رواية الوجه الآخر للرحمة الفصل السابع 7 بقلم عبير ادريس
رفل : لا شعري عفية كلشي ولا شعري احبه ، الله يخليك عوف شعري عوفه ، يمة حاجيه يعوف شعري
ما اهتم لحجيها زينها صفر وحط شعرها بحظنها وطلع ..
طيبة : ياعيني المهم ما ضربها
ريمة : لا ما ضربها لو ضاربها اهون ، اختي مصدومة
طيبة خليني اشوفنها
ريمة : شتشوفين منها اتركيها بحالها ومشكورة على السؤال
طيبة : اجيت للباب وترجعيني ريمة ؟ فد اتطمن عليها واطلع شبيج؟
ريمة : ديله فوتي
فتحتلي الباب دخلت سلمت على عمتي جانت تبجي ، والولد طالعين وي عمي للبستان ، رحت لغرفتها لكيتها حاضنة شعرها ونايمة ودموعها مبللة المخدة ..
طيبة : رفولة حبيبتي
فتحت عيونها باوعتلي بعصبية ، كامت من مكانها كعدت شالت الشعر حطته بحظني ومشت للمرايا بوجه عابس صافنة على روحها ودموعها تجري بهدوء ، بعدها ابتسمت ، كعدت على الطبلية الحديد عاينتلي وكالت
رفل : طيبة يلحك شعري يطول منا للصيف ؟
وخرت شعرها من حضني وكمت رحت يمها وكفت عاينتلها بالمرايا و دنكت بست راسها وجعني گلبي عليها دموعي نزلت حارة ..
رفل : ها طيوب حاجيني يطول شعري مو ؟
طيبة : اي يطول ويرجع سرح يخبل بلون الليل
رفل : يعني اكدر اسويه تسريحة ؟
طيبة : اي وتظفريه مثل قبل
تنهدت جرت حسرة وكالت
رفل : شلون يشوفني يوسف بعد ؟ خاف يكول علية موحلوة
استغفرت ربي ، وكعدت كبالها على الكاع
طيبة : رفولة اللي صارلج بسبب حبج الوهمي مو كافي الصار هواية عليج ، عوفيه ليوسف واللي ما يحبني ما احبه لو روحي بيه
اختنكت بعبرتها دموعها نزلت وكالت
رفل : والماتكدر تكون مثلج قوية شنو تسوي ؟ ها حاجيني عليش تعاينيلي هيج ؟ وساكته احجي
طيبة : ماكو وحدة قوية والثانية ضعيفة ، كلنا نفس العود ، فد اللي تريد تذل نفسها للرجال تذلها واللي تعزها راح تنعز وهو يركض وراها صدكيني
رفل : شلون كدرتي تنسين ليث عفية علميني
طيبة : كرامتي يارفل كرامتي نستني ليث وابو ليث هم
رفل : فد ليث مو مثل يوسف
طيبة : اتفق وياج ماكو واحد يشبه واحد فد ياعيني المايريدني ربح ما اريده خسارة
رفل : يعني شنو يصير لو يتزوجني ؟ طيبة علميني اقرأ واكتب حبابة
طيبة : وانه وين اعرف
رفل : مو دخلتي مدرسة ؟
طيبة : صحيح دخلت فد ما كملت و ناسية كلشي
رفل : كولي لبتول وتبارك يعلموني
طيبة : ميخالف اكوللهم ، المهم ما تبجين وتنسين يوسف وتخلين ببالج رفل تتلعم لنفسها حتى تعرف تقرأ قرآن تصلي صحيح ، تغير بنفسها ، مو لأجل يوسف
رفل : يعني انه مو حلوة ؟ واذا سمرة ما انحب لازم ؟
طيبة : والله حلوة وتخبلين فد الجمال مو كلشي عند الرجال ويحبج علموده
رفل : الجمال مو كلشي والشهادة مو كلشي عند اخوج چا شنو اليريده
طيبة : رفل المفروض هسه كارهته ليوسف لأن بسببه شعرج الحلو راح والبارحة ضاربج اكثر من مرة شلون تحبين واحد يضربج ؟ وما يريدج؟
رفل : انتِ ما جاية تشوفيني جاية تخليني اكره يوسف وما راح تنجحين ، لو مو يزينوني صفر لو يفصلون راسي عن جثتي ما عايفته لوحدة غيري وتجي تاخذه عالجاهز
طيبة : انتِ الحجي وياج ضايع ، وهاي رسالة من يوسف وشهم وابوي وكلهم كالوا بوجود يوسف بيتنا يترحم عليج طبته ، بالأيام اللي يروح بيها لدوامه كل الهله بيج ، اشوفكم بخير ...
كمت طلعت منها رحت لعمتي سلمت عليها طيبت خاطرها دا اطلع كالت
حنة : شدعواه اخوج خشم يابس ، والبنية بسببه راح شعرها مت عيني.
ألتفتت عليها شايطة
طيبة : عمة مو بسبب يوسف ، بنتج صلفة طابه لغرفة اعزب بنصاص الليالي وكلها نايمة شعندها موزين كص شعرها ما كص راسها
حنة : جاية تتشمتين بيها لو شني ؟ من همداچ اي والله..
حجتها وغمتني بيدها..
طيبة : ما متشمتة عمة فد الحق ينكال والباطل ينطم
تركتها ومشيت لبيتنا جانوا ينظفون بيه البنات ، شافتني امي صاحت
زهرة : ها يطيوب حاجيتيها ؟
طيبة : اي يمة حاجيتها
زهرة : كلتيلها تبطل من اخوج ؟
طيبة : اي يمة
زهرة : وشكالت ؟
طيبة : سكتت ما كالت
زهرة : يلا زين ، تعاي نكمل المطبخ
دخلت اشتغلت وياها ، وراها طلعت اجمع الحطب وشوية سعف حتى نخبز ، واشوف فارس ويوسف وشهم خانسين ، شلون اللواعيب من يلتمون كبل الشوط ما يبدأ هيج يخططون ، ضحكت ودعيت ربي يحفظهم ويحفظ خوتهم ..
