رواية القلب بالقلب كامله وحصريه بقلم روز الفياض

رواية القلب بالقلب كامله وحصريه بقلم روز الفياض

كثيرا ما سمعنا عبارة :

( العين بالعين والسن بالسن والبادي اظلم ) ..

وكثيرا مارددناها خصوصا عند وقوع شجار او مشكلة بيننا وبين شخص ما ..

ولكن هل سمعتم بعبارة :

( القلب بالقلب ) ..

عندما نتخيلها نجد انها صورة دموية مزعجة لو أخذنا المعنى بحرفية فكيف لاحد ان يقتلع قلب انسان من مكانه ؟..

هل تتخيلون المشهد ؟

لا أظن ...

أظن ان المعنى المجازي اقوى من المعنى الفعلي ..

فمن يقتلع قلبه يموت ..

ولكن اذا كان الاقتلاع مجازيا فمعناه الاذى الروحي الالم الذي لاعلاج له ولاتشخيص ...

مااقساه من اقتلاع ...

قد نجبر على اقتلاع قلوب من نحب لانهم هم من بدأوا بأذيتنا ..

مطبقين مبدأ العين بالعين ولكن هذه المره ستكون ..

القلب بالقلب والبادي أقسى ..

............................................

من الصبح كعدتني امي حتى اصلي واروح احلب الهايشة ...

بااردة الدنيا وظلمة مالي حيل اكوم من الفراش اتمنيت انام وادفى بفراشي وفهيمة تحن علي وتروح تحلب الهايشة بمكاني ...

غمضت عيوني ردت اغلس بس اتذكرت الصلاة ..

بقيت بفراشي وافكر اغلس بس بعدين كلت خل اتعوذ من الشيطات واكوم اتوضا واصلي محد يفيدني غير صلاتي ...

الماي باااارد اشششه ...

اتوضيت وصليت ورحت حلبت الهايشة واباوع عالشمس بدت تطلع شحلاتها ...

خلصت واخذت سطل الحليب ورحت للبيت خليته بالمطبخ يم امي وكعدت كدام الصوبة اتدفه ...

امي : ياسه ..

ياس: ها يمه ؟

درت على امي ...

امي : اكلج روحي لمي البيض شوفي ياهي من الدجاجات بيضت ... وطلعي طحين التمن خاف العصر نسوي سياح ..

باوعتلها وانه نعسانه وبردانه وكاشه يم الصوبة اتدفه كتلها :

شعدج العصر بالسياح والبيض لاهو ريوك لاهو عشه؟

امي : مو شغلج هذا روحي لمي البيضات من جوه الدجاجات وفضينه بساع ...

رحت كوه على اعصابي وادردم :

نايمات المسعدات فهيمتها وسلامتها بس ياسه من غبشت الله تكعد تحلب وتلم جوه الدجاج ..

شوكت اعرس مثلهن وانام للظهاري ... امداني كون حظي اغبر بنات السلف كلهن عرسن وارتاحن بس حظي المصخم مكابلة فهيمة وسلامة ..

انفتح باب غرفة اخوي مضر وطلعت مرته فهيمه وهي تشد بعصابتها على راسها وتكلي :

صبحج الله بالخير ياسه خايبه شماج تدردمين من الصباحيات ... عبالج العرس راحه حاسدتنه امداني اي والله لنص الليل وانه الولي للفروخ حتى تنام واخوج نايم من المغرب والضيم عليه ..

لميت البيضات وانه اسمع حجي فهيمة ...

دخلت كتلها بضحك وغمزتلها :

عالاقل اكو زلمة يمج ينشد بي الظهر وتنامين على زنده تالي الليل ..

فهيمة : خايبة شو دولي منا خليني اروح اعجن ... بطرانه وحك الله ... انام على زندة خايبة هو زنديش شو دسكتي ...

ضحكت حيل على فطارية فهيمة ..

فهيمة تصير بت خالي ومتزوجة اخوي مضر ..

