رواية احببت طريدتي الفصل الثامن والعشرين 28 بقلم اسماء المصري

فور عودتها صعدت لمنزلها و ارتمت على الاريكه فنظرت لها هدى بضيق هاتفه بتذمر :

_ كل ده ؟ و لا انتى ما صدقتى عشان تهربى من العمايل ؟

اجابت ياسمين ببكاء و انهيار :

_ حاضر يا طنط هغير هدومى بس .

شعرت هدى بالم فى قلبها من حالها و لاول مره فسألت بلهفه :

_  مالك يا ياسمين ؟ اوعى يكون بهدلك زى المره اللى فاتت عشان الاجازه ؟

هتفت باستسلام :

_ عادى يا طنط .

سألتها بضيق :

_ انتى مش قولتى انك واخده اجازه يا بنتى ؟

ترجتها بحزن :

_ خلاص بقا ابوس ايدك .

دخلت نرمين و رفيقتها هبه و التى كانت قد اكثرت من الزياره فى الاسبوع الاخير ، و اصبحت مقربه من ياسمين .

التفتت نرمين لابنة عمها هاتفه بلهفه :

_ مالك يا سو ؟

اجابت بحزن و غصه الم :

_ عملت كل اللى اتفقنا عليه .

سألتها هبه بصدمه :

_ انتو شفتو بعض ؟

اومأت مؤكده :

_ ايوه جه لحد هنا و قعدنا سوا فى الكافيه و عملت و قلت كل اللى قلتيلى عليه .

عادت هبه لاستجوابها هاتفه :

_ و صدقك ؟

اومأت باكيه :

_ صدقنى ...  المره دى صدقنى بس مش موافق انى اسيب الشغل .

ردت الاخرى بتحذير :

_ لو عملتى كده كل حاجه هتبوظ ،  ضعفك قدامه هيخليه يكشفك و ساعتها هتعملى ايه ؟

سألت بنحيب و بكاء :

_ و هو انا بعد اللى سمعته لسه هفضل ضعيفه ؟

اومأت هبه مؤكده :

_ ايوه لانك بتحبيه ،  لازم تسيبى الشغل .

حركت نرمين رأسها موضحه بتوضيح :

_ لولا انى خليت هبه تشغل مخها لصالحنا مكناش عرفنا نخرج من الموضوع ده زى ما انتى عايزه تجرحيه شويه و نحسن شكلك اللى خلتيه زى الزفت و لو شويه صغيرين و كمان نحمى الست كارما اللى وعدتيها .

فلاش باك *****

خرجت ياسمين من الشركه فور سماعها ان فارس قد خطط لايقاعها فى شباكه لتدلف منزلها و ترتمى فى احضان نرمين باكيه تقص عليها ما سمعته .

ربتت نرمين على ظهرها تهدئها هاتفه :

_حسبى الله و نعم الوكيل ،  بصى بقا موضوعك ده مش هيحله غير هبه صاحبتى .

سألتها بايجاز :

_ اشمعنى !

اجابت :

_ عشان هى بتكتب روايات من و هى عندها 15 سنه و خيالها واسع و هتعرف تمسك كل الخيوط صح ....  انا حكتلها كل حاجه من الالف للياء و هى بقالها يومين بتفكر و تمخمخ و كانها بتكتب روايه من بتوعها و جايه انهارده تحفظك دورك و تدربك عليه كمان .....  لانك للاسف لا بتعرفى تمثلى و لا تكدبى و بيبان عليكى .

.

