رواية الوجه الآخر للرحمة الفصل الثامن 8 بقلم عبير ادريس
المكان (مستشفى الأمراض العقلية)
الساعة التاسعة والنصف صباحاً (بتوقيت بغداد )
روتين الطبيب المقيم فعلياً بالمستشفى النفسي ، يكون بهذا الشكل...
أول واحد يدخل على المرضى الصبح...
يشوفهم بشكل يومي
يتعامل ويا النوم ، الأكل ، السلوك ، النوبات ، المشاكل مع الكادر ، يكتب تقارير يومية ، وينفذ أوامر الاستشاري ...
يتحمل المزاج السيء للمرضى منها الصراخ والضرب وحتى الإهانات (بالمختصر هو وجه المستشفى اليومي بالنسبة الها مو الاستشاري )
ريحانة
صباحي ما يبدأ بفنجان قهوة او كوب جاي وية الريوك ، او لمة اهل ..
صباحي يبدأ بصوت المفاتيح وصرير الأبواب المزعج ، وصراخ المرضى اللي فقدوا الإحساس بالوقت ، كل هاي الأشياء تخليني اتوتر واتنرفز من اي شخص يدخل للغرفة سواء يريد يعاملني بطيب او بعنف الكل عندي صاروا سواسية ، الكل يريد يأذيني بس بطريقة مختلفة..
بهذا اليوم ماجنت نايمة زين ، بالعادة نومتي تكون قلقة وما اغمض عيوني الإ والصبح طالع والشمس فايتة لغرفتي
جنت كاعدة على السرير واستمع لصراخهم بأعصاب مشدودة ، ركبي شادتها لصدري
وشعري نازل على وجهي مثل الستارة ..
دخل الطبيب المقيم ، بملامحه الباردة المرهقة المنهكة بسبب عمله المتعب بهذا المكان ..
الهالات تحت عيونه اقدم من مناوبته بهذه المستشفى ..
تقرب مني صبح علية بحماسه المعهود وسألني عن وضعي..
نادر : صباح الخير ريحانة شلونج اليوم
تنهدت ومارديتله السلام
وكف بعيد عني تارك مسافة محسوبة بيني وبينه
نادر : نمتي زين ؟
سؤال روتيني حقير ومستفز محسسني كاعدة بفندق ومتنعمة بالهدوء والخدمة الخمس نجوم ..
رفعت راسي باوعتله بتعب ، رديت بدون نفس
ريحانة : انت شنو تشوف ؟
نادر : ما اعرف اني اسأل
ريحانة : لا
نادر : ليش ؟
ريحانة : ماتعرف على اساس
نادر : انتِ احجيلي
ريحانة : انت شايف هذا المكان يصلح للنوم العميق ؟
نادر : ممممم الصراحة ؟ في بعض الأحيان لا
ريحانة : إذن ماكو داعي لسؤالك السخيف
دنك يكتب ملاحظته ، بعدها رجع سألني
نادر : أكلتي ؟
ريحانة : لا
نادر : ليش ؟
ضحكت
نادر : ليش ما أكلتي ؟
ريحانة : اكلكم وسخ ومطيب مابيه نكهة وأغلب الأحيان تقدموه بارد وجفيان شر ، رفع عتب بين قوسين
رفع عينه عن الدفتر باوعلي وكال
نادر : ليش وسخ ؟ ماشفت بيه شي ؟
ريحانة : اكلت منه ؟
نادر : لا
ريحانة : إذن تنجب وما تسأل اسألة سخيفة مثل وجهك
تقدم خطوة وهمس
نادر : عيب نتجاوز تمام ؟ و اليوم لازم نسوي فحص
ريحانة : ما احتاج
نادر : مو انتِ تقررين احنا نقرر
ريحانة : ومنو انت حتى تقرر عني ؟
نادر : طبيبج
ريحانة : على نفسك طبيب مو علية
مد إيده لمعطفه وكال
نادر : اذا تعاندين ، راح نضطر نتعامل وياج بطريقة ما تحبيها ...
ريحانة : جرب وشوف
تقدم خطوة كمزت من فراشي وكفت كباله رافعه اصبعي بوجهه مهددة ..
ريحانة : لا تقترب ، ولا تحاول مجرد محاولة بسيطة تلزمني ، ولا تحجي وياية كلمة ، صوتك ما اسمعه
دخلت ممرضة على صوتي تقربت من الطبيب وكالتله
_ دكتور خليها لا تتقرب منها
نادر : شلون ما اتقرب صارلها يومين بدون أكل وما تقبل تاخذ علاجها ونومها مخربط هاي كلها تتسجل علية مو عليها
حجاها وتقرب يريد يلزمني ، صرخت بصوت عالي وضربت الميز بيدي بقوة ...
ريحانة : كلت لا تتقرب حذرتك أكثر من مرة تنتبه لتصرفاتك وانت ماتستجيب إلا أأذيك يلة ترتاح ؟
ابتسم مستهزء
نادر : هو منو لازم يستجيب الدكتور لو المريض ؟
صرخت بصوت عالي وكمت اهوس بالغرفة
ريحانة : بالكوة تسووني مريضة بابه مابية شي مو مريضة اني كوة هي خوما كوة
نادر : مو مريضة بس لازم تاكلين وعلاجج تاخذيه وضروري تفحصين
ضحكت بهستيريا ، تقربت منه ضربت دفتره
ريحانة : سجلوا يلة سجلوا ، تقرير اليوم يثبت للمرة اﻷلف صحة كلام الدكتور نادر ، بأن ريحانة مريضة بربع عقل ولازم تعالجوها..يلة اكتب شكو صافن بوجهي ؟
بلع ريكه تراجع خطوة ورا وكال
نادر : احنا هنا نريد نساعدج ماعندنا اي عداء شخصي وياج
صرخت بوجهه
ريحانة : كلت ما أريد مساعدتكم شنو ما تفتهم عربي احجيها ألك بالانكليزي تمام احجيها
I don’t need your help.
هسه تمام فهمتني ياحضرة الدكتور الغير محترم ؟
نادر : لاحول ولاقوة إلا بالله العلي العظيم ، طيب ليش ؟
ريحانة : بكيفي ، بمزاجي ، براحتي ، هاي اني هيج ما اريد واحد يساعدني عجيب ...
بقى صافن علية ما يعرف شنو يحجي ، انهارت اعصابي
ريحانة : كل يوم تجوني ، تسألون نفس اسألتكم الغبية ، أكلتي ، نمتي ؟ شربتي ؟ وتكتبون بالدفتر ملاحظاتكم السخيفة التافهة وبعدين ؟ وين العلاج ؟ علاجكم شنو ؟ غير تخدروني ساعات وبعدها ارجع اتعس بألف مرة
نادر : هذا شغلنا ست
ريحانة : اذا تريد تحجي بالألقاب يامحترم ، كول دكتورة اني حالي حالك بس الزمن الأغبر ذبني عليكم
تقربت الممرضة سحبت الكرسي البلاستك وطلبت مني اكعد
ريحانة : تريديني اكعد هنا ؟
هزت راسها بأي
شلته وشمرته بالكاع انكسرت رجل من الكرسي ، عطت بيهم
ريحانة : يلة اكتبوا تقريركم ، احجزوني ، اربطوني ، عنفوني يلة شنو منتظرين ؟
همس من بين شفايفه
نادر : هو انتِ تنربطين ؟ تتعنفين ؟ احنا المعنفين
صحت بيه صوت خرسته
ريحانة : شنو كلت ؟ عيد الحجيته بلة عيده اذا انت رجال تعيده ..