وسلامة تصير بت خالتي ومتزوجة اخوي مصعب الجبير اكبر من مضر وانوب تجي وراهم جوريه وانوب أنه ..

اختي هالوحده و متزوجة بالولاية مو يمنة بعيدة علينه احنه بالسلف كل احنه عمك خالك وناس تعرف ناس واختي جورية متزوجة ابن عمي وساكنة وياه بالولاية لان هو متوظف هناك ..

احنه هالاربعة لامي ...

ابوي زغير اخوانه ..

عده اثنين اخوان واخت وحده ..

عمي الجبير كاعدين يمنة بالسلف وابنه الجبير ماخذ اختي جورية ..

وعمي الوسطاني متزوج بعيد مو يمنه كللش بعيد واسمعهم دايما يكولون :

كله من مرته عشكها وخلته يروح يسكن بغداد بعيد عن اهله وحتى ولده مانعرفهم ولاشايفينهم من جنه جهال ...

اتذكر من يصير عدنه عرس لو فاتحة يجي هو بس ومرته تخابر بالتليفون تتخلف النه لو تتبارك ..

عمي هذا جان دكتور بيطري ومرته هم وعرفها بالجامعة وحبها واخذها ومن ذاك اليوم وهو هناك ...

اتعود على بغداد وعيشة بغداد وبعد مايكدر يرجع هنا يمنه ..

مرات اصفن وافكر ..

شلون صايره بغداد ؟

يكولون حلوه مثل الولاية .. معقوله احلى من سلفنه؟

جنت اروح للولاية ويه امي وابوي من جنت جاهله من يرحون للطبيب لو يرحون بشغل ..

هسه من كبرت وشبيت ماظلوا ياخذوني يكولون عيب كعدي بالبيت صرتي مره مو مال خواره بعد ...

بطلوني من المدرسة بس كملت الابتدائية لان المتوسطة بعيدة علينه كللش ولازم امشي هواي يالله اوصللها ..

مليت من كعدة البيت بس شسوي ...

هواي يخطبوني بس اخوي مضر يكول بعدج عقلج عقل جاهل مو مال عرس ...

وين اكو جاهل عمرها( ١٨) ؟

كل بنات السلف عدنه يعرسن زغار اعمارهن ١٤و ١٥و ١٦ يعني انه هسه جبيرة بس مايرضون اخواني ..

جنت اطلع للزرع وي ابوي واخواني مرات من اضوج وتطك روحي .. اساعدهم ..

بس باقي الايام جنت ابقى بالبيت اساعد امي وفهيمة وسلامة ..

احلب الهايشة .. الم البيضات ...

مرات اسويلهم سياح ..

اسبح الفروخ ..

شغلات خفيفة لان امي بعدها بحيلها وفهيمة وسلامة نادرات وشايلات البيت شيل بس اعرف اعجن واخبز واطبخ كللش اعرف اسوي ...

المهم ...

طلعت طحين التمن وحضرت البيضات بس ظليت افكر امي شعدها؟

اباوعلها احسها اليوم مخبوصه ..

امي ماتنخبص الا اذا جايينه خطار ..

ياهو الجاينه من غبشة ؟

امي : ياسه كومي اتريكي بسرعة خلينه نخلص حتى نكوم كلمن على شغلها كفكفن البيت بسرعة ونظفن ... اريدن كل شي يلمع .. على مااطبخ ..

مضر ..اريدك تذبح جم دجاجة بعد امك خلص ريوكك وكوم اذبحهن ... حتى اللحك انظفهن واطبخهن كبل لايجون ..

ياس : ماتفهميني ياهو جاينه اليوم ؟

امي : خايبة بيت عمج جبر جايين من بغداد لينه ... ارتاحيتي؟

ياس : ياااا .. جا عليمن هالخبصه شني اول مره يجي عمي ..

امي : لاع مو اول مره ... بس هالمره وياه مرته وابنه ...

ياس : ياا جا ما طول هيج خل اروح اسبح والبس ثوبي الجديد بس كون سلامة خيطته ..

وبعد ساعات ...

