رواية احببت طريدتي الفصل العشرين 20 بقلم اسماء المصري

وصلت ياسمين لمنزل جدها و بمجرد دخولها هرعت نرمين ناحيتها و اسرعت باحتضانها هاتفه بلهفه :

_ الحمد لله انك كويسه .

اجابت باكيه :

_ الحمد لله .

نظرت ياسمين لجدها بمعاتبه و هى تبكى لتسأل بصوت مختنق :

_ ليه كده يا جدو ؟ انا عملت ايه استاهل عليه المعامله دى ؟

هتف مفسرا :

_ انا معملتش فيكى حاجه وحشه ، انا عايز اطمن عليكى قبل ما اموت .

ردت بحده طفيفه :

_ تطمن عليا تقوم تجوزنى بالعافيه ؟

حاول اقناعها بهدوء :

_ يا بنتى شادى شاب زى الفل و بيحبك و عنده شقته و عربيته و ......

قاطعته ياسمين برفض :

_ انا مالى بكل ده ، انا مش موافقه يا جدو لو سمحت .

تدخل شادى بلزاجه :

_ خلينا نتخطب بس و انا هعرف اخليكى تحبينى .

1

ضربت كفها بالاخر باستسلام و هتفت بغضب :

_ لا حول و لا قوه الا بالله ، انا مش موافقه وسيبونى فى حالى بقا .

صاح شادى بحده :

_ الظاهر كده ان كلامك مظبوط يا ياسين !

التفتت تنظر بحده متسائله باستفهام :

_ كلام ايه ده ؟

اجاب سؤالها بسؤال آخر :

_ انتى فى حاجه بينك و بين اللى اسمه فارس ده ؟

قوست فمها و اعقبت بحذر :

_ امممم ... يعنى انا عشان موافقتش على الخطوبه يبقا فى حاجه بينى و بينه ؟ صح كده يا استاذ شادى !

اجاب السيد نيابه عنه :

_ لا مش شرط بس انتى متغيره و انا مش مطمن و خدى بالك ان لو ده اخر راجل فى العالم مش هوافق بيه .

ابتسم شادى بسخريه و رد بنبره مبطنه بالمكر :

_ مش لما يكون بتاع جد ؟ مش لعب ببنات الناس و بس .

هدرت ياسمين بحده مدعيه كذبا حتى تجد حلا لمشكلتها :

_ ايه اللى انت بتقوله ده ؟ انا مفيش بينى و بينه حاجه ، ده مديرى و اكتر من كده لأ .

تدخلت نرمين فى الحديث لتحسم الجدل القائم امامها :

_ اظن كلنا زى ما شوفنا انه بيتعامل معاها كويس ، شفنا برده طريقته لما قصرت فى شغلها ... فياريت متخلطوش بين انسان بيتعامل برجوله فى مواقف تستحق ده و بين انه مديرها و الطبيعى انها تحترمه .

سألها السيد بتأكيد :

_ يعنى مفيش بينك و بينه حاجه ؟

احنت رأسها و لاحت على وجهها نظره تردد لتجيبه كذبا :

_ مفيش اكتر من انه مديرى .

اومأ الجد برأسه و هتف محذرا :

_ طيب يا ياسمين لو انتى فعلا مش موافقه على شادى انا مش هجبرك على ....

قاطعه شادى عابس الوجه معترضا :

_ بس يا جدى انا ....

قاطعه السيد بحده :

_ خلاص انا قلت كلمتى ، بس انا عندى شرط .

..

ابتلعت ياسمين بخوف و هتفت متردده :

_ ايه هو ؟

اجاب باستنباط :

_ تسيبى الشغل عند البنى ادم ده ، كفايه لحد كده لانى مش هفضل قلقان عليكى كده كتير .

حاولت اثناءه عن طلبه فردت بمهادنه :

_ قلقان من ايه بس ؟ اللى حصل ده حاجه خارجه عن ارادتنا كلنا و بعدين هلاقى مكان تانى فين بيدى مرتبات كويسه و انا ال position بتاعى مش هلاقيه بره .

