رواية تبديل عريس الفصل السابع عشر 17 بقلم جمانه السعيدي
سلسبيل...طلع بابا وقائد نزل البيته جوه
نزعت البدله ودخلت للحمام سبحت وغسلت وجهي وبدلت ملابسي
لبست تراك اسود ودخلت الغرفتي مشطت شعري
وتمددت احس نفسي تعبانه هلكد ماضايجه ومقهوره
نص ساعه وصعد قائد جايبلي عشى
دك بابا الغرفه
سلسبيل....منو
قائد...اني جبت عشى
سلسبيل...مااريد كلشي مااريد
قائد...نتعشى اني وياج اني جوعان التهيت بلهوسه وكلشي مااكلت
سلسبيل...اكل بلعافيه
قائد...اي كولي تفضل ليش تحجين من ورا الباب
فتح بابا الغرفه ودخل سابح ولا بس تراك وشايل صينية الأكل بيها معلاك شوي وفواكه وزلاطه وحمضيات
وماعون بي مرك اصفر والحم من طبخ العرس
خله الصينبه بلكاع وطلع جاب طبله من الهول
سلسبيل...مااكدر اكل اي شي مااريد
قائد...اني اريد اكل وياج
سلسبيل...جنت مدده وشعري مبلل
كعدت على حيلي ونزلت رجليه
اجا قائد كعد بصفي وخله الطبله كدامنا
قائد.. ليش شعرج مبلل تتمرضين
سلسبيل...مالي خلك انشفه راسي يوجعني
عاف الاكل وراح جاب الشوار
قائد...اني انشف شعري
سلسبيل...تعبانه اريد انام مالي خلك الاي شي
عندك منوم او شي يخليني افقد الذاكره
قائد...شو دوري انطيني شعرج اسم الله عليج من فقدان الذاكره
سلسبيل...شغل الشسوار وبدا يجفف شعري
شعري طويل اقل شي ربع ساعه يله ينشف
قائد...ربع ساعه نص ساعه اهم شي ينشف اذا نمتي
وهو مبلل راح تتمرضين
سلسبيل...ماكتلي عندك شي يخفف الألم راسي يوجعني حيل
قائد...اول تاكلين وبعدين تاخذين علاج وتنامين
سلسبيل...عوف شعري عوف الاكل اريد حبايه منوم
قائد...اذا مااشوفج تاكلين ماكو اي علاج
سلسبيل.. اخذ الاكل مااريد عوف شعري
قائد...انتي ليش عصبيه
سلسبيل...لعبتو بيه طوبه وتكول ليش عصبيه
اضحكون عليه وتزغروني كدام الناس وتكول عصبيه
زين اني بس عصبيه زين ماانفجرت
قائد...ليش ما تنظرين للموضوع من غير نضره
انتي لو مزوجه عزام مجان كدر يحبج لان كلبه ويا وحده غيرج
سلسبيل...وليش ازوجه اصلا لو مكلف نفسك وموضح الموضوع جان انسحبت من هذا الزواج
تعرف اني بفترة الخطوبه حتى ماكعدت ويااا
لان ماكان يتواجد بلبيت واذا موجود اهلك كلهم
كاعدين ابد ماكان عدنا خصوصيه
يمكن اني لو حاجيه وياا وحدنا جان فهمت
حتى من ردت اشوف البيت اجت خالتي وبنيين
شوف حتى تأجيل العقد عمي مخططله جان خايف نعقد
واعرف حقيقة حب عزام واعوفه
كال احشرهم حشر عقد وزواج بيوم واحد
يلله اذا عقدو وراسا زفينا بعد ما بيها مجال للتراجع
قبلها ماكو مجال نحجي سوه
خاف ينفرد بيه ويحجيلي عن حبيبته
هذا اسمه غش
ليش تلعبون على مشاعري
جمانه السعيدي
سلسبيل.. هو كاعد بصفي .لم شعري ورجعه ليوره
قائد...اني اعترف غلطنا بحقج بس بدون قصد