بعد وقت راحوا واتجمعوا وية عمامي واتفقوا يدزون خبر لأهل البنية حتى يحولون يمنا ، سمعت على اساس متصلين عليهم و رافضين كالوا الكعدة انحسمت والحق رجع لأصحابه بعد عليمن ، شهم محاجيهم وكايللهم بالنسبة لقضيتكم الحق رجع ، يمنا ما انحسم شي وألنا حق يمكم نريده واذا ما حولتوا يمنا خلال ٤٨ ساعة لا تلومونا بالراح نسويه .. الأب ناطيهم رقم شيخهم و محاجيه كايله
_ شنو قصدك ؟ كايل ألكم ٤٨ ساعة لا تلومونا اذا ماجيتوا بعدها ، نعتبره تهديد
شهم : من تجون لهنا تفهمون كلشي ان شاءالله وتريد تعتبره تهديد براحتك
هذاك مادري شنو مجاوبه ، شهم
سد النقال وحطه بجيبه ، ابوي ألتفتله كال
عبد الملك : ما اظنهم يحولون ليجاي
شهم : يحولون غصب على روسهم
عبد الملك : وان ما حولوا ؟
يوسف : نحول يمهم
زهرة : يمة يوسف اتجفوا الشر وخلينا نخسر المال ولا نخسر واحد بيكم
يوسف : يمة يا شر هذا ؟ اكثر ما كسروا عيونا وطلعوا كميل غلطان ؟ وجبروه يعترف بغلط هو ما مسويه ، هينة سمعتنا انداست بين العشيرة من ورا وحدة ما نعرف اصلها من فصلها منين ، وغير هيج فارس تصوب وناطين العندكم والماعندكم ، شنو يمه احنا مو زلم ؟ تريدين نلبس شيلات ونكعد يمكم ؟
فارس : بالنسبة الي من هسه اعتبروني لابسها اذا ما رجعنا حقنا
شهم : انه هم وياك شيلات حبوبتي هواي وتكفينا
طبت جدة تمسح وجهها بشيلتها سلمت على الكاعدين ، كاملها كميل سندها لحدما كعدت...
صدمة : اليوم لو باجر تفض السالفة بالزايد وبحيل الله منتصرين..
كميل : ياالله ياالله صدك جدة ؟
صدمة : دعيت وبعون الله الأستجابة قريبة
عبد الملك : من بختج يعلوية من بختج ان شاءالله
صدمة : اي والله ييمة دعيت ويمه الأستجابة ضلت..
نوح : دعيتيلي جدة ؟
صدمة : اي والله جدة دعيت للكل ما بقيتلي واحد وان شاءالله دعوتي مستجابة وتعرف انه مبخوتة من زمان ودعائي بالمچان
كميل : ماشاءالله عليج جدة مجربينج
صدمة : اسمعوا البارحة ردت انامن عيوني ما قمضت من ورا السالفة هاي ، كمت جددت وضوئي ، وصحت على طماطة تفرشلي السجادة جوا السما وطلعت صليت ركعتين ودعيت من ك
گلبي وچن نور جبير طلع ضوا المچان واشوفن ملج من الملايجة يكول سالفتج يحجية تنحل وسمعت الاستجابة بأذني معناها سالفتكم انحلت..
فارس همس : شكد جذابة
ألتفتله يوسف : ترة عيب عليك تجذبها ، جدة من اهل الله ونيتها صافية احتمال صحيح صار وياها شي بس مو حرفياً مثل ما حجت..
فارس : هو شنو عيب ، غير هذا انه جاوبتها ، لا ضوا ولاشي ظلمة هندس جانت
يوسف : دنجب انجب
فارس : تدري شنو معناها هاي ؟
يوسف : شنو ؟
فارس : كل قصصها الجانت تحجيها النا جذب بجذب الله وكيل ..
يوسف : ياقصص ؟
فارس : من جنا صغار
يوسف : دكوم من وجهي كوم ...
ضحك فارس وكام طلع بعدها الكل طش اللي يصلي واللي يسويله شغلة ، بقينا انه وجدة ويوسف ، كام راح كعد بصفها
يوسف : جدة عندج مشط خشب ؟
صدمة : اي جدة عندي شتسوي بيه ؟
يوسف : اريد منه واحد
صدمة : اخذني لغرفتي
سندها كامت وراح وياها مشوا لغرفتها ، فتحت باب البوفية الخشب وطلعت صرة من القماش الستان ، فتحتها بالكاع ، بيها اغراض هواي جامعتهن بيها ، ايدها ترجف من الكبر بالكوة تطلع الشغلة وكل شوية يوسف ياخذ ايدها يبوسها ويحضن بيبي وهي تكوله الله يرضى عليك ، مو مثل ذاك اخوك المخبل قصدها على فارس
يوسف : جدة يكبر ويعقل
صدمة : من وين يجيب العقل ، امك من جابته ، عقله طاح وي الجارة وذبوه بالزبل
ضحكنا انه ويوسف
صدمة : هاك جدة هذا المشط فد شتسوي بيه انت منيلك شعر ؟
يوسف : جدة عندي مو هذا
يحجي ويجر بشعره
صدمة : ماباقي فد شعرايتين اتزوج كبل لا يخلص وتاخذك مكورع شتسوي بيك
يوسف : جدة وهي تتزوجني علمود شعري لو ماخذتني الي
صدمة : جدك شعره جان نازل لجتافه من اخذته وتاليها كورع
مد راسه فارس من الباب وكال
فارس : طبعاً يكورع من ضيمج ما ضلت ولا شعراية براسه
صدمة : امشي لك جنك ابليس تنط علينا مادري منين
فارس : جدة انه هم اريد مشط خشبي
صدمة : ألمن رايده ماعندي
فارس : فد من يمي ماعندج ؟ بخيلة عليمن ضامتهن انطيني واحد
صدمة : ما انطي
لفت الغراض لحضنها ما تخليه يد ايده ، تقرب عاين على البوفية وكال
فارس : جدة ذن الماعين شوكت ناكل بيهن ؟ لا بالعيد مطلعتهن لا برمضان فاطرين بيهن ، المن ماخذتهن ؟ هناك بالكبر ماكو بوفية لا عبالج تاخذيهن وياج ؟
صدمة : انجب يومك كبل يومي ان شاءالله
فارس : الاعمار بيد الله ترحين فد بالكفن حتى جيوب ماكو
صدمة : يوسف هاك هذا دهن مال كبل يطلع شعرك من جديد
فارس : جدة انطيني منه الله عليج ماعندي
صدمة : مو هذا شعرك جنة ليفة ملفلف مايفيدك
فارس : هو انه شوارث منكم بيت سيارة شي بيه حظ ماخذت منج غير الشعر الملفلف
يوسف : والعيون الخضر والسمار منين ماخذهن مو منها ؟
فارس : هاي تاليتي اشبه صدمة خرب بحضي اذا عندي حظ اي والله
صدمة : لا تلعن حظك يالأغم لايطيح بالزايد هالنوبة لا حظ ولا عقل يضلن عندك
فارس : العقل راح من وراج والحظ منين اجيبه وانه مكابلكم
نضحك على مداهرهم ، يوسف عاين لمدالية بيها سبع عيون اخذها يگلب بيها .
