رواية كتوف مائلة الفصل الثالث 3 بقلم نور الشمس

يسعد اوقات الغالين ..

حبايبي عندي ابني عنده بكلوريا باجر اتمنى تدعوله بالتسهيل والتوفيق وكل الطلاب

.....

كتوف مائلة وهموم مثقلة

....

اني وعيت على قهر امي والمشاكل الصارت بينهم بس مامتوقع هذا الوجع لازمها من نشأتها الحد ماكبرت اني وگدرت اسندها

اكو غصة خنگتني عجزت ابلعها لو اعبر عنها واني اسمع ذكرياتها

وكالعادة كتمتها بداخلي وزيدت الامي بس بداخلي نور اشرق واني احس بشعورها وكأنها فرحانة اول مره تبوح بدواخلها الشخص تعتقد بي اهل الهذا البوح

هي تعرف غلاها عندي رغم الصار والفترة الي صارعت بيها وحتى هي ابتعدت عنها مجبور

اتمددت مقابيلها ..وبعد نص من سوالفها مااعرف شلون اهون عليها الحد ماحسيتها هي تريد تتهرب ماتكمل گعدت الحيلي

.. كملي اليوم مااعوفچ شهلة لاتتعززين عليه بسوالفچ ترى مركز اني لاتعوفيني ع النص

رجعت تسولف وكأنها تنقش اوجاعها تاتخلدها بذاكرتي وتخليني ازيد فخري بيها ركزت بكل كلمة تكولها وهي توصف من گلبها حتى اللحظات الي اتمنتها

..اي يا روح امك وعوضها ..وبليلة بيها الهوا جلاب فتحت امي شباك الغرفة الگاعدين بيها وزاحت البردات الچانن بكل بيت عراقي بالتسعينات

على حافة الشباك خليتلي شمعة بصحن چاي مثبتتها تعكس ضوا علينا بس ضوا الگمر والنجوم يجذب انظارنا اكثر

گعدتني بسدها خلت راسي بحضنها وهي تفرد بظفايري وتحرك اديها على راسي بحنان

عيوني صارت على السما شگد صافية والنجوم مزينتها الي قريبة وتلمع والي طافي ضواها بالنسبة لليمها

والي بعيده مطشرات بشكل يجذب ومدري ليش هيج اتخيلت حتى للنجمات قصة وكل وحده همها شكل

امي چانت تقنعني بسوالفه شلون رايدني وصار سنة يگلها سكنت الكراج وشارعكم بس حتى المحها كل مااجي الشغلي هنا حجولي عنچ ارملة شهيد وهي وحيدتچ

فرغتي صارت يمكم وبفرعكم بس حتى المحها وماحصلتها وتحلف رايدج بسنة الله ومستعد الكلشي ترديه مشية جبيرة شنو الي تريديه بس احجي

وترجع وتذكرني بي بشكله وصوتها متروس غصات مو غصة وحده هي هم مثلي مايهونلها تفارگني بس مجبورة وصرتلها هم

رجعت تذكرني بي وانه تيهت بينه وبين الوياه

ارد اتذكر هو العسكري الأسمر لو الثاني واثنينهم حلوين

بس اكو وسامة تختلف وشخصية تجذب ومدري ليش هيج حسيت بشعور لاهو فرحه لاحنين مدري شصار بامعائي خبطت

بحيث عدلت گعدتي ونهضت من حضن امي سحبت رجليني الحنچي تچيته عليهن وشبكت ايدي فوكهن

اغطي على عصف المشاعر الضرب روحي مدري شجاني وشحسيت لا هي لوية لا رجفة هيج شي تولد بداخلي الجانب الفضول الي اخذ مساحة اكثر

وبديت اقارن

المدني وسيم بشكل وبذاك الوكت الكشخة مو مثل هسه موديلاتكم لا

جانت القمصان فضفاضة وفوكها حزام وبنطلون واحذية روغان تلمع واني شفته مرتين مره برسمي وقاط يخبل جنه ممثل مكسيكي ومره بكشخة الشباب بوكته

گلبي يگلي هو لأن هو الكتل روحه ويتنوع عليه وذاك يجرجر بي وهيج بخيالي رحت شنو البس وشلون اكشخله وراح يحبني مثل المسلسلات والافلام المصرية هيج ادلل عليه واضحكله

واول مافكرت اگص برچم وارفع الشعر منا بف جانت هاي اقوى تسريحه للشعرها طويل مثلي والثانية گصة الاسد وهاي مااسويها لأن احبه شعري

وهيج اشتري كعب واخلي حمره سحرية

والبس جنطة ام سير طويل وتنورة كبس وي قميص حرير لو كوستم ابو الكتافيات بياخه طويلة

واخذني الواهس وي سوالف امي لگيت روحي اضحك وفرحانه بس ظل سؤال بداخلي

هو ليش رايدني معقولة عيوني هيج حلوه صح كلها تمدح بعيوني حتى اهل ابو سمير وامه وحتى ام سمير جانت تكول عيونچ ماشايفه بجمالهن ودوم تسأل عليمن طالعه بهاي العيون واي واحد يشوفني

اول ماتجذبه عيوني من انه طفله بس ماجاي اقتنع شاب يحب بنيه ويتعناها من عيونها

وهيج اكسر واجبر بخيالي

..تضحك عليه اني و احلامي حقك بس وحده مثلي لا تعليم لاشهادة لا استقرار وحال ميسور بشنو تحلم

هاي احلامها

..اخسا والله ..مااضحك عليچ ..اضحك على الوكت الشوفچ قهر بالمقابل انتِ الرايدته حياة كلش بسيطة ماطالبة المستحيل