قال باصرار :

_ انا خلصت كلامى ، عايزه تفضلى فى شغلك تتخطبى لابن عمك عشان يبقى معروف انك مخطوبه و محدش يستجرى يتكلم عنك ، و لو مش موافقه على الخطوبه يبقا تسيبى الشغل و ربنا مش بينسى حد .

ولجت ياسمين غرفتها بحزن و جلست تقص على نرمين ما حدث معها اثناء الحادث فلمعت عين الاخرى تهتف بذهول :

_ يعنى بيحبك ، اومال عمل ليه كده ؟

اجابتها معلله :

_ يمكن عنده fear of commitment ( بيخاف من الارتباط ) ، علاقته بامه غريبه و غالبا هو عامل كده بسببها !

صرخت نرمين بلهفه :

_ ده انا نسيت اقولك ، فاكره الشاب اللى كنت قابلته قبل كده فى محل الميك اب ؟

اماءت مبتسمه :

_ الوسيم اللى جننك ده ؟ اوعى تقولى اتقابلتو تانى ؟

اكدت معقبه :

_و فى محل هدوم .

ضحكت عاليا و اضافت :

_ ده شكله مضيع عمره فى الشوبينج ، ده انتو تليقو اوى على بعض مجانين شوبينج بس ممكن تشحتو سوا اخر الشهر !

غمزت لها نرمين بخبث و سألتها باثاره :

_ عارفه طلع مين ؟

اجابت سؤالها بتساؤل :

_ حد نعرفه ؟

هتفت بتاكيد :

_ حد انتى تعرفيه .

رفعت حاجبها بفضول و هدرت بها بضيق :

_ ما تقولى بقا .

ردت نرمين :

_ مازن الفهد .

ادارت الأخرى رأسها للجانب رافعه حاجبها الايسر متعجبه و هى تستمع لابنه عمها تقص عليها ملابسات الامر بتفاصيله الدقيقه حتى استماعها لتلك المكالمه التى دارت بينه و بين فارس فسألت بذهول :

_ يعنى هو اللى اشترى البرفان مش فارس ؟

اومأت نرمين موضحه : قصدك انا .

هتفت من جديد بدهشه :

_ حتى الكلام اللى قاله فارس و هو بيقدمهولى !

اعقبت :

_ برده انا .

ابتلعت ياسمين لعابها بحزن متسائله :

_ يعنى مش بيحبنى ؟

اكدت عليها ابنه عمها :

_ يا بنتى بيحبك اومال انا بحكى فى ايه من الصبح ؟ منا حكيت لك المكالمه كانت قدامى .

بحزن اعقبت :

_ ما يمكن عارف انك قريبتى ؟

دفعتها بطرف اناملها ساخره و هى تجيب :

_ هيعرف منين ؟ ده لحد دلوقتى ميعرفش .

تنهدت بعمق و نظرت حولها تقول بهمس :

_ تصدقى وحشنى ! عايزه اكلم مازن بيه اطمن عليه ، بس اللى حصل و رد فعله معايا مخلينى محرجه اتصل بيه .

فكرت نرمين بصوت عالٍ و هتفت :

_ طيب ما تكلميه على تليفونه هو .

قوست فمها بتذمر و فسرت بسخريه :

_ واحد فى العنايه المركزه ، هيرد على التليفون ازاى ؟

ضحكتا بسخريه لتعود لوجومها سريعا فربتت ابنة عمها على كتفها تطمأنها هاتفه :

