رواية عشق اهل الانبار الفصل الرابع عشر 14 بقلم رواء هادي
كاعد بالغرفة وافكر ليش كالتلي تعال لبيت صديقتي وزوجها مو هناك وشلون صديقتها رايحة للبيت وتاركتها الواحدها ؟! شعلت جكارة وبقيت أفكر اجت بالي
مسوية لي كمين أكيد تريد تورطني وياها لو مجهزتلي اخوانها
هناك علمود يلزموني وياها ويخلوني اتزوجها غصب عني وعن أهلي لو تخلي صديقتها تصورني بالخفية
وتصير تهدد بي ابتسمت ...
عبالج رائد مطي ينضحك عليه بكلمتين والله بطرانة خل احظرها ودز كلام لصديقتها بدون دوخة راس مابي حيل اتورط وياها واسوي فضية ادري
بروحي كل سنة لازم تصير بي مكسورة وفضيحة ..الخير يكعد بدار أهله .فتحت التلفون ودخلت تيليكرام طلعت رقم صديقتها المتزوجة دزيتلها ...
أسمعي هدى كلامي زين وصلي لعبير كوليلها من اليوم لا أعرفها ولا تعرفني وخل تحذف كل أرقامي وصوري من جهازها هي بطريق وأني بطريق بعد ...
وكوليلها عرفت بيها مسويتلي سحر ودافنته بالمقبرة هالمرة عبرتها لها بس المرة الجاي مراح اعبرها أهلها وراح اتهمها بتهيمة سودة وانتِ هم وياها اجرجرجن
للسجن وانعل ابو
الخلفوجن وتدرن بي اني شنو وشكدر اسوي خلال ساعات اشمرجن وره الشمس لذلك كعدن راحة وبعدن
عن طريقي ترى اتويجن .
ضغطت على إرسال راحت الرسالة لها ، حذفت أرقام عبير وصورها كذللك والرسائل مني ومنها كلشي محيته وانطيتها حظر من كل تواصل الإجتماعي نمت على ظهري مرتاح
ومطمن نفسيا وجسديا ِ..
اجت بالي ام الصخول زينب شحلاتها جانت جواي تبجي وتخاف مو مثل عبير تأكلني اكل بالكلام وبالنظرات زينب
وين عبير وين على كوله امي الشريفة
ماتباوعلك وتبادلك النظرات
تغض النظر عن الزلم وماتنطي مجال زينب هيج جانت وثاني شي اريد اكسر خشوم ولد عمامها من كالولي أنت سني وانتو كسرتوا ضلع الزجية اني اعلمهم بسيطة بطن عيني
إلا اصير نسيبكم وقطعة من الكبد ههههه.
الجكارة بحلكي شلت التلفون دخلت على التيليكرام دزيت رسالة لها هلاوو ام صخول ِ حبيت استفزها علمود ترد علية بقيت انتظر ماكو رد منها برغم ناشطة
مادخلت للرسالة
ضجت كلش طلعت من المحادثة دزتلي رسالة
هدى فتحتها كاتبة ..تمام .
حذفت الرسايل مني ومنها وانطيتها حظار ابتسمت من ردت ام الصخول فتحت الرسالة بسرعة كاتبة ...
_أنت شبيك ماتخجل على نفسك شنو ام الصخول ؟!
_وقابل مجذب أني
_طبعآ طبعآ مجذب هذولة إنسان حالهم من حالنا وعدهم اسماء وأني كذللك عندي اسم واسمي زينب افتهمت
_نعم فهمت ست زينب
_الحمدالله فهمت وأتمنى ماتكولها مرة اللخ كلمة ام
الصخول لو صخلة ام عداي لان
اتنفزززز اتنفزززز
_اوك اوك فهمت لا تصيحين
_يلا باي
_وين رايحة انتظري اريد احجي وياج
_ماعندي شي احجي وياك
_ أني عندي خليني اخذ من وقتج جم دقيقة
اذا مابيها زحمة لحظرتج ست زينب
_تفضل ؟
_دام فضلج بت الأصول
_الله يسلمك اخوي
طلقة وفاتت بنص صدري من كالت اخوي تخيلت نفسي اخوها ابن امها وابوها تعصبت منها وكتلها ...
_اشو ماشايفج بالبيت عدنا ؟
_مافهمت ؟!
_أنتِ مو كتي اخوي اشو ماشوفج عدنا بالبيت ؟
_تتمسخر ؟!!
_لاا بس أنتِ كتيها وأني لا اخوج ولا أنتِ اختي
_اممم أنت مؤمن ؟
_لا مو مؤمن للأسف
عبالها راح اكوللها اي علمود تكولي ان المؤمنين أخوه
هههه عبالها راح تعبر علية هاي السالفة
_لعد أنت يهودي ؟
_لا اني كاعد بنص السنة والشيعة وبنص الإسلام
انطينها جواب مابي حل أريد احيرها وماتكولي
اخوي طلعلي جاري الكتابة ...
