رواية الهجرس كامله وحصريه بقلم رواء هادي
#مقدمة
سأروي لكم قصة حقيقية مختلفة تمامًا عن باقي قصصي بل غريبة أيضًا
القصة واقعية حدثت في إحدى مناطق محافظة ديالى الحبيبة رواية غريبة نوعًا ما وستُدهشكم بعض أحداثها قد تصدقون أو لا لكن كل ما سأرويه لكم واقعي وقد حدث لبطل القصة فرقد
الملقب بـ #هجرس
سأقدم لكم بعض احداث القصة
#مشهد_الأول
_ليش دائماً يگولون ثلثين الطك لأهل ديالى ؟
_ شوف معنى الطك الرمي بالأسلحة وعرفنه احنه اهل ديالى لكثرة مشاكلنا العشائرية واستخدام السلاح في فضها يعني بكل مشكلة تصير ايدينه والتفك لذلك سمونه ثلثين الطك لأهل ديالى
#مشهد_الثاني
لابسه فستان أبيض قصير فوك الركبة وصلوخ مطلعة صدرها وشعرها البني نازل على كتوفها ومخليه مكياج طالعة جنها اللعابة مو بني آدمية
بتسمت بخجل وگالت بكل هدوء ورقة "
تأخرت !؟
رجعت الابتسامة لها دخلت للغرفة سديت الباب وخليت التلفون وسويج السيارة عالطبلة
بصف جرباية وقتربت لها
_لو ادري منتظرتني مجان تأخرت
_مو دزيتلك رسالة
_وين ؟
_ عالخط
_ماجنت منتبه اروح فدوة الهل الطول
على كيفج وياي ترى قلبي ترف
ومايتحمل كل هذا جمال
كامت بطولها اخذتلي قلبي وعقلي اجت لعندي مبين عليها وجهها ملامح الخجل بس صارت كدامي جريتها من خصرها باثنين ايديه
_احتركت امج على جمال لبيج
خلت رجليها فوك رجلية وكفت على روس اصابعها وحاوطت ركبتي بايديها الاثنين وتباوعلي بكل لهفة وشوق وانه كذلك ذايب بنظرات عيونها
قربت وجي لوجهها وهمست كدام شفايفها "
ليش من اقتربلج تنتهي كل
القسوة لبي ؟!
شدت على ركبتي اكثر وگالت "
لأن تحبني وأحبك
#مشهد_الثالث
ياسر_ كافي مو لعبت بنفسك لعب
انساها وخلها تولي
فرقد_ شكد سهلة بالسانك !
ياسر_ إلى متى لعد تبقى هيج ملوع قلبك من وراها ولك ماتسواك وماتسوى تذكرها على لسانك
وتمر على بالك
فرقد _ماكدر ياسر
ياسر_تبقى مسجون بحبها ولك هي لو تريدك
وتحبك ماسوت لسوته بيك
فرقد_ ندمان والله على السويته بيها
ياسر_هههههه
فرقد_شبيك تضحك ؟!
ياسر_ابشرك يالندمان علمودها البارحة
العصر جانت مشيتها
من سمعت شگال "حسيت طلقة وفاتت بنص
صدري گمت بسرعة من مكاني
وصحت بي "
فرقد_شلووووون ؟
#مشهد_الرابع
_أنت ليش تباوعلي ؟
ابتسمت بوجهها واخذت نفس طويل من الجكارة ورجعت نفخت الدخان عليها جانت بعيده
عني بعد أمتار قليلة
_ لتلومين نظراتي لومي جمالج
_الله ينتقم منك شرايد مني ؟
_اريدج من راسج لحد صبع رجلج تصيرين لي
#مشهد_الخامس
_ شبيك كاضيها بالجكاير جكارة ورة جكارة ؟
_ مشتاقلها كلش هواي ياسر
_ولك كافي انساها راحت بعد نامت بحضن غيرك
_ماكدر انساها ماكدر
_ولك هجرس ماتعودت اشوفك ضعيف ومكسور الخاطر تعودت اشوفك قوي وشجاع وقلبك ميت شجاك وهيج صرت هيج حبها دمرك وخلاك تمشي
وتصفن وتحجي وي روحك ؟!
_ صرت ابجي توالي ليل بفركاها
_وشنو ذنب الليل تبجي بي على هيج وحدة
_ هو الليل لو سامع شكو بصدري إذا
مايگعد يبجي وياي كلش عيب
#مشهد_السادس
جريت الكرسي وگعدت گدامها هي بالگاع كاعدة وتبجي بكل حركة وتصرخ بصوت عالي بقيت مستمتع بصراخها وعياطها عبالك موسيقى
المفضلة عندي واستمتع بسماعها قطعت
استمتاعي كلمة منها " جبروني
سديت عيوني ورجعت فتحتهم اريد اسيطر على اعصابي ماريد اتهور واكوم امد ايدي عليها خليت رجل على رجل ورجعت ظهري للخلف
وشابكت ايديه واباوعلها بتركيز هي تباوعلي وتبجي
_ليش ماگتي ؟ ليش ماهربتي ؟ليش بقيتي ساكتة إذا فعلاً جنتي مجبورة ؟ ليش هيج سويتي بي
شلون طاوعج قلبج وعفتيني
وانه بامس الحاجة الج ؟! بيش أحسن مني لاخذتي ورحتي لبعيد ؟! هيج انه رخيص
بنسبة الج يم...
#بـــارت1
في محافظة ديالى سنة ٢٠٠٧
وقت الظهر الساعة ١:٢٣
رجعت من دوامي هلكان من التعب الطريق كله أمشي على رجلية فاتت من يمي سيارة بيضة من نوع بطة معروفات ذني السيارت لأهل
الخطف والسلب نزلت جامة سيارة طلع رجال يطلع بالعمر ثلاثينيات اصلع الرأس أمشي وباوعله ابتسم
بوجي وخففوا السياقة
_أنت جابر ابن الضابط عبدالله ؟
وكفت اباوعله بعدم فهم ؟وكف السيارة وابتسم بوجهي ورجع گال بضحكة "
- هههه شبيك خفت ترى مو علاسة
احنه ربع الله حبيبي
فرقد_ربع الله هاي منين جبتوها نوب ؟
_وغلاتك حبيبي احنه ربع الله ونساعد العالم المحتاجة مو من اهل العلاسة تعلس الناس وتأخذ
افلوسهم لو روسهم هههههه
_الله يكثر من أمثالكم
_وامثالك حبيبي ...هسه ماگلتلي أنت جابر
ابن الضابط عبدالله؟
_لاعزيزي متوهم مو ابنه
_لعد ابن منو؟
_ابن وائل ابن حجي موسى
_هاا ...تكدر تكمل طريقك حبيبي
ماقتنع بجوابي حركوا السيارة بسرعة وطلعوا مانكر الموضوع خفت منهم وسلكت غير طريق لبيت أهلي طريت اطر الكيعان والبساتين طرور
لما وصلت لبيت أهلي جريت نفس برتياح من صرت كبال مضيف جدي حجي موسى دخلت شفت جدي كاعد فوك الكرسي بالطرمة
خزرني بنظراته جدي بسلامته كلش متعصب ومتشدد على أقل عركة يجر التفكة ويصير يرمي فوك روس مهما كان هذا الشخص يرمي
بس يتعصب صاح بي "
تأخرت هجيرس
_مو اجيت من غير طريق
_أول مرة وآخر مرة تتأخر
_حاظر جدي
_فوت جوه بدل وتغده وتعال ... نروح نسگي الزرع
_نسگي هجرس ؟
_اي قبل المغرب
_ان شاءالله جدي
عفته ودخلت للبيت سلمت على جداتي التلاثة وحدة بصف الثانية كاعدات وتلاثتهن يجرن جكاير مسويات معمل بالصالة طلع بوجهي علاوي
علاوي_اليوم هجرس يكابل هجرس ههههه
هجرس_ربع نصير ههههه
علاوي_تذكر شسوى بيك قبل جم سنة
هجرس _لاماتذكر
علاوي_تذكر هههه
عافني وطلع اباوع بوجه نسوان كلها تضحك والبنات والولد وعمامي كلها فرحانة لي راح اروح اسگي كاع هجرس هاي الكاع معروفة من أيام
اجداد اجداد اجداد جدي كاع مسكونه وبيها طنطل المغرب أو بالليل يطلع على هيئة هجرس " ابن ثعلب وعده أشكال مختلفة مايظهر بصورة وحدة
مرة گالوا الجدي شفنا على صورته الحقيقية جدي نكر هذا الكلام وگال الإنسان مايشوف الجن على صورتهم الحقيقية التي خلقوا عليها بس نشوفهم بصور أخرى متجسدين لها مستحيل
نشوفه بشكله الحقيقي
كلام جدي جان منطقي كلش لأن هواي شايفه بعده أشكال وتذكر مرة من المرات جان عمري بوقتها ٨ سنوات رحت المغرب ويه جدي
نشوف لكيعان وماعرف بيها هاي الكاع مسكونة وشفت هجرس صغير بنصها يباوعلي ويعوي رحت عليه أريد الزمه واجيبه للبيت اربي هاي جانت غايتي
تقربت عليه عيونه مو عيون واوي عيونه شكلهن مرعب وطالعات لكدام بلمح البصر أختفى من كدام عيوني من شفته أختفى وكعت
بالكاع من خوفي سمعت صوت غريب ومرعب همس باذاني" هجرس اطلع .... اطلع " صار يردد هجرس اطلع ... اطلع كلامه مثل فحيح الأفاعي
كمت بسرعة وصرت اركض وكفت على حدود الكاع اخذ نفس تعبت كلش رفعت رأسي وعساني مارافعه شفت مخلوق غريب عجيب
بجناح حمرة مثل اجناح الخفاش وحجمه بحجم الكلب بس سمين ومتروس اديه أدين بشر اذانه طويلة واطول منه جانوا ملامح وجه قريبة لملامح وجه الكلب بس مشوهة
رجلينه رجلين صخله كلهن شعر بالون الأسود رتفع كم مترعن الأرض وصفن بي بقيت صافن بي من خوفي وراها أختفى بس سمعت صوت جدي
_هاااي وين جاااي هجرررس ؟
أنتبهت على صوت جدي وگلتله بعيون كلها دموع "
جدي شفت جني
_هو أنت جني امشي كدامي للبيت امشي عار ابن
العار جابك الهنا اريد جابك ؟!