صدمة : هاي مطلية بالذهب ومحفورة بيها آيات عن الحسد
يوسف : تخبل جدة
صدمة : أخذها
يوسف : شسوي بيها ؟
صدمة : لمرتك
يوسف : وينها هي
حجاها وضحك ...
صدمة : تجي تجي قابل تضل بدون زواج
فارس : وانه جدة شوكت اتزوج ؟ شوفيلي
صدمة : من تعقل نسرحك بصخلة من الصخول العندنا ..
فارس : خلف الله عليج صبريلي لا ما خبلتج ماكون فارس ابن عبد الملك
صدمة : اطلع جلب
فارس : هاي طالع حتى المشط ماريده
يوسف اخذ اغراضه ، باس بيبي من راسها وصعد فوك ، صاحني
يوسف : طيوب حبيبة اخوها جنطتي يمج جوا
طيبة : ياهو البيها هدومك ؟
يوسف : اي
طيبة : اي هاي
يوسف : بلا امر عليج حضريلي ملابس فايت اسبح
طيبة : صار من عيوني
فات يسبح صاحني فارس
فارس : طيوب تعالي عينيني
طيبة : وين رايح ؟
فارس : اريدن اصعد
طيبة : شعندك صاعد
فارس : انامن شوية
طيبة : وشلون تنزل بعدين ؟ نام هنا جوا
فارس : ما يخلوني هوسة
طيبة : ديلة استند علية..
سندته وبالكوة صعدنا الدرج ، دخل غرفته وانه رحت لغرفتنا ، كمل يوسف صاحني نزلت ناوشته الخاولي وملابسه..
طيبة : هدومك مال طلعة فوك كويتهن جانن ممرودات
يوسف : عليش تعبتي نفسج عيون اخوج ؟
طيبة : اذا الكم ما اتعب ؟ منو التعب يستاهله ؟
يوسف : افداج انه يروح اخوج
طيبة : بعد عمري نعيماً
يوسف : ينعم عليج
احنا ونحجي صعدنا للغرفة فوك نسيت فارس صعد يريد ينام ومانبهت يوسف ما يسوي صوت..
دخلنا للغرفة ، كمت ارتبله الملابس وحذائته مسحتها ..
وهو فرش سجادته وكف يصلي ، رحت تمددت على الفراش الغاد وتغطيت لهناك عيوني ثكلت ،، فد اسمع صوت فارس يتحارش بيوسف ، النوب خجلني لابية اكوم واطلع من الغرفة خافن يعرفون انه سمعت ومالي عين اكابلهم ، ولا بية اضل ويدوس وياه بالغميج ..
كام فارس وكف كباله عاينله وشهك ، التفتله يوسف جان نازع تيشيرته يريد يغيره بالقميص
يوسف : وسم شبيك ؟ شيل عيونك مني جنك وحدة استغفر الله ربي
فارس : انا لست ب .... انا بائعة هوى يا ولدي
يوسف : مالي خلكك خليني ألبس عندي شغلة
فارس : وين رايح ؟
يوسف : شغلة اكضيها وارجع
فارس : همممم صاحبة المشط مو ؟
يوسف : لا
فارس : هي نفسها الشگت وجهك وكذا
يوسف : المشط الي لا تجلب وتسويها قصة براسك
فارس : اي هو الحرام ما يدوم لاعبالك ، صح لذته ثواني بس ندمه سنين
ألتفتله يوسف
يوسف : شتخربط انت؟
فارس : على هاي هاي
يحجي ويأشر على جسمه وعلى وجهه ويركص بحواجبه
يوسف عاين لجسمه وين ما يباوعله فارس وكال
يوسف : كبر حتى كبر اي والله ، صارلك ساعة متطفل علية وتركص بحواجبك وصاير ضابط تحقيق على هاي ؟
فارس : وليش هاي اثمها قليل عندك ؟
يوسف : عبالك مسوي شي يعني ؟
فارس : مو عبالي متأكد
يوسف لبس قميصه وراح للمرايا يمشط شعره ويرش عطر
يوسف : اعرف تفكيرك وسخ بس بعيد كل البعد عن هاي السوالف لا عبالك عايش وحدي هناك وماعندي رقيب ، ضميري ومن ثم ربي يحاسبني ، ماخايف منك لو مسوي حرام اكولك ، خايف منك يعني ؟
فارس : ها جذب وحلال وحرام مخلصها براسي وفتاوي وهاي اﻵثار شراميخ على عض ومناطق زرقاء اليمامة ، مسويتلك مكس تكول لفة فلافل كلشي بيها ، جلب هاي خاف
يوسف : وخر من وجهي ما طايقك ابد
فارس : اخوك وخايف عليك ، غير لو انه بنية واشوفك بهاي كشختك ياعلي ماعوفك اجلبلك شلون رفل حتى بكوابيسك تشوفني
يوسف : همزين انت ولد الحمد لله
فارس : واخوك فوكاها
يوسف : تخيل
طلع يوسف يريد ينزل صاحله فارس ، جاوبه ...
يوسف : وسم شكو ؟
فارس : نزلني وياك ميت جوع
يوسف : وشلون انزلك ؟
فارس : شيلني
يوسف : امشي ولي
فارس : ولك ما اكدر انزل شبيك ؟
يوسف : مثل ما صعدت انزل
فارس : ولك شلون
يوسف : زحف
وماسمعت صوت يوسف بعد صار بعيد ، طب فارس للغرفة وصاح
فارؤس : طيبة طيبوب طبطب ولج طماطة
جاوبته امي من جوا
زهرة : ماهي ماهي فوك نايمة
فارس : اي اي زين لا تصيحين مابينا واحد اطرش ، العياذ بالله تكول حرب ضد الحمزة مو ابنهم انه ، وارثتها من آكلة الآكباد من فوك الفرس وتصيح نحن بنات طارق نمشي على النمارق ، شني النمارق مادري ، ولج طيوب ...
