رواية القلب بالقلب الفصل السادس عشر 16 بقلم روز الفياض

رواية القلب بالقلب الفصل السادس عشر 16 بقلم روز الفياض

ج١٦

احلى فترة بزواجي من خلصت من اماني وحنان وخلصت من السحر وياهن ..

كرم غير كرم جان ..

حب ..

دلال ..

اهتمام ..

صدك حبيت هالكرم اكثر من قبل من عرفت شخصيته الحقيقة صح هو شوية عنده برود بس هالبرود جان محلي شخصيته ..

................................

.

جنت من تشتعل ماريد اطفيك

لان محتاج اشوف ابكيفك اذوب

ياس: بعد ممنوع تشغل نسوان وياك

كرم: توبة ههه ..

ياس: بس انه

كرم: لاااا هههه ابدا التوبة بعد خليج بمدرستج احسن ..

بس ثاني يوم اتفاجأت بأتصال من المعاونة ست شذى كالت بطلوني ..

والحجة هالفترة المدرسة تمر بظروف وقلصوا الكادر علمود المصاريف تقل وهي راح تقوم بشغل المعاونة والكاتبة ..

انقهرت ...

وبالبداية ردت اكللها عادي انه مامحتاجة للراتب بس اريد اتعلم واطلع بس ماكتلها اي شي وسديته منها ورحت لعمتي حجيتلها كالت:

اي طبعا يبطلوج لعد شمتوقعه غير حنان صديقتها المفروض تستغربين شلون لهسه خلوج ..

ياس: عابت اي والله على اساس جانوا مخليني بالبرلمان ..

عمتي: ولاتضوجين المدارس الاهلية تارسه البلد ارتاحي كم يوم وعمج يدورلج مدرسة زينه محتاجين موظفة وداومي بيها ..

ياس: الله كريم ..

ومن سولفت لكرم جان نفس رد عمتي بس كلي:

ماجنت اتصورها لهدرجة حاقدة ..

ياس: شكد كرهتها .. عود جنت اكول حبابة ..

كرم: ختولي تركيها اذا تردين اشوفلج معهد دخلي دورة لغة او حاسوب اتعلمي واستفادي او دخلي دورة تقوية وشغلي وقتج ودرسي كدام وقت طويل على امتحانات السادس حاولي تستفيدين منه قدر الامكان ..

ياس: اشم ريحة كيك ..

كرم : وين شميتيها ماكو يتخيلج ..

ياس: والله اشم ريحة كيك .

نزلت جوه عبالي عمتي مسوية كيكة بس ماكو ..

منين اجت هاي الريحة ..

فتحت الفرن والثلاجة وبديت افتر بالبيت وادور ماكو شي ..

لنى: شتدورين ؟

ياس: اشم ريحة كيك ... منو مسوي؟

لنى: محد مااشتم شي ..

عمتي جانت كاعدة كالت :

ياسه ؟

ياس: ها عمه؟

كالت بصوت ناصي :

خاف حامل ..

صفنتلها كتلها:

ماادري يجوز ..

عمتي: فايتج؟

ياس: اي من يوم اللي لكيت بي السحر بالغرفة جان موعدها بس ماكو..

عمتي: يالله ... وليش متحجين حتى اخذج تسوين تحليل ..

ياس: خفت ...مااريد اتأمل وتالي ماكو شي وهم جنه ملتهين بسالفة حنان واختها وراح من بالي ..

عمتي : يالله ان شاءالله حامل .. بعد شوي اخذج ونروح نسوي تحليل ونتأكد ..

ياس: لاعمه مااروح ... اخاف بعدين اذا طلع ماكو شي ينكسر واهسي ..

عمتي: لعد شلون تبقين هيجي ميصير ..

ياس: اذا طلعتوا العصر جيبيلي وياج اختبار منزلي ..

عمتي: اوك .. بس شيصبرني لباجر الصبح ..

ياس: عمه هسه احنه هاي سنين صابرين بقت عاليوم الواحد ..

عمتي : الله كريم ان شاءالله خير .. العصر اروح اجيبلج ..

بقيت للعصر افكر خاف صدك حامل ؟

لاخاف مو حامل ..

اتمنيت احجي لكرم بس ماردت اخلي عنده امل ومن يطلع ماكو حمل يضوج ويكتئب ..

