رواية القلب بالقلب الفصل الخامس عشر 15 بقلم روز الفياض

رواية القلب بالقلب الفصل الخامس عشر 15 بقلم روز الفياض

ظليت يومين آكل بروحي ..

شلون شسوي هسه حتى اخلص من حنان واختها ..

رحت خابرت على جورية اختي وحجيتلها وكتلها تروح تسولف لامي ..

بنفس اليوم خابرتني امي وهم رجعت حجيتلها كالت:

دورتي غرفتج هدومج فراشج ..

ياس: لاء

امي: جا شوصيتج انه .. مو كتلج بس تروحين دوري غرفتج ؟

ياس: اليوم ادورها ..

جان مدوخني موضوع اماني ومافتشت الغرفة الا وره فترة ..

اماني داومت ويه كرم ..

وانه جنت اروح للمدرسة وارجع اكون تعبانه ومالي خلك فما اروح ويه كرم للمختبر ..

حسيت كرم هواي يسولف بيها ..

اماني هيج كالت واماني هيج سولفت هيج سوت وهيج ضحكت ..

حسيته اكو شي مو طبيعي وانه ماجاي اتحرك ..

ماجنت اريد ابطل من المدرسة حتى لااخليهن يحسن انه حاسة بيهن وبخطتهن ..

بس المشكلة ماادري شصارلي احس روحي مالي خلك شي حتى كرم ..

الى ان ريم اخته اجتنه وجان مو يوم جمعة استغربنه ..

صعدتلي فوك جنت متمدده احس جسمي بايد ..

دخلت يمي وسلمت وكعدت كالت:

شبيج ياسه اشو مالج خلك؟

ياس: مابيه .. بس مالي خلك شوية

ريم: صاير بينكم شي انتي وكرم؟

ياس: لا ماصاير شي كرم مثل ماهو يوم يحجي وعشرة لا ..

ريم : كل منج انتي

ياس: ليش؟ شمسويتله؟

ريم : انتي مرخيتله الحبل ومخليته بالمختبر ويه غيرج ..

كعدت عدل كتلها:

غيري منو اماني؟

كالت بصوت ناصي :

اي اماني .. نايمة انتي والمي يمشي من جوه رجليج ..

انعصر كلبي كتلها:

عنده علاقة بيها؟

كمزت هي كالت :

لا لا لا .. لايروح بالج بعيد ..

ياس: جا وين يروح هذا معنى حجيج ..

ريم : الرجال من يشوف وحده مهتمتله اكثر من مرته ومكابلته بذاك اللبس وذيج الكشخه ..

ياس: جا انه مقصره؟ مو جاي البسله واكشخله ..

ريم : حبيبتي هي مو بس الكشخه انتي تكشخيله وتلبسيبله بس وينج انتي هنا وهو هناك يمها ..

ضاك صدري كتلها:

ريم ... بداعة جهالج .. اذا اكو شي بينهم كولي حتى اتصرف ..

ريم : شتتصرفين يعني؟

ياس: ماادري اروح اشوفهم احجي وياه اسوي اي شي ..

ريم: مااظن اكو شي بينهم بس اني اجيت وحجيت وياج لان انتبهتله يوم الجمعة الفات شكد حجه بيها ..

طاحت دموعي كتلها :

اكو شي اريد احجيه بس ماعندي احد احجيلهيا ..

ريم : كولي حبيبتي لعد اني شنو غير بت عمج وحماتج وهم اختج ..

حجيت لريم حجي اماني اللي سمعته من رحت لكرم ذاك لليوم ..

ريم : وانتي ليش ساكته ؟ ليش محجيتيله؟

ياس: خفت يزعل ويفسرها غيرة نسوان مو اكثر وهم خفت الفت نظره الها اكثر ..

ريم : بالله هاي سوايه تسويها جان اجيتي حجيتيلي او حجيتي لماما حتى نعترض على شغلها وياه او نشوف طريقة نبعدها عنه ..