شلون بيه هذا غير يسكت راح يفضحني ، طلع من الغرفة راح لغرفتي كمت وكفت بنص الغرفة طب شافني اخترع ...
فارس : سلاماً قولاً من رب رحيم هاي شجابج هنا ؟
طيبة : جيت
فارس : ادري جيتي منين طبيتي ماشفتج
طيبة : من فتت لغرفتي انه فتت هنا عبالي انت هنا
فارس : شلون انه هنا وشايفتني فايت لغرفتج
طيبة : يبوو يفارس لا تدقق موتتني
فارس : اعتذر آسف
طيبة : منك من الشيطان تعتذر
فارس : عادي منج اعتذر ، طيوب عادي اطلب طلب ؟
طيبة : كول
فارس : نزليني محد قابل ينزلني لئيمين
طيبة : يلا انطيني ايدك انزلك
نزلته جوا راح لغرفة بيبي اعرفه يسويله بلوة وياها رحت وراه خطية نايمة دنك عند راسها صاحها
فارس : جدة جدة جدة
صدمة : وسم وزهر ماتخلون واحد نايم ؟
فارس : اي والله جدة ما يخلون واحد نايم
صدمة : شرايد ؟
فارس : جدة رقيني
صدمة : شني ؟
فارس : اقري على راسي
صدمة : وليش عگلك نكص منه بعد ؟
فارس : والله جدة اخترعت فوك يمكن اكو جني
صدمة : الجن وي الجن يتوالمون محد يخرع الثاني
فارس : شنو قصدج جدة ؟ ياحيف ياحيف تربيتي بيج هيج راحت ..
صدمة : ولج طيوب ما تنطيني العصا خليني أأدبه هالجلب هذا
فارس : طالع طالع ، شنو من اهل ذول محد طايقني تهي بهي
راح ﻷمي للمطبخ يدردم على جدة واكف فوك راسها تكول يوسوس عبالك مو بشر
فارس : شني ما مصدكتني ؟
زهرة : ماصدكك يافارس لو تجيني هنا حجي وزاير مكة وغاسلينك بماي زمزم هم ما صدك حجاياتك..
فارس : ياا ها ليش عود ؟
زهرة : معروف بالجذب يايمة معروف
فارس : هاي فوكاها ؟ فوك ما افتح عينج على الحقيقة
زهرة : حتى لو حجيك صح انه راضية شعليك
فارس : داكلج تكول عليج مو خوش جنة متندمة خذتها ماخذت صالحة
زهرة : صدمة ماتكول هالحجي هذا تصفيطك
فارس : لا كالت وحتى تكول ابوك متندم خذاها هو كايللها هيج قبل بمرة ..
زهرة : وخر مني فريس لا دوسن ابطنك
فارس : يمة شبيج ماجذب
وصدك ضل يقرأ براس امي وهل صارت هاي العركة بينها وبين ابوي ...
بتول : يايا هذا ما يجوز ؟
طيبة : لا والله فوكاها ابوي يحلف ماشاكي لجدة عن امي ، وامي مصدكة فارس
بتول : ما كلتي لأبوي يجر أذانه
طيبة : وصغير هو ترة جبير لا عبالج
بتول : جبير وعقله هيج شنو الفائدة ؟
طيبة : فد والله ضحكني يكولها لجدة ارقيني
بتول : ما رقته بلجن يعقل
نسولف ونضحك الى ان خلصنا غسل مواعين ونظفنا البيت وراها صعدنا مددنا ...
لليل هم صارت لمة وكعدوا الولد واسمع يوسف يحاجي شهم بالحديقة يم شباج المطبخ جنت اسويلهم جاي ...
يوسف : انه كلتلك لمحله مو تحجيله السالفة كلها يا شهم
شهم :احاجيك لا تتندم ولا تنقهر بعلي تتكربس براسك لو تنتحر وتسويلها فلم من افلامها خليها تتأدب
يوسف : لا خطية مو لدرجة يزينوها صفر حرامات شعرها طويل
شهم : بالنسبة الي هذا الصح اذا مقهور صحح غلطك واتزوجها
يوسف : انه لو ماشايفها مثل اختي لا عبالك افوتها بس مالي نفس بيهن بالقرآن لأن ربينا سوية ، لا مستنقص منهن ولا بيهن عيب ، بعد هاي النفس وماتريد
شهم : تحجيلي انه ضايكها وملجوم عليش حاجيت اخوها حتى ما تنجبر تنحط بموقف مثل موقفي وتالي يخجلوك على ها خطية والبنية انكسرت والكل عرف بيها تحبك منو ياخذها؟ وتتكربس براسك ..
يوسف : ما يسووها وياية ما يكدرون ، انت هم ما جبروك ولا حطوا على ركبتك سجين ، عليش قبلت ؟
شهم : استخطيتها ، جنت انزل لبغداد وبالي هنا خاف صار بيها شي خاف اذت نفسها ، لا يكون موتت روحها ، وهاي تاليتي تورطت..
يوسف : وشنو حجيت لأخوها
شهم : الصار كله
يوسف : بالتفصيل يعني حجيتله كلشي حجيته ألك ؟
شهم : اي
يوسف : لا بداعتي
شهم : اي والله حجيتله كلشي ، عمي وين كاعدين مرة تحضنك وكبلها بايستك شكو ؟
يوسف : والله ما ادري شكولك بس باسل مسكين ، بعد حتى كعدة ما يكعد ويكابلنا
شهم : تخيل طيبة هيج تسوي من ورانا لو بتول لو تبارك واحنا ما ندري وياغافلين الكم الله ، شنو يكون حالنا واحنا نكعد بين الزلم مضحوك علينا
يوسف : الله لا يكولها والله صعبة
شهم : باسل حيل تأذى ، من جنا كاعدين صحته اخذته على صفحة وحاجيته بهدوء والنار طلعت من عيونه حتى الكعدة ما كملها
يوسف : حيرة هالرفل وين تريد توصل ما ادري ..
