رواية كفي والمنجمة الفصل الثامن 8 بقلم الكاتبة Leo alfatlawi

رواية كفي والمنجمة الفصل الثامن 8 بقلم الكاتبة Leo alfatlawi

كفي والمنجمه

للكاتبه leo Alfatlawi

بارت الثامن

صوت عمتي وصوت الرمي واني احس روحي تتكطع طلعت عمتي تركض اتشوف شنو الصار اسمع صوت مكرم يصيح ويه مؤتمن يكله لاتطلع والله يچتلوك ولك ايدك تنزف

زلم اهواي بالبيت بس هذه كله مواباله ولااسمعهم بس محتاره بروحي لان احس نهايتي قربت الالم مينحمل احس شي مني

ينشلع كل صرخه اصرخها تطلع من كلبي

اباوع المره العجوز اليمي اتخوف دخلت بيبي وياها كلتلها يلا فضيها لاتخليها اتلوع

--حجيه هاي ازغيره اخاف اتموت

هيه كالت اتموت والخوف اتضاعف كمت ارجف واصيح ماما لحكيني

بيبي. لاع ماعليها متموت جنها احصان نزلي الفرخ وخلصينه واذا ماتت هذه حد يومها

--راح اشتغل بس بمسؤليتكم

--اكلج متموت فضينه قبل لايجي زلمتها ويسبينا

اني شفتها كشفتني واني كمت اصرخ ولك مؤتمن الحكنيييي مؤتمننننن

لان عرفت هاي ناويه على كتلي كلبها اسود من وجها شنو الكقد الشايلته

العجوز تسحب بثوبي واني ادفع بيها واصرخ لمن صوتي انبح الخوف جان امسيطر عليه ضربتني بيبي بالعصه وكالت ولج خليها اتخلصج دمج راح يخلص وتموتين يمصخمه

--مااريد عوفوني طلعو منا ولك مؤتمننننن

هيه تتعارك واني ادفع واصرخ دخل على صوتنه مؤتمن كال اشصاير

بيبي. متخلي المره اتساعدها

--جذب يردن يموتني مؤتمن حباب لاتخليهن

احجي بشهكه واتوسل بي يحميني منهن

اجه يمي كمش ايدي كال غزل بويه يساعدنجن خليهن لاتخافين

--لالافدوه مؤتمن لاتخليهن اخذني للمستشفى ذني يموتني فدوه مؤتمن لاتعوفني

راد يشليني وبيبي كمشت ايده كلتله وين ماخذها البت اتسقط وانته حتى عقد ماعندك فوك الطياح الحظ فضيحه وهاي ايدك ليش هيج تنزف روح وعوفها هاي اعياره متعرفها انته

هسه ربع ساعه وتكوم مابيها شي كلنه سقطنه وكمنه مابينه شي لاتخاف بس اطلع

اباوعله محتار كامش ايدي يباوعلي ويسمع لجدته

المره العجوز. يمه لاتخاف كل يوم كم وحده مثلها اطلع جوه ايدي بس اطلع منا

عصرت ايده اشرله لاتعوفني مؤتمن حباب دنك باسني من راسي واكال يمج مااعوفج بس خليها اتساعدج

--لالا مؤتمن الله يخليك لاتخليها توصلي

دخلت عمتي اني اتوسل بي وكامشه ايده حيل اخاف يعوفني وهيه سحبتها اتكله اطلع يمه هسه عشر دقايق وتصحى مابيها شي سحبته سحب مني اندارلي همستله لامؤتمن

بس دفعنه ويحجن ابراسه يقنعن بي جان خايف ومحتار

مؤتمن. جده هاي ازغيره اخاف ممتحمل خليني اخذها للمستشفى

ولك اذا اخذتها هسه متلحك للمستشفى اتموت بالطريق تنزف هاي الجده اتعالجها اطلع لااتضل اميبس راسك اشعرفك بشغل النسوان يلا اطلع

يباوعلي محتار بس وهنه مستمرات لمن اقتنع اذا اخذني مالحك اموت بالطرق لازم الجده تشتغلني ابسرعه خلينه يطلع قفلن الباب