ياس: هي بس كلمة منج بينهم شي لو لا؟

ريم : لا والله العظيم لا كل شي مااعرف بس كتلج انتبهتله حجه بيها هوايه ذاك اليوم فكلت اجي انبهج هو اخوي ومااريد بيته ينخرب ..

ظليت متحنطه مامصدكه اللي سمعته ..

اكو شي جاي يصير مااعرفه شنو ..

رجلي جاي اخسره واعرف الفاعل منو بس مااعرف شلون اعالج الوضع ..

بس طلعت ريم كلت امداني ...

امداني وامده حظي ..

لازم اعرف السحر وين ..

لازم ادوره ..

كمت بسرعة اتحزمت وبديت ادور ..

دورت الكنتور كله ذبيت الهدوم بالكاع ورجعتها ..

دورت الجرارات والتحف وحتى الثريات حطيت كرسي وصعدت اباوع عليها خاف اكو شي بيها ..

تعبت حيل تعبت ودخت ..

اندك الباب خفت لايطلع كرم وانه كفشتي ومحزمه ورافعة الدشداشة بالحزام طالعة جني كصاب ..

فتحت الباب على كيف شفتها عمتي ..

دخلت كالت:

وينج اليوم مانزلتي ظل بالي كلت خل اصعد اشوفها خاف مريضة ...

ياس: ها عمه لامابيه شي بس جاي انظف الغرفة ..

عمتي: وليش تنظفيها وحدج صيحي لجوانا تنظفها الج ..

ياس: لامايحتاج مابقى شي بس الجرباية ..

عمتي: شبيج اشو شكلج تعبان؟

ياس: اي والله تعبت ودخت بس مابقى شي هسه اخلص وانزل ..

عمتي : شنو بقى عندج كوليلي حتى اساعدج وتخلصين بسرعة ؟

ياس: لا خلصت بس الجرباية وانزل لاتعبين نفسج ..

ردتها بس تنزل بالكوه يالله نزلت ..

بديت انزع وجوه المخاد وانه اتلمس بيها ..

مخدتي حسيت بيها شي ..

اخذت مخدة كرم نزعت الوجه وبديت اتلمس الديباج بيها ..

فجأة حسيت اكو شي يابس ..

رأسا مديت ايدي عالجرارة طلعت المكص ..

شكيت المخاد بالمكص وبديت انكش الديباج مالها لحدما طحت بالشي الموجود بطنها واللي هو ورقه ملفوفة بشريط لاصق شفاف ومطبكه حيل وصايرة زغيرونه ..

طلعتها باوعتلها مكتوب عليها بالقلم الجاف كرم .. ومخدتي طلع بيها نفس الشي مكتوب عليه اسمي ..

ظليت متحنطه ..

هذا مبين سحر لان عليه اسمائنة ومحطوط بمخادنه ..

رجعت عالبطانية شبرتها شبر شبر ادور يمكن اكو شي بيها بس ماكو ..

آخر شي من خلصت وعزلت الغرفة ورجعت كل شي بمكانه اتذكرت جوه الفراش ..

المندر جبير وثكيل مااكدر اوخره واشوف اذا اكو شي جواه ..

حاولت ارفعه شوية من الجهات الاربعة كل زاوية ارفعها شوية اشوف شكو جواها ..

ماكو شي منا لحدما وصلت للزاوية الرابعة من المندر ورفعتها ومديت ايدي جواه اتلمس خاف اكو شي ..

حسيت ايدي طخت بشي ..

رجعت ابحوش لزمت شي سحبته وطلعته ...

قفل ( ) ...

ظليت صافنه شنو هذا انوب وشيسوي جوه فراشنه ..

.

.

ظليت احوس بيومها ماادري شسوي شلتهن وخليتهن بجيس وخليتهن بالمخزن ضميتهن ..