شهم : مالك شغل بيها نريدها تبعد عن طريقك، ولا يضل بيالك مابيها شي ماكلة شاربة المهم تأدبت وعرفت حدودها وين ، وماراح تتجرأ وياك مرة ثانية تخاف لا نحجي لأخوانها
يوسف : وهي تدري انت حجيتله ؟
شهم : اي هددتها من طلعناها من غرفتك حاجيتها كلتلها هاي المرة سلمتج بيد باسل المرة الثانية ما ارحمج حسابج وياي يصير ..
يوسف : الله كريم ، هاي طيبة وين راحت بالجاي شدتسوي باچة صارلها ساعة
فزيت على حجايته واباوع القوري نصه متبخر بسرعة جملته مي وجاي ورجعته على الطباخ ، طلعت استكاين والشكر حطيتهم بالصينية وزعت الخواشيك ، طب يوسف
يوسف : وين الجاي طيوب ؟
طيبة : ثواني ويصير ثواني بس
يوسف : شبيج صاير وياج شي ؟
طيبة : ها لا مابية
يوسف : مرضانة ؟
طيبة : لالا ليش مبين علية بية شي ؟
يوسف : وجهج اصفر
طيبة : تعب هذا لا يضل بفكرك
يوسف : روحي نامي ارتاحي وانه اخذ الجاي من يصير
طيبة : اي رايحة
مشيت للباب رجعت ألتفتت عليه واكف مبتسم متانيني اروح..
طيبة : يوسف
يوسف : احجي البگلبج طيوب اعرف عندج سالفة
طيبة : انه تنسطت على حجيكم انت وشهم واعرف حرام فد والله السالفة ﻷن تخص رفل ضليت واكفة اسمع
غابت بسمتة من وجهه وتغيرت ملامحه عاينلي مركز بوجهي خفت منه بعدها كال ...
يوسف : اعتبري نفسج ماسمعتي شي وانه مسامحج
طيبة : الله عليك ؟
يوسف : بشرط ما تعيديها
طيبة : صار هذا هو تصبح على خير
يوسف : تلاكين الخير
رحت بسته بخده حضني وطلعت رحت فرشت اسناني وركضت لفراشي نمت بدون هز (هاي حجاية نكولها للتعبان وينام كبل )
ثاني يوم مر اعتيادي بالنسبة للناس فد النا مو عادي لأن منتظرين جيت هذولاك المايخافون ربهم ، اجتمعوا كل المعارف ، ديوانا وديوان بيت عمي قادر وعمي راضي انترست ناس ، حجوا بينهم واتفقوا اذا مرت ال ٤٨ ساعة وما جوي يدكوهم وانه حيل اخاف من سالفة الثارات هواي نسمع بيها ومن تصير ناس تجر ناس المذنب ياخذ دم البريء وكلها تصير سواسية ...
المعروف عن اخواني بين الناس ما يخافون من واحد
ولا يهابون احد
وية الحك محد يلزمهم وما ينلوي ذراعهم اذا اجتمعوا
اكبر شارب ما يهزهم
علم قريتنا الي هو علم العشيرة من تصير كعدات يعلكوه بنص الكعدة
غيروا شعاره وكتبوا عليه
ما لك هيبة يل ما لك شر
واخواني يلقبوهم بالقرى البقية (بيت جنية )
عبن محد يكدر يلزمهم وكت المشكلة ، ياخذون حگهم ومثل الملح من يذوب ما يلكولهم أثر ...
جدي وشيخ عشرتنا اتفقوا يودولهم خبر بيد طارش ، اجوا كان بها ما اجوا ما يلومونهم باللي يصير
ماقبلوا يحولون يمنا ، شيخنا كال شناوين ؟ شهم اخذه على صفحة حاجاه بعدها أخذ يوسف واولاد عمامي وراحوا لبيت البنية ، شلون وليش ما ندري ، رجعوا جايبين البنية وياهم ، انصدمنا ابوي ما رضالهم كميل انتفض لفعلتهم ، شهم وكف بنصهم وكال ..
شهم : اتفاقكم وياهم شنو جان ؟
كميل : ننطيهم الفصل ونخلص هذا هو
شهم : رحنا وحاجيناهم كالوا الحك ويانا وانت معتدي على شرفهم وناهب بنتهم وسالفتنا صارت علج بين الناس وماراح يسكتنا الفصل الاخذناه يعني ناوين يجرون منكم بعد
كميل : وشحاجيتهم من كالوا هيج ؟
يوسف : كلنالهم البنية ما انخطفت حبت اخونا واخونا متزوجها على سنة الله ورسوله ، واحنا جايين نوكع بمراضيكم ، ونريد نعلن زواجهم ونحفظ مي وجهكم بين الناس ، والبنت رايديها هي وحفيدنا
كميل : انتم تحجون صدك ؟ ثبتوها علية بالأكثر خابصيني واكلتوا راسنا صارلكم جم يوم نحلها ونحلها هذا حلكم ؟ اسويلها عرس ؟ وافضح روحي بين الناس ؟ ولكم ماعندي وجه حتى اروح للجامع مو عاد اسوي عرس ولكم شسويتوا شعملتوا ؟
شهم : ما تثق بأخوانك ؟
كميل : لا حشى بس والله ما ضل عقل براسي بعد الصار
يوسف : ارتاح انت والسالفة تتلوز وتجي لعندك المهم البنية جبناها ويانا والسر نلكاه عندها
عبد الملك : على شنو ناوين ؟
شهم : نرجع حگنا يابة نرجع حگنا
طب نوح ما يدري شنو السالفة سمع آخرها وكال
نوح : السالفة مطولة هيج وهاي البلوة عليش جبتوها ؟
شهم : حنى نعقدلها
كميل : ورجعتنا لنقطة الصفر شنو نعقد عليها بالنسبة الي ما اعقد لو اموت
شهم : ومنو كال انت تعقد عليها ؟
يعقوب : ياهو يتزوجها خاف انت ؟
شهم : ننطيها لليستاهلها ، العليكم ترتاحون والعلينا نرجع حقكم وزايد ...
الثلاثي طلعوا من البيت شهم ويوسف وفارس ، ما اعرف وين راحوا بالبنية..
لليل جابوها آخذوها للمخزن بنهاية البستان ، طلعوا كراسي من جوا وكعدوا بالباب الهوا بارد يلعب لعب ..