كلها كعدت من النوم حتى الفروخ وانه مكابله سلامة حتى تخيطلي ثوبي الاحمر اريد اسبح والبسه ..

اريد اكشخ بي جدام اهل بغداد ..

المفروض هسه همه راح يوصلون لان ابوي كال طالعين من غبشة ...

اخذت الثوب من سلامة ورحت سبحت وره ماسبحت فروخ اخوي مضر لان فهيمه امهم جانت تعجن ..

سبحت وطلعت كعدت يم الصوبة اظفر راسي ...

امي ماتقبل نكص شعرنه بس المتزوجات يكصن شعرهن عدنه والمامتزوجات عيب امي تكول ...

ظفيرتي جان طويلة وبيها لون ولونها راهم ويه عيوني ..

عيوني لاهنه زرك لاهنه خضر ...

شفايتلي لو هيج لونهن .. بس عيوني جان بيهن عيب ..

كل عين لون .. يعني عين خضره وعين شهله ...

وانه زغيرة جانوا الجهال بالمنطقة يضحون علي ويكولون عيونج تك وتك .. لو يصيحون علي حوله .. بس انه مو حوله ..

شكد جنت احب المدرسة بس ضجت منها بسببهم وبس كلولي بطلي بطلت رغم جنت اتمنى اتعلم وتصير عدي شهادة مثل بنات عمي جبر يكولون كلهن عدهن شهادات ..

لو جانوا فروخ بيت ابو ستار جيرانه يكولون علي جنية ويخوفون الفروخ ..

ظليت بالمدرسة امشي بحدي .. محد يرضى يمشي وياي يخافون مني ...

لحدما شبيت وكبرت وصرت حلوة ..

صدك عيوني كل وحده من لون بس صرت اكتل على كولت ابوي ...

واول واحد خطبني هو ستار ابن ابو ستار الجان يكول علي جنية ومرات يصيح علي ام عيون تك وتك ..

ابوي ردهم من يمه بس حتى لو ابوي قابل انه مااريدنه لهسه حاقدة عليه ..

المن خاطبني كون عيوني تك وتك .. والله يالله ..

باوعت لروحي بالمراية عدلت ظفيرتي وخليت شالي على راسي ورحت لامي اراويها الثوب شلون طالع علي ..

ياس : يمه .. شوفي ياكل ويشرب الاحمر علي ..

امي : ياا اول مره اشوف وحده تكول على روحها حلوه ...

ضحكت ..

ياس : محد يمدحني شسوي كلت منا وجاي انه امدح روحي بلكت يكعد حظي مثل المسعدات ..

سلامة : شبيج .. شناقصج .. شو كيمر عرب الظفيرة تلمع والطول غصن ياس ... ياسه واسمج عليج ..

اتنهدت وكتلها :

وغلستي على عيوني .. تك وتك مو صح ؟

سلامة :ياخايبه علواه انه عيوني تك وتك مثلج هيج جا شفت روحي على خلك الله وحتى اخوج جا مارضيت بي ههههه ..

باوعتلها مارضيت بحجايتها كتلها :

شبي اخوي .. هسه صار كخه .. موجنتي مجودره بالدرب (٢٤) ساعة كون يشوفج ويخطبج ... مو كتلتي روحج لحدما خطبج وسطح البيت يشهد عالرسايل الجنه نلكاهن الصبح من نكعد ..

وطوس الروبه وصواني الكيمر من غبشة وخبز ابو السمسم ...

هاا اكمل لو كافي هيج ..

ضحكت امي حيل وكالت:

هو انتي شخليتي بعد ..

سلامة : هههههه خايبة شمالج غرتي لاخوج ... جا هو غير رجلي وابو جهالي واحبنه ... بس ندلع عودك .. لو يصيرن عيوني رزك ماابدله ...

ياس : اي هيج جري عدل تره كله الا اخواني ماارضى عليهم الحجي العوج ..

امي وسلامة يضحكن وانه افتر بثوبي الاحمر فرحانه ومتعجبة بي ...