بعدما طلع كرم راحت عمتي جابتلي الاختبار وجابتلي كيك كعدت اكلت جني ما ماكلة قبل ..

عمتي: والله اني اكول حامل ..

لنى: ليش الحامل بس تاكل ؟

عمتي: اكو تاكل واكو تكطع الاكل .. وان شاءالله ياسه تاكل ..

ياس: شقصدكم؟

عمتي: حتى النوم هالايام كله خامله وكسلانه وتدور نوم مملاحظتها؟

لنى: اي صح ..

ياس: يا غير اكعد من فجر الله شلون ماانعس واتعب ..

عمتي: لا

.

.

.

.

ثاني يوم من الصبح رحت سويت الاختبار وبقيت كاعدة بالحمام منتظرة تبين النتيجة ..

كلبي يدك عبالك مسويتلي مصيبه ..

على مابينت النتيجة حامل ..

بجيت من الفرحة وجسمي كله ظل يرجف ..

شلون هسه شسوي اروح اكعد كرم واكله لو اخليها لحدما اروح للمختبر واسوي تحليل واتأكد ..

لا اتأكد بالاول احسن ..

سمعت حركة بره يمكن كرم كعد ذبيت الاختبار بسلة الزبالة وطلعت ..

صليت ونزلت اتريك ويه عمي ..

جنت فرحانه واحس مبين على وجهي الفرح ..

كعدت عمتي وره شوية وراحت تغسل وانوب رجعت صاحت علي :

ياسه؟

ياس: ها عمه؟

عمتي: بشري شنو الاخبار سويتي الاختبار؟

هزيت راسي اي وابتسمت ابتسامة شكبرها وكتلها:

حامل ..

عمتي: اييي يارحمتك يارب .. الف الحمدلله والشكر .. مبروك حبيبتي الف مبروك ..

ياس: مشكورة الله يبارك بيج .

عمتي: كرم شكال؟

ياس: ماكتله

عمتي: ليش؟ غير تفرحيه؟

ياس: لا كلت خل اروح اسوي تحليل بالمختبر بالاول اتأكد يعني يالله ..

عمتي: خوش حجي العصر اخذج ان شاءالله ..

.

.

.

نزل كرم يتريك قبل مايطلع للشغل باوعلي كلي:

اليوم شبيج؟

ياس: مابيه .. شبيه؟

كرم: مو على بعضج

ياس: ماكو شي كل شي مابيه الحمدلله

كرم: اشو احس عندج شي .. وجهج اصفر ..

ياس: وجهي؟ مامنتبهه ..

اتريك وطلع بعدما خزرني جم خزرة ..

بس طلع رجعت نمت حسيت روحي صدك نعسانه ..

بس ماطولت كعدت كلت اساعد عمتي ولنى لان بعد ماعدنه خدامة بالبيت جوانا رجعوها ..

سويت كم شغلة وعمتي ماقبلت كعدت اباوع عالتلفزيون ويه لنى لحدما اجه كرم واجه عمي واتغدينه ..

صعدت نمت وكرم وياي بس جان مو طبيعي ..

يباوعلي بنظرات غريبة ..

ياس: شبيك اليوم شو بس تخوزر بيه؟

كرم: ماكو شي ..

ياس: لا والله صدك شبيك؟

كرم: ماكو شي بس شكلج مو عاجبني وجهج اصفر وباهت وخاملة ماادري شبيج مو ياسه ..

بعدين اسحب منج دم اسويلج تحليل خاف نسبة دمج نازله ..

ياس: ميخالف بس هسه اريد انام نومه كون محد يكعدني ..

نمت كعدني العصر كرم حتى يسحب مني دم ..

كوه كعدت ..

كرم :شقصتج ويه النوم انطيني ايدج ..

مديت ايدي وكعد كبالي يطلع وريد ..

كرم: لتتحركين ..

ياس: آخخ كرم ايدك ثكيلة شوية شوية علي ..

سحب دم وراح بسرعة للمختبر ..

كعدت سبحت حتى اتنشط ونزلت لكيت عمتي مبدلة ومتانيتني حتى نروح نسوي تحليل حمل ..

عمتي: بعدج مامبدله؟ عبالي الكاج جاهزة هسه ..

ياس: خلص مايحتاج نروح

عمتي: ليش لتكولين نزلت ..

