رواية كتوف مائلة الفصل الرابع 4 بقلم نور الشمس

كتوف مائلة

وهموم مثقلة

.....

في مكان آخر..

هناك من يولد مع صراع وجودي ببيئة تنتعش على ايذاء الآخرين.. بحجة المزاح أو ترطيب الأجواء على حساب جرح المشاعر وشرخ القلوب ..

"التنمر" كلمة لاتصف معناها وماتحتوي

انا اعرفها للقارئ هي آلة هدم للروح والقلب والمزاج تنتج نوعين من الناس اما شخص قوي وصلب المشاعر لايتأثر بمن حوله الا بما يحب

او شخص ضعيف لايقوى على رفع رأسه امام الناس يعيش ايامه وهو يعدها وينتظر النهاية بفارق الصبر

ها انا ولدت بشكل مغاير لمن حولي وصفوا تميّزي واختلافي "بالطفرة الوراثية"

انا "هاجر"

اليوم انتهيت من اخر امتحان للسادس علمي المفروض انام وماارفع راسي الا بعد اربعة وعشرين ساعة بس صادف اليوم عيد ميلاد سجاد ابن خالو علي

وهذا الحفيد المدلل الخوالي لأنه اجه بعد انتظار اثنعش عام اصرت امي نحضره رغم مااحب لماتهم واجوائهم لأن للأسف يخلصون نص الجلسة بالحديث عن اهلي وابوي الي ماسأل عني بس مجرد مصرف يوصلني من صغري الى ان عرفت بمرور السنين ابن عمه يوصلهن او اخوه

ولو شافوني مابينا اكثر من سلام اني نافرتهم كلهم وهم ميبادرون بأكثر

هذا الحديث يزعجني يدمرني وبدون اي رادع يفتحوه كل مره ويشكون حظ امي الي بسبب ورطتها بزواجها من الانسان الغريب الحبته وفضلته على اقاربها وبعد ماولدتني اضطرت تبقى عليه

وتهتم بتربيتي شكد حاولو يقنعوها تتزوج ابن عمها الي يحبها من زمان رغم زواجه وانفصاله رجع يريدها وهي رافضه لأن لو عرفت وصلو الاقناعها تتزوج اتمرض وانتهي بسبب شرط خوالي بزواجها منه تعوفني يمهم وهذا الماارضاه

بالقاعة الفقرات مستمرة

الاجواء صاخبة مليانه اصوات وبهرجة وفرح والكثير من المظاهر والمجاملات الي تخليني اخجل نيابه عنهن وهنه يبوسن بعضهن ويسألن عن احوالهن وكأنهن خوات منتظرات فرصة ينفردن بيها يمزقن بعضهن وتظهر الوجوه الحقيقية عن چناين جدي احچي وچناين عمامهم

بحكم عيشتي ابيت خوالي الي يجمع اكثر من عائلة اعرف دواخلهم زين وطبيعة هذه العلاقات

اراقب بصمت ومنتظرة وحده تدخل بيه او بأمي حتى ارد برد يليق بيها

وبعد انتظار شرفت زوجة خالي الأكبر بضحكة

وگالت

..شلونكم عيني سحر شخبارچ ..يا هاي شلابسه هاجر صدك جذب اللون هذا ميلوگلج

وكسرت كلامها بضحكه صفرة خبيثة

..هههههه ليش تخليها تشتري هيچ الوان الفستان كلش حلو بس ملايگلها

وبهدوء وابتسامة مصطنعة رديت

..لا والله خاله كلش حلوو خاص بلوك الميكب الناعم هذا بس گولي اني لابسه بلونه وكسرتي عليه لأن مكياجي قديم ومااعرف اخلي هنا اگلج حقج وعذريني لأن ماادري راح اثر عليج .

وفعلا اللون كان كلش حلوو عليه واساسا انا مااتقيد بلون بطلت اتقيد بعد ماجنت كل لون يكلولي ميلوك بس گمت اعرف شنو يلائمه من لمسات ومكياج وفصال يناسب المناسبة وجسمي بعد ماتابعت القريبات من بشرتي بالسوشيل ميديا واللوك الناعم الراقي مو الصاخب لأني مااميل للاجواء الصاخبة ابد ولا الالوان

انحرجت وردت بكل وقاحة الأمي

..لو تهتمين بتربيتها كد اهتمامج بمظهرها چان هواي امور اتغيرت بس شنسوي من نكول وجود الاب ضروري بحياة الابناء التقويمهم اطلعن النا بسوالف حديثة ومعدومة بالواقع

وراحت تنگ براس خالو الي غير مكانه وراح الجدو وبيبي يخلص منها مااعرف يشكي منا الهم

وهنا عاد شراح يخلصني

هم للأمانة يحبوني بس يشوفون دلال امي واهتمامها وعدم زواجها ماله داعي ويعتبرون ردودي وقاحة ويتنرفزون من يشوفون امي تدافع عني وتذكرهم بتقصيرهم الابنهم وضحكهم عليه بحجة الشقه وي كل انسان يضحك ويتنمر

بالسنين الراحت والي عرفته ان ام جدو امرأه من ذوات البشرة السمراء مع ان جدو اشقر وخوالي بعضهم بياض عادي بعضهم حنطيين امي حنطيه وخالي الراح الرحمة الله اسمر حيل او السمار الداكن

السمار مو فد شي معيب واي عاقل راح يكول شنو العيب بي او ليش التحسس والتأثر بالناس

الاسمر بين اهله الي يشبهوه مااعتقد يواجه هذه الصعوبة لكن الصعوبة بالاختلاف الي مثل حالتي يتعب هواي لأن انولدت مختلفة من الحواليا

وبظروف قاهرة الامي بعد صدمتها بتخلف انسان ظن الزواج منها بهذا العبئ هو زواج من عرق منبوذ يسيئ السلالته العريقة باعتبار اصحاب هذه البشرة كانو عفوا للمفردة(عبيد) مع ان كلنا عبيد الله

بس جهل والدي

كان عبئ مضاف واختيار خاطئ و رهان فاشل راهنت عليه

وبظل هذه الظروف ولادتها وتمسكها بيه تحدي من نوع اخر تعوض بي فشل احتوائها الانسان يعز عليها فراقه