ظليت اليوم كله ادك صفنات منو حاطهن بالغرفة ..

معقولة عمتي الها ايد بالسالفة ؟

زين خاف تطلع حنان مالها علاقة بالسحر؟

منو بعد ممكن اشك بي ؟

اجه كرم بالليل جنت بغرفتي متمددة على جربايتي واضرب صفنات ودموعي ماوشلت ..

وكف اباب الغرفة صاح:

ياسه؟

رفعت راسي كتله:

هاا ..

كرم : تعاي ..

راح للغرفة الثانية بس مارحت وراه ...

جنت احس روحي مبهوته ...

اكو بيه شي اليوم مو صاحيه .. وحتى تكمل السبحة اجت ريم وحجتلي على كرم واماني ..

وانوب السحر والقفل ..

مابقى عندي حيل ولاخلك ...

راح بدل ملابسه ورجع وكف بالباب كال:

شبيج اليوم لاتحجين لاتسولفين .. لاتدردمين ..

ياس: مابيه شي

كرم : منين هالهدوء معرفتج؟

ياس: تعبانة ..

كرم: شبيج؟

ياس: ماادري .. جسمي كله يوجعني ..

كرم : اجيبلج حبوب

ياس: لا ..

بقى واكف يباوعلي وانه مااتحركت نايمه وظامه وجهي بالمخده واباوعله بسكوت من جوه المخدة ودموعي تصب ....

نزل ...

كمت كوه جريت روحي رحت غسلت وجهي ورجعت اتغطيت بلكي انام ..

بقيت اتكلب وافكر حسيت روحي راح اتخبل ..

حسيت بحركة يمي رفعت الغطا شفت كرم ..

كعد يمي يباوعلي غمضت خاف ابجي ..

كرم : شبيج اليوم؟

ماحجيت ..

كرم : ياسه؟ احاجيج؟

ياس: هممم؟

كرم : باوعيلي ..

فتحت عيوني باوعتله واول ماباوعتله طاحت دموعي ..

اتمدد يمي وحضني كلي:

شمضوجج؟

هزيت راسي ماكو شي ..

كرم: اخذج للدكتور؟

هزيت راسي لا ..

كرم: زين احجيلي شبيج؟ اكو احد ضوجج بالمدرسة؟

هزيت راسي لا ..

كرم: سويتلج اني شي بدون ماانتبه؟

ياس: ماكو شي كرم عوفني فدوه تعبانه والله ماادري شبيه ..

كرم: واني مااقتنع بهالحجي ... كولي شصاير؟

ظليت ابجي حيل وهو يباوعلي كلي:

وتالي؟

ياس: خليني كرم خليني ... مخنوكه شويه ارتاح واصير زينه ..

نزل وانه خابرت لامي كتلها لكيت هيج وهيج بغرفتنه ..

امي: ضميهن يمه لاتكلين لاحد عليهن وانه وابوج راح نروح للناصرية لبيت سيد (..........) كلها تمدح بيهم وان شاء الله يكلولنه شنسوي ..

ياس: وانه شسوي هسه؟

امي: احنه من نروح ونشوف شيكول السيد نطلع كبل انوب من الناصرية الكم نجي كبل ..

ياس: شوكت ترحون؟

امي: ابوج يكول باجر نطلع من غبشة ان شاءالله ..

.

.

.ثاني يوم ابوي خابرني الصبح تقريبا الساعة ب( ١٠) كال:

احنه جايين بالطريق بوية خاف نوصل السحر اللكيتيه جوه ايدج؟

ياس: اي بويه عدي ضامته ..

ابوي: اي حتى بس نرتاح شوية ناخذج وناخذ كرم ونروح نزوركم بأبو الجوادين ..

تانيتهم يجون بس تأخروا فأجلنه الروحه لثاني يوم ..

بالليل ابوي وعمي طلعوا راحوا لكرم للمختبر كرم جان مايدري بأهلي اجوا ..