_لامحسوب على السنة ولامحسوب على الشيعة ولامحسوب على المسلمين على منو محسوب أنت بالضبط ؟
_محسوب على الكل وين مايدير الهوء ادير ويا
_انت بهاي أفعالك جاي تضحك على الصوبين لا انت وي
الشيعة ولا انت وي السنة يعني بالخط العريض ماعندك
عقيدة ثابت عليها وهذا الشي غلط
_أني اشوفه صح احسن ماحوز نار لكرصة
خبز وحدة احوز نار لكرصتين خبز
_موضوعك يحير صدك سؤال؟
_تفضلي ست زينب
_شيل الاست مااحبها كول زينب وبس
_بعد احسن
_ أنت ليش ضارب ولد عمامي هذيج الليلة ؟!
_ناس طائفية
_وان يكن مايحق الك تضربهم
_والله اضربهم واكسر روسهم ورس كل واحد مثلهم
طائفي لازم أنتِ هم طائفية ؟
_لااا اني موهيج والله بس .
_بس شنو ؟
_هيج الكيبورد كتب تلقائي نفسه كلمة بس
_اوك اجه دوري بالكلام ممكن ؟
_تفضل ؟
_اخذتي بنصيحتي ؟
_نصيحة شنو ؟
_بخصوص الكوريين
_ماكدر أعيش بدون دونغهي واعشق عالم كيبوب
مو بسهولة اترك ولا أفكر اترك اصلاً
_سؤال واحد محيرني شنو بيهم حلو ويخلي الواحد
يتابعهم ويعشقهم أريد جواب مقنع زينب
زينب تنفزت من دز سمايل صخله دريت بي متعمد يدز الصخله لان ماتحمل يكتب الكلمة دز اسمايل رديت ...
_هواي أشياء تخليك تنعجب بيهم
_وما هن ؟
_اولا اللطافة لعدهم ماموجودة عند اي رجال دول الاجنبية او العربية ثانيا رقيقين وحساسين ويهتمون بمشاعر الآخرين ويحبون المرأة ويعتنون بيها وثالث شي جميلين وكيووووت من تباعلهم من ودك تخليهم بنص صدرك من
كثرة اللطافة لعدهم .
_صدك كذب زينب ماكو احن من الرجل العراقي والطف وارق ويتحمل نكد المرأة العراقية وثاني شي انتن النسوان شيجرعجن عفارم منه احنا ...
العراقين متحمل ينجن والحلو تردن كوري عيطة
من عيطاجن يفقد الوعي ويموت
_شايفنة يمممممة شايفنة
_سمعت عيطتج يمممممة من الحلة للانبار عزززة
العزاج صوتج كلش عالي هههههه
_ليش تتمسخر ؟!
_والله ماتمسخر هاي الحقيقة العراقي
للعراقية والكوري للكورية
_التنوع حلو
_الظاهر تحبين التنوع ؟
_اي شلزكنا بت العم لابن العم خل نغير نشوف
الدنيا أطفالنا يطلعون غير شكل ..
_وهاي أنتِ كتيها ماكو أحلى من سني وياخذ شيعية كوليلي اكو احلى من هذا التنوع وجمع بين طائفتين .
_اني مو هذا قصدي قصدي اتزوج من غير بلد
_ هسه تردين صخلة ام عداي
_ليش تكول صخله ؟!!
_ والعباس ابو فاضل صخله ام عداي تبق الأصل
ماكو فرق شعجبج بيها مادري ؟
_لا تتنمر التنمر حرام
_ اني بعيد عن التنمر جدآ بس هذولة يجبروك تتنمر
غصب عنك من كل النواحي اكو تنمر
_غيران
_من عمت عين الزلم لتغار من الصخول شنو بي حلو علمود اغار منه اشو الحمدالله الله رزقني بالمال وبالجمال والهيبة والأخلاق ودين الاسلام شنو لبي نقص علمود اغار من غيري علمود اكمله بي اني كامل مكمل والحمدالله .
_شايف نفسك ومتكبر
_استغفرالله شوفه الحال و التكبر فقط لله تعالى اما احنا البشر يلوكلنا التواضع من تواضع رفعه الله ومن تكبر
على الله اذله الله .
_وتريد تقنعني أنت مو متكبر وشايف نفسك
_والله قنعتي ولماقنعتي هذا الشي مايهمني المهم أني
اعرف نفسي شنو ومنو وثاني شي ام الصخول
مايتكبر بس الزبالة
_وهاي عدتها مرة اللخ ام الصخول الفاضك
_مايعجبج كلامي روحي لطخي راسج باقرب حايط عندج
_علمود اكسر راسج افتهمتي وثاني أنتو تحيرون الواحد لا والحلو مسمين نفسهم شيعة أمير المؤمنين علي(ع) ناس تتنمر وناس تجاوز على غيرها وناس تسوي طائفية
وناس تريد كفار وشرابين الخمر
عمي افضل لكم تطلعون من عقيدة أمير المؤمنين علي(ع) وتدخلون الملحدية افضل الكم مابها قيود وكلشي عادي
عدهم علي (ع) برئ منكم دنيا وآخرة
بالاسم أنتو شيعة علي للأسف.
