رواية بنت المصري ومؤذن الحي الفصل التاسع 9 بقلم جمانه السعيدي
منى....اصعب ايام مرن عليه ذني الايام
كنت اتهرب من امي وابد مااوكف ولا امشي كدامها
من تدخل للبيت اركض اكعد على الجربايه والم نفسي حيل
حتى لا تشوف بطني
صح هيه كانت شاكه اكو شي لان وجهي تغير
وجهي ضعف وصار عندي كلف حمل
امي...شبي وجهج هيج صاير اصفر وهذا الكلف شنو
منى...من القرايه والتفكير
امي...على كيفج شنو طارت الدنيا
كل النهار حابسه نفسج بغرفتج اطلعي اتحركي
مجاي اشوفج اطلعين
منى...بس اكمل اطلع وافتر واتونس
امي....الله يجازي تعبتج خير
بشهر السابع امي انشغلت عني فد مره ماشاء هذا الشهر اكثر شهر اجت الامي بي ولادات بليوم الواحد ولادتين واكثر
وهيه مامصدكه لان بيتنا بقا عليه شوية شغل ويكمل
هيه تريد ننتقل للبيت الجديد ونرتاح
اجتنا خاله سعاد مرتين من اسمع صوتها اسوي نفسي نايمه
حتلو امي تكعدني مااكعد
اذا طلعت من غرفتي ورحت سلمت عليها
راح أفضح نفسي
بس اسمع صوتها كبل اغطي وجهي واسوي نفسي نايمه
صراع ما ينتهي شسويت بنفسي
لو يرجع بيه الوكت جان كسرت رجلي ولا طلعت ذيج الطلعه
المصخمه
شكد مااحجي مااكدر اوصف الحزن الي جنت عايشته
حزن وهم وقلق
المهم امي بهذا الشهر ولادات مستمره
لو اجيب النسوان بيتنا لو تطلع البيوتهن
من تطلع من البيت اني انظف واطبخ واغسل ملابسها
وانضف غرفتها واعطرها خطيه تجي تعبانه
شكد تفرح من ترجع وتلكه البيت نضيف
والاكل جاهز على الطباخ تاكل لكمه وتنام كبل
جمانه السعيدي
تجي تطمن عليه بغرفتي وتطلع
اذا كعدت يمي شويه تبقى بس تسولف بلبيت
وشلون كمل وصار حلو
امي....حتلو كمل البيت ما ننتقل اله تكملين امتحانات
منى...انشاء الله
امي...مااريد اي شي يأثر على مستقبلج
اذا خلصتي امتحانات اخذج تختارين غرفه نوم جديده حلوه بس كون اطلعين معدل وهذا تعبج مايضيع
منى...انشاء الله
امي...بس تخلصين اخذج دكتور جلديه على هذا الكلف
هذا الكلف يطلع من التوتر
شلعبت بيج الامتحانات دمرتج دمار ميخالف هانت
انشاء الله
منى.... انشاء الله خير
امي...بعد لا تنضفين وطبخين اني من ارجع اشتغل
منى... عادي احرك جسمي شويه وهم انتي تعبانه خطيه عليه لازم اساعدج
امي....ولله ياماما انتي ماكو منج خوش بنيه ومطيعه
الله يستر عليج
منى...اي ولله اني محتاجه هذا الدعاء حيل
جمانه السعيدي
منى......من دخلت شهر الثامن حيل اشددت على امي اخاف تكشفني
منى...ماما ابد لا تجين يمي ولا تسولفين عليه قربت الامتحانات حتى اكل لا اجيبلي اني من اجوع اطلع اكل
امي... بس اشتاقلج
منى...بس هذا الشهر اتحملي
امي...أمري الله
بهذا الشهر كمل بيتنا بناء وامي استلمت المفتاح
توسلت بيه اروح اشوف البيت وياها بس اني ما قبلت
كتلها من اخلص امتحانات
اذا ماعدها ولاده تروح تنظف البيت اطلع مخلفات البناء
وتغسل السيراميك
بس البردات والفراش ماقبلت تشتريهن تكول من تخلصين
امتحانات نروح نشتريهن سوه
اغلب الوقت بهذا الشهر امي ماموجوده بلبيت
شكد فرحانه بيتنا الجديد تحس نفسها سوة انجاز عضبم
كلما تشوف البيت ترجع طايره من الفرح
وبس تسولف عنه
منى...جاي امر بالسوء ايام بحياتي كل يوم يمر عليه سنه م افكر شلون راح اولد
وشلون راح اتصرف وهذا الطفل شنو مصيره
وشلون راح اتخلص منه
ياترى راح اكدر اولد وحدي وهاي اول ولاده
ايجوز اموت بسبب الطلك ايجوز مااكدر
يارب اني تبت وانت تعرف هاي التوبه نصوحه وبعدها اني ماغلطت ولا سويت شي محرم
التزمت بصلاتي وعباداتي
هون عليه الجاي هون عليه كلشي صعب راح يمر عليه
هون على امي وجعها مااريد اخسرها بسبب غلطه
اني غلطتها
