رواية الهجرس الفصل التاسع 9 بقلم رواء هادي
تعصبت كلش من جهة أمه تشيع مناوي محجوزة ومن جهة هو يضحك ويكول حبيتها من أول نظره ومن جهة داز هالبنية مصورتها ودزتله صورها
لو شافوا صورها عده أهلها يذبحوها أعرفهم شلون ناس متخلفة وعقول متحجره أخذت نفس طويل وزفرت
علمود اطلع اهيض بيهم
ويه طلعتي من الباب انصدمت بجسم شخص جسم قوي ردت اوكع لزمني قوي وكال " من عمى العماج
ماتشوفين كدامج
من نبرة صوته عرفته هجرس فتحت اعيوني هو عافني بسرعة وكف كدامي يخزر بي بلعت ريجي أخاف منه ومن نظراته مارديت عليه
مشيت من يمه لزمني من زندي وجرني قوي ناحيته "
فوك غلطج صايرة أنتي ام الراهي؟
جريت زندي من قبضه أيده قوي وهم مارديت مشيت بسرعة لبره المشكلة لا هذاك الضابط السنجاب ولا البنية ماكو اختفوا عبالك فص ملح وذابوا
رجع حجه بهدوء"
عليمن تدورين ؟!
مارديت عفته وطلعت خايفة لايلحكني الحمدلله جانوا أبوي وأخوي طالعين بره ردت أروح عليهم اشرلي فاروق ادخل جوه شفت زلم غربه
يمهم واكفين بره عاد رجعت ويه رجعتي ردت اتصادم ويه هجرس جان يباوع بالتلفون رفع رأسه باوعلي بنظرات عادي وكال " العمى ضاربلج
اعيونج اليوم
هم مارديت انطيته مجال يمشي مشى وكال "
أدري لسانج مبتور ماتردين
بلعت ريجي وكلتله "
لا اعرفك ولا تعرفني عليش احجي وياك
أبتسم بخفه رجع تلفون بجيب البنطرون وكال "
وهذا لريده ...انتظري لترحين واسمعي كلامي زين ان شفتج تتمشين هنا وهنا وتطلعين كدام الولد حتلوه ولد العمام بالقرأن ابتر رجليج بتر فعذر
من أنذر سلسبيل
_وانت شعليك بي ؟
_مادام بيتي علية ونص
_لا والله
_انا كلت وكلمتي متصير أثنين
_يكول أبوي ماكادر غير على أمي عاد أنت حاط دوبك من دوبي ولك شعليك بي شاريد مني بس فهمني شيصير وياك تمشره برأسي
_لانج راس البله
_ليش ماتكول أنت ليش ماتكول مرتك ليش ماتكول ام مرتك هي لسوتلك السحر أني شعلي تذبوه براسي وأصلا شنو مصلحتي اسويلك سحورة
عيب عليك تتهمني باطل بالقرأن بس تدخل بي مرة الثاني أروح اكول لجدي موسى عليك واكله يكلي انتي سويتلي سحر وتركضين وراي
_كملتي
_بعد عن طريقي ابو الشياطين
_عليمن ابو الشياطين ؟
_أنت منو غيرك مسكون من الشياطين وخر عن طريقي ماريد يصير بي شيطان واصير مخبله
مثلك واتهم بالعالم واخر
اعيونه صاروا برأسه من شفته هيج عصب رجعت كم خطوة ليورة بلعت ريجي الحمدلله طلعت حنين من شافته واكف كدامي صاحت
حنين _فرقد حبيبي تعال اريد احجي وياك
بسرعة اندار عليها وكاللها " هاا
حبيبي شرايد ؟
حنونه _ أريد أخذ صور وياك
هجرس _يله تعاي
حنونه _تعاي سلي اخذيلنه صورة بتلفوني
سلسبيل _اي انطيني
أخذت تلفون من أيدها هو طبك بصفها أنوب قصيرة كلش والصورة متطلع حلوة حبيت ألطف الأجواء وابعد الشكل عني أني أحب فرقد
كتلها بضحكة "
حنونه الصورة تطلع نشاز خل يشيلج فرقد
حنونه_عيب
سلسبيل _هو شنو عيب غير زوجج يله شيلها
خل تطلع الصورة حلوة
أبتسم وشال حنين بحضنه بيد وحدة ضحكت تلقائي نفسي شفتها خطية تضحك وفرحانة " اي هسه راح تطلع الصورة حلوة ورومانسية
حنونه _بسرعة أخذي الصورة
سلسبيل _اوكي وهاي لتقطت الصورة لتنزلها خل اخذلك كم صورة حلوة
هجرس_ كملتي
سلسبيل _اي كملت يخبلون طالعين
هجرس_غير أحنا نخبل
سلسبيل _اي ربي يحفظكم البعض
باس حنونه بخدها ونزلها حنونه تضحك وكالت "
ويحفظج الله أنتي ودلشاد
هجرس_دلشاديش حنونه
حنونه _مو سلسبيل راح تنخطب لدلشاد
هجرس _صدك ؟
سلسبيل _ اكون
حنونه_شنو اكون موكلتي راح نخطب
ومحتمل اطلع خارج العراق
سلسبيل _اي قبل شوي راسلني
هجرس_عليش راسلج ؟
سلسبيل _وكال أمي تريدني أخطب بت أخوها وأني اريدج وراح عاند أمي
هجرس_ اي شكو بيها لو عاند الكل واخذج
حنونه_هاي انا وفرقد مو عاندنه الكل واخذنه بعض
سلسبيل _ماريد أني شغله عناد
هجرس_لعد شتردين ؟
سلسبيل _اريد بتراضي
حنونه_خاب دولي بتراضي بله مارضت شلون
سلسبيل _بكيفها بعد
هجرس_من كلامج ماتردين دلشاد
سلسبيل _ماعرف والله شي بداخلي يكول أرفض
حنونه _مو كتيلي أحبه شنو سالفتج أنتي؟
سلسبيل _ أحبه حب أصدقاء مو حب مرآة لرجل
حنونه_انتي تضحكين علية ؟
سلسبيل _لا والله ماضحك عليج .. أني ماريد أحب رجال منورة ظهر أهلي وباجر صار ماصار سلسبيل هيج وهيج جانت وياي ويكوم يطلع أشياء
من الماضي تره مو كل رجال رجال حنونه
هجرس_صح كلامج مو كل رجال رجال حشاكم اكو زلم بس تعوفه حبيبته يروح يشوه سمعتها وسمعه أهلها واذا طارت السمعه الموت أهون
سلسبيل _صح كلامك لذالك أني حذرة كلش وأصلا بعدني صغيرة خل اكمل دراسة
وراها الله كريم
حنونه _لازم الولد بي شي ؟
سلسبيل_ ماعرف أني
هجرس_شنو ماتعرفين مو صديقج الولد ؟!