..شنسوي بعد كلشي مكتوب نشوفه

..بعد كل هذا ماقابلتيه لو قابلچ ماحجيتو شعجب مافكرتو تسألون عنه يم اهله وديرته

..چان عنده خال هناك والحجي جدك مشاركهم وهو هنا مكان ابوه وعنده خبرة بالتجارة رغم هو معلم بس تارك التعليم بسبب قلة راتبه بوكتها ومكتفي بتجارته

ويطوع كل سنة بتدريس محو الامية بوكت الدوام ساعة وحده يروح يدرسهم ويطلع احجيلك هالتفاصيل عرفتهن بعدين والتدريس يومين بالاسبوع وهناك بديرتهم گال

بس من خطب ووافقت بعد تفكيري وكلام امي وقناعة ابو سمير وسؤاله عنه بشغله كالوله ولد محترم وابن ناس وماعليه كل نقد هنا

بساع بساع كالو يجون يخطبون الأحد وحددوه يوم ثمانية بشهر التاسع من سنة الاثنين وتسعين وقبلها بيوم اخذتني امي للصالون احف

جنت متعجبه اول مره اشوف هيج شني ام الصالون من شفتها اتعجبت بجمالها وكاصة الشعر ولادي ولابسه تنوره كصيرة

نسيت روحي عروس ومتت بيها انه متعجبه بام سمير واكول انوب الا اصير مثلها حتى بزعلها منه ماعافت حنتها والديرم

وهيج لكيت ام الصالون هي هم صافنه بعيوني وتسأل امي وعلجها يطگ وريحة الباودر والمكياج تجنن منها

..هالغزالة منين ماشاءالله على هالعيون هنيال الصارت من نصيبة

وبداخلي فرحتي ماتنوصف هاي الحلوه تشوفني حلوه

كملنا وطلعنا امي اشترتلي كوستم ابيض ساده بس طرف الردن والياخات مطعم قماش اسود بطوبات بيض واشترتلي عطر ليزر وحتى الليفة جديدة

للعصر اجنه نسوان من طرفه نسوان اثنين وحده متوسطة ووحده جبيره وعرفناهن مرت خاله وامها لأن امه هو متوفيه كالو

وهم كل شويه يمدحن بجمالي ويكولن والله فلا نلومه بعد على رادتها واصراره عليها

بس هنه اجن واجهه مابيدهن اي قرار ولا نقاش كل حجيهن كالن اتفاهمن وياه هو ومايقصر

وثاني يوم صارت طلعتنا نشتري الذهب اجه بسيارته المارسيدس چانت بذاك الوكت تنعرف بالعفريته لو الشبح هيج الناس تسميهة وهاي مايجنونها الا الناس الطاگه

ام سمير شاطت قهر من شافتها وبطلعتنا ظلت تحجي مدري منين يكوشن ع الزلم ويلگطنهم هم ضحكتن عليه بسالفة مثل ماضحكتن على ابو سمير وورطتنه بيجن

طلعت مامهتمه الحجيها بالي كله يم الي اسمه خطيبي

بس امي متخوفه وتريد بساع بساع تفض العرس

جنت خجلانه مدنكه ولابسه الكوستم حار وشادة الربطه خانكه روحي وفوكهن عباية الجو حلوو جان وماارتاحيت من الحر من ملابسي وكل شويه ابوكلي نظرة منه وهو مسولفچي منطلق وي امي وعيونه ع المراية عليه

بس رفعت عيني اشرلي بطرف عيني خلاني اخلي راسي بجفوف اديني وماارفعهن الا يم الصايغ

وكلشي مااختاريت هناك ولا اعرف هو وامي اختارو وحاسبو وطلعو وهنا هو سألني

..عجبج ذهبچ ياحلوه

هزيت راسي

..لاتنزلين عيونچ خليني متمتع بيهن وعايش شعور الفوز بحلم چان من المستحيلات .

رفعت عيوني وكمل

..كل انسان واله من الله ابتلاء وابتلائي عيونچ اخذني من اهلي وناسي ومن الدنيا كلها انتِ تعرفين شسوت بيه هالنظرات ؟

ماجاوبت لأن هو اصلا مامهتم الوجود امي الي تسوي روحها ماتسمع ولا اني كدرت اتجاوب لو احجي حرف رغم استمر بالغزل

مارفعت عيوني بعد والطريق كله اتنوع لچفوف ايدي وعرفت المتزوجته مو هين وجريئ وانه صعب اجاريه شلون راح اتعود

الحد ماوصلنا البيت طبينا لگينا ام سمير مطروده زعلانه ابيت اهلها وبس الولد موجودين وجانو مامهتمين بس حسن گال امي ماترجع الحد ماتولين ولو اتزوجتي بالج توصلين الباب بسببج امي تنضرب گدامنا لأول مره ابوي يضربها

امي ضاجت وقررت بعد زواجي تنهي هالمهزلة وترجع الناس الحياتها واستقرارها وهي هم تستقر

وطلبت من ابوك بوكت ماحاجته عرفت اسمه ابراهيم يعجل زواجه وقررت هي ترجع تأجر غرفة من ام امان اذا ماماخوذه الغرفة وظاله على حطتها

شكد ردتها تبقى وياي خاص عرفت هالسنة هو مأجرلي بيت هنا بين مايبني بيت النا يم اهله باطراف بغداد

امي بشهگة لطمت صدرها وردت

..وانه اكعد يم رجلج عمت عيني كون اكعد يم نسيب حتى يذلني ويذلج التوبة تنعاد هالذلة بس خل اطلع من ذمة ابو سمير واجرلي غرفة ولو اكلي رغيق خبز ولبن الف خير ونعمه

