رواية عشق الثأر الفصل التاسع 9 بقلم مينة طلال

رواية عشق الثأر الفصل التاسع 9 بقلم مينة طلال

وجان اختياري غلط

كل ظني تسوى التعب

والحبك تقدرة...

_______

قاسم : احمد خابر الشرطة بلغ عن تهريب سلاح ودز سيارتين اطلع جماعتنة قبل لا يلزموهم الشرطة

كون من تشوفون سيارة الشرطة بطريق تأخذوهم...

أسحاق..

طبكت سيارتين جرونا ومشو بسرعة نداريت واشوف الشرطة لزمت الشايب ويا الفلوس والبضاعة صحت بيهم

- منو انتو

احمد: لاتخاف استاذ احنا ويا استاذ قاسم

هزيت راسي كبل خابرت قاسم..

- استاذ لزمونا

- اني بلغت

- بس شلون استاذ مااخذنا الفلوس لو منتضر اخذهن

- مستحيل يطيكم هذا راد يكتلكم وياخذ الفلوس والبضاعة بس لاتخاف سويت لهذا درس مستحيل ينساه ..

سديتة مستغرب منة الفلوس ابد مو قليلة معقولة عدة احنا اهم من الفلوس سكتت

واخذونا جماعة قاسم يرجعون لبغداد كل الشباب نامو ناسين كلشي صار الة اني مااخذت عيني النوم واني افكر شلون راح اخلص من هل شغل.. شنو موضوع قاسم .. وين ورطت روحــჂ̤ .. وين راح اورطها بعد..

اجت بالي مروج ورسالتها .. باوعت لسليم هوة ونايم ماردت اشوفها بدون مااكلة خاصتاً هو حيل مبين يحبها ماريد تخرب صداقتي ويا علمود مرة .. ندستة سليم

سليم : عوفني نايم شتريد مني اسحاق .. رحمة لذاك الاب الطيب عوفني..

- اريد احجيك شوية كوم

- نعسااان نعسااان عوفني..

- شي يخص حبك

فتح عيونة يباوعلي وحامد ندار وعمران كبل كعدت حجو مرة وحدة

- حبة..

سليم : جلاب سدو اذانكم تعال شاورني

- لا بس اشوفك شي

طلعت المبايل شوفتة رسالتها جان يعقج حاجبة

- شتريد منك؟

- شمدريني كلت روح انت احجي وياها صارحها وافتهم منها شتريد كللها ايوب مكدر يجي او كللها اسحاق عرفت اسمي هية..

- خوش

ضل ضايج وساكت نزلو بشارع العام لان مايندلون بيتنا راح يتمشى وراها بمسافة نزلو الولد ..

دخنت جكارتين وحطيت راسي على الجامة غمضت واخذتني النومة ماكعدت الة على صوت السايق وهوة موكفني كدام باب بيتي..

جمدت بمكاني والخوف تملكني شلون عرف بيتي واني كلشي مطي من معلومات خطا باوعلي وكال:

- تفضل استاذ اسحاق وصلنا

حاولت ابين طبيعي نزلت واني اتلعثم من الخوف كلشي يعرف اسمي بيتي يعني اكيد يعرف اهلي ..

مااجة بالي غير دموع .. ضليت افكر شلون اخفيها عن عيونهم هسه ابسط شي يصير يخلوها كفش فداء او نقطة ضعف ضدي ..

استغربت باب الشارع الخارجي مفتوحة كل حيلة دخلت بسرعة واشوف باب بيتنا مكسور ركض بالبيت اصيح كفاح دموع عمة..

مااجاني رد صعدت ركض لغرفتي مقفولة ومحد طاخ شي طلعت السلاح والفلوس الضامهن .. نزلت عيوني تفتر بالبيت ما مبين صاير شي سرقة او شي .. قفلتة وطلعت اجة بالي عمامي مسويلهم شي بس استوقفني حديث جيرانة ابو احمد وهوة يكلي :

- ابني رجعتو من المستشفى البقاء بحياتك.. الله يصبرك وليدي كلنا على هل طريق..

