رواية القلب بالقلب الفصل الرابع عشر 14 بقلم روز الفياض

رواية القلب بالقلب الفصل الرابع عشر 14 بقلم روز الفياض

ج١٤

الصبح من كعدت بقيت اباوعله نايم ..

رحت صليت ولكيت البنات كاعدات كبلي ..

ياس: صبحكم الله بالخير ..

امي وفهيمة وسلامة وجورية :

صباح النور ..

ياس: اليوم كلها كاعدة من الصبح من اجه كل هالنشاط؟

فهيمة : صدك اليوم ترحون ترجعون لبغداد ؟

هزيت راسي اي .

سلامة: خيه شدعوه عليه رجلج حتى مالحكنه نشوفج ..

امي: خلنها تروح ويه رجلها احسن ..

فهيمة : ماكتيله روح وتعال بعد اسبوع ..

امي: لا شنهي هذا اللعب تروح ويه زلمتها بعد .. يومية داك هالدرب هذا شطوله سيارات وتعب على ساعة يصيرله حادث .. تروح وياه احسنلها .. المره المعدلة ماتعوف رجلها لوحده ..

سكتنه كل احنه بعد هالحجي ..

جورية حبت تلطف الجو كالت:

بس شوفن شلون اليوم وجها مورد من عبن شافته ..

ضحكت ..

امي: اي جا شلون مايورد غير رجلها وابو بيتها ...

حطن البنات الريوك بس مااتريكت كتلهن اتاني كرم يكعد ..

جورية: بيش الساعة اتطلعون؟

ياس: ماادري ماكال ..

جورية: بلكي الله يهدية وتبقون بعد فد يومين تلاثه حتى ماصاوغناج ..

ياس: قابل انه جايه علمود الصوغة ... هاي شفتكم وارتاحيت كافي ..

تريكن البنات وانه رحت للغرفة اشوفه خاف كعد ..

دخلت شفته بعده نايم ..

رحت نمت يمه حضني ..

ياس: كاعد؟

كرم: هممم؟

ياس: كوم صلي .. عوف النوم كافي ..

كرم: اممم ..

ياس: يالله كوم ..

فتح عيونه باوعلي وهو نعسان كلي:

حلوه انتي ...

ابتسمت استحيت حسيت خدودي صارن حمر ..

كرم: منين طلعتيلي ...

ياس: من المصباح السحري ..

ضحك كتله :

يالله عفية كوم ... عفية لخاطري كوم صلي ...

كرم: بس ترحين وياي ..

ياس: وين؟

كرم: نرجع لبيتنه ... نروح لبغداد ..

ياس: شسوي بعد امري لله ...

ظل يلعب بشعري بعدين باس خدي وطلع يغسل ويتوضه ..

رحت جهزت الريوك الي واله .. وامي تفتر وراي :

اي ..اي عفية بنيتي .. اي هاي المره الزينه .. هاي المره المعدلة تحط رجلها بعيونها ..

جانت حاصرتني البجية ..

خايفه يطلع هذا كله تمثيل حتى ارجع وياه ..

اتريكنه وخلصنه كلي:

تردين نروح هسه لو نطلع بعدين ..

ياس: لاهسه حتى نوصل قبل الازدحام ..

كرم: اوك .. روحي بدلي وجهزي نفسج واني طالع بره اشوف عمي والولد شيسوون وارجع ابدل ..

رحت بدلت وصفطت غراضي واجه هو هم بدل وطلعنه سلمنة عليهم وابوي ومصعب وصلونه للكراج ومناك اخذنه سيارة لبغداد ..

طول الطريق صفنه تاخذني وصفنه اتجيبني بس المواسيني الكلمة الكالياها البارحة .. يحبني ..

وصلنه للبيت استقبلتنه عمتي بضحكة وكالت:

هااا ماصبر على فراكج يومين مااتحمل شتردين بعد ههههه ..

لنى: لا جذب ليغشوج اني تره لحيت عليه وحلفته يروح يجيبج ..

درت عليه خفت لاتطلع حجايتها صدك بس هو ابتسم وكلي كدامها:

جذابة هههه تريد توكع بينه مالج علاقة بيها ..

ضحكت لنى ...