يوسف : فارس اشعل حطب ورانا كعدة طويلة
فارس : صار ثواني وادفيك ضلعي ..
راح جاب الحطب وشعله وكعدوا داير ميدوره والبنية معصبين عيونها وساكته ، صار هدوء حجت
- انتم وين جايبيني ؟ شنو تريدون مني ؟
شهم : نعقدلج
_افتحوا عيوني ليش ساديها ؟
كام فارس سحب العصبة من عيونها فتحتها وكامت ترمش بعدها عاينتلهم وكالت
_شنو تريدون مني ؟ عليمن جايبيني لهنا ؟ احجوا شكو ساكتين؟
يوسف : مو كلنالج نعقدلج يا عيني
_ وينه الشيخ ؟
شهم أشر على فارس وضحك
شهم : هذا
فارس جان لاف راسه بشماغ اسود وابيض ، ضحك وكال
فارس : نصبوني شيخ من كثر ايماني ماتدرين شكد اتعبد ليل نهار كاعد بالهيمة ، ما اعرف شنو يعني نوم ...
هزت راسها مستهزءة هي هم مبينة مو قليلة ابد
_ ومنو منكم يعقد علية ؟
فارس : اذا تحبين تلاثتنا
ضحكوا على حجايته ..
شهم : خرب بغيرتك مو كلنا نريد جدية ياشيخ
فارس : عذراً وقع سهواً
شهم : تحجيلنا بالتفصيل الممل شنو صار وياج ومنو دزج على كميل ؟ وليش اختاريتيه هو بالذات ؟واختياركم جان عشوائي ياهو اللي تشوفيه بطريقج تدبسيه لو بتخطيط مسبق ؟
_اللي حجيته هو الصحيح ماعندي شي ثاني اكوله
فارس : اعيدلها السؤال بصيغة ثانية احتمال مافهمت عليك
شهم : عيدلها شكو ورانا هاي كعدتنا للصبح
فارس :سولفي السالفة لحد ما نكلج ملينا بعد ما نريد نسمع ، منو دزج على اخوي كميل اللي يصير ابن امي وابوي ، وعليش اجيتي عليه هو بالخصوص ، اختيارج جان مقصود لو عفشيكي
يوسف : ولك عفشيكي شنو
حجاها وضحك
فارس : يعني عشوائي مخربط
يوسف : ولك منين جبتها ماموجودة بكل القواميس
فارس : موجودة بقاموسي ، رجائاً دكتور نريد نتكلم بجدية وبدون مقاطعة ..
يوسف : العفو تفضل
هي حجت واشرت على يوسف : انت دكتور ؟
واحد باوع للثاني بنظرات حقيرة وابتسموا بخبث ، اكو اشارات بينهم يفهموها من العيون ، جاوبها يوسف
يوسف : انه دكتور نفسي ، اي مشكلة عندج اكدر اعالجها ...
شهم : وياج طبيب عدلي ، اتعامل وي الجثث مو وي البشر بين قوسين گلبي ميت ماعندي احساس وعندي قابلية افتح الاجسام اشرحها حتى اعرف سبب الموت ، والوقت ، والطريقة والاسباب ، قتل ممكن خنق ، او حادث عرضي ولله ما اعطى ولله ما آخذ ، يعني احب اعرف تفاصيل الوفيات الغامضة ، اموت على الغموض ، لعبتي ..
فارس ضحك واشر على نفسه...
فارس : محسوبج فارس يلقبوني فارس جنية انسان بسيط مو مثل ذول الوحوش الكدامج ، مدرس كيمياء واشتغل وي صاحبي بالمختبر يعني مثلاً اكدر احضر مادة تخلي الأنسان يموت وما يحس بألم واكدر اسوي مادة تخليه يتوسل بية حتى اموته حسب الحالة يعني ، احجيلنا شنو تحبين من وين نبدي ؟
كهرباء دماغج بيد الدكتور يوسف
اعضاء جسمج اكدر اخدها بالكامل واتلاعب بالأعصاب تكومين تسويهن جواج ، اما شهم سمعتي شنو شغلته ما يحتاج نسولفلج يجيج بالأخير حتى يعرف سبب الوفاة منو انه لو اخوي..
هي هنا انتهت خافت منهم وبدأت تحجيلهم الى ان حجتلهم الأول والتالي ..
ثاني يوم طلبوا من كميل ياخذنا احنا و عمامي للزيارة ، شنو هالكرم اللي نزل عليهم فجأة ماندري بس اللي معروف عنهم كاعد يخططون لشي مو سهل ابداً...
رحنا للزيارة اخذنا كوستر جبيرة ، لليل رجعنا رحت لفارس توسلت بيه يحجيلي شنو صار ما قبل تعجبت اول مرة يضم سر ابطنه وما يخيس
طيبة : عليك الله ما تحجيلي شنو الصار ؟
فارس : حجيتلج بالتفاصيل من كعدنا وياها بعد شتريدين
طيبة : لا احجيلي هي شنو حجت ، وكفنا لهنا وصخرتني اجيبلك مي ومن رجعت كمت تتعزز علية
فارس : طيبة ما احجي كلت باجر يعني باجر
طيبة : اهووووو
تركته ورحت نمت ثاني يوم دزوا عليهم بلغوهم يحولون يمنا ويحضرون شيوخهم للعصر حولوا يمنا وصارت الكعدة شيخنا حاجاهم بأدب وبهدوء ، شيخهم لسانه طويل قابلهم بالقبح ما خجل ولا استحى ..
وصلت حدها يلا تدخلوا اخواني ، طبولهم يوسف وشهم لابسين دشاديش وغتر لافيها على روسهم والسلاح بالمحزم الجلد حاطينه صفح ، وراهم فات فارس لابس مثلهم ، ما قبلوا يكعدون ضلوا واكفين بنص الديوان ، والحجي بدا بيه شهم حسب الاتفاق بينه وبين باقي اخواني ...
شهم : شيخ وما اعرف عليش هيج سموك ، لأن الأدري بيه الشيخة الها اصولها والها مراجلها وانه ماشفت هاي الصفتين بيك
اعترض واحد منهم اشروله يسكت تالي كعد ، وشهم كمل ...
شهم : اللي يقاطع چلمتي جيلة بكصته وما نغلط بيها ..
