رواية القلب بالقلب الفصل التاسع عشر 19 والاخير بقلم روز الفياض

رواية القلب بالقلب الفصل التاسع عشر 19 والاخير بقلم روز الفياض

أمنية ..

اسميتك امنية .. وانتي كنت امنية ..

امنية لخصت العديد من الامنيات ..

فما ان جئت حتى تغير عالمي ... 

فخضع ذلك الجبار لرغبتي وانتقامي ..

والان حان دوري فكما اخذ قلبي .. 

سوف آخذه قلبه ..

فالقلب بالقلب والبادي اقسى ..

.............................

صار عمر امنيتي اربع شهور وبدت تضحك وتنكلب على بطنها ..

جانت فرحة البيت ...

بس اتعودت تريد شيل ..

من ايد لايد ..

بالليل جانوا عمي وكرم يتسابقون عليها عمي جان يموت عليها ..

بس هي بت ابوها بس تشوف كرم يدخل للبيت ماتريد احد بعد غيره ..

جان كرم يحاول يحجي وياي بحجة امنية خصوصا بالليل من ماتقبل تنام جان بس يسمع صوتها يجي ياخذها يمه ينومها ..

جان يسميها ( امنيتي ) ..

ساعات جان ينكسر خاطري عليه بس ارجع وادوس على كلبي واكول خليه .. خليه شوية ينشلع كلبه ..

مرات من ينوم امنية يمه جنت اروح اشوفها او اخذها مره من المرات جان نايم ومنومها يمه وحاضنها ..

وخرت ايده فز كال:

خليها نايمه ..

ياس: حتى تجعصها ..

كرم: لا مااذيها عوفيها ..

ياس: لاشنو عوفيها غير بتي مااعرف انام وهي مو يمي ..

لزم ايدي كلي:

نامي يمنه انتي هم ..حتى لاتخافين عليها ..

ياس: لا انعم الله مااعرف انام الا بغرفتي .

كعدي كلي:

ولشوكت بالله ..

شلت امنية كتله:

من ينشلع كلبك شوية مثلما شلعت كلبي ..

كرم: كل هذا وممشلوع كلبي ..

ياس: تستاهل ... من تضوك شوية من الضوكتنياه ذيج الساعة عود الله كريم ..

عفته ورجعت لغرفتي حطيت بتي بفراشها وظليت اباوعلها وابجي :

شفتي ابوج يريد كل شي بسهولة .. يريد على مزاجه ..

وره فترة رحت لاهلي بقيت اسبوع كوه ورجعت لان هاي الفصمة خبلتني تستغرب والليل كله تظل تبجي لان متعوده ابوها ينومها ..

رجعت واتلكتني لنى:

شوفي ربج شلون ميقصر .. رجعتج هاي القزمة فدوة لعمرها ..

كرم: حبيبة ابوها ... كلبها على ابوها متكدر تفاركة ..

ياس: اي طبعا هو الدلال والدلع شيجيب ..

كرم: ههههه لادلال ولادلع هي تحس ابوها ميكدر ينام الا وهي بحضنه ...

ياس: اي خوش فلم ..

كرم: هسه يابه مو رجعتج لو لا مو؟متقبل تنام بحضن غيري لو لا ؟

ياس: اي مو حضنك مطلي بالذهب ومرصع بالجواهر والالماس 😑 ..

كرم: انتي ادرى😉 ..

ياس: لا والله كل شي ماادري سنتين مسحور وسنة زعلان كل شي ماشفت منك بعد ..

درت على امنية بيد لنى جانت تضحك كتلها:

ارتاحيتي من فشلتينه وشمتي بينه الاعداء ..

ضحكت لنى وضحك كرم ..

صار عمر امنية ست شهور بيوم عيد زواجنه بالضبط ..

لنى: اليوم عيد زواجكم 😁 ..

ياس: ادري 😒 

لنى: اكيد اليوم كرم يجيبلج هدية بهالمناسبة 😁 ..