ضربني جدي على ركبتي من ورة مرتين خلاني ابجي صحت بي وگلتله شبيييك ؟ انه گلت شبيك بصياح لو جنيت على عمري طيحلي حظي
فوك ضيمي وخوفي من الجني هجرس جدي موتني من الضرب متعود على الضرب من أبوي عمامي أمي من تتعصب وتتعارك ويه ابوي
ونسوانه تجي تصب قهرها بي وتنهيني من الضرب جانوا كلما يضربوني اقسي وقلبي يحقد وراها
تعلمت شلون أدافع عن نفسي
وياهو ليضربني اضربه مرة من المرات ضربت ابوي وعمي جدوع بس نهوني من الضرب وآخر مرة جان عمري ١٣ سنة جريت سلاح على
ولد عمامي وردت اكتلهم لما جدي موسى تدخل ومن هذلك اليوم محد وصل حدري حتى ابوي شال ايده مني واخذني جدي له وگال اريدك
تصير ايدي وعيني ورجلي بالبيت بغيابي وتوصلي كلشي يصير بين النسون والجهال والزلم گتله صار تدلل جدي وصرت مرسال جدي
مرات اسوي خباثه بين نسوان واخليهن يتعاركت واروح لجدي وجدي يجي يخلي رجولتهن تضربهن وأبقى اضحك وتلذذ بتعذيبهن
وأتذكر شجانوا يسوون بي .
المهم تغديت ومشيت وي جدي موسى وابوي نسگي الزرع كسرت ماي على كاع وبديت اسگي قطرة خوف ماكو بقلبي ابوي خايف كلش
ويتلفت برغم الدنيا ظهر بقيت كاعد ورجلي بلماي طامسات وبصفي الكرك لمحت بنص الطين ولماي شي مربع نصفى طالع من طين مديت ايدي
طلعته على شكل مربع كله طين بديت اغسل الطين منه شفت رسومات كوه تبين لان كله طين من سمعت صوت ابوي ضميتها بجيب البجامة بسرعةوسحبت السحاب عليها
ابوي_هجرس سد لماي كمل الوح
هجرس_ماشي جم واحد بقوا
أبوي _ بعد لوحين ويكملون
كمت سديت الماي عالوح وفتحت ماي على لوحين وكعدت انتظرهم يكملون ابوي عافني وشرد لأن الشمس بلشت تغرب يصيح عليًّ
ابوي _كملهم يلا تطلع مو تصير جبان وتشرد
كمت رفعت ايدي خليتها يم حلكي علمود اوصل الصوت له " بس الچلاب تشرد وقت المغرب من تظهر الذياب وانه ذيب موچلب علمود اشرد
من هجرس ههههههه
صاح بي " انه اعلمك هجرس صبرلي
_تعال وعلمني عليش طفرت من صار المغرب
سكتت وتجمدت بمكاني من صوت
يشبه صوت فحيح الافاعي
يضرب بنص مسمعي ....
- رجعها ...رجعها هجرس ....
رجعها .... رجعههههها
آخر شي صاح بأذاني خله أذاني تصفر وتوش لزمت اذاني باثنين ايديه وكعدت بالكاع صرت اقرأ آية الكرسي أختفى الصوت وكمت خايف مرعوب منه ارجع شنو يريدني ؟ بقيت اردد آية الكرسي لما كملت الكاع سگي وطفرت اباوع ابوي ماكو
شفت من بعيد على راس البزل واكف وياشرلي اجي التفتت وره ظهري اشوف كوم مال علاليك سودة وحمرة ومن مختلف الألوان صاروا
يفترون على شكل دائرة عرفت بي جاي يوصلي إشارة هو موجود خليت الكرك على جتفي وطلعت ركض وأقرأ آية الكرسي .
وصلت يم ابوي صاح بي "
عليمن تحجي ولك
_مو عليك قصدي قصدي انه إذا طلعت من الكاع وقت الغروب معناها چلب مو ذيب يلا خل نكمل طريقنه الشمس غابت وخاف هجرس يتبعنى
_شنوو ؟
_اي سوه إشارة لي
_جاي يحذرك امشي لعد بسرعة
اباوع لابوي مخطوف لونه التفتت وره ظهري شفت كل العلاليك طايرة فوك الكاع ماعرف شبي عصب ههههه المهم كملت الكاع وطلعت بخير وسلامة .
وصلنا لبيت بوجي للحمام غسلت وطلعت انتظره ياذن علمود ادخل اسبح والله اذن دخلت سبحت توني ردت اطلع تذكرت القطعة لكيتها
كعدت بالكاع فتحت جيب البجامة طلعتها كعدت اغسل بيها جوه حنفيه الماي مايطلع الطين جامد عليها عادكمت جبت مجلافة
وكعدت اجلف بيها لما طلعت كل الرسومات لبيها كعدت تاملها بنية لابسة فستان وجني رابط ايده بيدها بسلاسل حديدية وبصفهم نار مشتعلة ؟!
حرت شنو تفسير هاي رسومات وطلاسم من جهة؟ مرسومة ولفت انتباهي الجني جان يشبه هجرس نسخة ثانية منه عبالك هو مرسوم
بهاي القطعة .؟!
خليتها بجيب بجامتي وطلعت عدل لغرفتي
ضميتها بصندوق وقفلت عليه
وشمرته جوه الجرباية يم اغراضي .
وره العشة سألوني خوما تعرض الكم هجرس ابوي صار يسفط جذب سوه إشارات وهجرس خاف لزمته ماخليته يشرد لما كملنا الكاع سگي
بقيت ساكت ماردت اجذب ابوي نفس الليلة حلمت بهجرس يركض وراي ويطرد بي المنطقة كلها ويصيح وراي رجعها هجرس رجعها
وانه ماعرف على شنو يحجي وكله شرد يرجع يكلي" رجعها رجعها هجرس رجعها " ماعنده غير كلمة رجعها كلشي مافتهمت منه .
من يوم سكيت كاع هجرس وهجرس مايفارق احلامي كل يوم احلم بي ويگلي رجعها رجعها وانه ماعرف شماخذ منه ويريدني ارجعها له .
المهم مرت الأيام وانه كاعد بصف الشباك كالعادة اتسنط على نسوان عمامي اسمع خيرية
تكول السراب "
خيرية_ مو اليوم باجر اهججها من البيت
سراب_ ولماهجت شلون ؟
خيرية _ انه اهج من البيت بدالها
سراب_ خيرية واثقة من كلامج
خيرية_طبعا واثقة هسه تعاي خل اعلمج شلون ندحس السحر لسويته لها بدوشكها
سراب_عززة العزاج شوكت لحكتي تسوين سحورة
خيرية _مو جنت يم اهلي وتدرين بخالي سحار اكشر وشولفت لامي وامي مسولفتله كلشي
وصبح دزولي السحر بيد علاوي
سراب_وهذا ماليش ؟
خيرية _مال تفرقة
سراب_راح نخلص منها
خيرية _اي نخلص منها
سراب_الله يسمع من حلكج
خيرية _يلا كومي خل ندحسه قبل لا تجي
سراب_قبل شوي راحن يحشن يلا كومي لعد
كمت مبتسم الوجه رحت يم غرفة قسمة زوجت عمي جدوع اباوع من الشباك عليهن دخلن الغرفة وراحن على الجرباية صارن يكصن بدوشك
الجرباية دحسن شي على شكل طوبة ملفلف بوصلة بيضة ورجعن خيطن الشك وكامن بسرعة بعدت من يم الشباك اهفي بيدي
هجرس_ الله يخلق ومحمد يبتلي وانه مبتلي بالناس لعندي وهاي الجدي رايح خل يلعن ابو الخلفوجن هههههه من زمان ماشايف عركة ههههه
من طفولتي بي زمرة خبيثة واحب اخبث على الكل وافتعل المشاكل والعرايك تمشي بدمي واعرف
الجبيرة والصغيرة بهذا البيت
ومثل مايگول ايد جدي اليمين مايمشي خطوة وحدة إذا مايگلي عدل للمضيف لكيت جدي كاعد وي عمامي خليت ايديني وره ظهري ودخلت بنص
الكل امشي بتباهي احب اتباهة بنفسي صاح
بي عمي جدوع
جدوع_نزل ايديك كلب
هجرس_لتغلط
جدوع _من اكوم اكسر راسك كلب ابن الكلب
اشرت على ابوي بحاجبي وكلتله "
لبصفك مو چلب لبصفح أسد وانه شبل
ذا الأسد...جدي رايدك بسالفة
جدوع _ولك
جدي _سد حلكك تعال جدي
ابتسمت بخباثة بوجه عمامي كلها مايكدرون يحجون وياي كلمة وحدة يدرون بي مدلل جدي حتى ابوي مايكدر يحجي وياي كلمة وحدة
نزلت ايديني ورحت كعدت بصف جدي فوك الدوشك بالكاع قربت لعندي وشاورته " جدي خيرية وسراب مسويات سحر تفرقة لقسمة مرت عمي جدوع
جدي_اي كمل
هجرس_ودحسوه بدوشك الجرباية
وخيطوا بخيط ابيض
جدي_بارك الله بيهن
هجرس_والله يكثر من امثالهن
جدي_انا اعلمهن روح راقب كلشي لما اجي للبيت
هجرس_صار جدي
بعدت عن جدي كمت هم خليت ايديني وره ظهري واطريت عمامي ال١١ عم وابوي وياهم يصيرون ١٢ ومن عده اولادهم عشيرة
خزروني ابوي گال "
احترم عمامك يابة
قبل لا ارد اجه الرد من جدي "
هو شمسوي علمود تگله احترم نفسك وعمامك .. اسمعوا اي واحد منكم يغلط بكلمة على هجرس معناها غلط بحقي انه افتهمتوا
هجرس_يفتهمون ليش مايفتهمون جدب
جدوع _سمعت يابة
جدي_ ماكل شيء روح هجرس
هجرس_تدلل جدي
جريت نفس طويل وزفرت برتياح اريد اخبل الكل مني اولهم عمامي ولدهم ادري بيهم يكرهون ابوي علمود ابن الغريبة ابوي وعماتي اثنين من مرت
جدي الصغيرة جدي متزوج ثلاث نسوان الجبيرة بت عمه اخذها علمود يرضي ابوه والوسطانية بت خاله اخذها علمود يرضي أمه
والصغيرة أخذها علمود يرضي نفسه جدي انسان عادل وقسمته عادلة دائما ومايفرق بين الجبير والصغير بس انه معزتي معزة عنده لأن جاسوس
مالته طلعت المضيف صادفني علاوي يخزر بي من بعيد قتربت من عنده خليت ايديني وره ظهري
نفخت صدري بتباهي .
هجرس_شبيك تخزر بعيونك البكل
علاوي_ هجرس لا تشوف نفسك كدامي تالي عمرك صاير براسي زلمة ولك تفلة من تفلاتي
اطمك بكاعك
صوفرت صافورة طويلة وعالية وگلتله بستفزاز "
لو أنت زلمة وطالع من ظهر زلمة تفل تفله صغيرة بنص وجي اللي شايل وجه جدي وشوف هذا الزلمة شراح يسوي بيك إذا ماشكك نصين
فلا يطلع زلمة حجي موسى
بلع ريجه اباوع الحنجرته مرتين بلع ريجه يعرف نفسه ماله شيء كدامي برغم هو أكبر مني بال٥ سنوات بس ليشوفه يگول أصغر مني انه ضخم
هو عمره ٢١ سنة وانه عمري ١٦ سنة .
