رواية بنت المصري ومؤذن الحي الفصل الثالث 3 بقلم جمانه السعيدي
احلام....اني كاعده المغرب بيتي واجاني خبر نقلومحمود
للمستشفى
اخذت منى ورحنا نشوف شنو المشكله
طبعا منى هنا عمرها سبع سنوات
وصلنا البنات والولد بلمستشفى كلهم يعرفوني
اني كل توقعي وكع بلسوك او تخربط لان هالايام هو يشكي من راسه عنده ضعط
ضايج على اهله صار هواي مرايح شايفهم
وصلت للمستشفى الوجوه ماتبشر بخير
جماعتي كلهم ضايجين من شافوني كلهم دنكووو
لان محمود وصل للمستشفى ميت
حتى مالحكو يسعفونه لان حياته انتهت قبل لا يوصل
للمستشفى
سئلت البنات ووين محمود
ااشرولي على غرفة الوفيات
وكفت بمكاني ولزمت ايد منى حيل شنو بغرفة الوفيات
يعني محمود مات
مستحيل شلون يموت بقيت واكفه بمكاني
مااريد ادخل غرفة الوفيات
حتى لا اشوفه ميت معقوله محمود مات
شلون مات واني ومنى شلون يعوفنا
هيج بكل سهوله دار وجها وراح
صار شكد ميت على سوفت اهله يريد بس يشوف امه ويطمن عليها بس باقي علمودنا
مايقبل يعوفنا ويروح خاف الدوله تمنع دخوله للعراق مره ثانيه وبعد مايشوفنا
محمود راح اكو شي أخذا منا
شي اقوى من حبه
المنى منى روحه من هاي الدنيا
شلون استسلم للموت وعافنا
جمانه السعيدي
منى...ماما ليش وكفتي اريد اروح اشوف بابا
احلام...من سمعت منى راسا نزلن دموعي
منى...ماما ليش تبجين يكولون بابا هنا بهاي الغرفه
نروح نشوفه
احلام...عفت ايد منى وكتلها ابقي هنا اني اروح اشوفه
منى...لا ماما اني اريد اروح اشوفه وياج
احلام...ماكدرت اسيطر على دموعي امسحهن
ويرجعن اينزلن صوتي راح
رجعت لزمت ايد منى ودخلنا الغرفة الوفيات
مغطين وجه لان مبين سبب الوفاة تمزق الكبد اثر الطعن
باداة حاده
مايحتاج يشرحون الجثه حتى يعرفون شنو سبب الوفاة
منى...ماما ليش مغطين وجه بابا
احلام....قربت ورفعت الغطى عن وجها
عبالك نايم هو محمود حبيبي بس هلمره
ساكت مسحت دموعي وحجيت بصوت خفيف كله حزن
احلام...محمود حبيبي تسمعني اجينا اني ومنى نشوفك
كوم حاجيني شنو الموت منعك تحجي ويانا
محمود ليش عفتنا اني مااكدر اعيش بدونك
هاي بنتك تريدك
منى...ماما ليش مايرد علينا
احلام...سمعت بنتك تريدك ترد عليها
امك محمود امك اذا سئلتني عنك شراح اكول
امك منتظره ترجع وتشوفك
ليش تخليها تحجي عليه هسه تكول العراقيه اخذت ابني
ومارجعته اليه
اعرف انت مقهور لان ماشايف اهلك من زمان
بس ولله اني ردتك تروح تشوف امك
خطيه كلبها عليك محمود شراح اكول لخواتك
ليش ما ودعتنا قبل لا تروح ليش ماكلت راح اعوفجن
ثنيينجن زين هم فكرت منو النا من بعدك
شلون راح نكمل حياتنا من دونك
عشت غريب وتموت غريب ليش هيج
ادفنك هنا لو ارجعك المصر ابو صوت الحلو
عشت وياك عشر سنوات ماسمعت منك كلمه وحده مو حلوه
تعرف من خطبتني شكد فرحت
بس خفت خاف اطباعك ما تشبه اطباعنا
خفت مااكدر اتعود عليك خفت نتزوج وتعوفني وتسافر
خفت ما تحبني وما تحب لهجتي
خفت ما تحب اطباعي
بس من بعد زواجنا كل يوم يمر عليه وياك
احمد ربي و اشكره الف مره اكول محمود نعمه جبيره
من رب العالمين الله رزقني بيها
اسفه لان صعبت عليك الموضوع مسحت دموعي
تعرف ليش ماسافرت وياك لان سمعت امك تكول مااريد احلام خفت اروح اسكن وياك هناك ويغيروك عليه
