رواية قلب لم يكن بالحسبان الفصل الخامس 5 بقلم جمانه السعيدي
الحجي...دخلنا اني و الشيخ بس كعدنا
ابو رنا....اريد الفلوس احسبهن
الحجي....تفضل احسب براحتك
الشيخ..بقا يباوع علي ما مصدك
كعد حسب الفلوس ااكثر من مره لمن اتاكد اخذهن يضمهن جوه ورجع علينا
الحجي...يله شيخنا توكل على الله
الشيخ...العروس موافقه
ابو رنا...اااي ااي موافقه ووين تلكه مثل الحجي
الشيخ....من رخصتك خل تجي توكف ورا الباب اسمع صوتها
ابو رنا...ولج تعاي اوكفي ورا الباب
الشيخ هز ايده باستهزاء
بدا الشبخ يحجي كليشة الزواج
من خلص كال اذا رضيتي قولي نعم وانت وكيلي
.....البنيه ماردت
ابو رنا...ولج ماتردين لو اجي أأكسر راسج
الشيخ...على كيفك وياها لا تجبرها
ابو رنا...شنو مااجبرها قابل نلعب
الحجي...رجع الشيخ رجع حجا الكلام مره ثانيه
اذا كنتي راضيه قولي نعم وانت وكيلي
هلمره طلع صوتها كالت نعم وانت وكيلي
الشيخ...مبارك لكي هذا الزواج
هسه نعقد للحجي
الحجي...عقدلي على رنا
حاتم...مبروك حجي الف مبروك
ابو هادي.. الف مبروك
الحجي...الله يبارك بيكم
ابو رنا ...انجبب جاي لو عصير
الحجي....شكرا كلشي مانريد منك بس خل العروس اجهز نفسها
طلع الشيخ وابوهادي وحاتم كدامي واني بقيت واكف منتظر رنا تطلع عليه
شويه وطلعت تمشي لابسه رداء املح هلكد ما ضاربته الشمس ومخيط من كل جهه خياط ايد
وخاله شال على راسها وتكرمون لابسه نعال ازرك
وايدها المكسوره معلكه بركبتها
شكد ضالم ابوها ماكلف نفسه يشتريلها ملابس بيهن حظ
تطلع بيهن بس شاطر يحسب الفلوس
الحجي....يله بويه
طلعت قبلها وصلت للسياره فتحت الباب الي بصفي
وكتله اصعدي
صعدت وهيه ساكته ومدنكه
شغلت السياره وطلعت بقت كاعده وملفلفه نفسها وساكته
منا لمن وصلنا للبيت
نزلت قبلها وفتحت باب البيت
ريحة الصبغ بلبيت تكتل البيت كله ريحة صبغ
دخلت قبلها فتحت البيبان والشبابيك
التفتت مادخلت وراي رجعت لكيتها نازله من السياره
وواكفه يم باب السياره
الحجي...يله عمو ليش واكفه
دنكت وكامت تمشي على كيف
دخلت للبيت
الحجي....شبيج خايفه لا تخافين هذا بيتج
صح هو قديم بس عوزه اثاث كم شغله ويتعدل
ريحة الصبغ قويه لان اليوم صبغووو الولد
تعاي هاي غرفتج اني مااعرف ارتب الفراش انتي رتبي
جمانه السعيدي
دخلت للغرفه بقت تباوع على غرفة النوم
يمكن عجبتها
الحجي....اروح اجيب عشى واجي
هزت راسها ااي
الحجي...خوما تخافين وحدج
رنا....لا مااخاف
الحجي...هسه ارجع بسرعه
طلعت من البيت وطبكت الباب وراي
رحت جبت كباب وصمون
شفت محل مفتوح يبيع ملابس نسائيه
رحت اشتريتلها دشاديش ثنيين على حد معرفتي
اني مااعرف بالملابس النسائيه
واشتريت حلويات وببسي وماي ورجعت للبيت
لكؤتها فارشه الفرشه على الجربايه
وكاعده بنفس وضعها
الحجي....تعاي اتعشي جبتلج دشاديش
شوفي اذا يجن على قياسج
بس تعالي اتعشي بلاول
الحجي...كعدت بلكاع وفتحت الاكل يله تعاي
اجت كعدت
الحجي.. ااكلي اني متعشي هذا الاكل اللج
رنا...كل هذا الاكل اليه
الحجي...واذا تردين بعد اجيبلج وهاي علاكة حلويات
رنا...كلهن اليه
الحجي....باجر اجيبلج ثلاجه وطباخ وشاشه وفراش
رنا....بس طباخ كافي ليش تكلف نفسك
الحجي...لا راح اجيبلج كلشي باجر اخذج للسوك تشترين ملابس لان ماعندج ملابس
رنا...ذني الدشاديش كافي