عوده من الفلاش *****

~~~~~~~~~~~~~~~~~~~~

كعادته كلما شعر بالضيق يقتله يختفى عن الانظار ليمكث فى ڤيلته الموجوده بالساحل الشمالى و التى لا يعلم مكانها احد حتى رفيقه المقرب ليختلى بنفسه و كان كل مره يعود منها مسترخى الاعصاب و اقوى من ذى قبل و لكن تلك المره حدث العكس تماما ، شعر فارس بالانكسار و الخواء و اصبحت اسوء مخاوفه تهاجمه بشراسه .

ظل يتذكر حال امه من قبل وفاه ابيه و حتى بعد زواجها من عمه .

فلاش باك *******

جلس الصغير فارس على مائده الطعام ليتناول فطوره قبل الذهاب للمدرسه تطعمه مربيته بيدها فى حنان لم يستشعره من امه الحقيقيه .

مسدت حنان على رأسه هاتفه بحب :

_ يلا يا سيسو بقا تعبتنى ، انا كده هزعل منك .

اجابها الصغير فارس ببراءه رافضا :

_ شبعت يا داده كفايه .

دخل مدحت متجهم الوجه ليهتف بغضب و هو يلوى فمه :

_ ما تاكل يا اخويا بلاش دلع قرفتنا بقا ، وجودك ده اللى خلانا منعرفش نتمتع بالعز .

اوقفه صوت فريده الرقيق موبخا اياه :

_ مالك بالولد يا مدحت ؟

اجابها بغضب :

_ متغاظ منه و من ابوه اللى لبسنا العمه .

امتعض وجه فريده بالضيق و هتفت مستنكره :

_ فى حد يتكلم كده و قدام الولد كمان ؟ خلاص اللى حصل حصل .

صاح مدحت بغل :

_ طلع نبيه و ذكى ميضحكش عليه و انا اللى كنت فاكره طيب و على نياته ، راح جمد كل الارصده و حطها بدون وصى و متتفكش الا لما البيه يوصل السن القانونى ، و حتى التعليم عمل له وديعه شرطها بالتعليم بس و انا المفروض انى اصرف عليه اكل و شرب ده بعده !

هتفت فريده بضيق :

_ ده ابنى يا مدحت ايه اللى بتقوله ده ؟ يعنى المفروض تحبه اكراما ليا على الاقل مش عشان ابن اخوك ، و بعدين ما انا اديتك ورثى كله !

هتف مدحت بتهكم :

_ ورث ايه ؟ هو انتى بتقولى عليه الملاليم اللى سبهالك دى ورث ! ده حتى الڤيلا دى باسم العيل ده و محدش يقدر يبيعها و لا يتصرف فيها .

ربتت فريده على كفه المسند على المائده و قالت بهدوء :

_ طيب اهدى عشان خاطرى .

رد بوجه حزين و غاضب بنفس الوقت :

_ انا استحملت حاجات كتير اوى عشان خاطرك فوق طاقه البشر ، استحملت اشوفك مراته و حامل منه ....

قاطعته راجيه و هى تنظر لنجلها :

_ بلاش الكلام ده قدام الولد عشان خاطرى و اعتبره ابنك يا مدحت و انسى بقا .

اجابها بكره :

_ مستحيل اعتبره ابنى و مستحيل انسى و مش هصرف على ابنه .... من الاخر كده دخليه مدرسه داخليه اهو تعليم و اكل و شرب كمان .

ثم غمز لها بطرف عينه هاتفا بغزل