ياس: اي مو جان مشبعني هدايا بكل عيد حب وبكل عيد زواج وبكل عيد فطر .. حتى بعيد الجيش😑 ...

لنى: 😂 

ياس: ضحك خير وشرنه على اماني ان شاءالله ..

لنى: ههههه يادي اماني القاهرتج لهسه ..

ياس: كل مسية ادعي عليها ..

بالليل من اجه كرم واتعشينه خليت امنية يمهم ورحت سبحت وغسلت مميات وفورت ماي حار لليل ..

رجعت للغرفة لكيت كرم منومها ومخليها بفراشها ورايح ..

كعدت مشطت شعري ورحت ابوسها وانام لكيته مخلي يمها علبتين زغار ..

فتحت الاوله جان بيها زوج تراجي لامنية على شكل بطه زغيرونه ..

فتحت الثانية جان بيها سنسلة زغيرونه بيها اسم امنية ..

كللش عجبتني ..

ضحكت 😁 ..

فشلني كلت مايتذكر ولايهمه ..

لبستها وغلست ..

نزلت ثاني يوم كالت عمتي:

بالعافية هاي منين ؟

ياس: على اساس ماتعرفين منين 😒 

ضحكت عمتي كالت:

الحمدلله ..

من رجعت لنى وشافتها كالت:

مبروك عيني مبروك شوفي اخويه شكد ذوق وجنتل 😁 ..

ياس: جنتل لو ينتل 😂 

لنى: لاحبي جنتل شفتي شلون ظالمته ..

ياس: يعني كلما احاول اصير مؤدبة وكيوت على كولتج لازم تجريني للطريق وترجعيني رون سايد 😠 ..

لنى: اني؟

ياس: اكص ايدي اذا ماانتي متفقة وياه وتدرين بي وتدرين بالهدية 😒 ..

لنى: وانتي بالله شراح تهديله؟

ياس: مااهادي احد انه .. 

لنى: لااا .. جنت افكر لو تجيبيله مثلا مدالية سيارة فضة هم بيها اسم امنية شتكولين 😁 ..

خزرتها صفح 😒 كتلها:

اذا مسويتها جيبيها وامري لله وبعدين نتحاسب ..

لنى: لاااا  يمعودة الحساب واصل انتي بس اتلحلحي وانطيهياه وكوليله اتفضل حبيبي😘 ..

ياس: لا بالله😐 ؟

لنى: دكافي يمعودة الرجال سحل روحه سحل وحتى ورد راد يشتري بس استحى مني 😁 ..

ياس: عابت هالشكل ... كاطعه رزقي شتسوين رايحه وياه ومخجلته ليش ماخليتيه يروح وحده حرمتينه من الورد الله يحرمج من نومة الليل 😤 ..

لنى: 😂😂😂

اخذت المدالية الفضة من لنى وغلفتها وحطيت وياها اطار وبي صورة امنية ..

وخليتهن بغرفته الينام بيها ..

اكيد من صعد ينام شافهن بس ماحجه ..

ثاني يوم الصبح من طلع جانت بيده ومخلي بيها سويج السيارة فرحت 😁 ..

وره يومين صادف عدنه عمال يشتغلون بالحوش والحديقة وهو جان وياهم واكف عليهم ويساعدهم ..

راحوا المغرب ودخل هو كعد بالمطبخ كله تراب وطين وحالته حاله ..

دنك على رجله عبرت وظليت اباوع شيسوي ..

شفت اظفره مشلوع ويصب دم ..

ياس: يااا هاي شبيها رجلك ..

كرم: ماكو شي ... وكعت عليها شتايكره ..

ياس: الصخام الصخمني ..

رحت جبتله الديتول والقطن وكعدت اعقمها وهو كل شوية يحركه الديتول ويسحبها ..

كرم: كافي .. كافي تأذيني ..

ياس: اصبر ... اوكف شوية لاتصير مثل الجهال اثبت ..

كرم: خررب كافي موتيني كافي ..

جبت امنية وحطيتها بحضنه كتله:

هسه التهي بيها ..

