رواية قصة معلم ستيني الفصل الثالث 3 بقلم جمانه السعيدي
ستار....حسيت بلانهيار واني اسمع هذا الخبر
أبين قوي من برا بس بداخلي جاي انهار
يعني مرتضى عاف البنات كلها وماحب غير سليمه
شكد عدنا بنات بلعائله
عافهن كلهن وحب سليمه من دون هاي البنات كلهن
هو شكله حلو اي وحده يخطبها راح تقبل بي
ليش ماصارت عينه اله على سليمه
اصعب شي واحد يكون منهار من الداخل بس جاي يكابر
يبين قوي
امي وعمتي فسرن صمتي وانزعاجي بهاي اللحظه
بسبب زواج مرتضى قبلي
امي حست نفسها ارتكبت جريمه
لان وافقت مرتضى يزوج قبلي
عمتي....انا كتلج مايرضا ستار مرتضى يعرس كبله
بس انتي ما سمعتي كلامي
امي... انا راح اكل الابوك نعطل عرس مرتضى
ونخطبلك وتعرسون سوه
ستار....لا يمه بلعافيه خلي مرتضى يعرس اني بعدني
هسه مااعرس
راحت امي وعمتي للسوك اشترن الشغلات الي محتاجاتهن
رجعت امي للعرب وعمتي اجت للبيت
كوه لزمت نفسي كدامها شكد جنت احس نفسي قوي
بس مااكدر أكابر اكثر
حسيت بوجع بروحي قوي
اول مره احس عندي مشاعر حب
بس اني الغلطان ليش ماحجيت
مرتضى احسن مني عبر عن مشاعره وماسكت
اي اكيد مني الصوج ليش بقيت ساكت
ليش اللوم نفسي اني ماجنت مستعد اخطب وازوج
حتلو احبها
مااعرف شلون مرتضى قرر يزوج وهو بعده
لا مكمل الخدمه العسكريه ولا متعين
كلشي قسمه ونصيب واني هاي البنيه مو قسمتي
جمانه السعيدي
رحت للشغل وصاحبي حس اني مو على بعضي
مو مثل كل يوم
كل يوم اوصل للشغل كلي نشاط وحيويه
اليوم حتى الكلمه تطلع مني بلكوه
عماد...شبيك
ستار...مابيه شي
عماد....صاحبي واعرفك زين اكو شي احجيلي
اني صاحبك
ستار...ماكو شي
عماد....ولله اكوشي ستار انت اخوي واعرفك اكثر ماتعرف نفسك
ستار....تعبان
عماد...لا موتعبان اكوشي مضوجك
ستار....ماكوو شي واحجي اريد الزم نفسي ومااحجي بس اذا سكتت انفجر
عماد..وليش تسكت احجي حتلو مااكدر اساعدك على الاقل
تفرغ الوجع الي بكلبك
ستار...البنيه الي احبها انخطبت
عماد ....لا لا تكولها تحجي صدك
ستار....اي احجي صدك
عماد....يعني كملت شغلة العرس مابيها مجال
ستار...مابيها اي مجال صوجي اني بقيت ااجل بلموضوع لمن ضاعت مني
عماد...لا اضوج كلشي قسمه ونصيب وهاي البنيه
مو قسمتك صدك لو مقسومه الك مجان راحت من ايدك
ستار...اعرف بس مااكدر اتخطى اتفاجئت بلخير
عماد...هيه كرايبك
ستار....يعني هيج شي
عماد...هسه تنسى بس تعدي الايام تنسى
ستار...شلون انسى اول انسانه حبيتها وتعلقت بيها
عماد...الايام كفيله تخليك تنسى
شوفلك وحده واخطب وزوج وانت راح تنسى
ستار...مااكدر
عماد...ليش ماتكدر
ستار...صعب اتخطى بهلسرعه وانسى اني ما مستعد
للزواج حاليا
عماد...يمعود انت مكبر الموضوع تروح وحده تجي غيرها
بس بلبدايه صعبه عليك
الايام كفيله تخليك تنسى
جمانه السعيدي
عماد.....تعال شوف هذا التلفويون يخبل صاحبه محتاج ويريد يبيعه بشرفي تحفه
انتم ماعدكم تلفزيون بلبيت اخذه حتلو تشوف على
الاخبار بليل تشوفك مسلسل فلم
ستار...اشتريت التلفزيون واشتريت اريل وواير ورجعت للبيت
اريد اشغل نفسي بشي اريد انسى او اتناسى
بعد مااكدر افكر بهذا الموضوع اكثر
لان سليمه صارت زوجت اخوي وحرام عليه افكر بيها
بقيت اليل كله اثبت بالاريل واضبط التلفويون
وعمتي مكابلتني
فرحانه صار عدنا تلفزيون حالنا خال التاس
طبعاةهيه من تروح للجوارين تشوف كل بيت بي تلفزيون
من ترجع للبيت تبقى بس تحجي بلمسلسلات والأخبار الي تشوفها
بقيت النص اليل اشتغل
مو ميت على التلفزيون لا بس اريد شي اشغل نفسي بي