بيبي. اذا سمعت صوتج اجسر العصه على راسج واموتج بيدي خليها اتخلصنه من بلوتج

الالم جان اموتني اتكلب اتكلب وانوب هاي اتخوف الواكفه على راسي

اول ماخلت ايدها على بطني حسيتها شعلت روحي كل صوت يطلع مني يشيل البيت شيل هيه اتشتغل واني اشيل روحي واركها بالكاع من الوجع جان مينحمل حتى تخدير ماانطتني من حسيت روحي رخت وبيبي واكفه على راسي كل صوت اتكول وسم عساج ماگمتي بعد مااحس بشي حتى صوتي راح

العجوز. هاي تنزف مااكدرلها خلي زلمتها ياخذها للمستشفى

بيبي. اتصخم اوجوهنا هاي اذا اخذها هوه الدافعها تالي يبلو ويروح بيها

--جاهاي اتموت مااكدرلها لاتذبوها ابراسي

--متموت كملي شغلج

--لاحجيه مالي شغل بيها شيخلصني من زلمتها اذا صارلها شي

عافتني الوج وطلعت لميت روحي اريد يهدء الالم اشويه

دخل مؤتمن دنك عليه وخر شعر عن وجهي كال وين اوديها

--عوفها دزيت احمد يجيب الجده ام سعد احسن من هاي الفاهيه

--غزل شتحسين

جنت بس اباوعله ودموعي تنزل مابيه ارد كال احجي بيج شي غمضت حسيت روحي رخت ماعندي طاقه

راد يشيلني بس بيبي اعترضت اسمع اتكله ولك عوفها

--صاح متشوفها انتهت لشوكت اعوفها راح اتموت

--ولك يچتلوك بس تطلع

--خلي يكتلوني وخري بعدي عن طريچي

لفني بالغطه وشالني وطلع يركض خلاني بالسياره وعمتي يمي خله راسي بحضنها وصعد يسوق اجه مكرم بيده اسلاح صعد ويانا خاف على مؤتمن وحده

اباوع السياره انترست دم مني وبطني بعدها توجعني بس خف مومثل من منساع بس مابيه بعد روح

عمتي تسالني مااكدر اجاوبها مؤتمن يسوق ابسرعه وكل اشويه يندار يكول راح نوصل اتحملي

بعديش اتحمل بعد ماموتني ليش مااخذتني من البدايه موتعرف اشكد يكرهني ويردن اذيتي

بديت افقد الوعي وخاصتا من اشوف الدم بملابس

--غزل يمه ردي عليه بيج شي ولك مؤتمن ابسرعه راح اتروح

حسيت تضرب على وجهي واخر شي سمعت صوتها وهيه اتصيح يبووو ماتت

حلكي مر وراسي دايخ لساني اثكيل فتحت اعيوني جانت بس عمتي ومكرم يم راسي ردت احجي ماكدرت رجعت غمضت

اخذت وقت طويل يالله كدرت ارجع لوضعي احس بطني تتشكك مااكدر اتحرك

صوت عمتي وهي اتكول يمه غزل اتسمعيني

--اممم

--يلا الحمد الله على سلامتج تنذكر ماتنعاد

--الطفل طاح

--فدوه الج يمه يجي غيره اهم شي سلامتج

فتحت اعيوني جان مكرم واكف يباعلي بس مؤتمن ماكو كال الحمد الله على سلامتج خويه

--الله يسلمك

--يلا معتازين شي اني طالع اهنا اشويه

--عمه. لايمه اخذ راحتك روح.

--عمه وين مؤتمن لو شمرني وراح

--يااا انوب هم هذه حضه ولج ياشمرج غير راح نص عمره وهوه واكف باب العمليات ونص دمه اتبرع بي الج والله يعمه خفت علي اكثر ماخفت عليج كلت هسه يصير بي شي من شفته كاعد بالباب وجها صاير اصفر من الخوف

--لعد غير ابسببه الصار

--والله يعمه كسر خاطري من يحجي بكسره و يحلف يكول فلتت من ايدي مادفعتها شنو خبل اسوي هيج بيها

--لعد وينه هسه

--غير انتي الله يصلحج طلعتي من العمليه اتصيحين وتسترحين بسيف متكليلي هذه اشلون جنتي ويا

خبلتي الزلمه ضل يشيل روحه ويركعها بالكاع اخر شي طلع مااتحمل يسمع اكثر

--عزا واكول مكرم كالب خلقته من هذه اني ادري حضي واعرفه سيف اجابه على بالي لو لازم تكمل عمه شراح يسوي هسه هم يعاقبني