رجع گال "
تشبه نفسك بجدي موسى ؟
_مو انه لشبهت هو الشبهني بي وگال هذا الشبل حفيد هذا الأسد بنص ديون والديون كله شيوخ
جان تذكر لو اذكرك بعد
_جديتك ساحرة جدي ومخليته مايشوف
غيرك أنت وابوك
_ابوي حاله من حال عمامي بس انه جدي
شيخني على صغيركم وجبيركم
عفط من مكانه رجعتها له بأبتسامة عريضة وگال "
باوع منو شيخ صاير علينا هجرس ولك
أنت خبيث خنيث
هجرس_ المهم شيخ فوك روسكم
راد يرد صاح بي جدي _ علاوي تعال هنا
علاوي_ هاا
راح علاوي التفتت وره ظهري شفت جدي وعمامي كلها ولد عمامي كلها تمشي وره دخلنا جوه البيت صاح جدي طلعوا نسوانه ونسوان عمامي
كلهن من ضمنهم قسمة وامي توهن راجعات من الحشيش والعبي ملفوفة على خصرهن اشرلي جدي اجيبله الكرسي يكعد بنص الصالة
رحت طاير جبتله الكرسي بلاستك خليته كدامه "
تفضل جدي
كعد وگال "دام فضلك
كعد ويباوع عليهن ابتسم وگال "
هجرس علاوي حسين رحوا غرفة عمكم جدوع وتلكون بدوشك الجرباية سحر
طلعوا وجيبوا لي
هجرس_تدلل جدي
حسين _سحر شنو ؟
هجرس_بلا كلام زايد سوي المطلوب
حسين _ ماشي جدي
جديتي حلوة _ عوذ بالله أنوب سحورة بنص
البيت وبغرف النسوان تنام
جديتي خديجة_ منو الخلاه تعرفه حجي ؟
جدي_ هو يطلع نفسه ماكو داعي احجي
هجرس مارحت للسحر انه سويت نفسي مااندله وخليت علاوي ابن خيرية هو طلعة وگال _اي جدي لكيناه هوينة ملفلف بنص دوشك
جدي_جيبوا
طلع علاوي طلعنه وراه شوفه للكل وگال "
هذا هو جدي شنسوي بي ؟
جديتي حلوة _جيبوا خل وملخ خشن
وماي ورد وصينية بسرعة
راحت قسمة بسرعة جابت ملح خشن وخل وماي ورد وصينية كعد علاوي دارت على ادينه خل غسل ادينه وفرك ملح بيديه صار يفتح بالسحر
رفعت عيني باوعت على خيرية وسراب وحدة بصف الثانية واكفات وميتات من الخوف والكل تتهامس ماتكدر تحجي كلمة كدام جدي
قربت على السحر مرسوم رسومات وطلاسم وصورة عمي جدوع ومرته قسمة مشكوكه بالنص وقفل مقفولة ومكتوب بخط أحمر العجل العجل الفراق بين جدوع ابن خديجة وقسمة بت سلمى
هجرس_سحر فراق بين عمي ومرته قسمة
جدي_منو منجن سوته ؟
جدوع _يااا ساقطة سوت هذا العمل الشيطاني؟
قسمة_حسبي الله ونعم الوكيل بيها لسوته
ام فرقد _بيش طالبات المرة والرجال حسبي
الله ونعم الوكيل بيجن
جدي_ منو سوته تطلع نفسها لو اطلعها بنفسي
ويصير مصيرها الطلاق
سراب كمزت وگالت "
خيرية سوته عمي
خيرية صاحت من مكانها "
هي سوته عمي وتذبها براسي
جدي_ سالم ... فواز أخذوا نسوانكم
ادبوهن لما ادز على اهلهن
خيرية_ مروتك عمي انه مامسوية
شيء هاي سراب
سراب_جذابة بالقرأن هي سوته مالي دخل عمي
هجرس_ماسمعتوا كلام جدي اخذوهن
ادبوهن لما ندز طارش لاهلهن
ونعلمهم بتصرفات بناتهم
عمي سالم جر خيرية من شعرها من فوك الحجاب ودخلها للغرفة سراب كذلك دخلوا بيهن للغرفة
نسمع اعياط وصراخ محد تدخل
بقيت مبتسم جدي گال "
أخذوا وبالليل شروا على نجوم حتى
ضوه النجوم يفسده
جدي_ عباس روح علم اهلهن واريدهم بالليل لعندي
عباس_صار جدي
جدي_ اسمعوا من صغيركم الجبيركم اي شخص بيكم يعصي الله لو يعصاني ويرتكب معصية لو يفكر يأذيه شخص من هاي العائلة مايلوم إلا نفسه .
كام وگال "
حلوة حظريلي الحمام اريد اسبح
جديتي حلوة_صار حجي
صارت بلبله بالبيت من وراهن وهن يعيطن ويصيحن لحد الأن محد تدخل ودافع الهن نص ساعة طلعوا
عمامي عيونهم براسهم صايرين
وعتذروا من عمي جدوع ومرته قسمة رحت كعدت فوك الدرج أراقب تحركات الكل صارت كدام عيوني حنونه لابسة دشداشة كشمير نص ردان
وشادة شعرها كصايب ظافرتهن تباوعلي وتضحك رجعت الضحكة لها كلما تمشي خطوة تاخذلي قلبي
وعقلي وتخليني انهد بطولي
برغم بعدها طفلة وعمرها ١١ سنة .
بالليل صار اجتماع طارئ بأهل خيرية وسراب امه خيرية ماجاية لأن تعرف نفسها المذنبة وجدي گال هذا آخر سماح الهن اما المرة الثانية
الطلاق واشهرهن بالمنطقة كلها خيرية وامها وخالها وسراب وياهم يشتغلون بالسحر والشعوذة ' الكل مصدوم شلون عرف بيهن جدي
مسويات سحر مرت على السالفة أشهر وصارن خوش ادميات كلما أحاول انفرد بحنونه تجي عمتي قسمة تتعارك وياي وتطردني من البيت
المغرب جرتني وره البيت تحجي بكيفها وانه منطيها أذان الطرش آخر شيء تعصبت وجرتني من تيشيرتي
قوي و الحلو انه اطول منها
لزمت ايدها قوي وجريتها عن ملابسي ولويتها لها
" اكسر ايدج
هديت ايدها قوي وگتلها "
بتج اخذها ولا تخليني هسه اخلي
جدي ياخذها لي
_الله أكبر طفلة صغيرة
_أنتِ بعمرها نايمة بحضن عمي جدوع
_عززة العزاك تحجي حجي مال كبار
_ مو بعينج رجال
_آخر كلام عندي توخر حدر بتي لو احفر قبرك بايدي
_ بتج نحفر داير مدايرها وكعت بمغارتي
وانتظري الأيام اخذها منج
رفعت ايدها رادت تركعني راشدي بسرعة لزمت
ايدها ولويتها وخليتها وره ظهرها
هجرس_ اكسر ايدج قسيمة
دفعتها هناك وين وكعت بالكاع واشرت عليها بصبعي بتهديد " اخذها وغصبا على راسج
ورأس كل واحد مايرضى
قسمة_ادفنها ومانطيها لك هجرس
رجعت التفتت عليها وگتلها "
خلص كبرها نفتح بين ضلوعي وعن
قريب اطمرها بحضني
قسمة_هجررررس
هجرس_وجععع ينام بنص قلبج قسيمة
قسمة_بالقران مانطيها الك
هجرس_الأيام راح تثبت كلامج لو كلامي يمشي
عفتها وراي تحجي بكيفها مر أسبوع وجدي قرر يعزل لعمي سالم وعمي فواز وعمي خالد وعمي جاسم وگال ياهو ليعرس بعد اطلعه بيت الواحدة .
بعد ماكو واحد يعيش وياي غير جدوع و وائل فرحت حنونه راح تبقى كدام عيوني يوم يومين تلاث كدرت انفرد بحنونه بالبستان
وكفت بصفها جانت تباوعلي بخجل ابتسمت
بخباثة وگتلها
هجرس_شبيها حنونتي خجلانة؟
حنونه _ منك
هجرس _شبي وتخجلين مني ؟
حنونه_ممم مادري
هجرس_لازم تدرين ؟
حنونه_والله مادري فرقد
هجرس_الله عليج عيدي اسمي
حنونه_هاا
هجرس_عيدي اسمي حلو بالسانج فرقد أول مرة اسمعه منج وهيج طلع حلو وينكط
عسل يلا گولي فرقد
حنونه _فرقد
هجرس_اويلي عليك فرقد تعاي لعندي حنونه
بعدت عني انوب هي سمرة وخدودها نكلبوا طماطية حمرة صارت تكتل كتل قتربت منها بسرعة جريتها من زندها بسرعة وحضنتها وهاي اول
مرة بحياتي احضنها خجلت كلش ودفعتني "
عوفني فرقد هسه تجي أمي وتضربني
عوفني فرقد عوفني
حضنتها قوي من ودي ... افتح اضلوعي
واخليها بنص ضلوعي يم قلبي "
هجرس_ ولج مادري وين اضمج حنونه
حنونه_ كافي فرقد عوفني
هجرس_ دخليني مرتاح بقربج لي
حنونه _هسه تجي أمي عوفني عليك الله
صارت تدفع بي ماحبيت اضوجها بعدت عنها ولزمت وجهها بكفوف ايديني خدودها صاروا نار من الحرارة
والخجل اباوع بعيونها تباوع بالكاع
هجرس_باوعيلي حنونه
حنونه _كافي عوفني
هجرس_بس باوعيلي
حنونه _استحي
هجرس_خرررر... بالمستحاء باوعيلي خاطر الله
فزت من صحت بيها ورفعت رأسها باوعتلي عيونها مليانه دموع وجهها ينكط براءة
ابتسمت وگتلها
هجرس_تحبيني حنونه ؟
دنكت رأسها وخلت ايدها على ايدي وگالت "
عوفني فرقد هسه أمي تدور عليًّ
هجرس_عوفيني من امج وگليلي تحبيني ؟
حنونه _ شنو ؟
هجرس_تحبيني مثل ماحبج ؟
باوعتلي بخجل وگالت "
ليش أنت تحبني ؟
هجرس_اي أحبج
حنونه _ليش تحبني ؟
هجرس_ من الله أموت عليج واحب الكاع لتمشين عليها حنونه گليلي أحبك ريحي قلبي ... حنونه يلا گولي احبك وخلي قلبي يرتاح
أبتسمت بخجل ودنكت رأسها انتظرها ترد نزلت ايديه وخليتهن فوك جتوفها "
هجرس_گولي أحبك هي كلمة من أربع حروف ؟
ماحسيت عليها غير حاضنتني بيديها الأثنين قوي وگالت"اي أحبك فرقد
من گالت أحبك حسيت نفسي طير وحلق بنص السماء قلبي صاير يخفق بسرعة بادلتها
الحضن وگتلها .