وتعوفني مجرد افكر انت راح تعوفني اتخبل
لان اني احبك
ليش هيج فجئه قررت تعوفني وتروح
اني ماكتلك اذا عفتني اموت من بعدك
جمانه السعيدي
منى...صح اني عمري سبع سنوات بس فهمت من كلام امي
بابا مات وراح يعوفنا للابد
كمت ابجي ابجي على بجي امي
احلام....ليش استعجلت وعفتنا ولله بعدنا محتاجينك
بنتك هاي حبيبتك منو الها من بعدك
اي ليش هيج تفاجئني بلموت اني كل عمري اخاف من الموت بس هسه كمت اخاف أكثر
لان الموت هلمره اختار شخص عزيز عليه واخذه مني
منى...بقت امي تحجي ويا ابوي ودموعها تجري شلال
واني ابجي على بجيها
لحد ما اجا خالي وخالتي سعاد وبيبي
كوه سحبو امي من الجثه حاضنه ابوي وتبجي
حاضنته بقوه ماتقبل تعوفه ابد
كل كادر المستشفى يبجون على بجي امي
وعلى العشره الحلوه لان كلهم يعرفون بابا صار زمان
يشتغل وياهم
عزا بابا كان عزا مهيب طلع ويانا للتشيع
كل الكادر بلمسشفى حتى الدكاتره والممرضين
والعمال كلها طلعت برا المستشفى حتى تودعه
الشارع انترس ناس وامي صوتها راح من كد الصريخ بصوت عالي
رغم شكد اكو ناس بلشارع
بس صوت امي حيل واضح وهيه أصيح محمود
محمود ليش عفتني
منى.... اشترت امي كبر بلنجف ودفنت بي ابوي
كتبت على القبر
(( قبر المغترب المصري محمود سليم ابو منى ))
ايام العزه امي انهارت هلكد ما تصرخ وتعيط وتضرب نفسها مامصدكه ابوي مات
اكثر مره شفت امي انكسرت بيها هاي المره
بعد العزا كدر خالي يدز خبر البيت جدي عن وفاة بابا
ووصللهم خالي خبر إذا يحبون ينقلون الجثه المصر
بعد اسبوع وصل خبر من اهل ابوي لا مانكدر على تكلفت نقل الجثه المصر لان لازم الجثه تنحقن بابره تمنع تعفن الجسم
حتى يكدرون ينقلونه من العراق المصر
وهاي الابر تنباع بلدولار وهمه ضروفهم على كدهم
مراح يكدرون يتحملون هيج تكلفه
وحتى امي ماتكدر تتحمل هيج تكلفه غاليه عليها
بقا قبر بابا بلعراق
منى بعد أيام العزا ماخلصت سمعت امي تحجي ويا بيبي
وخاله سعاد
احلام...اتمنى راتبه زين جان حولته الاهله بمصر
بس الراتب كلش قليل مايسوه
واني هم راتبي قليل لو ما الولادات جان كتلنا الجوع
وصل النا خبر اهل بابا بمصر مسوين عزا البابا
وموزعين اكل بثواب روحه
من هاي اللحظه انقطعت اي علاقه النا بمصر
بعد ماعرفنا اخبار بيت جدي شنوووو
منى...بعد وفاة بابا امي خطت قطعه حديد زغيره
مكتوب عليها
بيت المصري محمود أبو منى
زوج القابله ام منى
رفضت تكتب على القطعه بيت القابله ام منى وبس
تريد كلمة بيت المصري ما تتغير
نبقى طول عمرنا يسمونا بيت المصري
اني افتخر ابوي مصري
امي خصصت كل وقتها للشغل حتى تكدر أسد احتياجاتنا للحياة وما نحتاج اي احد
الحمد لله رب العالمين ساترها ويانا
صارت كل المسؤليه عليها
الإيجار والامبيرات والمسواك ومصاريف المدرسه
رب العالمين ابد ما ناسينا امي تقريبا كل اربع خمس ايام اجيب وحده لو ثنيبن ورا رزق رب العالمين
سنة ٢٠٠١ ازوج خالي بيت جدي بعد ما عاف المدرسه
وبدا يشتغل
لان صار اربع سنوآت يعيد السادس حتى خارجي درس
بس ماكو امل يطلع من السادس قرر يعوف المدرسه
ويدور شغل ويزوج
وهاي كانت فكرة بيبي و خاله سعاد
