رواية القلب بالقلب الفصل السابع عشر 17 بقلم روز الفياض

رواية القلب بالقلب الفصل السابع عشر 17 بقلم روز الفياض

اصعب الجروح هي الجروح التي تصيبنا بأيدي اقرب الاشخاص لنا ...

....................................

الصبح جان الكل ماله خلك ...

محد يحجي ويه الثاني ..

بقيت بالغرفة ماطلعت ..

محتارة اتصل على اهلي واسويها قصة جبيرة لو اسكت علمود عمي وعمتي ؟

شفت عمي راح كعد بالصالة ..

كاعدين هو وعمتي ويسولفون ..

جنت تعبانه ومالي خلك ..

واتمنيت لو مامتزوجه وباقية عد اهلي ولا هالقسمة السودة ..

نمت ..

وره شوية كعدتني لنى كالت تليفونج دك اكثر مره ..

كعدت شفت اخوي مصعب متصل ...

ردت اتصل عليه بس مالي خلك مااريده يحس من صوتي اكو شي ويخاف ..

بعدني احجي ويه روحي رجع دك ..

حجيت وياه كال :

انه هنا يمكم اجيت لبغداد بشغيلة وباجر ارد ..

كلت امر عليج واشوفج ...

ياس: هلا بيك خوية .. كل الهلا ..

مصعب: انه هسه طالع اخلص شغلي وبعدين امر عليج ..

ياس: كل الهلا خوية متانينك ..

سديت التليفون وانه حاطه كلبي بشيشة ...

رحت كلت لعمتي مصعب راح يجي ..

عمتي: ليش؟

ياس: موجود هنا وكال يريد يمر علينه ويشوفنه ..

عمتي: هلا بي ..

بس ماحسيت الحجاية من كلبها يمكن لان ماتريد احد من اهلي يعرف بالي صار ..

بهاالاثناء دخل رضا سلم واحنه ردينه ...

بعدنه واكفين دخل وراه كرم ..

انه من شفته رحت لغرفة لنى وسديت الباب ..

دخل وراي ..

ياس: خير ... خير ؟ شرايد بعد؟ تريد تذب علي مصيبة ثانية ؟

المن جاي وراي؟

كرم: نصي صوتج وكعدي ...

ياس: مااكعد .. ومااريد احجي وياك .. لهنا وكافي .. كافي ساعة السودة والمصخمة العرست بيها ... مو جنت كاعدة ومدلله المن اتزوحرت وعرست ..

كرم: كعدددي ...

ياس: مااكعد كتلك ..ولاتحاجيني بأي شي زين؟ روح شوفلك طبيب شوفلك صخام ... روح اتعالج عمي انت مريض .. مريض مو صاحي ...

لزمني وراد يطكني ..

خليت ادي على راسي .. بس ماطكني ...

كعدني كوه وبقى هو واكف على راسي ساكت ...

بعدين كلي:

اني ميصير عندي اطفال ..

ياس: اي طبعا تكول هيج لان متعافي ... المثلك يتمنى امنية يصير عده جهال وانت بس سمعت حامل اتسودنت ...

ليش طلكتها مرتك ؟

مو لان مايصير عدها حمل ؟

مو كلت ماتحبل ؟

شو هسه انه طلعتني مو زينة؟

ماعرفنالك شتريد ... تريد جهال ؟ ماتريد؟ ماندري ...

كرم: اني .. اني ميصير عندي اطفال افتهمي ..

باوعتله ماافتهمت ..

ظليت صافنه عليه ...

كرم: اتزوجت قبلج اربع سنوات واخذت هواية ادوية وعلاجات بس نسبتي قليلة .. آخر شي الدكتور كال ماكو امل ..

السبب مو منها جان ..

السبب مني ..

ظليت فاكه عيوني ..

ياس: يعني شنو؟ ش ..ش ..شنو منو يعني المايخلف انت لو هي لو انه لو منو؟

بقى ساكت ..

ياس: يعني جذبت علي .. كتلي مايصير عدها جهال وطلكتها هسه طلعت انت السبب منك وهي العايفتك ؟

وليش ماكلت من الاول؟

ليش ماكلتولي من الاول؟

منو بيكم الماحجه الصدك؟ انت لو اهلك لو اهلي ؟

على اي اساس اجيت وخطبتني وانت تعرف بيك هيج عله ؟

على اي اساس تكول مابيه شي وطلكت مرتي لان ماتخلف ؟

واجيتوا على ياسه ..