سلمت عليهم وكعدت شوية يمهم وصعدت لغرفتي حتى ابدل ملابسي وارتاح شوية ..

صعد كرم وصعد جنطتي بس خلاها بالباب مال الغرفة مادخل ولادخلها الي ..

كمت رحتله كتله:

خلص انه ادخلها عوفها ..

راح للغرفة الثانية ماحاجاني .

رحت وراه كتله:

كرم؟

كرم : نعم ..

ياس: يعني نبقى هيج؟

دار علي كلي:

هيج شلون يعني؟

ياس: يعني ماتدخل لغرفتنه وتنام بره ..

بقى ساكت شوية بعدين كلي:

الله كريم ..

ياس: ونعم بالله بس انت ماكلت لعمتي لعمي لاي احد حتى يشوفلنه شنو الموضوع ؟

كرم : لا ولتحجين لاحد ..

ياس: ليش؟

كرم: بعدين عبالهم اني مخبل ..

ياس: ليش هو بس المخبل يشوف هيج سوالف؟

كرم: مااريد احد يعرف ..زين؟

كلي بصوت حاد ..

سكتت ورجعت لغرفتي جنت تعبانه من الطريق نمت ..

كعدت بالليل ونزلت جوه مالكيته ..

عمتي: صح النوم ..

ريم: سفره سعيدة عيني ياسه ..

رحت سلمت على ريم وكعدت اسولف وياها وعيني عالباب انتبهت ريم علي كلتلي:

هسه يرجع راح للمختبر كال شوية وراجع ..

ماحجيت رجعت كالت بصوت ناصي:

ياسه ... اكلج شلونه وياج كرم ؟

ياس: زين ..

ريم: خوما مأذيج ومتعبج ..

سكتت شوية ماادري شتقصد شافتني بقيت ساكته كالت:

هو شوية بارد وثكيل كوه يطلع الكلمة اخوي واعرفه بس يحبج .. انتي غير عن مرته الاولى ..

ياس: شلون يعني غير؟

ريم: يعني ماتشبهيها بشي مختلفة تماما عنها ..

ياس: وهذا شي زين يعني؟

ريم: طبعا .. لوما زين جان هسه كرم ...

وسكتت ..

ياس: شنو ؟

سكتت وانوب كالت بتردد كأنما واحد جفص ويريد يصلح الموضوع بس جذبته مبينه :

جان ماحبج هيجي واتعلق بيج ..

ياس: يعني انه مااستاهل يحبني ؟

ريم: لا بالعكس انتي اصلا محبوبة وكل احنه نحبج مو بس كرم .. بس هو قبل .. قبل لايزوج اصلا مو هسه يعني .. قبل لايتزوج مرته الاولى من جان ابوي يكوله اخطبلك من بنات عمك ميقبل ..

سكتت لان اعرف نهاية هذا الحجي راح اتنكد وانغث ..

عفتها ورحت يم جوانا اساعدها نسوي عشه ..

اجت هي وراي ظلت تبوس بيه :

ياسه حبيبتي خوما زعلتي مني؟

ياس: وعلى شنو ازعل .. كل الحجيتيه اعرفه ماجبتي شي جديد ..

ريم: والله العظيم احبج مثل مااحبه واكثر كل احنه نحبج وفرحانين بيج بينه وخصوصا امي كوولش تحبج تكول فقيرة ياسه ومؤدبة وماتشتكي ولاتحجي ..

ياس: ادري .. وانه هم احبكم ولوما احبه واحبكم مااتحملت ..

حسيت وجها تغير كالت:

يعني هو مضايقج بشي؟ كايلج شي؟

ياس: شيكول؟ هو اصلا يحجي ..

ظلت صافنه .. وانه هم اخذتلي صفنه شضامين علي ..

شبيك ياكرم ؟ شصايرلك ؟

بعدما اجه كرم واتعشينه عمي راح بغرفته يقرا وعمتي تحجي بالتليفون ويه جارتها ..

لنى اخذت لابتوبها وهم راحت بغرفتها ..

بقيت كاعدة انه وكرم هو يباوع عالتلفزيون وانه اباوع عليه ..

كرم: انام؟

ياس: بكيفك ..