نهد حيلــي ورجف كل جسمي من كلامة "البقية بحياتك" ؟ يا حياة شصاير حجيت بالكوة واني احس صوتي اختفة ..

" عمي شـَڪو شصاير؟ "

ابو احمد : شنو عمي انت ما رحت للمستشفى

- عمي بروح اهلك احجيلي شصاير ترة كطرة دم مابقت براسي

- ولله يا عمي ماادري شكلك عبالي تعرف وجيت اعزيك من شفتك..

- عميييييي

صحت برجال اعصابي تلفت حجة بتوتر..

- اليوم الصبح اجت اختك من الجامعة وبيتكم مقفول وياها لوريس وبنتة اجو على ولدي حتى يكسرون الباب ومن طبو للبيت ..

سكت شوية واني انتضرة يكمل هزيت ايدي اي عمي كمل

- لكو عمتك ميتة بفراشها ... الله يصبركم ابني..

رخت رجلية وكعت بالكاع واني اذكر ظلمها النا وخباثتها ويانة وبنفس الوكت خوفها علينا وحنيتها الي مجانت تعرف تبينها النا اذكرت كسرتها البارحة من طبو عليها اخوتها..

ايامنا من ماتو اهلنا ومحد تحملنا غيرها وغير بيبي كلشي نعاد بعقلي عبالك شريط لحد اخر شي كعدتي وياها البارحة اني واكشرلها البيض.. هيج الدنيا غدارة ؟ بلحظة اخذتها وهيه البارحة جانت بنصنا..

حاولت اكوم مااكدر حيلي راح خانتني رجلي ماادري اني زعلان عليها لو زعلان علينا! لو زعلان من الدنيا الي كلساع تصدمني بشخص..

كومني ابو احمد هوة ويردد لاحول ولاقوة الا بالله الله يصبرك ابني..

التمو علينا ثنين من جيرانة سندوني ويا صعدوني بسيارتهم ورحنا للمستشفى، وصلنا وسألو الاستعلامات كالولهم اهلها بثلاجة جاي يستلموها..

صفنت لحظة رغم احس هواي ناس تحجي بس اسمعهم متغوش منو اهلها؟ لللحظة نسيت دموع اجة بالي عمامي عبالي همة سوالها شي ركضت قبل اللزلم واشوف دموع نايمة نوم على السدية ومطلعة وجه عمتي وتصيح من كلبها..

دموع رغم كلشي عاشتة ويا عمة بس جانت تحبها لان هيه سدت علينا وحشة اهلنا واحساسنا باليتم جانت ملهيتنا بشغل والمشاكل وما لاكين وكت نزعل لو نحس بالوحدة..

تقربت منها ايدي ترجف اريد احجي صوتي رايح..

دُمووع ...

رفعت راسها تباوعلي وعيونها طابة من البجي همس : كتلوها اسحاق هم كتلوها ماتت من القهر والحسرة اسحاق كتلوها..

لوريس : اذكري الله بتي اليوم يومها والله اخذ امانته محد مسويلها شي

تقربت منهم ساكت ماحاجيت احد حط ايدة لوريس بجتفي مشيت منة وكعدت على ركبي ابوع على وجها واذكر وجهه ابوية جنت اشوف بيها اهلي رغم كرهي الها بس جانت ما مأذيتني ...

طببت شعرها الطالع بشالها نزلت دمعة هاربة مني مسحت وجهي وكمت واني اررد انا لله وانا اليه راجعون غطيت وجهها وصاحت بية دموع

دموع : لاااا اسحاق لاااا لاتغطيها لاتخليها تروح

وين نروح احنا جانت هيه يمنا هيه جانت دايرة بالها علينا

تذكر من مات ابوية وهيه نومتنا يمها تذكر من اجت عاشت وكالت اعتبروني اني اهلكم ولك اسحاق شلون تريدها تروح

صح جانت تغلط و تصيح بس جانت اهلنا جانت ريحة ابوية اسحاق...

صياحها وعياطها سوة طنة بااذني وذكرني بذاك اليوم..

