رواية القلب بالقلب الفصل الثامن 8 بقلم روز الفياض

رواية القلب بالقلب الفصل الثامن 8 بقلم روز الفياض

ج٨

وفاتت الشهرية ..

ومن فرحتي حسبت حسابي لو رحت سويت تحليل وطلعت حامل صدك اخلي عمتي تاخذني للسوك واجيبلهم كلهم هدايا افرحهم مثل ماانه فرحانه ...

رحت كلت لعمتي وعمتي فرحت بس كلتلي:

لتكولين لاحد ..زين ماما؟

هزيت راسي اي ..

مشت شوية ورجعت كالت:

حتى لكرم لتحجين اي شي ..

هزيت راسي وكتلها :

ان شاءالله

ام كرم : ديري بالج مو تنسين وتحجين كدامه خليها مفاجأة ..

ونتأكد بالاول يالله نحجي .. احسن مانخليه يتأمل مو صح؟

ياس: صح ... بكيفج ..

طلعت من المطبخ بقيت بس انه وجوانا هي تنظف وتغسل الفاكهة وانه صافنه كالت:

مدام انت في بيبي؟

ابتسمت كتلها:

ماادري ... ان شاءالله ..

ابتسمت وسكتت جوانا ... كتلها:

جوانا مو تكولين شي لاحد لحدما نتأكد عمتي ام كرم ماتقبل ..

هزت راسها اي ..

الظهر رجع كرم عالغدا وكعد بصفي عالسفره دنك يم اذني كلي:

اتصلت بيج الصبح مشغول ..

ياس: خاف من الشبكة مااتصلت بأحد اليوم ولااحد اتصل بيه ...

سكت فسألته :

شعجب اتصلت؟ ردت شي؟

كرم : لاء .. بس ماادري عجبني اتصل بيج واحجي وياج شوية ..

فرحت حسيت بكلامه اكو نوع من الاهتمام معقولة اشتاقلي معقولة حس بيه ..

ياس: يا صلاوات يالله ماصار شي وره الغدا احجي وياي واني هم عاجبني احجي وياك ..

كرم : انه

ياس: اي انت جا منو ابوي ..

كرم : لج قصدي كولي انه مو اني ..

ياس: ليش مو انتم تكولون اني هاي اني صرت احجي مثلكم يمكن تحبني ...

كلت هالكلمتين واخرسيت حسيت روحي جفصت ..

هو ظل صافن بوجهي وانه هم باوعتله بس حصرتني البجية ردت اكوم من السفره بس لزم ايدي وكعدني ..

كعدت وانه خايفة عمي لو عمتي لو لنى .. واحد منهم يشوف الدموع بعيني وانفضح ... شحجي وشكول شبيه ابجي ...

بقيت كاعدة وياهم عالسفرة وساكته همه ياكلون ويسولفون كل واحد على دوامه وشغلة وشنو سوه بالنهار بس انه ساكته وكل تفكيري شكول اذا عاتبني وره الغدا ..

وشحجي اذا سألني شبيج؟

مااكدر اكله احبك وانت هاملني ..

مااكدر اكله ميته عليك بس انت بارد وياي ..

مااكدر اكله ادري بيك ماتحبني بس مو بيدي حبيتك ...

غصبن عني حبيتك ..

حبيت كل شي بيك حتى برودك وقابله بيك شما تكون بس مااكدر اشوفك يومية بالليل سهران تدخن لحدما يحترك صدرك من الجكاير ..

مااكدر اشوف بعيني دلائل عدم حبك الي واسكت ...

مااكدر اتحمل وضع الموجوده وماموجودة ..

موجودة كدام الناس مرتك وموجوده بين اديك بس ماتشوفني ولاعبالك موجودة بحياتك ..

.

.

.

.

يحجي ويسولف وضحك وياي كدامهم ولازم اجاريه واسوي مثله ..

ونصعد فوك لازم اعتبره غريب او ماموجود مثلما هو معتبرني ..

خلصوا كلهم اكل وانه منتظرته يعوف ايدي حتى اكوم اصعد فوك قبل لاانفجر وابجي ..

اجت جوانا تشيل الاكل وانه اباوعلها واحاول اسحب ايدي منه بدون ماتنتبه ..