مرات اني هم مثلهم احاسب نفسي عن شباب امي الي انهدر وعن تعبها وعن مصيرها المرتبط بمصيري بس بأنانية بنت الامها احبها الي وبس ما اتحمل بقائي ابيت جدي وزواجها

وبدت دفعات الحضور من اقارب امي والصديقات تهفوا الينا مدام بيها صار حزازية وشوشرة الي جايه فزعة الامي من مرت خالي اليكرهنا والي جاي بفزعة الها من امي وحبايبها باعتبار لاالحفلة ولا الأصوات الصاخبة تمنع نقل مادار بين امي ومرت خالي للبقية هناك فراشات تنقل الاخبار بانسيابية ورشاقة

اجن الحلوات

واني بنصهن لازم اكون محافظة على هدوئي وابتسامتي وفرحتي بهذا اليوم البهيج

ماكدرن يصبرن الا يتنمرن رغم ذكرت لابسة ارقى الفساتين بس بحجة ليش مخليه ميكب مضيع طفولتها وبرائتها انا صح لامتقيدة ولا فارضين عليه شي ماخذه راحتي لكن بأحترام وادب امي ماقصرت بتربيتي نهائيا ويمكن لأن سماري داكن يشوفون هالأشياء تغطي نقص بداخلي بينما انا بعد الي شفته والسمعته منهم ومن غيرهم وقوة امي ودعمها وايماني المطلق بأن الله سبحانه مايخلق شي عبث عندي نفسي اجمل بهوايه من اشخاص يشوفون بيه نقص وهذا واقع والدليل

ابسط التفاصيل تبرز جمالي

عندي مواصفاة تفوز بأنها مواصفاة عالمية لملكات الجمال وهالشي وعتني عليه امي بعد صراع متعب من قلة الثقة الزرعوها بيه

عندي عيون جميلة مسحوبه شفايف بارزة لمسات بسيطة من المكياج تعكس لون بشرتي البرونز الي هي حلم كثير من البنات

بالأضافة التفاصيل مااحب اذكرها لكن كل نقص مابيه والحمدلله مع هذا يصرون على اظهار العطف والأزدراء مره بكلمة

..خطية مو على امها

عليمن طالعه يمكن للمرحوم خالها ؟

وترجع تردف هالكلام بـ يااا عينچ عليها الله يحفظها الچ لا تتعقد هي هم

وترجع مرت خالي الثاني تذكر سبب انفصال امي بحجة ان هي دايره بالها عليه وتذكر قصة هجران ابوي الامي خوف من ان تجيبله ولد او بنت ثاني بلون بشرتي الي اضرت نسبهم

هالأمور كارهتها ومفروض عليه اسمعها بكل تجمع

مع ان الكل فرحان ومتونس واني كذلك اتظاهر بالفرحة بس تحفر بگلبي هذه الاحاديث المالها معنى

وقصة اي لون اشتريه بحكم مسبق عدهم مايلوگلي متنتهي و رغم اعرف كلش زين هاللون بالذات ناعم وي ترتيبي والمكياج الاخليه يطلع كلش حلوو وملفت عليه بس تبقى للكلمة اثر تحفر مهما كانت القناعات مرات اتمنى احنا كبشر عدنا قدرة نعكس الكلام اليطلع منا بلحظات على نفسنا قبل اطلاق سهامنا على المقابل

ماعولت تخلص الحفلة

وبطريق رجعتنا واحنا متونسين ماچان التوقع مناسب للحظة القرر بيها جدي يثأر الكرامة خالي وزوجته من امي كأنه بالون محمل بأنواع العتب واللوم وانفجر بانفجاره ماجرح امي بس جرحني وهاني وقلل مني كبنت مامعترف بيها

والمفروض هي كأم الي وبنت الهم تحمد ربها وتشكره على نعمة اعترافهم واحتوائهم البنت اصلها متبري منها وذكر ان مامستعد يزعل ابنه الجبير وبنت اخته حتى يرضي انسانة لا من صلبة ولا مجبور بيها

نهائيًا ماچنا نتوقع هذا الانفجار الي هيأ التغيير حياتي ثأر الكرامتي وكرامة امي المهدورة

ومابين كرامتين مره جابتني بلفة صغيرة

راح ترجعني بهذا عمري وكأن مكتوب عليه هذا الهوان

ذكرتني بأنها تعبت وربت لهذا اليوم الي هي واثقة مني اعيش بأي مكان بدون خوف وقلق وهذا القرار رغم حسيته حارق الروحي وجارح الى ان شفته قرار صحيح مجبورة امشي بي لأن امي خلص قفلت وقفلاتها معروفة من تقفل

وفاجأتني امي وهي تعترف بساعة عصبية ان لحد الآن ابوي يبچي عليها وان الثلاث اشهر الهجرهن بيها ماجانت بنظره كافية ان اتركه وتنفصل وتصر هي واهلها على تحريم دخوله للمحافظة كلها انمنع عشائريا من دخول محافظتنا بسبب طعنه بنسبهم

بوقت مشاكلها وياه على انه مايعرف بنسبهم مختلط الأعراق

وهنا بقرار سريع مفاجئ اتصلت امي بأبن عم ابوي وذكرتله

..الكم امانة عندي ثكل على ابوي واهلي حملها اكثر ومااريدها تنذل انت صار شكد تكول ابوها ندمان وتحاول ترجعني اله

انا مااريد ندمه الا على بنته الضاعت سنين عمره وهو باعدها كل الاريده يعوض هذا الندم برعايتها سأله مستعد لو لا واتأكد اذا گال اي تجيني لايتأمل اكثر من وجود بنته بحياته اما اني وهو صفحة وانطوت من زمان

واني اسمع هالكلام اترددت هوايه وماردت اسمع منها واروح بس شي بداخلي يكلي كافي ذل وسؤال يراودني منو يگول هناك ماانذل اكثر

بس نظرة مني الامي الي انهارت بسبب تعامل اهلها وتذكيرها الهم بأن شكم مره مذكرينها بفضلهم هذا ومنتهم