قبل ١٥ سنة جنت خاتل ورة الغرفة واني اسمع عمامي يخططون لقتل ابوية

ما مر من حجيهم اقل النص ساعة واني اسمع صياح غايب وهوة ينادي الدكتور : الحكنا دكتور اخوي راح راح

ركضت دافعهم وراكض لابوية الجان مغمض عيونة وجسمة بنفسجي وصوت جهاز الكلب يصدر صوت عالي معلن عن وفاتة..

بجيت بصياح واني ادفع بيهم منه واصيح : قتلة مجرمين انتو كتلتو جدو وبابا قتله

وخر الدكتور عن ابوية مدنك راسه وكال : البقية بحياتكم..

كامو يسون روحهم يبجون واني ادفع واضرب واعض حرت شسوي بيهم كلبي احترك ومجان عدي خيار اسوي غير اضرب بيهم بلكي يموتون صاح بية عمي..

غايب : دكتور ابنة نصدم عـدڪم مهدئ..

صاح الدكتور المضمد لزموني كلهم عبالك جندي كدامهم ضربوني ابرة وفقدت الوعي ...

____ الان _____

اخذنا عمتي من الثلاجة للمغتسل مال نساء بين ماغسلوها دزيت رسائل لقاسم والولد انو عمتي توفت خاصتاً قاسم لان عرفت كلشي يعرف عنا..

كملنا وانصدم من اطلع من المغتسل ويا عمي لوريس واشوف ولد عمي متقدمهم يـٰس واجو يمي وياهم عمامنا الكبار وناس هواي

خبر وفاة عمتي حالة حال اي خبر سيء طش كبل..

يـٰس : شصار ويا عمتي اسحاق شلون ماتت

ضحكت هزيت راسي مستهزء بيهم ..

صاح احمد بية ابن غايب : عليمن تضحك اسحاق

جاي نحجي وياك بحترام

- اكلكم مو بحالكم اني روحو سألو اهلكم شلون كتلو اختهم

صاح اخو محمد : ولك اهلنا شعليهم اسحاق احجي عدل

يـٰس : يولد صلو على نبي جاين ندفن عمتي لا تفرجون الناس علينا وتسونا علج بحلك العالم كل واحد يحترم نفسها ويسكت..

وخرت منهم اضحك بقهر صدگ الخلف ما مات طلعت جكايري بين ما يجيبون التابوت نصدمت من لحكني يـٰس ..

يــٰس : لازم نحجي اسحاق

- ماعدي حجي وياكم يــٰس الي بينكم جان ابوية وجدي وثنينهم ماقصرتو بيهم..

- واني شنو ذنبي بذنب اهلي؟

- يعني ماتنكر فعل اهلك؟

- لا ماانكر واعرف كلشي صار ، اصلان اني اجيت ليوم مو بس مكان ابوية اجيت احذرك..

- منو شنو تحذرني؟

- حجيت ويا دموع ما كالتلك؟

- شعدك ويا اختي يــٰس شتريد منها!

- مو هذا موضوعنا أسحاق سمعتهم بااذني يخططون يريدون يسون شي لدموع... يريدون يكسرون طهرك بااختك لازم ادير بالك..

ضليت اباوع بوجهها ممصدك حجية بس من شفتة يباوع لعيوني مترجي اصدكة ضبيت الجكارة دستها ومشيت بسرعة ركض وراي لازمني ...

يــٰس : وين رايح اسحاق شتريد تسوي..

- عدي حساب ويا اهلكم اريد اصفي من ١٥ سنة وهمة جبروني استعجل بحسابهم..

- صدكني جنت كارهك اني بس من جنت صغير وسمعتهم شلون كتلو جدي وابوك وشلون هسه يخططون يريدون يوكعون اختك كرهتهم وحقدت عليهم حتى ابوية..

- مايهمني هل حجي يــٰس .. اني عدي بس اختي بدنيا الي يمسها بمي امسة بنار واحركة واحرك اهلة وخر مني يــٰس

- افهمك ولله افهمك واني مستحيل اسمح واحد يأذي دموع..