هجرس_وانه اموت عليج حنونة
فزينه اثنينه على صوت بنية گالت "
هلأ والله عشاك البساتين
بعدت عني خايفة التفتت وره ظهري شفت سلسبيل لابسه نفنوف أزرق قصير لحد الركبة نصردان شعرها قصير أسود وبشرتها بيضة
جاتفة ايديها وتخزر بينه...
كملوا عليش وكفتوا ؟
هجرس_ شسوين هنا ؟
سلسبيل _امج تدور عليج ام الحب والرومانسية
هجرس_انجبي ولا كلمة
سلسبيل _ اوووي شكد خايفة امشي ام الرومانسية امشي امج كلبت الدنيا عليج وأنتِ هنا جاي
استغفر الله امشييييي
حنونه شردت بسرعة وهي واكفة تخزر بي اخزر بيها ولا جن ماتخاف مني عينها صلفة كلش اقتربت
منها بعد ماختفت حنونة
هجرس_بس تجيبين طاري لشفتي توج
ماتلومين غير نفسج
سلسبيل _ ماتخجل على نفسك تواعد
بت عمك بنص البستان
هجرس_وليش اخجل؟
سلسبيل _ تلعب بعرضك
هجرس_ مالج دخل ويلا ولي منااااا
دفعتها بخفه ومشيت ماسمعت حسها بعد رحت للمضيف وره العشة كاعد فوك الدرج اباوع للرايح والجاي بحذر أراقب الكل
وكفت امي كدامي "
فرقد ماتبطل عادة المراقبة
هجرس_هذا شغلي
امي_شغلك مراقبة العائلة
هجرس_تدرين بي ماكو داعي اكعد افصلج صدك يمة سويلي كلاص حليب وراي قراية
امي_همزين فكرت بدراستك
هجرس_ انه شاطر بدروسي...
بسرعة يمة لا تتأخرين
راحت أمي طلعت من الغرفة سلسبيل عدها عادة من تمشي تكلب شعرها بيدها وانه بطبعي ماكعد راحة بقيت اباوعلها هي ناعمة كلش ليشوفها
يكول اللعابة بشرية مو آدمية بس ماحبها من الله لسانها طويل ومتبري منها مو مثل حنونة خجولة وطيوبة وترف مثل الورد والياسمين.
باوعتلي وتخوصرت ...
شكو تباوعلي هجرس ؟
هجرس_ادري الله خالقج لعابة لو آدمية
ابتسمت بخجل ودنكت رأسها ومشت بسرعة من يمي ماعرف وين راحت بيقت اضحك وي روحي هاي شبيها خجلت وفلتت من يمي
وين راح السانها الطويل عجيب أمرها كلمة حلوة خجلت ام لسان الطويل شرشبيل ههههه اجت امي جايبتلي كلاص حليب
أخذته من ايدها وصعدت فوك بغرفتي اقرأ بقيت اقرأ لحد الساعة بال ١ ونص بالليل وراها لفيت
رأسي ونمت كعدت عالساعة بال٦
نزلت تريكت وصعدت بدلت وكعدت اقرأ كملت اقراية نزلت شفت حنونه والبنات مبدلات يردن يروحن للمدرسة شافتني قسيمة
وگالت " يمة علاوي وصل اخواتك
وبنات عمك للمدرسة
طلع علاوي "
صار عمة يلا امشوا
اخذهن وطلع بقيت أمشي واباوع لحنونه طلعت من بيت اهلها سلسبيل كالعادة حجاب ماكو لبس
مستور ماكو لابسة قميص نصردان
وتنوره قصيرة لحد الركبة والشعر مفتوح ومخليه قراصة صفح على شكل فراشة من شافتني
أبتسمت بخجل رديتلها الإبتسامة
رحنا مشي للمدرسة مدرستي أبعد من مدرستهن طول الطريق انظاري لحنونه وهي انظارها عليًّ حسيت سلسبيل تباوعلي وتتبسم ماعرف
شبيها هالبنية .؟
المهم مرت الأيام واحنه نروح .... ونرجع للمدرسة إنتهى الدوام ونجحت رحت لصف السادس علمي قررت اقرأ زين وطلع معدل بال٧٠ وفوك أريد
ادخل كلية الشرطة واحقق حلمي وحلم
جدي ربي يحفظه لي '
بوقتها الظهر مسوين فوك السطح مكان وسقيفة وزارعين بيها متسلق وشتلات ورد مكان كلش حلو وهادئ دائما اكعد هناك اقرأ
لمحت سلسبيل فوك سطحهم استغربت هالبنية شبيها مرات تمشي وتحجي وي روحها مرات تكعد تبجي موضوعها حيرني عاد عفت الكتب
ورفعت ايدي لها شافتني أبتسمت وقتربت من حايط الستارة " شرشبيل تعال هنا
_شتريد هجرس ؟
_شسوين صاعدة فوك السطح بهل حر ؟
_لعد وأنت
_انه كاعد بنص البرد مو حار هههه
_اي مكانك حلو وبارد وكله راحة وسكينة
_اي تعاي إذا يعجبج
_حنونة تضربني هههه
_وليش تضربج
_تگول عني كراشة ههههه
_وصدك أنتِ كراشة
_لاوالله أبد
_لازم مكرشة عليها منا منا
_لاوالله أبد أبد خوب جم مرة لزمتها
وياك ماجبت طاري
_شعجب ماجبتي طاري ؟
_ماحب اصير ناقولة حجي ويعلكون عليًّ ام علوم
_اي صدك
_جاي تقرأ؟
_اي والله كومه دروس وسادس وتعرفين شكد صعب السادس ويرادله قراية يابو القراية
_الله يقويك وينطيك الصحة والعافية يارب
_وينطيج... صدك اسألج
_أسأل عيني
_تسلم عينج يابة .. ليش ماتحتشمين مثل البنات
_حتشام ؟
_اي لبسي حجاب ولبسي للبس حلو وطويل ومستور
_ماحب
_الستر حلو ومريود للبنية
_والقرآن ماحب صدك ماگلتلك راح تخلص مني هههه
_وأنتٓ شمسويتلي واخلص منج.
_اراقبك وي حنونه الزركة هههه
_وأنتِ حليب أبيض
_لا أني قمر مو حليب
_هو صدك تشبهين القمر بالليلة كمرية
لما الخبالات لبيج
_خلف الله عليك ساعة تتغزل وساعة تسب
_ايي وين المسبة بالموضوع شرشبيل
_ مو تگلي شرشبيل ومخبلة ؟
_وهاي حقيقة اسمج قريب لأسم شرشبيل وتحبين البزازين وعندج بزونة حمرة
_ابشرك ماتت البزونة
_لااا ليش ؟
_مادري كعدت الصبح لكيتها ميته
_بخيلة ماسويتي فاتحة
_ههههههه
_ گالولج قبل ضحكتج حلوة
_لاعليك الله صدك حلوة
_والله حلوة
_شكراً فرقد
_يالله گالت فرقد ههههه
_ههه خل اگلك شئ
_گولي يابة
_من اصيحك بأسمك الحقيقي فرقد معناها صرت قريب لقلبي وحبيتك ومن اصيحك هجرس
معناها اكرهك وصرت بعيد لقلبي
_وهاي لازم احفظها عنج
_اي احفظها لأن راح اتركك برغم ماشفت
منك شئ حلو غير الاذية
_ليش وين راح ترحين؟
_راح نشيل
_وين ؟
_البغداد
_شسوون بغداد
_بابا نقلوا لبغداد وعلمود شغله راح نشيل
_لا حرامات بعد ويامن اتعارك
_وي قسمة هههههههه
_موحلوة قسيمة مثلج
_شلون ؟
_أنتِ حلوة وجنج لعابة ومن اتعارك وياج افرح عاد لان تعاركت وي آدمية مو وي
شيطانة هههههه
_ هسه تسمعك
_هي وينها اخذت بناتها ولدها ولت لبيت أهلها
_وأنت استغليت الفرصة حنونة الزركة مو
هنا وتحجي وياي ؟
_وعاد شكد خايف منها احجي وي
اليعجبني انه.ومايهمني أحد
_فرقد
_عيوني الأثنين
_شنو هاااي ؟
_هههه شنو
_تتغزل بعدوتك
_منو گال عدوتي
_مو أنت گلت كدام حنونه أنتِ عدوتي مادام عدوة حنونه وتتعارك وياي ومرات تأذيني
_خبالات زايدة ذني
_ هو أنت مخبل مو صاحي أبد
_شلووون ؟
_مادري
_شلون ماتدرين وتگولين مخبل ؟
_ساعة تصير عسل وساعة تصير سم
_ هذا انه تحمليني
_وأني عليش احتملك ؟!
_إذا صرتي صديقتي مثلاً تحمليني
_بعد وقت اصير صديقتك
_ليش ؟
_مو راح اولي لبغداد
_اي عادي نبقى على تواصل إذا تحبين
_لاوالله ماحب
_ بعد بكيفج
بعدت خصله شعرها خلتها وره .... اذانها طلعت وجهها الجميل من اباوعلها ارتاح من الله برغم ماحبها بس طبيعية لساني يشمر كلام وغزل
للرايح والجاي مثل مايگول لساني مخادع ومكار مثل راعية بقيت صافن بيها صاحت بي "
_شبيك هجرس صافن بي مثل الواوي
من يصفن بالواحد
_هههه هيج
_ شنو هيج ؟
_تذكرت سالفة وأنتِ عبالج صافن بيج
_وهاي السالفة ماتذكرها إلا بوجهي ؟
_مو وجج حلو ويجيب شكو سالفة حلوة
_ دكافي
_شنو شبيج انزعجتي ؟
_من تحب الحلوات عليش حبيت حنين الزركة
_هو الحب لو ينحب بالعيون جانت حبينه كل الخلق الله بس الحب ينحب بالقلب والقلب مايميز بين
ازرك وابيض وأحمر واخضر
_للأسف قلبك مطي مايعرف يختار
_ولج لتشوفيني اخذت وانطيت وياج تصيرين
تجاوزين حدودج
_يمعود ياحدود هاي هو ليشوف وجه حنين جنه طاوة محتركة لا والحلو بي كيلو لحم هم يگول حبيت بنية بشرفك شفت منها وحبيتها
_طيبة قلبها خلتني أحبها
_متوهم فرقد حنين خبيثة كلش لايغرك مظهرها الخارجي وبساطة شكلها ترى حية سامة ويجي يوم وتلدغك وتسمك وسمها يكتلك وگول شرشبيل
گالت في أمان الله.