حنونه_صادقين شلون مجان ؟
سلسبيل _أني الولد عرفته بالصدفة جاء خطار ويه أهله لعدنا وبقوا عدنا خمس أيام لما اشتروا بيت وسكنوا بي ماشفت منه شي وراها دخل معهد فنون الجميلة
وياي وقليل ألتقي بي بالمعهد شمعرفني شكو داخل القلب الوجه حلو ومبتسم ومحتمل
القلب أسود
هجرس_من البداية اجي وياج الولد مسوي شي موحلو كدامج ونظرتج له محلوة لذالك ابعدي عنه وأصلا شكله موراحة أبد و لتلتقين بي
واكطعي صلتج بي احسلج .
حنونه _ إذا بي عيوب ابعدي عنه ليش تجيبين المشاكل لاهلج عاد أنتي طبج مرض اهلج لاخطية
سلسبيل _ليش ولج أني طبني مرض
حنونه _ماحبج والله
سلسبيل _ ولا أني أحبج
هجرس_نبقى احنا انا ماحبج وانا ماحبج وليشوفجن يكول شرايج مو أقارب
سلسبيل _هي ماتجوز مني من جنه جهال
تخليك تضربني
هجرس_انتي مو ادمية جنتي وتضربيها
سلسبيل _أني لا والله هي مرة موتتني من الكتل فوكاها راحت كالتلك أني ضربتها وأنت
جملتها وكتلتني
ضحكت حنونه وكالت "
الله على أيام زمان هههههه
سلسبيل _الله ينتقم منكم على أيام زمان أني مظلومة منج ومنك وبس اتزوج اخلي ابني يكتل
بتكم كتل ويأخذ حقي منكم
هجرس_ هاي صدك حنونه تحجي
حنونه _اي والله جنت اخبث عليها علمود تباوعلك ههه
سلسبيل _غير جان حلو
أني كلت حلو لو هجرس ضحك بصوت عالي وحنين خزرتني وكالت _تتغزلين برجالي
سلسبيل _لااا
حنين_فوكاها تكولين لاا توج تكولين حلو اليوم اموتج
سلسبيل _اوكفي مكانج أني كلت من جنت صغيرة أشوفه حلو هسه لا ماشوفه حلو أصلا يلعب النفس
وبالكوه اباوعله واحجي ويا
حنونه _اموتج سلسبيل بس تباعين لفرقد
سلسبيل _ دا تحجين أنتي؟
حنونه_ انجبي اجوي العالم
متت من الخوف أني غبية وثولة وعلى كوله زهورة زماله وصفنات المطي مابطلها هسه فضحت نفسي وتأكدوا من جنت صغيرة احبه
طلعوا الكل ودعوا اهل العروس وطلعنا طول الطريق أفكر كلت لازم أكشف كل الأوراق وإذا أطرت الأمور أعترف جنت طفله معجبه بفرقد
بس هسه لا ماكو ذرة حب تجاه فرقد ولازم أموت هذا الحب بقلبي حرام علية أفرق بين أثنين علمود ارضي نفسي خطية فرقد هواي يحبها
لحنونه وهي هم تحبه وعافت أهلها علموده ليش أصير أنانية ودلشاد بس اوصل لبغداد أقطع صلتي بي مابي حيل يروح يورطني بسالفة.
ويطلعني وحدة قذرة بنظر أهلي.