بدون علمي خلتني ادوس على نفسي وبداخلي الومها هم

تكدر تبعد بيه عن الاثنين وتروح بينا الحالنا نعيش بس هي متريد تكسر كلامهم وحسيتها بآخر فترة عايشه حياتها وي ابن عمها الولهان واني المنغص الوحيد بعلاقتهم المدعومة من كل الاطراف الي يحثونها على جمعتهم بشرع الله وكتابه

دقايق واتصل وگلها جهزيها احنا الصبح هم يمكم

وهذه الليلة مااذكر شلون مرت حسيت امي اتندمت بآخر ساعات بس عنادها ومكابرتها تمنع رضوخها وجهزتني بدموع واحضان بدون علم اهلها بقرارها السريع

بالنسبة الي ماكدرت اتفاعل بصورة طبيعية واعكس خوفي واشتياقي الها

چانت متبلده عواطفي ومو مدركة الهذا الوداع المفاجئ

وصار كل تركيزي شلون اكدر اعيش بينهم ومنو يگول يتقبلوني

وبلحظة اصرار وادراك گلت لا والله يتقبلوني غصب عنهم بالأخير اني دمهم ولحمهم ومستحيل اتنازل عن حقي بأعترافهم بيه راضين او مرغمين وهذا اقل حقوقي

....

الساعة تقترب من العاشرة صباحًا اليوم الي شهد تغيير مفاجأ للجو من الحر للبرد بدت قاعة العلاج الطبيعي تتزاحم تدريجيًا من المرضى.

اصوات المرضى تعكس حجم الامهم وقوة تحملهم،

الهذه الاختبارات الوقتية الي تخليهم امام خيارين استمرار او فشل

ضوء الشمس ينساب من النوافذ برسالة امل واشراقه بهية بنفوسنا مرضى ومعالجين

في الزاوية الأخيرة من القاعة، لگيت الرجل جالس على حافة السرير العلاجي، ينظر الأيده اليسرى المتيبسة وكأنها مو اله

وبعد تكرار الجلسات عرفت منه قبل سنة كاملة چان يعمل، يقود سيارته، يحمل ابنه الصغير على كتفه، يربط أزرار قميصه دون تفكير او احساس بهذه النعمة

الآن..صار يحتاج مساعدة حتى يرفع كوب الماء.

انطيته مي دافي

ماچنت مستعجل ولا اريد اصارع الوقت وازيده ارتباك

وماجنت اتعامل مع الجلسة كروتين ينتهي بوقت محدد. بحكم شغفي بمجال عملي والحالات الي تمر عليه اشوفها رسائل غيرت بيه هواي

گعدت گدامه على مستوى نظره مباشرة.

..شلونك اليوم؟

ضحك بمرارة.

"جاوبتك على احوالي وبعينك شفت !

چان صوته متعب خشن من كثرة الكتمان.

أخذ نفس عميق وگال بصوت منخفض

..تعرف شنو أصعب شي؟ مو الألم... الألم يروح ويجي. أصعب شي من تشوف نفسك عالة

سكتت لحظات

باوع الأيده المشلولة وگال

..مرتي صارت تساعدني ألبس... ابني يخاف من شكلي من أطيح... حتى جهالي يلزمولي خاولي بشربي للمي احس روحي رجعت طفل!

چان يحچي بثقل كأن كل حرف يحمل أشهر من الانكسار.

ما قاطعته فضلت اكون مستمع ... احاول افهم لأن اعرف أن بعض المرضى يحتاجون من يسمع وجعهم قبل تحريك عضلاتهم ولايحبون الجدال ونصائح الصبر المفرغة قبل الأستماع

مرات لأنسان يحتاج يفضفض بلحظة ضعف الغريب ويم اهله يتقوى

بعد لحظات وگفت بهدوء وگتله

..يلا... نجرب

ساعدته على الوقوف أمام القضبان الحديدية.

اراقب جسمه المرتجف چان يقاوم حتى فكرة التوازن صعبة عليه

القدم المصابة انزلقت قليل سلطت نظري وتركيزي عليه شدد الرجل على الحديد بعصبية صاح

..ما أگدر

ارتفع صوته فجأة، وهو يضرب الحديد بأيده السليمة

..كل يوم نفس التعب ماكو فايدة المفروض تأشر على ملفي وخلص ادورون انجاز وتدريب بروسنا مايفيد ليش تتعب واتعبني

اقتربت منه بسرعة محافظ على هدوئي بضبط

عالي للنفس متعود على غضب المرضى وماعدت اتفاجئ مثل اول واساسا اني مهيأ الهذه الحالات وعندي القدرة بحكم حياتي العايشها

ثبتت أيدي على كتف المريض بقوة مطمئنة

..اسمعني

المخ بعد الجلطة مو مثل زر ينطفي ويرجع يشتغل. هذا طريق طويل.. حاول تستوعب أنت مو تحارب رجل أو أيد. أنت تحارب خوف، وإحباط، وأعصاب فقدت طريقها

صار يلهث من التعب وگصته تتصبب عرگ ، بينما اني چنت اراقب وگفته بدقة وتركيزي الزاوية الركبة لاحظت ارتجاف القدم وشد واضح العضلات الكتف.

عدلت وضعية قدمه، حركتها بحذر شديد كأني اتعامل مع شيء هش قابل للكسر

..حول وزنك علي

..اطيح

..أني موجود لاتقلق

تردد لحظات وترك جزء من ثقله عليه.

خطوة.

بطيئة... متعرجة... لكنها خطوة حقيقية.

ارتجفت ساقه بقوة راد يسقط، لزمته وسندته بصدري قبل لا يوگع للگاع

وگف المريض، والعرق ينزل من رگبته، بينما الألم يحرگ عضلاته المتيبسة

فجأه بچه!

مابچه بصوت ، بچه بچي رجال أنهكه الشعور بالعجز أكثر من المرض نفسه.