لاتحرمني منها هون عليها تعبها وحزنها
اذا صار شي الامي بسببي مستحيل اكدر اسامح نفسي
هون عليه كل الاشياء الصعبه الي راح تمر عليه
دخلت اول يوم بلتاسع بيومها امي طلعت من الدوام للبيت
لان اكو نقاط كهرباء ماكاملات
والكهربائي متفق وياها يطلع العصر يكملهن
لليل رجعت حيل تعبانه كبل نامت
بليل حسيت عندي وجع اني اعرف كل سوالف الحوامل من امي دائما تحجي كدامي
اليل كله مانمت الوجع يروح ويجي كل ساعتين هيج
يجيني الوجع ويروح
صبرت نفسي وتحملت شلون مجان
اتوقعت من تطلع امي يزيد الوجع بلكت اكدر اجيب وحدي
وامي بلدوام حتى ما تعرف مصيبتي
فورت مي وهيل وشربت
اروح وارجع بلبيت بس الطلوك مو حامي كلش
بعدني طلكه عن طلكه وقت شلون بيه
يارب سهل امري يالله
جمانه السعيدي
للساعه ١٢ الضهر زاد الوجع اكثر كمت امشي
واتحرك شربت زيت زيتون بلكت اكدر اولد وحدي
اشتد الوجع اكثر واكثر
كمت ابجي خفت اموت وحدي بلبيت
اريد امي تجي تساعدني بعد مااكدر على هذا الوجع
شلون بيه
للساعه ثنتين واني اتلوى من الوجع
ثنتين ونص رجعت امي للبيت
دخلت امي رحت الغرفتي بس مااكدر امثل اكثر
مااكدر أبين اني زينه
الوجع اخذني حيل
بس سمعتها دخلت اني كاعده على الجربايه
ولا زمه ضهري احس ضهري انفتح بلنص من كد الوجع
بعد مااكدر اتحمل الوجع اكثر مستحيل شي لا يطاق
صارت الساعه ٣ واني بعدني اتوجع
صحت ولج يمه الحكي عليه
يمه بعد مااكدر تعاليلي
جنت كاعده على الحربايه ومدنكه راسي حيل
دخلت امي....هااا ياستار شبيج
رفعت راسي بس شفتها واجت عيني بعينها
كمت ابجي ابجي بحزن عليها وعلى نفسي
امي...شكووو شبيج
منى....اهي اهي اعذريني غلطت ولله بدون قصد
باوعت عليه شافت بطني بقت واكفه بلنص لا قربت عليه ولا ابتعدت اتباوع عليه وتحاول تفهم شكووو
عيونها جاي تشوف شي وعقلها يترجم النضره غير شي
منى....ولله مو قصدي اهيييي ولله غلطه بدون قصد
راح اموت يمه فدوه الوجع اخذني
بس تباوع عليه بين فهمت وبين ما مصدكه الشي الي جاي تشوفه تريد اجذب عيونها
منى...ساعديني ساعديني بعد مااكدر بعد مااكدر
راح اموت من الوجع
بقت واكفه نضرته نضرت غضب على حزن
بس مجاي تنطي اي ردت فعل من كد الصدمه ما مصدكه عيونها ولا مصدكه الشي الي جاي تشوفه
منى....ساعديني الله يخليج واني احجيلج كلشي
اني غلطت اعرف نفسي غلطانه
بس ولله مو قصدي انضحك عليه حاولت احجيلج
بس ماكدرت خفت عليج ولله ماخفت على نفسي خفت عليج لا يصير بيج شي
ساعديني من البارحه اطلك
لو تساعديني لو تموتيني اني مااكدر اتحمل هاي النضرات منج
منى....فدوه يمه سامحيني سامحيني بعد كلبي هههههي
سامحيني اروحلج فدوه
غبيه وطايشه وغلطت ماعرفت اتصرف
واكفه وتباوع عليه خفت عليها اكثر ما اني خايفه على نفسي خفت يصير بيها شي بسببي
منى...كمت اريد اروح الزمها اهون عليها الصدمه
بس وكفت طك ماي الجاهل وحده
كمت ارجف من الخوف خايفه من الولاده وخايفه اكثر على امي خاف يصير بيها شي بسببي
امي....انتي حامل من يمتى وشلون
منى...قربت عليها ردت الزم ايدها سحبتها مني
منى...اني راح احجيلج كلشي صار بس ساعديني
جمانه السعيدي
امي....لا انتي مو بنتي مستحيل انتي منى الي ربيتها وتعبت عليها احرم نفسي حتى انتي تاكلين وتلبسين
ودرسين متحمله التعب والضيم علمودج
تالي هذا جزائي
حامل شلون حامل ويمتى ليش اني الي مجيبه النسوان كلها ماحسيت بيج
شكد عندي ثقه بيج بحيث انتي كدامي حامل وماشفتج
تخبلي اني قابله واجيب النسوان وبتي حامل كدام عيني وماشفتها ولا حسيت بيها
منى...اهي اهييي احجي عليه مو تيني اني غلطانه
اي شي تكولي صح انتي صح اني الغلط
امي....منيين ويمتى