يله ناكل
سلسبيل...اخذ الاكل مااريد
اذا أنت ابن عمي وتريد خاطري طلكني ورجعني البغداد
بعد مستحيل اكدر اعيش هنا
قائد....اطلكج
سلسبيل...اي هذا الزواج انجبرنا علي اني وياك
وهسه خلصت المسرحيه لازم ترجع زوجتك وجهالك مالهم ذنب بلشي الي صار
قائد....هسه ناكل ولله كريم
سلسبيل... سوه لفه زغيره وخلاها بحلكي
طلعته ورجعتها للصينيه مو كتلك مااريد
قائد..... اي اصبري خل انشوف الوضع شنو
سلسبيل...واني شكو بلوضع عزام اخذ حبيبته وانت ترجع زوجتك وعمي يتعالج واني اطلك ارجع البغداد
وهيج خلاص كلشي انتهى
قائد...بهل سهوله
سلسبيل...شنو الصعب بلموضوع فهمني
قائد....الصعب بلموضوع عزيزتي اني احبج
اي احبج من اول مره شفتج تعلقت بيج كلما تصيرين كدام عيني اكول ليش ما تعرفت عليها من زمان
كل صدفه تجمعنا اتأكد من مشاعري
سلسبيل...شنو تحبني انت مزوج
قائد...واذا مزوج شنو يعني المزوج حرام يحب
سلسبيل...مايصير تحب وحده غير زوجتك
قائد.. ليش مايصير هو الحب بكيفنا الحب
مشاعر تتحكم بلبشر مو هو يتحكم بيها
بعمرج شفتي واحد يكول اريد احب فلانه وبعدين يحبها
اكيد لا مشاعره تاخذه وتخلي يتعلق
سلسبيل...بس اني مااحبك ومااكدر اكمل بهذا الزواج
مستحيل اقبل اكون خيار ثاني بحياة احد
قائد...واني مااطلك لازم بيوم تحبيني
سلسبيل...شنو هو بلكوه
قائد...اي بلكوه اني ابن عمج وأولى بيج من الغريب
سلسبيل...منو بعد يفكر بهذا التفكير المتخلف
قائد...مااطلك عرفتي شنو مااطلك اني محامي وهاي القضيا
لعبتي
سلسبيل...شنو هو بلغصب اخ اخ راسي
دفع الاكل شويه وكال شبيج اخذج اقيس ضغطج
سلسبيل...انت رفعت ضغطي اكثر ما هو عالي
قائد...اتمددي راح اجيبلج بندول
نزل جوه شويه ورجع اسمعه طاير على الدرج
قائد...هذا بندول مهدء عام
اخذت حبايه غطاني وبقه كاعد بلغرفه
سلسبيل...شعندك كاعد روح نام
قائد...اطمن عليج بلاول
سلسبيل...تكدر ترجعني باجر البغداد
قائد...بعد شهرين وتخلص السنه اذا رحتي البغداد تروح عليج هاي السنه
اصبري بس تخلصين امتحانات اخذج البغداد
سلسبيل.. انقل
قائد...مايصير توج انقلتي هنا مايصير ترجعين تنقلين بنفس السنه اصبري بغداد ما طارت
ميته على بغداد شبيها بغداد
سلسبيل...بس اوصل بغداد بعد ماتشوفون وجهي ابد
قائد...ليش تلبسين طاقية الاختفاء
سلسبيل...اضيع نفسي حتى لحد يندل مكاني
قائد...لو تصعدين للنجم اصعد وراج
اني ماصدكت حصتلج انتي الحلم الي بعمري ما مفكر ممكن يتحقق
صح اني ضايج من الموقف الي حطنا بي عزام
بس بكلبي اكول الحمد والشكر لله
بعمري مااكدر اطلب هيج طلب من رب العالمين
معقوله الحلم يتحقق بهلسهوله
جمانه السعيدي
سلسبيل...سكتت لان فعلا تعبانه شويه ورحت بلنوم