_ و هو اعرف اخد راحتى معاكى بدل ما لازقلنا كده .

لمعت عين فريده و نظرت له بتحذير :

_ يا مدحت عيب كده قدام الولد .

رد مدحت باصرار :

_ ده اخر كلام عندى يا كده يا همشى من البيت ده و كل واحد فينا يروح لحاله .

تخوفت فريده و انتقضت بلهفه تمسك ذراعه بتوسل :

_ ايه ؟ عايز تسيبنى ؟ كده برده اهون عليك .

ابتسم بدلال :

_ متهونيش يا روحى بس ....

قاطعته مؤكده :

_ اعمل اللى انت شايفه يا حبيبى .

ابتسم بانتصار و اخبرها :

_ ماشى ، و فى مدرسه غاليه و كويسه و كل عيال الناس الاغنيا فيها عشان انتى عارفه الشروط اللى حطها البيه اللى بيتحكم فينا و هو ميت اكتر ما كان و هو عايش ، لازم المدرسه تكون بنفس مستوى التعليم بتاعه .

انحنى ليقبلها امام وليدها لتهدر بهم المربيه حنان :

_ حرام عليكم و الله ، الولد نفسيته تعبت من اللى بتعملوه معاه و قدامه حرام كده .

صاحت فريده بحده :

_ انتى مالك و ازاى تتدخلى بالشكل ده ، انتى حتته خدامه هنا ولا اقولك انتى مرفوده ، امشى اطلعى بره .

بكى فارس بكاءاً حاراً متوسلاً والدته :

_ عشان خاطرى يا مامى و النبى سبيها انا بحبها و مش عايزها تمشى .

ردت فريده بصلابه :

_ انت خلاص كبرت ان يكون ليك داده و كمان انت رايح مدرسه داخلى هتعمل ايه هى هنا ؟ اكبر بقا انتى مبقتش صغير .

عوده من الفلاش ******

شرد فارس امامه شاعرا بعالمه ينتهى من حوله مؤكدا بحنق :

_ مفيش ست عدله ، لا ام و لا اخت و لا حبيبه .

تنهد بالم و تذكر زوجة عمه دينا و مربيته حنان ليستطرد حديثه مع نفسه :

_ لا فى ، فى ستات كويسه زى الدكتوره دينا كانت ام ليا و داده حنان اسم على مسمى ، انا بس اللى اختارت غلط .

لمعت فكره فى راسه ليتحدث الى حارسه الخاص فرد زين باحترام :

_ باشا ... حضرتك فين ؟ ده احنا قلقانين جدا على سيادتك و حتى مازن بيه مش عارف يوصلك .

هتف فارس بضجر :

_ و ايه الجديد ؟ ما انتو عارفين ان ده طبعى لما بحب اريح دماغى ، المهم سيبك من الرغى ده و اسمعنى .

انصت له زين باهتمام :

_ اوامرك يا باشا .

اخبره بتوضيح :

_ فى ست اسمها حنان عايزك تدور عليها و تجيبها الڤيلا عندى .

سأله بحيره :

_ مين دى يا باشا ؟ و اسمها حنان ايه ؟

اجاب بحيره :

_ بص اللى اعرفه ان اسمها حنان صبحى كان مكتوب كده على الName Tag بتاعها ، و سنها مش هيقل عن 65 سنه و كانت بتشتغل عندنا زمان و غير كده معرفش .

رد زين بتفهم :

_ اوامر معاليك يا باشا ادينى 24 ساعه و كل حاجه هتحصل زى سيادتك ما امرت .