--لاميعاقبج لاتخافين انتي بالشافعات كمتي لباني اتموتين وأيسنه منج حتى مكرم خبر امج كلتله تره اتموت ايضل ذنبها بركابكم هاي متعيش حالتها تعبانه

--يلا همزين خلي اشوف ماما

--ولج غزل شنو جان بينج وبين سيف والله ييمه عقلي راح لغير مچان من اسمعج اتكولين سيف لا

--عزا واكيد ابن اخوج هم شطح عقله وياج

--والله ماادري من يجي سألي

--اي علمود للنجف كبل بعد ميتعب روحه هسه عوفينه من لطمه احس ملابسي مبلله فدوه بدللي

--اي ذني جابوهن الج. كومي خلي اساعدج اتبدلين

كمت وساعدتني عمتي بدلت ملابس شلت شعري لميته هم متلوخ دم عزا هاي اني اشكد نازفه عساها ابختج مؤتمن

-- تره انطاج بطلين دم مكانه لاتدعين كافي حتى الطبيب مارضه كله ميصير هالكد تتبرع ميتحمل جسمك بس لخاطرج ماهمه شي وسوده عليه منا ايده تنزف زين ماراح بيها

ميروح واحد مثل مؤتمن لاتخافين عليه ولويش ايده تنزف

--اوووف سكتي عمه بس اريد اعرف امج اشوكت اتفوت حاله

سكتت اخاف ترجع تذكر شنو سويت

رجعت نمت وعمتي جابت مي وكطن كعدت تمسح شعري بس جان ريحه الدم اتلعب النفس

انفتحت الباب واتفاجئت من شفت ماما مالبالي صدك امسويها وخبريها

ادموعي وحدهن نزلن اجت حضنتني وتبجي

--عزا ولج ماما شمسوين بيج ذوله

--ماسوو شي اني طحت من الدرج

--يمه عزا بعيني وهسه اشلونج

--طاح الطفل

--يطبه مرض فدوه الج بلكي اتخلصين من ابو بعد

--ان شالله بس ماما لويش هيج سويتي

--يااا شنو سويت

--ماماااا

--يستاهل خلي يحس بحركه كلبي من اخذج مني وسوه بيج هيج لو لباله علي حلال وعليج حرام اتخبل من شافج ويه سيف وهوه يتختل ويه اصخامه وحد

باعي غزوله ماما هذه جهازج بعد الصار مؤتمن ماراح يخليج اتخابريني ظمي يمج علما اخلص شغل واخذج منهم

--منو يخليج تاخذيني

--غصبا عنهم راح اخذج اني عندي طريقه اخذج من بين اعيونه

--عزا ماما لاتوكعيني بمشكله ثانيه فدوه اليوم جان متت

--يعني هوه الكتلج

--لاوالله ماما اني ركضت وطحت من الدرج

اخذت الجهاز وضميته علمود لاواحد يشوفه جانت عمه اتباوعلنه بس حبابه ادري متفتن

دارت وجها سوت روحها متسمع لهت روحها اتعدل بالملابس مالتي

وماما ماخلت غلطه بالدنيا ولادعوه مكالتها عنهم لمن دخل مكرم سلم عليها وكعد بعد ماحجت استحت منه لو خافت مااعرف

بس بعديش لوتوصل ربع الدعاوي الكالتهن هسه مؤتمن بالفتحه الخامسه هوه وجدو

دنحجي وانفتحت الباب دخل مؤتمن اول مشافها كلها شكو اهنا

--عسها ابختك ولاشفت الراحه لبالك اعوفك والله اطين عيشتك اذا مافضحتكم بالسلف كله مااطلع فريال لولبالك حلال عليك وحرام على غيرك

--خلصتي يلا اتوكلي

--ولك مؤتمن اتريد اتموت بتي ولبالك اسكتلك

--يابه لاتسكتين منو كلج سكتي بس بتج هسه حرمتي اكتلها اصلبها هذه الشي راجعلي

--شنو تكتلها ابكيفك غير اذبك احبوس واخليك تتمنه اتشوف الضوه ولك متشوفها طفله بله ماتت بيدك

--يطبها مرض اتموت وحده تجي مكانها عشره

جانت ماما تحجي بحركه اتشيل روحه وتركعها بالكاع وهوه يحجي برهاوه وستهزاء خلاها اطفر من القهر

عنده قابليه يجلط الواحد بكل سهوله

جانت ايده ملفوفه من يم زنده راح الوشم خرب حيل يباوعلي بلهفه بس كلامه ميوحي هيج يحير الواحد يتمنالي الموت وعيونه عليه غير

