رواية القلب بالقلب الفصل الثامن عشر 18 بقلم روز الفياض

رواية القلب بالقلب الفصل الثامن عشر 18 بقلم روز الفياض

ج١٨

بديت اخذ دورات لغة اخلص وحده ابدي بالثانية ..

صار عندي حماس ..

جنت شاطرة وعندي واهس ..

خلصت اللغة رحت للحاسوب ..

اريد اتعلم كل شي .. اريد اغير نفسي وحياتي وتفكيري ..

كرم حطيت وراه نقطة واعتبرته نهاية سطر ..

مالازم استسلم واظل مجلبه بي ..

المايريدني مااريده لو تصير روحي بي ...

عمي شافلي مدرسة ابتدائية يمنه بالمنطقة قبلوا يشغلوني عدهم عالطابعة ..

الايام تمشي وانه امشي اسرع منها ..

طلعت حامل ببنية ..

عمتي جانت كللش فرحانه هي ولنى عبالك اول بنية بالعائلة ...

اشكال الملابس والالعاب اشترن ..

جنت من اطلع اظل اباوع على هدوم البنات وغراضهن ..

كلها ماينشبع منها ..

جنت من اشتري قطعة اتمنى مثل البنات اروح اراويها لابوها المتلهف على جيتها للدنيا مثلي ..

بهالفترة رضا نقل شغلة من بغداد لاربيل بعدما اتوسطوا الاهل والكرايب والاصحاب ورجع مرته ...

اخذها وراحوا لاربيل ...

الدوام جان ممتع عالاقل نص النهار يروح بين الناس والجهال ..

والنص الثاني اذا ماجنت مشتركة بدورة فجنه نكعد انه وعمتي ولنى نتعلم كل مره حاجه جديدة ..

مره حلويات .. مرة طبخة .. مره حياكة مرة تطريز ..لان عمتي جانت كللش شاطره بهالسوالف تطرز وتحوك وترسم جان عدها حس فني وتحب سوالف الاعمال اليدوية ..

جنه نكعد وتعلمنة شلون نحوك جواريب لو حذاء مال طفل زغير وجنه انه ولنى نتنافس منو شغلها يطلع احلى ..

وبالنهاية يطلع شغل عمتي احلى ..

كرم جان يتابع الاحداث بصمت ..

ماادري اذا جانت عمتي تحجيله او هو يسألها بس انه جنت ابدا ولااسال عنه ..

بس وضعه جان ماعاجبني ..

رجع يدخن ومايحجي وماله خلك ..

من جانوا يجون اهلي جنت احتار شلون اتصرف طبيعي وياه كدامهم ..

بس جنت ادوس على مشاعري ونفسي واحاول اتصرف عادي بس ابدا مااحاجيه ولاهو ..

بس جنت مرات انجبر اكعد بصفه ..

والعجيب الصلافة العنده ..

جان يسولف ويضحك كدام اهلي ولاكأنه اكو شي ..

بطني صارت جبيرة ووزني زاد ..

جانت لنى ماكله راسي:

اكولج وزنج ديزيد هوايه مو المفروض تقللين اكل او تسوين حمية ..

باوعتلها صفح كتلها:

حميتيش اسم الله بالطبك؟شماكله هو صحن تمن ومرك وشوية خضرة وصحن ركي وكرصة خبز وشوية حليت بحبيتين بقلاوة ..

شني انوب المفروض تقللين؟ هاا؟ ماكله عشاج خوما منومتج بدون عشه ..جليلة الحيا ..

لنى:

ياس: مال هسه صحن مشاوي ..

لنى: هههههههههههه

من طبيت بالشهر السابع صرت ثكيلة ..

حركتي صعبة واتعب بسرعة لذلك جنت بس الصبح اروح للمدرسة ومن ارجع ابقى بالبيت مااطلع الا للضرورة ..

المعلمات بالدوام صارن صديقاتي وبالصدفة وحده منهن رجلها طبيب ومن سألوني مره رجلج شنو يشتغل وكتلهم صاحب مختبر ( ..... ) ثاني يوم اجت كالت :

زوجي يعرفه لزوجج ..

ياس: وين يعرفه؟

ست زينب: زوجي دكتور وعيادته بالبناية الكبال البناية البيها مختبركم .. بس هو اصلا يكول صديقة جان وياه بالمدرسة ..

ياس: دسأليه شلون جان بالمدرسة وكيح وكسلان لو شاطر وعاقل ..

ست زينب: لا يكول هادئ ومؤدب بس كوولش عصبي ..