..والله تعبت

بهدوء كلت

..ادري وحقك ..بس مو نهاية الطريق هذا التعب

نقطة انطلاق ..اتذكر ان الله سبحانه جعل العسر واليسر معا رفيقين

"إن مع العسر يسرا"

ماگال بعد العسر ولا گال قبله العسر معاه يسر والضيق يتبعه فرج لاتيأس ولتصدگ بس انت مهموم الناس كلها لولا الأمل بالله متعيش

مد اديه الي

..انت بطل وخلي احلام اولادك مقابيل عيونك اذا تحبهم

..شلون مااحبهم عايش الهم اني

..الله يرضا عليك ويشافيك ..خليك وياي

سندته وكرر الخطوة الصغيرة بأصرار

..تمام ..هسه تمام ..ارتاح

..الف رحمه الأبوك

غصة بداخلي قادتني للأنهيار شويه وانهر المريض على دعائه المو محبب بالنسبة الي بس الحكمة تكول ليس كل مايعرف يقال والله سبحانه يعرف بالحال والمخفي

مااعتقد اكو انسان مثلي يكره حتى الدعاء الوالده بس مرت عليه ذكرى ..بسيطة او ابسطهن وياه

بسنة من السنين عيد الاضحى المبارك بوقتها الكل يعرف ان ابوي علاقته بأمي مو زينه واعتبرو من حقه ينفر يمكن اكتشفها نزوة وانتهت خاص ان الكل عرف ان هو مضحوك عليه بهالزواجه وحاسين لو مااني ميخليها بذمته

واقعا هذا عذر ابوي والا هو مو مهتملي اصلا

المهم ماجان بظنهم احنا بحال يصعب على اي عاقل يعقله وان ابوي ظالم ومريض الحد الي صار يتلذذ بعذاب امي وخيباتها ويستفزني بيها رغم مرت كم سنة على قصة امي وامها الي طلعت مو امها والشكوك الزرعوها براسه بأنها بنت حرام ربتها من الشارع مريه ماالها احد وقشمرتك ماكدر يبلع هالموضوع ولايغفر ولا ينسى وبدون معرفة التفاصيل الي ممكن بيوم اعرفها من امي بس احجي عن الوكت الوعيت بي جان يجي مجرد يعذب امي يختلي بيها يسممها ويخلي يومها اسود من الليل ويطلع

لا اكل مثل الناس ناكل وصل مرحلة من امي تعاركه واطرده يتسوك البيته ذاك ويدزلنا الباقي من ثلاجتهم وبقهر امي تشمره من السياج البينا وبينهم

بعد مايتلذذ بعذابها عود يتسوك وبالباب يذبه تنجبر تاخذه الخاطري لأن طفل ومااصبر واتحمل جوع

اتذكر بالعيد

الكل جان فرحان بشراية العيد الا اني الهسه تتراوالي دموع امي والقهر الي انقهرته واني اسألها

..شوكت اني اشتري ؟

سؤال يمكن عادي بس على امي ماجان عادي جان موت بطيئ وهنا امي قررت تودي على عمي عاصم تعرض عليه تشتغل فلاحة بكاعهم

ماجنت اعرف غاية امي شنو وليش بكاع عاصم مو كاع جدي رغم نسوان عمامي يطلعن جانن وحتى بناتهم اذا حبن محد تنجبر بس الي تريد تطلع وتاخذ حصة من الريع حالها حالهم

بس من كبرت امي اتصرفت هيج وي عاصم بالذات حتى تشوفه ان صديقه واخوه والي حفر هوايه حتى يعرفه على الحقيقة هذا نتاج حفره عايشين بحياة عدم وهم رادت تحقره كدام اهله وعمامه بالأخير شماتكون ومنين متكون محسوبه هي عليه وهنا اتوالت الرزايل الابوي وطبعا محد قبل شغل امي بس دخلو عمامي ووصل الخبر الجدي

بوكتها ابوي جان طالع يگضي العيد بنص بغداد يتونس

بيومها حرمة ابوي زتت من الحايط علاكة ملابس قديمة لاخواني وكالت

..تردين تفضحين ابراهيم يم عمامه على ابو مقصر ويانا مو عيب هالسواية واذا ع الملابس لبسي ذني

امي ماحجت شي كومتهن وحرگتهن بصف السياج العليهم كل هذا يمر عليه شريط ذكرى تچوي الگلب والروح رغم استيعابي الهالمشاكل ماچان بوعي هسه حتى من اضوج ضوجتي وقتية وتنتهي بس المشاهد من تتكرر بالباب تاكل بالروح اكل

الي صار جدي وعمي اجو الامي وهم نهائيا ماطابين البيت بعد المواجهة الصارت بينهم وبين ابوي وعزلوه عنهم وشالو ايدهم عنه وشاف طريقه بالتجارة بعيد عنهم

جان كل ظنهم عايشين طبيعي امي لا مصادقه من نسوانهم وتشكي ولا هي من النوع الي تحب تورج الناس على مشاكلهم الا من انفجرت رادت شغل مو اكثر وحجتها تصرف عليه

عمي اتخبل من سمع من امي هو وجدي وهم لامو امي صوجج مابنيتي حياتج وياه بالصدق والامانة قسمت الهم يمين هي نفسها ماتعرف ولا تدري

هنا جدي طلب من عمي يجيبوله ابراهيم منين ماجان كلهم هسه تجيبوه وفعلا من جابوه اتذكر هو وعني سليمان ضربوه ضرب بس صوته يوصلنا وهو يرفض تعديهم وشرطو عليه يبطل ذلتنا بماله والا يشيل ايده وهم يتكفلون وهذا الصار

عمي دز زوجته الامي تفهم منها اكثر شنو تحتاج

امي بدموع حجت كلشي ومااعرف شنو الصار الي اعرفه عمي ماتركني بعد واتعلق بيه وكأن ابوي الحقيقي وحتى راد يسجلني بأسمه وهدد عمي يلا عقد طلعولي جنسية والحمدلله اتسجلت وي جيلي هالموضوع جر عداوات ومشاكل طويله بينه وبين ابوي وصلت بيه يحاسب امس سليمان شعنده وياج

رجعت الطريق كله گلبي مقبوض وضايج نزلت ع الشارع مسافة بعيده لأن التكسي مو على طول يدخل سايقها

لاگاني عمار نازل من دوامه اتسالمنا ومشينا سوه

صار عشرين يوم مانازل مشتاقله حيل عمار نقيب متزوج اختي سلمى بنت ابوي بس البنات مو مثل الولد بعيدات عني