بت عمك وترضه بيك وبكل عيوبك مو صح؟.

الشروكية ترضه بيك وتتحملك وماتكول شي ..

كرم: ماخطبتج اني علمود الاطفال ..

ياس: المن جا خطبتني علمود سواد عيوني ... وحده من الريف وماعدها شهادة ولامن ثوبك المن خاطبها؟

لان ماتحجي ..

لان اهلها عدهم عيب المره تتطلك ..

يعني غصبن ماعليها تتحملك عجبها لو ماعجبها ..

مو صح؟

كرم: مو صح ..

ياس: جا شنو الصح .. شفتج وعجبتيني .. عجبني عيونج وجمالج واخلاقج ...

مو هذا الفلم هسه؟

ظليت ابجي واحجي ...

ياس: شحجي وشكل للناس هم اذا اتطلكت العالم تسالني ليش اتطلكتي شكللهم؟

رجلي يشك بيه؟ ابن عمي يكلي حامل من منو؟ هذا ابن منو ؟

الله لايوفقك ....

الله لايوفقك يوم الدكيت بابي وورطتني ...

عافني وطلع سمعت عمي يصيح عليه ويكله المن جاي ..

راح ..

بالليل اجه مصعب ..

ماردت احرج عمي وعمتي واحجي الي صار ..

من سألني على كرم كتله:

مسافر ...

بالليل واحنه نتعشه كلت لمصعب :

اريد اروح وياك ..

الكل اتفاجأ ..حتى مصعب ..

مصعب: هاا خويه .. خوماكو شي؟

ياس: لا ماكو شي ..

مصعب: جا المن جايه؟ مو توج رديتي ؟

ياس: اشتاقيتلكم ..

مصعب: لا مايصير ... شلون حجي هذا .. توه زلمتج اجه ردج .. خو مو يومية رايحه راده بعد اخوج ..

سكتت ..

لااكدر احجي ولااكدر اسكت ..

صرت مثل بلاع الموس ..

خاف احجي واتفشل ويه عمي وعمتي والمصيبة مااكدر اسكت واغلس جنه ماصاير شي ..

خلصنه عشه ولمينه الماعين انه ولنى ..

رحت سويتلهم جاي ورجعت كال عمي:

هاا بابا ياسه ... تردين ترحين وتعوفينه؟

انحرجت كتله:

لا عمو ارتاح وارجع .. مااكدر اعوفكم لا انت لاعمتي ولالناوي ..

عمي: روحي بابا ... روحي ..

ارتاحي وشوكت متردين ترجعين اني اجي آخذج ..

مصعب: وزلمتها؟

دار علي كلي:

رجلج يدري؟

عمي رد قبلي:

اي يدري ..يدري ..

عمتي: راح نخليج ترحين لان حامل ونفسيتج تعبانه بس حسبي حسابج كم يوم ونجي وراج هههه ...

مصعب: هااا ...بيها الخير ان شاءالله .. جا خوية حضري غريضاتج حتى الفجر نطلع ان شاءالله وره الصلاة ..

ياس: ان شاءالله ..

بالليل صعدت جهزت جنطتي وحضرت اموري حتى الصبح اروح ..

صعدت وراي لنى تتوسل :

عفية ياسه مو تطولين؟ ظلي اسبوع اسبوعين شهر بس رجعي لتسويها زعله صدوك ..

ياس: الله كريم ... بكيف الله ..

لنى : يجوز بس يدري كرم يروح وراج مو ذيج المره يومين وفاجأكم هههه ..

ماحجيت ...

نمت وكعدت عالصلاة ...

من نزلت عمتي اطتني مصرف وحلفتني مااطول ..

ياس: ان شاءالله

طلعنه بس حسيت هالمره طلعت مكسورة الخاطر ..

اخذت الطريق ساكته .. اصلا نمت ..

الله ذب علي نوم ...

وصلنه لاهلنه اتعجبوا من شافوني ..

كلها تسألني شكو واكللهم مثل ماكال عمي :

حامل ونفسيتي تعبانه ..

امي احتارت بيه شتطبخلي وشتسويلي فرحانه لان حاما واليقهر ياهو يشوفني يكلي :

رجلج شنو جانت ردة فعله من عرف بيج حامل ؟

اظل ساكته .. يرجعون يسألون :

فرح يمكن؟

ياس: اي طبعا فرح ..

