رواية القلب بالقلب الفصل السابع 7 بقلم روز الفياض

رواية القلب بالقلب الفصل السابع 7 بقلم روز الفياض

رحنه للصالون الصبح الساعة (١٠) انه ووياي عمتي ام كرم ازدحام وهواي عرايس ..

ماخلصنه الا الساعة ب( ٤ ) ونص رغم عمتي ام كرم طلبت يسوولي مكياج بسيط وخفيف وشعري هم كلتلهم شي نازك وبسيط ..

كصتلي شوية من شعري ام الصالون علمود التسريحة ورفعته وردت البس العدسات رغم صارت بيه خوفة من المره الفاتت بس مرت عمي مارضت كالت:

لاااا ... لتلبسين عدسات كرم مايقبل ..

باوعتلها مستغربة :

متأكدة كرم مايقبل ؟

ام كرم : اي هو كلي مو تخليهم يلبسوها عدسات .. ليش مستغربة ..

ياس: لا مو مستغربة ... بس اكولن شو يمي اخرس ..

ام كرم : هههههههه نزول عليج ام لسان انتي .. هذا كله واخرس .

بالصالون كلها جانت متعجبه وكلها تسال ليش لون عيونها هيج كل وحده لون؟ وليش ماتلبس عدسات ؟ وشلون راح يخلون مكياج لعيوني اذا كل وحده لون ..

آخر شي ام الصالون ردت عالكل بصوت عالي :

عيني زوجها ميريدها تلبس عدسات لان اصلا حلوات عيونها بدون عدسات ... وهسه اخليها مكياج يلوكلها لتخافون ..

.

.

.

.

.

يمكن احلى لحظة تمر على كل بنية من تشوف نفسها لابسة بدلة العرس وواكفة بكامل اناقتها جدام الناس والناس كلها تأشر عليها وتكول الله شكد حلوه هالعروس ...

خلصنه وبقينه كاعدين اني وعمتي منتظرين كرم يجي حتى نروح نطك صور ..

اجه ..

كعدتني عمتي كدام يمه وهي كعدت وره ..

طول الطريق ساكتين لااغاني لا قران كل شي ماكو ..

اتوترت حيل ...

الحمدلله الاستوديو جان قريب مو كللش بعيد ..

نزلوني عمتي رافعة الذيل مال البدلة ..

وهو لازم ايدي وانه مثل العمية كل شي مااشوف من طريقي ..

من دخلنه ناخذ صور كالت عمتي :

كروم ... انت ماما تعال ساعد زوجتك ..

استحيت وحاولت مااضحك ..

اول ماشافني حسيته بي انبهر لحظات ظل صافن وبعدين كال:

زين ... سمعتي الكلام وماخليتي عدسات ..

ياس: اي كله منك ظلن هيج تك وتك ..

كرم : احلى مابيج عيونك كل وحده من لون مو تك وتك ...

باوعت لامه غمزتلي وضحكت ..

خلصنه الصور وطلعنه للبيت بس جان الطريق كللش ازدحام يمكن ظلينه ساعة كاملة بالطريق ..

كللش ضجت وهو هم حسيته متوتر وصار عصبي ..

مرت عمي كالت:

كرومي حطلنه اغنية شغلنه الراديو ياماما غير عرس هو المفروض اليوم زواجكم تفرحون تغنون تركصون مو ذابينها عالصامت ..

مد ايده بدون كلام شغل الاغاني ..

وصلنه للبيت وماادري وين راح ..

لكيتهم جايبين دي جي واتلكوني بالهلاهل وامي تطش على راسي تمن ...

واخيرا عمتي رسمية طلعت بيها فايدة خبصتنه بالهلاهل وكل شوية تكوم تدج وتردح وهي سمينه دنكت على ريم جانت كاعدة بصفي كتلها :

اكلج عفية كعديها المره لاتصير بيها سكته قلبيه بعرسي حظي واعرفه من دون ايام الله تموت بعرسي ..

ريم : هههههههههه خرب يومج ..

استمرت عمتي رسمية تكمز وتغني وتسوي هوسات للعريس ضجت صحت عليها :

عمه ؟

رسمية : هاا يمه ..