وانطيتها حظر بطت قلبي ام الصخول تريد كافر خوش مسوية نفسها شيعية وين اكو مسلمة تريد كافر اكوللها شحلات سني واخذ شيعية
تكول لا قصدي غير بلد انعل ابوج يابو بقيى البلدان من عده العربية الشريفة واهل الغيرة صوجي اني مكبر راسج
ومنطيج اهمية مليون وحدة
تتمناني ام الصخول . شربت ثلاث جكارات من وراها حركت دمي كمت بدلت لفيت رأسي ونمت روحي صايرة
بطرف خشمي من وراها .
زينب " حيرني موضوعه عبالك يريد شي مني وأني اعرف شيريد يريد ارتبط بي يدور كبل لا والحلو يكول سني واخذ شيعية ابوي وعمامي هم كالوا قصفني بكلام
خلاني اكمز من العصبية
ردت ارد ماكو رد انطاني حظر وحذف المحادثة مني ومنه كمت اكمز من العصبية بعد ماتحمل هاني الحقير هاني صوجي أني الثولة والغبية رديت عليه وانطيته مجال يحجي .
مر شهر كامل وأني بعدني متأثرة بالحظر وبكلامه ..... منوراه صرت مااباع للكوريين هواي بهاي الفترة كلامه جرحني من كال اطلعوا من الشيعة والاسلام ودخلوا الملحدية .
حقير عبالك بس أني المسلمة الوحيدة تسمع أغاني وتتابع الكوريين اشو اغلبية البنات تسمع اغاني وتعشق مشاهير من مختلف البلدان وعادي الا زينب حرام عليها
الكل يعيب وايععع واييععع ام الكوريين .. .وام الصخول خوش ألاقاب داكيلي صوجي أني الغبية ساكته لهم .الصبح اجت نوره مرت اخوي على أهلي كالت
اريد اخذ زينب وياي
بيت أهلي للعصر ونرجع زوجي طالع وكلتله كال اخذي .زينب وياج وهاي كلمة تأخذني وياها وأهلي عادي عدهم عاد رحت وياها نمشي بالطريق وصلنا كدام بيت أهلها
طلع مهدي يضحك
نوره : اجوي ؟
مهدي : هسه بالطريق
زينب : على منو تحجون ؟!
مهدي : بيت صديقه امي ام صدام تعرفيها أنتِ
نوره : شلون ماتعرفها
زينب انخطف لوني ام صدام ام الملازم أول رائد ليكولي ام الصخول ونوره مجابت طاري مكالت راح يجون خطار
لأهلها باوعتلها تضحك وي اخوها مهدي ..
زينب : ليش مكتيلي جاييين خطار لاهلج ؟
نوره : حبيت أسويها مفاجأة
زينب : مفاجأة شنو عيب عليج تضحكين علية جان كتي
من البداية جايين اهل الانبار جان مااجيت وياج
من أصل أصلا راح ارد أني .
مشيت كم خطوة جلبت بإيدي نوره ...
وين مولية زينب ؟!
عتيت أيدي منها ...
للبيت وين
نوره_وحق علي ماخليج ترحين تردين تفضحيني
كدام عيالي وتطلعيني جذابة
زينب : ليش جذبين لعد ؟
نوره : زوجي يدري بس ابوج مايدري حتى
امج تدري بالسالفة كلها
زينب : سالفة شنو ؟!
مهدي : كافي تحجون كدام الباب ادخلوا
جوه وتعاركوا يلا جووه
زينب : أي مادخل جاي اروح للبيت
نوره : بس ترحين بعد مااحجي وياج أبد
ولا اوصل عتبه باب بيتكم
زينب : تهددين!
نوره : شتعتبري اعتبري
زينب : خوش لعد أني رايحة
منوره تحجي مهدي يحجي يردون يرجعوني وأني عناد مراح ارجع تريد ام صدام تاخذ نظره عني لو ابنها عديم احساس والمشاعر يكول سمعت بي جاي واجت تشوفني .
مشيت كم خطوة وكفت من شفت ثلاث اثنين سيارت ستاريكس بيضة سيارة السودة عرفتها لرائد فات من يمي منزل الجامة ولابس نظارات من وصل يمي نزل النظاره
وخزرني عبالك متحلف بلعت ريجي درت وجي عنه ومشيت والصدمة لي هم وكفوا السيارت وجاي ينزلون وقطيع الچلاب بال١٠ چلاب وأكثر ناس تركض وره ناس وتنبح
مبينات متعاركات حرت وين ....انطي وجي ارجع لو اكمل طريقي بطريق الچلاب .!؟ُ بقيت واكفه وارجف من الخوف عطت من صاروا قريبات عني رأسن رجعت على نوره
ومهدي ااااه هي عيطة وهي ركضة .
نصدمت صدمة عمري من شفت كومه نسوان وزلم بال٦ زلم وأطفال ورائد يضحك من شفته يضحك تمنيت ارجع على الچلاب خل تكطعني ولا هالفشلة
صاحت ام صدام ...
ولكم الحكوا للبنية راح تكطعها الچلاب !!