جاي اكابر حتى انسى الحزن
من كملت تثبيت كلشي لكيت البث خلصان
والتلفزيون معزل وعمتي تعبت من الانتضار وراحت نامت
رحت اريد انام لان الصبح عندي دوووام
بقيت اتكلب بلفراش
اريد اقنع نفسي كلشي قسمه ونصيب وسليمه مو قسمتي
قسمة مرتضى
بس كلبي شيقنعه اول مره يحب بحياته شلون يقتنع
ويرضا نمت شويه وكعدتني عمتي كالت راح عليك الوكت
اكعد اتريك
كعدت جسمي كله مكسر عبالك طايح من جبل عالي
اول مره اكعد هيج ضايج
ومالي خلك اطلع للدوام بلكوه لبست وطلعت
بدو اهلي يجهزون للعرس ومرتضى بلجيش
التجهيزات كلها مسؤله عنها امي وابوي يساعدها
كل نزله للولايه علمود التجهيزات لازم يمرون علينا ويحجولنا
كل تفاصيل العرس
حتى مرتضى من ينزل مجاز مايجي بيتنا هنا بلولايه
ينزل كبل على اهلي
مامصدك نفسه طاير من الفرح
حقه يفرح سليمه حلوه ومؤدبه وبت ناس
بت عمه يحبها وتحبه
الكل فرحان بلعرس اله اني مااكدر امثل الفرح
مبين على وجهي الحزن
ابوي وعمي عمتي وامي كلهم متوقعين اني زعلان
لان مرتضى راح يزوج قبلي
مايدورون بمصيبتي مالها حل
ازوج مرتضى بليلة عرسه ماكدرت ابقى بيت اهلي
اكو ولد سايق جيران اهلي عنده بيكم
اهلي دائما يااجرو يجيبهم للولايه
رحت علي كتله هسه ترجعني للبيت
حتى ما اترخصت من ابوي وامي وعفت عمتي رجعت وحدي
السايق..سئلني ليش راجع بهليل جان بقيت للصبح
اتحجتت عندي شغل ومااكدر ااجله
جمانه السعيدي
اول فتره الزواج سليمه بقت بيت اهلي
لان مرتضى عسكري من ينزل مجاز ينزل كبل على بيت اهلي ومن تخلص الاجازه يرجع يلتحق
هذا الموضوع جان مرضي بلنسبه اليه ولو شويه
لا اشوف سليمه ولا اشوف مرتضى
لان بعدني ما متخطي الموضوع
بهاي الفتره اختي زهور وكعت مريضه
زهور عمرها ١٦ سنه
جابها ابوي للدكتور الدكتور انطاها دورة ابر
ست ابر كل يوم ابره
ابوي....الدكتور يكول كل يوم ابره اذا اخذها وياي
ياهو الي يضربها ابره
عمتي...خلها هنا هاي جارتنا تضرب ابر خلها لمن تكضي
الابر وتعال اخذها
ابوي...اي خوش سالفه
ستار...اني فرحت بزهور لان البيت موحلوه
بس اني وعمتي بي وحتى عمتي كل الوكت طالعه
يم الجواربن تكول اضوج
صار تغير بلبيت بسبب وجود زهور
من اول يومين اجت يمنا صارت صحتها احسن
واكثر شي فرحت بلتلفزيون والمكان المريح
اني هم اسولف عليها اشتريلها
زهور حبت المكان وحبت التغير
زهور....ستار اريد اطلبك طلب
ستار...اي كولي
زهور...اريد اضل هنا
ستار..اضلين هنا ليش
زهور...فدوه اروحلك مااريد ارجع للعرب اريد اضل هنا
اغسل هدومك وشتريد اسوي بس لا ترجعني للعرب
هناك يكربون عليه لليل نهار
حسره عليه اكعد الله يخليك من يجي ابوي
انت كله اريدها اضل هنا تغسل هدومي تخدمني
ستار...ميخالف سهله
عمتي مارضت على زهور تبقى هنا تريدها ترجع للعرب
لان وجودها بلبيت راح يقيد عمتي
عمتي تعودت تطلع وتروح وكونت صداقات ويا الجوارين
اذا بقت زهور يعني عمتي مراح تكدر تطلع من البيت
شلون تعوف بينيه زغيره وحدها بلبيت
عمتي...لا خليها ترد الهلها
ستار...تبقى هنا اني اريدها اضل يمي
عمتي. .شعدها ضاله تمشي لهلها تعاون امها واختها بلشغل
ستار....اني اريدها اضل هنا
زهور...فدوه عمه خليني واني اخدمج بعيوني
عمتي...ابوج مايرضا
ستار...اني احجي ويااا
عمتي سكتت مجبوره لان وجود زهور راح يفيدها
وهيه تعودت على الطلعه
عمتي وصلت بلعلاقه ويا الجوارين
تاكل بيتهم ومرات اجيب اكل وياها من ترجع
وخاصه الجوارين الجدد الي نزلو بصف بيتنا
صار سنه
جيرانه من الساده كان ابوهم اسير باايران