جريتة من ياختة احجي بين اسناني : شعدك ويا اختي...

رن مبايلي اشعار هديتة طلعت المبايل اشوف رسالتني وحدة من قاسم داز تم هزيت ايد وحدة من سليم داز ..

سليم : أسحاق اعذرني اني رايح سامحني اخوي

عكدت حاجبي وين رايح ليش اسامحة خابرت على حامد كبل جاوب

- حامد تعرف وين سليم؟

- لا ولله استاذي بس كال ضروري نجيك وهاي اني وعمران بطريق الك ..

- معقولة هوة ميجي

- مااعرف بس كاللنا لاتعوفو

سديتة منه وصفنت شصاير ويا حجة يــٰس متفاجئ : منيلك هل مبايل الغالي اسحاق اني ادري انت حالتك مو زينة..

- حسد عيشة ؟ حجيت ويا من ورة خشمي ومشيت- -

- رحت للتابوت بعد ما طلعو شلنا وصعدنا بسيارة البيكم خليت راسي على التابوت احجيها بصوت ناصي..

ها سموحة رايحة لزيد ؟

رايحة لاخوج الدائما تذكري وتتحسرين على ايامة

رايحة ترتاحين يم اهلج وخليتيني اني وهل يتيمة؟

سلميلي على جدي وبيبي وابوي كليلهم اسحاق مناسيهم وراح ياخذ بثارهم ..

محالله وموهوبة مسامحج على كلشي الله يرحمج ويغفرلج..

ضلينا ساعتين من ورا الازدحامات يلا وصلنا للنجف مشينا للامام دخلنها علية زورنها وصلينا عليها وطلعنا للمستشفى

خابرت على الدفان الي من وصلت لكيتة مكمل حفر القبر وبس ينتضر الجثة.. نزلنها اني و يــٰس ومحمد واحمد الي جاين بدال اهلهم وصلنا للحفرة واحنا نصيح لا اله الا الله..

كملنا المراسم بدت الناس تمشي وتروح ضليت كاعد على القبر لزمني من جتفي يــٰس ، اجاهلت الكل وضليت كاعد مااريد اروح واعوفها مثلهم هية ماعفتنا رغم الجوع والظلم والفقر ضلت يمنا شلون اعوفها وادير ظهري مثلهم..

يــٰس : يلا اسحاق كوم كعدتنا مراح تجيب نتيجة مراح نستفاد شي كوم ادعي الله يرحمها..كوم لازم نسويلها عزة لاتخليها بدون جادر ويكولون ماعدها احد ...

كمت ويا صعدني بسيارتة ويا ازدحامات بغداد طبينا منطقتنا المغرب واشوف عمامي ناصبين جادر كدام بابنا وكلهم كاعدين وناس هواي جاين منهم ولد عمامهم وعمامهم الكبار وشيوخنا ماكدرت احجي شلون اكوم الناس لو اتعارك وياهم كدامهم؟

سكتت وطبينا كلنا طبة وحدة كامو الناس يعزونا كعدت بعيد عنهم اجاني حامد وعمران

عمران: البقاء بحياتك خوية الله يرحمها..

حامد : خاتمة الاحزان خوية الله يرحمها..

- تعيشون شصار هنا..

حامد : ورة ماخابرتك اجينا لبيتك لكينا عمامك الضربهم سليم وياهم ولد جاي ينصبون بجادر ضلينا على صفحة صاحو علينا نساعدهم كربو عمران كراب شبعهم سب كساع متعارك وياهم ولازمة

نوب اجو ناس عاد لتيهنا بيهم وما سوينا شي لحد مااجيت..

- بالي يم سليم مستحيل يعرفني بهيج ضرف شصاير ويا

عمران : مانندل بيتة جان رحنالة تريد نروح؟

- لا بس خل تخف الناس اني اروح..

ضلينا كاعدين كساع جاي واحد وكمنا صار وكت العشة بدو الشباب يصبون والناس لتمت للاكل واني كبل بس صارت هوسة رحت لبيتنا اشوف دموع حتى اروح لسليم..