الصبح كعدت على صوت التليفون
بلكوه فتحت عيوني الساعه عشره الصبح
باوعت قائد نايم بصفي على الحربايه بس متغطي وحده
متغطي بغطه غير غطاي
لزمت راسي بين مصدكه وما مصدكه سكت التليفون
رجع رن مره ثانيه
فتحت عيوني بابا يتصل عليه
سلسبيل...الوووو
بابا...هاا حبيبتي بعدج نايمه جبتلج ريوك
سلسبيل...شكرا
بابا...افتحي الباب واخذي الأكل الباب الخارجي
سلسبيل...كمت من مكاني امشي واني مغمضه
فتحت الباب
بابا...صباح الخير شلونج اليوم
سلسبيل...راسي يوجعني
بابا...ارجعي نامي واذا تردين اخذج للمستشفى
سلسبيل...ماكو داعي
بابا...اني يم عمج اذا تحتاجين شي
سلسبيل...شكرا
خليت الاكل بعلاكته بلمطبخ
ودخلت الغرفه الثانيه ونمت على الطخم
يمكن هذا العلاج بي منوم لان احس نايمه على نفسي
بس خليت راسي غفيت
ماكعدت اله الساعه ثنين الضهر
اسمع قائد يحجي بلتليفون فتحت عيوني لكيت
قائد مغطيني
قائد.....عمي اني قابل طاردها من البيت
رجعت مالكيتها ليش تأخذ الجهال وتطلع بدون ماادري
.....اي اجي بس بليل مو هسه
اي ميخالف اني اصالحها
طبك التليفون واجاني للغرفه
قائد...سبوله حبيبتي ليش نايمه هنا
سلسبيل...عوفني تعبانه
قائد...اي اكلي اي شي من البارحه وانتي بدون اكل
مايصير اكعدي ناكل ارجعي نامي
نامي بغرفتج لا تنامين هنا النومه على الطخم تكسر
سلسبيل...مالك شغل بيه عوفني بحالي شردت منك ليش
نايم بغرفتي
ممنوع تقرب عليه فهمت لو لا اذا انت محامي بابا هم محامي وراح اطلك منك
وبااقرب وكت
وروح رجع زوجتك وجهالك
قائد...ماارجعها وأنام بغرفتج ووين ماترحين وراح
هااا بعد عندج شي
سلسبيل...يمعود عوفني انت منيين طلعتلي
قائد...طلعتلج من الحظ والبخت
بكيفج تحبيني بارادتج لو تحبيني غصب
سلسبيل.. كمت رحت الغرفتي دخلت وطبكت الباب
اتصلت على بابا
سلسبيل...بابا اريد اروح البغداد هسه تجي تاخذني لو اطلع وحدي
بابا...اي اجيت بس على كيفج ماطارت بغداد
شويه وسمعت قائد فتح الباب البابا
بابا....شكو ليش سلسبيل عصبيه
قائد.. مااعرف بس من البارحه بدون اكل وتشكي من راسها
سلسبيل...اندكت الباب فتحتها
سلسبيل....هلو بابا
بابا...هلو حبيبتي ممكن تهدين
سلسبيل ...مااكدر اهدء اريد ارجع البغداد
بابا...حبيبتي اصبري بس تخلصين امتحانات
اخذلج نقل وارجعج البغداد هسه ترجعين شسوين
رايحه جايه بس التعب
اكعدي اقري وشوفي دراستج
سلسبيل...قائد يطلكني
بابا....الي تردي يصير
قائد...اني مااطلك لو يعلكون حبل المشنقه لو يذبحوني مااطلك
هاي اني جاي احجي كدام عمي مااطلك
عمي اني احب بنتك وماصدكت ازوجتها مااطلكها
تكول اضحكون عليه تكول غشيتوني تشتكي عليه
اني مااطلك اني احبها
سلسبيل...سمعت بابا سمعت يريد يضحك عليه بكلمتين