بهذا الموقف قطرة دم مابقت بي وراسن بجيت اقترب مني ولد متوسط بالعمر شمر الچلاب بالحصو ويكوللهن ولنننن يلللا ولنننن .. وهاي ولن خوما بيج شي ؟!
بقيت واكفه اباوعله من الفشلة صرت ابجي واسمع الكل يكولون خاف اتاذت ورائد يضحك بصوت
عالي ويكول ...
رائد : المسافة جانت بينها وين الچلاب بعيدة
مابيها شي هههه ههههههه .
ابو صدام : هي مال ضحك رائد
رائد :اي شعدها راجعة ؟
اجت ام صدام لعندي وأني اشهك وابجي من الخوف ومن ضحك ابنها عديم احساس حضنتني وتهدي بي والبنات يباعون اخذتني ودخلتني للبيت وياهم نوره
تباوعلي وتضحك
بسكوت ابنها بعده يضحك ويتمسخر ابوه يرزل بي ولا جن طلعوا بيت خالتي ام حسن سلموا عليهم رحت لخالتي ابجي مثل الطفل كتلها الچلاب رادوا يأكلوني
خالتي ام حسن مربيتني مثل مايكول من صغيرة اجي يمهم اقرأ وي نوره ونوره تجي لعدنا تقرأ مثل أمي احسها
وهي هم معتبرتني مثل بتها نوره
دخلنا جوه رحت غسلت ونوره اجت لعندي
تضحك ....فضحج الله زينب
_كله من وراج
_كلتلج لا ترجعين ابقي هنا ماسمعتي مني هسه حلوة
الچلاب طردتج كدام العالم والولد
يضحكون.عليج هههه
_محد ضحك غير عديم الاحساس
_الملازم رائد
_اكو غيره يتمسخر على العالم بطني توجعني صارت اااه
كله من وراج غشمرتيني اااه بطني
_من الخوف هيج صار بيج
_تدرين بي جبانة من ضلي أخاف امشي
جيبيلي علاج راح امووت
_اي ماشي هسه اجيبلج
كعدت بغرفة خالتي ام حسن متوجعة جابتلي العلاج اخذته ونمت على ظهري تنبز بي .. كوميي اطلعي البنات يسألون عليج يردون يشوفونج كوميي زينب
_شيريدون مني ؟!
_يخطبونج الرائد ههههه
_خاااب ماتنجبين ماتجيني غير المشاكل وجع الرأس كله من تحت راسج صرت مسخرة كدامهم فشلة والله
فشلة أصلا مالي وجه اطلع .
_انجبي سويت هن الطلاب ردنج لهنا هههههه
_اطلعي برره خليني ارتاح قلبي راح ينفجر من الوجع
_تسوين الحباية كباية ادري بيج تستحين
_امشي اطلعي بس اصير زينة الا اقرأ بيج التوبة
_لا دخيلج زنوبة يمكن حامل
_بطلي جذب أني اعلمج اااخ بطني قلبي اااه
_هههه ااخخ شنو اااه شنو جاي تطلكين ههههه
_انجبي انجبي اااه
_ههههه من تولدين صيحيلي ههههه
_من عمت عينج توبه بعد اطلع وياج توبه
_تطلعين وأنتِ الممنونة
_بحلامج بعد
_ههه نشوف
طلعت وأني تلفلفت بالبطانية ستبردت كلش وثاني شي خجلانه واستحي اطلع نمت من صدك فزيت من حسيت ايد تتلمس رأسي وباستني بكصتي فتحت عيوني
طلعت ام صدام .
ام صدام : سم الرحمن شبيج ابنيتي ؟
زينب : فزيت
كعدت بسرعة خجلانة منها ليش هيج تسوي وياي ....وتعاملني بهاي الطريقة عبالك بتها مو بنية غريبة عنها؟! كعدت كدامي تبتسم بوجي واني
اباوعلها بتعجب ؟؟!!
ام صدام : ا عرف بيج مستغربة تصرفي وياج ؟
هزيت راسي بمعنى نعم !؟ ' أبتسمت وخلت ايدها على ايدي لزمتها بكل هدوء ملامح وجهاا حلوة كلش وهادية وبشوشة مو مثل ابنها وجه الكافر وجه ينكط سم .
_احجيلج الصراحة من أول يوم شفتج بي حبيتج ودخلتي بنص قلبي وبنية بقمة الأخلاق والآداب ونعم من تربيتج وتربيه أهلج الج واكثر شي جذبني
بيج من ابني المخبل ...
رائد دخل بيج إنذار محجيتي شي ولا طلعتي لصار وياج خارج الغرفة بقيتي بداخلج وهذا الشي تلكاه قليل عد البنات بهذا الزمن البنية الكتومة وحافظة السرار نادرن
بقيت اباوعلها كلشي مافهم شنو قصدها من هذا الكلام ...
_عجبتيني كلش واريد اخطبج لابني رائد
كالتها وجههاا يتبسم وأني قطرة دم مابقت بي بهذيج اللحظة ردت اتخربط ماتوقعتها راح تفكر بي بهاي الطريقة وتجيني خطابة بهاي السرعة لا والحلو الرائد عديم الاحساس
وابو صخلة ام عداي يكلي ام الصخول .