~~~~~~~~~~~~~~

عادت ياسمين للعمل حتى تقدم استقالتها و لكن عدم وجود فارس يحول دون ذلك لتحاول ان تاخذ توقيع مازن عليها و لكنه رفض معللا :

_ انتى متخيله ان انا ممكن اتخطى فارس ؟ لما ييجى هو يبقا يمضيها و لحد ما يرجع لازم تستمرى فى الشغل انتى كنتى غايبه اسبوع و منصحكيش تغيبى تانى لان الانقطاع عن العمل بيضيع مكافاتك و حرام تضيعيها .

هتفت ياسمين باستسلام :

_ الامر لله .

قام زين بالتحدث مع مازن امام ياسمين عن عمد  :

_ فارس باشا كلمنى انهارده يا بيه .

لمعت عين ياسمين عند سماعها اسمه و سأل مازن بقلق :

_ هو كويس يا زين؟

اومأ مجيبا :

_ ايوه يا مازن بيه ، مع ان صوته مكانش عاجبنى .

نظر مازن لياسمين هاتفا بحيره :

_ يرجع بس و انا افهم منه ابه الحكايه طالما ياسمين مش راضيه تحكى .

ردت ياسمين بضيق :

_ مفيش حاجه تتحكى يا مازن بيه ، قلتلك سبنا بعض و خلاص و يا ريت نقفل على الموضوع ده .

~~~~~~~~~~~~~~~~~

فى احدى المطاعم الفخمه جلسا معا فنظرت شيرين هاتفه بتهكم :

_ مش محتاج تعزمنى فى مكان ممكن يبلع مرتبك كله عشان تبهرنى .

هتف ساجد بابتسامه ساخره :

_ قلت اول مره توافقى نخرج سوا بعد محاولات و مكالمات قد كده منى ، كان لازم تكون اسبيشيال .

هتفت برقه :

_ صدقنى انا لو مكنتش ارتحتلك مكانش ممكن ابدا اخرج معاك ، انت عارف الحصار اللى اخويا عامله عليا خصوصا من بعد المشكله دى .

رد ببسمه و ثقه :

_ مش المهم انها اتحلت ؟

اجابت بتعجب :

_ اه الحمد لله ، اللى مش قادره افهمه ايه اللى حصل و خلى اسمى اتشال اصلا من التحقيقات ؟ حتى صاحب ياسين الظابط مستغرب .

تذكر ساجد استخدام نفوذ عائلته لاجبار الفتاه على تصحيح المحضر و ازاله اسمها من التحقيقات و لكنه يمثل عليها انه شاب متيسر الحال حتى لم يخبرها سوى باسمه و اسم والده و لم يأتِ على ذكى لقبه حتى لا تبتعد عنه .

نظر لها ببسمه و رد بفرحه :

_ كبرى دماغك ، المهم انه اتحل ... ها تاكلى ايه بقا ؟

هتفت شيرين باصرار :

_ لا احنا نشرب حاجه خفيفه كده بما اننا قعدنا فمضطرين و نخرج نروح نقعد فى مطعم تانى .

سأل ضاحكا :

_ ليه طيب ؟

اجابته و هى تنظر لقائمه المطعم المسعره بارقام مبالغ فيها :

_ حرام عليا انى اوافقك على اللى انت عاوز تعمله ، مرتبك هيضيع اسمع كلامى انا عارفه الاماكن دى كويس الميه فيها بعشروميت الف جنيه ، و صدقنى انت مش محتاج تعمل كل ده عشان تبهرنى .

قهقه ساجد بصوت رجولى جذاب و هو ينظر لها باعجاب اشد ليقول بهمس :

_ قد كده خايفه على فلوسى ؟

اجابت بتأكيد :

_ طبعا ، ده شقاك و تعبك و انا مش استغلاليه و عارفه المرتبات فى الشركه كام و الشباب بتتعب اوى عشان تقدر تكون نفسها و الدليل الحى قدامى هو ياسين .

ابتسم ساجد و نظر لها برومانسيه و رد على حديثها :

_ اولا قطع لسان اللى يقول عليكى استغلاليه ، و ثانيا انا مرتبى كويس الحمد لله و بابا و ماما دكاتره يعنى مرتاحين الى حد ما ماديا و برده متقلقيش انا عامل حسابى و بحوش للخروجه دى من يوم ما عرفتك .

شعرت بالفرحه و هتفت :

_ ياااه للدرجه دى ؟ بتحوش من يوم ما عرفتنى !

اجاب بحب :

_ طبعا .

نظرت شيرين للارض بخجل ليقول ساجد بغزل :

_ قمر و انتى مكسوفه .

تحول وجه شيرين من الرقه الى الغضب لتهتف بحده :

_ استنى بس متاخدنيش فى دوكه !