المهم وصلنا للبيت بسرعة بدلت وغسلت المكياج توني ردت اكعد انفتح الباب ودخلت حنونه وكالت "
سلي حياتي تعالي معتازتج
أبتسمت وكتلها "
جاية قلبي
جديتي خديجة استغربت طريقة كلامنا وكالت "
اليوم حياتي وقلبي خيرجن
حنونه _قررنا اليوم نصير صديقات
جديتي خديجة _اي عفية هيج اريدكم كلكم قلب واحد
حنونه_ان شاء الله جدة
طلعت مبتسمة سدت الباب وكالت "
اريدج تعترفين بكلشي
سلسبيل _شمسوية أني واعترف ؟
حنونه _فرقد كال صيحيها أريد اسألها كم سؤال
سلسبيل _بخصوص شنو ؟
حنونه _مكال امشي يله هسه يضوج ويتعارك وياي من وراج أمشي خاتونه أمشي
سلسبيل _وشمسوية ؟
حنونه _دمشي عاد شكد تحجين
أخذت نفس طويل فتحت الباب وكالت " تفضلي انسة سلسبيل "جان كاعد فوك الجرباية من دخلت أبتسم واشر على الكرسي " اكعدي هنا سلسبيل
سلسبيل _اممم
حنونه كعدت بصفه كعدت فوك الكرسي جني متهم ودا يحققون ويا أبتسم هجرس وكال "
هجرس _سؤال الأول جنتي معجبه بي بطفولتج ؟
رديت بسرعة بدون تردد وخوف "
اي
هجرس_شكي بمحاله جان
حنونه رادت تحجي رفع أيده منعها تحجي "
لتحجين انا اسأل وهي تجاوب
بعدين يجي دورج
حنونه تخزر بي رجع سأل "
وشوكت إنتهى الحب لبقلبج ناحيتي ؟
سلسبيل _من رحت البغداد نسيتك
هجرس_ تمام " أنتي جنتي تضربين حنونه ؟ وتسوين مشاكل وترحين تكولين لامها
هي تلتقي بي ؟
سلسبيل _كم مرة ضربتها لأن طكت روحي منها ومن جذبها بس ولا مرة رحت كلت لخاله قسمة
عليها تلتقي بيك
هجرس_ تمام زين أنتي لسويتي السحر لي ؟
سلسبيل _لامو أني
هجرس_ كل أصابع الاتهام موجهة الالج
سلسبيل _عندك دليل يثبت أني لسويته؟
هحرس_ماعندي بس انتي الوحيدة ماتقربين
لقسمة اما البقية كلها أقارب
سلسبيل _غلطان مرت عمي جدوع الصغيرة غريبة وصديقة حنونه سارة هم غريبة وهواي بنات مايقربون لقسمة وهاا قبل لا نسى جنتها الوسطانية
هم غريبة محتمل وحدة منهن مسحته بظهرك من تعاركوا وياك يوم الحنة
حنونه_تتهمين أمي؟
سلسبيل _تره امج لسوت السحر
هجرس_سلسبيل اسكتي
حنونه _راح اكوم اموتج كتل سلسبيل لتتهمين
امي أنتي لسويتي السحر
سلسبيل _والقرآن الكريم امج والكل تعرف بهذا الشي اسألي هجرس وشوفي شيكولج
هجرس_ اسكتوووا
حنونه_صدك أمي؟
أخذ نفس طويل وراها زفر ومسح وجه بكف أيده وكال "اي امج بيوم الحنة راشته بالغرفة بس وحدة ثانية وياها ماسحته بظهري
حنونه_ليش ماكلتلي أمي سوت السحر ؟
هجرس_ماحبيت اكسر قلبج وكلج امج تريد تهجم بيتج وتردج بيوم العرس
حنونه صارت تبجي خطية انقهرت كلش رجع باوعلي وكال " تحلفين كلام الله مو أنتي لسويتي السحر مو أنتي لتخبثين على حنونه أيام زمان؟
وحنونه هي جانت تخبث عليج ؟
سلسبيل _اي احلف
هجرس_كومي توضي وتعاي احلفي
كامت حنونه بسرعة خايفة وكالت "
لا فرقد لاحلفها مايصير تحلف
هجرس_ماعليج أنتي كومي كدامي فوتي للحمام توضي وتعاي وانتي هم حنونه فوتي وراها توضي
وتعالوا احلفوا اثنيناتكم
سلسبيل _ماشي
حنونه _فرقد ماتصدك بي وتريد تحلفني تره هي جذابة واكيد راح تحلف باطل
سلسبيل _هذا قرأن مو لعب جهال احلف باطل وأني راح احلف صدك بكل كلمة اكولها
بدون خوف وتردد
دخلت للحمام عفت الباب مفتوح فتحت الماي قطرة خوف ماكو بقلبي لأن أني صادقة بكلامي اسمع بيها تتوسل بي مايحلفها وبس يحلفني أني
رجع صاح بيها وكاللها "
اطلكج حنين بالقرأن إذا طلع كلشي كتي لي عن سلسبيل أيام زمان جذب
_ماجذب انا هي الجذابة
_تدرين بي أكره الكذب ذبحني ولا تكذب .. ويله كدامي للحمام توضي وتعاي احلفي
_هاي تاليتي تحلفني
_ اثنينكم اليوم تحلفون كلام الله والباطله بيجن راح تصير بيها مصيبة وتنكشف الحقيقة
يللله للحمام
اسمع صوت بجيها طلعت بره الحمام وصلت لعندي ودفعتني قوي ردم ظهري بالحايط حسيت بألم كلش قوي بظهري هو كام وصاح بيها
هجرس_من طيح الله حظج ليش هيج؟
حنونه _وحدة قليلة شرف وراح تحلف باطل
وزرعت ابشك بقلبك ناحيتي
دخلت للحمام طبكت الباب قوي كمت خليت أيدي وره ظهري "اااه الله ياخذلي حوبتي منج
هجرس_هسه حوبة منو بيج تطلع
باوعتله ودموع بعيوني "
الله يعرف حوبة منو تطلع أريد حجاب ؟
راح بتجاه الكنتور طلعلي شماغ رجالي أبيض وأسود سد الكنتور وجاء ناحيتي " تريدني البس شماغ ؟
هجرس_حنين ماتحب أحد يلبس
ملابسها هاج البسي
أخذته من أيده ولبسته عدل هو أبتسم ودار وجه بسرعة طلعت حنين وردت باب الحمام وراها بقوة باوعتلي لابسة شماغ هجرس تخبلت
حنين _فوكاها لابسة من علاكة علمود تشمين
ريحته انزعي لو اذبحج انزعي
صاح بيها هجرس"
حنين انجبي ولا كلمة يله تعالوا
حنين _حسبي الله ونعم الوكيل بيج ان شاءالله
تشوه سمعتج بالعشيرة كلها
هجرس_ماتاكلين خرر.. وتنجبين حنيين
حنين _لتغلط فرقد
هجرس_اذا كمتلج محد يخلصج من بين أيديه
سلسبيل _كافي تتعاركون هسه تحلف لو اطلع
حنونه_اطلعي ماكو داعي نحلف هي حقيقتج واضحة مثل عين الشمس تردين فرقد لالج
سلسبيل _لو أريد جان ماخليته ياخذج
حنونه _فوكاها ترد الساقطة ام الولد ام ال.."#@$
صارت تفشر افشار زلم ماتفشر هيج افشار نزلوا دموعي عيب مناك رجلها تفشر هيج تفشار تعصب هجرس رفع أيده راد يضربها ماخليته صرت
كدامها وكلتله "
أمانة عليك فرقد لتضربها
هجرس_ ماعندي نسوان تفشر عوفيني خل
ادبها محد مدبها هاي
حنونه _ ماسمحلك...