جريت ايدي منها بكل هدوء وكتلها ...
مامفكرة بالزواج خاله
_ليش خاله مامفكرة بالزواج وعمرج جبير مو صغيرة
_اريد اكمل دراستي
_هاي سهلة تزوجي وكملي دراستج عدنا وأني بإيدي
اوديج للجامعة واردج بعد شتردين
اخذت صفنه وكتلها ...
أني ماريد اتزوج بعيد عن أهلي
_ومن بعد الانبار عن الحلة مسافة ساعات نوصل واخذيها مني كلما تردين ترحين لبيت أهلي أني اخذج بإيدي اخاف تكولين مايقبل رائد اني اتكفل بكلشي
_خاله اكولج شي
_كولي ابنيتي ؟
_ابن عمي يريدني ومن زمان وكلما يجوني
خطاب ينهي ويطرد الخطاب
_هاي ماكو اسهل منها ثواني اخلي الولد يتصرفون
ويا واخلي يكعد بالمشية هم
ياربي ضيعتني منين مااجيها تجيني كلت خل اكوللها الصدك ابوي ماينطي للسنه وفلت المشكلة .
_خاله واهم شي لازم تعرفينه
_شنو خاله ؟
_تبوي ماينطي مره الرجال سني قبل كم سنة اختي اجوها خطابة سنه من بغداد ماانطاها وتعارك وياهم وطردهم ليش تجون ويطردكم وتتفشلون هاي كلتها الج .
_أني شيعية ترى مو سنيه واولادي ماشين على طريق امهم ويحبون أهل البيت(ع)زواير ويوزعون وخيرات يسوون وحالهم من حال الشيعة ماكو اي اختلاف
مو عبالكم احنا بالانبار معناها مانعرف أهل
البيت (ع) وعالم جهلة متخلفة
_انتِ شيعية !
_اي شيعية
_والله
_اي والله
_ليش أنتِ من وين اصلج ؟
_أني اصلي من الانبار بس وامي الله يرحمها أصولها من الحلة وتحديدا من هاي المنطقة واني عشت وياها بعد مانفصلت عن أبوي وعشت كل طفولتي هنا وصرت شيعية
_انتِ منا ؟
_اي بنيتي منا أني
_مكالت خالتي ام حسن
_باعي ام حسن ماتعرف هواي أشياء عني نفصلنا عن بعض من صار عمري ١٣ سنة أهلها شالوا للنجف وبعدها انقطعت اخبارها وهاي السنين عن طريق الصدفة بالزيارة
تشاوفنه ورجعت الماي المجاريها .
_هاا الله يحفظكم لبعض
_ويحفظج بنيتي هسه شكلتي ؟
_والله خاله ماريد ابنج
_ليش خاله شبي ابني
_يخوف
_هههههه هو شنو ويخوف خاله
_والله يخوف بس يخزر من يباوع بوجي عبالك يريد يفترسني ويكولي ام الصخول لو صخله ام عداي
_ههه ماعليج منه هذا هو يصنف على الرايح والجاي
فطير وبي شوي تفاهة ههه
_خاله ماناسبه والله العظيم أني وين هو وين باعي شطوله اطول من الباب وضخم كلش وبس عضله ايده بمتن خصري مانتوالم والله شوفيله وحدة ضخمه وتناسبه
كمت بسرعة اخاف جلبت بي لزمتني من ايدي بسرعة ...
الله سبحانه وتعالى خلق الرجل اضخم من المراة علمود يحميها وتنحمي بي لو تردين واحد معصفر دفرة
وحدة من شخص يتكوم كدامج .
_موهي...
_أني حجيت وي امج وكتلها كلشي كالت احجي وي البنية هي يمج واذا قبلت اكول لابوها علمود تتقدمون .
_امي تدري؟!!
_اي تدري اخذت رقمها من ام حسن واتصل بيها وكتلها تدزج لهنا علمود البنات وابو صدام يشوفونج
_وليش أني معندي علم
_هسه انطيتج علم شبيج بنيتي انزعجتي احسج
_ طبعآ انزعج ليش ماعندي علم وامي مو تدري بابوي مايقبل مستحيل ينطيني بالانبار عن موضوع دراستي بدفرات يلا قبل رادني اجل سنة علمود اقدم مرة اللخ
لما خوالي ماقبل والله خاله أني احبج واعزج واحترمج وماريج تجين وتتفشلين من ابوي وعمامي .
ادري بيهم مايحترمون السنة وشوفت عينج ولد عمامي شسوو وي ابنج بالعرس وصلت للضرب وانوب هو نفسه يجي خطابه علية مراح يقبلون أبد أبد هم لحد الآن متحملين
علية لان ضربهم انوب ينطونه مره .
_خوب انتِ سديتيها بوجي خاله
_خاله جاي اكولج الصدك أني ليش اجذب عليج واكلج راح ينطونكم ماينطون وعمامي يردوني .