ياس: جا عمه غير انه الجايبتج وياي تهوسيلي شو بس تهوسين لابن اخوج؟

ضحكوا كلهم وهي كالت:

هو ابن اخوي وانتي بت اخوي اثنيناتكم نفس المعزه ..

ياس: بعد عكبيش خلصتيها هوسات لابن اخوج .. صوجي مارجعتج ويه ابوي ..

امي وام كرم وعمتي والبنات كلهن يضحكن ..

رسمية: وبت عمنه واختنه تصير جنتنه مانرضه الغريبة تدوس عتبتنه ..

هلا .. هلا .. هلا ..

ياس: اي عفية عليج عمه ولو هاي قديمة ..

ام كرم : لا مو خوش عدنه حنونه غريبة مانقبل بهيج هوسة ههههه..

خلص الوقت ضحك على هوسات عمتي رسمية منا لحدما اجه كرم ..

اتصل على ريم واجت شاورتني كالت :

ياسه كرم وصل ...

ياس: جا شسويله؟

ريم : ههههه لج يعني قصدي يجي يدخل لهنا لو لا؟

ياس: جا انتي عايفه امج معرسه واخوج معرس وانتي هم معرسة وجايه تسأليني وانه اول مره اعرس ..

امي جانت كاعدة بصفي سمعتني وضحكت كالت :

خفي عالبنية ماتعرفج ولاتعرف سوالفج ..

ياس: شبيها سوالفي حجيه؟

امي: ثكلي ولج فضحتينه ..

سكتت وبقيت طول الوقت ساكته ...

مشت بينه السيارة من البيت للفندق وفره بالطريق طويلة وازدحامات ..

كل هذا جنت ساكتة بس داخ راسي ...

وصلنه للفندق كلها راحت وبقينه بس انه وكرم كاعدين هو يباوعلي وانه اباوعله ...

آخر شي كال :

شبيج؟

ياس: مابيه انتي شبيك؟

كرم : اني تمام مابيه شي بس انتي ساكته ماادري شعجب ..

ياس: والله احتاريت وياكم احجي تكولون سكتي وثكلي اسكت تكولون شعجب ساكته ..

ضحك على كيف كال:

من كلج ثكلي هههه؟

برطمت كتله:

امي ..

اجه كعد يمي ولزم ايدي كال:

وانتي يعني زعلانه لان كلتلج ثكلي؟

ضحكت كتله بصوت عالي :

لااا يمعود متعوده انه على امي تزفني بالرايحه وبالجاية ...

ضحك شوية بعدين كال:

ليش يسموج ياسه؟ انتي مو اسمج ياس؟

ياس: لاااا عووووع لاتذكرني بأسمي ... ياسه احسن ..

كرم : ليش اكو بشر يكره الياس ..

ياس: مااحبه عدي عقده منه ..

كرم : why

ياس: هاا

كرم: يعني ليش .... ولتكولين هااا كولي نعم ..

ياس: خوش نعم ؟

كرم : مو كتلج معناها ليش؟ ليش عندج عقده من اسمج؟

ياس: من جنه جهال ونتعارك انه واختي جورية جنت انه اكتلها كتله ...

ضحك ..

ياس: هي ماتكدر علي فشلون تضوجني ؟

كرم : شلون؟

ياس: جانت تكلي ياس خضر ...

ضحك ... ضحك ..ضحك .. لحدما دمعت عيونه وانه اباوعله لحدما سكت كتله:

مبين عجبتك النكته ؟

كرم :

ياس: تره احجي صدك

كرم : ههههه هسه هو منو كال نكته اني لو انتي ؟

ياس: اي انه كلت بس المفروض ماتضحك انت ..

كرم : ليش يابه؟

ياس: يعني غير المفروض انت هسه رجلي وتواسيني وتهديني وتاخذ بخاطري تكلي ياسه واسمج عليج او تكلي اسمج ياس وانتي فعلا غصن ياس ...

انتبهت عليه كللش مركز وياي وصافن علي سكتت ...

سألني بصوت هادىء:

كملي ليش سكتي؟

بلعت ريكي واتدنيت شوية ابتعدت كتله:

هاا؟ قصدي نعم؟

كرم: كملي ...

ياس: نسيت .. نسيت شنو جنت اكول ...

كمت من يمه حسيت نفسي ارتبكت من نظراته المباشرة الي ..

