رواية هواك يا أميري الفصل الثالث 3 بقلم سولييه نصار
الفصل الثالث(خُدعة ومهارة )
لكِ حبي وحياتي
.......
رمشت راوية وهي تنظر إليه وهمست بصدمة ؛
-بتقول مين ؟!
-ندى يا ماما ....
-ندى طليقة عمار ؟!
قالتها بإستجهان ... ابتلعت منار ريقها وهي تجد شقيقها عدل من عويناته بتوتر ...كان تلك حركة ملازمة له يفعلها عندما يخجل أو يتوتر بشدة ......
-وفيها ايه بس يا راوية ؟!
قالها عز بلطف وهو يرى توتر ابنه ...
نظرت راوية إليه وقالت بحزم :
-بس أنت ...متتكلمش. ...
ثم نظرت إلى ماهر وقالت:
-أنا شغالة اترجاك تتجوز وبجبلك بنات زي الورد وانت في الاخر عايز تتجوز واحدة مطلقة وقبلها ...قبلها ..
صمتت بغضب لينظر إليها ماهر ويقول :
-اللي حصل لندى مش بإيديها ...مينفعش نلوم الضحية ...حضرتك ست وعارفة قد ايه الموضوع ده صعب عليها ......
أغمضت عينيها بقوة ثم فتحتهما مرة أخرى وهي تقول :
-أكيد أنا مش بعاير بوضعها ربنا معاها ...بس دي واحدة مطلقة ...وانت متجوزتش قبل كده ودكتور قولي ليه يا ابني ترمي نفسك الرمية دي ....
-مش رمية ولا حاجة ...أنا بحبها يا ماما ...بحبها أووي وهي الإنسانة اللي أنا عايزها ببساطة من غير تعقيد ...عايزها فهتجوزها ...كونها مطلقة أنا مش مهتم .
تنفست راوية بعنف ...تعرف ابنها وكم هو عنيد. ....هي ليس لديها شئ ضد ندى ولكنها ام تريد لأبنها الشئ الافضل ....الشخص الافضل له وندى ليست هكذا ..تلك الفتاة تُعاني بسبب ما حدث ولن يرتاح ماهر معها ....
-طيب ماشي اتجوزها بس بشرط ...
نظر إليها بصبر وهو يعرف أن شرطه لن يعجبه أكملت هي :
-تتجوز واحدة من اختياري وبعدها اتجوز اللي تتجوزها ....
هز ماهر رأسه بيأس وقال:
-ماما ...أنا بحب ندى ...ندى وبس ...اتجوز واحدة تانية واظلمها ليه ....
-هو الجواز حب بس ...
قالتها راوية بضيق فرد:
-لا طبعا بس فيه مشاعر لازم تكون موجودة أنا مقدرش اشتت نفسي بين اتنين ...أنا عايز اتجوزها ...جربت مرتين مع غيرها ومنفعش ...
-انا قولت اللي عندي ...
قالتها راوية ثم تركته وذهبت غاضبة....
ربت عز على كتف ماهر وقال :
-متقلقش أنا هكلمها وأقنعها....
ثم تركه وذهب خلف راوية ...
تنهد ماهر لتسحبه منار ناحية غرفته وتقول ؛
-كنت فاكرة انك مش هتتكلم بجد ..صدمتني يا ماهر ....
جلس ماهر على الأريكة بغرفته وقال :
-كنتِ عارفة من امتى،؟! ...
جلست منار وقالت بإبتسامة فخورة :
-حزر فزر ...
-تفتكري حبيتها من امتى ؟!
قالها ماهر لمنار شقيقته ...فابتسمت منار وقالت :
-تقريباً أنا اول واحدة اكتشفت كده في فرح عمار ومريم كنت بتبصلها اووي ...بس ساعتها خوفت اتكلم عشان ماما ....
هز ماهر رأسه بالنفي وقال :
-لا أنا في الوقت ده قررت أظهر حبي ليها ....ده الوقت اللي اعترفت لنفسي اني بحبها بعد ما أنكرت مليون مرة ...سنين وانا بحارب دقات قلبي وبقنع نفسي أنها مش ليا ..
نهض وهو يقترب من خزانته ..يخرج صندوق صغير ....ثم أخرج المفاتيح من جيبه وفتحه ....ابتسم وهو يمسك الورقة الكبيرة التي عليها رسمة لرجل قريب نسبياً من ملامحه ثم قدمها لمنار ..
-كنت وقتها في الامتياز اتعرفت على عمار كان في السنة الأولى فى الكلية ...كنت بزوره احياناً في بيته ...بس كتير كنا بنروح بيت عمه عشان نتجمع أنا وهو وياسين ...
كنت بلمحها كذا مرة بتبص علينا كانت تقريبا عندها ١٥او ١٦ سنة ...كان أول مرة مسيطرش على عيني ...عينيا مكانتش بتسمع أوامر عقلي زي ما قلبي مسمعش الأوامر وحبها ...وفي كل مرة كنت اشوفها مع عمار كنت بصارع قلبي ميدقش ليها ولا عيني تبص عليها. ..وكنت بخسر واحتقر نفسي لاني بحلم بحاجة مش ليا ....ودلوقتي دي الفرصة الوحيدة يا منار أنا عايزها. ..ومستعد استناها
أمسكت منار الورقة وابتسمت وهي تقول :
-هي اللي رسمتك صح ؟!
هز رأسه وابتسم بفخر وقال :
-أصلي كنت اول كراش ليها ..
ابتسمت منار له وقالت :
-طيب هتعمل ايه ...
هز كتفه وقال :
-هعمل ايه يعني ؟!هتجوزها.
ابتسمت منار وقالت :
-لو احتاجت اي مساعدة قولي .
ابتسم له وقال :
-منحرمش يا أختي العزيزة ..
......
-يا راوية دي سعادة ابنك ....مادام عايزها خلاص سيبيه يتجوزها ..
قالها عز فصرخت راوية :
-أنت ناوي تجنني انت وابنك ...هو ماهر ناقص ايه عشان ياخد مطلقة ؟!.
-يعني هي المطلقة ناقصة ايه يا راوية وبعدين ندى اتظلمت كتير وبنت رقيقة ومحترمة وابنك بيحبها....وافقي عشان ابنك ...
-لا يعني لا ...
-استعنا بالحُنين ...
همس بها عز ثم اقترب منها وقد رسم علامات الحزن بمهارة وقال :
-يعني يا راوية عايزة تكسري سعادة ابنك ...مش عارفة ماهر لو منفذتيش اللي عايزاه هيزعل وهو حمال قاسية يعني مش هيرضى يتكلم ولا يلومك وهيتجه لسكة المخدرات ويبقى مُدمن ويهرب من البيت ويلم زبالة من الشارع...عايزة ابنك يلم زبالة من الشارع يا راوية ...
-يالهووي يا ابني لا طبعاً...تف من بوقك يا راجل ...
قالتها وهي تضع كفها على صدرها ليقول ببساطة :
-ده اللي هيحصله بالضبط لما أنتِ ترفضي تجوزيه اللي عايزها ...
-لا لا خلاص يا اخويا ..خليه يتجوزها ...يا حبيبي يا ابني ...أنا عارفاه حساس وممكن يكتئب ...
يتبع