وحاقدات عليه وعلى امي عكس الولد بحكم جنا مدارس سوه ولعب وبستان يجمعنا وتجمعنا مواقف

خلقت بينا جو من الألفة رغم ابوي جان يفرق واضوج منهم مرات بس مااكرهم

حتى وسام الجبير شكد ابوي مخربه بدلاله بس اذا صار الجد متأكد يوكفلي ويعزني

ورغم عمار متزوج اختي بس اقرب شخص اليه اخو عزام هو ولهذا دوم يكلولي ليش تشد على عزام وتعوف عمار رغم مشاكلهم اكثر

الفرق بين الخوات ذنيج مايعتبرني اخ ويشكن وهم دوم انصحه اما ريمه ماعدها غيري وادخل اكثر من النصح

اتواعدت وياه بالليل نتشاوف وسألته عن عزام وبلغته ليش يشوف اتصالاتي ومايتصل وكتله كله جنت متهاون وياه بعد هذه التصرفات راح يشوف اجراءات اصعب

ضحك

..شمسوي هالمره ساب العنب الاسود

..ياعنب ياتين وين ترحون مني هالمره عمي وجدي وياي

..لايابه على كيفك ويانا خو مامشمول اني

..شمسوي انت الثاني

..ماكل تراب بالدوام شمسوي بس هي وراي ورت وثعول دخانها وحاليا ابيت ابوك

..مابيكم خير المن تعرسون بحال الجوبي والطبول اسبوع تدك باعراسكم

..مو سويناك خال شبينا مابينا خير

..هاي الفالحين بيها ..هم خاين انت ولك

..اني وعزام خل نباوع للعدنا يلا نخون دماغنا بي الف حسبة الخيانة للمرتاح

..الا اگل المهيب ولد عمك حاسدينك

..يول هذا صدك مرتاح بالله العظيم رحتله للمستشفى كل طيره يمه تكل للثانية اني احلى منچ وهوو هناك شصاير طباب خير وخيّر يصلح امور ومرتاح ابن مرتاح

..على عمه ابراهيم ينگطون خيورية

..صدك ع الخير بقرب زواج ابوك الرابع

..الخير يصيبك.. بعد هم يلوحنا ضيم لا بالله ابراهيم معرس بشرو عماته

ضحك وراح فتت للبيت اتلگتني خديجة

بفرحه تصيح

..جه خالووو يمه

..ياهلا بالحلوه وبأمج الف هلا

واتفاجأت وياها روشه وغزالة وهاي نادر مايلتمن ويجنا

..يابه منور البيت اليوم هلا بيجن كل الهلا

..وبيك اكثر گلنا صخر الاشهل ناسينا نروح نذكره احنا

..الله يساعد طلابج عليج رشا خانم مصار يومين من مريتكم ..غزولة شلونچ

..بخير الحمدلله فوت بدل وتعال جوعانين ومشتاقين الأكلك

..مو تددللن جنجن على اكل شعجب ام صخر ماموكلتجن

صاحت ريم

..جذابه والله تغدينا من وكت قبل صلاة الظهر عمتي اجيناها من وكت بدون ريوك وفرحت بينا وطبخت ع واهسنا شوتلنا دجاج بتنور الطين بس هاي تريد تاكل ردود كالت اذبها وهو يحتار

..تدلل غزالة تطلب عيوني

..الله يسلم عيونك اشهلنا

..رشا ماتعوفين اسمي وتخلصيني انتِ مامرتاحلج اكثر وحده عمج يحبج

..والله عمي ذواق من اختار عمتي وحسنلنا النسل ومن اختار اسمك اشهل وشرط ها لو صار عندي ولد اسمي عليك

..صخر مو

..لا اشششششهل

..تموتين ع المداهر ..وواثقة تسمي هي خطيبچ وين يقبل لايهضمني ولا اهضمه

..هو بكيفه مايهضمك

..الله يساعده مال من مداهرچ تعلميني بيج..شهلة المزيونه متونسة اليوم مو

..هلا يبعد امك اي والله ونسني

ريم گالت

..گول دوخنج مو ونسنج صار هواي ماجايين وعدنا كوم سوالف فضفضنا يمها واحلى نصايح من العمه الحنونه اخذنا

..لا والله ونسني من زمان ماجايات

..يمه كربي عليهن بيهن خوش شغل بس ريمة لا

..تموتون ع التفرقة ولد واحفاد الحجي

..غزالة اخر وحده تسولف بالتفرقة انتِ ماخذه منها حصة الاسد ..ابدل واجيجن واحجيلي شوكت ترحون الاربيل

رحت ابدل ورجعت اول مافتت للمطبخ بوجهي للغدا اطبخه غزاله كالت

..اتعاركو ابوي وخاله بسبب روحتي ويمكن ابطل

..الج الصافي معليج هم يحلون امورهم العليج تراعين نفسج وصحتج ومعليج شيصير ميصير عمي يعرف شلون يدير الامور

..واذا اجت مااروح والله ولا اسوي عملية

..ممكن اعرف السبب

..هواي اسباب مااحب افصلها

..معليج منها خلص العليج تسمعين كلام عمي وبس

..واذا كال تروح

..مايكول ولو راحت شعليج

..لو راحت واني مريضه واحتاج اهتمام شرط هي تتمرض وادور اهتمام هم وابوي يحتار بيني وبينها

..ترى مو طفلة هي وتسوي هيج يمكن تصادف مريضه فعلا

..لا والله هي هيج

..زين ليش متشوفيها من زاوية ثانية هي مريه والمرأه بطبيعتها تحب اهتمام وخطيه هي محرومة من الخلفة ومنفصلة وزوجوها الابوج المانسى امج ولاكدر يكسر الحاجز بينهم علاقتهم شبه سطحية وامشين وكتهم وبس رادت تعوض الامومة بيجن مااتقبلتوها وين تروح يعني منين ادور اهتمام مالها خيار غير ابوجن فكرن بهالجانب

رشا تسمع مامشتركة بس غزالة تحجي وريم وامي بالهول يحجن ويمهن البنات الصغار يلعبن وهوسه مايوصلهن حديثنا