اجاني الوجع صحت ااااا خ يابوي
امي...ابوج انتي ما احترمتي ابوج بكبره حامل منى انتي حامل ولله ما مصدكه عيوني
منى...مو قصدي غلطت كلنا نغلط
امي ... هيج غلط هيج غلط هاي جريمه مو غلطه
منى...اني اشرحلج كلشي بس ساعديني اااخ
امي...مااساعدج اريدج تموتين واخلص منج
انتي تستاهلين الموت
منى...كعدت على ركبي وكمت ابجي ابجي ومن يجيني الوجع أصيح اخ اخ بعد مااكدر
كعدت ولميت رجليه حيل احاول اضم الوجع
بعد مااكدر كمت اعيط بصوت عالي يابوي تعالي
يابوي راح اموت يابوي الحك عليه
اشتد عليه الطلوك حيل كمت اعيط بصوت عالي
طلعت امي من الغرفه
كلت خلاص منى راح تموتين وحدج هنا محد يريدج
بسبب عملتج هاي
شويه ورجعت عليه جايبه مشمع الولاده فرشته بلكاع
وخلت أدوات الولاده بلكاع
بدون ما تحجي ولا كلمه
شالتني من اكتافي وحاولتني على المشمع
خلت جوه راسي مخده صارت بين رجليه
دموعها كامن يجرن تمسحهن وتولد بيه
صاحت بيه بصوت عالي لا تشنجين نفسج راح يموت الجاهل رخي جسمج
بين تبجي وبين تحاول تساعدني دموعها تنزل نار على
رجليه
منى....راح اموت وووجع وووجع قوي
امي....هانت رخي جسمج رخي
منى... للساعه خمسه يله جبت
ماسئلت شنو ولا شفته بعيني هلكد ما تعبت
غمضت عيوني وبس ابجي مااريد اشوفه مااريد اشوفه بعيني جبت ولد أخذته امي كصت السر
وغسلتله وكمطته يبجي بصوت ناصي هلكد ما تعبان
رجعت عليه نضفتني ولبستني حفاض وملابس داخليه
غطتني اخذت الطفل وطلعت من الغرفه
منى...عندي وجع عندي تقلصات تعبانه هلكد ما طلكت
بقيت بلغرفه وحدي
اسمع الطفل يبجي بصوت ناصي
لليل رجعت عليه امي واني بس اتلوى من الوجع
امي...اكعدي احجيلي منو وشلون صار هذا الشي وشلون اني مااعرف
منى...حجيت كلشي من اول مره شفت هيثم الاخر مره طفر علينا للبيت
امي...ما استحيتي مو مني جان استحيتي من رب العالمين
جان كلتي الزنا من الكبائر
جان كلتي حرام عليه اضيع تعب امي واشوه سمعتها
اني حرمتج من شي خليت شي بنفسج
المن اشتغل وتعبانه
اذا عليه الراتب كافي على عيشتي حتلو ابقى بلايحار هم الراتب يكفيني وزايد عليه
كل تعبي علمودج اكول خطيه مااريد اخليها محتاجه احد
ماانقص عليها شي
يصير عدها بيت اذا ماارتاحت ويا زوجها ترجع تكعد بيتها
ليش هيج ولله حرام عليج
هسه شلون نحل هاي المصيبه مالكيتي غير هذا الدايح
اكيد انحكم إعدام حتى مانكدر نطالب اهله يصلح غلطته
انتي مو غلطتي غلطه عاديه انتي دمرتيني اليوم
انتي ذبحتيني ضيعتي حياتي
اني عايشه علمودج يعني انتي الحلم بلنسبه اليه
هيج اسوين بيه
جمانه السعيدي
منى...ماكدرت ارد عليها بس ابجي كل كلامها صحيح
اني غلطانه من راسي الرجليه
طلعت امي من الغرفه وبعد مارجعت عليه
بليل جابلتي اكل خلته ونطتني مهدء الام وطلعت بدون ما تحجي اي كلمه
وقت اذان الصبح سمعته اتصلي وتبجي
شكد بقت تبجي امي تبجي بسببي
امي الي عايشه علمودي تبجي بسببي
ورا الصلا بعشر دقايق سمعتها فتحت باب الشارع وطلعت
شويه ماكو اقل خمس دقايق ورجعت دخلت وطبكت الباب
مااكدر اسئلها ولا اريدها تشوفني وترجع تتوجع بسببي
ثاني يوم من طلعت للدوام طلعت اشوف الطفل
مالكيته بلبيت
الله اعلم امي وين اخذته
حتى مااكدر اسئلها علي
ساعه ورجعت للبيت يمكن طلبت اجازه ورجعت
دخلت غرفتها وبعد ما طلعت
بيومها اندكت الباب اتكسرت اتكسر ما طلعت من غرفتها
ولا فتحت الباب
والتليفون احترك عبالك ما تسمعه
قبل بس تسمع التليفون والباب تركض
تكول هذا رزق رب العالمين دازه النا
خايفه عليها خايفه لا يصير شي بسببي
يارب اذا اكو وجع او مرض خلي بجسمي وابعده عن امي
يارب ساعده تتخطى هاي المحنه