نادر : هذا آخر انذار الج ، وبعدها تشوفين شي مني ما تحبين تشوفيه..
ريحانة : رجع يهدد وهو مو كدها ، رجع يهدد ، لك بابه لا تهدد وانت مو كد الشي التحجيه كم مرة صار اعلمك ؟
_ قصدج أكتلك
ريحانة : شنو كلتي ؟
_ ما كلت
ريحانة : لا خربطتي عبالج ما سمعتج ؟
نادر : راح اتركج للإستشاري يشوفج اني ماعندي شغل هنا بعد هذا اليوم ، حضري نفسج إله
ريحانة : انت والإستشاري مالتك والقندرة يلة ولي من وجهي يلة ...اطللعوا اغبياء
نادر : شو انتِ ماتحترمين ؟ شنو مو بعينج ؟ عيب عليج هيج تتصرفين
ريحانة : مخبلة ، اني وحدة مخبلة ، اهينك اضربك اطلع عيونك بإيدي بكيفي اسوي اللي يعجبني
نادر : شو مو بكيفج وغصب عندج تاكلين وتاخذين علاجج وراها تروحين وياية للفحص ، واني مسؤول عنج منا ورايح..
ريحانة : سويها ، انت رجال وكدها اجبرني يلة وكلني وشربني علاجي واخذني للفحص مو كلتلك جرب حظك الاسود وياية ...
نادر : لج وصلت حدها وياج كافي لا تتمادين أكثر
ريحانة : تماديت ؟ تضربني مثلاً ؟ تهيني لا سامح الله ؟
ألتفت على المريضة وكاللها
نادر : هاي صلفة مو مريضة والصلف يتأدب مو يتعالج
تقرب مني يريد يجتفني ، لزمني من كتفي بقوة وثبتني على السرير ، خلصت ايدي من جواه ودفعته ما وخر مني مديت ايدي لحلكه ماحسيت بنفسي شنو سويت غير دمه نزل على وجهي ، كام يصيح تركني وطلع ماسويتله شي هو يريد يعتدي علية ...
فرح : بس هذا الشي مو صح يا ريحانة تدرين اصابته قوية ، خيطوله حلكه منا ومنا..
ريحانة : يافرح شسويلة هو يعاند كلتله لا تتقرب وتقرب اكثر من المسافة المسموحله بيها ..
ضحك يوسف من گلبه وكال
يوسف : ميانة وياج كله فرح وكذا
فرح : اي خلف الله عليها محترمتني وتصيحلي فرح
شحجيلك دكتور شحجيلك خبلتنا ما خلينا طريقة تعتب علينا ماسويناها وعجزنا ، ضلت يمك اذا ما اجيت تموت من الجوع اليوم الثالث بدون اكل
يوسف : ان شاءالله ارتب وضعي واجي بلكت باجر او بعده ، المشكلة اهلي بوضع ما اكدر اعوفهم بيه ..
فرح : والله دكتور كل المرضى تحت السيطرة الإ هي خبلت الكادر خلتهم يمشون ويسولفون وية نفسهم ، ودكتور نادر ، بعد الصار طلب اجازة مفتوحة ويريد يقدم نقل لو تنسيب ما يريد يكمل ويانا
يوسف : شدعواه كيوت ، هسه مو شككت وجهي ما سويت سوايته واخذت اجازة وتركت العمل ، هو من اشتغل بهيج مكان شنو جان متوقع ؟ ياخذوه بالأحضان مثلاً ؟
فرح : دكتور بس مو هيج ؟
يوسف : هاي بعد شغلنا هيج
فرح : تدري المشكلة وين ؟
يوسف : وين ؟
فرح : هي مو مجنونة صاحية وتفتهم البارحة جنا نحجي اني وياها بشغلات تجاوبني بمصطلحات طبية وانكليزيتها قوية تحجي بطلاقة وجداً ذكية..
يوسف : غير دكتورة ودراستها باللغة الانكليزية وهذا سبب من اسباب تمردها ، حتى وان كانت تحتاج للعلاج فعلياً تشوف بهذا المكان دمارها مو صلاحها
فرح : والحل ؟
يوسف : خليني اجي والله كريم
شهم : ابو يعكوب وين صرت تعال
ألتفت يوسف عليه بعد التليفون عن إذنه وكال
يوسف : ثواني ابو فاطمة اجيتك
رجع حجى وياها نهى الأتصال ورجع للكعدة ، دخل كعد بصف شهم ..
شهم : المهم احنا ما نريد تعويض للضرر الصار لا الحريق ولا انحملكم الخسائر ، نريد ترجعون فلوس الفصل الأخذتوها منا بدون حق
بعد كلام مطول وافقوا ، وحجزوا اربع زلم منهم الى ان جابوا كل الفلوس حسبناها مضبوطة يلة طلعوهم ، وبهيج انسدت السالفة اما البنت ما رجعوها وياهم كالوا نريد نشوف شنو سالفتها ، يعني راح تبقى عندنا فترة من الزمن وبعدها يتقرر مصيرها ...
ثاني يوم دزوا خبر لبيت سارة ، اخذوا سعيد وياهم وراحولهم، دخلوا لبيت اهلها يوسف وشهم وفارس وتركوا نوح وسعيد بالسيارة ، وبلشت الكعدة ..
يوسف : الله بالخير
ردوا : الله بالخير والعافية
يوسف : عندكم خبر بجيتنا ؟
وجه كلامه لأبوها
_ نعم عندنا
يوسف : تعرفون السبب ؟
_ ترجعون سارة لبيتها وزوجها بمقابل تنفيذ شروطها
يوسف : وهي ؟
_ زوجة المرحوم يطلكها نوح وبعدها ياخذلها بيت هنا ببغداد
ابتسم يوسف وكال
يسوف : لا حجي ما جايين نرجع ولا انفذ شروط
_ شنو سبب جيتكم اذا ما جايين على البنية ولا تنفذون شروطها
يوسف : عندنا حك نريد نرجعه
_ وهو ؟
يوسف : بيوتنا وحلالنا كلها صارت رماد يعني خسارتنا جبيرة
_ واحنا شنو ألنا بخسارتكم ؟
يوسف : لا يابة ألكم ونص
ألتفت لشهم سأله
_ اخوك شيخربط ؟
شهم : محشوم ابو يعكوب ما يخربط ، أنتقي ألفاظك حجي عيب احنا بديوانك واذا ننهان ما نسكت
_واحنا شنو بخسارتكم ؟ جايين مناك لهنا كاطعين مسافة حتى تشمرون بلائكم علينا ؟
شهم : لا حجي احنا ناس تخاف الله ما تتبلى على الفقرا
_شنو تفسر حجيكم ؟ لنفرض انت بمكاني شنو تفسره؟
شهم : اشرحله الموضوع ابو يعكوب
يوسف : حجينا الله بالخير
_ الله بالخير اختصر اعصابي انتهت
يوسف : لا سلامتك من العصبية ، ونصيحة مني اذا تمالكت اعصابك بلحظة غضب ، راح توفر على نفسك ايام من الحزن والندم
_ اكولك انت مو جاي تمشيهن علية اني مو مخبل بمستشفى عندك
يوسف : كل دقيقة غضب تضيع منك ٦٠ ثانية من السعادة حجي...