سحب ايدي حيل كلي:

مااكلتي؟

ردت ابقى ساكته لان بعده مصر يتجاهل وجودي ومشاعري بس ماكدرت ابقى ساكته :

مسدوده نفسي ..

كرم : شبيج؟

ياس: سلامتك ..

ماحسيت الا سحبني من ايدي حيل وكام صعد وانه اركض وراه ..

دخل للغرفة ودخلني وسد الباب كال:

ياسه خل نكعد نحجي شوية هنا ..

كعدت وهو كعد بصفي كال:

يمكن انتي ممرتاحه وياي ويمكن اني متعب لا مو يمكن اكيد اعرف هالوضع متعب نفسيا اعرف يمكن وحده غيرج متسكت ولا تقبل بهالوضع بس مابيدي شي ...

باوعتله كتله:

يعني شنو مابيدك شي؟

كرم : يعني هالوضع انفرض علي مثلما انفرض عليج ...

بذيج اللحظة كلبي وجعني ..

ورأسا طاحت دموعي خرز خرز ...

طلع مايحبني ...

طلع مجبور علي ...

مارايدني ... ولاعده استعداد يتقبلني ...

لا شعوريا ظليت اضرب على خدودي ...

ياس: امده حظج ياسه ..

امده حظج ياسه ...

امده حظج ...

ظليت ابجي وادك على روحي وهو كاعد ساكت ومدنك راسه ..

ياس: ليش هيج ... ليش .. مادامك مارايدني وماتريد اصلا تحبني .. ليش كسرت بختي .. ليش ورطتني ليش ...

لزم ايديه حيل وحضني ...

كرم : كافي .. اهدي ..

ياس: عوفني ... عوفني كتلك عوفني ..

كرم : اعوفج بس اهدي شوية ...

ياس: شهده يابرودك ... يابرودك ... جاي تكلي عجبني احجي وياج وهذا حجيك ... جاي تكلي مااريدج وتكلي اهدي ...

شتريدني اسوي يعني ... اصفكلك؟

ظليت احجي لحدما تعبت وهو ساكت ...

ياس: الله ينتقم منك ..

رفع راسه باوعلي يمكن انقهر من حجايتي بس هم سكت بعدين كلي :

شنو تردين مني هسه اني حاضر ... تردين طلاك اطلكج تردين تبقين ... ابقي وماراح ينقصج شي ..

كتله وانه ابجي :

مااريد شي منك ... مااريد ... اريد الله كون ياخذ عمري وارتاح ... مااريد شي بعد ...

بقى كاعد كبالي هو ساكت وانه ساكته ..

تعبت من البجي ..

ظليت بس اباوعله وهو مدنك راسه ...

كل شوية اتطيح مني دمعة ..

فاتت ساعة وساعتين غفيت ..

كعدت وره ماادري شكد شفته مثلما هو كاعد كبالي ويباوعلي والجكارة بيده ..

غمضت عيوني ودرت عالصفحة الثانية مااريد دموعي تطيح كدامه ...

كرم : ياسه ؟

ماحاجيته ..

كرم : ياسه؟

هم ماحجيت ..

حسيته اجه صار بصفي طاحت دموعي كتله :

شتريد من صخامه ؟ شتريد بعد؟

حسيته راد يحضني انتفضت ووخرت كتله:

جنت اتمنى امنية تدنه يمي وتحضني ...

اتمنى لو بس من ينسد علينه باب الغرفة تبقى نفسك انت نفس الشخص الجان وياي جوه ...كدام الناس ...

هسه المن حاضني بعد؟ المن؟

اتحسر بعدين كال:

مو بيدي ...

اتصلي بيمن تردين اهلي اهلج اخوانج كيفج اشتكي مني كوليلهم هيجي كلي هيجي سوه بيه ... سوي اللي يعجبك .. اللي يريحج سويه ..

عافني وطلع ...

ظليت حايرة شسوي هسه لااكدر ابقى وياه ولااكدر احجي وشحجي لو ردت احجي شكول ...

دكيت على جورية اختي جانت يم الخياطة ..

شيصبرني على ماترجع للبيت وتتصل بيه ...

ظليت الوب واحوس بالغرفة محتارة شسوي ...