ظلت فرحتي ناقصة مصير امي مجهول وفعلا اجر بيت واثثه اثاث بسيط كال بس من راحت امي تودي الملابس وحجتلي عنه طرت فرح واتوسلت تغير رايها وتجي وماقبلت

كالت مخلي ثلاجه صغيره وتلفزيون ملون وسنك وطباخ منضدي وميز وكاونتر صغير وهذا التجهيز مو شويه بوكت الحصار اغلب البيوت هيج يعني ماناقصني شي حتى تنور وقنينة مجهز وانه الحمدلله الحسنة الحصلتها من ام سمير بهالفترة اتعلمت كلشي منها شماجانت نيتها الله يرضا عليها دوم اكول خففت عني لو ظاله مااعرف اسوي كلشي ويالقهر الاشوفه جان بالضيم ظليت

..بيا شهر اتزوجتو الزواجة السعيدة احجيلي

ابتسمت بقهر على كلامي

..اتزوجت نهاية الشهر التاسع خطوبتي طولت عشرين يوم .. وهي شماشفت بيها سعيدة صدگ لأن ناتجها انت وعوض ربي جبير بيك

ابتسمتلها مهون عنها واتذكرت الايام الراحت

..اني هم عذبتچ ..هم شايله عليه بسبب السويته ندمانه لأن طاوعتيني لو لا

بذعر ردت

..لا لا اني اندم ابد يوم عيد يوم الشفتك جبير بي والك الراي ..بس الضوجني مو هذا.. الضوجني الصارلك بسببنا وياكل بروحي الهسه

..لاتبچين يمه اروحلچ فدوه لاتبچين والله هالدنيا هاي مابيها شي يضيگ خلگي غير ضيگ خلگج ولا اهتم البشر گد مااهتملچ شيحجون شيسوون مو مهم المهم انتِ راضية

..گلبي وربي راضين عليك

..الله يحفظچ يايمه ياحبيبتي انتِ ..زين احجيلي ابوي شلون چان يعاملچ من اول ماصرتي بذمته وليش ماعقدتي من اول زواجج

..ماعقدنا لأن چنت قاصر ويطلبون حضور ولي امري وباقيلي اشهر وادخل 18 بداية الثلاثة وتسعين بعد مااحتاج الا حضور ولي امر وطبعا هي جانت حيلة من امي حتى مايوصل خبر الاحد من اهلي او يدققون بسجلاتهم لأن ابوي وجدي متوفين بهالحالة ولي امري الحاكم الشرعي الي هو القاضي بس امي مارادت كل هالهوسة رادت اعقد عقد سيد وورقة العقد تتصدق على جنسيتي كبل باعتباري مو قاصر من الاساس

..وهاي غلطة كلفتج هواي

..الله يرحمها امي ماجانت واعية ولاتدري الدنيا وين ماخذتنا

..الله يرحمها خوفها جان يقودها وحقها اكيد بكل الخوف العاشته

..وبليلة زواجي لو تدري شنو اكثر شي جذبني

ضحكت من گلبي اريد اتوقع شنو الشي الجذبها وضحكتي زادت ورنت بحيطان البيت من گالت

..التلفزيون

..صدگ جذب يمه وابوي خلاچ تشوفين تلفزيون خاف جان مو هو خاف مبدلينه بعدين

..ابوك عشت وياه سنة تعادل عمر من حلاة ايامها اي ماجان هيج ابوك اتخبل من تالي ويمكن النا ذنب بخباله

..ذاك هو كلشي مابي وشخبله بصغري اتذكر ابوي مخلصها حفلات وونسة وجوبي ووين ماكو عرس حاضره دومه مطرب ومونس روحه ووراج اتزوج وگبلچ متزوج وعايش زمانه حجي متولي

..بس مارجع نفسه ..المهم خلاني اشوف على راحتي وعلمني عليه واني رحت فطيره ومطفيه بكلشي وعلمني كلشي على ايده وهذا الخلاه يتعلق بيه اكثر

جان مقنعني بالاسبوع يومين يروح يشوف اهله وذني اليومين امي تجي يمي وكبل لايجي تروح حتى غدا ماترضا تتغدا امي نفسها كلش عزيزة

يرجع ملهوف واتلكاه عروس ومشتاقتله حيل وكل حجايه ويكلي

عيونچ يابه والله سبني

..وتالي كره عيوني من وراهن

..تكرهه هدومه المسودن

..عليج الله لاتدعين بهاي .. هنه بس هدومه ساتراته خليهن عليه مالنا خلگه يتسودن فرد نوب

..سمعت يدورله مره هالأيام

..يامهبول ينطيه ..وشناقصه حرمتين عنده بس الندم ماكله ومايعرف شلون يعوض

..يظل يدور خيالي ومايلگاه وگتله تتندم على كلشي سويته بيه

.. لو يموت اظفر منچ مايحصل وخليه يندم هاي اذا عنده ضمير ع السواه بيج يعتزل الدنيا مو يدور نسوان ويعرس تايرتاح

..اي نكمل بذاك الوكت سألني شنو اكثر شي تتمنيه گتله ادرس خاص بعد ماعرفت هو معلم حسيت الله ودالياه رحمه لأن يعرف شگد مقهوره جي مااقرأ

علمني حرف حرف ويوميه بعد مايرجع يگعدني بحضنه على رجله ويمتحني وكل حرف اعرف اكتبه يبوس ايدي بيها وعيني