سلسبيل _كافي اسكتوا الله يأخذني ويخلصني
هجرس_ حنين بالقرأن بس اسمع حسج هسه اطلكج واشمرج على اهلج وانعل امه وابوه
ليرجعج بعد وامشي احلفي
حنونه_ماحلف لو منو يجي
سلسبيل _انطيني القرآن خل احلف واطلع
خزر حنين وراح جاب القرآن الكريم وخله كدامي "
اقسمي بالقران أنتي صادكة وحنين الكاذبة ؟
رفعت أيدي جانت ترجف من الخوف مو من الحلف لا من المشكلة لصارت كدامي وأخاف يصير شي بيناتهم من وراي خليت ايدي على القرآن
نزلوا دموعي بسرعة وكلت "
احلف بكل حرف من حروف القرآن الكريم أني ماسويت السحر وحنين هي جانت تتعارك وياي وتضربني علمود اباوعلك وتروح تكلك أني اضربها
وأني ماجنت أخبث عليكم يم امها أو يم احد ثاني أصلا جنت اشوف واغلس .
رفعت أيدي وفتحت اعيوني كلها دموع باوعلي حسيت لمعه بعيونه صارت رجع باوع لحنين وكاللها "تحلفين لو طلاقج يصير هسه
حنونه _عزززة العزاك تريد تطلكني فرررقد
علمود هالبربوك
هجرس_تحلفين لو تطلكين
ندارت علية تريد تجي تضربني صاح بيها"
راح اطلكج حنيييين
صارت تبجي واجت لعنده تتوسل "
والله احلف انطيني 'سحبت من ايده القرآن الكريم وصارت تحلف وحلفت باطل بكل صلافة وجرئة بدون ماتخاف من الله تخاف من البشر
وماتخاف من الله تحلف باطل "
كملت أخذه من أيدها أني ابجي وهي تبجي كال "
الأيام راح تثبت منو الصدك بيكم ... سلسبيل
روحي غسلي يابة
رحت للحمام غسلت وجي اباوع بالمراية وجي مخطوف من حلف حنين الباطل مامستوعبة أبد تخاف من هجرس يطلكها وماتخاف من الله تحلف
باطل "المهم ارتاحيت شوي بالحمام وطلعت نزعت الشماغ خليته فوك الميز ردت اطلع وكفت على صوته
"لتطلعين هسه
سلسبيل _اريد اطلع
حنونه_اطلعي م...
هجرس_انجبي حنين ولاكلمة تعاي اكعدي ارتاحي وراها اطلعي واتجبين طاري
حلفتكم كلام الله
سلسبيل _مراح اكول
هجرس_ ستراحي يابة
كعدت بالكاع انطيتهم ظهري اسمع بيها تكله "
ارتاحيت هسه ؟
هجرس_اي
حنونه_شنو ستفاديته من حلفتني كلام الله
وتدري بيها جذابة
هجرس_ استفاديت هواي ..سلسبيل كومي اشربي ماي
رديت بصوت ناصي "
ماريد
هجرس_ خوما جاي تبجين
سلسبيل _لا
هجرس_شو باوعيلي
حنونه_سالمين فرقد تريدها تباوعلك مو بعينك انا
هجرس_تارسه اعيوني ترس أنتي يله اكعدي وانجبي باوعيلي يابة شبيج مطيتنه ظهرج
سلسبيل كمت مطيتهم ظهري بسرعة رحت للباب فتحته وطلعت بوجي للغرفة بدون ماباوع لأحد لفيت
رأسي ونمت بالفراش
صاحت بي امي"
سلي ماما شبيج نمتي ؟
رديت عليها"
تعبانة يمة
امي_ ارتاحي لعد
ثاني يوم الصبح كعدت بوجي للحمام غسلت وطلعت بدلت لبست نفنوف قصير جوه الركبة بردان أطوال مشطت شعري خليت قراصة صفح
خليت حمرة سحرية لشفايفي وخدودة وارنبة خشمي هم اخليلها يطلع الشكل حلو ولطيف أصلا نسيت شصار وياي البارحة بي طبع ماحمل هم
وبسرعة أنسى وماهتم ... طلعت بره الغرفة مبتسمة مجانوا أهلي موجودين جداتي تلاثتهن وحنين بنصهن كاعدة ومناوي كاعدة
تلعب بتلفون "
سلسبيل _صباح الخير
ردوا _صباح النور
حلوة_تعالي جدة اكعدي بصفي
رحت كعدت بصف جديتي حلوة أبتسمت بوجهي رديت الإبتسامة الها باستني بكصتي وكالت "طلبت من أهلج يرحون وماياخذوج
فكيت اعيوني بصدمة أهلي راحوا وعافوني "؟
أهلي وين ؟
مناوي_راحوا هههه
سلسبيل _وين راحوا .؟
حلوة_لبغداد
سلسبيل _شلون يرحون وماياخذوني ؟!
حلوة_مو انا كتلهم خلوا سلسبيل يمي مشتاقتلها ومن تجون يوم العرس عود ترجع وياكم ... متفرحين تبقين
يم جديتج عشر أيام
بقيت صافنه بوجهها عشر أيام أبقى يم هجرس وحنين رفعت رأسي باوع لحنين كالبة خلقتها وكاتفة ايديها لصدرها من ودها تشرب من دمي .