ياس: لا بس كرم سحب مني دم وراح يسولي تحليل اكيد يبين عده ..

عمتي: يعني كتيله حامل؟

ياس: لا بس هو صارله يومين يكلي وجهج اصفر ووضعج مو عاجبني وقبل لايطلع سحب مني دم كال خاف نسبة دمج نازله ..

عمتي: يجوز يبين عنده اذا حامل ..

ياس: ماادري بعد ..

عمتي: خاف ميبين ..دمشي خل نروح هو هذا المختبر عالشارع منطول ..

كمت كوه على روحي لبست ونزلت وصلنه للباب وشفنه كرم رجع ..

عمتي: ها حبيبي اشو رجعت؟

كرم: وين رايحين؟

عمتي: ماكو كالت ضايجين كتلها كومي خل اطلعج شوية

كرم : لا خلص ماكو طلعة ..

كلبي ظل يدك اسلوبه ونظراته وهدوئة يخوف ..

عمتي : هاا ليش؟

كرم : دخلوا للبيت ..

عمتي: اي ليش؟ متريدنه نطلع ..

كرم: فوتوا ..فوتوا ..

دخلنه للبيت وعمتي مستغربة وانه جنت فرحانه كلت اكيد عرف انه حامل ورجع بس خفت من نظراته الي ..

لنى: هاا اشو رجعتوا؟ مو حامل؟

ماجاوبناها لان كرم دخل ورانه مباشرة كللها:

لا حامل ..

ظليت متفاجأة حتى ماحسيت بالفرحة من شفت برودة ..

عمتي: ايي الف الحمدلله والشكر ياربي عود هسه جنت اريد اخذها للمختبر نتأكد كلنه خاف ميبين عندك ..

بقيت ساكته اباوعله وهو هم واكف يباوعلي وساكت ..

لنى: مبروك حبيبتي ياسه الله يسهل عليج يارب ..

بوستني بس انه ساكته حاسة اكو شي سكوته مايطمن ..

عمتي هم اجت باستني وباركتلي ..

وبعدين باركوله بس جان عادي يمكن احسن مني رد عليهم بس مامبين عليه فرحان ..

كعد كبالي عالكرسي مدنك بعدين رفع راسه كلي:

ليش ماكلتي؟

ياس: شكول؟

كرم: حامل .. ليش؟ مو الصبح جنتي مسويه الاختبار المنزلي؟

ياس: اي سويته .. بس ردت اتأكد بالاول التحليل احسن ..

عمتي كعدت تباوعلي وتباوعله بعدين كلتله:

المهم حامل وهسه يجيكم ولد لو بنية يترس علينه وعليكم البيت ان شاءالله ..

باوع لامه كللها لاتفرحين هواي يجوز يطلع مثل ذيج المره ..

باوعت لعمتي ردت افتهم شنو يعني مثل ذيج المره ؟

عمتي اتغيرت الوانها وردت عليه بحده:

اسم الله .. شنو هالحجي هذا؟ عيب ..عيب عليك تكول هالحجي لتعيده مره ثانية افتهمت ..

ماحجه شي عافنه وطلع ..

ظليت كاعدة متصفصفه .. لااخذ ولااطي ماادري شنو الموضوع ..

ياس: شنو السالفة؟ اريد احد يشرحلي شبي كرم؟ شو مافرحان ؟

لنى ماحجت باوعت لامها ..

عمتي: ماكو شي ... عوفيه يمكن مصدوم وممتوقع الخبر ... من يستوعب هو بحده يجي ..

.

.

.

بقيت كاعدة جوه وره العشه لان كرم مارجع للبيت ..

جان عدنه حماي رضا يريد يبات عدنه لان مرته بعدها عد اهلها ..

عمتي كلت لعمي ورضا عالحمل كللش فرحوا وعمي شالي مبلغ وخلاه بيدي وكلي:

هاي مالت البشارة ..

ياس: بس مو انه البشرتك عمتي بشرتك هههه ..

عمي: هاي الج وعمتج متحتاجها ..

لنى : زين بهالمناسبة احنه مالنه نصيب

عمي: انتي مخليه علي شي اول بأول ماخذه حقج ههههه ..

رضا: مبروك ياسه .. الله يوفقكم يارب ويرزقكم ..