ابوي بالطريق حاجي لعمي على سالفة اماني وحنان ..

عمي بالبداية مامستغرب ومتعجب بس بعدين صدك من راحوا وشاف اماني بالمختبر ويه كرم ..

وهم ابوي حجه لعمي سالفة السحر الي لكيته بغرفتنه ..

من رجعوا جان وياهم كرم بس كلهم وجوهم ماتتفسر ..

بالليل وره العشه كعدنه كل احنه نسولف ..

جنت فرحانه بجيت اهلي بس خايفة لان ماادري شكللهم السيد ولاادري شبيهم رجعوا من كرم ضايجين ..

بالليل كرم صعد نام من وكت ..

صعدت وراه كتله:

شبيك؟

كرم: ماكو شي ..

ياس: لا اكو ... مالك خلك رجعت انت وابوي وعمي ماادري شبيكم ..

بقى ساكت بعدين كال:

ابوي وعمي شافوا اماني ومقبلوا على وجودها بالمختبر ..

فرحت ...

ياس: ليش؟

كرم: يكولون لبسها مو محتشم وابوي يكلي انت رجال متزوج عبالك شافني وياها بموقف مو وين ..

سكتت خاف احجي تبين فرحتي بعدين كتله:

هي صدك لبسها مامحتشم ..

كرم : واحنه شكو بيها ..

ياس: شلون غير هم سمعت المختبر وصورته كدام الناس ... شيكولون عنكم انت ومثنى ..

كرم: اووف اووف

ياس: سلامتك من الاوف قابل شكلولك وهيج تتحسر

كرم : لج شكول للبنية ابوي وعمي ميردوج بالمختبر؟ هسه تكول ليش شبيه..

ياس: اي كللها الصدك .. كللها لبسج مو حلو ومال مكان شغل محترم ..

كرم :

ياس: لاتخزرني انه ماطايقتها من الاول وانت تدري تتطوى جنها حيه وتتنغوص عبالك مانعرف احنه نلبس هيج ونتنغوص مثلها ..

لف راسه ونام بدون حجي ..

انه نزلت لامي للغرفة شفتها متمدده بفراشها كتلها:

كعدي حجيه ..كعدي فهميني شكلج السيد؟

امي كالت وهي تتثاوب :

كال اكو عملين بالغرفة واكو قفل .. واحد ربط حتى ينربط عنها ومايتدنالها والثاني محبة لوحدة ثانية .. والثالث حتى هي هم تبرد عنه وتضوج منه ..

ياس: ماكللكم منو مسوي العمل؟

امي: كل ( ٣ ) متعاونات اثنين كرايب خوات بنات عمي بنات خال ماندري بس كرايب ووحده غريبة ..

ياس: الكرايب هن حنان واختها بس الغريبة منين؟

امي: الغريبة اظن هاي البت التشتغل عدكم ..

ياس: يااهي ؟ جوانا

امي: لان كال وحده سمممرررة وكصيرة ومو من اهل البيت بس ساكنه وياهم ..

ياس: فلاشة ... صخام بوجهي ...

بعدنه نحجي انه وامي اندك باب الغرفة دخلت جوانا جايبة بعد لحاف خلته وابتسمت كالت:

تردون شي؟

امي: بربدج يامبربده كون ..

جوانا : هااا

ياس: روحي روحي ماكو شي ..

امي: صابهن علي كون بيش طالباتج هالمكارات ..

ياس: يمه شلون بيه خاف يظل يحبها ؟

امي: خايبه شيحبها .. الولد مسحور باجر نروح للكاظم وذبي العمل هناك .. وخلي ابو الجوادين يسطرهن كون ..

ياس: يارب ..

ثاني يوم مارحت للمدرسة رحت ويه ابوي وعمي وامي للامام الكاظم ..