الحجي...ااكلي مبينه جوعانه
بدت تاكل شويه شويه استطعمت الاكل
الحجي...اريدج تاخذين راحتج هذا بيتج
واذا عليه لا تخافين مني اني مراح أقرب عليج
هذا الزواج بس حتى اطلعج من بيت ابوج
وتخلصين من ضلمه
رنا...يعني انت ماتريد مني شي
الحجي.. انتي مثل بنتي بعمري مافكرت ازوج
وحده على ام امير بس انتي كسرتي خاطري
وقررت ازوجج حتى اطلعج من بيت ابوج
رنا....بس اني مااستاهل كل الفلوس الي دفعتها الابوي
الحجي...لا تستاهلين جنت مستعد ادفع ااكثر بس اطلعين من بيت ابوج
رنا....ابوي اخذ الفلوس كلهن وضمهن
الحجي. خلي ياخذهن ذني ثمن حريتج
رنا...اني راح اصير خدامه جوه رجليك طول عمري
حتى اوفيك دينك
الحجي...اني مالي دين عليج
جمانه السعيدي
انتي تحبين تتعلمين شغله تفيدج لو تردين تكملين دراسه
رنا...لا اريد اشتغل واعتمد على نفسي
الحجي...وشنو الشغله الي تحبين تتعلميها
رنا...مااعرف الصراحه اني اعرف بس شغل البيت
الحجي....يعني ممكن تتعلمين حلاقه نسائيه شغله حلوه
رنا...بس اني كلشي مااعرف
الحجي.. تتعلمين قابل النسوان يصيرن حلاقات وحدهن
يتعلمن شويه شويه
رنا.......اي ولله اكيف
الحجي...بس اريدج ترتاحين كم شهر وتاكلين زين
حتى جسمج يصير قوي وبعدين نفكر بلشغل
رنا...بكيفك حجي
الحجي...اني ما متعاجز منج لو من مصرفج بس اني مادايم اللج كلشي يصير
لازم يكون عندج شغل تعيشين منه
رنا....اي ولله اكيف اشتغل
الحجي... اعرف .انتي ما راضيه على هذا الزواج اني متاكد
رنا....لا بس خايفه
الحجي...منيين خايفه
رنا....خايفه من كلشي خايفه من الجاي
خايفه افشل خايفه مااكدر اعيش هاي الحياة الجديده
الحجي...لا تكدرين انتي قويه تحملتي كل هذا الضلم والقهر وهسه ماتكدريت تكملين
رنا....انت ليش ساعدتني اذا ماتريدني زوجه
الحجي.. هذا السوال الي حير الكل كل الناس تسئل نفس السوال
ازوجتج بس حتى اساعدج تخلصين من ضلم ابوج
رنا...اي ليش شراح تستفاد
الحجي.. استفاد رضا رب العالمين
رب العالمين مو وصانا على الرحمه بينا ووين الرحمه
اذا اشوفج تتعذبين واتفرج عليج
رنا...هلكد ما شفت ضلم من ابوي مااكدر اصدك اكو انسان بكلبه رحمه
ويساعد الناس هيج الوجه الله
الحجي.. اني راح ابقى اساعدج منا لمن توكفين على حيلج
ويصير عندج شغل خاص بيج
وبعد ما تحتاجين اي احد
لا اني ولا ابوج
رنا...يعني اني ممكن اشتغل وانجح
الحجي....انتي الي راح تنجحين لان بعدج زغيره
وتكدرين تغيرين حياتج
رنا....ولله مااعرف شلون اكدر اشكرك
الحجي...اولا تهتمين بصحتح وواكلح وبعدين نفكر بلجاي
شلون راح نكدر انام ويا ريحة لصبغ هاي
رنا...اني اكدر انام على الاقل انام واني متاكده
مراح اكعد بدفره وغلطه
الحجي.. انسي كلشي راح نامي براحتج
والصبح اجيبلج احلى ريوك
واخذج للسوك تشترين ملابس حلوه
رنا...الله يحفظك ويسلمك
الحجي.. ادخلي نامي جوه واني راح انام هنا
رنا...لا انت ادخل نام بلغرفه واني انام هنا
اني مامتعوده انام على جربايه
الحجي....لا هاي غرفتج وانتي الي راح تنامين بيها
رنا...مايصير
الحجي...اسمعي كلامي ولا تناقشين
جمانه السعيدي
دخلت رنا للغرفه وطبكت الباب
الحجي.. اتصلت على ام أمير
ام أمير..... ذكرتني اليله انت عريس
الحجي...مو عريس حقيقي
ام أمير.. وينها
الحجي...دخلت تنام بلغرفه