حتى ابقى على ذمته
ولله بس ترجع زوجته تهججني بليله ضلمه
اني مااقبل اخذ واحد مزوج انت تطلبتي
قائد...انتي ازوجتي خلاص تقبلين ما تقبلين ازوجتي
ارضي بنصيبج
سلسبيل...ماارضى وراح اطلك اخ اخ راسي
بابا راسي ذبحني
بابا...امشي نقيس الضغط ايجوز ضغطج صعد
انت قائد اسكت رحمه الله
قائد...اني اخذها تقيس الضغط
سلسبيل....مااروح وياك بابا ياخذني
جمانه السعيدي
سلسبيل بدلت ملابس ورحنا اني وباب طلع ضغطي صاعد
أنطوني حبايه تحت السان
وحبايه مدرر رجعنا للبيت
المشكله اني مضطره اتحمل قائد
لا اكدر ارجع البيت عمي مااريد ارجع البيتهم
ولا اكدر اروح اعيش بيت بابا زوجته ماتريدني
ومااكدر ارجع البغداد اضيع هاي السنه عليه
دراستي صعبه مو بسهوله اكدر اعيد السنه اريد اخلص
حتى تبقى عندي سنه وحده
اني عايشه اكبر مأزق ماعندي اختيار حياتي مجاي تمشي بكيفي
كلشي مر عليه اتحمله وجرعته غصبا عليه
رجعت للبيت لكيت قائد محضر الاكل وعصير ليمون
بس وصلنا سئلنا
قائد.. هااا شبيها
بابا...ضغطها صاعد درجتين بسبب التوتر
سلسبيل...بسبب قائد
قائد...اني شعليه بسببي
سلسبيل...بابا عظ شفه القائد وغمزله لا تحجي وياها
كعد بابا واني كعدت بصفه بلهول
بابا...يله أكلي حبيبتي الخاطري
كعدنا اني بابا وقائد مكابلني يجيب لحم ويخلي كدامي
بديت اكل شويه شويه وشربت كلاص عصير ليمون
قائد...هسه نخدر جاي وراح تصحصحين
سلسبيل...اريد اكطع الاجازه وارجع للدوام
بابا...شكد خلص منها
سلسبيل.. خمس ايام بعد خمسه
بابا...اي باجر اخذج للجامعه
سلسبيل...بعد طلب قائد ممنوع يصعد هنا ينزل جوه
يروح يصالح زوجته ويكعد وياها
هنا شهرين منا لمن اكمل امتحانات وبعد لا اشوفه ولا يشوفني
بابا...سمعت قائد
قائد...ليش اني شسويت بيش ضوجتج
سلسبيل...هااا ولله هسه اطلع وارجع البغداد وحدي وانعل ابو الكليه لا ابو الدراسه
قائد...ميخالف نشوف
سلسبيل...بابا انت الي تجي تشوف طلباتي
بابا...صار من هاي العين وهاي تدللين بس هاي لو بعد اكو طلبات ثانيه اهم شي لا اضوجين
ولله اخاف عليج
سلسبيل...لا ماعندي اي طلبات
نزلو بابا وقائد لليل اندكت الباب الخارحيه
فتحت لكيت عمي وخالتي وبنيين
سلمو عليه ودخلووو
عمي...اني اريد اعتذر منج اني السبب ردت عزام يزوج
وحده بت اصول وانتي الي جنتي كدامي
بت اخوي اعرفها واعرف اصلها
مو ياخذ وحده امها مطلكه
سلسبيل...اني امي مطلكه ايجوز ماكدرت تعيش
ويا زوجها وضروفها صعبه وطلكت
عمي...انت وين وهيه وين
سلسبيل...بس هو يحبها واختارها دون كل البنات
هاي الزواجه جان ضلمتني وضلمته انت تعرف كلبه معلك
بوحده ثانيه ليش تجبره على الزواج مني
اني زعلت منك لان قللت مني وزغرتني بعيون الناس