ذبيت العمل هناك وكفت كباله كتله:

بكيفك ياابو الجوادين انه غريبه ولااعرف اطب ولااطلع ولااعرف اسوي سحر ولااعرف افكه ولااعرف اسوي مثل بنات ابليس ولااكدر البس واتحمر للزلم مثلهن ... من يمك اريدها وتكضي لان مالي حيل هاي الناس واهلي بعاد عني ومالي احد قريب يعلمني ... بالله وبيك ..

رجعنه للبيت الظهر وابوي وعمي طول الطريق يحجون بهالموضوع عمي جان متخبل مامصدك جنته الحلوة ممكن تسوي لحماها سحر ..

واتفقنه على اساس عمي راح يحجي لعمتي من نرجع حتى نراقب جوانا وحنان ونعرف اذا هن صدك صاحبات السحر ...

جنت مرتاحة لان عمي عرف عالاقل احد يساندني ويشجعني ..

عمتي من عرفت اتخبلت ..

عمتي: كل هذا يصير واني مااعرف ؟

عمي: هسه مادام عرفتي خلي عينج عليهن ..

عمتي: شخلي عيني اني هسه اروح اطين عيشتهن يدخلن سحر لبيتي؟ والمن؟ لابني؟ لا عيني ولااصبر ولااراقب ولااخلي عيني عليهن اصلا ... وينه القفل؟ انطونياه اشوف ..

عمي: مو ذبيناه بالامام لعد شدنحجي من الصبح ..

امي: كله من هاااي هاي السويده ..

وتأشر على جوانا من بعيد ..

راحت عمتي جابت قفل من المخزن واجت كالت:

مثل هذا؟

هزيت راسي اي ... صاحت هي على جوانا ؛

جوانا ... جوااانااا

اجت جوانا تركض وعمتي استلمتها تحقيق:

هذا شنو القفل؟

جوانا: مااعرف

عمتي : هذا القفل لكته ياسه فوك بغرفتهم جوه فراشهم منو خلاه هناك ..

نكرت جوانا وعمتي مصره تشكف الموضوع وهي مصره على انكارها وصارت هوسه امي تصيح بصفحة وابوي وعمي بصفحة وعمتي بصفحة وجوانا هم تصيح ..

حسيت روحي دخت كللش ثال راسي ..

صعدت وعفتهم يكملون تحقيق ..

نعسانه جنت وجوعانه واحس بجسمي وهن ..

نمت ماكعدت الا من كعدني كرم ..

عبالي اتحلم ...

كرم : ياسه .. حبيبتي .. صح النوم ...حبي ياس كعدي ..

باسني وحضني وكل هذا وانه عبالي حلم ..

فتحت عيوني شفته يباوعلي كتله:

توه جنت اتحلم بيك ..

كرم : شنو اتحلمتي بالله؟

ياس: تحلمت بستني وكتلي حبيبتي وحبي .. كابوس مو حلم ..

ضحك ورجع باسني بعدين كلي:

مو حلم ... هذا واقع ... اكو احد يشوف هالجمال ويكدر يقاوم ...

ظليت متعجبه هذا رجلي كرم لو غيره ..

معقولة انفكت العقدة وراح السحر وشافني وحس بيه ؟

مااصدك ..

ياس: اليوم جاي لغرفتنه شعجب ؟

كرم : شلون مااجي وانتي هنا ...

كعدت على حيلي اريد اصدك الجاي اشوفه واسمعه كتله بعصبية:

شوف كرم اذا ماتحجي عدل وياي هسه الم البيت عليك مادام ابوي هنا حتى اروح وياه كول شعدك وخلصني .. مالي حيل ملاعيب هاي وسوالفك ..

ضحك كال:

شبيج؟ شصاير؟ هسه واحد يحب مرته وراجع من الشغل مشتاق الها شنو البيها هاي ؟

ياس: منك من الشيطان؟

كرم: هههه لامني ..