كتلها بكلبي وينه ادبه لو عنده ذرة ادب واحترام جا ماكلي الحجي الكاله ..

ست زينب: بس هو مو جان متزوج قبل ؟

هزيت راسي اي بس ماحجيت ..

ست زينب : زوجته حسب ماسمعت جانت وياه بالكلية ومتزوجين عن حب ... بس بعدين عافته ...

بقيت ساكته بالبداية ومااعرفت شجاوبها ... بس بعدين كتلها:

كل شي قسمة ونصيب ومحد ياخذ غير نصيبه ...

زينب: انتي بت عمه مو صح؟

جريت حسرة وكتلها:

بت عمه ..

زينب: صعبة واحد يحب واحد ويتحدى علموده اهله وعائلتة وناسه وبعدين يطلع مايستاهل ...

ياس: الله اعلم بظروفها وهو لو تجين للصدك المره تتحمل رجلها شماتكون عيوبه وتصبر وياه حتى اذا العيب منه بس الرجال مايصبر ولايتحمل ... تهون عليهم العشرة بسرعة ..

زينب: اي والله .. بس مو كلهم ..

ياس: اكيد مو كلهم ..

بمرور الوكت زينب صارت صديقتي حيل تتصل علي واتصل عليها وبيوم المااداوم جانت تجيني وتطمن علي..

من دخلت بالشهر الثامن رحت سويت سونار كلتلي الدكتورة:

المي قليل لازم متتحركين ومتمشين هواي ..

ياس: ليش قليل؟ شكد قليل؟

الدكتورة: لتخافين الوضع مابي خطورة بس نسبة المي اقل من الشهر الفات ولازم متتحركين حتى متنزل اكثر ..

رجعت للبيت وانه خاطري مكسور ..

صعدت لغرفتي كوه ..

اتمددت وظليت ابجي ..

هالطفلة الشايله همها بحدي ... شبي حظي المثله محروم من الجهال كون هسه محتار شلون يدلعني ويفرحني ..

المفروض كل شوية يتصل يسألني بتي شلونها ..

ليش ياربي ..

شمسويه عدك وطيحتني بهالقسمة ؟ لا انه من البنات اللاعبات لحدما كايلات بس ولاانه طالعه ولاطابه ولاانه لساني مو زين ويه الناس ولاملكاي مو حلو..

جاليش حظي اعوج ..

صاحولي بالليل عالعشة بس ماردت انزل ..

رجعت عمتي اتصلت ونزلت ..

نزلت وكعدت على اعصابي لان كرم جان موجود ..

جان بيومها عيد ميلاد لنى وعمي جايبلها كيكة ..

عمي: هلا ببنيتي وام بنيتي ..

كعدت يم عمي كلي:

هاا شكلتلج الدكتورة اليوم طمنينه شكد بقى طولت علينه الاميرة ..

دمعت عيوني كتله:

المفروض عالشهر الجاي تجي ... بس ......

سكتت لان دموعي غلبتني ..

شكد حاولت اصير قوية وماابجي كدامه بس بجيت ...

حسيت بي التفتت علي يباوعلي شوية بعدين طلع ماادري وين راح بقى عمي يسكتني هو ولنى ..

عمتي خطية ظلت تبجي وياي ..

عمي: يالله بابا كافي مو زين عليج الزعل والبجي الحامل اهم شي تكون نفسيتها مرتاحة وانتي هاي اول فرحة الج لتفكرين بالشي المو زين وخلي عينج بعين الله ...

باجر من تصير بقوة الله كل حياتج تتغير للاحسن .. حتى هذا التشوفينه عبالك معايش ويانه باجر يتوسل بيج بس يريد رضاج ومترضين عنه ... اريدج تربي من اول وجديد ...

ضحكت عجبتني الفكرة ..

عمتي: ضحكت الدنيا ههههه عجبها الحجي .. تفائلي حبيبتي والوضع مثل مكالت الدكتورة يحتاج بس راحة واني ولنى يمج شنو تحتاجين بس صيحي علينه ..

كمنه نرتب الميز انه ولنى ورحت اجيب الصحونه من المطبخ ..

لكيت كرم كاعد يدخن ...

اخذت الصحونه والشوكات وجاي اطلع طاحت مني شوكة بس مااكدر ادنك اخذها ..

ظليت محتارة آخر شي دنكت وحصلتلي رفسة ابطني من بتي رجعت كمت ماكدرت ..

ياس: اسم الله .. عورتج حبيبتي سودة عليه ..

التفتت كرم باوعلي وانه احاجي بطني باوع عالكاع شاف الشوكة شالها وراح غسلها وخلاها بيدي وانه طالعة سمعته كال:

طفله وحامل بطفله ..