سلسبيل _هاا
خديجة _شبيج جدة نخطف لونج ؟
جوري_ خطية البنية مصدومة أهلها عايفيها ورايحين
مناوي_ هههه
سلسبيل_غير يكلولي ؟
حلوة_هم ماقبلوا انا وجدج موسى لحينه عليهم يله قبلوا وأنتي جنتي نايمة
سلسبيل _اممم
خرسيت للأبد والخوف أكل كلبي أكل يوم القررت بي أنسى هجرس للأبد عافوني أهلي ويا بنفس البيت مدة عشر أيام مدرة ابجي مدري الطم
على حظي العاثر "
بيت خالي طلال جنت أراقب بيتهم من بعيد كل هاي الفترة والبارحة المغرب رجع للبيت بعد أشهر بلغت عليه وطلعنا مداهمات وصلنا كدام باب البيت جان مسدود
تسلقوله عناصر الشرطة
وفتحوا الباب دخلنا أحنا والعناصر حاوطوا البيت بالكامل دكينه الباب ماكو أحد صاح ياسر بالعناصر وكال
" كسروا الباب
ثواني ويكسرون قفل الباب دخلنا احنا واسلحتنه واصوت لاسلكي أبد ماطفت فتشوا الغرفة طلعوا جديتي
ومرت خالي وبنات خالي
والجناين باوعتلهم أبتسم بخفه لجديتي من شافتني صاحت " فرقد شلون تسويها وتداهم بيت جديتك وين
غيرتك على عرضك وييين
طلعت بدون مارد عليها بقت تبجي وتصيح صعدوا العناصر لفوك السطح صعدت وياهم الباب جان مسروك
من الخارج كسروا الباب
السطح وصعدنا فتشوا السطح فتحوا برميل الماي لكوا بي نايم صاح الشرطي " سيدي المطلوب
داخل خزان الماي
هجرس_طلعوا
الشرطي_ارفع إيديك ليفوك بسرعة
طلال " ديخلك مامسوي شي
هجرس_كلكم من تصيرون بقبضة العدالة تصيحون دخيلك مامسوين شي طلعوووا
بسرعة للخايس
كام مطلع رأسه من خزان الماي جروا عناصر الشرطة جتن لابس تراك جوزي نصردان جسمه كله مبلل
من شافني صاح "
طلال_فرقد دخيلك خلصني
هجرس_ كلبشوا ايديه وسدوا اعيونه بسرعة
طلال_فرقد انا ابن خالك فرقد لتخليهم يعتقلوني ولك فرررقد ساعدنييييي بغلات جدك موسى خلهم
يعوفونييي فرررقد
هجرس_سدوا حلكه صوته مزعج
اباوعلهم شلون كلبشوا أيديه وخلوهن وره ظهره وعصبوا اعيونه بوصله سودة وضربوا حلكه بتيب ازرك
جروا جر هو معاند
شعور الفرحة ماينوصف جان ... داخل قلبي عبالك يوم عرسي من حنونه حبيبتي نزلنه بي جديتي من شافته كامت تدك وتلطم على رأسها
وتصيح "
سويتها فرقد سويتها واخذت ابن خالك للسجن ولك ليش هيج مو ابن خالك ... حسبي الله ونعم الوكيل بيك .. الله لايوفقك ... الله لايخليك ... ولك عوفه
ماله دخل عوووفه
باوعلي ياسر جديتي شبت بطولي تضرب بي وتبجي قلبها مفرفح على ابن اخوها علمود عتقلته قلبها مافرفح علمودي من عافتني امي وجنت بأمس
الحاجة الالها رادوا يبعدونها عني العناصر ماقبل "
لتدخلون طلعوا المعتقل بسرعة
اشرلي ياسر بعيونه عود مني هاي اشرتله يطلع ويتركني وياها هو والعناصر والله طلعوا بقوا واكفين بالباب لزمت ايديها الاثنين
قوي وباوعت بنص وجهها جانت غركانه بدموعها "
حسبي الله ونعم الوكيل بيج أنتي وبحنان وبخوالي وبجدي الله لارحمه ان شاءالله
كلكم حقراه وانذل دمعة وحدة مابجيتوا من عافتني امي وانا بامس الحاجة الالها .. وهسه على ابن اخوج تبجين دم والله العظيم الا اخلي يخيس بالسجن وشوفته تصير حسرة بقلوبكم كلكم
تفلت بنص وجي وكالت "
كلب ابن كلب طلعت ملامت حنان من عافتك وتزوجت وخلفت غيرك عرفت بيك خايس
ونذل وناكر للعشرة
عفت ايديها مسحت وجي بكف ايدي واعيوني برأسي صايرين كتلها بهمس بعد ماشفت ياسر دخل
وياشرلي اطلع
هجرس_حنان أيامها معدودة صارت
مشيت من يمها بقت تصيح وتغلط حتى فشرت علية وعلى عناصر الشرطة ياسر كال " منو هاي ؟
هجرس_جديتي ام الخلفتني
ياسر _طلال ابن خالك
هجرس _ابن القندرة لتكول ابن خالي أمشي هاي فضحتنه وطلعت على الترابي
ياسر_ دباع موتت روحها علمود حفيدها الناقص ابو الحشيشة
هجرس_اليوم اسوي حشيشة من صدك
ياسر_اويلي متحلف الأخ
هجرس_لماخليت يطلعون من خشمه حليب لني
فلا اطلع هجرس
صعدنا بالسيارة حرك السايق كال ياسر "
مانريده يموت هههه
هجرس_ولا انا اريد اراوي طعم الموت على أصوله
ياسر _ لعب بيها يابة سميرة ههههه
هجرس_ ماتنجب ياسر اعصابي تلفانة وانت تغني
ياسر_الطف أجواء
هجرس_ ماكو لطافة بهل الاثناء
ياسر_ حامي الملازم فرقد وائل
هجرس _كرمني بسكوتك أترجاك ياسر
ياسر_نكرمك ليش لا
عاد تفهم الوضع وسكت هو مابنيته شي الرجال حب يلطف الأجواء كدامي مايدري بي بركان ونفجر داخل صدري من جديتي هانتني كدام العناصر
وفرحانه حنان عافتني وتزوجت وخلفت غيري '
ياسر_بخصوص ابن زوج امك المكموع ... نقلوا للمحكمة العليا وحسب علمي
باجر محاكمته
هجرس_١٥ سنة حكم مع معالجة من دمان المخدرات
ياسر_شمدريك هذا راح يكون حكمة
هجرس_ الحكم معرف يتعاطى مخدرات ويتاجر مخدرات اما ابن اخو الخلفتني محتمل
جبير عدام لو مؤابد
ياسر_ صخام براس الخلفته وامها راح الزلمة هههه
هجرس_ أتمنى عدام
ياسر_عليك الله صدرك شلون متحمل هذا القلب الاسود
هجرس_حقك تحجي ماعشت لأني عشته
ياسر_صح ماع ...