ياس: اهلي واهلك وين ؟

كرم : جوه ديتغدون ودزوني اصيحلج تنزلين حتى تتغدين ..

نزلنه اتغدينه والكل ساكت بس كرم جان خابصنه ..

جان غدانه سمج يفلس ويخلي كدامي ..

وانه وبقية العائلة صافنين عليه .. متعجبين ..

امي: شلونها وياك ياسه ؟ خوما مقصرة ..

كرم: ياسه ورده .. ياسه واسمها عليها ...

دنكت يمه كتله:

انشرب عالماي الخابط ..

ضحكوا كلهم وعمي كال:

اي والله محجيتي الا الصحيح ...

اتغدينه وخلصنه بس ماشفت جوانا ...

شلت الماعين ويه عمتي ولنى ورحنه للمطبخ سالت عمتي كالت:

تولي بغرفتها زعلانه فوك سوايتها وصخام وجها تتزعل .. الا اخلي عمج يرجعها ..

ياس: ياريت والله شنسوي بيها بس المشاكل وراهن ..

عمتي: اصبريلي بس خل يجي رضا اليوم واحجيله شمسوية طايحة الحظ مرته هي واختها وانوب اتفرغ لجوانا ...

ياس: يبووي هم ورانه بعد عركة اليوم؟

لنى: اليوم الظاهر يوم الاكتشافات كل واحد ديكتشف الثاني شنو ..

بعد الغده اجه رضا من الشغل النه لان عمتي متصله بي ..

عمي وعمتي وابوي وامي وانه ولنى كعدنه وكعدوا كرم ورضا وجابوا جوانا حتى تعترف كدام رضا ويسمع الدليل بأذانه ..

رضا من سمع خطية وجهه ظل ينطي الوان ..

مابين العصبية والاحراج ..

وكرم ظل متحنط .. مامصدك

وانه جنت ساكته ماحجيت ولاكلمة ..

اتصل رضا على حنان وكللها تجي ..

اجت وعمتي ماقصرت بيها .. طبعا هي نكرت:

تجذبوني اني وتصدكون بهاي اللفو ..

رضا: ليش لفو هذا بيت عمها يعني بيتها ..

حنان: وحده شروكيه حاقدة جايه تتبله علي وتشوه سمعتي اني واختي وانتو مسانديها هذا جزائي لان اعتبرتها مثل اختي وشغلتها .. هاي تاليت اللي يسوي زين وياكم ؟

عمتي : وجوانا؟

حنان: شبيها جوانا؟

عمتي: جوانا اعترفت كالت حنان تنطيني فلوس وانه اخليلها الشغلات بالغرفة مالت كرم وياسه ..

حنان: ختولي جذابة شنو مصلحتي اخرب زواجهم اصلا اني احبهم وحتى نصحتها علمود الاطفال والشغل ...

ظلت تحجي وتبرر وتنكر لكن الموضوع انكشف وانتهى ..

صار واضح للكل هي شنو وشنو سوت ..

صارت مشكلة كللش جبيرة بين اهلها وبين بيت عمي ورضا وراحت زعلانه لاهلها لكن بيت عمي جانوا الاقوى بسبب شهادة جوانا ..

حاولوا اهلها يطلعوني جذابة واريد اخلص منها لان اغار ومدري شنو لكن بالنهاية رضا ماقبل يرجعها ولاقبل اهلها يرجعونها ..

ووصل الموضوع بينهم للطلاك واتوقف لان الاهل والاصحاب اتدخلوا حتى يصلحون بينهم علمود الجهال ...

ماادري يجوز هم سوتله سحر خلته يبرد وينسى ..

اهلي طبعا بقوا يومين يمنه وراحوا .. بينما الهوسة بين رضا وحنان مستمرة صارلها اسبوعين ..

اهم مابالموضوع خلصت من اماني

السادس عشر من هنا

تعديل المقال