انطتني ظهرها مارديت عليها بقيت ساكت رجعت التفتت وگالت بضحكة " گالولك قبل عليك ابتسامة ساحرة وعيون مثل عيون الصقر
نظراتهم حادة وثاقبة ؟
ضحكت وگتلها "
لاوالله أول مرة بشر يگولها
_ماشي باي
_بايات لعابتي هههه
رجعت التفتت وگالت "
ليش تگول لعابتي ؟
_مادري لساني يگوم يشمر حجي غصب عني
_ضبه لعد
_ماكدر
_لسانك هم مثلك مخادع ومكار مثل الهجرس
_بالضبط
_ فرقد
_قلب فرقد
_وتالي ؟
_شنو
_تتغزل
_لاوالله هاي حجاياتي ويه الكل مو بس وياج
_ماشي بعد خمس أيام نشيل أتمنى تصير زين وياي علمود اخلي ذكريات حلوة عنك
اتذكرها بالمستقبل
_صار تدللين لعابتي
_شكراً
_على شنو ؟
_على حجاياتك الحلوة
_ لعابتي تعال لترحيين
_شتريد ؟
_عندج هواي هموم وحجي داخل قلبج مو صح
_اي
_ شنو موضوعه ؟
_بصفتك منو وتريد تعرف ؟
_اممم بصفتي صديق
_للأسف مو كل صديق نحجيله لبقلبنه باي
عافتني وراحت ماعرف ليش اجتني طاقة سلبية منها وحسيت بلي جاي تحس بي قلبي انقبض عليها برغم ماهتم لها ولاحد ثاني غير حنونه
وأمي هم مرات مابين لأمي حباب وطيوب ابين كدامها قوي وماهتم لها المهم رجعت اقرأ كملت وعفت كتبي ونزلت لكيت أمي متعاركة وي أبوي
وتبجي سألت خيرية "
عليش متعاركين ؟
خيرية_شدراني روح اسألهم
عافتني ومشت هاي شبيها ؟ رحت يم أمي بالغرفة دخلت وسديت الباب " شبي أبوي وياج؟
_تقبل يگلي مابيج خلفة خلفتي فرقد
وحلتي عليه وهسه يريد يتزوج
_اي خل يتزوج
_فرقد شنو تگول خل يتزوج ؟
_الرجال يريد خلفة عليش لازمته خلي يتزوج
_فرقد لا تخليني افقد اعصابي
_يمة ترى صدك حقه صارلج 18سنة ماكو خلفة خلفتيني وكطعتي بعد خل يتزوج ويخلف
شعليج بي واكفه بنص طريقه
كامت بوجي جانت تبجي جرتني باثنين اديها من تيشيرتي وصاحت بنص وجي "
_ هيج تجازي امك فرقد تريد ابوك يتزوج عليها مرة ثانية ليش ولك مو أني أمك ليش
ضربتني راشدي والراشدي الثاني نزلقت للكاع يم رجليه وتبجي وتصرخ "أني بت المدينة تزوجت ابوك ابن الريف عمري ١٢ سنة جنت مدللة عند
أهلي وعايشة مثل الاميرات اجيت هنا بعدني عروس جديدة طلعت للحلال وصرت احلب الهوش واعلف الغنم واحش الحشيش وانظف
مكان الحلال وعفت كلشي وعودت نفسي على كلشي في سبيل أبوك واهله يقبلون عني هيج يجازيني يريد يتزوج عليًّ ويگلي تردين تمشين
لبيت اهلج امشي وعوفيلي هجرس هاي
جزاتي انهان وانذل ' ويگلي اطلكج وامشمرج على اهلج علمود الخلفة ليش أنت موخلفة
ليش مو خلفتله زلمة يعادل عشر زلم ليش هيج يسوي حسبي الله ونعم الوكيل بيك ان شاءالله ماتشوف الخلفة بعينك ولا تتهنى بحياتك
على السويته بي .
نزلت لعدها _كافي يمة لتعذبين نفسج
_بعد عني هم نفس ابوك طلعت نذل واناني بعددد
_يمة شبيج تخبلتي ؟
_لا تلزمني اتنكس منك انت جرثة ابوك النذل الخاين قليل الأصل والله العظيم مابقى ثانية وحدة بهذا
البيت هسه اتصل باخواني يجون
يأخذوني أني أبقى على رجال مايقدرني ولايحترمني لاوالله اطلك واتزوج زينة
زلم العشيرة وعلى عنادك
_يمة صدك تحجين وين ترحين وتعوفيني ؟
_اعوفك لابوك مو تريده يتزوج ويخلف ابقى يم ابوك حزام ظهرك أني امك مابي حزام
ظهر بعد عني
_يمة تعوذي الشيطان انه الصالحج گلتلج خلي
يتزوج بس بشروط
_وخررر عنيييي
_يمة بس اكعدي خل افهمج
_شتفهمني هجرس شتفهمني ابوك راح يتزوج وتريدني اهدي واتفهم الموضوع شلون اتفهم شلون ياربي انهجم بيتي انهجم .
ياربي ليش هيج هجمت بيتي رجلي صارله 18 سنة ماجايب طاري الزواج والخلفة هسه خليته يفكر
يتزوج ويتركني ليييش ربي
شسويت ويااك ليش هيج تجازيني ليش؟
_الله جاي يختبر صبرج يمة تحملي
الخاطري مو خاطر احد
_لا تحمل الخاطرك ولا خاطر احد
_يمة انه ابنج و حزام ظهرج ولمتج وكت كبرتج لا تتخلين عني وترحين منورة أبوي
_أنت لو تريد أمك جان وكفت وياها وخليت جدك يقنع مايزوجه مو جاي تگلي خل يتزوج
_هو جدي متزوج ثلاث نسوان أنوب ترديه مايخلي ابوي يتزوج الثانية ويخلف يمة هم مقررين من زمان
يزوجون أبوي والحجي مابي
فايدة اطلبي منه يسجل قطعة أرض بأسمج وخل يتزوج اضمني مستقبلج ومستقبلي مو تهدين لبيت
وترحين تالي عمرج ؟
لا أول وحدة زوجها يتزوج عليها ولا آخر وحدة
_لا تحلم أبقى بهذا البيت بعد ساعة وحدة أنت لابوك ضل وخادم لجدك وعمامك حسبي الله ونعم
الوكيل بيكم كلكم
_يمة انه ابنج لا تعوفيني وترحين منو لي غيرج
_ طزز بيك لو بيك خير جان وكفت بوجه أبوك علمود أمك بس للاسف وكفت بوجه امك علمود ترضي أبوك ياحسافة بيك 18سنة تعب تفووو
عليك وعلى ابوك وعلى الساعة الشوفتني ياكم .
دفعتني وكعدت تلم بغراضها بقيت اتوسل بيها ماتعوفني وتروح تبقى الخاطري تدري محد يحبني بهذا لبيت غير جدي وجديتي حلوة
حتى أبوي مايحبني ومايهتم لي بس تتركني وتروح راح تاكلني الوحوش ماخليت بست رأسها والديها ونزلت لرجليها حتى بجيت علمود
ماتتركني جانت عناد وراسها يابس دخل ابوي صرت اتوسل بي گال طبها طب تسوي فضل تروح لبيت اهلها باجر اروح اخطب مرة
تعاركت وي ابوي ضربني وطلع رحت لأمي هم ضربتني وگالت حالك من حال أبوك مابقى علمود ولد اني اروح لبيت اهلي وأشوف حياتي
واخلف بعدني صغيرة والحياة كدامي عليمن باقية بهذا لبيت اخدم الخر.... عجزت من الكلام وياها دخلت جديتي حلوة حجت وياها ماكو
قافلة تدخل جدي هم قافلة گالت اريد طلاق
مابقى بعد بهذا لبيت "
جدي_وابنج منو له مافكرتي بي
امي_ واني منو لي مافكرتوا بي
هجرس_انه الج يمة
امي_مابيك حزام الظهر حالك من حال ابوك باجر تزوج وتاخذ مرتك وتولي مابقى مابقى طلكوني طلكوني ودوني لبيت اهلي لو احرك روحي
جدي_ طلكها وائل .. جاسم رجب ودوها لبيت أهلها
هجرس_لااا عوفوا امي وين مودينها ... يمة عليج الله ابقي علمودي يمة لا تكطعين بي يمة ماعندي غيرج يمة لا ترحين اروحلج فدوة لا ترحين
صرت ابوس بيها دفعتني عنها وگالت "
لااعرفك ولا تعرفني ودوني لأهلي
صحت بيها "
انا ابنج يممممممة
امي_ماعندي خلفة
هجرس_ لعد انه شنو موخلفتج لتعبتي بيها ؟
امي_ لاا ماعندي يلا ودوني الأهلي
عفتها وصعدت فوك لغرفتي طبكت الباب وكعدت وراه ابجي زلمة شكبرني وشكدني فراق أمي كسر بي وذلني صار الليل ومحد اجه وسأل عني
متت لو عشت لو سويت شيء بروحي كاعد فوك الجرباية ومخلي رأسي بين رجليه وتذكر كلام أمي
اندك الباب صحت بعصاب
هجرس_منو ؟
سلسبيل_أني افتحلي
هجرس_شتردين ؟
سلسبيل_اشوفك
هجرس_روحي سلسبيل
سلسبيل_ماروح والله افتحلي خل اشوفك
هجرس_وتالي وياج شتردين مني ؟
سلسبيل _بس اشوفك
كمت فتحت الباب الها باوعتلي بنظرات الحزن "
عادي اطب ؟
هجرس _تفضلي
دخلت وسديت الباب بقت واكفه تباوعلي "
شلونك ؟
_شلوني موزين
_گالتلي جديتي حلوة حاكر نفسك
بالغرفة واجيت اطمن عليك
_محد منهم كلف نفسه واجه يسأل
عني غيرج أنتِ؟
_ليحبك يذكرك بشد أيامك
_قصدج محد يحبني؟
_لو يحبوك صدك جان اجوي سألوا عليك وساندوك وكفوا وياك مو عافوك الواحدك وجاي
يجهزون لخطوبة ابوك
_حنونه وين؟
_عجيب امرك تسأل عنها وهي ماكلفت
نفسها وسألت عنك
_مالج دخل
_صدك شعلي بس اجيت اگلك إذا تعتاز
شي أني موجودة وعتبرني صديقة
_الله لايعوزني لأحد
_يجي يوم وتعتازني بي تفضل
مدت أيدها وانطتني اسوار من خرز أسود "
هاي شنو ؟
_أني سويته الك ؟
_وانه بنية تنطيني اسوار خرز
_ لاتلبسه بس خلي ذكرى مني
_وأني شفت منج علمود اذكرج ؟
_تذكر هاي لحظة اجيت وسألت عنك
برغم محد كلف نفسه وسأل
عنك تفضل أخذها
ماحبيت افشلها أخذتها وگتلها "
شكراً
تفاجأت من حضنتني قوي بقيت مصدوم من فعلتها بعدت عني وگالت " شوكت ماتعتازني تلكاني
واكفة وياك ماوصيك على نفسك
دير بالك على نفسك زين ولا تخلي أحد لا ياخذ حقك وامك راحت الله وياها عتمد على نفسك ولا تعتمد على أحد في أمان الله
طلعت بقيت مصدوم منها رجعت گالت "
فرقد الأيام لتمر بيها شديدة وصعبة عليك بس تأكد الله أرحم وأحن وراح يخلصك منهن
ابتسمت بوجي وراحت بعد ماشفتها بقيت أفكر بكلامها لو يحبوني صدك جان اجوي وسألوا عني قتربت مديت رأسي شفت الكل كاعد وفرحان
مثل مگالت شفت حنونه تضحك ويه بنات عمي وياكلون جكليت شنو جاي يحتفلون بطلاق أمي وزواج أبوي هاي حنونه ليش ماجت وسألت عني
مو تگول انه حبيبها '
طلعت من شرودي على صوت سلسبيل التفتت عليها جانت تضحك " ابوك راح يتزوج اخت قسمة الارملة شوف كلها فرحانة لطلاق امك اولهم حبيبتك
حنونه الزركة
مارديت رجعت گالت "
هذا آخر لقاء لي وياك ماظن راح اكدر أشوفك بعد واحجي وياك لذلك اگلك أني...