..واني اگول قرايتچ مال دراسة 12سنة مو مال مامداومه ابد طلعت الدراسة يمج بمستوى عالي وجهد استثنائي

..هههههه لا واني جنت افتقد الوجود الرجل بحياتي يعني اريد بس ارضيه وكلشي يكوله عندي قرار والدراسة اني اصلا احبها فچنت اجتهد اتصور اشنگ العجين اخط ع الطحين الي مخليته بالصينية الوث الشنگة بي الاحرف والمقاطع والكلمات وخو اسمه من كتبتبه عندي مسويه انجاز

..اي ليش لا دامه معلمچ ابوسه وحضنه حقچ شهلة خانم جان بشر طبيعي من حقج هيج تحسين

..اي والي صار من اول شهر حبلت بيك وطار من الفرح وقرر نحول العقد للمحكمة بس بوكتها انخبص وياخذه ليل ويجيبه ليل كال استعجل ابني هناك ونروح الأهلي ورغم صغر سني وقلة خبرتي بالحياة اكثر من مره اسأله ليش اهلك محد منهم اجه يگلي مشغولين والماعنده ام ماعنده اهل

هنا بديت اتعلم اكثر واتعود عليه واحبه صرت اموت عليه ويوميه احتار وينعگد الساني وي كل غزل وكلام حلوو يطريه وهو قاري كتب ويحب يقرا ويسمع غنا ويرتب كلام بس احلى كلام الچان يطلع من گلبه واحس بكلامه طالع من گلبه الگلبي

عيونه چانت تحجي گبل السانه

هذا غير الدلال ماخله شي بنفسي حتى زيارة الاهل البيت دخيلهم هو زورني وياه جربت اول شعور بكلشي حلوو

اول شعور بقراءة الاحرف وكتابتها اول شعور بالطلعة وايدي بأيد رجال مأمنه بي وماكو شي يخوفني

لامتنكبه لاخايفه لامستحية عايشة حياتي وامي هم شفتها مرتاحه رغم ابو سمير ماقبل يطلگها بس رجعت وي ام ايمان وعافت كلشي هناك وتجيني يومين بالاسبوع يروح بيهن ابراهيم هناك

وحتى بحملي ماتأذيت حملي بيك نسمة ماحسيت بثگل ابد الا بآخر اشهر لا لعبت نفسي ولاكرهت اكله وكلشي حبيت وهو ماقصر

وبيوم راح الاهله هناك واجه ملهوف حيل اول مافتحت الباب الي موصيني افتحه بس اله والامي حضني وگال

.. عيونچ ابويه شهالعيون التذبح انتِ شجابچ عليه؟

تدرين بهاليومين الي هناك النوم مانمته همت بالليل وتاليها شلون

..هو اني الك ليش تهيم

..الي وماتصيرين الغيري ادري بس شلون اتحمل بعدچ ايام

..فتره يكمل بنيانا ونشيل حتى انه والله مااكدر بدونك وخاطري يتكدر

ضحك على حجيي ورد وهو يضحك

..لعنة ابو شارب اليكدر خاطرچ ام الآنه انتِ تدرين بس منچ احب اسمعها هيچ تنگال

حضنته مااعرف اعبر مثله واحجي

..اني هم احب سوالفك ومااكدر ارد عليها

..بس سوالفي تحبيها ياحلوه

..لا كلك الي واحبك

حضني وفات وجنت طابخة التبسي اليحبه وي تمن عنبر ريحته تارسه البيت

والجو بارد صوبة علاء الدين بالغرفة وعليها كتلي ماي افوره اخدر منه جاي واكاسرله بي جايه يحب الچاي ثخين ومكاسر بماي حفظت كل تفاصيل يحبها واسويله كلشي بحب واشوفه واجبي دامه يحبني وموفرلي حياة كريمة جنت احلم بيها

اتغدينا وفتنا انام وغير رايه نهار الشتا قليل گال يصير المغرب حضريلي الحمام اغسل والنوم لاحگين عليه توه طب للحمام يغسل واندكت الباب

امي مستحيل تجي واليوم هو جاي منو يجينا هالوكت محد

حتى الجارات منعني اخذ وانطي وياهن كال كلها كم شهر ونشيل والناس مامعروفه شنو رغم العالم جانت بخير واحلى العلاقات علاقة الجورة بس مافرق عندي لأن امي هم جابت عمرها تخاف ومامصادقين احد ولامتعوده اصادق

حاجيته

..ابراهيم الباب تندك

..خليها لاتفتحينها اطلع واشوف

شويه وطلع صاح منو ومن الصوت الرد وگال صديق

اشرلي افوت واسد الباب

سديت الباب وظليت اتنوع من طرف بردة الهول

وذاك الاجه شايفته يمكن العسكري نفسه بس هالمره بغير شكل ولابس مدني هواي فرق بشكله

اتحاجو وشويه وزنگ ابوك من ياخته طبگه على الحايط يريد يخنگه بلاوعي صحت بس ماطلعت خفت

وهو من سمع صوتي دفعه حيل واشرله يطلع وياه بساع

بدل ع السريع وعيونه كلها شر ومخنوگ ورجع وصاني ماافتح الباب الاحد وكال ساعة واجيج

ماخلاني اطمن اكثر واوصيه طلعو وتأخر بدل الساعة تلاثة وانه اكل بروحي اكل حتى اول مره اعرف شنو يعني تقلصات وشنو تسوي من لزمتني لويه يومين وانطوني علاج الها حبوب للتقلصات

من رجع ماكال شي كال ابن عمي وعلمود الشغل اكو غلط بالحسابات سوء فهم وصححناه

بس خاف عليه لأن الرعبة صارت ابطني وخفت حيل عليك ماجنت ادري شبيه ولد لو بنيه بس من اول ماانزرعت ابطني اتعلگت بگلبي