انقهرت بس ماكدرت اسكت درت عليه كتله:

ماطكيتك على ايدك وكتلك تعال اتزوجني مادام شايفني طفلة شجابرك ..

عفته ورحت كعدت وانه دمعتي بطرف عيني ..

بعدها ماكدرت اروح للمدرسة بعد لان خفت ..

كلت ماتسوه خل اجيب بتي بالسلامة وانوب الله كريم على كولت عمتي المدارس الاهلية تارسة البلد ..

دخلت بالتاسع وجان عندي تقصات والالام خفيفة بس عمتي جانت تكول عادي ...

خلصت الاسبوع الاول والثاني وماكو شي .. رحت للدكتورة كالت:

انتي شكلج راح تقبطين شهرج يالله تجيبين ..

ياس: ليش؟

الدكتورة: البجر اغلبهن هيجي تقبط الشهر او مرات تعبره بيوم بيومين وانوب تجيب ..

ياس: وانه من يا صفحة؟

الدكتورة : اذا قبطتي شهرج وماكو شي نتتظر وراها كم يوم واذا ماكو نسويلج عملية ..

ياس:

قبل لا اخلص شهري بيومين جنه كاعدين انه ولنى نباوع فلم رعب جوه بالصالة ..

عمي وعمتي نايمين وكرم جان بيومها معزوم بعرس ولنص الليل وهو ماكو ..

اسلس حب شمسي ومغطيه وجهي بالمخده لان هذا المجرم بيده سجينه ويدور على البطله واخاف اباوع ..

لنى: هسه شجابرج؟

ياس: اشش ولاصوت من تحجين اخاف ..

لنى: اذا انتي دتباوعلين من وره المخده المن خالتها على وجهج بعد؟

ياس: ميخاف المخده على اعتبار باب وانه لابده وره الباب واباوع واذا شافني المجرم اسد الباب بوجهه ..

لنى: مشاركة بالفلم طلعتي واني ماادري ..

وره شوية التفتت شفت لنى تغفي كتلها:

لتنامين .. شوفي ولج راح تكتله شوفي واتعلمي ..

لنى: شتعلم اريد انام نعست ..

ياس: لا لا عفية راح يخلص بعد نص ساعة صبري .. شوفي البطل شلون يخبل يالله شوفي ..

لنى: احلى من اخوي يعني؟

ياس: هو وينه اخوج شايفته انه ... خلصها علي لو مسحور لو زعلان ..

لنى: اي بس اخوي احلى .

ياس: اخوها احلى على اساس اخوج مثل هذا لو يوصل لنصه ..

بعدني مامكملة جملتي دخل علينه كرم انه غصيت بكشر الحب ظليت اكح بالنص ساعة ..

كرم ولنى يضربون على ظهري وانه اكح ..

بعدين من ارتاحيت درت عليه كتله:

كسرت ظهري .. على كيفك شوية شكلولك جيس ملاكمة ..

كرم : العفو عيني ..

راح ... التفتت على لنى لكيتها تضحك :

شبيج شاكة الحلك ؟

لنى: شفتي شلون يشور ... هههههههههههههههه ..

ياس: دخيلج علوية انتي واخوج ..

لنى: يمه شلون دخل عليها وهي تحجي عليه وغصت ..

ياس: كافي خلينه نشوف النهاية ضيعتيها علينه انتي واخوج .. شوفي الناس شوفي الرومانسية مو اخوش ماندري بي شوكت يزعل وشوكت يرضه ..

رجع دخل كرم انه سكتت لنى ضحكت كالت:

هههههههههههه شوف ربي شلون مرتبها الج كلما تحجين عليه يجي ..

كرصتها حتى تسكت ..

كرم: شعدجن لهسه كاعدات وشنو هالمزبلة المسوياتها هنا .... انتي مو وراج دوام باجر ومدرسة؟

سأل لنى:

اي والله وعدي امتحان بس غير زوجتك مورطتني ومتقبل انام واخليها ... تريد تكمل الفلم تعال انت اكعد يمها حتى اروح انام ..

دار علي كال:

اني شايف الحامل تنام ترتاح مو تسهر لنصاص الليالي ...

ماحجيت ..

خلص الفلم ورحنه لغرفة لنى لان من دخلت بشهري ظليت انام يمها ..

تمددت وره شوية حسيت نفسي اريد اروح للحمام صحت عليها:

لنى تعاي كوميني خل اروح للحمام ..

رحت للحمام شفت كرم مشغل اللابتوب وكاعد بالصالة ..