دخل الدكتور يجيك الوضع سكتو اثنينهم اباوعلهم اتكول ارويسيه ماما اتباوعله بحركه وهوه كوه كامش ضحكته يعرف اشلون يستفزها

الدكتور. كله تمام بس اتخلوها اليله اهنا وباجر تطلع وهاي وصفه ودكتور الخفر يمر يشوف وضعها بليل هم بس اطفال ماكو بعد لمده سنه رحمها ميتحمل

ماما. عزه يعني سكطت بتي

--لاماسگطت بس هيه طفله اصلا ونزفت اهواي وحضراتكم ماجايبيها لهنا ابسرعه لمن متااذايه فاللافضل اتضل فتره بلا طفل حتى تسترجع صحتها

مؤتمن. هاي هيه دكتور مشكور اخذ راحتك

ماما لطمت على اخدودها كلتله سكطتها مؤتمن اترتاحيت

اجه يمي سحبني من مقدمه شعري رفع راسي وكال شنو واصل صوبج ولج اشرتله لا دفع راسي

ماما. الله يكسر ايدك ان شاء الله اذا ماخليتك تتمنه اضفرها اصلا اخليك بلا نسوان وحده وحده اطيرها منك

--ههههههههه لبالج بهاي تفاهتج العملتيها خربطتي الزواجه اشكد واثقه من نفسج انتي والله عجبتيني تره هيه مشكله ازغيره وحليتها ومحد خسر غير بتج زواجي هذه الشهر راح اجيبها واخليها تاج راسها لغزل

بماانو بتج بعد متنفع كحرمه خليها نستفاد منها للخدمه

--حسبي الله ونعم الوكيل بيك مؤتمن اذا ماخليتك اتعضعض اصابيعك ندم

--همم سهله الج مطلق الحريه اشتغلي ابراحتج التكدرين عليه عملي ويلا وين الكرن مالتج لوجايه وحدج

رادت تطلع كمشت ايدها ماما خليج بعدني ماشبعت منج

وين هذه زوجج وترديني اضل ماضل شي راح ارجعج حبيبتي بس صبريلي ديري بالج على نفسج ماما وهذه شعرج يتعبج كصي بعد عليمن متحمله تعبه اشو سيف وراح

همست ميخالف ماما فدوه سكتي انتي اتشعليها وتالي تطفه بيه

مؤتمن. استغفر الله يابه صدك الكرامه نعمه

ماردت طلعت ابسرعه وهوه ضحك وراها اجه يمي كال الحمدالله على سلامتج

--بعد وكت صار ساعه تسحل بيه ياسلامه هاي

مارد باوعلي جان رافع احواجه ماعاجبه جوابي اندار لعمتي كلها اني طالع عندي شغل

مكرم راح يضل اي شي تعتازي اتصلي

--ابروح عمك هدي مؤتمن مابيه حيل اشوط وراك لاتروح صوبهم والله يعمه تنحل

--لامارايح لصوبهم لاتخافين اي شي تعتازين خابروني دنك باس راسي وطلع

خلص اليوم وطلعنه ثاني يوم جان مكرم ويانه مؤتمن ماكو صعدنه للسياره

عمتي. ها يمه بشر اشلون صارت شغله مؤتمن

--حلها وعجلو العرس بس ام غزل بقت كون تكعد لاكلساع طالعتنه بسالفه

اشكد حلو ماما زارعه بيهم رعب من اتكول هالكدودها مخبله عشيره وخالتهم يلزمون استعداد وراها ضحكت شافني مكرم كال ضحكينه وياج

--ماكو شي بس فرحانه مؤتمن راح يتزوج

--استغفر الله صدك العقل زينه

وصلنه دخلت محد اتحمدلي عالسلامه اتكول كاتله ابنهم رحت لغرفتي بليل جانت تجي يمي هيفاء اتنام وبالنهار محد يدخلي اضل وحدي اخلص اكثر الوكت بالفون اسولف ويه ماما دوم هيفاء اتشوفني اتحذرني بس ابد مافتنت خطيه اشكد طيبه

بليل جانت كاعده يمي كلتلها قفلي الباب وتعالي اتفرجي وياي

قفلنه الباب وكعدنه اراويها فيديواتي المصورتهن من جنت عايشه بمريكا اكو فيديوات اني من شفتهن صفنت على روحي اشلون مصورتها خاصه عالبحر جنت اخزي بس اشلون جنت احس عادي مااعرف جانت خبله مااعرف لان عيشتي اتغيرت وشفت غيرت مؤتمن كمت احسب احساب لكلشي