مايدرون برجلي اتخبل واحتار شيحجي ..

ذبله مصيبة شكدها وشكبرها ...

بنفس اليوم الوصلت بي بالليل كرم ودالي مسج :

( ديري بالج هالطفل يصير بي شي )

ظليت ادك صفنات هذا شبي ...

لاادري انت رايده ولا ادري انت مارايده !!

زين اذا رايده شلون تكول مني او مو مني؟

هسه حتى لو كايلك الطبيب مايصير عدك .. يعني انت ماتعرفني؟

مو كدامك اطب واطلع ويه امك لااعرف اروح وحدي ولا اعرف ارجع ..

تليفوني مشمور ( ٢٤ ) ساعة لابي رمز ولاشي ..

شبيك يحظي شخبلك عليه ..

معقولة هذا هم سحر؟

والله ماادري شفكر عقلي ماجاي يستوعب ويفتهم ...

راح اتسودن ..

بقيت يومين تلاثه افكر محتارة شحجي ..

آخر شي قررت مااحجي اي شي لاي احد ..

لان اول وتالي لازم ينفتح الموضوع وينعرف كل شي ..

وبنفس الوكت خفت من اخواني ..

خاف يتعاركون ويه كرم ويتكاتلون وزحمة من عمي وعمتي ...

اكيد اذا حجيت تصير مشاكل وطلايب ويجوز توصل للسلاح لو اني انكتل لو كرم ..

البنات سلامة وفهيمة جانن محتارات شيسولي العود مايخلني اشيلة من الكاع ...

خذتني جورية اختي وياها لبيتهم ارتاح جم يوم ...

بس هي جانت نيتها تريدني احجيلها انه ليش جايه ..

ومن حجيتلها اتخبلت ..

جورية: صابه علي كون ... شلون يحجي وياج هيج شماله اتخبل ... هذا هم حظج .. عبالنه ابن عمج وترتاحين وياه شو طلع مدري شني ماشني ..

ياس: اي هو حظي ..

ظليت عدها جم يوم خذتني للدكتورة وسويت سونار كالت:

حامل بالشهر الثاني ..

ياس: ولد لو بنية

ضحكت الدكتوره كالت:

شنو لهدرجة مستعجلة ههههه بعد كدامج خير ..

ياس: حتى اذا بنية اخسرهم وحده تجيبلها تراجي وحده كلادة غير حتى الحك احسبها ربحانه خسرانه ..

جانوا عمي وعمتي يوميه يخابروني ويسألون عني حتى رضا جان كل جم يوم يوديلي مسج ويسالني خاف محتاجه شي بس كرم ماكو ..

بقيت اسبوعين عد اهلي بس ابوي اكل راسي:

بوية شني جا انتي كاعدة هنا وعايفة رجلج شلون يصير؟

امي: خليها ترتاح النساوه موتتها ..

ابوي: شمالها .. هاي خدودها جنها طماطة ... الحمدلله مابيها شي تاكل وتشرب وان شاءالله تخلصها بسهاله ..

وره الاسبوعين اجو بيت عمي كلهم ..

اتفاجأنه بجيتهم .. عمي وعمتي ولنى ورضا وكرم ..

جنت كاعدة بالحوش الوراني يم سلامة وفهيمة وحده تخبز ووحده تشيللها الغلك ( الغطا ) .. وانه كاعدة مبسطة بالكاع ياخبزه يطلعنها اخذ منها الجزء المكسب آكله واعوف الترف ..

سلامة: شو البت خربت الخبز كله .. خايبه خليينه جم خبز صحاح لعمي مايحب الخبز المكسم والحروف ..

ياس: عمج متعافي كله نعمة الله ..

فهيمة: خايبه لايجونه خطار غفل شنطيهم خبز مثلم ..

ياس: شكو بيها ... اذا سالوا كليلهم عدنه وحده حامل وتتنسه حامل بولي العهد ..

سلامة : شني متزوجه الخديوي اسماعيل ..

ياس: لا متزوجة السلطان سليمان ..

فهيمة: خايبه سلامة .. البت هاي اذا جابت حتى فروخها يطلعون عليها نص عقل ..

سلامة: ههههه اي عفية ..