شيخهم كاله
_ احجي محد يقاطعك
شهم : من دستوا بساطنا واتهمتونا بأعراضنا سالفتكم العوجة طشت بين السلف انه وهذا اخوي ماجنا موجودين استغليتوا الموقف الجنتوا متفقين عليه واتهمتونا باطل ، طخيتوا اخونا بجيلة وحركتوا بيتونا وحلالنا واخذتونا غفل مثل المخانيث ، صارت الكعدة وجدي الله يعلي مقامه ماراد السالفة تكبر بحكم شيبته المباركة وبحكم اخلاقه بين الناس مايحب الشر ولا يطيق ريحة الدم عفى عنكم ونطاكم اللي تريدوه
جاوبه الشيخ : هاي حجيتها بلسانك معناها الحك ويانا عليمن جايبينا لهنا
يوسف : انت لو تبطل تقاطعه جان فهمت اسكت واستمع للأخير راح تفهم كلشي
سكت الشيخ وجهه احمر من فشلته
شهم : جدي عكسنا ما يحب الشر لكن احنا اهله ، ما يحب الدم ، احنا نتونس بيه ، اسأل عنا وهذا علمنا فوك راسك اقرأ شنو مكتوب بيه ؟
(ما لك هيبة يل ما لك شر ) وفهمك كفاية شيخ
_ معناها جايبينا هنا حتى تصفونا ؟
يوسف : محد يطلع منا اذا ما رجع حگنا بالكامل وها مو خاوة لا والله نحجي كلشي صار ، وشيخ عشيرة آل سلمان طرف ثالث هو يشهد بينا وبينكم ..
الباقين كالوا والنعم والنعم
_ شنهو سالفتكم احجولنا ؟
شهم : شيخنا (يقصد شيخ آل سلمان ) بنت تدعي عندها علاقة بأخوي وحامل منه وعلى اساس مهددها وناهبها واخوي رفض حجيها جملةً وتفصيلاً وراها اخوي فارس تصوب وهاي تقارير عمليته كبالك بالملف اقراه ، ومن اخذوه للمستشفى ابوي واخواني واولاد عمامي ،القرية فرغت من زلمنا ، اجوا فاتوا حركوا بيوتنا وحلالنا وطلعوا وهذاك المكان اللي يحب يشوفه يتفضل ويانا ..
جاوبه الشيخ
_ اخوك تصوب ﻷن هجم علينا ، واحنا دافعنا عن نفسنا وبالنسبة للحريق احتمال قدر واحتمال انتم افتعلتوه حتى تجيبونا هنا وتخسرونا كلشي..
يوسف : فارس دافع عن عرضه وارضه ، كل واحد بينا يسوي اللي سواه ، دخلتوا بسياراتكم وزلمكم لقريتنا بيها اعراضنا مأمنين عليهم واحنا بدوامنا اللي رايح بالبستان واللي نازل لبغداد ، شلون تريده يتصرف وانتم هاجمين علينا ؟
تعالت الاصوات وبالنهاية كالوا الحق وية فارس وهاي اول شغلة ثبتت عليهم ، رجع حجى شيخهم
_الضربة اعتبروا ديتها موجودة الباقي ماعلينا بيه
شهم : شلون ما عليكم ؟ اثبتلي منو الحرك بيوتنا وحلالنا انه جدام هاي الناس كلها متنازل عن كلشي نملكه من جدي لعمامي ألنا
_ وذا ما ثبتت شنو تسوي ؟
شهم : واذا ما ثبتت العكس ،اول شي دوسة بساطنا عليها فصل ، ضربة اخوي عليها فصل ، تخويفكم لحريمنا وترويعكم لأطفالنا عليها فصل ، اتهامكم لأخوي باطل عليها فصل ورد اعتبار وآخرها الحريق الصار تعال احسب وياي بيتين كل بيت ميتين متر راحن هن واثاثهن صارن رماد ، البستان تكلفته بالقليل بالقليل فوك ال ١٠٠ مليون
فز الشيخ وكال
_ شني ١٠٠ مليون خاوة هي ؟
شهم : احسب يا شيخ ، الزرع راح كلشي زارعين بيه من حلال الله خير ، من البقر ماتن ١٥ بقرة واقل بقرة بيهن ب٤ مليون ، دواجن الدجاج بهذاك الحساب ، طليان ما ضلت اللي اخذتها النار واللي شردت وباكوهن المايخافون الله ، هواي ناس ما تخاف الله وتاخذ حك الناس وتنام مغمضة براحتها ..من غير احواض السمج تلوثت بالدخان ...
يوسف : نجي نحسبها حساب عرب ، ملايين الها أول ما الها تالي ، شنو ردكم ؟ احنا نسمع
جاوبه الشيخ
_ تلفون تلفون وتبتعدون عن الموضوع الأساسي ، اخوكم نهب بنتنا
يوسف : بسيطة ، البنية موجود هنا نجيبها وتحجي الصار وياها بالتفصل الممل واحنا نسمع ، واذا جان الحك وياكم ياشيخ تاخذ فصلكم مربع واحنا متنازلين عن كلشي ونعتذر منكم ، ها يابة عايلين بيهم ؟
جاوب شيخ آل سلمان وكال كل قصور مابيكم تجي البنية وتحجي الصار ..
وبالفعل راحوا جابوها وكفت بنص الديوان جانت مغطية وجهها ، تستحي من البشر والله ما تخاف منه ...