ياس: الله يبارك بيك .. مشكور

ظلينه نضحك ونسولف بس كلبي جان مقبوض هذا وين راح؟

هسه المثله يكابلني ويكعد مو يفرر بهالليل ..

امداج ياسه

.

.

.

الساعة ب( ١١ ) رجع ..

سلم وصعد ..

رحت صعدت وراه لكيته يبدل كتله:

تتعشه؟

كرم: متعشي ..

ياس: بالعافية ...

شفت وجهه ثكيل درت ردت انزل جوه كلي:

تعاي هنا ..

ياس: شنو؟

اشرلي براسه ادخل للغرفة ..

دخلت وسد الباب ..

كعدت عالجرباية وهو بقى واكف يباوعلي ..

ياس: شكو؟

كرم : راح اسألج سؤال واحد واريدج تجاوبيني بدون جذب ولف ودوران ..زين؟

كلبي ظل يدك وخفت شبي هذا؟

كتله بخوف وارتباك :

اسأل ...

كعد كبالي يباوعلي بطريقة غريبة بعدين كلي:

هذا ابني مو؟

عبالي يتشاقه ظليت صافنه عليه اباوعله لان كلت بكلبي صدك جذب هو هذا حجي يضحك بالله ..

كرم: ليش ساكته؟

ياس: لان ماتضحك ..

كرم : ماكو شي يضحك جاوبي عالسؤال ..

ياس: شجاوب هههه

كرم: ابني لو لا؟

ياس : هههه لا ابني اشتريته من السوك هههه لا على كولت امي سويته بالصوندات ..

من شفته عصبي ومايضحك ويخزر بيه عرفت اكو شي مو طبيعي .. هذا يمكن يحجي صدك ..

ياس: انت تحجي صدك لو تتشاقه ؟

كرم: جااااوبي ...

ياس: شجاوب شنو مخبل انت ...

كمت اريد اطلع جان كاعد كبالي واريد اعبر كتله:

وخر .. وخر خليني اطلع ..

كرم: كعدي وحاجيني بدون هوسه ومشاكل حتى لااضطر اتعامل وياج تعامل ميعجبج ..

ياس: لا اكعد ولااحجي .. انت مو مال واحد يكعد وياك ويحاجيك .. انت واحد مريض ..

ماحسيت الا كام سحبني و ..

ماحاجيته ..

رحت فتحت باب الغرفة بالاول ورجعت للكنتور ظليت اطلع ملابسه واغراضه واشمرهن من الدرج ..

بقى واكف يباوعلي ..

سمعت عمتي جوه تسأل شكو ماجاوبتها ولاهو ...

استمريت اشمر ملابسه واشيائها كلها من الدرج ..

صعدت عمتي ولنى يركضن ...

عمتي: شكو شصاير شبيكم؟

ياس: ماكو شي عمه سلامتج .. جاي انظف غرفتي ...

صعد عمي كال:

شبيكم؟

درت عليه كتله:

ماكو شي عمو سلامتك قبل من جان على اساس بي سحر جان يريد يطلع من الغرفة لان يكول شكلج مااشوفه نفسه ولم هدومه يريد ياخذهن لذيج الغرفة .. بس انه ماخليته كتله لاتنام بالغرفة ومااريد منك شي لاتحاجيني ولاتجيني بس هدومك خليهن حتى عمي وعمتي لايدرون وتصير هوسه ومشكلة وكلها تدري انت مارايدني عيب ...

بس هسه انه مااريده بغرفتي بعد ..

وخلي الكل يعرف بعد مايهمني ..

رجعت دخلت للغرفة جبت عطورة شمرتهن ..

عمتي اجت لزمتني هي ولنى لان حسيت اتخبلت ..

عمي: شصار ؟ فهموني شصار؟

نزل هو وعافنه نزل عمي وراه يريد يعرف شبي ..

عافني املخ بروحي ...

نزلت وراهم اركض ووراي عمتي ولنى يركضن ...

لكيت عمي لازمه بالمطبخ هو ورضا ويسالونه شكو ..

ياس: سألوني آنه .. أنه سألوني انه ..

امداني ... امداني على حظي وعلى قسمتي ...

هاي كدامكم والله اذا اجه ووصل يمي لو دخل للغرفة لو السانه اجه على لساني الا احرك روحي وابليكم ..