سكتت گتلها " أنتِ شنو ؟
حسيت بيها ترددت وگالت "
ماكو داعي اگولها.. بس اگلك سمارك بايك ملوحة الشبان ...
#آلَـبِـارت_آلَثّآنِيِّ
فتحت عيوني على وسعهن مصدوم تتغزل بي سلسبيل طكتها بضحكة ونزلت تركض فوك الدرج قتربت بسرعة يم المحجر اباوعلها وكفت بداية
الدرج رفعت راسها باوعتلي كلبت شعرها بيدها ومشت راحت كعدت بصف جديتي حلوة وكل
ساع ترفع رأسها وتباوعلي
الحلو بيها لطافتها وبراءتها وجمالها جنها لعابة مليت انتظر شخص من أهلي يسأل عني لو يطمني
بكلمة بخصوص رجعوع أمي
ماكو أحد رحت لغرفتي كعدت فوك الجرباية ابجي ضميت رأسي بين رجليه وحسيت شخص خلى ايده على جتفي جانت ايده ثكيله
كلش وحارة رفعت رأسي بسرعة التفتت وره ظهري ماكو شيء ماشفت شي طفرت من فوك الجرباية اباوع برجاء الغرفة
أريد اشوف هذا الشخص ماكو تجمدد بمكاني من سمعت صوت بأذاني يهمس مثل فحيح الأفاعي
" رجعها هجرس
صار صفير قوي باذاناتي اثنينهن حسيت راسي راح ينفجر وصار ألم موطبيعي غطيت اذاناتي باثنين ايديه ورصيت عليهم كل قوتي
كعدت على اركبي اصيح على أمي تجي تنقذني منه "
يمممة الحكيلييي ولج يمممة الحكيللي
كل صرخة تطلع ....من أعماق قلبي جسمي كله صار يرجف مثل السعفة وألم البراسي موطبيعي أبد وبعدني اسمع الصفير عبالك صفير الموت
انفتح باب غرفتي والكل صارت عندي فتحت عيوني اللي كلهن دموع شفت بوجهي أبوي نزل
لعندي خايف مرعوب
ابوي_هجرس شبيك يابة
هجرس _اريد امي ااخخ
الصفير زاد بأذاني ماتحملت لزمت ابوي باثنين ايديه وصحت بعلوا صوتي فجأة أختفى الصفير وسمعت صوت هجرس يردد "رجعها هجرس' الكل
نخبصت بي
ماكدرت اتحمل الألم لصار براسي وفقدت الوعي بحضن ابوي فتحت عيوني على صوت جدي موسى " فرقد جدي اكعد فرقد يلا اكعد جدي اكعد
فتحت عيوني بتعب أول مافتحت عيوني ماشفت شي غير الغواش رجعت سديتهم وفتحتهم وهم يگولون صحى صحى اول مافتحتهم
شفت سلسبيل كدامي واكفه بصف ابوها وتبجي حسيت شخص باس ظهر ايدي درت وجي شفت جدي موسى حالته حاله ابتسمت بخفة
وگلتله "
جدي أنت هنا ؟
جدي_ اي جدي يمك احجي شبيك
شجاج وتخربطت ؟
أبتسمت وباوعت للسكف "
هجرس ملاحكني
الكل كبت أول واحد صاح بي ابو سلسبيل "
الطنطل هجرس ؟
ابوي_شتگول ؟
جديتي حلوة_ وين شفته ؟
جدي _ فرقد لتهلوس گول متأثر بروحة
أمك وتريدها ترجع
هجرس _بكيفك لا تصدك هجرس يريدني ارجع...
جدي_كااافي هجرس كافي مليت ترى
ابوي_خلص أنسى امك وعتبرها ماتت
ختنكت صرت اكح بصوت عالي كعدت فوك الفراش اكح وجديتي حلوة تضرب على ظهري وسلسبيل
جابتلي كلاص ماي
سلسبيل _هاك اشرب ... افتح حلككك راح تموووت
رادت تشربني بنفسها اخذته من أيدها شمرته بعيد تكسر الكلاص وصحت بيهم " اطلعووا برره عوفوننننيي
نهاريت خطية خافت مني وصارت تبجي وره ابوها تخبلت خبال ابوي قترب مني دفعت ابوي وطلعت خارج الغرفة ماعرف وين انطي وجي
وراسي بعده يوجعني وبعدني دايخ الكل وراي تصيح توني نزلت جم باية من الدرج وكعت من فوك الدرج تدعبلت دعبل عظم مابقى بي صاحي
صرت بالكاع لزمت جسمي كله بألم واصيح على امي اريدها معتاز امي الكل نخبص بي شالني عمي فواز بحضنه وركض بي للمستشفى
طول الطريق ابوي يحجي على امي وجدي موسى يشتم عليًّ وصلنا المستشفى كشف عليًّ الدكتور واخذلي أشعة كلشي مابي طلع
بس ترضرض طلعت من المستشفى نفس الحالة طول الطريق اكل رزايل من جدي موسى وعمامي ابوي ساكت كلمة ماطلع
هجرس_كافي اسكتوا لعبتوا نفسي
جدي _ انجببب موتتني شلعت قلبي رجال شكبرك وشكد تبجي وره امك الحقيرة لو تريدك جان بقت يمك مو عافتك وراحت تدور رجال
يداوي دودتها حيووووان انجببببب لتبجي هجرس ماريد اشوف دموعك كافيييي
قرأ بي التوبة جدي بالسيارة فوك الألم لبي اكل كتله كل مايضرب اصير ابجي مثل الجهال آخر شي صاح بي ابوي "عوفه يابة نهيته من الضرب
جدي _ماريده يصير عار ومثل النسوان اريده زلمة ماريد اشوف دموعه اموتك هجرس بس اشوف
دموعك نازله افتهمت
عمي فواز _خاطر الله عوفه يابة خطية الولد
جدي_هجرس ماريد اشوف دموعك كافي
امسحهم واضحك يلا امسحهم
بلعت ريجي ومسحت دموعي برغم الألم لبي موطبيعي راح اموت باوعتله
وضحكت بوجه "
هجرس _هيج
جدي _اي هيج عفية عليك
ساعة ونص يلا وصلنا للبيت الكل طلع يطمن عليًّ باوع بوجههم بضحكة عيوني تدور على سلسبيل خطية رعبتها مالكيتها لاهي ولا اهلها
ولا لكيت حنونه حبيبتي مالها طك ردت اصعد فوك غرفتي ماخلاني جدي موسى وگال روح نام يم جديتك حلوة عاد رحت نمت
يمها فوك الجرباية تمددت بطولي تبوس براسي "
بي ولابيك فرقد ... الله لاينطي امك وابوك راح يضيعوك منورة عنادهم ... لا تهتم انه اصير ابوك وأمك واختك واخوك وكلشي تريد اصير
نزلوا دموعي وگتلها "
ماريد شيء بس اريد امي فدوة رحتلج جدة روحي رجعيها علمودي مو علمود ابوي
حضنتني قوي وگالت "
اروحلها باجر
_والله
_اي والله اروحلها وان شاء الله تسمع مني وترجع
_ترجع هي تحبني
_اي تحبك
حضنت جديتي والليل كله ابجي متت من الخوف هجرس ماخلاني انام بس يهمس بأذاني رجعها رجعها هجرس كلشي مافهمت شرجع
ماصحت ولا كلت لأحد هجرس ملاحكني بقيت ساكت ثاني يوم صبح راحت جديتي لبيت اهل امي بقيت انتظرها بره فوك الشارع
على امل ترجع وترجع وياها امي بس للأسف رجعت جديتي الواحدها وگالت " أنسى امك فرقد انه امك من اليوم خلص عتبرها ماتت
نزلوا دموعي مسحتهم بسرعة وگتلها "
شگالتلج ؟
_گالت ماعندي ولد اسمه فرقد
_ گليلها اسمه هجرس هي ترجع
_گتلها گالت ماعندي خلفة وراح ازوج بعد ماكمل العدة امشي اسبح راح نروح فدشوي خطابة لأبوك ماريد تسوي شي وتخليهم يتعصبون
ويضربوك يلا جده امشي
تعوذت الشيطان ومشيت وياها سبحت برغم مابي حيل اسبح جسمي كله يوجعني باوعت عليه بالمراية كله كدمات زركة أثر الوكعة
بدلت وطلعت خلتلي عطر جديتي حلوة بقيت اضحك دخل ابوي شافني اضحك ضحك وقترب مني لزمني من جتوفي الاثنين وگال
ابوي_ايي هيج اريدك زلمة وماتهتم لفراق النسوان
هجرس_عد عيناك يابة
ابوي_ يلا امشي اصعد وياي اريد اتباهة بيك
ابتسمت بوجه أبوي وطلعت كابلني جدي موسى جرني من ايدي يباوعلي من فوك لجوه يفحص شكلي مايحب يشوفني مبهذل يگول
أنت نسختي الثانية
ولازم ماتطلع مبهذل كدام العربان باسني من خدي وگال " اريدك ترجع تراقب الكل
_تدلل
مد ايده بجيبه وطلع سفطة فلوس كلها حمرة وخظرة وخلاهن بيدي وگال "
هاي الك خرجية
اخذتهن وبست ايده وراسه كدام الكل الكل شبت بيهم النار المهم طلعت حنونه لابسة حجاب وفستان طويل اويلي اخذتلي عقلي وقلبي صار
يدك دمام عليها ضحكت بوجهي غمزت الها عين وراها طلعت بره بالمضيف انتظر الكل تكمل علمود نطلع لمحت سلسبيل لابسة فستان أحمر
قصير جوه الركبة نصردان واكفة كبال شتله الورد البيضة وتحوش " تقطف " ورد صحت بيها فزت وكعت من ايدها الوردة بالكاع
هجرس_جاي تسوين ؟
التفتت عليًّ وعساها ماملتفته جانت مخليه مكياج وهي منا حلوة وتكتل كتل صايرة جنها لعابة طبق الأصل عيونها كلهن دموع
هجرس_ ليش تحوشين الورد ؟
سلسبيل_ شلون صرت ؟
هجرس_ لتغيرين الموضوع ورد
الحديقة خط أحمر
سلسبيل _ گلت لجدي موسى وگال حوشي
هجرس_ ماشي لعد انزلي اخذيها
سلسبيل _ماريدها بعد
طلعت من الحديقة تبجي هاي شبيها زعلت ؟ ماهتميت الامرها وره مدة اجوي رحنا خطاب على اخت قسمة الارملة ما مخلفة رجلها ميت على
سبعة بقتل إرهابي طلعت العروس باوعتلها من فوك ليجوه بدل ابوي موحلوة أبد وجكمة نسخة
ثانية من اختها قسمة زركة
وكعت عيوني على سلسبيل .كاعدة بصف ابوها وتشرب عصير برقة اوووي شلون نازكة بت الكلب
رجعت باوعت على حنونه
تأكل كعك جنها هايشة وتجرش جرش هي وشلتها رجعت باوعت سلسبيل تاكل بنزاكة ردت اطم نفسي هاي حنونه ماتعلمت اداب الاكل من امها .