اتصلت جورية وانه ركضت للتليفون ..

حجيتلها كل الحجي اللي كاله ... ظلت مصدومه .. سكتت ماحجت شي ..

ياس: شو سكتي؟

جورية: شحجي؟ هو اكو حجي ينحجي بعد؟

ياس: كليلي دبريني شسوي هسه اخابر امي لو اخابر ابوي؟ لو انزل اسولف لعمتي وعمي .. حاجيني لاتخليني هيج تره راح اتخبل ..

جورية: لا لا لاتحجين لاحد هسه ... صبري خل نشوف التحليل يمكن من يعرفج حامل يتغير ... واصلا امج وابوج لو كتيلهم راح يكلولج المره المعدله تعرف شلون تخلي رجلها يحبها صبري عليه ..

لطمت خدي كتلها :

المصيبة اعرف حجيهم .. اعرفه ... بس شلون ابقى ويه واحد مايريدني ويكلي انفرضتي عليه ..

جورية: بعد اختج صبري عليه صدك .. تره ماصارلج سنه .. وره السنه سنتين يالله الوحده تشتكي .. مو هيجي كبل .. وروحي سوي تحليل وعايني من الله خير ...

سديت التليفون وانه دمعتي على خدي ...

مسحت دموعي وغسلت وجهي ونزلت لعمتي ..

ياس: ها عمه نروح؟

عمتي كالت:

بكيفج .. عبالي بطلتي ..

ياس: ليش؟

عمتي : مو شفتكم مانزلتوا لاانتي لاكرم كلت يمكن يردون يبقون سوه ...

ياس: لا اخذتنه نومه ..

عمتي : يالله كيفج لبسي واني هم راح البس ...

.

.

.

رحنه للمختبر سويت تحليل حمل وكعدنه ننتظر ..

وره تقريبا نص ساعة طلعت النتيجة بس مو حامل ..

عمتي حسيتها ضاجت ..

وانه هم ضجت ..

جان عدي امل اطلع حامل يمكن الله يهديه ويحبني ..

جبت الطريق ابجي وعمتي تسكتني عبالها ابجي عالحمل ماتدري بالمصيبة الطاحت على راسي ...

ماتدري ابجي على حظي ..

اخذتني شربتني عصير وبعدين رحنه اتمشينه ...

جانت تحجيلي طول الطريق شلون اتعرفت على عمي وشلون حبته وهو ماجان يدري بيها ..

وشلون جازفت وظلت تلمحله عن مشاعرها واعجابها بي الى ان واجهها هو برفضة بصورة مباشرة بسبب الفروقات الاجتماعية بينهم ...

كونه هو جاي من الريف واهله ناس على كد حالهم وهي وحيدة اهلها ومدلله وابوها جان قاضي ..

بس هي بقت مصرة على حبها اله وهو بقى مصر علر رفضه الها ..

الى ان انخطبت لغير واحد جان وياهم بس بالنهاية انفسخت الخطوبة لان هي جانت تحب عمي ..

وهالمرة عمي الظاهر حس نفسه خسرها المره الفاتت وهاي اجته فرصة بعدما فسخت ولازم يستغلها ..

فخطبها واهلها وافقوا بشرط يسكنون يم اهلها بالعاصمة بغداد لان اهلها ماعدهم غيرها ومايكدرون يفاركونها ..

وصارت القسمة واتزوجوا بعدما عانت هي وحدها وهو وحده لمدة (٤)سنوات ..

سمعت القصة وبقيت ساكته ..

ماادري يجوز هي تعرف بوضع كرم وياي لذلك جاي تحجيلي قصتهم هي وعمي ويجوز بالصدفة حجت ...

يمكن السالفة صدك تحتاج مني صبر بعد ..

ومحاولات اكثر ..

رجعنه للبيت اول مادخلنه اتفاجأت بكرم بالبيت ..

راجع من الشغل ..

اول ماشافنه كال:

وين جنتوا؟

رادت امه تجاوب وتطلع عذر بس بذيج اللحظه ماادري شخلاني كلتله الصدك :

بالمختبر ..

يمكن جنت اريد اغثه؟

يمكن جنت اريد اوجع كلبه مثلما وجع كلبي ..

