رواية الحب المفاجيء الفصل العاشر 10 بقلم امل بكر
\في البيت//
انا وهمس واحنا قاعدين فجأة طلع سيف وهو بيقول ان ماما عايزاكو
نزلنا ولقيت ماما هي وخالتو في المطبخ وبيعملو الأكل
-في اي ياماما ؟!
-احنا هناكل انهارده علي السطح في القاعده الي عملتوها
بصيت انا وهمس لبعض بحماس وقولنا
-طيب حلو
-انزلو شوفو حياة خلصت الأكل الي بتعملو ولا لسه
نزلنا وبدئنا نطلع الأكل فوق بعد لما ظبطنا المكان
والكل اظن اجى من الشغل علشان بابا ويزن وجوز خالته وأمير اجو
يزن وأمير طلعو معانا الأكل وبعد لما القعده جهزت الكل طلع واتلمينا
اتكلم أمير وهو بيبص علي المكان ،
-حلو اوي فكره القعده دي مين عاملها!!!
ماما ردت عليه ،
-أبرار وهمس وانا كمان شايفها قاعده حلوه بنطلع علطول بقي
خالته ،
-فعلاً كل حاجه في مصر مختلفه
بابا اتكلم ،
-ان شاء الله بنتغدا علطول مع بعض
عمو بابتسامه،
-ان شاء الله
بدأنا ناكل والأكل كان حلو جداً خلصنا اكل هو المتعب ان احنا طالعين نازلين انا وهمس بنطلع الأكل بنزل الأكل بس كله يهون علشان اللمه الحلوه دي
بابا وعمو وجوز خالته نزله القهوة علشان عايزين يلعبو طاوله
وسألت حد عايز يشرب حاجه
يزن،
-قهوة
أحمد ،
-وانا كمان
ماما ومرات عمو وخالته ،
-شاي
أمير بابتسامه،
-انا شاي بلاش قهوة لتتكب عليا تاني
-تمام
بصيت علي سُليمان الي مكشر وهو ماسك الموبايل،
-وانت ؟!
رفع راسه ورد ،
-مش عايز
نزلت عملت انا علشان همس كانت تعبانه قولتلها خليكي وانا هنزل
عملت وطلعت وعطيت لكل واحد كوبايته ومفضلش غير فنجان قهوة عملته لسُليمان اجت كده بقي
عطتهولو،
-قهوتك
بص علي الكوبايه وبصلي حسيته عايز يقولي بس انا قولت مش عايز !!! ولكنه اخدها بهدوء وقعدنا فضلنا نتكلم في مواضيع عامه وكل واحد يقول كلمه وكانت قاعده دافيه بمعني الكلمه
أحمد خلص قهوته ونزل علشان صاحبه مستني تحت
أمير اتكلم بعد لما حط كوبايه الشاي الفاضيه علي الصنيه الي علي الأرض ،
-تسلم ايدك بجد يابيرو علي الشاي
ابتسمت بهدوء ،
-الف هنا
-بيرو ماتيجي تسافري معانا وتعالا انت كمان يايزن هوريكو شويه امكان جامده اوي ياجدعان
يزن ،
-ان شاء الله ياعم نظبط الدنيا وهاجيلك
اتكلمت ليزن ،
-لوحدك !!!وانا كمان هروح معاك!!
ضحك أمير بمرح،
-وبيرو كمان دي اهم واحده
-تسلم
يزن اتكلم بجديه متصنعه وهو بيشرب من القهوة،
-أبرار انتي اخدي علي الجو أوي وحاسك ولا أكنك من عيلتنا !!!
-بطل بوخاه بقي
أمير ،
-سيبك منه يابيرو انا اشهد انك من عيلتنا ميه في الميه
يزن اتكلم بهزار ،
-لي مربيها علي ايدك ولا اي ؟!!
ضحكت،
-ده انا الي مربيا
أمير اتكلم بضحكه خفيفه،
-ده لو كنت اكبر منك كنت اتجوزتك يابنتي والله
خالتو ادخلت ،
-حبيبي مش بالسن
اتكلم وهو بيرد علي أمه بجديه متصنعه،
-يعني عادي ياماما مش كده ؟!!
ردت علي ابنها ،
-ايوا طبعاً ياحبيبي انا بقول ابرار هتوافق
رديت وانا ببصلهم ،
-نعم نعم انتو جوزتوني وخلتوني موافقه كمان
أمير اتكلم وهو بيتنحنح ،
-لا لا انا واعد البت الي في دبي
شاورت بايديا ،
-احسن حاجه
خالته،
-ولد خلاص احنا طالبنا البنت دلوقتي عيب
رفعت حواجبي بدهشه ورديت ،
-اي ياخالتو ياحبيبتي انتو بتتكلمو وبتردو علي نفسكم سيبي الولا يتجوز البت الي في دبي
خالتو اتكلمت ،
-ياحبيبتي انتي مش عايزة أمير
رديت وانا بضحك،
-لا للاسف
-خلاص ياابني نصيب بقي
أمير اتكلم بدراما ،
-يلا ياماما احنا نمشي
-يلا ياحبيبي
انتهت فقرة الهزار وبعد ساعه بدء كلو ينزل معتش فيه غير انا وهمس بصيت علي ملامحها التعبانه
اتكلمت بعد لما خلصت تنظيف المكان وكنا خلاص هننزل علي السلم ،
-همس انتي كويسه طول القاعده مش بتتكلمي؟!