عنده ٣ بنات وولد من اتاسر الاب زوجته اخذت جهالها وراحت عاشت بيت اهلها بغداد
والبيت بقى مسدود طول فترة الاسر
رجع الاب قبل سنه تقريبا ورجع فتح البيت
وجاب عائلته من بغداد
من يوم رجعو للبيت وعمتي ساكنه عدهم
مصادقه الام
رغم اكو فارق طبقي فضيع بين ام علي جيرانه
وعمتي الي طبعها طبع اهل الريف
ذيج مره مثقفه شايفه وعايفه
عمتي لا قرايه ولاكتابه مره عايشه كل عمرها بلريف
بس ام علي بسيطه صادقت عمتي وتعودت عليها
حتى تطبخ وتوديلنا اكل طبخها يجنن
اني كلما اضيع عمتي اوكف يم الحايط وأصبح عمه
اعرف موجوده بيتهم
راسا تجيني
اجا ابوي ياخذ زهور
زهور من شافت ابوي دخل للبيت وعمتي فتحتله الباب
اجت كعدت بصفي
سلم ابوي ودخل وعمتي راحت تحضر ريوك الابوي
ابوي...هااا شلون صرتي
زهور...زينه بس مو كلش
ابوي...شلون مافهمت
ستار...اني افهمك اني اريد زهور اضل هنا
ابوي...شلون اضل هنا وبيتنا مناك
ستار...اني اريدها اضل يمي تغسل هدومي تحضرلي اكل
بعد عمتي كبرت وماتكدر
ابوي.. ماتزوج احسن ماضال وحدك
ستار....لا ماازوج بعد وكت
جمانه السعيدي
ابوي.. شني بعد وكت هذا مرتضى ازغر منك وعرس
ستار...بعدين موهسه اني طالبك زهور اضل يمي
ابوي...اسبوع واحد واخذها ياهو الي يعاون امها
بلشغل
ستار. الله كريم
زهور بقت متمسكه بلمكان ماتقبل ترجع كلما يجي ابوي ياخذها تكوم تبجي تريد تبقى هنا
بكل مره يجون ياخذون زهور عمتي تكوم تحجي
على زهور تريدها ترجع للعرب
ماتريدها تبقى هنا
كلما اهلي ينسون موضوع زهور لان تعودو على غيابها
عن البيت عمتي اذكرهم بيها
بس اني ابد مااقبل ياخذونها منا
(ياريتني خليتها ترجع وياهم ولا هاي المصيبه الي صارت )
بدت زهور تتغير صادقت بنات الجيران البغداديات
وكامت تشوف لبسهن وتريد مثله
وتشوف شكلهن وتريد تصير مثلهن
بس عمتي لازمتها بقبضه من حديد لو تكعدين وتسكتين على هذا وضعج لو ترجعين للعرب
تخاف منها تخاف ماتكدر اسيطر عليها
حرب بين عمتي وزوهور
ستار...اني انطي زهور حصه من الراتب
كلما انطيها فلوس تاخذهن
البنات الجوارين يشترن الها وياهن ملابس
حتى مكياج تشتري وياهن بس بدون مااعرف
هيه لا تطلع ولا تدخل بس غيره تريد تقلدهن بكلشي
حبت شكلهن والوضع الي هنا علي
تريد تصير مثلهن باي شكل من الأشكال
الحد ماخلص مرتضى خدمه عسكريه
طلع من الخدمه وبقى ينتظر التعيين مدرس
بهاي الفتره صار عنده ولد محمد
ست اشهر وطلع تعيينه المدرسه الي طلع تعيينه بيها
قريبا علينه
قرر يجيب سليمه وابنه ويسكن ويانا بنفس البيت
حتى يكون قريب على الدوام
ضجت كلما كانو بعيدين احسن
هسه راح بكون كبالي طولي الوقت
نضفن زهور وعمتي الغرفه الفوك حتى مرتضى يجي هو وزوجته يسكن بيها
وجودهم بلبيت صار امر واقع مابي نقاش ابد
اجرو سياره وجابو غرفة النوم واجووو
بعد ما انتقلو للبيت اني حددت وجودي بلبيت
على كد الاكل واذا اريد شي أصيح زهور
الصبح دوام تكعدني عمتي اتريك واطلع
الضهر من ارجع اذا مرتضى جاي ناكل سوه
واذا اني اجيت قبله زهور اجيبلي اكل وانام ساعه واطلع للشغل
زهور مسؤله عن فراشي وملابسي واكلي بلبيت
مااطلب اي شي من سليمه
ولا بيني وبينها كلام زايد
ننجمع بليل علمود نتفرج تلفزيون كلنا
هذا الوقت الوحيد الي نكون كاعدين كلنا سوه
بهاي الفتره استقليت بشغلي وحدي
طلعت عن صديقي بلشغل كمت اشتغل وحدي
اجرت محل وشتغلت وحدي
بس صداقتنا اني وعماد ماتغيرت ابد
بقت مثل ماهيه
على فكره من ازوج مرتضى عماد فهم مشكلتي شنو
عرف اخوي اخذ حبيبتي