وره شوية هم حسيت نفسي اريد اروح للحمام صحت على لنى:

لناوي كعدي عفية تعاي ساعديني ...

كعدت لنى وهي تدردم :

هذا كله من الحب شمسي مدري من الفلم ..

رحت للحمام ورجعت وصلت لباب الغرفة حسيت ماي ينزل على رجلي صحت:

لنيوه لحكيني مدري شصارلي اكو ماي جاي يصب على رجليه ..

رفعت راسها لنى باوعت وانوب كامت كالت:

هاي شنو ؟ خاف هاي ولادة؟

ظليت متحنطة مااتحرك ...

ياس: بس ماكو وجع عندي ..

لنى: شمعرفني خل اروح اصيح لماما ..

اجت عمتي تركض بس شافتني كالت:

ولادة ماما ..

اخذتني للحمام غسلت وبدلت ولنى راحت حظرت جنطتي وعمي وكرم اسمع صوتهم انخبصوا طلعوا السيارة ..

رحنه للمستشفى انه وعمتي وكرم .. عمي بقى يم لنى ..

عمتي كاعدة يمي وتقره ايات وانه صافنه ..

ماجنت خايفة يمكن لان ماجان عدي الالام ..

بس من وصلنه للمستشفى خفت ..

ظليت ابجي :

مااريد ... مااريد ..

عمتي: هي نص ساعة وتفض وتجيبلنه بنوته حلوة ..

ياس: مااريد .. مااروح ... ..

عمتي: يالله حبيبتي لتخافين ماكو شي يخوف كل النسوان تمر بهاي اللحظة .. نص ساعة مو اكثر ...

ياس: مااريد ...

عمتي جانت كاضتني من ايد وكرم من الايد الثانية ...

حسيت بده عندي الوجع وبديت ازيد بالبجي ..

عمتي تتوسل بيه والسسترات يتوسلن بيه وانه مجلبه بعمتي مااقبل ادخل جوه ..

اخر شي كرم كلي:

مو كلنه طفلة زعلتي ماعجبج الحجي ..

ياس: اي طفلة والله رجعوني لامي اريد امي ..

لزمني من ايديه اثنينهن وخلاني بيد الممرضات وكلي:

كافي يالله .. نص ساعة وتطلعين لسانج شطوله ..

دخلونه وانه ابجي وادردم على كرم ...

ماطولت ولادتي اقل من ساعة الحمدلله جانت سهلة ..

بس اطمنه على ( امنية ) رجعنه للبيت ..

عمي وعمتي سموها ( امنية ) وهي صدك جانت امنية ..

جانت تشبة كرم حيل ..

رجعنه للبيت ودخلوني بغرفة لنى ..

جانت لناوي تسهر وياي هي وعمتي لان امنية جانت ماتنام بالليل ..

ومرات جانت تجي ريم تبات عدنه وتساعدنه ..

الكل جان فرحان بيها وعمي جان من يرجع للبيت يكابلها ويكعد ..

يوميه تصير عركة بين عمي ولنى ..

لنى تريدها بحضنها وعمي يريدها بحضنه ..

بالليل جنت مرات اطيها لريم اذا موجودة او لنى وانام فد ساعتين واكعد حتى اكدر اقاوم واسهر وياها ..

امي وابوي ثاني يوم اجوني وبقوا يمي يومين وراحوا ..

مره من المرات كعدت بالليل مالكيتها كلت اكيد عد عمتي وعمي ...

طلعت شفت كرم بالصالة ومخلي امنية بحضنه ويلعب وياها ..

بالبداية ظليت صافنه عليه شلون يبوس ايديها ويحاجيها بس بعدين رحت اخذتها ..

كرم: على كيفج لاتتأذه .. شبيج هجمتي عليها ؟

ياس: بتي وبكيفي ..

كرم: لا مو بتج مو بس بتج بنتي هم مو بكيفج ..

ياس: صح النوم ... شوكت بالله طلعت بتك؟ قبل الولادة لو وره الولادة ... مو بتك بتي وبس ..

كرم : اني ابوها

ياس: منو كال؟ منو كال؟ اذا عدها ابو فعمي هو ابوها جدها هو ابوها .. انت مو ابوها .. ابوها عمي تسع شهور يسأل عنها ويفكر بيها مو انت ... انت مو ابوها ..

رجعت للغرفة حطيت امنية كبالي عالفراش وكعدت ابجي ...

شوية ودخل وراي هو وكف على راسي كلي:

اتزوجت قبلج وحده اعرفها مدري كم سنة وبقينه متزوجين اربع سنوات ... واتزوجنه وره علاقة .. علاقة حب اربع سنوات بالكلية ووره الكلية .. وتالي ماتالي طلعت ...

