رواية علي الهامش الفصل الخامس 5 بقلم جمانه السعيدي
اسامه....فعلا ثاني يوم من رجعت من الدوام لكيت احسان بلبيت
ابو خالد تنازل عنه وطلع
اسامه...كعدت وهو مدد اكبالي
اريد احجي وياك وانتبهلي
احسان...انت مالك اي كلام وياي فهمت لولا
ولاتصير براسي واعظ انت حتى ماكلفت نفسك اطلعني من السجن
اسامه...صدك لو راجعتلي الشغله اعوفك بلسجن
الحد ما تتعلم وتتأدب انت مقتنع بحياتك هيج
نوم وسهر وشرب وتدخين
والى متى يمتى تصير انسان محترم وتندل طريقك
احسان...اني محترم غصبا ما عليك فهمت لو لا
وبعد لا تفتح حلك ولاتحجي وياي باي موصوع
اسامه...غير حياتك علمودك انت مو علمودي انت محتاج تعيش صح تحدد مستقبلك
احسان...اهووو صار براسي ماكو منه مالك شغل بيه
اموت اعيش اكلك انسى عندك اخ فهمت لو لا
اسامه...بكيفك بس امي مادايمتلك واذا بقيت كل يوم توكع بمشكله وترفع ضغطها راح تسخرها بأسرع وقت
شغل عقلك ولو مره وحده
عاف المكان ودخل ينام بغرفة امي ومارد عليه ولا عبالك جاي احجي وياي
هنا يومين وطلع يسهر برا عبالك كلشي ماصاير
ولا وكف بعينه توسلات امي ودموعها حتى تستعطف الناس يساعدوها حتى يطلع من السجن
اسامه...هااا ابنج طلع يسهر
امي...لا كال ارجع من وكت مااتاخر
اسامه...انتي ويا احرار اني ماادخل مالي شغل بيكم
خمس سنوات من بديت اشتغل بلبيت الحد ماكملته بناء
واني اشتغل ليل نهار وادخل بسالفه واطلع من سلفه
نسيت نفسي ونسيت العمر الي جاي يركض
بعمر ٣٣ يله كملت بيتنا
البيت كان عباره عن طابقين طابق اول غرفه وهول ومطبخ زغير وصاله
والطابق الثاني غرفتين وصحياة
الغرفه الجوه الامي
والغرفتين الفوك وحده اليه ووحده الإحسان
جمانه السعيدي
من شفت البيت كمل قررت بس ننتقل واستقر واخفف من الديون افكر ازوج وارتبط واشوف حياتي بعد اني مو زغير
قبل يومين انطيت خبر الإحسان احنا راح ننتقل
بليل نشيل أغراضنا وننتقل للبيت الجديد
طبعا هو ولا على باله ولا مهتم
من ارجع بليل اني وامي نرتب للغراض ونخلي بلكراتين
والفراش خليتهن بشلفان
نبقى اني وامي نشتغل للوحده للثنتين وهو بعد ماراحع للبيت
من يرجع يلف راسه وينام ويخلص النهار نوم كلعاده
اذا اكعده بلنهار مايكعد لو كلشي اسوي
المهم بليوم الي راح ننتقل بي طلبت اجازه من الشغل
حتى اكدر ارتب نفسي
اجو وياي ثنيين ولد من اصدقائي وابن عمي ساعدوني
نشيل الغراض
ومن وصلنا ساعدوني نرتبها سوه
لان ماعندي احد.يساعدني
طبعا من نزلنا الغراض ورتبناهن بليل امي اجت ورانا
اما احسان كعد من النوم وطلع وياا جماعته
المهم الولد ماعافوني لمن رتبت كلشي طلبنا عشى الساعه عشره بليل اتعشينا شكرتهم على هاي الوكفه الحلوه
هلكد ما تعبان نمت ثاني يوم جمعه ماكو دوام
كعدت الساعه تسعه الصبح
لكيت احسان راجع طبعا امي عايفتله الباب الخارجي مفتوح لان ماعنده نسخه من المفتاح
المفاتيح كلهن عندي
وداخل فارشتله امي بغرفته ونايم
ليش يهتم كلشي جاي يجي على الجاهز