_عوفينا من عمامج وكوليلي أنتِ موافقة
_شلون اوافق بدون علم ابوي
_الرأي رايج قبل لايكون رأي ابوج
_أني رأيي من رأي ابوي شيفصل ابوي اني البس ومستحيل
ثم مستحيل عارضه لو اكسر بكلمته
_تمام بنيتي
دنكت باستني بخدودي وتبتسم ماهامها كلامي عبالي جرحتها ..احنا هسه طالعين وقبل لا نطلع للانبار اريد اشوفج لابو صدام كال اريد اشوفها لان مشافج زين بره
_استحي خاله
_لا تستحين هو نفس ابوج يلا تعاي وياي
_والله استحي خاله
_اي ليش تستحين مراح اخلي احد غيره وغيري
يشوفج تعاي وياي خاله .
جانت تلح ماحبيت اعرضها طلعت وياها خايفة كلش كل بناتها والجناين يباعون ويضحكون بهذاك الوقت حسيت بالخوف ماعرف ليش دخلت للهول جان بس الاب موجود
لابس دشداشة بيضة وشماغ أحمر وعكال اسود وعباية سودة مطرزة بذهبي اسمر البشره بي شبه من ابنه من ناحية برود الوجه .من شافني أبتسم وكال
_ماشاءالله عليها تخبل شلونج عمو
_زينه وأنت
_الحمدالله بخير مادامج بخير عمو تفضلي اكعدي
كعدت بصف ام صدام هو يباوعلي وأني انظاري بحضني ..
هاا شلونها ابو صدام ؟
ام صدام : طبعآ ذوقي حلو وادري
هيج بنية تفيد ابنه
ابو صدام : وان شاءالله تكون من نصيبه
ماتحملت راسن كمت وطلعت بس ماردت ابجي شنو يخطبوني للوحش رائد لو يبقى بس هو مراح اقبل مراح اقبل وي طلعتي لزموني البنات والجناين يحجون وياي
كلمة وحدة ماطلعت بس حابسة دموعي ومتحلفة بامي وخالتي ونوره شوي وكمت من عدهم اريد اطلع بره ارد للبيت رجعت بسرعة شفت الولد ورائد كاعد يفر بالسبحة
لمحني جاي اطلع من الباب راسن ابتسم رجعت وره مدة راحوا جلبوا منهم رادوهم يبقون على الغدة كالوا
مانكدر صارلنا يومين هنا وعدنا شغل .
من راحوا استلموني بيت خالتي ام حسن اقبلي مراح تلكين احسن منهم ناس جدآ محترمة وزناكين وانتي دراستج هناك بالانبار وصارلج ثلاث سنوات بيها
وتعرفيها اكثر من عدنا واذا السالفة تخص ابوج ماعليج بي احنا نقنعه وماعليج من عمامج جبناء تهديد واحد من عدهم يسحبون نفسهم هذولة دولة اما عمامج
ناس بسطاء وعلى كد حالهم .
وأني صافنه شلون اقبل برائد جنه وحش لا ماقبل أني وين هو وين مانرهم والله مانرهم جايزة من روحي اتزوج بالانبار وفوك كلشي ضابط متكبر مغرور شايف نفسه
شوفه وايده والتهديد واكيد ابو النسوان هاي هم الضباط يموتون على النسوان اني اريد كوري يعني اتزوح كوري وره الغدة شحطت نوره ورحت للبيت
اخذت امي لغرفتي
_انجبي زينب القسمة خوش قسمة وماتتفوت
_شنو خوش قسمة شايفه الولد أنتِ
_اي شفته ماشاءالله عليه هيبة وكشخة وجميل وفوك كلشي ملازم بالجيش وين تلكين هيج واحد لو تردين تلخذين ابن عمج زيد السربوت ابو الشوارع اللي مامكمل
السادس علمي كل سنة نايم بي ماتحجين
_ماريده مانتوالم أني ويا بس عضله ايده بمتن خصري وين لاكينها يمة وحدة مثلي وزنها ٥٢ كيلو تاخذلها واحد
بال١٢٠كيلو وأكثر هم .
_انتِ شنو من بنية البنات يتمنن يتزوجن هيج واحد وأنتِ ماعاجبج تردين صخله كوري مو كولي اريد هذا الكوري معرف شنو اسمه والله بس اشوفج مرة اللخ
تباعين الكوريين وتكولين احب هذا الكوري الا اكسر التلفون فوك راسج كافي مليت كوري وكوري وين ماروح بتج ام الكوريين تريد تزوج كوري كافي فضحتيني
بين الناس وتقبلين برائد اشوف
_ماقبل
_والله العظيم اكسرلج راسج لا تشوفيني متساهله وياج
هسه اتصل بخالتج ام جلال وخل جلال يسأل على
الولد قبل لا اكول لابوج
_هو صديق جلال والمسؤول عنه اكيد مراح ينطي بي كسيرة
_تعرفينه لازم
_اي اعرفه مرتين شفته
_مكتي
_شكول هو بالصدفة يمة عليج الله لا تقبلي ورفضي من
عندج ماريده هي كوه اخذه خوب كوه
_انجبي وخليني اتصل بخالتج .