..يابعد گلبي شهلة المزيونة ..وانتِ معلگه بالگلب والعين وكل الحواس هم ..كملي هذا الاجاكم عمي عاصم مو

..اي عاصم چان صديقه وابن عمه واقرب شخص اله والظاهر ناهيه من الزواج مني وابوك الي براسه يسويه

..هي هاي الشغلة بيه حلوه ومو حلوه

..اي وشسوه عاصم بعدين

..ظل ابوك شكد مايبين هو طبيعي بس القلق واضح عليه وچان ظني صدگ بشغله وبيوم گال بعد خلص نترك الاحرف والمقاطع واذا تكدرين وسباعية نقرا جرايد بعد ..اول يومين فشلت

وبعد جيته بيوم من اهله وجان ضايج ع اساس المواد الذابهن للبنيان تالفات من المطر ومقهور

من رجع من شغله القريب علينا حبيت افرحه وظليت اقرا

تانيته يفوت وبيدي الجريدة اقراها

بعده توه فتح الباب ركضتله وهو يضحك وفاتح ايده الي

.. عرفت اقرا والله عرفت

ضحك وباسني بگصتي وخلاني تحت جناحة

..شجاعة انتِ وقوية اقريلي اشوف

بديت اقرا واتلكأ بس فرق هواي جنت مااعرف هو علمني

وكل كلمه اقراها صحيح انباس

اندگت الباب مو دگه عادية الباب اتكسر وهدو علينا نسوان وازلام

اشرلي افوت اتبسمرت وهو فتح الباب ثواني وانسحلت من راسي وحده منهن هجمت علي

وهو شايب نبت عوجيته بصدره

بلحظتها جني بحلم مااعرف شني الصار ولا استوعب شكو بس هي جرها واحد عني واني احتاريت اريد استر روحي وهو يصيح

..عمي وخر عني مااريد ازعلك ..فوتي شهلة جوه فوتي لاتظلين هنا

مااتذكر شحجيت وصحت بس جلبت بلساني

..منو ذوله منو

عمري كله اتخيل من خوف امي تجينا ناس تهد علينا واحلم ايام اكعد مرعوبه احمد ربي محد واصلنا

هاليوم صار الخايفه منه جسمي صار ينفض ولبست عباتي وظليت وره الباب خاتله بخوف

افكر اسمع الغلط والفشار والتعيار ومامستوعبه هذا عليه وعلى ابوك

اجاني صوته وهو يسبهن ويصيح بيكم خير سكتوهن ونتفاهم ماانسى حرگة گلبه وصوته الي انبح وهو يصيح ويدافع ويحجي ومن استوعبت هو وحيد بينهم طلعت وريت ماطلعت

شفت اليصيحله عمي عم ابوك ابو عاكف وجد اخوانك

يتنوعلي بنظرة رخص واستحقار يبتسم بتك خد مستهزأ ويكول

..من يا خان جبتها

..مامسموح الاحد يقلل منها هذه مرتي

..حرمتك بت عمك تجيب عليها وحده بلا اصل ياناقص

..بت عمي على عيني وعلى راسي انت من انطيتها الي وكتلك لاهاويها ولا هاويتني گتلي هي تعيش وياك وتحبك وانت گلبك عندك والي تريدها ثنيها كلت لو لا

..مو شروگية من الكراجات تخليها على راس بنتي ياسافل

..شبيها الشروگية تاجها نحاس وتاج بنتك مرصع ياعمي عوف هالكلام وخلينا نتفاهم اني ماماخذها بسر مبلغ ابوي ومارضا يمشيلي وكال بيك خير اخذها واخذتها

..گلك هيج ابوك لأن متأكد الشروگ الأصيل البيهم ماينطي لمگطم ماله اب يحضر خطبته ويتعهد الاهلها بيه

..هالأمور مادخلك بيها ولا من حق اي شخص يقلل من حرمتي

بهالساعة شصار بيه يمكن ضغطي صفر لأن الرجفة الرجفتها والنار الي اشتعلت بگلبي شگد مااحجي عنها مااوصفها

مرته تغلط وتحجي وتسب كلامها مااستوعبت منه شي طلعو وانه على وگفتي ولافه عباتي عليه وارجف حتى تيهت منين ادخل وشلون اگعد بهاللحظة ماردت غير امي امي وبس وكل ظني امي مثلي مضحوك عليها

نحبت بصوت عالي اريد امي مثل طفلة وتايهه

اجه شكد راد يحجي وياي يتفاهم وحلفلي امي تدري وهي الماقبلت ابلغچ واكلج انت ثانية ماصدگته الحد ماراح جابها بيده وطلع وخلانا الوحدنا ومن گالتلي امي ادري وانه المصلحتچ ماگتلچ

لطمت لطم بس الله يدري بي رغم لا لاطمه ولا اعرف بس وجهي خدر گد مادگيت عليه من حيرتي وقهري مااعرف شسوي نار اشتعلت مو بس بگلبي

حتى جسمي ورث نار

وذبيت قهري بأمي

..مااريدج اتظلين يمي المن باقية خايفه عليه عود خوفج كله جذب انتِ ماعولتي تخلصين مني گامو يعيروه بيه يكلوله من ياخان جبتها لو عدها اهل ماينطوك بدون اهلك مايدرون اني ماادري بي متزوج مايدرون ماادري بالمشية شلون تصير وشروطها وليش لازم كلها تحضر