ماحجيت سكتت نزلت اني وامي كملنا ترتيب البيت
تغديت وطلعت للشغل
امي...يمه وسام اريد نسخه من المفتاح خاف اطلع اشتري شي
اسامه...اي تدللين هاي نسختين مو نسخه وحده
طبعا امي مو بس علمودها علمود تنطي نسخه الإحسان
يدخل ويطلع بكيفه
بعدها بدت الناس تجينا تباركلنا على البيت وجيب هدايه
الاشياء الي ناقصه اخذتها من المحل الي اشتغل بي بلقسط
بديت اثث بلبيت شويه شويه كلما اسدد فلوس شغله اشتري شغله ثانيه
بعد سنه من انتقلنا للبيت كدرت اخلص من الديون الثانويه
بقت بس سلفه الدوله على راتبي
بيني وبين نفسي قررت ابدي اجمع كم فلس اريد ارتبط
كافي صار عمري ٣٤ سنه من حقي ارتبط واكون اسره
بعد ماصار عندي بيت خلاص لازم ابدي افكر بلزواج
بديت ادخل سلف من جديد سلف بسيطه اكدر عليها
الحد ماجمعت مبلغ زين تقريبا جمعت خمسه مليون
خليتهن بلمصرف لان الصراحه مااثق بااحسان
مادام عقله ملحوس بلخمر اكيد ايده مو امان
اذا اخذ فلوسي بعد مااكدر ارجعهن منه ولا هو يشتغل
ومخلصني من هذا الضيم
جمانه السعيدي
بعمر ٣٥ قررت افاتح امي بموضوع زواجي
بيوم الي قررت افتح هذا الموضوع وياها
بيومها امي بس دخلت للبيت كالت اريدك بموضوع مهم
خلت الاكل وكعدت اتغده
اسامه...خير انشاء الله
امي...اني لكيت حل احسن حل يصلح حال احسان
اسامه...يالله وأخير عرفتي احسان يمشي بلطريق الغلط
امي...هذا الحل راح يخلي يمشي عدل ويبطل هاي السوالف التعبانه
ويشتغل ويهتم بنفسه وعائلته
اسامه...لا لاتكولين لكيتي الفانوس السحري
لان احسان كلشي ما يعدله غير الفانوس السحري
امي...احسن من الفانوس السحري
اسامه...اي كولي فرحيني
امي....نزوج احسان
اسامه...استغربت من كلام أمي (( ازوجينه))
امي...اي احسان يحب وحده صار اكثر من سنتين
يحبها وعدهم تواصل بلتليفون هو وياها
ويريد يزوج اكيد اذا ازوج راح يفكر بزوجته وجهاله
ويبطل هاي السوالف ويصير خوش انسان
هااا شكلت
اسامه... يمه شلون يزوج فهميني وهو لا شغل ولا عمل منيين يعيش بنت الناس
امي...غير عنده راتب ابوك ويشتغل بعد الزواج
الي مثل احسان ما تعدله غير المره
بس يزوج ينصلح حاله
اسامه...ومنيين ازوجينه
امي...غير اخوك انت زوجه
اسامه....منيين ازوجه
امي....الله يرضا عليك ساعدني حتى نزوجه اني متاكده راح ينصلح حاله
اسامه....يمه ترا اني الي لازم ازوج عمري صار ٣٥ سنه
احسان توه عمره ٢٢
امي...اني ما ميته على زواجه بس اريده ينتبه النفسه
اسامه....وهاي الي تحبه تدري بي لا شغل ولا عمل وسكير
نايم بلنهار دايح بليل
امي...اي تدري وراضيه تحبه ويحبها
بقت امي تلح على موضوع زواج احسان
الصراحه كنت اتمنى اشوفها تلح على موضوع زواجي
بنفس الطريقه
بس اني كتلكم اني صرت على الهامش من يوم انولد احسان لليوم
اسبوع واني ادخل واطلع امي تلح بهذا الموضوع
الحد ماكرهة نفسي هلكد ما امي تحجي بموضوع زواج احسان
بيني وبينكم كلت خل اسايرها وامشي وراها
اكيد اهل البنيه من يعوفون اخلاق احسان يرفضون