_ متخافيش عليه ، الخبر الوحش بيوصل قبل الحلو .

~~~~~~~~~~~~~~~~~~~

مر يومان سريعا و فارس يقبع على فراشه بجناحه الخاص و معه عائلته لتبدء فريده باستفزازه بالحديث هاتفه :

_ البنت اللى انت كنت هتموت نفسك عشانها طلعت مخطوبه .

نظر لها فارس بحده و اعقب :

_ شئ ميخصكيش .

صاحت فريده بعصبيه :

_ انت يا فارس تصوم تصوم و فى الاخر تقع فى واحده تضحك عليك !

هدر بصياح غاضبا :

_ متخلقش لسه اللى يعرف يضحك على فارس الفهد يا فريده هانم .

تدخل مراد محاولا اسكاتها حتى لا تثيره اكثر :

_ يا فريده ابنك تعبان مش وقته الكلام ده .

تحدث فارس ساخرا :

_ لأ ازاى ؟ مش بيقولك اطرق الحديد و هو ساخن !

تنحنحت چنى و اعقبت بحزن :

_ انا مش مصدقه الموضوع ده اكيد فى حاجه غلط و بعدين احنا اصلا محدش اداها فرصه تتكلم و تدافع عن نفسها .

رد مازن :

_ انا سالتها قدامك .

لم يستطع فارس ان يتمالك اعصابه اكثر فصاح بحزم :

_ بس خلاص مش عايز كلام ، اتصل لى بيها حالا يا مازن .

حاول الاعتراض هاتفا :

_ بس يا فارس .....

قاطعه فارس بصوره هادره :

_ انا مبقاش كلامى بيتسمع من اول مره ليه ؟ لو فكركم ان فارس الفهد وقع تبقو غلطانين ، انا و انا كده عندى استعداد افرمكم كلكم .

ابتلع مازن لعابه بخوف و اومأ مستسلما  :

_ خلاص حاضر يا فارس انا كنت عايز اقولك ان تليفونها مقفول من يومها ، انا حاولت اكلمها اكتر من مره و معرفتش .

حرك رأسه بامتعاض و وضح بنبره صارمه :

_ اتصرف ، هات رقم اى حد من طرفها ... عمها او جدها اكيد هتعرف تجيب ارقامهم من مصطفى و مش عايز حد غيرى و غيرك فى الاوضه .

و بالفعل خرج الجميع و اخذ مازن رقم المنزل من مصطفى و قام بالاتصال عليه لتجيب نرمين بتلقائيه :

_ الو مين معايا ؟

تحدث بلباقه : السلام عليكم ، انا عايز اكلم الانسه ياسمين من فضلك .

تسائلت بحيره :

_ اقولها مين ؟

هتف بايجاز :

_ مازن الفهد .

فور ان ابلغها بهويته ابتسمت و قالت بمرح :

_ اهلا و سهلا ، اخبار الشوبينج ايه ؟

قوس حاجبيه و سأل بدهشه :

_ مين معايا ؟

اجابت بصوت رقيق :

_ نرمين .

سألها بفتور واضح بصوته : بنت عمها ؟ كويسه الصدفه دى .

ابتسمت بحرج و قالت :

_ شكلها معجبتكش ؟

رفض معللا :

_ لا ابدا بس انتى عارفه الظروف اللى انا فيها .

اجابت بتفهم :

_ اه طبعا ، ربنا يقومه بالسلامه و هو كويس دلوقتى ؟

قبل ان يجيبها صرخ فارس بعصبيه و صوت هادر :

_ ما تخلص يا بنى انت قاعد تتعرف !

سمعته نرمين من الجانب الاخر فتوترت و هتفت بسرعه :

_ طيب ثوانى انادى على ياسمين .

دلفت الغرفه ممسكه بيدها الهاتف المنزلى و الاخرى مشغوله بالجهاز اللوحى تتفقد الاخبار لربما تجد ما يطمأنها عليه فأتاها صوت نرمين هامسا :