وره الغده غسلت الماعين عن سلامة وكعدت يم امي بالمطبخ نتاني الخطار حتى ابدي اخدر الجاي ..

شعلت الفحم بالمنقله وصحت على مضر اخذها للديوانية وانه جهزت قوري الجاي والاستكاين الزينة وكعدت المع بخواشيك الجاي ...

بعد ساعتين اجه ابوي كال:

هاا .. غداجن كامل ؟

امي : ياا جا شلون مو كامل مو تغديتوا ..

ابوي : لا اقصد بقى غده الهم ..

امي : جا شلون مابقالهم ... من يمته احنه نسوي غده على الكد دومنه نسوي زايد مو ناقص ..

ابوي : خوش حجي ... ياسه ؟

التفتت لابوي :

هاا بويه ؟

ابوي : جايج بويه .. جاي مهيل كون عمج يحبه بي هواي هيل ..

ياس : اي بويه ترسته هيل اعرفك حتى انت تحب طعم الهيل قوي ...

ابوي : يابعد ابوج همه مساع من خابرتهم كالوا بالمطعم يجوز تغدوا بس انه اريدج كون كل شي جاهز خاف بعدهم جواعه ..

امي : لامادام نزلوا بالمطعم معناها تغدوا بس خاف ماشبعوا العصر ياسه تسويلهم سياح وبيض عيون ..

ابوي : اي كيفجن بعد بس لاتقصرن المره اول مره تجينه وهي مامتعودة خاف علينه وتستحي افروشلها بغرفة بحدها حتى تاخذ راحتها وابو كرم وكرم بالديوانية الولد يفرشولهم خاف يوصلون تعبانين ...

بعده ابوي يسولف ويطي تعليمات ودك مصعب عليه كله الجماعة وصلوا وهو طالعهم يجيبهم ..

ابوي : يالله اجوا طلعلهم مصعب يجيبهم لان يكولون متيهين الدرب ... تحضرن بعد انتن ...

طلع ابوي لباب الحوش يتانيهم وانه والبنات نركض منا ومنا ..

سمعنه صوت السيارات بره ..

امي لبست عباتها وطلعت هم تسلم عليهم وتستقبلهم ..

وره شويه سمعنه سلام ومباوس واجت امي دخلت ووياها مره ..

لاول مرت اشوف مرت عمي جبر مو جبيره مدري جبيرة بس مهتمة بروحها ..

طويله وجسمها مرتب شوية مو مثل نسوانه الكبار ولابسه عباة مخليتها على جتفها وربطه بس ربطتها مفتوحه وشعرها طالع مصبوغ اصفر وعباتها مفتوحه ولابسه جواها بنطرون وكعب هاعلواته ..

وانه وسلامة وفهيمه فاكات حلكنه ..

يحححح ...

سلمن عليها فهيمة وسلامة وبعدين امي صاحتلي حتى اسلم رحت اسلم عليها كالت :

منين هاي الصبية الحلوة ...

امي : هاي بتي الزغيره ياسه ..

ام كرم : ياسه ... عاشت الاسامي ..

بوستها ورجعت كعدت وهي فاتت جوه هي وامي ..

درت على فهيمة وسلامة غميت روحي ..

سلامة : خايبه شمالج يحظي كلساع وغميتي روحج ..

ياس : بالله هاي عجوز وانه شابة ... خايبه شفتيها شلابسة ؟ بنطرون وعباتها على جتفها ومطلعه شعرها من الربطة ... آخخخ يالقهر وانه اتوسل بأمي احف حواجبي ماترضى ...

بعد مااتأكدنه الجماعة متغدين اجه مصعب صاح :

جاي .. جاي ..

كمت اركض اصب الجاي ..

صبيت الجاي واخذه يم الزلم وصبيت النه احنه النسوان واخذته يم امي ومرت عمي ..

دخلت لكيت امي ومرت عمي كاعدات ويسولفن ..

حطيت الجاي وكعدت واجن وراي الحبايب ..

مرت عمي : اي عاشت ايدج حبيبتي والله جنت محتاجه جاي لان دخت من الطريق ..