..شو ماتردين مامقتنعة بالحجيته

..لا كلامك صح بس هي الي تريد تعوض دور الأمومة بينا غير المفروض عدها احساس امومة تخاف علينا يهمها امرنا احنا بالبيت نشوفها ضابط مو مره ابوي العسكري مو مثلها

تكعد ادور انضباط بروسنا الريوك بفلان ساعة ولو تأخرنا ينهرج البيت وتستغل فترة طلعة جدي وابوي وتحجي من يجون يمهم صبورة وملاك وهواي امور مااريد اشرحها

..انتِ ليش هيج مقهورة يعني شو تردين ادمعين الهالدرجة غاثتج تجين يمنا فترة تغيرين جو سوي العملية وتعاي يم امي تخليج بعينها والله وتفرح بجيتج

بس لتضعفين هسه المهم ترتاحين وتريحين عمي ترى خطيه باله كله يمچ

گامت وگفت ع الكاونتر تفتحه وتسده كأنها ادور شي ومتأكد ماعدها حسيتها محرجة من السوالف غلست ايدي بالسمچ املحه وحضرته بالشوايات

..سمعتها تكل الأبوي انطيها الابن اخوي الاخرس منو ياخذها وهي بتك عين صح ابوي رزلها وظل يحجي وخلاها تبجي بكلامه بس مابرد كلبي بيها

..منو ينطيج انتِ اذا مو مكمله دراستج و واحد يقدرج ويعرف مقامج ويستقتل عليج يشهد الله ماانطيج لا مرت ابوج ولا حتى ابوچ نفسه لاتهتمين للسوالف خليج مطمئنة

دارت وجهه فرحانه ورشا تكلها

..شتردين بعد ها اها اجاج الضمان خو ماارتاحيتي الا لمن حجيتيها اله كتلك ابوي ردها وكافي

..لا مو كافي خاف بيوم يقتنع اكو من يحاجيه ومااضطر اني اوكف بوجهه

..من زمان كايلجن اني اخوجن وصديق الجن مو بس اخ احجلي ولاتفكرن بشي

وبرد عفوي رشا جرت التمن تريد تغسله

صحت

..لاااااا منو موديج يمعوده خليه ..اني اسوي

صفنت

..انت مو جنت تتقبل اساعدك بأشياء بسيطة مثل هاي

..چنت

...وهسه شنو اتغير

حكيت طرف خشمي رغم الزفر بيدي

..انخطبتي

..هاا

..والله ولاتسألين اكثر وتحرجيني ..شكو مدوخات نفسجن ادللن يمي اكلن وبس

سكتت ماحجت شي وسويت نفسي مامهتم بس من القهر على نفسي مااكلت الا مجامله الهن غدانا صار العصر ويغنينا عن العشا گوه بلعتلي كم لگمه ماردت ينتبهن

وصلتهن بالليل ورجعت الأمي

..نكمل يمه سوالف

..ماتعبت

..لا ..شعندي اريد اسمع واخلص من الموضوع وافهمه كله لأن ياكل بروحي

..يابعد روحي لاتحترگ الله سبحانه عوضنا وبخير ونعمه مادام انت سالم واني يمك وما اتفارگنا كلشي سهل

..بعد ماراح ابوي للحلة شصار

..اجه متغير وقلق عبالك سامع شي بس جان مامصدك بالسامعه وماسولف شنو ظل يسأل هواي بشك يستفسر حتى اني دوخني وماحصل مني نتيجة لأن مااعرف غير المعروف الي وبس بهالفتره مااتغير بتعامله وياي رغم ضغط عليه صار وسحبو منه كلشي ابوك يعاند راح من ثاني اسبوع دور شغل ومااهتم بس ظل مقهور وياكل بروحه شلون هيج يعاملوه

بيومها سألته

..اتندمت لأن اتزوجتني بعد ماخسرت شغلك وسيارتك ومكانتك عند اهلك

..لا ابد والله مااتندم على شي سويته بقناعة الندم بس من احس اني چنت زوج او شخص استغلني اهلي هم جانو مستغليني ومستغلين خبرتي ووكتي بالأخير حتى السيارة الي هي من تعبي سحبوها

وانتِ شغله وحده الي تغيرني عليج

..شنو هي

..شكوكي اذا ثبتت

انقهرت وبزعل استفسرت

..بشني شاك انت

..ماادري بس غيبت امج من مكانها واختفائها فجأه خلاني بشك واتمنى يطلع هي الكلامها مو صح مو انتِ

..كلام شنو احجيلي

..امج كالت شهلة وحيدة وابوها انكتل لأن الكاتله راد يسوي بلبلة وشرد للهور وانكتل هناك

صفنت راسي مفتر

..الاعرفه عندي اخوان انكتلو وي ابوي بنومهم هجمو عليهم بس انه وامي جنا بغير غرفة وشردنا وكبل مو بيت محكوم ومحد يكدر يشرد بيوت كبل وبمحافظاتنا احجر مطشره هم طبو للحجره ابالهم كل احنا بيها ويخلصون منا بس امي شردت بيه بليلة سوده حسب وصفها

..شوفي اكو اختلاف بالحجي وليش يكتلوكم اذا لا انتم معارضه لا انتم حزب العاية من كتلكم وحتى اطفالكم شنو

..تكول امي غيرة نسوان مرت جدي مخليه ولدها يكتلون اخوهم

طفر من مكانه

..شنوو؟

هيج سمعت منها

..عمامج شارده منهم لأن هم الكتلو ابوج مو لأن عدهم عادة النهوا

..يا نهوا

..ترى خبلتني انتن امج وين الكاها هسه

..انت شلون خطبت

..امج سنة كامله اروح وارجع عليها حجيها مختلف نهائيا منو بيجن تصدگ

..والله ماادري بس شراح يأثر لو عرفت اني هسه زوجتك

ماحجه شي طلع ورجع مامهتم يتغزل وسوالفه تخبل فرحت

وبليلة الجبتك بس هو وياي ماوده على احد بس انطى فلوس للمرضات دارني ماانسى هالليلة حسيت بروحي صدك غريبة ووحيدة وكل طلكه قوية ادعي ربي امي بخير وبالي يمها وين صارت الحد مانورت انت راحن يبشرنه