اتكلمت وهي بتفتح عينها بتعب،
-كويسه بس عايزه انام
مسكت ايديها علشان اسندها واحنا نازلين بس صـووت وانا شايفها بتـقع وكانت خلاص سيكه وهتقع علي السلم بس لحقتها وانا بمسكها زقتها بعيد عن السلم وانا بنزل لمستوها
بخوف وانا بمسك وشها،
-همـس همس ردي عليـا !!!
بلعت ريقي برعب وانا شايفها مش بتصحي نزلت جري وخبط علي الباب فتح يزن
اتكلمت بسـرعه وبنهجــان،
-يزن الحق بسـرعه همس اغمي عليها
طلعنا جــري علي السلم يزن فضل ينده عليها وانا كمان بس من غير فايده مش بتصحي
يزن اتنهد وهو بيشلها وبينزل بيها علي السلم،
-لازم نروح المستشفي
ماما واقفه علي الباب
-في اي ياولا…!!
مكملتش كلامها لما شافت همس الي يزن شايلها شهقت بخضه،
-همـس مالها ؟!!!
رديت بسرعه وانا نازله ورا يزن بخوف عليها،
-معـرفش ياماما اغمي عليها
ماما اتكلمت بقلق ،
-طب بطمنوني
نزلنا بسرعه فتحت الباب الي ورا وقعد جمبها ويزن ساق بسرعه رهيبه كل شويه يقولي حاولي تفوقيها
بس من غير فايده مش بتصحي وانا عامله اعيط بخوف ان يكون في حاجه
وقف قدام المستشفي وانا جريت انده علي حد يجي يساعدنا اجو ممرضين جايبين سرير بعجل ويزن حاطها عليه ومشينا وراها لغيت لما دخلوها اوضه وقفلو الباب
يزن عامل رايح جاي في الطرقه بقلق وانا قاعده علي الكرسي عماله ادعي ان تبقي كويسه
قومت وقفت ويزن قرب اما لقينا الدكتور طالع
يزن اتكلم بسـرعه وبخوف بان في نبـرته،
-دكتور قول انها كويسه الله يسترك
الدكتور بصله واتكلم،
-هو للأسف ا…
يزن وقفه ونبرته عيلـت،
-للأسف اي !!!! قولي انها كويسه بقولك
الدكتور اتكلم من تاني بابتسامه،
-حضرتك استني اكمل كلامي هي كويسه بس للأسف الضغط عالي جداً وعندها انيميا حاده ولازم تقعد في المستشفي يومين علي الأقل تظبط الدنيا
يزن بلغ ريقه وهو بيعقد حواجبه ،
-يعني لمًا تقعد هنا هتبقي كويسه ؟!!!!
الدكتور هز راسه،
-ان شاء الله اهم حاجه تاكل كويس برده علشان الانيميا تختفي
يزن بلع ريقه بارتياح انها كويسه ،
-طيب شكراً
-تعالي بس معايا هكتب علي علاج
هز راسه ،
-ماشي
ممرضه طلعت من الأوضه وقفتها وانا بسأل،
-ممكن اخش عادي يعني ؟!!!
-ايوا اتفضلي هي صاحيه
فتحت الباب وقربت منها وانا بحضنها بعد عنها وانا ببص علي ملامحها المرهقه،
-كويسه ؟!
هزت راسها ،
-ايوا كويسه لي اغم عليا ؟!!
قعد علي الكرسي جمبها وانا برد عليها ،
-عندك انيميا والضغط كان عالي
اتكلمت بعد مااخدت بالها،
-هو انا جيت هنا ازاي انتي الي جبتيني!!!
ضحكت ،
-هو انا هقدر اشيلك !!! ده يزن الي شالك
-يزن!!!
-ايوا هو الي طلع قدامي وطلع معايا وشالك
-طب يلا نروح
وقفتها وانا بقول ،
-نروح اي لا الدكتور قال يومين علشان فيه محاليل هتاخديها ا الانيميا حاده
بتعب ردت،
-انا مقدرش اقعد هنا بكرهه المستشفيات
-معلش انا هبقي معاكي
بصت علي اسدالي واسدالها وهي بتضحك بتعب،
-انتي جايه بالاسدال ؟!!!
بصيت علي نفسي،
-اهو شوفتي اتخضينا وجرينا بيكي
-تقصدي اتخضيتي !!