_ ياسمين .

نظرت لها بحزن و اردفت :

_ مفيش اى اخبار نازله لا عن الحادثه و لا عنه يا نرمين ، انا قلقانه عليه اوى .

حاولت مقاطعتها اكثر من مره لاخبارها بوجود مازن على الخط و لكنها لم توفق حتى استمع لها مازن و فارس على الطرف الاخر من مكبر الصوت فابتسم فارس بسعاده لتأكده من عشقها له .

تنحنحت نرمين هامسه :

_ فى تليفون عايزك .

تسائلت بحركه من عينها فاجابت الاولى :

_ مازن الفهد .

انتفضت تلتقط سماعه الهاتف و ردت بلهفه واضحه بصوتها :

_  مازن بيه ! فارس باشا اخباره ايه ؟

أجابها فورا

_ فارس جنبى اهو و عايز يكلمك .

بفرحه عارمه ردت :

_ اوكى

اخذ الهاتف و اغلق مكبر الصوت و نظر لمازن بنظره ذات معنى فاطرق الاخر رأسه و خرج دون كلمه منه و انزوت هى بعيدا حتى تنفرد معه بالمحادثه و راقبت لها نرمين الطريق حتى لا يسمعها احد .

سألته برقه :

_ عامل ايه دلوقتى ؟

هتف بغضب و حده :

_ لسه فاكره ؟

عللت معتذره :

_ حقك عليا متزعلش منى ، بس كان عندى مشاكل هنا غير ان الموبايل ضاع و لسه مجبتش غيره و معرفتش اوصلك .

تحدث بحده :

_ لو عايزه تكلمينى هتعرفى ، بلاش حجج فارغه .

تضايقت من حديثه فردت بحزن :

_ انا عارفه انك مضايق و متعصب دلوقتى عشان كده مش هزعل منك .

هتف متذمرا :

_ انتى كمان اللى المفروض تزعلى ! هو سؤال واحد تجاوبى عليه عشان انا هنا بقالى يومين هتجنن ..... ايه حكايه شادى ده ؟

اجابت بصوت مختنق :

_ مفيش حاجه ..... هو حب يستعرض بس قدام اهلك .

صاح بحده :

_ يعنى مفيش خطوبه و لا كلام فارغ من اللى قاله مظبوط ؟

اجابت بهلع :

_لا طبعا ، انا يعنى هبقا مخطوبه و اخبى عليك ! هو بس فى مشكله صغيره .

صمتت فسأل :

_ خير ؟

قصت له ما دار من نزاع بينها و بين اهلها ليجيب بغضب :

_ يعنى يا تتخطبى يا تسيبى الشغل ؟ ايه التهريج ده ؟

هدأته بلباقه :

_ اهدى بس ... انا بعرف اتعامل مع جدى ، هو يومين و هيهدى عشان كده انا محاولتش اعمل اى تصرف اخليه يتضايق منى و موضوعنا خليه سر لفتره .

رفع حاجبه و سأل بضيق :

_ ليه ؟ انا مش ناوى اتسلى .

اتسعت ابتسامتها بفرحه و بللت شفتيها بطرف لسانها و قالت بهدوء :

_ ده وضع مؤقت بس لحد ما اتكلم مع جدى .

وافق و رد بحزم :

_ ماشى يا سلطانه مفيش مشاكل المهم عندى ان موضوع اللى اسمه شادى ده يتقفل بدل ما اقفله انا بمعرفتى .

مازحته بمشاكسه :

_ اهدى يا وحش و انا هتصرف .

ضحك فارس على مزاحها و ردد بغزل :

_ بحبك يا سلطانه قلبى .

1

اجابته برقه و خجل :

_ و انا كمان ، خد بالك من نفسك .

رد :

_ حاضر ، و اول ما ارجع هكلمك .

سألت باهتمام :

_ هترجع امتى ؟

اجابها :

_ غالبا بكره .

برقه و حب قالت :

_ تيجى بالسلامه .

1