على فكره هنا كان عمر خالي ٢٥ سنه
مخلص عمره كله رسوبات
ازوج خالي بنيه حبابه وبت اوادم مخلصه ابتدائيه
اهم شي بيبي حيل راضيه عليها
يكولن اذا العمه حبت الجنه ابليس دخل الجنه
يمكن بيبي قدمت فرصه للشيطان بدخل الجنه بسبب حبها الجنتها هههه
الاحداث الجايه تغير حياتي
هسه خل اوصفلكم الشارع الي احنا مااجرين بي بيتنا
شارعنا تبليط شارع فرعي
البيوت صايرات جها وحده
مقابليل البيوت مدرسه ابتدائيه مختلطه
يعني المدرسه صايره بنص مربع ادوالبيوت داير ميدور المدرسه
بنص البيوت الي بشارعنا بلضبط اكو حسينيه مساحتها بكد مساحه
بيت ٣٠٠ متر اسمها حسنية خديجه
بيتنا بعد عن الحسينيه اربع بيوت
اربع بيوت بينا وبين الحسينيه
هاي الحسينيه مقفوله الدوله قافلتها من زمان
تخاف لايصير بيها نشاط ضد الدوله بذاك الوكت
يعني بعمري ما شفتها مفتوحه رغم اني اروح وارجع للمدرسه كل يوم وافوت من بابها
بيت هاشم الي اعتقلته الدوله يصير جار هاي الحسينيه
الحايط على الحايط بيت هاشم والحسينيه
البيت والحسينيه ثنيينهن مقفولات من زمان
ومبين عليهن آثار الهجر دائما مابيهن ضوه ضلمات
حيل والجهال كلها تخاف تفوت من يمهن بليل
واكو اطفال يحجون عنهن قصص مرعبه
بيهن طنطل بيهن وحش محد يقرب عليهن ابد
اني كنت دائما اكول لو اموت ماادخل بيهن خاف يطلعلي وحش
جمانه السعيدي
وصلنا السنة سقوط النظام
اني عمري وقتها ١٣ سنه من سقط النظام اول شي طلعو
المسجونيبن الي ضلمهم حزب البعث
وهاشم واحد منهم
الشارع كله فرح بطلعت هاشم من السجن
الكل متوقع انعدم محد صدك بعده عايش الحد
هاي اللحظه
اني كنت اسمع هاشم طلع من السجن الرجال الكبار والامهات كلهم فرحانيبن لطلعت هاشم
رغم اني مااعرفه ولا اعرف ليش انسجن
اخذني الفضول اروح اشوفه هلكد مااسمع الناس بلشارع كلها تحجي عنه كم مره وكفت بابنا بس اريد اشوف شكله
بس ماصادف وشفته ابد
هاشم جان عنده علم بوفاة امه وابو
بلبدايه جانت الدوله تهدده يعترف الاي جهه معارضه يشتغل ويهددونه باامه وابو
بس هو مايشتغل الاي جهه كان انسان متدين وبس
الحد ماعرف بعد ٣ سنوات سجن وتعذيب
عرف بالصدفه امه وابو ماتو بسبب حزنهم علي
وهاي كانت أكبر صدمه تعرضلها هاشم
داخل السجن
اول ماطلع وفتح بيت اهله انهار بلبجي ضاع عمره كله داخل السجن وانحرم من اهله
ضاع عمره لان راد يقرا كتب دينيه ويثقف نفسه ويوعي الناس الي قريبه علي اصول دينهم
ثمن سنوات سجن وتعذيب
يسولف للجوارين يكول شفت انواع التعذيب
ووقعو كتاب اعدامي
كل يوم كنت اتشاهد قبل لا انام
مااعرف ليش ما نفذو الحكم يمكن بعدلي عمر بهاي الدنيا
اول ماطلع و فتح بيته الجوارين كلهم فزعو فد فزعه نضفو البيت وصبغو وعدلووو
شمرو الأثاث القديم وجابو جديد بمكانه
طلع بيت مرتب حتى يكدر المسكين يكعد بي
فتحو الحسينبه ونضفوها وصبغوها وترسوها اضويه
انجمعو كل الزلم بلمنطقه وراحو البيت هاشم
اتفقو وياا يكون مؤذن بلحسينيه
ويكون مفتاح الحسينيه بايده هو المسؤل الاول عنها
بلاضافه راح يتركون كلشي تحت امره
اي قرار يعجبه يخص الحسينيه ما يناقشونه بي
منى...اني و امي بلنسبه النا بكلشي ماشاركنا
لان الموضوع مايخصنا ابد مره وبتها ليش يدخلن نفسهم بشغل الزلم