_يمممه ليش هيج تسوين ماريده حرام عليج تجبريني حرام
_مو حرام ماريدج تصيرين لزيد السربوت ابو الشوارع وهذولة خوش عالم وناس وخالتج شيعية ام جلال اخذت واحد سني من الانبار اشو مدللها دلال لا صاير ولا داير
دكافي تفكيرج هم صاير مثل ابوج وعمامج متخلفة هاي انتِ الدارسة والفاهمة عود هذا تكفيرج من امداج وامده دراستج مو صوجج صوجهم هم السنه لفوج
عدهم وحافظوا عليج صارله ثلاث ....سنوات
هناك ماغيرتي من اطباعج
_تدرين بي مو طائفية بس ادري بابوي وعمامي راح تصير مشاكل اذا صارت واجوي ورفضوا هذولة ناس كبارية بالدولة يمة وعناد وراسهم يابس ماريد تصير مشاكل
تذكرين من ضرب زيد ولد عمامي بس كالوله انت سني تخبل عليهم لو يرفضوه ويغلطون عليه شراح تصير فكري بيها يمة وجفي الشر اترجاج ابوس ايديج
ورجليج ارفضي .
بقيت اتوسل بيها وابجي بالدفرات يلا غيرت رأيها .
تمام راح اتصل بيها بالليل واردلها الجواب اول مرة بحياتج تجيج قسمة زينة وطارت من ايدج يازينب
ام الكوريين .
مارديت بقيت كاعدة وامسح بدموعي طلعت تمددت بالفراش أفكر شراح تكون رد فعله من امي تكوله البنية ماتقبل ههههه اني اعلمك تنطيني ابلوك وتكولي ام الصخول
وتجيني ورة كم يوم خطابة عبالك راح اقبل بيك واكولك تعال لعندي قابله بيك هههه .
رائد من وصلنا شريفة بت الحسن ابوي تعجب اول مرة بحياته يزور وراها زرنا كربلاء انصدم صدمه عمره وكال جنت مدفون بالحياة ماتوقعت راح اسوف هذا الجمال وهاي الراحة والطمأنينة من راح ادخل
من دخل العباس انصدر بقى بس صافن وأني اضحك اخواني كذالك صافنين كال بعد كل مرة نجي نزور انعل ابو الطائفية الكل تضحك وفرحانة وي فرحة ابوي
وراها للنجف الاشرف هم داخ بالامام علي (ع) اهناك صله وكال الا ابات اهنا مراح ابات بالفندق اريد اكفر عن اغلاطي وابقى لصبح استغفرالله الله وادعي اهل البيت (ع)
يسامحوني عاد كلها راحت للفنادق أني بقيت عنده وامي كذالك بقت الصبح رحنا زرنا المقبرة أهل امي وابوي كال راح اشتري قطعة أرض هنا واريد اندفن بالنجف بس اموت
رائد : وان شاءالله اول واحد يندفن هنا أني وشهيد دعولي
ابوي : ناوشوني جلمودة خل اهبدة بيها
امي : وتالي وياك رائد
صدام : تفاهة صعدت فول عوفوه .. يلا هم يلا
نروح لبيت ام حسن وراها نرجع .
طلعنا المقبرة عدل لبيت ام حسن وصلنا بيت ام حسن وشفت ام الصخول دمشي مبين عليها متعصبه فتت من يمها على الطريق نزعت النظارات خزرتها احب اخزرها
لان تخاف راسن دارت وجهها
كتمت ضحكتي شفت بالمراية جوكه .... چلاب تركض وهي راحت بتجاهن وكفنا السيارت كدام البيت جانت نوره
ومهدي بالباب واكفين وي نزلتها اجت
ام الصخول تركض
وتبجي والچلاب وراها من شفت المشهد خربت من الضحك راحلها يركض ابن صدام فاضل خلصها من الچلاب بقيت اضحك بصوت عالي راحتلها امي حضنتها مادري
امي شايفه بيها وتحبها .وأني شكو ضحك من فوك الله
نزله علية ابوي يرزل اخواني ماكو فائدة بي تفاهة
واقل زلة تطلع كلها
اخذتها امي ودخلوا جوه اباوعلها واضحك هي عيونها متروسة دموع جبانة وماتتحمل طلعت ام الصخول مثل اصخولها طبق الاصل رقيقين وكيوت ههههه .
كعدنا وأني لازمتني الضحكة نبزني صدام ...
ولك كافي فضحتنا
رائد : لزمتني هستيريا ههههه
صدام : شراح يكولون عنك كافي ولك كافي
كرصني من رجلي شيط روحي شيط ...
اااخخ ..
صدام : اي هسه ستعدلت .
وراها سكتت بقوا كلام عادي وي ابوي واخواني طكت روحي طلعت بره طلع وي مهدي ولد أخواني كعدنا بره بالطرمة افر بالسبحة لمحت زينب ام الصخول
طلعت من شافنتي
رأسن دخلت جوه مادري أني صكار البنات صاير ههههه ساعة زمان رجعنا وأبوي كام ماعرف وين راح شوي ورجع يضحك وره نص ساعة رجعنا للانبار .