شربت شوية وانه اباوع عليها شلون تشرب نازوكيه مبينه ..

رفعت راسها كالت :

عاشت ايدج خوش جاي مهيل .

ياس : بالعافية .

ظلت تسولف هي وامي والبنات وانه ساكته اشرب جاي واسمعهن ..

دارت علي كالت:

ياسه والله صدوك عاشت ايدج جاي مضبوط بحياتي مشاربة هيج جاي طيب وطعم الهيل بي واضح ..

امي : الف عافية .. هني ومري .. بعد هذا جاي ياسه ينضرب بي المثل عدنه ..

مرت عمي: انوب شلون كصيبه حلوه شلون عيون ماشاءالله عيني باردة عليج احلى صبيه ..

وانه وسلامة وفهيمة حاصرتنه الضحكه على كلماتها ..

رحت للمطبخ بحجة اجيب الشكر وكامت سلامة تصب جاي مره ثانية للزلم ..

سلامة : احلى صبيه ..

ياس : بوويه هاي المره لو تظل عدنه اظل مكابلتها وكاعده لااكضي شغل ولاعمل ... يمه شحلاتها وشحلات حجيها .. شمالج طكيتي من الضحك ماسامعة بكلمة صبية بالتلفزيون اللبنانيين والسوريين كله يكولون صبايا ..

سلامة : اي ولج اعرف بس شحلاتها بلسانها واتعجبت هي عجوز يعني صدك مو عجوز كلش مثل بيبيتي بس هم عجوز يعني وين تعرف الصبايا ...

ياس : خايبه انه من طبت هي وانه مدولغه لابسه بنطرون يححح وشلون كاعدة بي ونازعة العباة وتشرب الجاي جنها هذني اليطلعن بالتلفزيون ..

شبعنه ضحك انه وسلامة بالمطبخ ورجعنه للغرفة ...

اول ماطبيت كالت مرت عمي :

تعالي هنا يمي خل اشوفج بالله ..

رحت كعدت بصفها وانه مستحية ..

مرت عمي: بعدج مامتزوجة مو ياسه؟

ياس : اي بعدني ...

صفنت علي كلتلي :

سبحان الله ..

عرفتها تقصد عيوني .. ضجت ..

كالت : الله منطيج نعمة تكدرين يومية تبدلين لون عيونج مره اخضر مره اصفر ..

ياس : اي جابتلي جورية اختي عدسات بس مااعرف البسهن واصلا انه مااطلع من البيت المن احطهن بعد ..

سكتت ماحجت ..

بعدين دارت تسولف هي وامي امي تسألها عن ولدها وبناتها وهي هم تسال امي عن اهلنه وكرابتنه ..

وره ساعة كمنه كل احنه وخليناها ترتاح شوية وتنام ...

رحت لغرفتي وطلعت العدسات حجيها شهاني اجرب البسهن ...

فتحتهن وبديت احاول البسهن جربت كذا مره مارهمت ..

تعبت وكفت كبال المراية كلت:

هاي آخر محاولة بسم الله ..

وبديت احاول بيها الى ان كعدت بمكانها الصحيح ..

فرحت وكيفت وطلعت اركض لامي اروايها عيوني صارن اثنينهن خضر ..

امشي واحجي بصوت عالي :

يمممه ... يمممه ... تعاي شوفي صرت صدك صبيه ... يمممه ...

طبيت للمطبخ وقبل لااشوف منو بالمطبخ اجتني كفخة على راسي ...

ياس : آخخخ ...

شفت امي ويمها ابوي وعمي واخواني ووياهم واحد مااعرفه واكفين كلهم بالمطبخ ويسولفون ..

رجعت ركض طلعت من المطبخ لان ماحاطه ربطه على راسي ..

رجعت للغرفة وانه خايفة من الرزاله مال اخواني ..

بقيت واكفة كبال المراية واباوع لعيوني صدك صرت حلوه ..

يجوز صدك هاي نعمة مثل ماكالت مرت عمي ...

