رواية القلب بالقلب الفصل الثاني 2 بقلم روز الفياض

رواية القلب بالقلب الفصل الثاني 2 بقلم روز الفياض

ج٢

بقوا عدنه بيت عمي ( ٤ ) ايام ..

وجنت مستغربة لان عمي جان من يجي يبات عدنه يوم واحد ويرجع ..

المهم ...

ثاني يوم بعد قصة العدسة عيني التهبت وخذتني فهيمة واخوي للطبيب وراحوا ويانه عمي وكرم ومرت عمي للولاية ..

نزلناهم عد بيت جوريه اختي ورحنه للطبيب ..

الطبيب كالي:

عندج التهاب بسيط ان شاءالله هسه اكتبلج قطرة وبنسلين القطرة مرتين باليوم مره الصبح ومره بالليل والبنسلين مرة وحده بس باليل ...

هزيت راسي اي ..

كتبلي الوصفة وراح اخوي يجيبها وكعدنه انه وفهيمة بره نتانيه ...

جنت انه آخر رقم بالعيادة ماكو وراي مراجعين ..

العيادة سنطة انه وفهيمة ساكتات وهذا اللي يطي الارقام طلع وكف بره ..

طلع الدكتور من غرفته باوعلي واتمشى شوية ورجع رخل للغرفة ..

من دخل للغرفة صاح علي :

ياس .. ممكن تجين شوية ؟

باوعتله مستغربة :

ليش؟

الدكتور : اريد اعيد الفحص اريد اتأكد من التشخيص لان يجوز اكتبلج بعد قطرة ..

خفت كلت اكيد عيني حالتها مو زينه ..وفعلا هي جانت حمره مثل الدم وتوجعني ..

كمت رحت دخلت وياه للغرفة وكلبي يدك ..

فهيمة مادخلت وياي لان جانت اتدك على اخوي ..

اشري اكعد عالكرسي وكعد كبالي وجاب اللايت فتحه على عيني وبده يباوع بعيوني ..

الدكتور : ياس؟

ياس: ها دكتور؟ تره خفت ..

الدكتور : وين بيتكم؟

كتله باستغراب :

ليش؟ شبيها عيني؟.

ضحك على كيف كلي:

مابيها شي بس حبيت اكسر حاجز الصمت ..

كتله:

شنو ؟

اتدنه علي وقرب وجه مني ..

استحيت رجعت ليوره ..

الدكتور : متزوجة ياس؟

هزيت راسي لا ..

الدكتور : مخطوبة ؟ مرتبطة؟

ياس: لا ... شنو يعني مرتبطة؟

ابتسم كلي:

يعني اكو احد ابالج .... تحبين يعني؟

رديت عليه بعصبية:

مايخصك .. شنو هالحجي هذا؟ اعرفك تعرفني وتسألني هيج سؤال؟

كمت اريد اطلع حسيته راد يلزم ايدي انرعبت راسا طلعت ركاض من الغرفة ..

رحت لفهيمة كبل كتلها:

كومي عفية خل نطلع نوكف بره ..

فهيمة : باردة ولج اخوج كال جاي الصيدلية هاي مابيها قطرة ورايح لغير صيدلية ..

ياس: دكومي فهيمة عفية ..

فهيمة : ياا شمالج ولج ؟ شكلج الطبيب؟

ياس: ماكلي الخ....

فهيمة : جاشمالج اتسودنتي؟

ماحجيت سمعت صوت باب غرفته انفتح عفت فهيمة وطلعت بره بالبرد اتاني اخوي ..

بدت الدنيا تنكط مطر خفيف وانه لابسة عباة ولافة جواها على جتفي شال ..

حسيت واحد طلع التفتت شفته اجه وكف يمي كال:

شبيج هيج خفتي مني تره ماقصدي الي فهمتيه ..

ماحجيت ..

الدكتور : انسة ياس انه انسان متعلم وابن ناس واعرف العيب والاصول ..

درت عليه وانه احس قطرات المطر تطيح على وجهي كتله:

واليعرف الاصول يكض ايدين بنات العالم؟

ابن الناس لازم مايتجاوز حدوده ويه بنات الناس مو هيج؟

الدكتور : اي صحيح كلامج .. بس انه انعجبت بيج ..