وصلنا المركز ماكمل كلامه بعد نزلنا بسرعة أخذوا من عدنا بقيت واكف ويه ياسر جاء جواد وكال "وأخيرا صار بقبضة العدالة أهنئكم على
نجاح العملية واهنئك فرقد على اصال
الخبارية الصحيحة
حضنته فرحان بهذا الإنجاز العظيم "
الله يسلمك
ياسر_بعد هجرس صفته معروفة المراقبة بدقة هههه
جواد _اي
هجرس_انجب ليسمعوك وياخذونها علية
هجرس وهجرس
ياسر_كل المنطقة تدري بيك هجرس وإذا عرفوا
هجرس_ ياسر
ياسر _اوكي حبيبي مراح اكول اطمن كليباتي ههههه
جواد _خرررر... بمصغبك ياسر
ياسر_ هههه أحبك جوادي
جواد _بله حب وبله بطيخ رايح على تحقيق
هجرس_اريدك تحركلي سلفة سلفا
جواد _مو انا لاحقق ويا ؟
هجرس_لعد منو ليحقق ؟
جواد _ النقيب أحمد حيان والم....
ماكمل كلامه نادوله طلع بسرعة المركز مخيوص خبصه اليوم وانا عندي خفارة وياسر راح يفلت للبيت
ساعتين تلاث فلت ياسر للبيت .
بقيت بالمكتب كاعد ماكو كم دقيقة ندك الباب صحت " تفضل ؟ " انفتح الباب الشرطي ضرب تحية وكال
" سيدي عندك زيارة
هجرس_خل يتفضلون ؟
والصدمة لي .... جانت طلع خوالي تلاثتهم وياهم شيخ العشيرة كمت بسرعة" خير ؟
شيخ العشيرة _ ياخير هذا ليجي منورة جهرتك ولك هجيرس شلون تدخل بيت خالك وتاخذ ابن خالك هاي بدل ماتستر عليه وتهربه تشيله
هجرس _ بس خل افهمك جم حجاية شيخ انا ماعندي خوال وهذا واجبي وشغلي لو أبوي متهم مطلوب اروح اشيله وسلمه للعدالة
ابو طلال_ هجيرس لتندك بينه تره ندكك بارضك
احسلك طلع طلال
شيخ العشيرة _ سمعت شكال خالك طلع طلال
هجرس _ كلتلك ماعندي خوال لتعيد كلساع تتفضلون بره لو اخلي العناصر تشمركم يم طلال بتهمة تعدي على ضابط شرطة داخل المركز .
ابو ناصر _ تالي عمرنا هجيرس يطردنا لتخلينه نشمرك وره الشمس احسلك اكعد عاقل وانجب
وتحالف ويانه
هجرس_ كلت تفضلوا بره
اشرت على الباب تقدم ناحيتي ابو طلال وكال "
خلال أربعة وعشرون ساعة يطلع طلال وأشوفك شلون يطلع ولتشوف نفسك تره كلك خلك ملازم وحالك حال الشرطي لواكف بالباب
هجرس_وهذاك الشرطي الواكف بالباب يشرفك
أنت وعشيرتك
انا كلت هيج هو رفع أيده راد يضربني لزمت أيده بسرعة ونزلتها وحجيت من بين سنوني
" ايدك لو اكسرها لك
عت أيده عفته صاح بي شيخ العشيرة "
هاي تاليتك يالخايس ابن الخايس تلزم ايد خالك بدل ماتبوسها وتخليها على كصتك .
هجرس_ حرامات مخليك شيخ للعشرة أنت مكانك الصح يم الكاولية والكواويد
تعصب الشيخ وجاء لعندي بدون مقدمات سحب المسدس وسحبت أقسام صوبته عليهم " تتفضلون بره لو اخلي يهلهلك فوك روسكم يله بره برره
شيخ العشيرة_هاي اهانتك جبيرة وراح تتحاسب
عليها هجيرس
هجرس_ جفيني شرك تره الشر لبي يبلعك ويباع لوياك برره
ابو طلال _بسيطة هجيرس
ابو ناصر_اذا ماخليناك تبوس القنادر... بس اصبرلنه
هجرس_ ماعاش ليخلي حفيد حجي موسى يبوس القنادر انا لاخلي أعدائي تبوس قندرتي .
شيخ العشيرة _ انا الك
ابو طلال _الله كريم هجيرس
طلعوا يتحلفون بي نزلت المسدس مبتسم كعدت فوك الكرسي أضحك وأخيرا انذلوا واجوي لعندي هجرس همس بأذاني "انتقام رديت عليه "
_انتظر
هو صار المغرب بدأ رحمة الله وياي هجرس يحجي من جهة سل تحجي من جهة خبلوني آخر شي تعاركوا
صاروا ملخ فوك رأسي
سل تريدني اطلك حنين وهجرس ماقبل اطلك .