-لا ماهو يزن اتخض برده وحتي كلم الدكتور وهو خايف عليكي
-هو هنا دلوقتي ؟!!
-ايوا الدكتور بيكتب علي علاج وهو هيجيبه
-طب ممكن تتصلي علي سِليمان او احمد يجيلي
-هو انا مش عجباكي وبعدين معيش موبايل احنا جرينا بقولك
-مش قصدي بس علشان الفلوس الي هتدفع
-يزن موجود
الباب خبط ودخل من ورا يزن بص علي همس وكأنه بيطمئن عليها بعنيه،
-انتي كويسـه ؟!!
ردت بهدوء،
-الحمدلله
هز راسه ،
-طب كويس محتاجه حاجه؟!
نفت براسها وخدودها احمرت ،
-لا شكراً
-طيب هروح اجيب الدوا وهاجي
كان هيطلع بس همس وقفته وهي بتقول ،
-شكراً يايزن
ابتسم بهدوء ،
-مفيش حاجه
طلع واتصل علي أحمد وسِليمان يعرفهم ان اختهم في المستشفي
وربع ساعه بالظبط ولقيت سُليمان واحمد وطنط حياة وعمو كانو موجودين في الأوضه بعد لما اطمنو عليها سُليمان طلع ليزن الي واقف بره
قرب عليه وهو بيتكلم بضيق،
-انت جبتها ازاي ان شاء الله؟!!
يزن اتنفس بفراغ صبر منه،
-هيكون ازاي يعني شيلتها
بغيظ من طريقته ،
_ولي مقولتش وانا الي كنت جبتها عامل فيها السوبر مان!!!
-استغفر الله العظيم هي كانت واقعه قدامي عايزني انزل اقولك واسيبها مرميه مش فاهمك !!!
-ايوا تقولي وانا اجيبها
-ماشي وانا مجتش في دماغي الفكره الحلوه دي !!خوفت عليها وشيلتها علطول
خلص كلامه بنبره بتأكد خوفه الحقيقي
بنرفزه ،
-اي خوفت عليها دي وانت مالك بيها!!!؟
-سُليمان هو في اي دي بنت عمي!! وفيها اي لما اخاف عليها المفروض كنت افرح وهي مغمي عليها في الأرض
-بالظبط هي بنت عمك وبس تمام
مسح علي وشه بضيق من كلامه الي مش متقبله،
-انت مكبر الموضوع من الأول خد بالك وانا مش عايز اخسرك اكتر من كده
-انت خسرتني لما خنتني
يزن ضحك بسخريه واتكلم بجديه ،
-اي خونتك دي!! سُليمان كنت تقول كده لما تعرف الموضوع من حد غيري لكن انا جتلك وعرفتك اني كلمتها تلت مرات بالظبط وانا عرفت اني غلط خلاص بقي
-لا مش خلاص دي اختي وانت كنت صاحبي واكتر وكلامك معها من ورايا دي خيانه
يزن بصله بإرهاق وهز راسه ،
-ماشي الي تشوفو
خلص كلامه وكان هيدخلها وقفه وهو بيمسكه من دراعه،
-خير رايح فين؟!!
-داخل اطمن عليها قبل لما امشي
-ملهوش لازمه اتفضل امشي
-هدخل اخد اختي دي فيها مانع !!!
ساب ايده ودخل قبله وهو دخل ورا
اتكلم يزن ،
-يلا ياأبرار خلينا نروح
بصيت علي همس ،
-بس انا عايزه اقعد معها
همس ،
-لا روحي كفايه تعبتو
-طب مين هيقعد معها ؟!
سُلميان ،
-هقعد انا
هزيت راسي وحضنت همس ،
-هجيلك بكره الصبح
-ماشي هستناكي
قربت من يزن علشان نمشي اتكلم ،
-الف سلامه عليكي
همس بصت علي سُليمان وبعدين نقلت نظرها ليزن ،
-الله يسلمك شكراً
يزن ،
-مرات عمو تعالي لو هتروحي معانا وانت كمان ياعمي
مرات عمو ،
-ماشي خالي بالك منها ياسُليمان وانا هعملها الأكل وهاجي بكره
عمو ،
-خالي بالك منها يا سُليمان ..حبيبتي هجيلك بكره
همس،
-ماشي يابابا
روحنا البيت وماما سألت بقلق ،
-خير اي الي حصل هي كويسه
قولتلها مالها ودخلت نمت علي السرير وانا زعلانه علي همس وفضلت ادعيلها ربنا يشفيها
تاني يوم الصبح ويزن قالي انه رايح شغله قولتله يوديني المستشفي الأول وماما قالتلي هتيجي بليل المستشفي
وصلني وقبل لما انزل قالي ،
-أبرار لما تطلعي تطمنيني عامله اي دلوقتي
الحادي عشر من هنا