المهم قروا الفاتحة وكطعوا مهر نفس اليوم وحددوا موعد العرس بعد ١٠ أيام عيوني ماشلتهم عن سلسبيل رجع ابوها باسها بخدها
المدللة مالته عنده أربع ولد وبس هاي البنية روحة من الدنيا مايرفض الها طلب مثل حظي وانا هم واحيد امي وابوي ويدكوني بالنعال هي حظوظ
بعد وكلمن وحظه وقسمته ونصيبه بهاي الدنيا.
المهم طلعت بره شفت سلسبيل واكفه يم ولد خال حنونه مادري ليش حسيت بالغيرة ونار وشتعلت بصدري طلعت حنونه تاكل جكليت
لعبت نفسي صحت بيها "
اكلي عدل من طيح الله حظج
حنونه _شبيك ؟
هجرس_اشمريها من حلكج من امداج وامده امج وياج ماعلمتج آداب الاكل تاكلين مثل البهائم دخلي جوه غسلي حلكج خررر بيج لعبتي نفسي
دخلت جوه تركض هي وشلتها رجعت خزرت سلسبيل ماهتمت لي بقت تحجي ويه الولد وهم يضحكون وياها مامصدكين وحدة حلوة وجنها
لعابة تضحك وياهم برغم صغر سنهم بس ملاعين وملعبين ويعرفون كلشي عبالك كبار مو جهال بقيت مركز انظاري عليهم اجتني قسمة
تلعلع "
ولك هجيرس شعليك بحنونة
صحت بيها من مكانها "
اوكفي حدج قسيمة " قبل لاتحجين وتعاتبين روحي علمي بناتج آداب الأكل بتج تاكل اكل مثل البهائم لعبت نفسي خررر.. بتربيتج اريد
قسمة_ هجيرس الزم حدك لو بالقرأن اسوي
فرجة الأمه محمد
هجرس_اخر همي فرجتج جري منا مالي خلكج
طلع جدي صاح " هاي شكو ؟
سبقتها بالكلام "
زلمتك جاية عليًّ النسوان تريد تسوي فرجة لأمه محمد تقبلها جدي
قسمة_ عمي تقبلها يغلط على حنونة
جدي _ جري منا حسابي وياج بالبيت
قسمة_عم....
هجرس_جري منا ماتسمعين كدام جدي
خزرتني ومشت متحلفة بي اخر همي قترب مني جدي وخلى ايده على جتفي وگال
" شكو شصاير ؟
هجرس_بتها تاكل مثل البهائم لعبت نفسي شسوي انه نفسي بسرعة تلعب من شخص گتلها روحي غسلي حلكج واكلي عدل هاي رايحة
لامه ومسويتها دراما براس هجرس
المسكين الك يالله يالفقير
جدي _انه اعلمها هي وبتها يلا امشي
دخل جوه يسألون عليك
هجرس_سلسبيل فوتي جوه
بقت تباوعلي مستغربة رجعت صحت بيها "
فوتي جوه شسوين طالعة الوحدج وبنص
الزلم فوتي جوووه
جدي _ فوتي جوه ماتسمعين الكلام أنتِ
فزت من صاح بيها جدي موسى وفاتت من يمنى تركض جدي موسى خلى ايديه وره ظهره ونفخ صدرة وصار يمشي وانا هم قلته ودخلت ويا
كعدت بصفه واقلد كل حركة يسويها '
رجعنا للبيت سلسبيل ويانه اجت هي وامها يحجون بموضوع الخطبة بدلت وكعدت فوك الدرج كامت سلسبيل اجت كدامي وكفت تخزر بي
سلسبيل _بصفتك منو تصيح عليًّ ؟
هجرس_ شكو شبيج ؟
سلسبيل_شكو تصيح عليًّ مناك الجهال ؟
هجرس _زحمة لعابتي تكابل الزلم
سلسبيل _شنو لعابتك لازم حدك لا تشوفني اضحك وياك معناها انطيتك الحرية المطلقة آخر مرة تصيح عليًّ اسمع هجرس من اليوم لا اعرفك ولا تعرفني
هجرس_ ليش لعابتي متعصبة ؟
سلسبيل _راح اضربك بالقرأن لتگول
لعابتي اكره هالكلمة منك صرت
هجرس_طيب ليش ؟
سلسبيل_لأنك شخص استغلالي وماكر مثل الثعلب
هجرس_ وهذا انه هجرس
سلسبيل _ اكرهك هجرس
هجرس_ هي بقت عليج ماتكرهيني اكرهيني يابة
سلسبيل _ أبقى مضحكة حنونة الزركة
هجرس_وأنتِ هاي لكاتلتج أحب حنونة الزركة ؟
سلسبيل _طبك مرض أنت وياها ماتهموني المهم عندي اولي من ديالى وانسى شكولاتك
وشكولات حنونة
هجرس_لهل درجة شكولاتنه ضاغطتج ؟
سلسبيل _مو ضاغطني مدوختني بالقرأن
هجرس_جري من يمي مالي خلكج
سلسبيل _ولا أني الي خلكك وخلك وجك الاملاح
هجرس_ املح وملوحتي مدوختج ههههه
سلسبيل _ولللي
هجرس _أنتِ ولي مو انه اولي يلا ولي منا وليي
سلسبيل _تسويني چلب هجرس؟
هجرس_وأنتِ گتيها
سلسبيل _وخل انطيك معلومة الچلب
صكار الهجرس باي
هجرس_اول مرة اشوف لعابة تصكر
زلمة املح ههههه
سلسبيل _يجي يوم واذكرك بيها فرقد
هجرس_صرت قريب إلى قلبج ههههههه
سلسبيل _الله ياخ... استغفر الله
الله يخليك ويحفظك
رادت تدعي عليًّ لزمت لسانها بسرعة ومشت حتى ماكعدت يم امها طلعت خارج البيت بقيت أبتسم هاي سوتها صدك وزعلت " مثل كل يوم تتعارك وترجع
تصالح وتتغزل اعرفها ترف وقلبها طيب "
سلسبيل" كلش ضجت من فرقد كل مرة يحجي عليًّ لو يرزلني لو ماينطيني عين وأني معندي شيء
والله نيتي نية صافية ..
ضحت كلش من صاح بي كدام الولد وحنونة الزركة كعدت تضحك عليًّ شبت النار بين ضلوعي المهم رجعنا للبيت واجهته ولا هامة وزعلت من
صدك ورحت على بيتنه طبيت لغرفتي بدلت ولفيت راسي بالغطة وكمت ابجي مقهورة ليش مايحبني ليش يصيح عليًّ ليش يحب حنونة ؟!
أني كلش زينة ويا واوكف ويا وشريد اسويله مو نفس حنونة تجاهله ولا يمها فرقد هاي بالسنة حسنة تجي يمه تضحك عليه بجم كلمة
وهي مايصدك بيها "
شبعت بجي من كيفي والصبح شحطت أغراضي شمرتهن بالسيارة وابوي وامي راحوا يودعون بيت جدي موسى وأني مارحت زعلانة
ماريد اشوف فرقد خوب قلبي طاك على شوفته راح نشيل لبغداد وبعد ماكدر اشوفه هو هذا الاريده اريد ابتعد علمود اكدر انساه لأن بعمره مراح
يحبني ولا يبادلني نفس المشاعر مشاعره وعواطفه كلها الحنين شكو اوكف بيناتهم بعد "
رجعوا اهلي قلبي صار يدك حيل ماعرف ليش ؟ خليت وصعدت فوك السطح على أمل اشوفه لكن للأسف ماشفته مجان موجودة
بقيت باوع لمكانه وعيوني يكدن دموع مسحت دموعي ونزلت رحت صعدت بالسيارة قبل أهلي اجوي اهلي واخوي جان يسوق
بقيت اباوع على بيت جدو موسى وابجي مانوقعت الفراق هيج صعب محد من اهلي حجه وياي عافوني ابجي طلعنا المنطقة قلبي كام يرجف
من القهر طلعنا محافظة ديالى شوي وكفت بجي وشربت ماي وصلنا بغداد محافظة جبيرة كلش وكلشي ماعرف بيها ؟! وماعرف شلون راح اكدر اتقألم بيها واكون صداقه جديدة
وأني صديقي الوحيد هجرس اللي مامعتبرني صديقه اله معتبرني وحدة مضحكة يكعد يضحك عليها وأني الغبية برغم اليسوي بي
يزعلني وارجعله صدك لو گالوا الچلب مايحب غير خناكة المهم وصلنا للبيت نزلنه الاغراض واجوي عائلة صديق ابوي بنية ولد الولد بعمري
جان بس يضحك وبشوش لدرجة أني ماهتميت اله رحت طبيت للبيت عزلوا الأغراض ويانه واجه الرجال جايب أكل من بره مدوا السفرة
بالاستقبال والكل كعد إلا أني ماكعدت ماشتهي اكل قلبي يبجي على افراق ديالى اريد بيتنه أريد ديالى اريد بيت جدي موسى اريد اتعارك ويه
فرقد ماكدر بدونه ماكدر .