بزعوني خليت إيديني على أذاني قطيتهم وصحت بيهم " ولكم كافي عوفوني بحالي عوفونيييي
... روحووووا ... رحوووووا
لحظات وختفوا من يمي خليت رأسي على سطح المكتب أتنفس قوي خبلوني تخبل كل شخص يريد شي مني أسوي وانا مالي رغبة أحقق مطالبهم
لماتخلص "
وره العشا أتصل بي ياسر كال أجوي عالم وشيوخ على أبوي علمود وساطة يطلع طلال وأبوي ماقبل كاللهم اعذروني ماكدر وماعندي وساطة
قوية بالمركز وطردهم جريت النفس برتياح هسه صدك انذلوا وصاروا يتوسلون بالعالم علمود يطلع طلال ولايحلمون طلال مايطلع
سديت الاتصال كمت افتر بالكرسي وأضحك هجرس وكف الكرسي شفته واكف كدامي يخزر بي مبين
متعصب وضايح
_ خيرك ؟
_سل
_شبيها ؟
_زعلت
_والمطلوب
_سلسبيل
رفعتله تك حاجب مستغرب "
شتريد منها ؟
_ تريدها
_شلها بيها
_حنين
_ولك احجي عدل شتريد منهن
_حنين باطلة
_شنو ؟
_سلسبيل الحق
_قصدك حلف حنين باطل بحق سلسبيل
_اي
_هه وانا عبالي سلسبيل الباطل
_حنين
_تندمت خليتها تحلف كلام الله
_سل تكول أستاهل
_اووف من سل تكره حنين كره موشلون مجان
_أنثى تكره أنثى
_ههههه
أختفى فجأ بعد ماضحكني من كل أنثى تكره أنثى ولاعاب حلكك حتى بين الجن والإنسان بين النسوان كره وحقد موشلون مجان .
دخل علية الرائد كمت ضربت تحية له كعد يحجي وياي بخصوص طلال ولي فهمته منه طلال معترف على هواي اشخص وكلهم تجار مخدرات
جبيرة بنحاء العراق .هو هم تاجر جبير بديالى وأغلب ستيراده من إيران عن طريق لحوم المجمدة ومتعامل ويه شرطة الحدود وعترف على كم
شخص يشتغل ويا بالمنفذ .
هسه تأكدت حكم ابن اخو الخلفتني "مؤبد عدام " لامحال " المهم إنتهى الاجتماع " رجع هجرس يحجي بس أسمع صوته " سل ...سل... سل
_بخلافك اتيه هجيرس هههههه
_سل
_مطيحه حظك سل متكلي شلون متحمل
_سلسبيل
_شبيها لعابتي
_جميلة
_اشتعلت صفحتك هجرس تتغزل بلعابتي ههههه
_سل تكول
_هاا سل مبين غيرانة
_تحبها
_هلاووو أول مرة بالتاريخ جنية تعشق آدمية ههههه
_راضيها
_هاي شلون ورطة ولك ماعرف شلون اراضي جنية روح أنت راضيها وخلها تجي
تحجي وياي
_أنت
_هجرس لتعاند روحلها أنت وقشمرها من يمك...هجرس وين رحت هجرس ... مواحجي وياك ...ولك هجرس...خررر. بيك ويييين وليييت
شرد وعافني الواحدي .... اضوج بخلافة وخلاف سل يونسوني بسوالفهم مرات بالدوام طول الليل مالهم حسن أنادي عليهم ماكو سل زعلت
وهجرس ماكو اله طك .
حنين أتصلت بي وكالت سلسبيل تره بايته عدنا وراح تبات منا لما يجي عرس أبوك عدنا وانا ماتحمل أبقى وياها بنفس البيت ضجت من حنين كلش
وضجت أكثر من حلفت كلام الله باطل خافت أتركها وماخافت من الله صوت همس بأذاني "كاذبة ملعونة "عرفتها سل صوتها زرف أذاني زرف
بسرعة فصلت الاتصال أنتبهت عليها"
سل تعاي ...سل موجودة ؟ سل وين رحتي تعاي لتزعلين ... والله اسمعج بس تعاي ؟ اوووف هم مثل لنسوان لعدنا تشلعين القلب بزعلج ...وج تعاي هجرس وينك ولك تعاي شلعت قلبي سل بزعلها ...
...هجرس وينك ؟
اثنينهم راحوا .....وعافوني نوب خفارة وياسر ماكو ولاجواد يمي طلعنا دورية بال١٢ بالليل ورها رجعنا ميت من التعب وكل ساعة أنادي على سل
وهجرس هم ماكو سل زعلت وتعال جيب ليراضيها " المهم ثاني يوم رجعت للبيت تلكتني حنين روحي بخشمي صايرة اجت بالي اضربها
وادزها لبيت أهلها بس وكف بعيوني حبي الها دخلت للبيت سلمت على أهلي سلسبيل نزلت من فوك السطح جانت لابسة دشداشة بردان طوال
ابتسمت بوجهها ماردت الإبتسامة ولا سلمت راحت للمطبخ انزعجت من ماسلمت بوجي للغرفة طلعتلي ملابس حنين دخلت للحمام
سبحت وطلعت اجت وراي حنين كعدت وكفت كدامي"هاك البس الحجاب
أبتسمت وأخذته من أيدها ماتدري بي الحجاب ورقة بيضة شمرت الحجاب من رجعت من عزيمة اهل سلسبيل حبيت اعرف الحقيقة شنو .