عرفته واحد لعبي ويريد يسوي روحه معجب ومن هالسوالف الشبعانه منها وين مااروح لازم يذبولي الرقم ويتبعوني ويسمعوني والوان الحجي ..

هالمره هذا راد يتجاسر ويكض ايدي وهسه جاي يقنعني بجم حجاية جذب هو انعجب بيه ..

بيمن انعجبت بعيوني التك وتك ...

ياس : دكتور انه لامال عجبيتي ولامال حبيتج ولامال وين بيتكم اريد اجي اخطبج ..

بهالاثناء شفت اخوي جاي من بعيد ركضت لفهيمة كبل لايشوف هذا واكف يمي بالباب ..

فهيمة : يالله خل ندخل الدوة للطبيب ..

ياس : لا لا مايحتاج غير هو كالنه شلون نحطه وشوكت بعد عليمن نرجعله ..

مضر اخوي باوعلي كلي بنظرة ونبرة الشاك اكو شي :

شبيج؟

ياس : ماكو شي سلامتك بس بعد هو غير كال القطره مرتين والبنسلين بس بالليل .. بعد عليمن نرجع عليه ..

خزرني ومشى كال :

يالله امشن للسيارة بسرعة ..

رجعنه لبيت اختي جورية حتى ناخذ عمي وابنه ..

طبينه لحوشهم دخل مضر كبلنه وانه وفهيمة نمشي وراه بس من دخل للبيت جرتني فهيمة من ايدي وخذتني للزوية مال المطبخ ..

عبالي تريدنه ندخل من باب المطبخ بس من وصلنه للزوية الظلمة كالت :

شمالج ولج .. شسوالج الطبيب ؟

ظليت مخلوسه وبنفس الوقت من اتذكرت لعبت روحي ...

فهيمة : احجي شبيج؟

ياس : مابيه شي ..انتي شبيج؟

فهيمة : علينه ... اعرفج بيج شي طلعتي من يم الطبيب وجهج مخطوف ومارضيتي ترجعين يشوف الدوه ويكتبلج عليه ..

ياس : هسه شتردين؟

فهيمة : يااا خايبه تحجي انه اختج اريدلج الزين قابل غريبة .. امداج اي والله ..

دخلت كرامي فهيمة وهي تدردم لان مارضيت احجيلها عالصار ويه الطبيب ..

بقيت واكفة شوية متانية فهيمة تبتعد حتى اطب وراها حتى تلتهي شوية ويه جورية بالسوالف والسلام وتنسى ..

اباوع على باب المطبخ وشفت بصف الباب من الصفحة الظلمة ضوه شوية ..

ظليت ابحلك بعيوني شنو هذا الضوه .. مثل النقطه حمرة ...

اتدنيت شوية ... اختفى ...

خفت اتنديت للباب ردت ادخل رجعت شفت الضوه وحسيت اكو حركة ..

اتخلست ويبست رجليه ...

اجه صوت واحد ينحنح ( احم ..احم ) خلسني جفلت ..

خليت ايدي على كلبي من الخوف ..

- هههه شبيج خفتي واتجمدتي ..

بالبداية ماميزت الصوت وظليت جامدة بمكاني لثواني ..

بعدين اتوقعت هذا صوت كرم ابن عمي جبر بلعت ريكي كتله :

جفلتني اشوف ضوه احمر بس عبالي اكو احد هنا ..

ضحك على كيف وكال:

جنت ادخنلي جكارة عالسريع يم الباب بعدين سمعت البزازين هنا يتعاركن واجيت اطردهن وبقيت ادخن هنا بالضلمة ..

بقيت ساكتة .. مااشوف وجهه لان واكف بالضلمة بس انه واكفه بالضوه هو يكدر يشوفني ..

ياس : براحتك .. يالله من رخصتك ..

نزعت الشحاطة وجاي افوي للبيت سمعته كال :

شلون صارت عينج؟

ياس : الحمدلله احسن شوية ..