ام أمير.. هااا انت مو وياها بلغرفه
الحجي....ريحة الصبغ تكتل شلون انام
ام أمير.. تعال نام هنا والصبح ارجع
الحجي....شلون اعوفها وحدها ااول ليله
ام أمير....شكو عليها اقفل الباب وتعال
الحجي....لا مااعوفها خطيه راح افتح الباب
وانام حتى يتغير الهوى
ام أمير...تجي الصبح
الحجي....لا اتريك واروح للشغل شعندي جاي
ام أمير.. نتريك اني وياك
الحجي.. خليها غير يوم البيت فارغ كلشي مابي بس غرفة النوم
اريد اجيب كم شغله باجر
ام أمير...لا اجيب غراض وتكوم وهيه كاعده وحدها
الحجي....الضروريات اجيبهن
ام أمير.....من طلعت من بيت اهلها شلابسه
الحجي. هااا بدينا سوالف الغيره
ام أمير... الله عليك
الحجي....ملابس يهدن الحيل حتى المجديه ما تلبسهن
اني بس افكر بابوها شنو من كلب عنده
شلون يخليها تطلع هيج مااعرف
ام أمير...ابوها لو يخاف الله مازوجها الواحد بكد أبوها
علمود الفلوس
الحجي.... ترا اني بعدني شباب
ام أمير....لا شنو شباب أولادك وبناتك مزوجبن وعندك أحفاد
الحجي.. تردين تكبريني حتى مااباوع الغيرج
ام أمير.....غير اني غبيه ولا شلون وحده تنطي رجلها
الحجي...ووين رايح رجلها هلنايم بلهول بلكاع
هو هذا حال عريس
ام أمير....حيل تستاهل
الحجي...مو من كل كلبج
ام امير...ااجي اني يمك
الحجي... هاااا خير انشاء الله نامي لا اضحكين الناس علينا
ام أمير....تصبح على خير
الحجي...وانتي من اهل الخير
بليلتها ماكدرت انام مكاني متغير وريحة الصبغ تكتل
غفيت مااعرف شكد سمعت صوت الاذان
كعدت توضيت وصليت
ورجعت اتمددت ونمت
سمعت صوت فتحت عيوني طلعت رنا من غرفتها
لابسه وحده من الدشاديش الي جبتهن الها
وخاله شال على راسها طالعه تغسل
باوعت للتليفون الساعه تسعه الصبح
حيل اتاخرت بلنوم
كعدت غسلت وطلعت جبت ريوك واجيت
الحجي...صباح الخير بويه
رنا...صباح الخير
الحجي..تعالي نتريك
رنا...بطني توجعني من عشى البارحه اني ما متعوده
ااكل هلكد مرات انام بدون عشى
الحجي.. ماتشوفين شكلج شلونه تعاي ااكلي
رنا...بعد شويه بطني توجعني حيل
الحجي...زين بس اكمل اخذج تشترين ملابس
رنا...جبتلي دشداشتين كافي
الحجي...لا مو كافي ونجيب شغلات طبخ
اني ماأحب الاكل الجاهز
كملت ريوك وغسلت
اخذتها طلعنا للسوك تمشي وتباوع بعيونها
ماتعرف تشتري
الحجي...ليش ما تشترين
رنا...مااعرف اشتري كل عمري البس ملابس نجاة
لا مشتريه ملابس ولا اعرف اشتري
الحجي...تعاي نسئل ابو المحل شنو أحدث موديل
ونشتري
افترينا على كم محل وشترينا ملابس وتركات
واشترينا شغلات طبخ
للضهر يله رجعنا للبيت
بس وصلنا اتصلت عليه ام أمير
ام أمير...تجي للغده
الحجي.... لا عندي شغل مهم
ام أمير...هااا بدينا من اول يوم
الحجي... عندي شغل كلش مهم من افرغ اجي
ام أمير...انتظرك نتغده سوه
الحجي... مااكدر اجي اليوم على باجر انشاء الله
ام أمير...اليوم كله ما تجي
الحجي...اي مااكدر
دخلت رنا تقيس الملابس
الحجي. تعالي اشوفهم عليج حلوات
طلعت لابسه دشداشه نص ردن وردي وقصيره
خجلانه مدنكه راسها
اباوع عليها اديها كلهن آثار ضرب وايدها المكسوره بعدها مربوطه
ورجليها كلهن آثار ضرب وكدمات
الحجي...هاي شنو الاثار بجسمج
رنا...هاي آثار الضرب
الحجي...جسمج كله مشوه
رنا....حتى ضهري وبطني
الحجي...الله لايرضا عليهم ليش هيج
انتظرونا.
السادس من هنا