كمت وانه ادردم بصوت ناصي :

خرب هذا شبي هيج صافن علي .. دور وجهك شوية كول هاي تخجل ... مامبين علي خجوله يمكن ... امداني

التفتت ردت اسألة يحب يتعشى بالاول لو يصلي بس شفته واكف وراي مباشرة ..

ياس: هاا؟ اوووه .. نعم ؟

خله ايدية على خصري ... حسيت بمثل الكهرباء بكل جسمي ..

حس بيه .. ابتسم ..

ظليت مخلوسه ...كال:

كملي ...

هزيت راسي شنو؟

كرم: شجنتي تكولين؟

هزيت راسي ماكو ..

ابتسم .. كال:

انتي دائما هيج تحجين ويه نفسج وبعدين تنكرين؟

هزيت راسي اي ...

ضحك حيل .... بعدين اتنهد وكال:

ياسه واسمج عليج ...

ياس: هااا !!!

كرم : اسمج ياس وانتي صدوك غصن ياس ..

استحيت كتله:

اكلك تره خفت منك ...

ضحك كال: ليش؟

ياس: لو طول اليوم اخرس ماتحجي شي وذابها عالصامت لو هسه جاي ...

كرم : جاي شنو؟

ياس: ماادري .. يعني .. هذا ... ماادري شنو ...

ابتسم حيل كال:

جاي اخذ بخاطرج .. واوسيج ..

ياس: يعني تاخذني على كد عقلي ؟

اتدنه علي حيل وحضني اكثر وصار وجه كبال وجهي وكلي:

لااء ...

.

.

.

.

.

بقيت طول الليل كاعدة ومسويه نفسي نايمة لان اشوفه مانام طول الليل بقى واكف يم الشباك يدخن .. جكارة وره جكارة لحدما اذن الفجر ...

ماكدرت اتجاهل وقت الصلاة ...

كعدت شفته يطفي الجكارة ويباوع عالساعة ..

كمت كتله :

صباح الخير ..

كال بعدما اتنهد ماادري هي حسره :

صباح النور .... وين رايحة ؟

ياس : اريد اصلي ..

ماحجه شي رحت اتوضيت وطلعت كتله:

وين تريد تصلي ؟

كرم : ليش؟

ياس: حتى اصلي وراك ..

سكت ظل يباوعلي بعدين دار وجهه وكال:

اني مااصلي ...

حسيت عبالك واحد ضربني على وجهي .. صدك ضجت وحسيت بين على وجهي ...

بديت اصلي اجه وكف كبالي .. سكتت ماكملت صلاتي كتله :

شبيك؟ اريد اصلي .. انت ماتصلي بس انه مااكدر مااصلي ..

كرم : وليش ضجتي؟

بقيت ساكته ماردت نبدي حياتنه بمشاكل ..

كرم : ليش ضجتي؟

ياس : مايحتاجلها سؤال ... يعني انت مو زغير حتى ماتصلي الجهال تصلي انت ليش ماتصلي؟ شلون الله يباركلك برزقك بحياتك وصحتك ؟

سكت ماحجه شي دار وجهه وكلي :

صلي ... صلي ...

رجع دار وجهه علي كلي:

عود ادعيلي وياج ...

.

.

.

.

رجعنه للبيت ونسيت الموضوع او تناسيته لكن بقيت اراقبه طلع اصلا مايصلي ...

كللش ضاك خلكي شبي هذا ؟

بس بالمقابل من مشت بينه الايام جان مدللني طلباتي كلها مجابه بدون نقاش وكل حاجه اكله عليها يكلي كيفج براحتج ...

بده يتغير حسيته ..

كلي مره قبل لاانام :

ياسه ...

درت عليه كتله :

نعم ؟

كرم : من تكعدين تصلين الفجر كعديني وياج ..

بليلتها مانمت من الفرحة يارب ياهادي الف حمد وشكر الك ..

وفعلا بدا يصلي ..

ومن حجيت لعمتي كالت:

وجهج خير عليه .. خليتيه يرجع يصلي ويذكر ربه عفية عليج هو جان محتاج وحده مثلج قوية تساعده ...

جنت فرحانه لان بدا يصلي وراح من بالي اساله اساعده بشنو وليش تكول يرجع يصلي معناها جان يصلي قبل وكطعها ؟

يالله المهم هسه ..