جاوبه ابنه
_ انتم شنو جيتكم ؟ ناصبين علينا لو شنو ؟
يوسف : انت بالذات يا حلو اللي يكدر يضوجك بالنهاية يهزمك وانه رجال ما انصح بالعصبية ابداً
_ شلون يريدني اهينه وامسح بيه الكاع
يوسف جاوبه مستهزء
يوسف : لالا ما انصحك تتجاوز وتزعلني لأن الانسان الغاضب يتحول دمه الى سم ، وانه اخاف عليكم من دمي اذا تحول
صاح الحجي بيوسف فقد اعصابه وجسمه رجف
_ طلعوه منا لا اسوي شي كلنا نندم عليه ، ما اكمل الكعدة وهذا موجود ما اكملها
يوسف يباوعله مبتسم ، من فرغ عصبيته جاوبه بهدوء يحرك الاعصاب
يوسف : حجي ليش ما تمارس الرياضة بشكل يومي ؟ صدكني الرياضة مهمة تخليك تحس بالاسترخاء وصفاء الذهن والروح
_ ياربي شنو من ابتلاء هذا ، ماكو بيكم رجال يحاجيني شنو جاي يصير ؟
يوسف باوع على نفسه وكال
يوسف : كل هالطول والضخامة ما شايفني ؟ عيب عليك ياحجي عيب انتقي كلامك
ابنه جاوبه
_انت شبيك ؟ شارب شي وجاي ؟ لأن مو صاحي ابد
يوسف : في بعض الاحيان ضروري يغيب العقل عنا لأن اذا اشتغل راح يدمركم وما يبقالكم أثر
_ بنص بيتنا وتهددنا ؟ انت شنو من صلف
يوسف : اخذ نفس عميق وازفره راح ترتاح اكثر
ابنه كام ليوسف يريد يضربه كامله شهم وكف بوجهه رفع ايده مبتسم
شهم : ايدك حبيب لا ترفعها اذا رفعتها تخسرها
_ ومنو انت حتى تكسر ايدي ، هسه اتصل على الشرطة يسحلوكم سحل منا
فارس : ما انصح
حجاها وضحك
_ منو وياك انت حتى تحجي ؟ بعد علينا الزعاطيط
فارس : ديلة بلة انه زعطوط ؟
_ زعطوط ونص
فارس : ذيل الجلب هم عنده شوفة حال
انتفض وراح لفارس يضربه ، بحركة سريعة جتفناه
يوسف : مو من مصلحتكم تتصرفون هاي التصرفات ياعيني
حجى الأب
_ ما تحاجي اخوك على شنو يتجاوز
ألتفت لفارس وكاله
يوسف : عليش تتجاوز شضايعلك ؟
فارس : ماضايعلي شي ، غير خسران بيوت اثنين ٤٠٠ متر و١٥ بقرة وخير من الله دجاجات ، واحواض سمج تسممت ، وتصوبت برجلي هاهي ..
يوسف : قليلة ما تسوى
فارس : ابد
الحجي كام يصيح بخبال ، فارس ألتفت ليوسف وكاله..
فارس : احجيله للحجي مهارات تساعده يتخلص من الغضب وما يستعجل بقراراته
حجاها وضحك ، جاوبه يوسف
يوسف : ضروري يستعين بالله سبحانه وتعالى فهو خير معين
شهم : ويستعاذ بالله من الشيطان الرجيم
فارس : حجي اذا جنت واكف ننصحك تكعد او تغير مكانك لو تطلع وتخلينا نتفاهم وية ابنك او بنتك
كام يصيح وابنه هم يغلط ويتجاوز بالكلام
يوسف : عيوني حجي لا ترفع صوتك اكثر من اللازم مابينا واحد اطرش
فارس : حجي توضأ ، الغضب من نار ، والنار ما تنطفي إلا بالماي
_ اشو انعل ابوكم لابو الجابكم شلة زعاطيط مستهترة ودازيها علينا
فارس : حجي اجوك الزعاطيط احسن ما نجيب الكبار وتصير كعدة رسمية وتنحرج اكثر
_ من شنو انحرج ؟
فارس : من الراح تسمعه هسه
_ حاجوني فهموني لا تضلون تحجون زايد وتضغطون على اعصابي
فارس : حجي ليش تسويها بيها المافاهم وتريد منا نفهمك ؟
يوسف : الحجي كاعد يمر بتقلبات مزاجية وإكتئاب وقلق واتوقع صعوبة بالنوم
_ تحجون على شنو جايين لو شلون ؟
شهم : حجي الله بالخير
كام يعيط ويلطم على راسه
_ من وين ييجي الخير من وين كل شوية واحد صاح الله بالخير وراها تحركون اعصابي ، شبيكم منو دازكم علية
شهم : انت تعرف سبب جيتنا عليش تلف وتدور على نفسك
_ مامسوين شي احنا ما مسوين شي
فارس : بداية الاعتراف شفت عليش خلينا يوسف يحاجيك ؟
حجاها وضحك
_ على شنو اعترف كلت ما مسوين شي
شهم : حجي حبيبي اعصابك احنا جايين انشوفكم ونشرب هالجاي الطيب من ايد بنيتنا سارة ونطلع ماعندنا شي..
_ ماكو جاي ولا ضيافة ، تفضلوا بدون مطرود
شهم راد يجاوبه ، اشرله يسكت
فارس : ابو فطومة لا ترد عليه مقامك عالي ، خليني انه اجاوبه
ألتفت للحجي
فارس : حجي عليش تستبق الأمور ؟ المفروض منك تفهم سبب جيتنا بالأول
_ صار ساعة تسولفون بشي اني ما فاهمة ، وخيط وخرابيط ، شرايدين من الأخير
فارس : بنيتكم الرقيقة الهادئة ، من خطبناها كلتوا ما الها حس ، شتحاجوها تكول تم ، بس حجي احنا بعدنا ما محاجيها حركت بيوتنا وحلالنا وبموافقتكم
_ شنو ؟ عيد السمعته
فارس : ياجماعة نطقي صحيح للحروف ؟ لو جاي تطلع وياي بالهندي
شهم : لا صحيح ابو الفوارس فاهميك كمل
فارس : عليش يكولي عيد الحجيته ؟
يوسف : عيدله شكو ورانا كاعديله هنا للصبح
فارس : صار لخاطركم راح اعيدله الحجي
فارس : حجي حبيبي بنتك سارة حركت بيوت اخواني وحلالنا واحنا جاييك نريد حگنا هيج مفهوم الحجي؟
_ ماكو هيج شي ، يلة تفضلوا برا
فارس : كبل لا نتفضل برا صيحلنا البنية نحاجيها
_ شلون جاي يتبلون علينا عينك عينك ، هاي ما لكيتوا واحد تذبون بلائكم عليه جايين على بنتي ما لكيتوا غيرها ؟ ماصيحها.