عمي...اني جاي اعتذر منج على هاي
ولله ياعمي البارحه وصلت الموت بسبب عزام
هسه عزام خلي يولي بس انتي مااقبل على زعلج
خالتي...انتي بنيتنا وردناج لان من عدنا وبينا
وهسه الحمد لله هم صرتي من نصيبنا
سلسبيل...بس اني اريد اطلك
عمي...لا لاتكولين شلون تطلكين قائد زلمه والنعم منه
سلسبيل...بس مزوج وزوجته تحبه
عمي...واذا الشرع حلل اربعه وهو مقتدر ويكدر يصرف على بيتين
سلسبيل...واني ليش اعيش ويا رجال عنده مره غيري
ازوج واحد بس اني بحياته
عمي...ما تلكين مثل قائد
سلسبيل...ليش ماكووو شنو فرق قائد عن غيره
عمي. فرقه الأصل فرقه ابن عمج ويخاف عليج
سلسبيل..اني اخذت قراري بس تخلص الامتحانات
ارجع البغداد وبعد ماارجع هنا ابد
خالتي...يايمه هنا ابوج واحنا عينا عليج
سلسبيل..هذا القرار ماارجع بي ابد
عمي...الله يهديج
طلعو عمي وخالتي شويه سمعت صوت جهال قائد
يعني رجعت مها
ولله زين رجعت بسرعه مبينه تحبه وماتكدر على فراكه
دخلت غرفتي وطلعت الملازم وفتحت النت
وكعدت اقرا
ماصعد قائد بقا جوه اي همزين اجت مها تخلصني منه
الصبح كعدني بابا علمود ياخذني للجامعه
كعدت اتريكت وبدلت ونزلت لكيته منتظرني برا
وصلني للجامعه من كملت اتصلت علي كال اجاج قائد
طلعت لكيت قائد منتظرني برا
قائد...مستعجله على الدوام جان طلعنا يومين سفره
سلسبيل...اطلع ويا زوجتك مالك شغل بيه
قائد.. انتي زوجتي واسمج على اسمي
سلسبيل...مؤقت بالقريب راح كلشي يخلص
وصلنا للبيت صعدت البيتي مدري شعجب ماا اجا وراي
سلسبيل.. فتحت البيت ودخلت
رحت للغرفه اغير ملابسي
لكيت باقة ورد حمره وعلبة حلويات وكاتب بلورد الاحمر
احبج ياربي شلون بيه منه
بدلت وطلعت اكلت لفه ودخلت نمت
لليل يله كعدت طلعت برا احضر عشى
اندكت الباب
سلسبيل...منو
قائد...اني جبتلج عشى
سلسبيل. فتحت الباب اخذت الاكل طبعا اكل جاهز
مو زوجته طابختلي
ردت أسد الباب
قائد...على الاقل ناكل سوه بصفتي ابن عمج مو زوجج
سلسبيل ليش تريد المشاكل
قائد.. ليش المشاكل ياستار
سلسبيل. مها تزعل
قائد مها ماتعرف اني اجيت
سلسبيل اخذ العشى وروح اتعشى انت وياها
قائد...لا نتعشى اني وياج واكعد ساكت مااحجي
سلسبيل. فتحت الباب دخل
خليت الاكل على ميز الطعام بلهول
كعدنا ناكل اني ويااا كعد ياكل وهو ساكت
كملنا اكل وشلت الصينيه
جمانه السعيدي
قائد...شنو رائيج نخلي جدول
سلسبيل...جدول مال شنو
قائد..ليله الج ووليله المها ترا كل المزوجين هيج
سلسبيل.. شكرا اني متنازله عن هاي اليله روح الزوجتك
قائد...زين بسيطه اللج يوم تكولين اني اريد تبقى هنا
اني اليه حصه بيك
سلسبيل...عندي امتحان اريد اقرا ممكن تطلع
قائد...طالع على كيفج
طلع واني اضحك على سوالفه