سمعت ابوي صاح علي عدلت ربطتي ورحتلهم بالمطبخ سلمت من بعيد كال عمي:

لج تعاي هنا شنو هالسلام البارد ...

رحت سلمت عليه وحبيت ايده وهو هم حب راسي كلي :

عود شنو تستحين .. صرتي جبيرة يعني وظليت متسلمين ام عيون ههههه هاي صدك انتي صايره صبية ...

ماشاءالله ..

ابتسمت بخجل وهمه كلهم يضحكون ردت اروح كلي عمي:

لج وين ... اشو مستعجله شعندج ..

ياس : ماعندي شي ..

عمي : تعاي تعاي يمي..

رحت وكفت يمه رجع دنك على راسي وحبه ..

عمي : اكولج ؟

ياس : هلا عمي .

عمي : انتي ميصير تتزوجين اي واحد ..

ياس: ليش عمي؟

عمي : لااا لازم واحد يستاهل هالجمال الخام .. واحد كون ثقه .. شلون ننطيج لاي واحد كم ياس عدنه احنه هههه ..

ابتسمت بخجل وانه ادردم بكلبي :

هو انه جنت ناقصتك تحجي جدامهم هيج حتى انوب يلزكون ياهو اليجي مايقبلون خرب منين طلعتلي ...

عفتهم ورجعت للغرفة اريد انزع العدسة حسيت عيني توجعني ...

حاولت اطلعها ماعرفت ..

جربت مادبرتها وعيني توجعني وظلت تدمع حيل امسحها وترجع تصب ...

خفت كلت هم تك وتك وهم وحده منهن تخرب لو تعمى انوب اصير عورة ...

رحت اصيح لامي وابجي :

يمه .. يممه ... يمممه ..

اجت امي تصيح :

وصمه .. شبيج ..

شافتني ابجي كالت :

يااا شمالج ؟

ياس : هاي العدسة ماتطلع من عيني وتعورني حيل وتصب دموع ..

امي : يااا وشلون هسه نوديج للطبيب لو شلون ؟

راحت امي لابوي كلتله ..

اجه ابوي وعمي شافوني ابجي ابوي كال :

خلي عمج يشوفها ..

عمي : لا مااجازف اني خاف أءذيها .. خل اشوف كرم يجوز يعرف ..

عدلت ربطتي اتذكرت هذا الجان واكف وياهم بالمطبخ بس ماشفت شكله ولاسلمت عليه ...

رجع عمي ووياه ابنه كرم دخل كال :

السلام عليكم ..

ردينه السلام وانه مدنكه راسي وامسح بعيني كله ابوي :

تعال بويه شوفها هاي شلون تطلع تعرفلها ؟

كرم : شنو هي ؟

رفعت راسي كتله العدسة واشرتله على عيني ..

اتدنه علي واشرلي بأيده ارفع راسي باتجاه الضوه ..

باوع على عيني وكلي :

لاتخافين هسه اطلعها بس خل اغسل ايدي اول لان العين حساسة ..

راح هو ومضر اخوي وداه للحمام غسل ورجع كعد كبالي واشرلي ارفع شوفي ..

لزم وجهي بيده كشيت ..

ابتسم وانه من فشلتي حصرتني الضحكة كلي :

بس لترمشين حتى متتأذين ..

خله ايده على عيني وحرك العدسة بيها بعدين مااادري شلون طلعها لازكه بأصبعه ..

رأسا كلي :

هاي طلعت ...

كرم : والثانية تعرفين تطلعيها لو اساعدج ؟

ياس : لا الثانية مابيها ..

ابوي : لا الثانية عينها هي خضره بس هاي عدسه عيونها تك وتك هههههه ..

عمي : اي خطية ..

شكد اضوج من هالكلمة كلها تكولها وين مااروح عيونها تك وتك والناس ترجع تكول خطية ..

باوعلي حسيته اتفاجأ عيوني مو نفس اللون بس غلس ...

انطاني العدسة وطلع .

الثاني من هنا

تعديل المقال