كرم: يالله اوك ..

طفى التلفزيون وصعد وانه رحت طليت على لنى وصعدت شفته جاي يفرش مندره بالصالة ..

شافني صعدت كال:

لتنامين بالغرفة ..

ياس: جا وين انام ؟

كرم: تعاي هنا يمي ..

فرحت من كلي تعاي يمي ..

رحت اندحست يمه بالفراش ..

ساكت اسمع بس صوت انفاسه يم اذني ..

كتله:

باجر اتداوم؟

كرم: ان شاءالله ..

ياس: وانه وين اروح ..

كرم: وين تردين ترحين مو اليوم رجعتي من اهلج ..

ياس: مالحكت اشبع منهم ...

كرم: المهم شفتيهم .. غير مره اخذج الهم وابقي اسبوع ..

درت عليه كتله:

جنت تتخيل كبل تخطب وحده من بنات عمامك؟

فتح عينه باوعلي ورجع غمض وكال:

لاء .

ياس: ليش؟ لان مو من المدينة؟

رد علي وهو مغمض :

جنت اكوللهم مااريد وحده شروكيه ...

حجايته صدمتني وصرت عصبيه لان حجاها بهالبرود ..

ياس: وشجبرك عالشروكيه مادام مو كد المقام ..جان رحت دورتلك وحده من ثوبك ؟

فتح عيونه باوعلي وانوب باس خدي وكلي:

حبيتها ...

ضجت وانغثيت هذا الريم رادت تركع بيه جفصتها بس بمكان ماتكحلها عمتها ..

تحركت ردت اكوم حضني حيل وكلي:

نامي ..

ياس: اريد اروح انام بغرفتي ..

كرم: وتعوفيني انام وحدي؟

ياس: شتسوي بالشروكية تنام يمك .. متعود انت على غير نوع ..

فتح عيونه ورفع راسه كلي:

اني اختاريتج لان انتي غير نوع على كولتج ... انتي النوع الاريده افتهمي عاد ...

ياس: مو جنت تكول انفرضتي علي هسه اختاريتج ماعرفنالك ؟

كرم: وافرضي واذا انفرضتي علي شنو يعني؟ المهم احنه هسه شنو؟

ياس: ماادري شمدريني احنه شنو انت كل ساعة بحال وكل يوم بوجه ..

كتله ودرت وجهي رجع دار وجهي بيده كلي:

تره لسانج طويل ..

ياس: ادري ..

كرم: ديري بالج لااكصه ..

ياس: حتى لو كصيته هم اظل ادردم ..

ضحك هو على كيف وكلي:

المشكلة لسانج محليج هههه ..

بقيت متكدره وساكته واباوعله كال:

اني كتلج تعباان واريدج تتحمليني مو تعبيني اكثر ...

جريت حسره وحضنته ..

كرم : لا .. .

.

.

.

.

مرت الايام وانه بالبيت وكرم مره زين ومره مو زين بس جان احسن من الاول وياي وجنت اغلب الوكت احاول اخليه يبقى بعيد عن الغرفة وعن جو البيت لان احسه بره البيت يكون احسن ونفسيته مختلفة ..

بيوم جمعة اجونه رضا ومرته عالغده كالت حنان:

ياسه نسيت اكولج علمود هاي الشغلة بالمدرسة ..

ياس: اي ..

حنان: تره اني اتصلت بالبنية وكالت محتاجين كاتبة .. اذا تردين حتى اخذج عكب باجر الصبح حتى تلتقين بيهم ويحجون وياج ..

خفت اول مره راح اشتغل واطلع واعتمد على روحي بس فرصة واجتني كتلها:

بكيف كرم ..

باوعتله جان يباوعلي كال:

روحي وشوفي ..

فرحت حيل ماصدكت خلصت الغده وكعدت يم حنان حتى اسألها شنو احجي شنو اكول شلون راح اتصرف شنو بالضبط يعني وظيفتها الكاتبة ؟

وهي جانت تحجيلي على وضع الدوام والمدرسة وتشجعني وتكلي طلعي من جو البيت والرجال يحترم المره اللي تشتغل ويستضعف المره الكاعدة بالبيت ومن هالحجي وبصراحة حجيها جان مقنع ..