وهم ماجايين ماراضين بس خاله مطابكه

ادك على وجهي بقهر ملخت شعري وكتلها اذا ظليتي يمي اموت روحي والله

هسه ترحين منين مااجيتي رجعي الغرفتج مرتاحه من همي خليني انه بقهري وضيمي رجلي متزوج وماادري

مو حرام عليج ماكلتي بنتي ماتتحمل تشوفه بحضن غيرها شلون اجه ابالج تزوجيني المتزوج انتي مو متندمه على زواجج المو حقيقي من ابو سمير وكلتي خربت بيته شلون تخربين بيت ثاني ومرته شابه بعدهي

هيج انه ماهمج ماشلتيني وديتيني العمامي يكتلوني احسن

شكد رادت تحتويني بجت باست ابد وكفتلها وكفه بالباب اتخبلت مدري شجاني عمت عيني طردتها وقفلت عليه الباب ساعة واجه هو دگ الباب حجه راد قفلت حاجيته من وره الباب

..روح الحگ اهلك ومرتك لاتظل يمي مااريدك بعد تضحك عليه انت وامي مو حرام عليك ليش خليتني احبك ليش

ومثل الواحد وصحاني كمت ابجي بخبال اصرخ واملخ بروحي

..جنت تروحلها اليومين التروح بيهن تروح الها

اتخبلت وهو يريد بس افتح الباب ماافتحه اخر شي كسر باب المطبخ ومد ايده فتح السرگي من الداخل اجاني لاف ايده تكت دم مجروحه بالكزاز

اني كارهته وهو عاف جرح ايده واتخبل يلزم وجهي وايدي رفع ثوبي يشوف رجلي

..يولي شصاير بيج جسمچ شبي

وجهي منا متحسس وما حاسه ومنا من الطگ عليه شصاير بيه انصدم شاف عيوني مورمه اتخبل جتف اديني الحد ماتعبت وهدأت واصر ياخذني للمستوصف بهالليل طاوعته من خوفني گال حملج يروح منج

بالبداية كلت خل يروح انوب خفت عليه حيل هو شحصلت من الدنيا اني غيره حتى امي طلعت ماتحبني لو تحبني ماسوت بيه هيج

اخذني للطوارئ انطوني علاج تحسس وطلعت شربته گوه ماماكله شي وغفيت واني اشهگ الليل كله افز وارجع انام مدري شلون تنسحب روحي كوه مني للنعاس اريد ابعده وهو محاوطني وكل شويه بايسني ويعتذر سولف هواي سوالف ماجمعت منهن وحده گعدت مااكدر ارفع راسي محضرلي حليب حار وبيضة مسلوگه شربت بس الحليب وگمت بعد ماگال كعدي نسولف

سولف هواي عن حبه الاعرفه والماعرفه عن عقله السلبته عيوني وهواي حجه مادخل منهن بمخي حجايه وحده

بس شسوي هو مو وحده مقشمرني امي وياه وهي الاساس بعيشة الوهم العشتها

ظل يوعدني ويحلف مايفرق شي كلها شهرين ونشيل ويوم يمج ويوم يمها اتنوعتله بيأس وحزن جن الدنيا طابكه سماها وارضها عليه

رفع وجهي يبوس بعيني

..لاتنكسر نظرتهن هيج والله ادللج والله احبج

..انت تدري شكد حذرتني من الجذب وكتلي اكرهه والي يجذب علي بيوم مااغفرله لو ابوي شلون كلبك يهون عليك توصيني بشي انت مخالفه

انت تدري اني كمت احجيلك حتى بالفكرة البعدها ابالي تدري اني مكشوفه الك ليش هيج تعشمني وتغشني ليش

..مايتغير شي اني الج والله الج

..لا مو الي والله مو الي انت واقعك الاهلك ومرتك وعايش وياي بالوهم

صفن لحظات ماحجه شي كرفص گبالي وسحب اديني باسها

..لاتسوين بروحج هيج واذا متزوج شراح تأثر عليج تدرين ماشايف غيرج اني

..ومرتك شني ذنبها

..مااقصر وياها بشي

..انت تريدني اموت بقهري

..والله محد راح يموت غيري شنو اليرضيج احجيلي

ارد اكله اطلكني بس وين اروح امي الانطتني بهيج زواج وانه بنيه تتحمل ظروفي ردود وياي طفل اني جرت عليها بس هي انجبرت وارجع اكول قصرت بزواجي لو مصارحتني بس

..احجيلي لاتسكتين الترديه شنو يجرالچ

بعجز بچيت

..تظل تحبني تخاف عليه ادافعلي منهم ومن الناس

..مااعوفچ والله وياج العمر كله

وهو يحجي اندكت الباب وهالمره اهله واخوته ماطلعت بس صرت افور ع الرزايل الي اترزلها والاهانة الحسيت بيها وهم يشككون باصلي وفصلي ونسبي هم اصلا مشكلتهم ميحبون ياخذون الا من ناسهم

ويكرهون الزواج من مناطقنا عدهم عنصرية بهالموضوع انوب اجيتهم اني

يسأله ابوه وخوانه اهلها وين يكلهم

..ميتين

منين اخذتها

..من امها ورجلها

..رجل امها هو مربيها يعرف عمامها نسأل عنهم

وجوابه

واتعددت الاسئلة بهالخصوص وكلها

..لا ..لا ..لا

وحده تتبع الثانية كلهم نهروه صاحوني افوت مافتت الا من صاحني هو

جدك بوكتها جان وجهه دم ينگط مقهور وعيونه تنگط شرار والبقية ماتنوعتلهم اصلا بالأخير من شاف شكلي ظني مكتولة تفل على ابنه وكال روحي عمي حجينا مو وياج