فارس : حجي گلبنا من الحامض لاوي ، لاتسوي بيها العبيط
_كل حجيكم ما ياكل عندي و
قاطعه يوسف وكال
يوسف : حجي البنية بنتنا وعاشت بوسطنا سنين لا يوم ولا اثنين ، جيبها هنا بين اخوانها نحاجيها كلمتين ونطلع لا اتعبنا ولا نتعبك
ضغطوا عليهم حاصروهم من كل الجهات ، تالي جابوا سارة ، طبت ترجف خايفة اول ما سلمت ، طلع صوتها بيه رجفة يوسف ابتسم وغمزله لفارس..
يوسف : عليش خايفة بعدنا ماحجين شي
سارة : شنو رايدين مني ؟
يوسف : عليش حركتي بيتج وطلعتي منه مثل الحرامية ؟
سارة : ما اسمحلك تحجي وياية بهذا الأسلوب
جاوبها شهم بصوت حاد بيه نترة .....
شهم : جاوبي بأدب عليش حركتي بيتج وطلعتي منه ؟ وشلون تتفقين وية اخوج يساعدج بهجمان بيتج ؟
سارة : ما حركت شي ما يخصني اني
يوسف : شلون ما يخصج ؟ تقنعينا صدفة الصار ؟ يحترك البيت وانتِ تطلعين قبل لا تلتهم النار بيوتنا وحلالنا ؟
سارة : كلت ما مسوية شي ما مسوية
يوسف : واذا كلتلج اكو اليثبت صحة كلامنا شنو رأيج؟
سارة : وين دليلكم ؟
شهم : سعيد ما حاجيتيه قبل بيوم وطلبتي منه يساعدج تأذين زوجج ؟
سارة : لا ما طلبت منه هذا واحد جذاب
يوسف : نجيبه ويسولفلنا وتسمعيه ويببن منو اللي يجذب
ابوها كال
_ وينه ؟ خابروه ؟ ييجي
فارس : عليمن نخابره موجود برا هسه اجيبه ويحجيلك
وبالفعل طلع فارس جاب سعيد واجى ، وكف كبالهم وحجى كلشي يعرفه..
سعيد : انه مالي شغل سارة صادفتني قبل يومين من الحريق وطلبت مني اساعدها انه رفضت ، اصرت نأذيكم وكالت اريد احرك گلبهم مثل ما حركوا گلبي كلتلها انه مشكلتي وي شهم مو نوح ، روحي انتقمي منه وحدج ، عفتها ومشيت ثاني يوم كالت انه ماعرف شلون هيج حجيت وياك انسى الحجيته ساعة عصبية ، عفتها ورا يوم صادفت اخوها بالشارع العام قريب القرية ، شافني ارتبك سلمت عليه وسألني على سارة اذا كاعدة او لا ، كلتله ما ادري بيها ، طلب مني اصيحها أله ، جان حاير شلون يدخل للبيت خايف واحد يشوفه ، اخذته وياي وصلنا لسور البستان الخارجي فتحت الباب طلبت منه يدخل رفض كال ما اريد واحد يشوفني ويجلب بية على الغدا زحمة ، رحت لبيتها دكيت الباب طلعت لابسة عباتها واكو جنطة صغيرة بالباب وجهال نوح جانوا لابسين ومتحضرين للطلعة ، بلغتها اخوج يريدج كالت وينه ، دليتها بمكانه ، ووهمتهم على اساس رحت ، فد انه جنت واكف بزاوية وسمعت كلامهم ..
سارة : ها انفذ ؟
عادل : شنو راح تسووين ؟
سارة : رشيت البيت بالنفط باقي بس اشعل النار
عادل : ديري بالج على الجهال سارة
سارة : لا تخاف ، طلعتهم بالباب حتى ما يستنشقون الريحة
عادل : اخذتي اغراضج المهمة ؟
سارة : اي اخذت مستمسكاتنه وفلوس نوح ، ما بقيتله شي وخلي زواجته من وفاء تفيده
عادل : يطبه مرض ، رايح اجيب السيارة وانتِ اشعلي النار وجيبي جهالج وتعالي وراية
سارة : وين تنتظرني ؟
عادل : براس الفرع خاف واحد يشوفني ، يعرفون سيارتي
سارة : محد يشوفك لا تخاف
عادل : ليش وينهم ؟
سارة : ماحجيتلك مو البارحة ناس هجموا على البيت وفارس تصوب ، اخذوا للمستشفى وراحوا محد بالبيت
عادل : اي زين هاي من صالحنا صارت حتى سالفة الحرك تضيع
سارة : اختك ذكية اختارت التوقيت الصح
عادل : ذيبة ما ينخاف عليج من البداية كلتلج نوح ما يصلح يكون زوجج ، خبصتيني طبيب وطبيب وهو عايش بهاي الزريبة
سارة : وياريت غزرت بيه تضحياتي تركت دوامي واهلي ومنطقتي وتالي يجيب ضرة علية ومو اي ضرة وفاء ، علم فهم يتزوجها ويكسر عيني بيها خلي عناده وجده يفيدوه ، والله لا اخليه يحلم يشوف اظفر من جهاله
وراها رجعت للبيت فتحت الباب ثواني وطلعت تركض هي والجهال صعدوا السيارة وراحوا ..
شهم : ها حجي شنو رأيك بالكلام ؟
-منو كال ما متفقين وياه على هاي المسرحية ؟ وبعدين سارة ما عندها موبايل حتى تتصل بأخوها هو جاها صدفة وجابها لهنا
شهم : هذا ابنك وهاي بنتك كدامك اسألهم يجاوبوك
يوسف : ابو فاطمة جيناهم نلم الموضوع بيتاتنا ، بس الظاهر الحجي رافض يحل الموضوع بيناتنا يريدها عشائرياً وقانونياً ، يلة يابة نرفع الزحمة ..
اخذوا سعيد وطلعوا صعدوا سياراتهم ، بعدهم ما محركين طلع ابوها بالباب أشرلهم ينزلون ، نزل يوسف تبعه نوح ، نزل شهم من السيارة حتى يمنع نوح يدخللهم للبيت
شهم : لا توسخ نفسك بيهم خلي يوسف يحاجيهم
نوح : اريد بس اسألها ليش هيج سوت ؟ انه ما أذيتها وحتى زواجي من وفاء ما تم فقط عقد كدام الناس
شهم : كلنا ندري ياخوية ماكو داعي تحرك نفسك ضل بالسيارة ولا تحاجيهم
نوح : احجيلي شنو صار ؟
سولفله شهم
نوح : وشنو كالت على حجي سعيد ؟
شهم : نكرت كلشي وابوها يكول شنو دليلكم عليهم ؟ عادل اجاها صدفة واخذها
نوح : شلون صدفة وهاي مكالمتها وياه من موبايلي طولت ساعة على اساس تحاجي اهلها
شهم : المكالمة عندك ؟
نوح : اي هاي
شهم : انطيني الموبايل اشوفه لأبوها
نوح : خليني افوت وياك
شهم : ترتاح اذا دخلت ؟
نوح : اي والله على الأقل احجي اللي بگلبي وما اطك واموت من قهري
شهم : هذا هو امشينا
نزلوا شهم ونوح ودخلوا للبيت ، جان يوسف يحاجي ابوها ، شهم شوفهم المكالمة نكرت وكالت
سارة : عادي اطول وية اهلي ساعةمرات اكثر ، اني وين و وين يلا اتصل بيهم ، يعني شنو هذا دليل ؟ حجتها وضحكت مستهزءة
شهم راد يجاوبها نوح سكته وحجى وياها
نوح : مو صدفة ياسارة تطلبين تحجين وية اخوج بهذا التوقيت ويجيج ثاني يوم قبل الحريق بساعة وحدة ..