بمساعدة سل وهجرس وتفقت وياهم مايأذوني ولا يأذون العالم لحوالي بس بشرط أنفذ كل مطالبهم ليطلبونها
وهسه سل زعلانة
تريدني انفصل عن حنين "
سلسبيل طلعت العصر ويه مناوي تطول للهايشة مال بيت جدها وتحش حشيش للحولية " جديتي حلوة كالت ماتطلعين بدون حجاب عاد لبست حجاب
ورحت وياها حشت نص كونية ماقبلت أني "
قليل تعالي منا نحش لها خطية تجوع
مناوي_كافي
سلسبيل _لاوالله موكافي انطيني أني احش الها
مناوي_وين تعرفين ؟
سلسبيل _اي مويحتاجلها علم الذرة انطيني
مناوي_هاج إذا انجرحتي مالي دخل
سلسبيل _لتخافين
اخذت الكونية منها خليتها فوك ظهري والمنجل بيدي وامشي بتجاه الحشيش تجمدت بمكاني من شي فات بصبع رجلي شمرت المنجل والكونية بالكاع
كمت اصرخ " ااااه مادري شنو طب ااااه لحكيلي مناوي
كعدت بالكاع شفت من جوه النعال ضاربني سيم طاب بصبع رجلي الجبير جريته بهدوء "
مناوي_ههههه شنو طب هههه
سلسبيل _سيم طاب ااااه يوجع
مناوي_متتت من الضحك طب ههههه
كعدت بالكاع مديت رجلي ورجلي الثانية لزمتها واصيح عليها من الوجع " اااه تعاي شيليني راح اموت
مناوي_شتموتين هو جرح بسيط ههههه
سلسبيل _مو طب بصبعي وزرفة
مناوي_هههه وج اسكتي فضحتينه شنو طب كولي فات ههههه سوالفج تخرب ضحك سلي هههههه
سلسبيل _صدك مناوي ماتجين تشوفين صبعي
مناوي_حيل بيج مو كلتلج كافي دكيتي عناد له احشلها صارت نادرة عود دكليها على كولتج
طب هههههههه .
سلسبيل _تعاي شيليني مابي حيل امشي
مناوي_هههه علواه تشيليني انتي ههههه
سلسبيل _أني اعلمج مناوي
مناوي_ههههه طب ههههه
تعصبت منها جرت الكونية واخذتها وشالت المنجل خربانه ضحك الحقيرة عقلها راح لبعيد شلت تك النعال بيدي وتك لابسته برجلي وامشي على كعب
رجلي المجروحة
متوجعة كلش "
اااه يوجع مناوي والله مابي حيل امشي تعاي
شيليني مناوي تعاااي
بدون ماتلتفت كالت "
شافتني رجال واشيلج هههه
سلسبيل _ الله لايعوزني الج
مناوي_احسن هههه
دخلت قبلي دخلت وراها هي راحت لسكيفة تنطي أكل للحولية وأني كعدت وره البيت فوك الممر اباوع لصبعي نازف دم ويدك مثل القلب يوجع
_اااه يمة
عفت رجلي من حسيت ظل فوك رأسي واكف رفعت رأسي شفت هجرس يباوعلي مستغرب "شبيج ؟
سلسبيل _سيم طب ...
مناوي_ولج فضحتينه هههههه
حسيت بي كتم ضحكته وندار على مناوي "
شبيها مناوي
مناوي_سيم بالكاع فات بصبع رجلها
هجرس_خوما تأذت
مناوي_لا مجرد جرح بسيط وسلسبيل ماتت من
العام الأول هههههه
رجع اندار علية أبتسم بخفه وجاء كعد بصفي بدون مقدمات بقيت متفاجأة جر رجلي شكد فشلت واستحيت من مناوي انوب كلها وسخ جنت امشي حافية
سلسبيل _دا تسوي عوف رجلي
جان يباوع للجرح بتركيز "
ماكو شي جرح بسيط كومي اغسلي
رجلج بماي دافي وعقميها زين
عاف رجلي جريت رجلي بسرعة وكمت من يمه مناوي كالت"لتوكعين سلي
سلسبيل _اجيت مناك لهنا امشي على كعب رجلي هسه تكوليلي توكعين مااوكع طمني
هجرس_لتخافين عليها سباعية سلسبيل
وكفت ودرت رأسي عليه اباوعله بطرف عيني غمزلي عين بلعت ريجي ودرت وجي بسرعة مشيت أعرج لما وصلت للبيت شفت جديتي حلوة صحت
سلسبيل _جدة السيم طب بصبعي
حلوة_ياا شلون طب بصبعج ؟
سلسبيل _جنت امشي بالزرع واكو سيم هناك طب بصبعي
حلوة_غير تنتبهين ياجدة تعاي خل اشوفه الج
طلعت حنين تضحك من غرفتها "
هههه طب ههههه
حلوة_طاح حظج شنو هاي حنين
حنونه_ هي تضحك عود بت بغداد تكول طب هههههه
سلسبيل _جدة يوجع
حلوة_ اكيد عمق تعاي خل اغسل رجلج تعاي جدة
حنونه _هلاوو حجاب ست سلسبيل ودشداشة
صايرة مره عود ام الطب ههههههه
سلسبيل _انجبي الزركة
حنونه _مو اجي اموتج ام الطب
سلسبيل _دتعاي وشوفي شسوي بيج إذا ماشكيتج نصين فلا اطلع سلسبيل
حنين _هسه اخلي ...
دخل هجرس وصاح من عتبه الباب "
كافي لغوا حنونه جيبيلي كلاص
ماي بارد
حنونه_تدلل قلبي
قلدت شلون كالت تدلل قلبي بس ماطلعت صوت انتبهت هجرس يباوعلي ويضحك بسرعة مشيت ويه جديتي حلوة غسلت رجلي بماي دافي وراها
نشفتها لي وعقمتها وشدت مكان الجرح "
لصبح تمشين عليها
دخلت مناوي وكالت "
صارت ذيب هههههه
سلسبيل _شنو ذيب ؟
مناوي_الذيب من ينجرح بالسيم عشيرتة تكتله لو تطرده لان يجرب وأنتي صرتي مثله ههههههه
سلسبيل _جدة شوفي مناوي بس تضحك
حلوة_مناوي كافي هههه
سلسبيل _جدة نوب أنتي
حلوة_ شسوي ياجدة سوالفكم تموت من الضحك
...يله ارتاحي
طلعت مناوي تضحك وجديتي حلوة هم طلعت دمعه صارت بطرف عيني من الوجع مسحتها توني ردت اقطي رأسي بقيت لازمة البطانية واباوع للباب
لأن انفتح دخل هجرس وسد الباب بقيت صافنه بي .