طول الطريق امي وابوي وياي بالسيارة والجهال .....هم وابن أخوي صدام فاضل وياي بالصدر كاعد بس ردت أعرف عليش هالابتسامات ابوي وامي ماعرفت
وره مارجعنا تعبان شمرت روحي للفراش حتى ......سبح ماسبحت ماكعدت العصر اخواتي رايحات لبيوتهن نزلت جوه يم ابوي وأبوي جوعان اشرت لبت صدام
تروح تسويلي اكل...
العشق فروحة سوي اكل العمو جوعان
فرح : هسه عمو
ابو صدام. : الله جابك رائد
رائد : هاا يابة شعندك ؟!
ابو صدام. : لكينالك مره معدلة
رائد : مرتيش ؟
ام صدام : مره نزوجك
رائد : ماتزوج أني جوزوا مني .. جاي هم ويا
جيبي فروحة
فرح : ان شاءالله عمو
ام صدام. : لتغير الموضوع خلي بالك يمنا
رائد : مو كتلكم مليون مرة ماريد اتزوج ليش ماتفهمون
ابو صدام. : واحنا نمشي بكيفك حجينه وي
أهل البنية وخلص
رأسن كمت بطولي مصدوم ...
شنووووو؟!
ابو صدام. : اكعد بمكانك واسمع اكعد
رائد : احجوا منو هاي لخطبتوها لي منورة ظهري احجووا
ام صدام. : زينب البنية لدخلت بيها إنذار
رأسن أبتسمت وكلت بدون وعي ...
ام الصخول ؟!
ابو صدام : شنو ام الصخول ؟
ام صدام :تحب الكوريين وهذا داكلها لقب ام الصخول
ابو صدام : وتالي وياك ماتبطل من تفاهتك
ام صدام :تحب الكوريين وهذا داكلها لقب ام الصخول
رائد : شلون تخطبولي مرة بدون علمي ليش مكتولي هناك
ابو صدام : ادري بيك غراب ابكع بس كلت قااااق قاااق
ماريد مره خلص انسوا المره بعد ماتصير
وكلما نسويها لك مفاجأة
رائد : اي مو هي حفلة عيد ميلاد لو حفلة ترفعي تسولي مفاجأة ماريد ام الصخول وخلص فروحة عمو
خلي الاكل عندج اجي اكل .
ام صدام : ولك رائد تعال لا تطنشنه ..
رائد :ماريدها هي كوه تردون تورطوني بام الصخول هي مو طفلة شوفت عيونكم لحكتها الچلاب صارت تعيط هاي فطيمة بت اختي أقوى منها تركض وره الجلاب بالعودة
تردون تورطوني اوووي ...
ابو صدام : وجعوووي طايحة بايدك ابو الكحاب من كحبة الكحبة ابقى هيج صوجي أني افكر بيج واريد ازوجك والله هي حرامات بيك جميلة كلش عبالك اللعابة انت تفيدك
وحدة جلحة ملحة كاتلها الوسخ مو هاي الحلوة والكيوت لو شوي ابن صدام فاضل بي كبر جان اخذتها له بس اخخخ حرامات والله تروح لغير واحد .
ام صدام : واني امشي بكيفه بس خل تردلي
الجواب امها والله كريم
رائد : يمممممة
ام صدام. : وزقنبووووت صوتك صوتك قبيح ماريد اسمعه فتهمت روح زقنب وتعال يلا روححح
رائد : شنو أنتِ بكيفج تزوجيني لام الصخول
ام صدام : اي والله بكيفي أني حبلت بيك وتعبت تسع اشهر وكبرت وسويتك زلمة وخليتك تكون بمنصب عالي بالدولة الكاع كاعي وابوك الزرع واني السويت يعني أنت
كله على بعضك مالتنه واحنا نتحكم
بيك مو ابو صدام
ابو صدام : اي سهاد
رائد : هسه صرتوا ايد وحدة علية نسيتي يمة
شجان يسوي وياج منو يوكفلج مو أني
ابو صدام : مشاكل وعدت وهسه الحمدالله رجعنا دهن
ودبس وخليناك بالنه نزوجك الحلوة يعني نزوجك
رائد : ربي دعاء فقير اريدك ماتخلي القسمة تصير ويرفضون
ام صدام. : من فال الله ولافالك
ابو صدام. : مو كلتلج غراب ابكع بس كال قاااق قاااق
خلص بعد ماتصير واخذيها مني هسه تتصل
المره تكول ماكو قسمة .
رائد : اللهم آمين.
رحت للمطبخ كعدت اكل واسمع ابوي دايس .... بي دوسة ونص امي كذلك كملت اكل وشربت جاي طلعت اشوف امي تحجي على التلفون كملت الاتصال وجان تكولي
ام صدام. : من سودة بكصتك رفضوك
ابو صدام : مو كلتلج غراب ابكع
رائد ماعرف ليش حسيت طلقة وفاتت بنص صدري حسيت بوخزة لزمته صدري بمكان قلبي أني مامهتم لها جانت مجرد نزوه ومن حظرتها راحت وكمت مااهتم لها هسة
شجاني وضجت وتألم قلبي .