ثاني يوم جنت متلهفه ..

ظليت اليوم كله اباوع بالكنتور محتاره شلبس باجر لو رحت وياها للمقابله ..

والليل مانمته من الفرحه ..

الصبح كعدت لبست ونزلت اتريكت وظليت اتاني حنان تجي علي ..

مااجت منا للساعة بالتسعة ونص ..

رحنه للمدرسة وعرفتني على المدير ومرته المعاونه ..

مو جبير ولاهي جبيرة ..

سلمت وكعدت رحبوا بيه وسألوني شكد عمري وشعجب متأخره بالدراسة وبعدين كالت مرته ست شذى:

احنه راح نساعدج لان ماعندج خبره وراح تعلمج ست اريج شنو شغلج بالضبط لان هي بعدلها شهرين وتتزوج وتسافر وخلال هالشهرين راح تعلمج ..

المدير استاذ يعرب جان حباب ويضحك ويسولف وياي وويه حنان بعدين كلي:

ست شوكت ميعجبج تبدين اهلا وسهلا بعد انتي من طرف حنان منكدر نحجي ..

اتفقنه اداوم من ثاني يوم تجي علي السيارة لان ماباقي شي على امتحانات الدور الثاني ..

وفعلا داومت ثاني يوم وانه بقمة السعادة ..

كل المعلمين والمعلمات طيبين وياي وجنت اتعامل وياهم بصورة رسمية ..

بديت اتعلم شغلي واتعود عالناس الوياي بالمدرسة ..

جان طريق السيارة يمر على المختبر مال كرم وشريكه ..

من خلصت الامتحانات آخر يوم وانه راجعه للبيت ماادري شجه ابالي بنص الطريق قررت انزل يم كرم ..

اروحله للمختبر ..

اريد اتجرأ وابدي اتحرك وحدي ..

وصدك من وصلنه يم المختبر نزلت ..

صعدت للمختبر فوك ..دخلت شفت ناس موجودين مراجعين وشفت الولد شريكه سلمت عليه وسألته عن كرم كال:

كرم جوه بالغرفة .. اتفضلي اتفضلي ..

رحت كبل للغرفة آخر غرفة بالممر دكيت الباب وانه مبتسمة وفتحت الباب على كيف ودخلت كتله:

حبيبي وين ؟

شفته يباوعلي متفاجأ كاعدة عالكرسي كباله بنية كللش حلوة وكشخه ..

الشعر اسود مفتوح والبنطرون مخصر والسترة كوه تتحرك بيها ومكياج والعطر تارس الغرفة ..

ظليت مخلوسه ومتحنطه .. وهي هم ..

كرم : هلو ..

كتله بصوت ناصي :

هلو

كرم: هاي منو جابج؟

ياس: سيارة المدرسة وصلتني ..

هي تباوعلي وانه اباوعلها ...

كرم : تعالي كعدي هنا ..

كعدت وانه عيني ماطاحت منها بس هي دنكت يمكن على كدما خزرتها استحت ..

كرم : اعرفج .. زوجتي ياس ..

دارت باوعلتي وكلتلي :

اهلا وسهلا .. عرفتها اني مباشرة بس دخلت ..

كرم: ياس هاذي اماني .. راح تشتغل ويانه بالمختبر بس فترة العصر ..

ياس: اهلا وسهلا ..

كرم: اماني بعد انتي مو غريبة شوكت يناسبج تداومين براحتج ..

اماني: لا شي اكيد مو غريبة هههه اشكرك كولك ذوق كرم .. يالله اني اترخص هسه ..

كرم: اهلا وسهلا بيج ..

طلعت وانه اباوعلها شلون تتطوى بالمشي مثل الحيه وكرم صافن علي شلون اباوعلها كال:

كافي البنية حتوكع ..

ياس: خليها عساها بالكسر وانه شكو كايلتها تلبس هالكعب وتتطوى جنها حيه ..

ضحك حيل كال :

يعني تغارين ؟

ياس: منين اغار من هاي؟ عمت عينها انه ياسه اغار بس من الزين مااغار من الشين ..