وهنا الي صار السيارة انسحبت وانوخذت منه التجارة كلها الحسابات كلشي جوه ايده انسحب وابوه بلغه الك بس هالشهر تكمله وتجي البيتك تكعد بي حتى لو تكمل بناءه بعدين

المهم ماتظل هنا بعد

اني شحجي شأكول كمت مااعرف شني الانقهر عليه اكثر شني اليوجعني اكثر اروح وياه لو ارجع الامي احاجيها لو اظل بزعل

اتحمل اشوفها هناك لو راحلها شيصير بيه وهواي امور بهالشهر هذا هو انشغل ومااهتم الكلشي راح منه كل همه نروح ونستقر كال صالحي امج حرام عليج تقاطعيها رادت مصلحتج مو اكثر

وداني الها بهالفتره نزل وزني نزله امي من شافتني بجت واخترعت عليه ولكيتها هي هم شابعة قهر ومشكل وياها سكر من قهري ماريحتها ابد

ماوگفت على هاي لهنا وكافي عود واخلص لا امك ماتخلص طلايبها وي الدنا

طول اليوم امي تريد تحجي وتتردد اخر شي كالتلي اليوم انتي تباتين يمي اني اتفقت وي ابراهيم يخليج يمي رغم هي مارادت تكلي راح لهناك الاهله ومرته بس هو واضح هيج رجع جسمي طگگ من القهر الغيرة موت بطيئ ينهش بالروح

لا اخذت علاج ولا سويت شي وهي تريد تحجي وبطلت

ظلت الليل كله تصبر بيه وتسولفلي قصص اشكال ماكو قصة خشت مخي بس اني اتعودت ع الواقع واقعية مايوم حلمت بشي خارج واقعي ودوم انتكالي على ربي حاولت انتكل على الله واطلب الصبر بس

ثاني يوم هم ظليت وثالث يوم كالت اريد احجيلج شي خاف تعرفينه من غيري حاچيتها

..شنو يمه احجيلي شضامه بعد

نريد نسولف واجاني هو اخذني

وظل بالي بالضامته امي

اسبوع وشلنا امي ودعتني وماحجت شي اتعذرت بابو سمير مطلك وخلصت سالفتهم

الطريق من الحلة لليوسفية مو طويل حيل بس كل صفنة بي تاخذني المدري وين خوف وقلق واحتا محملين مو بس غراض محملين هم وقهر وكل واحد منا همه شكل

ومن اول يوم شفت اشكال

اول طبتنا وفتحنا الباب واستقرينا البيت مرتب ومنظف ومجهز ورغم من الحايط اشكال غلط ودعاوي سمعت بس كلشي بيه طافي مالي خلك حتى الحجاية

بعد ساعة اجه اخوه الجبير وجان كلش ابوك يهابه حاجاه بره بالحوش كلمة وحده كالها گلبت حياتي كلاب وفتحت عليه بيبان من النار جنت اجهلها

گله

..ومنو يگول قصتهن حقيقة ومامضحوك عليك انت شتعرف من اصلهن من فصلهن

هالكلمة هاي فتحت عليه قهر السنين لأن جانت مثل محراث التنور الي يهيج النار هيجت كل شكوك ابوك واكتشف بعدها كوارث بالنسبة الي واله

الموقف الخلاني بعد سنين من العذاب اذكر عمك بي وكتله انت صاحب بنات ماخفت من خطيتي ماتخطيك ترا وبعدها عرفو ضيمي وي ابوك شنو

..وهذا السبب الخلاه يكون مسؤول عليه ويكفر عن ذنبه رغم هو مو ذنب اني اشوف اي اخ ينصح اخوه يحجيها هالحجاية بس ابوي مو بس هالكلمة ظل عاصم يحفر هم وهو السبب بالصارله

..عاصم هم الله چواه وخلاه علچ بحلوك ربعه اليدورون الزلة ..بس عمك كتلك جان بوابة للشك لأن بس طلع ابوك اجه يسأل عن عمامي يريد يواصلهم من كتله احنا شاردين منهم ونخاف نوصلهم صفن متعجب كال لأن ناهين عليچ لو غير شي لأن الكتل ابوج انلزم وطلعو خارجين عن القانون المانعكم شنو

ومن كتله اخواني انكتلو واحنا شردنا بالليل اتعجب وثاني يوك رجع للحلة

...

اتنهدت امي بتعب اني وتعبت هي شلون حاجيتها مهون

..ايام وراحت شهلة المزيونة يرحولج فدوه الرضو والمارضو الحجو والماحجو بيهم خير خل يجنون نسوان مثلج مو لاعبات لعب بيهم ابراهيم هو الخسرچ ترى وظال يدور شبيهه الچ ومايلگه انتِ قالبچ منج وانكسر حتى اشباه الج ماكو

ضحكت بتعب

..ترخصني يمه اروح انام ونكمل بعدين

..غالية يمه نوم الهنا

مانمت وظليت ابحث بتليفوني بمجال اختصاصي

ثاني يوم ماداومت عطلة حاجيت عمي سليمان ناخذ مهيب اول مايرجع من خفارته نروح نرجع مرته ونحلها

ولكينا الجهال متحضرين بالباب وجنطها بالحوش يم الباب مايحتاج نسولف اصلا هي راجعة واول ماشفت فرسان اشرتله ع الجنط هز ايده ماراضي

ضحكت ومهيب ياشرلي اغلس مااهيجه

حتى سوالف ماسولفنا عمي ظل ينصحه عينه على مرته واطفاله والمرأه تريد احتواء والسان حلوو وعاملها بمايرضي الله ومن هالسوالف وكلنا ايدناه