كرم : سلامات ان شاءالله ..

ياس: الله يسلمك ..

فتت بسرعة للمطبخ خاف اخوي مضر يطلع ويشوفني واكفة احجي وياه وهو خاتل بالضلمة شيكول بالله ...

دخلت نزعت عباتي وكعدت يم فهيمة واحس مبين على وجهي جنت احجي وياه ..

كلبي يدك ..

جورية راحت للمطبخ تسوي عشه وصاحت علي اساعدها ..

جورية : شبيج ياسه .. وجهج مخطوف وساكته ماتحجين ؟

ياس: مابيه شي شبيجن اليوم وحده تهدني ووحده تكضني ..

جورية : ياهي بعد سألتج؟

ياس :فهيمة هم لزكتلي شبيج ..

جورية : هسه معناها حجي صدك ومو بس انه منتبهه حتى فهيمة ... كولي شبيج؟

ركضت طليت من باب المطبخ باوعت على مكانه خاف بعد واكف مالكيته ..

سديت باب المطبخ ورحت يم جورية كتلها:

ولج كرم ابن عمي جبر جان واكف هنا بالزوية مال مطبخكم بالضلمة من طبينه انه وفهيمة بس ماشافته فهيمه انه شفته من طبت فهيمة وظل وكاف يحجي وياي ..

التفتت علي جوريه كالت :

فلشج كون يامفلشه ... شيحجي وياج؟ هو مو معرس ..

ياس: شمدريني معرس لو مامعرس بس سألني شلون صارت عينج.. كتله زينه الحمدلله ..

جورية : بس هاي؟

ياس: اي والله بس هاي..

جورية : ياسه ديري بالج هذا من اهل بغداد يعني يوديج للشط ويرجعج عطشانة ..

ياس: ياخايبة شبيج هيج زفيتيني هو انه شسويت هو واكف بالضلمة وسألني شكله ؟ لاتسألني ولاتحجي وياي خاف توديني للشط وترجعني عشطانه ...

جورية : عطشانه ..

ياس: ياهي ؟

جورية : خايبه انتي تكولين عشطانه كتلج عطشانه ..

ظلينه انه وجوريه نتداهر وكل شويه تزفني ...

بعدين رجعنه لبيت اهلي من بعد العشه ..

الدرب بعيد وظلمة من الولاية لبيت اهلي ...

نعست وغفيت على جتف فهيمة ..

بالطريق سمعت فهيمة تسولف ويه مرت عمي ماادري على شنو ...

بعدين انتبهت ..

فهيمة : لايجون عليها هواي والله بس الولد يكولون بعدها زغيرة ..

............................

فهيمة : لا لو على خالي وخالتي من زمان يزوجونها ماعدنه بنية تظل لهيج عمر بدون زواج لاعدها مدرسة ولاشي المن ظاله ..

.............................

فهيمة : الولد ماقبلوا تكمل مدرسة والله هي جانت شاطرة وتحب المدرسة بس بالاخير ظلت تضوج منها لان الفروخ بالشارع وبالمدرسة يقلدون على عينها ..

..............................

فهيمة : اي اعرف بس كبل ماكو عدسات مانعرفها وهي هم تخاف تلبسهن شوفت عينج بس لبستهن البارحة دقيقة اليوم عينها انخبطت خبط ..

.............................

ماجنت اسمع مرت عمي شتكول بس عرفت من ردود فهيمة عليها ..

ثاني يوم كعدتني امي من غبشة حتى اسويلهم سياح ..

وكفت كبال الطباخ اسيح واطيهم حتى ياكلونه حار ..

سمعت ابوي وعمي يحجون عالبيت .. البيت الكاعدين احنه بي بيت ورثة بيت جدي جان وعمي جاي يريد حصته ..

ابوي صح عده خير بس مايبقل يطلع من بيت جدي سمعته يعرض على عمي هو يشتري حصته ..

مرت عمي : ياسه شنو هالفن والابداع عاشت ايدج هاي رابع وحده اكلها ..