ياس: فهيمة سمسم حطي على الخبز فدووة وكسبي زين يمه انه لحدما اجيب اصيرن فيل ..

انفتح باب البيت وراي اجت امي كالت:

ماخلصتن .. اجوا خطار وانتن كاعدات تتسامرن ... يالله خلصن خل نصب الغده ...

درت على امي كتلها:

ياهو جاينه هسه بوكت الغده .. صدك ناس جوعية لايعرفون عيب لايكولون خاف ماعدهم غده ..

امي: بيت عمج جبر ..

ياس: هااا ؟

امي: كومي طبي ساعديني ..

طبت امي وانه ظليت كاعدة مصفنه ماطبيت ..

خلصن فهيمة وسلامة كالن:

خايبة كومي شوفي خاف رجلج جاي .. جاف عمتج جايه ..

كمت دخلت رحت وياهن دخلت شفت عمتي ولنى ...

رحت سلمت عليهن وكعدت يمهن

لنى: عود حلفتج ماتطولين ..

عمتي: ماشاءالله محلوة وسمنانه يمكن وزنج زايد شوية مو؟

ياس: والله عمه ماادري بس انه من اجيت لهسه حلكي مابطل جرش ..

عمتي: ههههه بالعافية هو احنه شنريد نريدج تاكلين وتتغذين زين حتى النونو يطلع بصحة زينه ..

بقينه نسولف شوية بعدين صبوا الغده وكعدنه نتغده ..

الزلم يتغدون وحدهم واحنه وحدنه ..

خلصنه غده وظلينه كاعدين عالسفره نسولف ونضحك ..

شوية ودخل عمي كمت سلمت عليه ..

بس ماشفت لارضا وكرم ولا سمعت حسهم منا لليل من اجوا بيت عمي ابو امير وضلوا يسولفون ويضحكون بالديوانية ..

لنى: منو اجه؟

ياس: عمي والولد ..

لنى : لعد خل نروح احنه نشوف البنات ... خل نكول لماما تأخذنه عفيه ..

ياس: ياماما .. هي ماما وين تندل تاخذج بهالظلمة ..

لنى : لعد خلي فهيمة او سلامة تاخذنه ...

ياس: هههههه صدك ضحكتيني ولج ماعدنه وحده شابه تطلع وحده بالنهار مو بعد بالليل غير ابوي يذبحنه .. باجر الصبح نروحلهن وشوفيهن واذا قبل ابوي نخليه ياخذنه للبستان نتمشه ..

وره شوية ابوي صاحلي ..

رحت لكيته هو وعمي ابو كرم وعمي ابو امير وكرم واخواتي كاعدين البقية ماكو ..

ياس: ها بوية ..

ابوي: كعدي بوية عمامج عدهم حجي وياج ..

كعدت وانه كلبي يدك ..

عمي ابو امير كال:

ها بوية .. جا شنهي ماكافي ..ظلتج هنا شنهي بوية؟

ماحجيت ماادري عمي شنو كايللهم وماردت افشله فبقيت ساكته ..

ابو امير: عمي احنه اهلج وهذا بيت ابوج وحقج تشتاقين وتجين كل الهلا بيج بس بوية مايصير تعوفين زلمتج وحده وتظلين هنا ..

عمي ابو كرم : بابا انتي عدي اعز من كرم الله الشاهد مو هو ابني بس انتي اعز منه ..

ياس: ادري والله ادري ..

ابو كرم: احنه غلطنه وغلطنه جبير من ماحجينه الصدك ولاكلنه هو هم جان عده مشكلة مو بس بت الناس ... بس هاي الله جازاج بكل خير انتي لان طيبة واتحملتي رجلج وماحجيتي ولااشتكيتي واحملتينه وياه ..

ياس: لا عمي العفو منك انتم اهلي وماشفت منكم شي مو زين ولاسمعت منكم كلمة تغث ..

ابو كرم: احنه تعودنه عليج .. مانكدر هلكد نفاركج ولناوي ماكلة راسنه صح وليل تكول روحوا جيبوها .. بعد انتي اختها .. وهو اذا ضايقج بعد كدامه هذا هو بس تعاي وكولي هيج كلي وشوفي شسويلج بي ...

بجيت لاكادرة احجي الحجي الكاله ولاكدرت اسكت ..

لان عمي من حجيه الظاهر ماحاجيلهم الصار كله بس كللهم انه همه ماكالوا الصدك علمود سالفة الحمل ..