فرسان بحرشة كال

عمي سليمان وصخر تضمنون مهيب يبطل سوالفه وماتجي شكاوي منه

گتله

..شيتنفس ابو ايهم طالبه بموت انت

ضحك عمي بصوت عالي ومهيب يتحلفلنا

طلعنا وعفناه يم نسابته يرجع وي مرته حاجيت عمي ياخذ غزالة ورشا الاربيل هم سفره وهم علاج حس هي طالبه مني تاماتروح خالتها وظل حاير ويسأل

..هاي يظلن هيج متنحسات من بعضهن العمر كله

..مو هيج بس الطرفين يغارن عليك

..لا مو بس غيره ..خالتهن مره بتعاملها نظامية حيل وصارمة عكس امهن وهنه يشوفن الغريبة التاخذ مكان امهن احسن من القريبة ..شوف يمكن لو ولد مايهتمون بس لأن بنات اني اعذرهن

صفنت شويه ورديت

..لا والله الأم ام مالها علاقة ولد لو بنت اني الدنيا كلها ماتغنيني عن امي

..الله يحفظها الك امك اصيلة

..الله يسلمك عمي ..عزام هم حاجاك مايرد عليه السافل

..عزام موديه ابوك هو وكمال يجيبون اخوك الهيبة الجبير من دياحته بأربيل

..طاح حظه مامنه نفع هذا ابوي هو الخبله ليش ضايج عليه هسه مو جان يدلل بي كيد بيه خل يبلع من دلاله

..ابوك كل تصرفاته غلط ويعالج الغلط بغلط الهسه تايه

..سمعت يريد يخطب ويقبط الرحلة للجنة الله شاهد جن عيني تشوفه ابوي ينحشر كتفه مايل ولو بينه وبين الجنة ذنبي وذنب امي ماابريه ولا اخليها تبريه

..لاتحقد هيج عمي الحقد مو زين

..والعشناه قبل زين برايك ليش قبل الهسه هو يشوفني اذا ماسبني وهاني

بصغري جنت اتحسر عل كلمه وحده منه احلم حلم يصيحني يحضني يعاملني معاملة اخواني اصفن عليه اشتاقله والله

هو شيفهم صفنتي يفهمها استفزاز ووكاحة وظل كل ماشافني يكلي نزل عينك الحد ماعفى گلبي منه ومااكتفى لمن ملاه غل

..اذكر الله حبيبي شبيك شو مشحون مو مثل كل مره

..ماكو شي سوالف اجت ابالي واعتذر منك غثيتك

..لا ماانغث منك بس لاتصدك ابوك مرتاح ابوك الله محاسبه بالدنيا هذا هو وعاصم جابو الهم والندم بديهم وماعرفو يتصرفون ظلمو وطغو والندم وي الطغيان يجر الندم اكبر يكابرون وهم مسحولين وساحلين نفسهم

سكتت وصحيح هم مامرتاحين ابد وفعلا من اديهم

وصلته للبيت واتصل بيه خالد ابن عمي قادر يريدني الحكهم للبستان طالعين بوصية من جدي نتعاون تحضيرهن للموسم القادم خلص موسم حصاد السنة ولازم نحرث الكاع ونرش سماد

لكيت فرسان واخوانه ومهيب طالع منها بحجة مرجع حرمته

وخالد واخوانه ومن اخواني بس حمزة وعبد الإله

حمزة يرتب بصناديگ التفاح الخشب الفارغة تانرجعهن للمخزن بديت ارش السماد وياهم

وبت عبد الإله تلعب جوه رجلينا هي وجهال الولد يخربون مايعمرون

صاح حمزة ماتصيحون بيهم نريد نخلص وذوله ماخذينها ونسه

..ياما اخذناها لعب وخربنا خلي الجهال

بنت عبد الإله يصيحولها فراوله وابوها مسميها ليان

حتى ماتلوگ وي اسمه

صحتها الاعبها وشفت عمي عاصم وابوي من بعيد يتمشون غنيتلها موال

وبطلي من اللعب لا لا لعبچ مرد دلالي

حمزة اندمج وصاح

للا للا لو لو

كملت وياه

امشي اعليج داحي الباب عني ابد لاترحين

احبچ والجفه اذاني

التمو عليه كلهم الي مترب والي بصناديكه يتمايل والي بيده السماد وحمزة بطگ اصبع يلحن وهم وياه

للا للا لو لو لا لا ولك من علمك

..يالسايگ ضعون الولف ريض بالضعون

بالله ارد انشدك هالضعن وين اهله يردون

للا للا لو لا لا ولك من علمك رگص الهچع

هم يلحنون ويتمايلون وفرسان وگف يمي

..شوكت تبطل خباثة صخر الاشهل شوف الدخانه الوراك لو احنا رايدين ومحلفينك تغني ماغنيت

هو يسولف وابوي كال

..خوش لمة.. كاولية صرتو ابوي من وداكم بشغل مايدري بملهي الرعيان وياكم

گلت بصوت عالي

..بيت الطرب ماخرب متعلمين الكيف منكم انت وعمنا الثگيل عاصم

عمي عاصم ضحك اجانا يتمشى

..ماكملت لنعل شارب ابيك .. ابوك هم صاير نكدي مو الاولي مو جنا متونسين ونسب بخوالك من ذيج الصفحة خلفولنا علل نموت وماتموت عللنا بكلوبنا

..ابتلو بيكم هم وبناتهم ذيج الصفحة مايحتاج تسبون

..يتبع