ويمكن جنت اريد منه رد فعل حتى اعرف شنة المفروض اسوي وشلون اتصرف بعدما صدمني وجرحني بحجيه اليوم ..

كرم : يامختبر؟ شعدكم؟

رأسا مشت عمتي بسرعة راحت وكفت وراه وظلت تأشرلي مااحجي بس ماكدرت ..

ياس: ماعدنه شي رحت سويت تحليل حمل ...

سكتت انتظرته يسألني عن النتيجة بس حسيت وجهه ظل ينطي الوان ...

بقى ساكت .. بس بعدين كال:

وليش ماكلتلي جان اخذتج وياي؟

اتدخلت امه بسرعة حست الجو متوتر كالت:

الجايات اكثر من الرايحات ... الله يرزقكم بنونو حلو ان شاءالله بعد عرسان لاتستعجلون ...

باوعلي هو بعد مافهم ماكو حمل وكال:

وليش متجاوبين عالتليفون؟

ياس: مادك

كرم : مادك؟ بالله طلعيه وشوفي كم مره متصل بيج اني؟

مديت ايدي بالجنطه وطلعت التليفون لكيته صدك متصل ( ١٠) مرات ..

ياس: ماسمعته ... هوسه بره ..

كرم : مره ثانية خلي بالج يم التليفون خاف اتصل بيج لاتخليني بقلق واضطر اعوف شغلي واطلع ..

عمتي واكفة وراه وتأشرلي لاتجاوبين بس غثني اسلوبه وعصبيته كتله :

وليش تتصل؟ مو حجيت وياي الظهر وكتلي شنو جان عاجبك تحجيه الي ... اكو شي بعد عاجبك تحجيه؟

جر نفس حيل واتنهد واشرلي براسه اصعد للغرفة ..

مافهمت كتله :

شنو؟

كرم : امشي اريد احجي وياج ..

صعدت وهو صعد وراي وامه واكفة ماتعرف شكو ..

دخلت للغرفة ودخل هو وراي وسد الباب ..

كرم : سمعتي التليفون من دك لو ما سمعتيه؟

ياس: كتلك ماسمعته؟ عمتي وياي اسألها خاف ماتصدك ..

بقى ساكت شوية بعدين كال:

خلي التليفون يمج وعلي صوته لتخليه صامت حتى من اتصل تسمعيه وتجاوبين مو اظل بقلق عبالي ماادري شصاير بيج واضطر اعوف شغلي واجي اركض وتالي متالي جنابج رايحة تسوي تحليل مدري وين واني آخر من يعلم ..

بقيت ساكته ... والدمعة بعيني ...

مسح وجهه بيديه وكلي بهدوء:

تدرين شكد قلقت عبالي سويتي بنفسج شي ..

طاحت دموعي وظليت ابجي حيل ...

كرم : اوووف ياربي ..

ياس: انت سويلي شي ..عفية انت سوي بيه شي .. اي شي سممني ... مسدس ماعدكم مسدس موتني وكول ماطلعت بنيه ... مو عدك مختبر جيبلي سم اليوجع كلبي انه اشربه بدون مااحجي ولااكول والله بس شوفلي حل .. شوفلي طريقة للموت .. شلون اموت ..شلون؟

اجه حضني حيل وكلي:

مااسوي ... مابيدي شي اسويه ... مو بيدي .. والله مو بيدي ..

ادري بيج متكدرين تحجين لاحد من اهلج ..ادري بيهم ميقبلون تطلكين ..واعرفهم حتى لو اني غلطان يظلموج ويشيلوج ذنب غلطي ...

بقيت ابجي حجيه يوجع الكلب بس ماسكت :

اول وتالي تبقين هنا .. مثلما كلولج تبقين هنا للموت هم كلولي متطلع من بيتك الا ميته ...

باوعتله كتله:

موتني ... عفيه ... فدوة اروحلك موتني ..

حتى انت تخلص وانه اخلص ... ابوس ايدك موتني لان مااكدر اشوفك يومية كبالي واتصرف عادي بعد الحجي الكلته ..

مااكدر والله ... ابوس ايدك .. ابوس رجلك ..