جنت مرتاحة عد بيت عمي عمتي زينه صح مرات احسها غامضة بس زينه وياي وتعلمني وتنصحني بعلاقتي بكرم وعمي جان فرحان بوجودي بينهم حتى مصرف يطيني حالي حال لنى ..

كل جمعة جانت العائلة تتجمع رضا ومرته وبته وريم ورجلها وبتها واحنه ..

مر اول شهر بسرعة ماحسيت بي ولاحتى حسيت بوحشه بينهم وانه اصلا عشرية بسرعة اتعود عالناس وبسرعة يحبوني ..

كرم جان الصبح والعصر يشتغل وعشرته سهله ماعده متطلبات بس جنت احس اكو شي مضوجه ..

شي مايكدر يكلي عليه ..

ظليت اشك بروحي ...

اكيد الصوج مني ..

جان بالليل يخلص باكيت الجكاير كله .. ومرات يجيب واحد ثاني وهم يشربه ..

كرهني بروحي ...

حسيت اكو شي بيه غلط ..

يمكن اتحسف لان اتزوجني .. يمكن حس انه اقل منه ...

بس انه مو اقل منه .. اذا عالفلوس ابوي هم عده خير من الله ..

بس يجوز لان ماعدي شهادة ..

كله منك يابوية ..

لاكله مني .. انه بس كلولي بطلي بطلت ..

او يمكن بسبب طريقة حجيي كلماتي ماتشبه كلماتهم ..

مو نفس المفردات ..

او يجوز طريقة لبسي ماعاجبته ...

بس انه كل ملابسي امه اختارتهن واتعمدت اخليها تختارهن حتى لااشتري شي ومايعجبهم او يحسون ماعدي ذوق او ذوقي مايناسبهم ويناسب عيشتهم ...

اصلا ولامره من عرسنه لليوم طلع وطلعني وياه ..

ولامره كلي امشي خل نطلع سوه نتغده لو نتعشه ..

لو حتى نتمشه بس ...

ولامره كلي احبج ...

معقولة ماحبني ؟

جاليش انه بسرعة حبيته ...

ماتغمض عيني بالليل اذا مو راسه عالمخدة يمي ..

مثل الجاهل كل شويه اكعد اشوفه خاف ذاب الغطا وبردان ..

اكوم اغطيه وارجع انام ..

وهو ولامره سواها ..

هو يدخن وانه كلبي معطب ومحترك علموده ..

عبالك انه الادخن مو هو ...

هو ضايج وانه محترك كلبي وضايج خلكي واذب حسرات علموده ...

ومن اسأله شبيك ؟ ليش هلكد تدخن ؟

يهز راسه ماكو شي ..

هذا الهدوء ماجان بدون سبب .. اكيد وراه اسباب مو سبب واحد ..

بس شوكت اعرفهن ..

مر الشهر الثاني والثالث واحنه على نفس الحال واخاف احجي لعمتي خاف تصير مشكلة وخاف يزعل مني ...

قررت اغير من نفسي لبسي حجيي تصرفاتي حتى تفكيري ..

كلت لعمتي :

عمه .. اريد اروح للصالون اكص شعري واصبغه ..

ام كرم : ان شاءالله بس ليش تكصيه شعرج حلو وثخين ..

ياس: اريد اغير شوية بشكلي عمه مااريد كرم يمل ... واصلا انه اتمنى اكصه .. تدرين امي قبل ماجانت تقبل لان مامتزوجة ..

ام كرم : المهم كرم شيحب يقبل تكصيه؟

ياس: كرم مايحب شي معين كله براحتج وبكيفج ..

سكتت ماعلقت ..

رحنه للصالون كصيت شعري شوية ودرجته بعدما صبغته ..

مريت عالسوك اشتريت ملابس جديدة ..

رجعت للبيت واحس نفسي كاعدة على نار اريده يرجع ويشوف التغيير ..

عجبه لو لا..

اريد اشوف اللهفة والنظرة اللي شفتها بعيونه بيوم زواجنه .. اريد احس بي يحبني ..

معجب بيه ... فرحان وياي ..

بس ماكو فايده ولاانتبه اصلا وحتى من سألته :

شرايك بشعري؟ حلو؟

هز راسه اي وماحجه ولاعلق ..

