رواية بنت النصاب الفصل الثاني 2 بقلم جمانة السعيدي
رحمه....الشك دخل قلب ساره لان هيا اصلا تعرف بابا
بدت تراقبه وتسئل ورا
تريد تعرف وين المكان الي يشتغل بي
تريد تتأكد من كلامه
اما بابا ماكو بعقله غير يريد يدبر اي مبلغ ويروح يلعب
ااكيد راح يحالفه الحظ
مو معقول يخسر كلشي
يمكن هلمره تظبط وياا ويحصل فلوس هواي ويكدر يعوض
خسارته
كلما تسئل اي احد عن شغل بابا
يكول مااعرف شنو يشتغل
بليله رجع متأخر هلمره رجع الساعه ثنتين بليل
ساره بعدها كاعده ما نايمه
انتضرت يصعد فوك بس ما صعد مثل كل يوم
نزلت تتسحب على كيف
تمشي على أطراف اصابعها سمعته جاي يتعارك
وياا اخو جاسم
او مو عركه نقاش حاد
جاسم منفعل علي ويكووول
جاسم...انت يمتى تبطل سوالفك هاي بابا جوز من القمار
ضيعت عمرك وضيعت فلوس الذهب
ليش ما فتحت بيهن المشروع
إلى متى راح تبقى هيج حياتك مخربطه وبدون هدف
يله هسه شراح تكول الساره
خلدون....بس هلمره انطيني اي مبلغ واني راح العب واعوض كلشي
انت ليش ماصدكني
جاسم...منيين اجيبلك هو اني بطرك اليوميه
لو عندي فلوس جان ازوجت وصلت للخمسه وعشرين
وبعدني انام بلهول
خلدون...جيبلي من اي أحد واني راح ارجعهن
احلفلك اني راح ارجعهن هيه لعبت حظ مره وحده
وراح اعوض كلشي
جاسم..ماعندي بطل بطل لعب قمار بطل كافي
وهنا ساره اتأكد ذهبها راح على لعبة قمار
وخلدون جان يضحك عليها
دخلت عليهم وكامت تعيط بصوت عالي
هيا متقصده تربد كل الي بلبيت يكعدون ويسمعون
مصيبتها
الصراحه هاي مو اول مشكله هيا وبابا طول اربع سنوات مشاكل اتحملته هواي على أمل ينصلح حاله
والخاطر بتها بس ماكو فايده
الاعوج مستحيل ينعدل
هلمره هاي المشكله هيه القشه الي قسمت ضهر البعير
دخلت على بابا وعمي وهيه تعيط بصوت عالي
ساره....ذهبي راح ذهبي راح على القمار
الله لايوفقك شلون تلعب قمار وتكول اشتغل
يبوووي يبوووي تضحك عليه
خلدون...اش اش ابوي نايم
ساره...ابوك نايم اني اريد اكعد الناس كلها ابوك وامك
لحكو عليه ضاع ذهبي بلعب القمار
ضحك عليه وأخذ ذهبي حتى يلعب بي
كالي اشتغل وصدكته
جمانه السعيدي
رحمه...فعلا كعد جدي وبيبي وعمي الزغير على صوت عياطها
جدي...شكووو شنو هذا الصوت
ساره...الحك عليه عمووو الحك خلدون اخذ ذهبي لعب بي قمار وخسره
اني اريد ذهبي كامل ولله اروح اشتكي عليكم
اني تنصب عليه رجع ذهبي لو اسويها سوده ومصخمه عليك
جدي...صدك هذا ااكلام
رحمه...دنك ابوي وكال لا جذب دخلت مشروع وخسر
ساره...جذب ولله جذب اسئل جاسم
جدي...وين هذا المشروع اروح اسئل عنه اريد اعرف شلون خسر
خلدون...اهووو انتم ليش تدخلون بيني وبين زوجتي
ساره...اي زوجتك زوجتك الي ضحكت عليها
اني اعرف انت نصاب من زمان بس تنصب عليه اني مستحيل اصدك
جدي...ترجع الذهب غصبا ماعليك فهمت لو لا
خلدون...كتلكم مشروع وخسر منيين اجيب
بعدين النسوان توكف ويا زوجها وتسنده حتى ينجح
وهيه سوتها هوسه علمود الذهب
جدي.. ترجع الذهب وانت ممنون
النسوان تسند الزلم لمن يكون براسهم خير
مو يضيعون فلوسهم بلعب القمار
ساره....اني اروح البيت اهلي وعندي اب واخوان
ياخذولي حقي
جدي...اصبري عمو واني اجيبلج حقج
ساره...دقيقه مابقى اذا ما الذهب يرجع
صعدت ساره الغرفتها لمت ملابسها وملابس حنيين
وجدي بقى يحجي ويغلط على بابا
انت مابيك خير
عبالي ادمي وجبتلك بت اخوي تسوه راسك
انت ما منك فايده
اذا اطلكت ساره تطلع من هذا البيت
شلون راح اشوف وجه اخوي اذا اطلكت بته
لا فوكاها مضيع فلوس الذهب على القمار
يمتى تنعدل
يمتى يصير براسك خير فشلت ويا التاس كلها
العركه استمرت الاذان الصبح
وساره نزلت جنطها ونزلت حنيين نايمه
ومصممه تروح بيت اهلها وتكبر الموضوع
جدي...خل الصبح يطلع عمووو عيب تطلعين هيج وكت
ساره...لا اروح هسه مابقى دقيقه