ردت ادنك على رجله بس لزمني ودفعني عالجرباية وكلي:

كاافي ... مثل مااني متحمل انتي هم لازم تتحملين ... ماكو مفر واي تصرف تأذين بي نفسج ماارحمج تره ... افتهمتي ؟

طلع وطبك الباب وراه حيل وخلاني بيني وبين الجنون شعره ..

مابقت فكرة عن الانتحار والموت مافكرت بيها ..

ومابقى وعلة ماخليتها بنفسي حتى اكدر اقتنع ليش مايحبني ..

ومابقى احد مافكرت اروحله واحجيله يمكن يلكالي حل لهالوضع ...

بس بالنهاية ماوصلت لاي نتيجة ..

من كدما بجيت نمت بمكاني وماكعدت الان سمعت خطواته بالغرفة ...

باوعت للساعة ب(١٠) كل هذا الوكت جنت نايمة ...

اخذ ملابسه وطلع من الغرفة ..

غسلت واتعوذت من الشيطان ونزلت جوه لكيتهم متعشين ومخلصين ..

معناها بس اني وهو بعدنه ..

رحت للمطبخ سخنت العشه ورجعت صحتله يتعشه ..

كعد كبالي عالسفره بدون كلام ..

اباوعله ياكل بهدوووء ماادري منين جايب كل هذا الهدوء والبرود ... وليش انه مو مثله ..

رفع راسه شافني اباوعله ماادري شبي مثل الكمز عاف الاكل وكام راح ...

ظليت متعجبه هذا شبي ..

ركضت للمراية اباوع لشكلي عبالي وجهي بي شي بس ماكو ...

رجعت كعدت بمكاني امسح دمعة تطيح غيرها بعدين فكرت يمكن تلعب نفسه من عيوني ..

ماكو غير تفسير .. يمكن مايعجبه شكل عيوني او مايعجبه موضوع كل عين من لون ..

بعد كلمن ونفسيته .. كل شي يجوز وكل شي ممكن ..

كمت ركضت عالدرج صعدت دورت العدسات العدي وينهن

دورت الكنتور دورت الجرارات ماكو وين راحن ..

اتذكرت الثلاجة فتحت الثلاجة لكيتهن ..

رحت للحمام وكفت كبال المراية وايدي ترجف اخاف البسهن لبستهن مره والتهبت عيني ..

بس شسوي مجبور ياسبت ...

لبستهن وعيني اتدمع ..

اكو نغزه شوية بعيني بس ميخالف اتحملها ..

رجعت نزلت جوه كعدت كباله بالصالة ردته يشوف شكل هسه بعدما لبست العدسات .. بس ماباوعلي ...

دورتلي على حجه حتى احاجيه بيها بس ماعدي حجه ..

اخر شي خطر على بالي الجاي كمت ركض اسوي جاي ..

بعدني واكفه يم الطباخ متانيه الجاي يخدر شفته طلع من الصاله بأتجاه الدرج ...

ركضت عليه كتله :

كرم ؟

التفتت علي كال:

نعم؟

ياس: جاي اسوي جاي ماتريد اصبلك وياي؟

كرم : لامااريد .. اريد انام تعبان ..

صعد وعافني ...

ظليت واكفة يم الدرج حايرة بعمري ..

محتارة شسوي ..

طفيت الجاي وصعدت للغرفة بس اول ماصعدت الدرج اتفاجأت شفته نايم بره الغرفة ..

فارش مندر بالصاله الفوك كبال غرفتنه ونايم ...

ماادري شصار بروحي ...

كل هالسوالف بيوم واحد ربي هواي ...

ماظل بالكلب حيل ...

لااكدر اغلس احبه وشالع كلبي ..

ولااكدر اروح اسأله ليش؟ واحجي وياه ... مااكدر كرامتي ماتسمحلي ...

ليش هيج ولك كرم ... موتني بس مو هيج موتني كون موت صدك رصاصة كون مو هيج موت مااريد هذا الموت بطيء ويأذي اكثر من الموت نفسه ..

اتذكرت امي من جانت تكلي لاتغمين روحج مايصلح ...

هاا يمه شسوي هسه؟

هذا كله ومايصلح اغمه ؟

يارب الك المشتكى ...

التاسع من هنا

تعديل المقال