--غزل اريد اشوف سيف اشلونه

--لويش

--هيج فضوله اريد اشوف هذه الشبع كتل لخاطرج

--اراويج صورته

--اي شي واشلون جانت علاقتكم

--عاديه جنه اصدقاء

شكلها جنت كوه حافضه روحي منه والله استحي احجي هسه يكولون لعد عليمن كاتله روحج عالرجعه لمج

راويتها فيديو جنه بالحديقه واكفه اصور وهوه اجه من وراي عصرني وباسني بخدي وبعدين شالني واصراخي وضحكنه صار عالي اتذكرت اشلون جانت حياتي اهناك اخذت الفون وضلت اتكلب متعجبه

--غزل انتي متاكده ذني ملابس لابسه لوعلاقتج بسيف بس صداقه ولج هذه شابع بوس بيج واحضان

--اكلج سر متكولين لواحد

--لاع

--سيف جان خطيبي وبعدين اتزوجنه واخوج طلكني منه واخذني

--اصخام الصخمج عليش ولج قبلتي

--موهوه ابكيفي

--جاوين عنه مكرم اواحمد اشلون قبلو

--ذوله جانو الشهود

--يعني مكرم يدري وجان ويا

--امم ويا وهوه الشجعه ياخذني

اباوعها صفنت كلتلها هاااا هيفاء نحنو هنا حبيبتي نصيحه مدام انتي هيج هامله روحج وذابه روحج ماراح يحاجيج ولايعبرج

--منهو

--لاتغشمين روحج تره دااشوف

--هيج مفضوحه اني بسلا هوه هم عرف

--لاحبيبتي امني هذه ينتبهلي وميتنبهلج على هاي الفهاوه

--عليش شنو البيج اكثر منه وهيج كاتلين روحم وراج

--مابيه شي ازيد والفكره البراسج شيليها تره منتبهتلج مكرم اخوي وماحاسبني غير اخت لوعنده غير شي جان هوه اخذني ماخله مؤتمن ياخذني

--غزل انتي حلوه مو مثلي

--عزا ولج اشبيج بس انتي تركي المطبخ وعدلي روحج اشويه لو عندج شكل خواتي جان اشسويتي

--يعني يجي يوم يحبني

--ولويش ميحبج

--ههههههه ولج غزل تدرين خواتج شنو يسمنج

--اعرف ميحتج اتكليلي كميت الحب المتبادل بينه موطبيعي

--احلاشي بيج ماامعبرتهن وهنه ناطات اشلون عندج قابليه هيج مجاهلتهن

--اتعلمت من اخوج

--هوه اخوي المكرود هيبه وشخصيته چدام العلم تالها وحده ابكد مااعبرته لبالج مامنتبهين ترانه انشوف ذاك اليوم يكلي ماكعدت ربانزل صدك ضحكني بس والله من صدك جاب التشبيه ضبط جنج ربانزل اعيونج اكبار وحركه

--انتي لومنتبها لمكرم ابكد شكلي جان هسه ميشوف كدامه شي غيرج

--عوفج من حبي كليلي هاي صورتج ويه سيف هم مابيها شي

--متشوفين صديقتي وياي هاي الصوره جان اموديني للمدرسه واخذناها سوه قبل لانجي لبغداد

--يعني عادي هيج حاضنج بالشارع كدام العالم وهاي صديقتج شنو طالعه وناسيه تلبس بنطرون

--لاولج لابسه شورت بس مامبين لان قميصها طويل

ضلت اتكلب ومتعجبه على المناظر والحياة اهناك اشلون عايشين كالت جنت اكول عليج متكبره بس هسه لاحقج تعترضين على عيشتنه

ضلينه للصبح كاعدين بعدما عادت الصور والفيديوات الف مره والف سؤال على كل صوره حسستني جنت بالجنه واجيت للجحيم متدري اهناك الكئابه اشلونها بس خليني مانه عليهم علاساس جنت ملكه زماني