خلاني ابات بالمستشفى والصبح جابني بفرح گال

..سميته اشهل

شگد جنت فرحانه شگد يحبني وهيج مسميك گابلك يوم كامل بوكتها مرت عمك سليمان الوحيدة الوصلتنا وجانت عدها بس ريمة ورشا جابت غدا وهدية الك الباقي محد اجت بس جدك وده ذبيحة واجه شافك وكبر باذنك ومن راد يسميك ابوك كاله سميته اشهل

ماحجه شي بس اخذ على خاطره اكثر لأن الظاهر متعودين هو اليسمي ولدهم وبناتهم

..من حسن حظي ابوي سماني شريد بعد ذكريني اصلي صلاة شكر

..ههههه انت حتى هاي ماخليته يتهنى بيها وغيرت اسمك كوه عليهم كلهم

..هم راسي يابس مثله

..يمه همزين اعترفت راسك يابس عليه

..اكسر راسي والله

..چا حتى بالسوادين تشابهون

..اي وره شگد من ولادتي اتغير كلشي

..يمكن اكثر وحده ادللت بنفاسها والله حتى رجليني جان يغسلها الي بوكتها صارت مشاكل ومرته دزت على اهلها شني يجيني بس بالليل بليلتي وايامه كلها يمها كاللهم ماعدها احد ومحد من بناتنا توصلها اشمرها حتى ترتاح رزق

..شلون رزق هي هنيال ابوي بيها

..ههههه اي واشترالك ملابس وفرحان ينكل راد ينسى كلشي ويعيش الفرحه الحد ماوصل خبر امي راجعه للحلة گال اتجهزي اخذكم تشوفوها وتشوفكم وهناك نفهم كلشي لأن الحجي جاي يكثر والعالم تألف واني مااحب احد يحجي بظهرنا اتأكد حتى من اسولف اسولف بحيل صدر ومااهتم

جهزت جنطتي وفرحانه وعزلي مصرفي بس عمت عيني امي سمعانه بيه جبت هو موصل خبر لأم ايمان من تشوفها تبلغها حتى يشوفها ويفهم وهذه نيته جانت من سامعه بساعتها طالعة وجايتني وكايله ع النشد اندل

ماكو العصر بلغني بجية امي المدري شلون وصله خبرها بيوم النطلع الفجر كعدت حتى نطلع وصلنا خبر امي مدعومة وحالتها خطرة

ماطولت يوم وانوفت وراح سرها وياها

..ابوي بوكتها وكف وياج لو شكه مأثر عليه

..لا والله وكف وياي وكفه ماانساها بحيث نسيت كل تفكير وخوف من ناحيته وگلت خلص كل همي جان حزني بفراك امي حيلي راح وانت صغير تريد سهر واهتمام ماقصر بمساعدتي وحتى دفنها هو اتولاه ودفنها بالنجف مثل ماتريد ووصيته

..وبعدين

..بليلة ويوم انگلب كلشي اجاني فاير جنت بحضني ارضعك

گال ودي لفراشه وتعاليلي بساع

خفت منه بس كل ظني مسويتلي زلة وياه غاسلة واوراق بملابسة ورادوها منه مضيعتبه حاجه

سامع حجي من مرته وصدكها لأن اكثر من مره تكله تطلع بره وتدندن وتغني تخبث عليه كلت صدك يجوز وگلبي خايف هم مامتعوده اشوفه هيج

..انتن شايفاتني زوج شكم واحد مقشمراته گبلي

..شنو

كلمة وحده مني خلته يفر وجهي براشدي فر وكعت مامستوعبه وهجم عليه اريد اعرف منين اصد الضرب مااكدر

اخلي ايدي على وجهي احمي لو احمي بطني لو ظهري لو راسي وشعري الانشلع

بروح اعزازك لا لاتطگني بعد كافي ماظل بيه عظم صاحي خليني اشوف ابني يبجي شبيك بس احجي فهمني

طكاته زادن و اقوا من الاول صارن وهو يسب ابوي ويسبني

استهضمت حيل على وصف امي الابوي اشوفه شي جبير وماجني مااعرفه بروحي عايش

..لاتسب ابوي

..و انتِ منيلچ اب انتِ ..سافل طبگت براسه حاجته فرغها وجابج بلاء الي اني تقشمرني اني ابن الحسب والنسب اخذلي وحده نغلة تايه نسبها

..والله عندي اهل والله بت شيوخ انه امي جانت تگلي اهلج شيوخ

..لو شيوخ ماخلو امچ الساقطة تفتر بيج وتورط ولد الاصل ابزرتها المالها نسب هاي اذا طلعت امج ومالفتج من الشارع وربتج ماصدكت تلكالها زوج مثلي ينعجب ركبتج براسي ياسافله ماتستحن وانتن تألفن قصص عبالجن تنضم السوالف

..لاتسبها امي مؤمنة والله وتوها ماتت حرام عليك

..والله لخليچ تتمنين المووت ومااطوليه مو اني الينضحك عليه الا اخليج تسبينها على الورطه الورطتج بيها وياي عبالجن انه قشمر عبالجن ابو سمير واتقشمر

گالها وصدگ بيها خلاني اتمنى الموت 13سنة اتي اتعير بأهلي الحد ماوصلولي خوالك وهنا كتله لهنا وبعد بس وصار الي صار وياك

..ماهجرج

..لو هاجرني هواي ارحم جان يجي شارب مرات ومرات صاحي بيوم الشارب يرجع هو نفسه العرفته بأول يوم بس تكش نفسي منه جي بمنكر وكوه اتقبل وجوده وبيوم اليجي صاحي يخليني اتمنى الموت الف مره مو مره وحده

..منو الجان موصله ان انتِ بت حرام وهي مربية الج مو ام صحيح ام سمير مثل ماكالي عمي بسبب غيرة نسوان لو لا

..صح ام سمير موديه ابنها بدون علم ابوه والرجال بعد سنين يلا عرف من جاب خوالك ووصلهم النا وجان جبير وحتى سمع كوه يسمع من حجوله شيريد يسوي يعني