وين اكو عائله محترمه تنطي بتها الواحد مثل احسان
اني لو عندي جلبه مو بنيه ماانطبها اله
اتفقت وياا امي نروح نشوف اهل البنيه
واني أأكد عليهم بنفسي يسئلون على احسان
قبل لا يوافقون
خاف امي تروح وتسوي احسان نبي وماكو منه
اني متأكد اهل البنيه راح يرفضون
وهاي الزواجه راح تخرب
خل امشي وياا امي واسايسها حتى تقتنع وتعوف زواج احسان وازوج اني
اسامه....... يمه انطيهم خبر نروح نتعرف عليهم
امي...اي اليوم انطيهم خبر وباجر نروح عليهم
ثاني يوم لكيت استاذ احسان مبدل ومحضر نفسه يروح ويانا
كلت بكلبي كون تحصل بوري معدل على هاي الكشخه
حتى تنتبه النفسك وتعرف انت ماشي بطريق غلط ومحد يرضا ينطيك بنته تزوجها
بلكت يرجعلك عقلك
جمانه السعيدي
بلطريق سئلت امي شكد عدها اخوان ابوها شيشتغل
امي...ماعدها اخوان ولا عدها اب
اسامه...شلون يعني احنا رايحين نكعد ويا منو
امي...امها مزوجه ومخلفتها وزوجها ميت
يعني عبير يتيمه
بعدين مزوجه واحد ثاني وصاير عدها بنات ثنيين والرجال مطلكها
اسامه...يعني البيت مابي رجال بس نسوان
امي..امها موجوده
اسامه...احنا هسه ويامن نتفاهم ويا امها
امي...اي ويا امها
اسامه...زين ماكو عم خال
امي....مااعرف اني ما سئلتها
اسامه...هاي شلون ورطه
امي....كول يالله انشاء الله خير
وصلنا بيتهم كلش قديم وتعبان وحسب مافهمت من امي
البيت ايجار
دكينا الباب امي دخلت بعدين دخلنا اني واحسان
اجت امها كعدت يمنا مو مره السانها شطوله
وصوتها عالي وهيه تحجي
حسيتها جسره وماعدها المستحه الي عد النسوان
امي..بقت تحجي وياها
شويه واجت العروس تقدم العصير
ضعيفه سمره سنونها عاليات لابسه ثوب ضيك بحيث حتى الملابس الداخليه مبينه
بدون حجاب ولا حتى شال على وجها كيلين مكياج
دخلت سلمت وكعدت توزع ابتسامات
اني كاعد ومذهول من المنظر
هما ذوله الناس الي راح اناسبهم
باوعت على احسان ااشرلي اوكي براسه
يعني هاي هيه افتح موضوع الزواج وياهم
اسامه...انتي شمخلصه دراسه
عبير...اني مبطله من الابتدائيه ابوي مات وامي وحدها وبطلت
اسامه...وليش مارجعتي كملتي
عبير...وشغل البيت منو يخلصه
بعد الي بعمري هسه تعينت صار خمس سنيين
صاحباتي كلهن تعينن
اسامه...ليش انتي شكد عمرج
عبير...٣٠ سنه بس اني ناعمه مامبين عليه
اسامه...قربت على احسان وحجيت بصوت ناصي
...اكبر منك ب ٨ سنوات وموحلوه
احسان...مالك شغل عاجبتني
اسامه....ولك هاي ضاله محد بحالها ولكتك زوج وجلبت بركبتك
احسان...عاجبتني اريدها
اسامه...بكيفك
اسامه...خاله احنا جاي نطلب ايد عبير ويشرفنا ناسبكم
من حقج تسئلين عنا
وتسئلبن عن احسان وبعدين ترجعين خبر
ام عبير...لا مايحتاج اسئل مبينين ناس اوادم
بعدين هو يحبها وهيه تحبه
خليهم يزوجون شايفين كل الخير
امي...خير الي بوجهج انشاء الله
ام عبير...مهرها حاله حال البنات والعرس يمتى ما تحبون احنا حاضرين
اسامه....تمام احنا نترخص ونرجعلكم خبر بعدين