ظل عمي يصيح علي وعليه :

كافي شبيك اتخبلتوا متستحون متخجلون .. واكفين نتوسل بيكم نريد نعرف شكو وانتو ولاهامكم كل واحد يهوس بصفحة .. احترمونه .. احترموا وجودنه ...

كعدت بالكاع وظليت ابجي ...

اجت لنى كومتني واخذتني لغرفتها وسدت الباب وكعدت يمي تسكتني ..

شوية وسمعنه هوسة بره وصياح بين عمي وكرم ورضا وعمتي تصرخ ...

طلعنه نركض سمعت صوت باب المطبخ انضرب ضربة كللش قوية ..

دفعتني لنى للغرفة بس ماكدرت ادخل خفت بقيت واكفة يم باب الغرفة اريد اعرف شكو ..

عمتي وعمي ماكو ..

طلع رضا من غرفة عمي وراح للمطبخ ووراه لنى ركضت ..

مااسمع بس صوت التكسير يمكن مابقى صحن ولا كلاص ماانكسر ...

رجعت لنى دخلتني للغرفة وكعدت يمي تهديني ..

لنى: ارتاحي كعدي لتطلعين ...

تبجي لنى وانه ابجي ...

لنى : اتخبل كرم .. اتخبل ...

وره شوية صار هدوء ...

اجت عمتي دخلت علينه وهي تبجي كالت:

متفهميني شصار بينكم فهميني شبيكم ؟

كتلها بعصبية:

شبي ابنج؟ ابنج شبي؟ فهميني انتي ابنج شبي ؟ مريض مخبل ؟ فهميني لان راح اتسودن .. عقل ماظل براسي ..

عمتي: شسوالج؟

ياس: كلكم تعرفون شبي بس ماتحجون مخلين كل خباله يطلع علي مخليني مثل العمية ماادري شبي وشصايرله ..

لنى: على كيفج على كيفج ليصير بيج شي انتي غير حامل ..

ظليت الهث وارجف من العصبية ..

حاولت اهدأ شوية خفت واستحيت لان عليت صوتي على عمتي ...

رجعت خليت راسي بحضنها وبجيت ..

ظلت هي ساكته بس بعدين كالت:

عمج ضربه ...

رفعت راسي باوعتلها كالت:

انوب اتخبل بالزايد وكسر المطبخ .. هسه رضا اخذه بره ..

لنى: شكلج؟

التفتت على لنى ومسحت دموعي كتلها:

شكلي بعد؟ شكلي .. حتى استحي اكول شكلي ...

عمتي: ضربج؟

ياس: ماهمتني الضربة ماهمتني ... لو كاتلني ومكطعني ولا الحجاية وصخام الوجه الحجاه ..

يكلي هذا ابني لو لا ...

رجعت ابجي وعمتي انصدمت ..

لنى تباوعلها وهي تباوع عليها ..

يمكن اطول ليلة مرت علينه ..

محد نام يمكن ...

خلوني بغرفة لنى انام بس مانمت ..

كلبي محترك ..

رضا رجع اخذ السويج ومفاتيح بيته وطلع ..

صاح على عمتي راحت حجت وياه وطلع ...

اخذ كرم وياه لبيته ..

باتوا هناك ..

ظليت متمددة بالفراش ودموعي تصب ..

اسمع عمتي ولنى ينظفن ويلمن الزبالة والكزاز بالمطبخ ...

بقن يمكن للفجر ينظفن ..

وانه كاعدة مره اتمدد مره اكعد واحط ايدي على خدي ..

شسوي هسه وين اطي وجهي ؟

وين اروح ؟

شلون اتصرف ؟

شيجيب الصبح ..

مااظل هنا بعد .. مااظل الا اروح لاهلي ..

الا اخليهم يلعبون بيك لعب ..

هاي تاليتج ياسه ..

هذا العرس الكتلتي روحج عليه ..

من امداج وامده حظج

........................

بعض البشر كلما احببته ..

ازاددت صفعات الحياة لك ..

فأما ان ترضخ وتبقى طوال حياتك شيئا ثانويا في حياته ..

او ان تنتفض فترسم لنفسك مسارا جديدا يقف عند حده كل من حاول النيل من كرامتك

...............................

يتبع

السابع عشر من هنا

تعديل المقال