كرم: اففف ... شوفي امج شلون متاخذ الحجي مو تطلعين مثلها مؤذية ..

بالليل ماادري شصارلي ماادري ليش حسيت لهنا وكافي ..

كافي عليه هلكد عقاب ..

بالنهاية هذا حظي وهاي قسمتي واول وتالي لازم ارجعله واحجي وياه ..

غسلت المميات وترست الترمز لامنية وصعدتهن فوك ورحت لبست وكشخت واتعطرت ..

رحت لغرفته شفته نايم وكالمعتاد منوم امنية يمه ..

بس شلتها فز ..

فتح عيونه باوعلي شلتها رجع غمض ونام ..

انه أخذت امنية وخليتها بفراشها ..

ورجعت لغرفته ..

جان نايم وظهره الي ..

ظليت واكفة اباوعله ومتررده ..

بس ضغطت على نفسي وكلت خلص كافي ياسه بعد ماتسوه وهو رجلج وابو بتج وندمان .. 

خلص انهي الموضوع ولاتخلين البرود يستقر بينكم اكثر من هيج ..

نمت بصفه وحضنته وانه مستحية ..

كمز بس دار علي حضني وكلي:

شكرا 

ياس: على شنو؟

كرم: لان سامحتيني واتحملتيني ... وصبرتي علي ..

ماحجيت كال:

وين خليتي امنية؟

ياس:بفراشها ..

كرم: بحدها؟ خاف تكعد وتظل تبجي ..

ياس: لا خلص راح اروح انام يمها ..

كمت رجعت لغرفتي نمت بفراشي وظليت صافنه ماادري السويته صح لو غلط ..

شوية وانفتح الباب درت شفته اجه ..

نام يمي وحضني:

عالاقل بالجذب كولي تعال نام ويانه بالغرفة ..

ياس: اصلا اجيت اقفل الباب خاف تجي ..

كرم: هههه ميفيدج عندي نسخة ثانية ..

💏💏💏 ...

...............................

يـ بنيه الحجي الـ بروح 

ماينكال تمنيت الكلب جامه .. 

#حيدر_حطاب

..............................

مشت الايام ونسينه الفات ..

وبدينه من ذاااك اليوم ...

من اليوم الصارت بي امنية ..

واستمرينه ..

كبرت امنيتي صار عمرها سنة ..

وبديت ادرس حتى امتحن سادس خارجي ...

جنت ادرس ليل ونهار ..

اخيرا راح احقق احلامي .. وتصير عدي شهادة .. واصير مثل البنات الجنت اشوفهن بالتلفزيون ..

سنة صعبة جانت لان امنية حركة وعندي دراسة وجنت حامل بعلاوي 😊 ...

امتحنت ونجحت ..

جان كرم متحديني اذا اكدر اجيب معدل وادخل كلية علوم مثله ..

وجبت معدل يدخلني علوم..

بس كرم شجعني ادخل كلية صيدلة اهلية ..

ودخلت وهو جان يدفع اقساطها .. 

واتخرجت من العشرة الاوائل الحمدلله ...

فرحة حتى باحلامي مااتخيلتها ..

حاليا اشتغل بالصيدلية اللي يم مختبر كرم ..

امنية وعلاوي بالمدرسة اثنينهم الحمدلله ..

ولنى اتزوجت وبقينه بالبيت بس احنه وعمي وعمتي الله يطول بعمرهم مااكدر اجازيهم على دلالهم وطيبتهم وياي ..

#ختامنا ..

امنيات لنا ولكم بطيب العيش وحسن المعشر ودوام المحبة بينكم وبين من تحبون ...

-ترفقوا بني البشر فكل منا في قلبه مالايستطيع البوح به ..

-لاتتخلوا عن امنياتكم ولاطموحاتكم فالله عز وجل قد قال في محكم كتابة الكريم ( وادعوني خوفا وطمعا )  ..

اطمعوا بكرم الله فكرم الله لاتحده حدود ...

-كونوا في جوار الله دائما واحسنوا النوايا فعلى نياتكم ترزقون ..

تعديل المقال