك مگابلني المن تفتح شهيتي مثلا لا والله تگطعها اني الغده لاغيه ترى
..ترى حمامات عدنا ونجلف
..لاتگلب معدتي ولي
..زايده مني واخابرك بس گلت اخوي ماانساه وعدني وخاف يكول التهى
..يسلمك الله ..عزام مااجه ؟
..اجه وراح العمي ومالاكيه وبنات عمك مامفوتاته
..بعد اخوهن ..عنده حجي خلي يجيني يسولف وياي
..الله يعينه
وصدك نهيت الاتصال ارد انام اندكت الباب عزام بالباب يدخن وتعبان حالته حاله
..ياهلا بالغايب
..بغلاة امك صخر ترى شايف النجوم بعز الظهر اخوك لكيناه محبوس وكوه طلعناه بكفاله متعارك هناك ووكلنا وحل على ماحلينا سالفته واجيت
..هلا بيك تعال فوت ..شمسوي وسام
..متعارك ومحبوس وكوه حليناها ..عوفك منه ريم شنو الي تريده
..الي تريده الحرمه من رجالها
صفن عليه
..اني ادري تتعب وتنقهر بس شسوي اذا تحبني تتحمل خو مااتعارك وي امي كل يوم والله مليت اني هم
..وليش هي تتحمل اذا تحب ..خو انت تبين حبك الها واطلعها من هالهوسه كلها هي اتحملت هواي وترى كلها المشاكل ادري بيها وجنت اصبرها بس خلص كلشي اله حد وصبر ..عزام اني احبك والله يشهد انت اخ الي لا كيد بيك مدخل ولا ابالك متعقد واطلع عقدي عليك موضوع الزواج الروحي مااريده صح بس من اشوف اختي متزوجه تهمني سعادتها وراحتها مااريد خراب بيوت تفهمني لو لا
..والله فاهمك وادري بس شبيدي عبالك ماحجيت بوراها ماعاركت عاجبني اني اشوف اهلي يفرقون بين بناتي وولد اخواني اني هم مقهور ترى
..والحل شنو تعيش بقهر هذا برايك صح
..ماادري حاليا مااكدر اطلع يرادلي هواي
..اتوكل بالله وشد عزمك والله يسهل لاتهتم حاچيت جدي ينطيك من الگاع وصله ابنيلك بيها بيت على گدك واني وعمي وياك لاتهتم والولد كلهم يفزعولك بالبناء
..مو بهالسهولة التحجيها
..بعد اسهل يخوي لايظل بالك
..ليش موصيها ماتجاوبني
ضحكت
..كالتلك وصاني شنو
..لا ادري بيها تمشي بشورك واول مره تسويها وتقفل تليفونها ايام
..ترى مجروحه هواي هي عينك عليها ريمه طيبة وفقيرة ولاتنسى يتيمة والكلمة تأثر بيها من اتزوجتها وعدتني مااشوف غير الفرح بعيونها
..الهسه عد وعدي
فركت عيوني بتعب
..ماكو شي يكسرها اكثر من ان تفقد امانها وياك وانت اتماهلت باذيتها وماامنت خوفها وهالشي ينعكس حتى على بناتك وتتشوه صورتك بعينهن خلي بالك نصيحة مني اسمعها مو هجوم
..شكايلتلك عني
..والله ماكالت هالكلام مني بحكم العشته ..بس كالت يريدني اصبر ومااشكي ومااحجي مايريد يدوخ بيه وهالكلام هذا تفسيره ..لا تتحسر بعدكم بداية طريقكم اطفالكم صغار عيشو بسعادة بعيد عن مشاكلهم ترتاحون وتريحون
..والله شكلك صح بس بنفس الوكت السوالف سهلة بالواقع تعيقنا هواي امور اهمهن المة جنت رايدها تصبر الحد مااتمكن وابني بيت على راحتي مااتضايق واقصر عليهم وعلى نفسي
..شي اولى من شي واحنا وين رحنا وياك ومانقصر وبسلامة جدي وعمي اتقرض ووفي ع المرتاح وراسك بارد
..استحي منهم اني مو مثلك اذا تسعالي انت من باجر نبدي
..نتوكل على الله ليش لا
..حددو خطبة عمي الخميس الجاي وبيوته هسه كابه نار لايوصلك الشرار بالك
..بعدهن الهن خلك ويغارن
..اي والله جانن يشكن الابوي ووسطنه يدخل بمنعه
..وشگال عمي
..گلهن ابراهيم شاب ومايسمع منا نصيحة بهذا العمر يسمع يعاند اكثر لو حجينا وخاف ناوي يسوي عرسه بسكته من اكله كبرت ومو مال زواج يدك جوبيه اسبوع
ضحكت
..يسويها والله ماعنده لحية مسرحه
ثاني يوم داومت واول مارجعت على گد غداي واتصلت بعزام ورحنا الجدي وعمي وماقصرو وياه بس شرط ريمه تبقى ابيت عمي الحد مايبني ويكمل بناء وهذا المارضا عمي ومرته وخابرني يعاتب
سمعت منه وماقاطعته وكتله اجيك اشوفك ونحجي الاسباب وتدلل علي
برد بعد ماجان عصبي وثاير مبين عائلته كايليله هو الشارط وكله منه
رحت اريد اتفاهم وياه
ولأول مره اتفجأ بسلام اختي بهذه الحراره