مروا يومين طلعت بره شفت بنية سمينة تمشي وي ابوها وياهم دلشاد رحت يمهم حجيت شوي وطلع الرجال رسام معروف بالمنطقة وهاي بته
رحت ويا لبيتهم شفت اللوحات ورسومات تطير العقل من هذا اليوم البنية صارت صديقتي المقربة والولد دلشاد هم ابوها صرت اتردد الهم
كل يوم واكعد اتعلم الرسم من ابوها وهنا شوي شوي بديت اتعود على أجواء بغداد " الحمدلله والشكر خلال أيام قليلة كدرت اكون علاقات
وصداقات
رجعت العصر للبيت شفت ابوي كاعد يحجي وي عمو ايهم ويضحك قلبي كام يدك حيل اريد اسمع صوت فرقد مشتاقتله عاد خليت وطبيت جوه
بغرفتي وبالليل ابوي وداني لسوك اشتريت ملتزمات لرسم اريد اتعلم الرسم وانسى فرقد وانسى كلشي جنت احبه بديالى واحب شيء جديد
بغداد لأن أفضل الي .
المغرب طلعت مخنوكة خنك مشتاقه لفرقد ذبيت قهري بجهال المنطقة وتعاركت وياهم صرنا ملخ من الروس حتى ضربت الولد وضربوني
خلوا دمي بطولي اجه ابوي شافني هيج تخبل وطببني للبيت عالجوا جرح راسي واكلت رزاله كمت ابجي واشهك بصوت عالي مشتاقه لبيت
جدو موسى ' من هذا اليوم كمت كلما اطلع بره اتعارك وي جهال المنطقة عاد اهلي صاروا
مايخلوني اطلع يخافون عليًّ
هجرس والله مرت الأيام وسلسبيل العابة راحت إلى الأبد بعد ماكو لعابة اتغزل بيها لو اصيح عليها حتى ماجت ودعتني راحت زعلانة مني
ضجت كلش بهذا اليوم ماعرف ليش ؟ حسيت فراق جبير بداخلي صار مادري فراق أمي مدري خوفي
من هجرس ماجاي يحل عني .
صعدت فوك اقرأ وعيوني على سطح بيت سلسبيل متعود كل يوم تصعد فوك ماكو بعد قفلوا باب بيتهم ومشوا البغداد والمفاجاة الحلوة حنونة
صعدت لعندي تضحك "
هاا فرقد حبيبي
_اللهم صل على محمد وآل محمد اليوم القمر
منين طالع وصعتي لعندي ؟
_هههه أمي راحت لبيت جدي وستغليت الفرصة واجيت اشوفك مشتاقتلك
_تعاي لعد اكعدي بصفي
اجت بسرعة تضحك كعدت بصفي اباوعلها تضحك انوب خدودها مكلوبات طماطة حمرة أستغربت مديت ايدي على خدها جريته قوي
_هاي شبيهم خدودج
_اااه مكياج
جريت ايدي اباوع لروس اصابعي كلهن لون أحمر "
مورد خدود ؟
_اي
_وعليش ؟
_الك ههههه
_خررر... بيك عمي جدوع ههههه
_أحبك
_حبتج امج قسمة اكون عليش هالمكياج ؟
_مو كلت الك
_وانه شلي بالمكياج؟
_مو سمعت أمي تگول المره تخلي مكياج وتلبس ملابس للرجال علمود يحبها أكثر ويهتم بيها
_وأنتِ الفهيمة سويتي هيج
_ههه اي حلوة مو
_ههههه تشبهين عمتي سعدية
_فرقد شنو هاي تشبهني بعمتي سعدية
_مو خدوج مثل خدودها حمرة طماطية ههههه
لزمتني هستيريا مال ضحك هي زعلت وضربتني بخفه على صدري مرتين وكتفت ايديها
بزعل" بعد زعلت
_ههههه عليش
_كافي فرقد
_خررر... بيج وبلي گالج هذا المكياج يسويج حلوة امشي اغسلي وجج وتعاي ههههه
مااا
_ولج كومي راح تيبسين قلبي من الضحك ههههه
_فرقد ترى ازعل من صدك
_ازعلي بس كومي من يمي شكلج جنه
شكل عمتي.سعدية هههههه
سوتها صدك وكامت " انه اعلمك هجرس
راحت من يمي تركض نمت فوك الفراش خربان من الضحك نزلوا دموعي من شدة الضحك اريد اسكت ماكدر اسكت صرت اضرب بيدي بالكاع
من الضحك ههههه خررر.. بيج حنونه راح توكفين قلبي ااااخ يمة راح هههههه اف كافي هجرس ولك راح تموت
بشفعات ياعلي يلا كدرت الزم نفسي من الضحك مسحت دموعي ورجعت اقرأ صار المغرب فتحت عيوني بصدمة من سمعت صوت
هجرس رجع همس
بأذاني "هجرس ...رجعهاا "
كمت بسرعة اباوع برجاء المكان مالكيت شي عفت الكتب ونزلت ركض للبيت بوجي رحت كعدت بصف جديتي الجبيرة خديجة جانت تجر جكاير
_وجك مخطوف ؟
_الدنيا صارت المغرب ونزلت
_من شوكت تخاف من الغروب هجيرس
_من يوم سگيت هجرس وقلبي
مقبوض ماعرف ليش ؟
_ خوما تعرضلك هجرس ؟
_اي
_تحجي الصدك؟
_لتگولين بس
_ولك احجي شصار وياك ؟
_همس بأذاني رجعها هجرس ومن هذاك اليوم ملاحكني ومايعوفني بحال سبيلي
_رجع شنو ؟
_ماعرف جدة والله موتني وشالع قلبي بنص الليل يهمس باذاني رجعها رجعها
_أعوذ بالله بس لا مسك ويريد يتلبس بيك
_شنوو ؟
_ كوم وراي للغرفة لتحجي هنا الكاع
محظورة كوم جدة
طفت الجكارة بنفاضة وكامت كمت وراها دخلت غرفتها سديت الباب وراي كعدت بالكاع اشرتلي اكعد بصفها " تعال هجرس اكعد واحجيلي
كعدت بصفها خايف كلش من هجرس "
احجي جدة لتخاف
_جدة راح تساعديني ؟
_إذا انه ماساعدك منو يساعدك لعد جدة
_راح أثق بيج جدة واحجيلج كلشي صار وياي
بس لتگولين خلي بيناتنه
_من عيوني جدة احجي
_ گلتلج قبل من شفت شكله الحقيقي مو ؟
_اي گلتلي
_زين من رحنا سگينه الكاع انه وابوي وي المغرب ابوي طفر وعافني الوحدي اسگي الكاع هنا صار يهمس بأذاني رجعها هجرس رجعها
هجرس بقيت اقرأ
آية الكرسي مثل ماگتيلي قبل..
_اي كمل ؟
_من هذلك اليوم هو وراي ويصيح بأذاني رجعها هجرس رجعها هجرس ماعرف شنو قصده ؟ وشرجع وأصلا شماخذ منه علمود ارجعه له ؟
_متأكد من كلامك جدة ؟
_اي جدة متأكد
_ عوذ بالله من الشيطان الرجيم بسم الله الرحمن الرحيم أخذ نفس ورتاح ماكو شي ان شاءالله
_جدة راح يخبلني وأنتِ تگولين ماكو شي
_ ان شاءالله ماكو شيء باجر اخذك واوديك لبيت السيد خل يقرأ عليك وتصير زين بإذن الله
تعالى وبركاته السيد
_اذا يقرأ عليًّ السيد راح يروح مني هجرس ؟
_اي جدة يروح هو شيطان ملعون والكاع كاعه ومايقبل أحد يمس هاي الكاع وأنتو وجدكم عناد إلا تزرعون الكاع وهذا شيطان خطير وأخاف
يتلبسك لوتبقى هيج
_شنو يتلبسني ؟
_يتلبسك ويوسوس بعقلك ويخبلك
_هاي شلون جني يدخل بجسم الانسان ؟
_يدخل جدة أثناء خوفك منه
_جدة ماريد اتخبل وديني لبيت السيد
هسة كومي خل نروح للسيد
_لامايصير نروح هسة باجر العصر اوديك
_ماتحمل جدة
_هجرس هدي جدة ولتخاف هسة يجي
جدك واگله وخل يأخذك للسيد
_أنتِ وديني
_لازم جدك عنده علم تدري بي اعصاب
مابينه حيل ويا
_ماشي
بقيت يمها حتى صليت وياها من الخوف من هجرس والقرآن مايوكع من حلكي بس اقرأ آية الكرسي والمعوذات واستغفر الله واصلي على محمد
اجه جدي فتحت ويا جديتي الموضوع باوعلي بنظرات تخوف خفت منه وكمت بسرعة گلتله والقرآن ماجذب هجرس ملاحكني جدي
جدي _من شوكت ملاحكك ؟
هجرس_ من سگيت الكاع انه وابوي
جدي _ ليش ماكلت ؟
هجرس_مو گلتلك وأنت بسلامتك جبيتني جب بالكتل وتگول تبجي على امك
جديتي خديجة _ودي بسرعة للسيد
جدي _امشي بدل وتعال
هجرس_صار جدي تعاي وياي جدة
جديتي خديجة _وين اجي وياك ؟
هجرس_للغرفة اخاف يطلعلي
جدي _ولك من شوكت جبان أنت
هجرس_هذا شيطان مو لعب جهال لو بني ادم علمود مااخاف منه امشي جدة وياي
جدي _روحي ويا لما اشوف شبي
راحت وياي جديتي لزمت ايدها وصعدت فوك بدلت بسرعة ونزلت الكل تباوعلي شلون لازم ايدها وامشي وياها كدامهم اضحك هم مايدرون بي راح اموت
من الخوف وكفت كدام باب الغرفة انتظر جدي يطلع سمعت قسمة گالت لجديتي خديجة شبي هجرس مجلب بيدج مثل الجاهل ؟
جديتي خديجة _ هذا هو من يوم يومه يحب يدلل نفسه هههه
قسمة_عمة
جديتي خديجة _ جديد عليج هجرس روحي جيبيلي ستكان جاي مهيل
كعدت جديتي بصف جداتي وتضحك نست على السالفة فرحت كلش من ماجابت طاري لأحد طلع جدي طلعنا بره دز على عمي فواز اجه ركض
فواز _ها يابة رايدني
جدي _فرقد اشك بي صايبه مس من كاع هجرس امشي خل نودي للسيد يقرأ عليه..