جدي...بابا جاسم وصل ساره بيت اهلها وتعال وراي للمطعم
طلع جاسم ااجر تكسي وأخذ ساره بيت اهلها
وجدي وعمي الزغير طلعو للمطعم
وابوي صعد نام بغرفته ولا كأنما ااكو شي
ومنا بدت الحرب بين اهل بابا وبيت عمهم اهل ساره
ابو ساره مصمم الذهب يرجع
وساره مصممه على الطلاك
وجدي ماعنده اي حل لان بابا غلطان
اشتكت ساره على بابا
رفعت علي قضيتين ووحده طلاك ووحده اطالب يرجع الها ذهبها
تعرفون هيج قضيا تستمر اشهر بلمحكمه
جدي كان محرج جدا من الموقف الي انفرض علي
حتى جدي لا يخسر اخووووو قرر هو الي يرجع
فلوس الذهب الساره
رغم هذا ساره قررت تطلك وبعد مستحيل ترجع
لان تعرف بابا مستحيل يتغير ابد
رغم جدي وبيبي شكد دزو عليها ناس حتى ترجع
بس ماقبلت
انسانه حكيمه تفتهم كدرت تعرف من عشرة اربع سنوات
ابوي مستحيل ينصلح حاله
واذا بقت ويااا راح تدمر نفسيا وماديا
جمانه السعيدي
اطلكت ساره من ابن عمها خلدون
اما بابا جدي قاطعه ومايقبل يحجي ويااا
بقا بابا بلبيت
مايقبل يشتغل اي شغل يريد يلعب قمار ويصير مليونير بين يوم وليله
الشيطان يكله هاي اسرع طريقه تصير بيها ملويونير
وما تحتاج احد
محتاج ضربة حظ وحده
وتصير أغنى من أهلك كلهم
جماعته الي يلعبون وياااااا يطلبونه فلوس
كل شويه جاي علي واحد يطلبه فلوس
يدك الباب اريد خلدون
يختل بلبيت ويكول كوولو مو هنا
بعد كم شهر وكف الحال ويا كلش قرر يروح البغداد يشتغل
هو بلحقيقه مو ميت على الشغل
بس يريد يخلص من الديانه لان اهله بدو يضوجون
من الناس الي تجي عليهم
راح بابا البغداد ونكطعت اخباره
جدي كان فرحان لان خلص منه ومن مشاكله
بس بيبي تبجي علي
اشتغل ااكثر من شغله بس بلاخير ينهزم
بعد ما يخون الامانه
كلما يشتغل بشغله لازم يمد ايده على فلوس الناس
لو يقشمرهم ويطفر
اول شغله شاف مطعم محتاج شيف
كاللهم اني اسطه ومحد يشتغل شغلي
بمحافظتي جنت اكبر كببجي والناس تجي علمودي
بس صار خلاف بيني وبين الوالد وعفت الشغل
قررو يجربونه بما ان اشتغل سنيين بمطعم جدي
عنده خبره اشتغل يومين شغل يخبل
اتعجبو بشغله
هااا وكان يبات بلمطعم
هو شرط عليهم يبات بلمطعم لان ماعنده مكان يبات بي
ثالث يوم كاللهم اريد الراتب مقدم
راتب شهرين
اريد ادز مصرف الزوجتي وبنتي واني باقي هنا قابل وين اروح اشتغل وابات هنا
مجرد مااستلم الراتب
ثاني يوم مالكو ماخذ الفلوس ومهزوم
بعدين اشتغل محاسب بمخزن طحين
مااعرف عنده طريقه عجيبه يقنع الناس ويضحك عليهم
اشتغل اسبوع لمن امنو بي باك الدخل مال يوم كامل ونهزم منهم
ااكيد اشتكو علي وعممو بياناته
بس وين يلكو يغير المنطقه الي يشتغل بيها
من بعدها اشتغل بمعمل البان
بقا يفكر شلون يصيد صيدته وينهزم
صادق ابن صاحب المعمل
طلعات وسهرات ويكرم وينطي وانت صرت اخوي
الحد ما الولد اامن بي
بابا طلب سيارته يطلع بيها يخلص شغله
هذا الموضوع تكرر ااكثر من مره
الحد ما طلع بيها اخر مره واختفى هو والسياره
راح باعها تفصيخ واستلم فلوسها
عبالك فص ملح وذاب
طبعا انتم اذا شفتو مستحيل تتخيلون هذا نصاب
شكله حلو ناعم بلكلام لبق مرن
كريم بشكل مو معقول اذا ابو التكسي طلب ٥ ينطي عشره
الي يمشي ويا ويعاشره مستحيل يتخيل هذا نصاب
لو محتال
محترف جذب حيال درجه اولى
بقا يتنقل من شغله الشغله
بس شنو الشغله قبل لا يدخلها يشوف شكد راح يستفاد منها
وكل فلس يحصله يركض يلعب بي قمار
على أمل تصدف ويا ويصير غني
يعني فلوس حرام تروح للحرام
غاب لمدت اتلث سنوات عندي اهله وهو متغرب وبعيد
وما يسئل عن اهله
خلص هاي السنوات كلهن نصب احتيال وسرقه
من بعدها
الشرطه بغداد كلها ادور علي
هلكد ما علي بلاغات
صار معروف بدوائر الدوله
مايكدر يطلع ولا يشتغل خاف يلزمو
قرر من بعدها يرجع البيت اهله
لان بعد مايكدر ببقى ااكثر بغداد
اذا لزمو راح ينسجن