سارة : كلت صدفة
نوح : ما استحيتي على نفسج من اخذتي مستمسكاتج ومستمسكات الجهال وتاركة اوراقي المهمة على الأقل طلعيهن وياج ، عليش تركتيهن يحتركن ؟ حالهن حال فلوس البيت الجنت جامعهن فلس على فلس حتى ابنيلج بيت الأحلام ، شنو تفسرين تصرفاتج هاي ؟ مو تريدين بيها أذيتي ؟
سارة : تستاهل كل الصارلك ،ما حركك گلبك من شفت دموعي وحركتي ؟ توسلاتي بيك وصبري وياك ؟ ومعاناتي ما غزرت بيك ، تروح تلبي أمر جدك على حساب كرامتي ؟
نوح : ولج يا معاناة العشتيها وياي ؟ وياصبر الصبرتيه ؟ شو سويتج ملكة ، كاعدة ابيتج معززة مكرمة وكلشي يوصلج بس تأشرين ، لا طلعتي للحلال ولا حويتي زرع ولا سويتي شي من عاداتنا ، وكلتلج زواجي من وفاء على الورق ما راح يتنفذ
سارة : هيج هيج انت جبت ضرة علية وما اسامحك على هالشي إلا تطلكها
نوح : عناد بيج زواجي منها يتم بشكل رسمي واسويلها عرس لا صار ولا انحجى بيه وانتِ طالق كدام اهلي واهلج احجيها ومن باجر امشي بأمور الطلاك وجهالي اخذهم وياي
سارة : اريد اشوف شلون تسويها يا نوح ؟
نوح : حقج هيج تحجين لأن ما شايفة وجهي الثاني
ألتفت على ابوها وكال
نوح : بنتك عندك واولادي يرجعوني عندي ، ماعندي استعداد تربيهم وحدة حرامية باكت فلوس رجلها وحركت بيته وانهزمت ، تماشونا بالطيب احنا وياكم تعاندون احنا ألها نموت على العناد ..
ابوها جاوبه بنتر
_ جهالك اخذهم ما نريدهم واذا عندكم شي يثبت صحة كلامكم مرولنا
دخل جوا للبيت طلع البنية والولد وطلب من جدتهم تلم اغراضهم ، بنته كامت تصرخ وتبجي تريدهم والجهال تبجي يردون امهم ، اخذهم نوح وطلع من البيت تبعوه يوسف وشهم ، وفارس جاب اغراضهم ومستمسكاتهم وطلع ، صعدوا سياراتهم ومشوا تاركين سارة بنارها لحكتهم تركض حافية ، منظرها وذلها اكبر رد اعتبار لنوح ...
مشوا مسافة يوسف اتصل عليهم جانوا طالعين سيارتين ، وكفوا بداية قوس بغداد نزل يوسف من سيارته هو وفارس وحاجى نوح وشهم
يوسف : انتم كملوا طريقكم وانه راجع لبيتي باجر ضروري اداوم
شهم : اجازتك خلصت ؟
يوسف : اساساً انه اجيت بدون اجازة ، المدير ما وافق عليها ، وراجع علمود المرضى ما اكدر اعوفهم اكثر من هيج
شهم : اكيد عملك اهم ، ما قصرت ابو يعكوب
يوسف : من توصلون انطوني خبر
شهم : صار
يوسف : ابو سام لا تضوج نفسك محلولة ان شاءالله
نوج : ان شاءالله المهم الأولاد وياي الباقي سهل ..
صعد فارس للسيارة بعدما ودع يوسف وحضنه
يوسف : لا تشاغب وتسوي مشاكل وعينك على جدة لا تضوجها
فارس : ما نطتني مشط شلون تريدني اسامحها ؟
يوسف : اجيبلك واحد وياي من انزل الجية الخ
ضحكوا صعد فارس وياهم ورجعوا للقرية ، اللي عرفته من خلال كلامهم ، سعيد ما رجعوه لبيته ، حجزوه بمكان قبل لا يرجعون للقرية حتى ما ينهزم ويساعدوه اهله او يغير اقواله ..
من اخذنا كميل لكربلاء ، ماخذين سعيد وكاتليه كتله زينة الى أن اعترف بسالفة البنت اللي ذبت بلاها على كميل ، اما الحريق تهموه على اساس هو اللي ساعد سارة بأفتعال الحريق ، هو انتفض وحجالهم كلشي يعرفه وسمعه بهذاك اليوم ...
اتفقوا يكاوموهم عشائرياً وبالفعل صارت الكعدة وبعد الضغط على سارة واهلها اعترفوا هي واخوها بفعلتهم ، والأب رجع فلوس نوح كاملة وسمعنا باع بيوته وسياراتهم وعوض اهلي خسارتهم ، المهم ما توصل للقانون و ينسجنون بنته وابنه ..
صفوا على الحديدة خسروا كلشي ، طلكها نوح ودزلها ورقتها وياها مهرها كامل ، غايبها فقط ﻷن حاضرها حركته بإيدها وماعندها يمنا شي غير الغايب ..
الأولاد وداهم لوفاء يعيشون وياها بين ما يكمل نوح بناء بيته الجديد وينتقلون بيه كلهم ...
نفذ كلامه اللي حجاه لسارة وقرر يسوي لوفاء عرس كل القرية تسولف بيه ..
تقرر اليوم اللي يتم بيه العرس ، عزموا اهل القرية والأقارب وبلشنا بالتحضيرات ، وفاء رفضت فد نوح اصر على العرس وكاللها صرتي مرتي كدام الله سبحانه واهلي اريد الناس كلها تعرف وتفرح بهذا الزواج ...
سمر سمعت بسالفة العرس راحت لشهم تحاجيه جان كاعد بالحديقة يحضر العشا وية امي ..