ياس: الف عافية

مرت عمي : هذا الكيمر انتو مسويه؟

امي : اي ... ياهي من البنات كاعدة تروح تحلب الهايشة ناخذ الحليب ونفوره ونطلع الكيمر ...

مرت عمي : ياسه هم تعرفين تحلبين البقرة ..

التفتت عليها كتلها:

اي عمه اتعلمت ... بالاول جنت اخاف بس بعدين البنات علمني ..

امي : ههههه جانت تخاف منها .... ماعدنه حلال احنه بس هاي جابوها لابو مصعب هدية ..

مرت عمي : هههههه اول مره اسمع بهيج هدية ..

امي : اي والله ... صارت طلابه مناك غاد يم الشط المعدان بيناتهم ... وصارت بيها اكتلني واكتلك علمود جهالهم متعاركين وواحد فاشخ الثاني بصخره ... تدخلت العالم حتى تفكهم وتصالحهم مافاد آخر شي اجو على ابو مصعب وابو أمير (عمي الثاني ) وخذوا وياهم بعد شيوخ وسادة وحلوها... من حلوها واحد منهم جاب لابو مصعب هاي الهايشة ..

بس الدجاجات عدنه من الاول ياس من بطلوها من المدرسة ضاجت بالبيت جابولها اخوانها دجاج وارنب زغيرون وبشه ظلت تتونس بيهن انوب اطتهن بقن بس الدجاجات علمود البيض خلتهن ...

مرت عمي : اي بعد عليمن تطلع عمها طبيب بيطري واني هم ههههه ....

بس والله حرامات بطلتي من المدرسة .. لازم ترجعين هذا مستقبلج والشهادة سلاح للمرأة باجر يجوز تحتاجيها وتفيدج ..

ياس: مايرضون اخواني ..

ابوي جانت كلمته وحده مايقبل بيها نقاش ولايقبل اعتراض لامن ولد ولامن بنيه وخصوصا البنات ...

جنت اتمنى عدي تليفون مثل البنات بس مايقبل جنت اتمنى البس بجامة بالبيت بس هم ممنوع مايقبل جنت اتمنى اطلع ويه البنات من يرحن للولاية يتسوكن بس ممنوع ..

لااطلع لااطب ولااشوف احد ..

جانت جورية اختي مرات تشوف سوالف وهدوم عالفيس بتليفون امير رجلها ومن يجون تراوينياهن ومرات جنت اخليها تطلبهن الي بسكوت بدون مااحد يدري ...

البسهن بغرفتي واوكف كبال المراية اتفرج عليهن وافتح شعري واخلي مكياج ... جنت العب لعب تالي الليل من ينامون كلهم ..

اسد علي باب غرفتي واظل البس وانزع ...

مليت اتوسل بأمي وابوي على كل شي ومايفيد كله مرفوض امي جوابها الوحيد هو :

باجر من ترحين لبيت رجلج سوي شماتردين ...

اففف زين شوكت يجي رجلي .. وينه .. مو جنه طول؟

شوكت اعرس وافتك ..

جنت اتمدد عالجرباية واصفن واتخيل شكل الرجال اللي راح اتزوجه ..

اسمر حلو مملوح ... جسمه متروس وجتافه عراض وعيونه سووود كبار ..

ويسمعني اجمل كلام الحب والغزل ..

يسويلي شكو شي انحرمت منه عد اهلي ...

اويلي وينك يمعود مو انكطع كلبي ..

اريد اعررررسسس ...

بالليل من جانوا بيت عمي عدنه جانوا الزلم يكعدون بحدهم والنسوان بحدهن ..

وره العشه جنت اسويلهم الجاي الزين وسلامة عدنه تحب تسوي كيك وهالسوالف ..

تسوي دائما تتعلم براسنه ومره تصيب ومره تخيب بس جنه ناكله غصبن عنه لان سلامة عقلها زغير وتزعل ...

مرت عمي جان كل شي بالنسبة الها غريب عدنه ..

ليش البنات يبطلن من المدارس؟

وليش ماعدهن تليفونات؟

وليش ممنوع يطلعن من البيت الا كلمن ويه رجلها؟

جانت هواي تستفسر وترفض هيج اشياء وانه جنت متونسه اول مره اشوف وحده مثل تفكيري ..