ولله لو ما مزوج ياقائد انت احسن زوج بلدنيا
بس مزوج وكلمن ياخذ نصيبه
اليوم الي بعده قائد وصلني للجامعه
بس صعدت انطاني باقة ورد بيضه
سلسبيل...شكرا بعد لا اجيب ورد
قائد...حتى الورد ممنوع
سلسبيل....كلشي ممنوع
من رجعت بيومها اريد بس انام تمددت شويه راسا اجتني حكه بضهري
بعدين بشعري بعدين برجايه اني لابسه ثوب
نوم قصير اباوع جسمي صار احمر
كمت على حيلي واحك ياربي شنو هاي حساسيه
اني ماعندي حساسيه
والفرشه البارحه فرشتها
ماكدرت اتحمل كبل دخلت للحمام غسلت جسمي بمي بارد
طلعت بعدني احك
تخبلت يااا شصاير ليس هيج احك
حتى وجهي صار احمر طلعت التليفون اتصلت على بابا
كال اني طالع للحله عندي شغله
شلون ياربي دخلت للحمام مره ثانيه
غسلت وطلعت بعدني احك
اتصلت على قائد
قائد...هلو حبي شعجب اتصلتي
سلسبيل .الحكني مااعرف شبيه جسمي يحكني صار احمر
قائد...اي اجيت
افتحي الباب الخارجي
فتحت الباب شويه واجا الضاهر جان بيت عمي
لكاني صايره طماطه
امشي واحك برجليه
قائد...شبيج صايره حمره
سلسبيل...مااعرف شبيه راح اموت من الحكه
قائد.. بدلي وتعاي نروح للمستشفى
سلسبيل..هسه ابدل .ماكدر البس بنطرون لان متت من الحكه
لبست ثوب وشال وطلعنا
طول الطريق احك متت متت جسمي اجرح من الحكه
وصلنا الدكتور الاختصاص ماكووو
طلعنا للعياده بس اني شنو صرت طماطه من الحك
دخلنا على الدكتور
فحصني الدكتور....انتي خاله شي على جسمج
سلسبيل...لا ابد
الدكتور...الجلد متعرض الماده تشبه الفلفل الحار
بعد اقوى والجسم كله بي هاي الماده
انتي لابسه ملابس من غير وحده
سلسبيل...لا اني مالبس من غير وحده اله ملابسي
الدكتور.....على العموم هاي ابره مهدء
ودهني جسمج بلمرهم ولازم تبقين شويه لمن يجف على جسمج وبعدين تغسلي
الابره هسه اخذيها
طلعناواشترينا الابره والممرضه ضربتني رجعنا للبيت
دخلنا
قائد...صرتي احسن
سلسبيل...ادخل اسبح بمي بارد
قائد...اني منتظرج
سلسبيل...ماتطلع للمكتب
قائد.. لا ماروح لمن تصيرين احسن
سلسبيل...طلعت من الحمام شويه احسن
قائد.. اخليلج مرهم على جسمج
سلسبيل...لا شكرا اني اخلي مااحتاج مساعدتك
قائد...فكري زين مو بعد شويه تتصلين تعال اريدك تساعدني
سلسبيل...شكرا ما محتاجه مساعدتك
طلع قائد واني تمددت على نفس فراشي راسا رجعت عليه الحكه اقوى من قبل
مافكرت ابد ممكن الفراش يكون علي شي يسبب الحكه
هاجت الحساسيه اتصلت على قائد
سلسبيل.. قائد فدوه الحك عليه راح اموت
رجعت عليه الحكه
صعد قائد من درج البيت الداخلي
راسا مها كامت تصيح هااا مو تكول مو زواج حقيقي
شعندك صاعد يمها
هااا حلت بعينك هااا تريدها عجبتك انزل بسرعه
هذا ماكان الاتفاق انت كلت هذا الزواج
بس كدام الناس مو زاج حقيقي