سمر : شهم اكدر احاجيك ؟
جان مدنك يگلب بشياش الكباب ، جاوبها بدون نفس
شهم : احجي شعندج ؟
سمر : سعيد وينة ؟
شهم : مالج شغل
سمر : شلون مالي شغل ؟ غير اخوية ؟
شهم : اخوج الباعج لصاحبه برخص هذا هم تسميه اخ؟
سمر : شهم امي راح تموت خوف عليه ، الله عليك كولي وين مكانه ؟
شهم : من حوره وتموت خوف عليه ؟
سمر : والحل شلون ؟ اللي تريدون تسمعوه منه حجاه ألكم ، وحقوقكم رجعت بعد شنو ؟
رفع الشياش من على المنقلة عاينلها وكال
شهم : وحجى شنو يعني ؟ سوة انجاز ؟ حقوقنا رجعت بتعبه وما ادري ؟
سمر : عفا الله ياشهم ، رجعوه لبيتنا وخل امي ترتاح
شهم : اذا ما بردت نار اخواني ناركم ما تبرد
سمر : يعني شنو ؟
شهم : سالفتنا وياكم طويلة ، ارجعي لأهلج اذا حابة ترجعين
سمر : انه جاية اسألك عن سعيد شجاب رجعتي لبيت اهلي ؟
شهم : مو اشوفج حنيتي ألهم
سمر : الله يخليك عوف عنادك على صفحة وكولي سعيد بخير فد هاي كولها اطمن گلب امي اريد
شهم صاح بصوت عالي حتى نسمعه
شهم : يلة يولد بنات العشا صار جاهز
واكفة سمر تعاين عليه
شهم : اذا جوعانة اكعدي اكلي ويانا
سمر : ما اريد سوي فد لفاطمة تحب الكباب
سوه لفتين وحدة بطماطة والثانية بدون ، لفهم بجيس وحطهم بيد سمر
سمر : هواي اثنين وفطومة ما تاكلها بطماطة
شهم : حطيت بوحدة بالثانية تذكرت ماحطيت
يحاجيني وعيونه بالصينية انه اعرف مسويها الي فد ما يكول المكابر كتله كتل ..
سمر : عاشت ايدك
شهم : هله
سمر : كبل لاروح سمعت نوح يريد يسوي عرس جبير وعازم الكل بيه
شهم : السمعتيه صحيح
سمر : معناها لازم نروح للسوك نشتري هدوم انه وفطوم
شهم : شكد يكفيكم ؟
سمر : بكيفك انت كريم واحنا نستاهل
شهم : باجر كبل لا ارجع لبغداد امرلكم هم اتسوك للبيت وهم انطيج مصرفكم وفلوس تشترون ملابس ، محتاجة شي ؟ لو اروح اتعشى؟
سمر : خيرك سابق ابن عمي يلة اروحن انه وبالعافية على العشا..
شهم : الله وياج
مشيت غاد وألتفتت عليه كالت
سمر : ماتكولي مكان سعيد وين ؟
دنك آخذ طابوكة من الكاع وصاح بيها
شهم : اذا ما رحتي انيمها براسج
سمر : هذا هو رايحة رايحة شدعواك محد يكدر يحاجيك..
ألتمينا على العشا وبعدها كلمن راح لغرفته نام ، ثاني يوم شهم تسوك لبيت عمي قادر ، هو مسؤول عن احتياجاتهم حتى لو عمي مكتفي مادياً شهم ما يتركه ابد ، بين فترة وفترة يروح يشوف شنو اكو نواقص بالبيت ، يسدها عنه .. نطى مصروف لسمر ، بوس فطومة وتوجه للباب حتى يطلع ، عمي قادر طلع وراه تشكره هواي ومشى وياه يوصله ..قبل لا يصعد شهم لسيارته عمي لزم بابها وكال
قادر : شهم انت ابني وصدك لو عندي ولد من صلبي ما حبيته كثر حبي ألك
شهم : بعد گلبي بوية روحي تفداك اي والله
قادر : يخليك الية وما يشوفني بيك مكروه
شهم : اللهم آمين ويخليك النا حجي
قادر : سمر هم بنيتي واحبها وعزيزتي ما يهون علية اشوف الحزن مرافگ عيونها ولا متحمل نوحها وبجيها توالي الليل
شهم : بوية سمر غلطت ولازم تتحاسب وتحس بغلطها.
قادر : صح انت حقك الصار مو سهل ابد فد هاي بنية وغيرة البنيات واردة بينهن يا ابني مو شي جديد وننصدم بيه
شهم تنهد سحب نفس وكال
شهم : المطلوب مني يابة شنو ؟
قادر : دام نوح راح يعرس على وفاء ، شنو رأيك ترجع سمر وتعقد عليها وتصير الفرحة فرحتين
شهم : بوية اعذرني ما اكدر
قادر : لخاطري لا تكسر كلمتي هالمرة
شهم : بوية حبيبي قبل مرة هم جيتني ترجيتني وما تحملت اشوفك بهذا الحال وقبلت تزوجتها والنتيجة شنو ؟ خسرت حياتي والبنية الأحبها راحت مني
قادر : كلشي بالقسمة ابني ، كلشي مقسوملنا نشوفه ، انت مكتبولك هيج لا تعترض على حكمة ربك
شهم : بوية ما معترض بس سمر ما ألي نفس بيها بالقرآن لحد هاي اللحظة الاحاجيك بيها انه شايفها طيبة
قادر : وشلون صارت فاطمة لو شايفها مثل طيبة ؟ تقنع روحك بهذا الحجي
شهم : عمي منو وكف فوك راسي حتى اتمم زواجي منها ؟ منو اصر يشوف خلفتنا مو انت ؟ يابوية افهمني والله مالي نفس بيها
قادر : كلامك نهائي هذا ؟
شهم : اي
قادر : على العموم انه اجيت ابري ذمتي امام الله لأن البنية جايتها خوش قسمة وارد انطيها ..
شهم : ماكو هيج شي
قادر : شنو ماكو بكيفك
شهم :تحجي هيج تريد تجبرني حتى ارجعها لذمتي
قادر : بكيفك لا تصدك وانه بكيفي ازوجها لمنو يعجبني
شهم : يابه كلت سمر ما تتزوج يعني ما تتزوج
قادر : شنو لا ترحم ولا تخلي رحمة الله تنزل ؟ البنت بعدها ببداية شبابها عليش تبقى مرتبطة بذكراك ؟
شهم : عندها بنية يابة وبنتي مستحيل اخليها تتربى بحضن زلمة غريب ، وما اكدر ابعدها عن امها لأن متعلقة بيها ، لهنا وانتهى الكلام
قادر : ما انتهى فاطمة تتربى يمي وسمر ازوجها
شهم : وانه كلت ما تتزوج
قادر : رجعها على ذمتك حتى لو ما ألك نفس بيها خلها ابيتك وتزوج التريدها المهم تعيشون بنفس البيت اذا مو لأجلها ﻷجل بنتكم
نطت سمر ما ادري منين وكالت
سمر : جدي المايريدني انه هم ما اريده ومالي نفس بيه ، وبالنسبة للناس ردلهم خبر انه قابلة ..
نزل من السيارة توجه عليها ركضت للبيت صاحه عمي رجعله
شهم : عمي وراية طريق خلني اولي ..
قادر : ها صرت عمك ؟ اول مرة تنطقها ياشهم اول مرة اسمعها منك !!