~~~~~~~~~~~~~~~~~~

مرت ايام ما بين عوده فارس و قضاءه ما تبقى من فتره شفاءه بمنزله برفقه عائلته و ما بين محاولات ياسمين العديده اقناع جدها بتاجيل قرار ترك العمل حتى يتحسن فارس و تجد بديل لها ، و لم تنقضى تلك المده هكذا حيث ظلت المكالمات الرومانسيه بينهما قائمه و سبه يوميه بعد ان يغفوا الجميع مساءا مستخدمه الهاتف الخلوى الخاص بنرمين .

ارسل رساله كما عودته قبل الاتصال يسألها :

_ صاحيه نتكلم ؟

أجابته

_ ايوه ⁦

رن الهاتف فورا فأجابت :

_ عامل ايه انهارده ؟

اجابها بصوت رزين :

_ الحمد لله ، وحشتينى .

خجلت و صمتت فاستطرد :

_ افتحى الكاميرا عايز اشوفك .

نظرت لنفسها بالمرآه فوجدت شعرها مبعثر و شكلها مجهد فرفضت بلباقه :

_ مش هينفع يا فارس البنات نايمين معايا فى الاوضه .

تنهد تنهيده عميقه متوسلا :

_ طيب عايز اشوفك وحشتينى ، مينفعش اجيلك ؟

ردت بخضه :

_ لا اوعى ، انت لسه تعبان . انا هحاول اجيلك بس ادعيلى ربنا يحنن قلب جدو عليا !

سألها بضيق :

_ الموضوع مش طول كده ؟ و انا بدأت اتضايق و مش عايز اتصرف عشان انتى متزعليش .

هدأته قائله :

_ هتكلم معاه الصبح و ربنا يحلها من عنده .

صمتت فهتف يسألها بمكر :

_ اقفل ... زهقتنى منى ؟

شاكسته مجيبه :

_ اه زهقت .

تحدث بصوت تصنع به الحزن هاتفا :

_ اوامرك يا سلطانه ، تصبحى على خير .

هتفت بخضه :

_ استنى ، انت زعلت ؟ انا بهزر معاك و الله .

ضحك عاليا و اعقب :

_ و انا بحبك يا سلطانه .

سألته بانبهار و حب :

_ ايه حكايه سلطانه اللى بتقولها لى دى ؟ ليه مش بتقولى يا ياسمين او ياسو ؟

اجاب بجاذبية قتلتها :

_ لانك سلطانه قلبى و هتبقى سلطانه مملكتى عن قريب ان شاء الله .

~~~~~~~~~~~~~~~~~~~~~

استيقظت ياسمين مبكرا و خرجت لتناول الافطار مع الجميع حتى تتحدث مع جدها بامر عودتها للعمل فتحدثت برجاء :

_ يا جدى انا لازم ارجع الشغل لان كده غلط عليا و ممكن يخلينى معرفش اشتغل فى اى مكان تانى .

اجاب باصرار :

_ مش قولنا تقدمى استقالتك ؟

بررت معلله :اصلا العقد بتاعى بيدينى 15 يوم اخطار يعنى لازم اروحهم .

اجاب السيد باقرار :

_ طيب يبقا قدامك 15 يوم فى الشغل و بس .

ابتلعت ياسمين لعابها و تحدثت بعقلانيه :

_ ما انا لازم اقدم الاستقاله لرئيسى المباشر عشان يبدأ يجيب حد مكانى و ادربه ، و دلوقتى فارس باشا لسه مرجعش الشغل و غير كده الشغل صعب و مش بالساهل حد يتعلمه فى 15 يوم غير انه لسه لازم يعمل انترفيوهات .

هتف جدها بحيره :

_ انتى اشتغلتى فى يوم و ليله .

اومأت مؤيده و هتفت باقناع :

_ انا كان وضعى مختلف عشان اونكل مصطفى ، و كمان انا فضلت ادرب شهر كامل على ايد السكرتيره بتاعته قبل ما تمشى و بعدها اتدربت على ايد كارما يعنى الموضوع مش بالساهل يا جدو ارجوك .

زفر السيد باستسلام و رد :

_ خلاص يا ياسمين يبقا تسيبى الشغل بعد شهر من رجوع فارس بيه للشغل .

هتفت بفرحه بعد ان ضمنت بقاءها شهر على الاقل دون مشاكل :

_ ايوه كده يا حبيبى ، ربنا يخليك ليا .

تدخلت هدى بسماجه :

_ و الجمعيه ؟

و لاول مره تأتى افعال هدى فى صالح ياسمين لتردد بخبث :

_ اعمل ايه يا طنط ؟ ما حضرتك شايفه اهو يبقا جدى و عمى يكملوها هما بقا ، و هو انا هقبضها امتى ؟

اجابتها بحده :

_ منا قلتلك انى داخله بنفرين  واحد لياسين فى الاول عشان ادفعه مقدم للشقه و انتى واحد فى الاخر .

هتف الجد بحيره :

_ خلاص يا هدى ربنا يحلها من عنده