..بس واني بالاعدادية وصلتلج ورادت براءة ذمة

..وكلت الابنها وجنتها لو بينها وبين الجنة ذنبي بس مااغفره الها

ام سمير دمرت حياتي وحياة ابوك شوف هو الغلط من جدتك ماحجت الصح اني سنين صدكت هي مو امي وجنت اموت الف موته باليوم اكول شجابرها تتحمل كل هالقهر علمودي هي لو ماانه تعيش براحه حالها حال هواي نسوان بس من دريت هي بيبيتي ام امي وشنو جاري عليها اكتشفت اني بنتها وهي عمة ابوي

بس مكروهه من نسوان اخوانها المشاكل بينهن من قبل ولأن ابوي وحيد الامه ومتوفيه بالسل ظاله هي مربيته رايدها واحد من عمامي الصغار اخوانه يعني بس امه مانعه زواجه منها وظال يشيعون حجي عليها ابوي متزوج بصغره ومن صار الحجي والعالم لاحه والحبايب مايقصرن بهيج سوالف كطع حجي الناس بزواجه منها

وهنا خلافهم زاد وحقدهم صار مكشوف للكل وهو اخذ صيت بسبب كرمه وشجاعته خلاهم يزيدون بكرهه الكتل على شي بسيط على مود مكينة الورع الكاع متعاركين العصر ومهددينه ومامصدك بيهم ومنفذين بالليل اثنين منهم

الناس كالت علمود مكينة ماي بس الحقيقة المكينة الگشة الكسرت ظهر البعير

..زين شلون انعدمو اربعتهم عمامج حتى الماشارك بكتل اهلج

..حسب ماعرفت بعدين بالأنتفاضة صاير فرهود للاسلحة لأن المحافظات سقطت گبل لايجي للحكومة دعم

اكو ناس بياعة شراية صدقان الهم مأمنين الاسلحة يمهم عود يبيعوها بعدين اكو من موصل خبر للدولة شالوهم واعتبروهم حالهم حال العناصر السوت انتفاضة غايتهم اسقاط نظام مو بيع وسلب

..ارادة الله هاي بضرب ظالم بظالم

..بعد عيني الكريم مايترك حق احد ..عمامي بوكتها كل الي مسوينه ذابين من العشيرة الاثنين النفذو وهدرو دمهم ع الورق بس والا هم ظالين ببيوتهم وكاعهم الحد مااخذوهم وبيوتهم انهدمت

من مسجونين مرت ابوي رايحه مبلغه گبلها محد مسوي شي لأن هم اخوه ابن العم يروح يبلغ وياخذ حقهم بس مرته جان الها حق وخايفه على ولدها

..بس سبحان الله شلون افترت وو گعتهم حتى مااتهنوا بالسووه سنين قليلة وانتهو

وسمعت خوالي بعدين طاردين ولدهم من الكيعان والهسه ممنوعين من دوسة الگاع ومطرودين من العشيرة هم

..اي خوالك بوكتها جانو صغار من كبرو ماخلولهم شي

..وامهم ونسوانهم

..امهم مامطولة وراهم ونسوانهم وي ولدهن

..اول لقاء اتذكره بينج وبين خوالي بس احجيلي شلون استقبلتي خبر الج اهل ومو اي اهل الكل يسولف بشجاعتهم وكرمهم

..اوو ساعتها گلبي راد يوگف فرحه بصدمة بخوف ورهبة مدري شصار بية

..شرايج نروحلهم ع الجمعة التجي اذا ماسوت عمليتها غزالة

..الواه والله من زمان يلحون اروح

وباجر اريد تحجيلي ليش مابلغتيهم بالسواه ابوي واهله

..تعبت ودخت هسه وماابلغهم الدنيا تريد العزيز

ابوك لو يدري بيه عزيزة عند احد ماظل يعيرني سنين

وخوالك لو درو بيه مالي قيمة هنا مااجوني بالمنظر الشفته ولا اريد يكولون فلانه خطيه لاتنسى ماجنت اعرف عنهم شي والناس اجناس

..ومن عرفتيهم

..كلهم غيره ونوماس ارفع راسي بيهم بس اريد يشوفوني مثل ماشفتهم وانت بالذات فرحو بيك من شافو معزتك شلون عد جدك وعمامك

..كلها بجهه والسواه ابراهيم بجهه ذبحلهم نص الحلال

..جان فرحان انرفع راسه بعد سنين والعار الي اتعير بي انكشف للناس كلها الي مناسبهم من اخيار الجنوب وكل ظنه راح اغفرله مايدري هاليوم جان اخر يوم يشوفني بي مجبورة على قربه

اتحسرت واني اتذكر بهذا اليوم جانت صدمتي غير اليوم الي خلاني اثور وانسى كلشي واسحب سجينه طيرت بيها حاجب ابوي جنت ناوي اقلع عينه لولا لطف الله

الي سمعته جنت اسمعه هواي واغض سمعي كوه امي ترفض ادخل بينهم خاص بوكت عصبيته تكول حتى لو ضرب عادي اني وياه نحلها بالك توصلنا وتدخل

بس بيومها ماجان ضرب عادي جان ضرب واعتداء شي عقلي رافض يتخيله ويصدكه وبعد ضربي من جدي وعمي مروان على ضربي الابوي حجيت بقهر الشفته كعدو يشرحولي هالشي عادي يصير بين اي زوجين وهذا الخلاني اشمأز من الزواج وطارية وكعدت افكر كل ليلة جنت اسمع هالشي منه ماجان يضرب جان يعتدي يهين ينهش بدون اي رادع الفرق امي ماجانت ترفض بصوت عالي ولا تجادل وجدالها ورفضها الخلاني افزع الها وانصدم صدمة عمري بمنظرها بين ايديه اتخيلته وحش وبيده فريسة

منظر ماينشرح بس صعب ينبلع او ينعقل ماكدرت اشوفه عادي ابد حتى امي كرهتها

كرهت ضعفها وقبولها ورضوخها بكل ليلة تمر وهو يعاملها هالتعامل

جان المفروض تكتله هيج اجه ابالي من الصدمة حتى كتله حلال كلشي حلال الا السكوت

يتبع..