شهم : بوية ماضل عقل براسي ، سوالفكم ما تتسولف
قادر : روح ابني روح الله وياك فد فكر بالموضوع الحجيتلك عنه ، لأن اذا ردت انطيها راح انطيها ومحد يوكف بوجهي واذا عارضت كل الناس راح توكف بوجهك لأن انت الغلط واحنا الصح ..هيج موكف قسمتها..
كمل كلامه سد باب السيارة وضرب على القمارة وكال .
قادر : توكل ابني درب السلامة من توصل طمنا ..
شهم رفع ايده من الجامة اشرله ومشى لبغداد لدوامه ...
بلشنا بتحضيرات العرس ، اليوم البستان غير شكل ، الأشجار الخضرة تزهي والجو بداية ربيع الهوى يجنن ، اختارينا مكان الكوشة يكون عند شجرة الليمون شجرة كبيرة ومليانة بالثمر ....
من الصبح غبشوا الشباب فارس واولاد عمامي بتزيين البستان ، جابوا درج خشب وصعدوا عليه وكل شوية فارس يهزله واحد يريد يوكعه وهذا يصيح عليه يخاف لا يتكسر ، ربطوا الاضاءة بين نخلة ونخلة ، سلك الكهرباء انمد مثل شريان غذى كل الحديقة ، الله هذا المنظر رجعنا لطفولتنا ، بابا وعمامي جانوا كل عيد يزينون البساتين ويشعلون اضوية حتى نلعب وما نمل الى ان نتعب وننام ، وما نطالبهم يطلعونا خارج هاي الدائرة اللي احنا عايشين بداخلها ...
امي جانت تخبز عند التنور لزكت الخبزة وصاحت على فارس
زهرة : ولك يمة جوز من شقاك لا تكسرلنا واحد ، ورانا عرس مو لعبة
فارس : اي اي وانه شوكت اعرس ؟
زهرة : من تكبر وتعقل
فارس : انه ساكتلج لخاطر اخوي واكف بنص البستان ويعاينلي بعين مشدودة
زهرة : شبيها عينه ؟ يمة اسم الله
فارس : مشدودة
زهرة : ياه هذا شصايرله ؟
فارس : هذاك نوح معصب عيونه يمكن راسه يون عليه
زهرة : يا يمة روح شوفه شبيه خافن مقهور على هاي العرمة
فارس : لا شمقهور اليوم يومه بعد
زهرة : مو اليوم العرس باجر
فارس : ها عبالي اليوم حرامات سبحت
زهرة : ولي من وجهي يفارس وروح عين اخوك لا تعوفه وحده
فارس : شني اتزوج بداله ؟ لو اعاونه بمرته شو انتِ مدري شلونج ؟
زهرة : انجب ادبسز وخر وخر
دفعته راح يضحك ، تصادفنا انه وياه عند باب الحوش
طيبة : همزين اجيت
فارس : شكو ؟
طيبة : تعال ساعدني نطلع الطبلات الخشب
فارس : ذن الكبار ؟
طيبة : اي
فارس : وعليش ؟
طيبة : غير عرس الناس وين نصبلها تاكل
فارس : نفرش سفرة بالكاع شني ناس تكعد تاكل وناس توكف سرة تنتظر شني كاعدين بمطعم مقبط
طيبة : شبيك اليوم كالب على الشني جنك جدة
فارس : هو انه شتعلم منها ؟ هذا حظي كابلها وكعد
طيبة : هسه تطلعهن وياي لو شلون ؟
فارس : بابة سفرة وفضيها عاد شلون شخصيات راح تجي للعرس
طيبة : على الاقل وحدة يعقدون عليها
فارس : شكلج متأثرة بالمسلسلات التركية ، وتجي وفاء تكعد بنص هاي الزلم ويعقد عليها نوح وتكوله أفت ويكوم يبوسها ، تهي بهي
طيبة : فارس شبيك ادري البنية تضل جوا بس شهم مايريد يكعد وكدامه ورد شي ؟
فارس : قصدج نوح وين شمرتي على شهم ؟ تريدن تزوجينه الثالثة ؟
طيبة : شنو ما تدري شهم باجر يعقد ؟
فارس : شنو يعقد ؟ عليمن ؟
طيبة : على سمر
فارس : هاي شلج بيها ناصبة علية ؟
طيبة : روح اسأل ابوك وشوف اذا اجذب لو لا
ماجذب خبر راح لأبوي سأله
عبد الملك : اي وشنو يعني عليش مصدوم
فارس : محد كال اسمع حالي حال الغريب لو اعرف بوقت العقد ؟
عبد الملك : احنا هم ما ندري قبل ساعة اجاني قادر وكال شهم يريد يرجع سمر على ذمته والفرحة تصير فرحتين
فارس : هذا شبيه حظ اخواني مال ألزم حظهم وادكه بالنعال ..
عبد الملك : عليش ؟ شبيه حظهم ؟
فارس : لا مابيه ، واحد حبيبته عافته واخته لزكتله طلك مرتين وهسه يريد يرجع خيته المتربي وياها ،، والثاني عمت عيني عليه مرته باكته وحركت بيته ومن يريد يفرح بزواجه يشوف وجه اخوه بوجهه ، عرفت ليش اريد اطم حظهم طمة ما يطلع منها..
عبد الملك : كلشي مكتوب وكلمن ياخذ نصيبه بالحياة
حجاها وتحسر ، اندارله فارس
فارس : لا يكون گلبك بعده يحن لصالحه ؟
ابوي ركضله سد حلكه
عبد الملك : انجب لا تسمعك امك
فارس : اسكت عن حسرتك بشرط
عبد الملك : كول واعتبره تم
فارس : تزوجني انه هم
عبد الملك : اختار العروس وانه ازوجك تدلل
فارس : موجودة ان شاءالله بس حرك جيبك
عبد الملك : نفض سالفة اخوانك ونندار عليك ، بس المفروض يوسف يعرس بالأول
فارس : يوسف ما يعرس اموت وما يعرس
عبد الملك : هذا هو متفقين سد حلكك
فارس : دجيب ٢٥
عبد الملك : ٢٥ شني ؟
فارس : بوسة ، فلوس غير
عبد الملك : شتسوي بيها ؟
فارس : ثمن سكوتي
عبد الملك : ٢٥ لو ازوجك ؟
فارس : اثنينهن ولأن خيرتني بينهن صارن ٥٠
عبد الملك : انت صدك تحجي ؟
فارس : كلمة لخ اروح لأمي احجيلها
ابوي استغفر مد ايده لجيبه وطلعله ٢٥ ، فارس اشرله بعد ، رجع طلعله ٢٥ ، قبل لا يضم المحفظة اشرله ينطيه بعد ، صارن ٧٥ ، صفطهن وحطهن بجيبه .
عبد الملك : ما تشوف ما تتوفق بحياتك عبن تبتز ابوك
فارس : شكو تتحسر وتتنهد على صالحة
امي سمعته هيج يكول واجت على ابوي تحقق وياه انهزمنا انه وفارس ..