حجت كل اللي صار بالضبط مثل ما حجته لأخواني ، وحتى يأكدون كلامها حجى شهم
شهم : ها سمعتوها ؟
_ سمعناها اكيد مهددينها من هاي اجيتوا البارحة اخذتوها حتى تجبروها تغير كلامها ؟
يوسف : بابه احنا جابريج على شي ؟ احجي لا تخافين
خافت تلتفت عليه والرجفة بصوتها كالت
_ لا محد جابرني هاي الحقيقة
تخبلوا اهلها ، كام ابوها وكال
_ اكيد مهددينها والدليل لكيناها ابنص بيتكم شجابها هنا اذا نجذب ؟
يوسف : انه اكلك انت تكذب والبنت حجت الحقيقة
_ وين دليلك ؟ احنا عندنا دليل البنت صار اللي صار وياها بعدين اجيتوا حاجيتونا على اساس تعقدون عليها وطلع جذب حتى تجبروها تغير كلامها وتصير كعدة وبالفعل صار اللي تريدوه
يوسف : دليلكم ضعيف ياشيخ ودليلنا عندنا اذا مو البنت اكو غيرها ، وصحيح نعقدلها ما كذبنا
فز من مكانه وصاح
_ وينه دليلكم جيبوه ؟
ألتفت يوسف لفارس اشرله بركبته يعني اطلع جيبه
طلع فارس خارج الديوان ورجعلهم بالدليل وصاح بنص الزلم
فارس : احجي الصار من الأول للأخير لو اضر..... كتل
شهم : وثول مو هيج
فارس : بزعوني غير بالكوة لازمها لنفسي مو راح اطك
يوسف : ذكرني بعد الكعدة اعلمك تفاصيل الصبر شلون يكون
فارس : دخيلك عوفني دمي حامي ومايفيد بية لو تطش طشت ماي بارد بوجهي مو عاد سوالف
ورجعوا يحجون وية الزلم ، ابوي كال
عبد الملك : وسفة منك يبن اخوي هاي تاليتك تحط ايديك بإيد ذول وسفة عليك وسفة فد ما عليك الحسافة ، امشوا دزوا على ابوه واخوانه حتى يسمعون السمعته ويكونون بالصورة ..
اخواني حاجين لأبوي من هاي مكسورة كعدته بنص الديوان ، ابن اخوه شكد صعبة يربي
اجوا عمي واولاده دخلوا بنص الديوان وكعدوا على صفحة وبلش سعيد يحجي مدنك راسه ...
سعيد
كبل فترة صارت شغلة عائلية بينا وبين بيت عمي مالك ، وزوجت اختي لصاحبي ولد ابن عالم وناس وبحضور ابوي واخواني الباقين تزوجت ...
طليقها اللي هو ابن عمي من سمع ما رضى جابني حقق وياي بسطوني الى ان دليتهم مكان البيت ، راحوا جابوها منه وثاني يوم طلكوها ، لهنا عبالي انسدت السالفة، جنت اشتغل بمكان وي رجال ثالث يوم من السالفة بطلني كتله ليش كال انت ما تتأمن على عرضك شلون أأمنك على مالي ، عرفت رايحيله وحاجيله
فارس : عندك دليل ؟
سعيد : ماعندي
فارس : انجب
سعيد : لا تتجاوز
فارس : خلص حجي وشوف التجاوز على اصوله
صاح شيخنا سكتهم وطلب من سعيد يكمل
سعيد : اي عرفت بسببهم هو بطلني ، و وين ما كمت ادور شغل وانقبل ثاني يوم يبطلوني ويحجولي نفس الحجاية ، حقدت عليهم وقررت انتقم ، حجيت لصاحبي كال اكو خطة اذا سويناها ونجحت ناخذ مبلغ محترم وبنفس الوقت نأذي سمعتهم ، ونستهدف اكثر واحد عليه العين بيهم
شهم : واختاريتوا كميل ، لأن العين عليه ومعروف بين الناس كلتوا اذا طلعنا عليه هيج سمعة البقية كلها تحترك
سعيد : بالضبط هذا الصار
يوسف : صاحبك ذكي حبيت تفكيره
فارس : انه هم نسويله زيارة نتعلم منه
شهم : اي ضروري نروحله ليش لا ، كمل يلا لعبتها لنفسي
سعيد سحب نفس وكمل
سعيد : كلتله شلون نسويها ؟ كال عندي جماعة هاي شغلتهم ، وحجالي سالفتهم
نوح : شنو سالفتهم احجي لا تختصر خل الناس تتوعى وتعرف شنو اكو من مصايب عايشة بينا
سعيد : كال عندهم بنات حيل حلوات ويستغلوهم بمثل هيج امور
كميل : شلون يعني يستغلوهم وضح اكثر خلينا نفتهم
سعيد : يعني شلون سالفتك ، تجيك تكولك هيج وهيج صار وياية اخذتها برضاتك اخذتها ما اخذتها تجبرك وبعدها تتصل عليهم من تصيرلها فرصة ويهجمون على البيت او تستهدف الشباب العندهم سيارات او شركات هاي شغلتهم خليهم يحجولكم التفاصيل
شهم : وطبعاً يا شيخ مو بس هيج احنا ما نحجي فقط كلام لا تفضل اسمع
فتح موبايلها بيه تسجيلات شلون استدرجت كميل الى ان وصلوا للقرية
شهم : والهدف من هذا التسجيل يا شيخ حتى اذا فشلت بالمهمة ، تسمعهم محاولاتها وياه حتى ما تتأذى حسب ادعائها وشوفتنا صور بيها آثار تعذيب وغيرها اذا فشلت او رفضت
يوسف : مشغليهم تحت التهديد
شيخنا سألها : بابا هذول اهلج ؟
بجت وهزت راسها بلا
_شيصيرولج ؟
_انه يتيمة ماعندي اهل جنت بملجئ ومن صار عمري ١٨ طلعوني ، ماعندي مكان اروحله تعرفت على وحدة وهي كالت اكو مكان تاخذني أله وتشغلني رحت وياها وطلعوا همه هذوله ..
_ تريدين ترجعين وياهم ؟
_اذا رجعتوني يكتلوني اكيد واذا بقيتوني ما اعرف مصيري بينكم شنو راح يكون
_ انتِ بنيتنا وما تطلعين منا إلا راضية ومأمنة ...
اجه اتصال ليوسف ترخص من شيخنا وطلع للحديقة جاوب ..
يوسف : الو اهلاً فرح شلونج
فرح : هله بيك دكتور هواي اتصلت ماكو
يوسف : يم الأهل وحبيت افرغ راسي شوية ، شلون الوضع كلشي طبيعي
فرح : اي اي كلشي تمام بس دكتور هاي شسويت بيهم انت
يوسف : شمسوي ؟
فرح : من رحت لحد الآن يشتغلون
يوسف : اي زين خليهم ، شنو غيروا بلة
فرح : لحد الآن الستائر والشراشف والاغطية
يوسف : متأخرين بالشغل شعجب ؟
فرح : يركضون دكتور يا متأخرين
يوسف : جيد ، المريضة ريحانة شلونها
فرح : دكتور اسكت غير شكت حلك دكتور نادر
يوسف : شنو شنو عيدي ما سمعت ؟
فرح : شكت حلك دكتور نادر