مو مثل امي كله تجعم بيه ..

مرت عمي : ياسه حبيبتي لازم ترجعين تكملين دراستج واني بس اروح اشتريلج تليفون وادزه الج بيد عمج من يجي مرة اللخ ..

ياس: ياريت عمه والله متت من الحبسة بس ابوي والولد مايقبلون ..

امي: لا بعد كبرت شتسوي بالمدرسة .. البكدها عرسن وخلفن .. هي هم باجر عكبة تعرس وتلتهي ويه رجلها وفروخها ...

والتليفون ابوها مايرضى كل مره تكله يكلها اطيج شكد ترديت اشتري هدوم اشتري ذهب بس تليفون لاااء ..

سكتت مرت عمي واني هم سكتت لان اعرف جوابهم ماراح يتغير ...

ظلت امي تسولف ويه مرت عمي وتسألها:

الولد وين وصلوا؟بعدهم يدرسون؟

مرت عمي :لا دراستيش .. خلصوا كرم عنده مختبر مال تحليلات ورضا عنده مكتب هندسي ابوه فتحله ...

امي: هو كرم مو عرس؟

ردت مرت عمي بنبره غريبة :

إييييه .. عرس ..

امي: عده جهال؟

مرت عمي : لا ماعنده

امي : شعجب من زماان عرس ؟

مرت عمي : بعد الله ماقسم .. مرته مايصير عدها ..

امي : ياا يمه مصعب .. مو خوش حجي ... جا مااخذ وحده ثانية؟

مرت عمي: الله كريم كلنه ماصارلهم هواي ٤ سنوات نصبر والله كريم .. بس هي ....

سكتت مرت عمي بس افتهمنه هي ماحابه جنتها والظاهر بينهم مشاكل ..

بس المصيبة امي ماتسكت :

يالله الله يعاينلهم .......

والاخر .. اخوه؟

مرت عمي: رضا هم متزوج بنية مهندسة جانت وياه بالكلية وماقبلوا يكعدون ويانه رادوا بحدهم كنالهم كيفكم عدهم بنية ومرته هسه هم حامل ...

امي: اي خوش نعمه .. والبنيات ؟

مرت عمي : ريم هم عدها بنية وهم حامل بيها ولد .. الاسبوع الفات اخذت سونار .. ولنى زغيرة بعدها بالثاني متوسط بس وكحة هههه مونستنه والله لسانها طويل تحشش على ابوها وعلي وعلى اخوانها هههه محد خالص منها ...

ابتسمنه كل احنه ...

راحوا بيت عمي رجعوا لبغداد بعدما اتفقوا عمي وابوي على موضوع البيت ...

حسيت البيت ضوجه صار جانت مرت عمي مونستنه تسولف وتضحك وتسأل على كل شي ..

هسه رجعت بحدي فهيمة وسلامة كل وحده تخلص شغلها وتلتهي برجلها وجهالها ..

وامي تلتهي بالبيت تطلع شغل من جوه الكاع تسويه حتى ماتبقى كاعده ...

وانه اخلص شغلي واظل كاعدة بغرفتي لو اطلع للحوش والوراني الم نبك ..

ساعات اكعد اسولف ويه الدجاجات بس احسهن يباوعلي مستغربات يمكن يكولن شمالها هاي المخبلة ؟

شتحجي ؟

والله دوختنه ...

ومرات اطلع كتبي مال المدرسة لهسه عدي ضامتهن .. اقرا بيهن شوية واتمنى لو اكمل متوسطة ...

بنات عمي يدرسن بس انه يعني هاي الزغيرة احسن مني واصله للثاني متوسط وانه ضاله خلصت السادس وبس كلولي بطلي بطلت ..

امداج

هسه شدعوه عليج لو ضحكوا عليج الجهال قابل اول مره جا اتحملتيهم ... احسنلج هيج محبوسه وتاليتج مخبلة ..

خلي الدجاج يفيدج .. حتى الدجاج يضحك على حالج

الثالث من هنا

تعديل المقال