طيبة : شجاك ؟
فارس : اشاقيه امج مادري شلونها زودتها كلش
طيبة : امي الزودتها متأكد ؟
فارس : لا انه الاغار ويومية مفتعل مشكلة وياه
طيبة : منو زرع الشك بگلب امي غيرك ؟
فارس : لليل يتصافون المهم اخذت ال ٧٥ واليوم عازمج على لفة فلافل وتدلل خيتي شعندي غيرها
طيبة : فلافل ياظالم فلافل ؟ كول كص لحم ، دجاج ، كباب
فارس : يولي غير من استلم الراتب ، تقشف هالأيام
طيبة : مو عندك ٧٥ ؟
فارس : اريد اجيب نركيلة جديدة واغير المعسل
طيبة : ها فريس رجعنا للتدخين ؟ توها الرئة تنفست ترجع تخنكها بالدخان ليش ؟
فارس : مزاجي يحب هيج شسوي وبعدين يا طيوب واحد ميت ميت عليش يموت وصحته زينة ، نلعب حديد ورياضة ودايت وتالينا وجبة دسمة للدود ..
طيبة : عاجبك تتمرض انه شكو ؟
فارس : اي خليني ماعليج مني ، يلا امشي نطلع ميز العقد التركي ..
رحنا طلعناه جوا الشجرة ، فرشت عليه قماش ابيض ، وتبارك جابت ورد جوري من البستان جمعتهم بمزهرية حطتها بالوسط ، اجتي سمر فرحانة طايرة الضحكة شكت وجهها صاحت من بعيد ..
سمر : صعدوه اعلى شوية حتى يبين من نكص صور
ضحكت وصعدنا القماش الملون على الشجرة وراهم مثل ما رادت ، فارس يصيح وين حطيتوا السماعات ؟ وابن عمي يجاوبه على مكانهن وكميل يصيح حرام وما نشغل اغاني ..
جريت سمر اخذتها عل صفحة
طيبة : اشتريتي شي ؟ جهزتي روحج للعقد ؟
سمر : ولج ما ادري انه اشتريت لعرس نوح ما ادري شهم راح يعقد علية
طيبة : امشينا نروح للسوك نجيبلج فستان حلو يناسب العقد..وهذا الديكور الحلو
سمر : نعقد هنا ابوج قبل ؟ والزلم شلون؟
طيبة : كالوا بالبداية تصير كعدة نسوان وغدا بعدين يجون الزلم ويصير العرس وكت العشا هيج تقسمت
سمر : ها خوش فكرة
طيبة : اي يلا امشينا نروح للسوك نجيبلج فستان حلو تلبسيه
سمر : ماعندي فلوس تكفي خلصت
طيبة : ناخذ من ابوي وهو وشهم يتفاهمون
سمر : تشوفين هيج ؟
طيبة : اي طبعاً
رحت لأبوي اخذت منه فلوس ونطيت خبر لأمي حتى ما تضل تصيحني وعبالها مغلسة ، رحنا للسوك وسمر ما تمشي على الكاع طايرة من فرحتها تضحك وعيونها تدمع ..
سمر : آخذ هذا ؟ لو هذا ؟ لو هذا ؟ ياهو احلى ؟ يووو احتاريت كلهم حلوات
طيبة : شهم شنو يحب ؟ يحب الشي البسيط اخذي هذا ولا تبالغين البساطة احلى
سمر : عاجبني هذا مثل بدلة العرس ، طيبة انه ما لبست بدلة وفرحت حالي حال البنات
طيبة : يلة اخذيها اذا عاجبتج ليش تبقى بنفسج
اخذته حاسبت ابو المحل وطلعنا ، رحنا اشترينا باقي احتياجاتها ، بطريق الرجعة كالت ..
سمر : طيبة اخوي سعيد وين ؟ شهم ما راضي يدلينا عن مكانه
طيبة : احمدي ربج واشكريه اهلج بعدهم بالبيت كاعدين
سمر : شنو قصدج ؟
طيبة : لولا شهم جان العشيرة شيلوا اهلج من مكانهم
سمر : وعليش رفض يشيلوهم ؟ معقولة شهم يرفض هيج شي ؟ وهو يتمناه ..
طيبة : لخاطركم انتِ وفطومة ماراد يأذي اهلج وبالنسبة لسعيد يربوه فترة ويطلعوه لا تخافين عليه..
هزت راسها سكتت ، قبل لا نوصل البيت مرينا لوحدة عندها صالون نسميها حفافة ، بس بعدين تطورت كامت تشتغل عرايس ، ولأن مانعرف للمكياج كلنا على الاقل هي ترتبها شوية ..حجزنا عندها وكلنالها الصبح نجيج كالت اي..
ورجعنا للبيت ثاني يوم من الصبح اخذتها ورحنا للصالون بالطريق اشوفها تتثاوب حلكها انشك
طيبة : شنو سالفتج ما نايمة من وكت ؟
سمر : اصلاً ما نايمة
طيبة : وعليش مانمتي ؟ اول عرس قابل
سمر : بالنسبة الي اي اول عرس
طيبة : اللي يسمعج يكول عرست على ثاني وهيج فرحانة وتريد تحس بالعرس ، ما اريد اضوجج فد الماخذج شهم هو هو ما يتغير
سمر : لا يتغير
طيبة : وشنو ضمنج ؟
سمر : حاجاني من نقال عمي اذا محتاجة شي وحجيتله عن كلشي سويناه واشتريناه ثوبي وترتيب الحديقة وكلشي جان يسمعني طيبة شهم سمعني من سولفتله ..
طيبة : وبرأيج هذا تغيير يعني ؟ من المكالمة حكمتي ؟
تجاهلت سؤالي وضلت تحجي تحجي وهي فرحانة طايرة وانه ادري بأخوي هو هو ما يتغير إلا بمعجزة ..
خلصت ام الصالون وجهها وشعرها ، حاسبناها ورجعنا للبيت وكفت كبال المرايا لبست فستانها عاينت لشكلها تعجبت ضلت صافنة وتضحك بعدين تلتفت تحاجينا
سمر : اكيد راح اعجبه ، مو بنات ؟ شتكولون ؟
طيبة : المهم انتِ عاجبج
سمر : كلش عاجبني كلش
تجهزنا احنا هم ومن خلصنا طلعنا للحديقة فقط نسوان ييها، بلشت المراسيم شغلنا اناشيد وكمنا نركص ، تعبنا وشهم والشيخ بعدهم ما اجوا ، اتصلنا عليه يكول جاي بالطريق ، ورا ساعة نرجع نتصل ويكول قربت آخرها راح كميل جاب صاحبه شيخ حتى هو يعقدلهم ، لأن شهم كايله اللي أخرني الشيخ منتظره ...
وصل الشيخ صاحب كميل ودخل للبيت جوا يم اخواني ، سمر نزلت الشال على وجهها واحنا لبسنا عبي تحضرنا علمود يعقدون ...
صاحت سمر
سمر : ولج طيبة جيبي طشت ترسيه ماي وحطي بيه ورد اريد اخلي رجلي ...
طيبة : تمام هسه
رحت جبته الها حطيته بالكاع نزلت رجلها بيه ، اخذت وردات اثنين من المزهرية ونثرته بالماي على رجلها...
ضلينا نتاني شهم ساعة او اكثر ما اجى نتصل عليه يطلع نقاله مغلق ....
يتبع ....