شنو هالشي المخليك تبتعد عني يوم وره يوم ..

لوما العيب والخجل واخاف تصير مشاكل جان حجيت لعمتي او لامي وكتلها من ليلة العرس لحد الان يمكن (٣) مرات او (٤) اللي اتندنالي بيها ...

والمره الاخيرة انه البادرت ...

انه تاليتي هيج ؟

ليش؟

معقولة مابيه شي مغري ؟

معقولة هاي الناس اللي تشوفني حلوه كلها ماعدها ذوق؟

فكرت مرات ومرات ومرات احجي لاحد واكللهم هالولد مارايدني مايتدنالي رغم احسه ساعات يريدني يقترب مني بالليل مرات يحضني بس ماادري ليش بس التفت عليه لو احاجيه يعوفني ويطلع لو يدور وجهه ...

اكو شي بيه مخليه ماطايقني ..

شكد حاولت اسولف وياه واضحكه ماردت انكد عليه ويكرهني ..

ماجنت افتح وياه اي موضوع يضوج ..

جنت اكعد واسولف وياه مثل الجهال الزغار بس اريد اعرف شبي ... بس اريده يشوفني كدامه ..

بس ماكو فايدة ..

جان اكو شي .. اكو حاجز .. شما سويت يبقى اكو حاجز ماكدرت اعرفه شنو هو ..

كلما اتدناله خطوة يبتعد مني عشرة ...

اسولف وياه يسولف اضحك وياه يضحك وكأنه ماكو شي ..

لدرجة ساعات جنت افكر يمكن انه عقلي بي شي واتخيل اكو مشكلة او اتخيله مايحبني او مامرتاح وياي ..

بس ندخل للغرفة وينسد علينه باب واحد يتغير ( ١٨٠ ) درجة عبالك مو هو ..

يخلصها تدخين وحسرات ..

ظليت اباوع لقمصان النوم التارسه الكنتور وافكر شنو فايدتها اذا هو اصلا مارايدني ..

ماطايقني ... ولاشايفني اصلا ...

استمريت مقاومة الوضع ومحد يعرف باللي يصير بيني وبينه بس الله سبحانه وتعالى ..

آخر شي فكرت يمكن عرفت السبب ..

عرفته ..

اكيد علمود الحمل ..

هو اتزوجني لان مرته الاولى ماتحبل ..

يعني اتزوجني لان يريد جهال ..

آخر شي تعبت من التفكير وحدي ..

شلت التليفون وخابرت على جورية اختي وحجيتلها كل شي من الاول للاخير وحلفتها ماتحجي لاحد ..

جورية: شوكت سويتي تحليل ؟

ياس: ماسويت

جورية : والشهرية؟

ياس: بعدها مافاتت ..

جورية : لازم اتانين من توفتج الشهرية تكلين لعمتج تاخذج تسوين تحليل ..

ياس: اففف ..

جورية : ياسه .. سمعيني زين ..

ياس: اسمعج ..

جورية: خاف ترحين تسوين تحليل مو ترحين تسوين تحليل عده ..

ياس: جا ليش؟ الا تخسريني فلوس ..

جورية : خايبه انجبي وسمعيني .. سوي تحليل بغير مختبر خاف تطلعين مو حامل ويغندب عليج بالزايد ..

ياس: اي .. اي .. صدك حجيج كلام والله انه طلعت بوخه كل شي مااعرف ..

جورية : هو انتي من يومج بوخه

ياس: انعم الله عليج ..

سكتت شوية ماردت يبين صوتي بجيت جدام جورية ..

محد يدري بالنار التسعر بكلبي غير الله ..

مسحت دموعي وجريت نفس وكتلها:

خيه جورية ..

جورية : هاا؟

ياس: ادعيلي .. من تصلين ادعيلي بعد اختج ..

سكتت جورية يمكن حست بيه بجيت بعدين كلتلي:

ياسه ؟ تحبينه؟

ياس: جا خايبه انه ماصدكت اعرس واكضلي واحد واصير مثل هذوله اليطلعون بالمسلسلات انوب مااحبه ... هو شبي ماينحب ..

ضحكت جورية على حجيي وانه دموعي صبت بسكته

الثامن من هنا

تعديل المقال