تعجب ساجد و قد اقتضب وجهه من تحولها المفاجئ هاتفا بمزاح :

_ فى ايه يا برعى ؟

زمت شفتيها بمزاح هاتفه :

_ برعى فى عينك .... بقا انا برعى ؟

نفى هاتفا بغزل :

_ لا انتى القمر .

ردت باستسلام :

_ هيرجع تانى يسبل و يسهينى !

سألها بحيره :

_ فى ايه يا بنتى ؟

اجابت بتوتر :

_ معلش يعنى هو سؤال بايخ بس انا لازم اساله ؟

اومأ بجديه هاتفا :

_ اتفضلى اسألى ، انا سامعك !

هتفت بتردد :

_ يا ترى ... انا رقم كام ؟

جعد جبينه متسائلا بحيره :

_ رقم كام فى ايه بالظبط ؟

ردت بعصبيه :

_ هيكون فى ايه ؟ طالما داخلين فى جد و هنتقابل و كده يعنى يبقا من حقى اعرف فى كام واحده كانت قبلى ؟

ابتسم بعبث و هتف بمشاكسه :

_ آااه فهمت .... بس هو انا سألتك فى كام واحد قبلى عشان تسألينى ؟

ردت بغضب :

_ احترم نفسك انا اول مره على فكره .

رد مقلدا صوتها و طريقتها هاتفا بمكر :

_ و انا اول مره على فكره .

لم تصدقه فهتفت :

_ كداب اوى ، فى واحد بشكلك ده و طريقتك دى يكون اول مره !

رفع حاجبه بدهسه و هتف بغرور :

_ انتى شيفانى مز اوى كده ؟

اجابت بابتسامه خجل :

_ ايه معندكمش مرايات فى بيتكم ؟

اخرج ضحكه ساحره شردت بها و رد بمرح :

_ عندنا ، بس انا شايف نفسى عادى و يمكن اقل من العادى .... يعنى اخويا مثلا وسيم اوى بشكل مستفز و من و احنا صغيرين و هو اللى كان على طول مقطع السمكه و ديلها و انا و الله غلبان .

قالت بتهكم :

_ تصدق صعبت عليا ، بس برده مش مصدقاك .

اصطنع الحزن و الوجوم هاتفا :

_ يعنى انا اصدقك على طول و انتى تكدبينى كده برده ؟

سألته بترقب :

_ اصدق يعنى ؟

نفى مجيبا بايجاز :

_ لا .

ردت بخضه :

_ ايه ؟

اكد موضحا :

_ بقولك لا متصدقيش ، ما انا لازم اكون صريح معاكى .

امالت رأسها للجانب بترقب هاتفه بحنق :

_ اممم .... كام ؟

رد :

_ قبلك كان فى اتنين بس و الله .

تسائلت بفضول :

_ و ايه اللى بوظ الموضوع ؟

رد موضحا :

_ الاولى كانت فى الجامعه و امر طبيعى ان قصص الجامعه بتخلص ، و التانيه كانت قبل ما اشتغل بحاجه بسيطه ، بس امى مكانتش موافقه عليها .

تسائلت بخوف :

_ ليه ؟

هتف ساجد بحذر حتى لا تعرف مستواهم الاجتماعى فهى كانت طامعه به و بعائلته و استطاعت دينا كشفها له :

_ تقدرى تقولى ان طريقتها معجبتش امى .

تعجبت و استنبطت :

_ معجبتهاش من ناحيه اسلوبها و طريقتها يعنى و لا ايه ؟

اجاب مؤكدا :

_ اه ... اهلى بيشجعونى دايما انى اتعرف على بنات ناس يعنى بصراحه كده مش حابين البنات اللى شايفه نفسها .

اكدت شيرين بغرور و راحه :

_ بيفهمو ، لان النوعيه دى متعمرش بيت .

هتف مبتسما ابتسامه عذبه :

_ بالظبط و ده رأى ماما .

سألته بحيره :

_ و اخترتنى عشان انا مناسبه لمواصفات مامتك ؟

رفض مجيبا :

_ لا طبعا ، اختارتك عشان عجبتينى .

~~~~~~~~~~~~~~~~~~~~~

باحدى البنايات الفخمه بلوس انچلوس جلست عاليا تتحدث مع صديقتها چينفر :

_ انا لابد و ان اعود لمصر .

تعجبت رفيقتها هاتفه :

_ اعرفك منذ خمس سنوات و حتى الان لم افهمك عاليا ، لماذا تطاردين اشباح ماضيكى .... امضى قدما عزيزتى لقد مضى اكثر من ثمان سنوات .

بكت مجيبه :

_ لم استطع نسيانه چين ، انا احبه حد الجنون و من الصعب ان انساه .

سألتها چينفر :

_ متى ستعودين ؟

اجابت بحقد :

_ قريبا جدا و سوف اريه كيف له ان يتزوج بغيرى فانا من تستحقه .