سكت وانه ساكته ومدنكه ..

كعدت لنى اخذت مخدتها وبطانيتها وطلعت من الغرفة وهي تدردم :

من اشرد منكم يومية فلم ..

كعد بمكان لنى كلي:

اتخيلي تحبين واحد سنين وتالي يكلج والله طلعت مااحبج .. لعد هاي السنين شنو جانت؟

وياريت متحبني وانتهى الموضوع لااا لكيت عدها فوك الاربع شرايح اتصال تحت الفراش مضمومات ..

طلعت تعرف اكثر من شخص وتحجي وياهم بنفس الوقت ..

ومثلما لكيت اختبار حملج بالسلة هي هم لكيت اختبار حملها بالسلة هم جانت حامل ..

بس من سألتها بالبداية نكرت وبعدين من ضغطت عليها كالت جنت حامل ونزلته ...

معقولة وحده بعد صبر هالسنوات مراجعات واطباء وادوية وتحاليل وبهالسهولة تنزل ابنها؟

بس انه تقريبا شبه مقتنع انه هي منزلته .. ولكن حاولت تخفية لحدما اتطلكت وخلصت عدتها واتزوجت ابوه وسافرت ..

رفعت راسي باوعتله انصدمت ..

كرم: اني انصدمت لان اني كل فترة زواجي منها مجان يصير حمل رغم العلاجات والادوية ... لانه نسبتي قليلة ومجانت ترتفع ... ولانه شكي بيها وبحملها لهسه ذابحني ...

اعرف انتي غير عنها .. اعرف انتي مو مثلها بس انه هم معذور هالموضوع مااكدر انساه بهالسهولة ..

هاي خيانة ومو اي خيانة ..

بقيت ساكته ماحجيت كال:

هسه تكولين منطيج حرية صحيح بس حتى تليفونج جنت مراقبه .. جنت اعرف ويامن تحجين ومنو تراسلين ..

اتفاجات كتله:

بعد؟

كرم: بس ... بعدين خلص عرفتج انتي شنو .. وزادت ثقتي بيج بس خبر الحمل لاجان عالبال ولا عالخاطر .. رجعني لانكس شي مر بحياتي .. اني بشر ياس .. وجل من لايخطأ بس اني احبج واريدج بس كل اللي صار ويانه من زواجنه لهسه مو بيدي .. لدرجة فكرت كم مره اطلكج لان اعرف انتي مو سعيدة وياي ... اعرف متأذيه مني وتعبانه وياي ... بس مو بيدي .. احبج ولااني كادر انسى الي صار بالماضي ولاكادر اعيش واتأقلم ..

باوعتله كتله:

معناها طلكني ..

كرم: لا هسه خلص شلت الفكرة من راسي ...

ياس: بس انه هسه حطيتها براسي .

كرم: وتتوقعين انطيج امنية لو صممتي؟ امنية بنتي مثلما هي بنتج ..

ياس: شلون عرفتها بتك بالله سويتلها تحليل؟

كرم: ميحتاج تحليل كولها اني عيونها ووجها اني .. مماخذة شي منج ..

ياس: عالخير ..

كرم: هاي واني كتلج اتحمليني ... صبري علي ...

عافني وطلع ..

وخلاني ساعة ابجي وساعة اضحك من حجيه ..

باوعت لامنية كتلها:

ابوج لو مسودن لو يريد يسودني .. شتكولين؟ اووف اووف .. والله راح اتخبل من وراه ..

امنية جانت بجاية هواي تبجي واذا بجت ماتسكت ..

ياس: مشهورة ... تحب المشاكل منين تطلبها ..

لنى: اي والله بعد امها ياسه وابوها كرم ..

ياس: لا والله ؟.. تخبل شو جنها البخت ..

لنى: هسه هو منو كال مو حلوة بس بجاية وتريد شيل وتريد تدلع هاي بتج مو هينه ..

ياس: اذا انتي عمتها جا شلون تطلع هينه ..

لنى: المن اشتكي هسه لابوي اشو عمج مينطي بيج لزوجج زوجج هالايام ساحل روحه كون بس تحجين وياه المن اشتكي لامي هسه تكلي زين تسوي بيج ..

ياس: شبيج صيري زينه وياي وويه بتي وانه اخليهم يرضون عليج ..

لنى: صدوك لو كالوا اجاك تالي عكبك ..

ياس: ههههههه

التاسع عشر والاخير من هنا

تعديل المقال