ماكدرت احجي واعترض ..

باليل ناموا الزلم بالديوانية وعمتي ولنى بغرفتي وانه يم امي ..

ثاني يوم رحنه للبستان واتونسنه كلها راحت احنه وبيت عمي ابو امير وبيت عمي جبر ..

ظلينه للمغرب ورجعنه ..

شفت كرم بس لاحاجني ولاحاجيته كعد هو والولد بعيد ..

بالليل ردت اخابر جورية اختي واكللها باجر ارجع ..

طلعت بالحوش كلها جانت ملتهية ..

حطيتلي تخته وره الباب وكعدت كبال البيت حتى خاف احد يطلع ويشوفني اشوفه ومااجفص بالحجي ..

جورية: بس شرطي عليهم ..

ياس: شااشرط هو ابوج يرضه ..

جورية: ميخالف حتى يتأدب ومرة الثانية مايعيدها ..

ياس: الله كريم من نروح هناك احجي ويه عمي .. هنا خاف احجي وابوي يزفني .. ومااريد افشل عمي وازغره يم ابوي وعمي ..

جورية: ياالله خية جا شتسوين بعد .. بلكت من تردين يستعدل بلكت الله يهدية ..

ياس: نشوف ..

بعدني احجي افتح الباب حيل وانكفخت بي لان كاعدة وراه ..

ياس: آخخ

شفت واحد مد راسه يشوفني رفعت راسي ...كرم ..

كرم: شمطلعج بهالليل هنا؟

رديت عليه ابرود:

اخابر ..

كرم: وملكيتي مكان تخابرين بي الا هنا؟ ومنو الي تحجين وياه بهالساعة ..

كالها وهو يباوع على ساعته ..

ياس: جورية اختي ...

كرم: فوتي جوه اشوف ..

كمت اتمشه ادخل للبيت سمعته يكول:

شوكت مااجي الكاها كاعدة وره الباب ..

صفنت كلت صدك حجيه المرة الفاتت هم لكاني كاعدة وره الباب من ركض وراي فلاح المنغولي ..

الصبح طلعنه بعد الصلاة لبغداد .

ومثل كل مره امي تودعني بنصايح كومه حتى اصير مره معدلة ..

وابوي يزيد عليهن جم نصيحة اليشوفهن هو برأيه صح ..

منها:

المرة الزينه ياابوج ماتطلع من بيتها زعلانه ... تبقى زعلانه بس ابيتها ..

اسمع واهز براسي موافقة عجبني لو ماعجبني هذا الموجود ..

اول ماوصلنه لبغداد صعدت نمت ..

قفلت علي باب غرفتي ونمت ..

كرم جان ينام بالغرفة الثانية .. وعمتي ناقله اغراضة وهدومه كلها هناك ..

همزين اجت منهم ...

الغريب بالموضوع ..

انه بمكان ماانه ازعل هو جان المايحجي وياي ..

يعبر على باب غرفتي مثل الغريب ..

وانه هم كلت بعد احسن .. خليه بعيد لان ظليت اشك بي انسان صاحي ..

كل تصرفاته من اتزوجته لليوم تكول لو مخبل لو وراه شي وكل مره اكتشف شي ويبقى بعد اكو شي مااعرفه ...

مشت الايام وانه لااحاجي ولاهو يحاجيني جنت مرات انقهر واكعد ابجي بغرفتي اكول حتى بالجذب ماكلف روحة يجي يعتذر لو يبرر لو يسوي اي شي ..

لذلك قررت انساه ..

نهائيا ..

اشيلة من تفكيري ومن يومي ومن حياتي ...

قررت اسوي مثلما هو نصحني قبل ...

ادرس واستغل وقتي خصوصا هسه ماعندي جاهل يلهيني ..

حجيت ويه عمتي وكالت:

اي شكوا بيها ... دخلي دورة انكليزي استفيدي ولهي نفسج ومن تخلص دخلي حاسوب ...

وهيج سويت ...

خلصت الشهر الرابع وانه وحدي ...

انقهر من نطلع لمكان واشوف البنات المعرسات وحوامل كل وحده هي ورجلها بس انه رجلي كارهني وعبالك غريب مايعرفني ...

راح يسودني هالكرم ..

شيريد بس لو افتهم ..

الثامن عشر من هنا

تعديل المقال