ضحك كال:

على كيفج البنية حبابة ليغرج لبسها ... اخت حنان مشايفتها قبل؟

ياس: ياحنان؟

كرم : حنان .. حنونتنه زوجة رضا ..

ياس: يااا ... هي هاي المطلكه لان رجلها اتزوج عليها؟ مو عدها اخت كالت مره اتطلكت لان رجلها اتزوج عليها ؟

كرم: اي هي .. يالله كومي

ياس: وين؟

كرم : اغديج ونرجع للبيت ..

كيفت اول مره نطلع انه وياه بحدنه ..

كرم : اوك طلعي خل اروح احاجي مثنى واكوله طالعين حتى من يخلص يعزل ويروح ..

نزلت عالدرج شوية شوية وحدي وكلت خل اوكف بره يم باب العمارة ..

جان اكو شبه ( عمود انارة ) وكفت يمه اتاني كرم ..

بصف العمارة جان اكو صيدلية جبيرة شفت اماني اخت حنان طلعت منها وتليفونها بيدها تخابر ..

تمشي على كيف وتحجي مدري ويامن كالت:

هو غير بس كعدنه اجت طبت علينه الشروكيه .. عرفتها من عبايتها جنها مكدية ..

عرفتها تقصدني ظليت واكفه وجاره العبايه على وجهي حتى لاتشوفني وهي واكفة يمكن متانية احد او يمكن متايتني اطلع حتى ترجع للمختبر ..

اماني: دخلت علينه مثل القضا المستعجل .. اندري شعاجبه بيها ... ههههه لالتخافين اني اله اجيب راسه اجيبه الكشخه والاناقه فووول لتخافين بس خل اداوم وشوفي اذا قبل يباوع بشكلها بعد هههههه لعد شعبالج نحن لانهزم ...

شفت سيارة وكفت باوعت سيارة حنان اجت على اختها ..

طلعت السالفة اتفاق بينهن ..

لاتشتغلين ويه كرم اشتغلي بالمدرسة هاا ..

وجايبه اختج تاخذ رجلي مني ..

وهذا المطفي يكلي حبابة

انه الجن انتي واختج ..

اصبرلي بس ..

نزل كرم ورحنه لمطعم قريب اتغدينه وسولفنه شوية عن المدرسة بعدين كتله:

شو جني اتندمت ..

كرم : ليش؟ ممرتاحه وياهم؟ ضوجوج بشي؟

ياس: لا

كرم : احد ضايقج .. المدير ؟ واحد من المعلمين؟ لو المعلمات؟

ياس: لا .. بس اكول لو مداومه وياك احسنلي شو استحي منهم ..

ضحك كال:

مبين عليج غرتي ..

ياس: لا تره احجي صدك مااتشاقه ..

كرم : لا المدرسة احسنلج تستفادين ويصير عندج صديقات وتعطلين وياهم من يعطلون ..

ياس: شو جنك ماتريدني اجي وياك ؟

ضحك كال:

لا والله ههههه تعاي براحتج اذا يعجبج تعاي ماكو مشكلة فرصة اصلا مادام اماني راح اتداوم حتى الشغل يكون اخف واكدر اعلمج ..

ياس: خوش ..

رجعنه للبيت وانه الف حسبة براسي ..

معقوله كرم يطلع صدك اكو احد مسويله سحر؟

اذا طلع صدك اكو سحر ... معقولة حنان واختها وراه؟

جا ليش جايبه اختها تريدها تهجم بيتي اذا مو هي المستفادة من السحر ..

طركاعة السودة وطاحت على راسج ياسه ...

منين اجتج اماني انوب ...

دهر فرج حنان كون ..

هسه شسوي المن اروح اشتكي اخاف احجي لاحد ويكولون تغار منها وتتبله عليها ؟

دبرني ياربي ...

دخلنه للبيت صعد هو ينام وانه بقيت كاعدة اسولف لعمتي على الدوام وشلون رحت لكرم ولكيت يمه اماني وتالي رحنه اتغدينه واجينه ..

المره ماجان عدها اي رد فعل على سالفة اماني كالت:

بالعافية عليكم .. زين سويتي طلعوا غيروا جو ..

بقيت ساكته ماادري شحجي ولاادري شكول ..

الخامس عشر من هنا 

تعديل المقال