بس اني لحد الان ماشفت شكله شلونه
مره من طلعت من المدرسه بقيت واكفه كبال الحسينيه
كانت صلاة الضهر توها خلصانه والزلم جاي تطلع من الحسينبه
سمعت صوت هاشم وهو يقرا قراءان صوته يخبل
دخلت على كيف اريد اشوف شكله شلونه
كان كاعد.كبال الباب حلو شخصيته هيبه
لحيته نصها ابيض طبعا هو حس اكو واحد
يباوع علي رفع عينه شافني واكفه كباله
طبك القراءان وكال هااا عمو اكو شي
اني بس سمعت ذني الكلمتين انهزمت من كباله
بعد شهرين من طلعت هاشم من السجن سمعنا ازوج وواحد من أصدقاء ابو
من عرف هو طلع من السجن واجا زراه بيته
وشافه وحيد بلبيت
قرر ينطي بنته زوجه اله بدون اي مقابل
جمانه السعيدي
هاشم صار عنده راتب محترم من الدوله بعد ما طلع من السجن
لان يعتبر من السجناء المضلوين بلنظام السابق
وكل المنطقه ادزله اكل وهدايه
وتروح تحجي وياااا
منى...اني بلنسبه اليه التغير الوحيد الي حبيته
بعد ماطلع هاشم من السجن
صوت الاذان كان صوته وهو يااذن صوت جميل
جدا صوت شجي
وهيج البيت الاضلم والحسنيه المهجوره
صارن اكثر مكانين يضون بلشارع
حتلو الشارع اضويته قليله هنا الاضويه الي بيهن تسطع
وضوي الشارع كله
منى...شارعنا صار حلو وبي صوت اذان وبي حركه اكثر من قبل حلو التغير
اني هم صار تغير بوضعي كبرت وصرت صف ثاني متوسطه
وكمت احس نفسي انتقلت من مرحله
طفله إلى مرحلة بنيه
بهاي الفتره تعرفت عل بنيه من الجواربن
تدرس وياي بلمتوسطه
بلابتدائيه مجانت تدرس وياي بنفس المدرسه
انتقلو جديد للمنطقه اجرو بيت بمنطقتنا وسكنو بي
قدمت على أقرب متوسطه بنات هيه نفسها المتوسطه
الي اني قدمت بيها
شلون اتعرفت عليها
من طلعت من الدوام اجينا نمشي سوه وهيه اشرتلي على ببتهم
اني مو كتلكم اكو مدرسه ابتدائيه صايره كبال بيتنا
الي اني درست بيها
المدرسه بلوسط والبيوت دايره عليها على شكل مربع
احنا بيتنا من جهه وبيت رونق صاير من الجهه الثانيه
مقابيل جهتنا
اتفقنا كل يوم نطلع للمدرسه سوه
ونرجع سوه اني كلش حبيتها بنيه حبابه ومؤدبه
كمنا حتى نتفق شنلبس وشلون نحضر دروسنا سوه
صارت صديقتي المقربه حيل اتعلقت بيها
وضعنا المادي بعد السقوط حيل اتحسن
بلنسبه الامي بعد السقوط صعد راتبها بعدها حصلت قطعة أرض من الدوله
وهيج اوضاعنا شويه استقرت لان الراتب صار احسن بهواي من قبل قبل امي تاخذ تفاليس
من الدوله وعيشتنا كلها على حالات الولاده
هسه الراتب صار زين
وصار عدنا قطعة ارض
امي صار عدها زباين اكثر واكثر من قبل صيتها معروف حيل بين الجدات الي يولدن
اول شي امي قررت تبني هاي القطعه حتى نخلص من الايجار
على فكره أصحاب البيت صعدو علينا الايجار بعد السقوط
اضطرت امي توافق لان متعوده على المنطقه
واغلب النسوان الي يولدن عدها يعرفنها ويندلن هذا البيت
سحبت امي سلفه وبدت تبني بيتنا شويه شويه
منا لمن يكمل وننتقل نسكن بي
بهاي الفتره بيبي ام امي توفت
وتركت اثر جبير بحياتنا
امي حيل اتاثرت عليها لان بيبي زينه دائما تذكرنا
وتجي ازورنا بيتنا وتسئل عن اوضاعنا
اذا ماتكدر يجينا تتصل تطمن علينا بلتليفون
موتها ترك حزن بنفسنا عليها الله يرحمها
انتظرونا ممكن تصعدون التفاعل