صحت على الولد كتلهم يضل عينهم على عمامي الي ابتعدو عني عشر مترات وراه السويتة بيهم ..

طبيت لبيتنا وصلت لباب المطبخ هواي نسوان عرفت بس نسوان عمي وكلهن كبرانات اخر شي شفتهن من فاتحة بيبي صحت مرت قادر ..

عمة بس اريد دموع صيحوها..

ندارت على بنات ثنين يمكن بناتها كبار بكد دموع حتى نسيت اسمهن كالتلهن :- امشن جيبن دموع .. البقية بحياتك وليدي

لعبت روحــي من كلمة وليدي اني مو ابن احد خاصتاً همة كتلها : الله يسلمج..

شوية واجن لازمتها منا ومنا لابسة اسود وشعرها متكطع وجها احمر تقدمت احضنها وشمرت روحها بحضني تبجي..

- شلون اطاك كلبك تدفنها اسحاق شلوننن .. ولك ريحة جدي وابوية هاي منو النة بعد شلون نعيش اسحاق فهمني..

- اش حبيبتي ادعي الله يرحمها هذا يومها ما بيدي شي وداعتج لو جان بيدي شي جان سويتة بس ارادة ربج ولااعتراض على حكمة صليلها ادعيلها هيه هسه ارتاحت شافت من حياتها بس القهر والظيم ..

هيه تهز براسها والنسوان الي بالمطبخ على حجينا اني ودموع ضلن يبجن وينوحن اطيت دموع للبنات وحدة منهن جاي تجرها طخت ايدها بيدي من رفعت راسي اباوع شفتها شكلها مو غريب كالت ..

صباح : البقية بحياتك خوية

- الله يسلمج .. ديري بالج عليها خوية ..

صباح : لا يضل بالك كلنا يمها..

هزيت راسي عفتهم وطلعت افتريت من ورا الفرع باوعت منا ومنا خاف واحد يشوفني شغلت سيارتي وفتريت عكس الشارع حتى من بين الافرع افوتلة ..

سليم بيتا بالبياع اشترة ورا مااشتغل ويا قاسم محد يندلة حتى اهلة بس الي كال علاقتي بسليم مو شغل ولاصداقة علاقتنا عبرت الاخوة كل اسرارنا سوة شغلنا ماضينا محد يعرفني بكدة اكو اشياء بحياتة اني مااعرفهن بس هوة كلشي يعرف عني ..

وصلت كبال باب بيتة طبكت السيارة بعيد عنة حتى لحد يشوفها نزلت للباب دكيت لحد ما مليت مجاوب عبرت من السياج ومشيت الحديقة نظيفة ومرشوشة يعني هنا هوة؟ معقولة بالبيت وما اجاني ؟

مشيت بسرعة لباب الصالة كسرت الباب علية ماكو صحت راح اكسر الباب هم ماكو صوت باوعت ماكو احد نداريت لباب الورة هم مامو الكلوبات شي مشتغل شي طافي لعب كلبي مارتاحيت..

اطيت اضل ادفع باب الورة لحد ماطك ونكسر طبيت ركضت ادور بالبيت البيت نظيف ومرتب طبيت لغرفتة وانصدم من اشوفة بيدة تليفون وايدة الثانية شاكها والدم تارس الكاع وهدومة ...

_______

مُروج :

جنت نايمة وكعدت على اشعارات هواي لكيت رقم خالد داز اكثر من رسالة فتحتهن يطلب اشوفة ونحجي استغربت ليش يريد يحجي ويا اعرفة يشتغل عد عمي ..

دزيتلة : خير خالد اكو شي؟

: لازم نحجي شي ضروري

- بس تعرف عمي مايقبل اطلع وهسه عطلة عدنا

: عادي عدج الشردة انتي نفس كل مرة ونركض وراج ..

ضحكت ودزيتلة : لا كلشي تغير

راح ابلغ اطلع بس مااكلة وياك ...

_______________

يُتبع

العاشر من هنا

تعديل المقال