طلعنه فلم رعب وضلينه انباوع للصبح يالله نمنه هيه اعترضت كالت موش وراي كعده الصبح

مو بطلنه شغل المطبخ وصار ساعه انخطط اشلون انصير اتكيت وكذا

جانت مامقتنعه اشكد حجيت كوه قنعتها

مؤتمن دوم يجي بليل بالباب دقايق ويروح بس يطمن

صارلي اسبوعين من طلعت من المستشفى اكثر وقتي اخلصه ويه هيفاء اعلم بيها كلبت شكلها

امها اتهوس اتفوت وتطلع تحجي علينه بس من تسمع مؤتمن خالها يمي تسكت

بليل نسهر بالنهار انام لو نلعب بشكلنه مؤتمن ملتهي ويه نسابته الجديده واخيرا انحلت الشغله وراح يتزوجون بدايه الشهر

طلعت للطارمه لكيتهن يسولفن على زياره شافتني عمتي كالت ها يمه اشلونج اليوم

--تمام عمه

--ماطولج نضفتي متجين اتزورين ويانه الصبح طالعين

--مؤتمن راح يرضه

--اي البيت كله رايح اكيد يرضه للزياره ميعترض مؤتمن

--تمام بس سماح لويش اتشوفني تبتعد عني

--تركيها يمه هاي خبله متضايقه على رجلها لان راح يتزوج

--لايمكن لان انضربت ابسببي بس تره اني اكلت الحصه الجبيره من العقوبه

--عوفج منها روحي حضري ملابسج تره ويه الفجر نطلع

رديت للغرفه حضرت ملابسي وقت الفون نمت كعدونه الساعه 5الصبح رحت للحمام اخذت دوش لبست الحجاب الاسلامي وضليت محتاره بالشال تالي هيفاء لبستني طلعنه لكيتهم مخبوصين يلمن غراض اتكول رايحين للمريخ شكو هالكد غراض جنه انروح لغير

ولايه مناخذ غير فوناتنا ذوله صدك يحجون

صعدنه بالسياره جانت جبيره كعدت يم عمتي بعد النعسه بعيني اتفاجئنه من صعدن تهاني وامها ويانه

--عمه شكو جايه هاي شنو متستحي

-- اليوم العقد راح يعقدون بالامام

--امم الله يسهل لعد اشوكت يطلكني

--غزل مووكتها سكتي هسه

صعدو الولد والسايق انتبهت لتهاني اتعمدت تكعد بالكرسي الورانه عرفتها شنو اتفكر

صعد مؤتمن ومكرم كلتلها عمه حبيبتي قبل لااحجي ضحكت كالت غزل ادري شكو ابراسج

--امم عفيه عمتي بعدعمري فاهمتني

-- يمه مؤتمن تعال يم مرتك هاي دايخه لااتطيح علينه

اجه لباله صدك كوه كمشت ضحكتي كعد يمي كلي اشصايرلج

--مابيه شي بس لان كعدت من وكت بعدني نعسانه

خليت راسي على متنه وغمضت اجه عطره ابخشمي

-- مؤتمن اشو بعد متلعب روحي من عطرك

--غير كتلتي الطفل بعد على شنو تتوحمين

--تره انته كتلته او لاهاي الورانا سبب موته

اباوعله سحب نفس ورفع راسه على كشن واجتف و غمض

اني هم غمضت الطريق طويل نمت اشكد كلمااكعد اشوف بعدنه مواصلين

كعدت شفته ويراسل بيها ويبتسم اشكد لئيم وماعنده احساس انداريت لكيتها هم تبتسم خرب احس اكو غيره ابكلبي صارت ماادري لويش

--مؤتمن عطشانه

--شنهو

--عطشانه اريد مي

كام جابلي كاسه انطانياها اخذتها شفتها اتباوع اجت فرصتي شربت اشويه وكلتله وين اودي الباقي

--شمري من الشباج

--لاع ميصير انوصخ البيئه كافي هيه وصخه اشربه انته

اخذه وشربه عفس الكاسه شمرها هوه من الشباج رجع يراسل ردت اشوف سحب الفون وخره كال وين

عضيته من متنه اصلا مااهتم ولاعبرني اتكول اعض بالكشن مالت السياره

سحبت الغتره من راسه

--بويه بيج شي

--هئ بس بردت

نزعها وانطانياها

--بطلت مااريدها اخذها ولااتعيط عليه مره لخ انداريت للشباج سويت روحي زعلانه

فتح الغتره ولف امتوني بيها وسحبني لحضنه كال لاتتمرضين مابيج بعد روح نامي من نوصل اكعدج

والله مجنت طايقته بس ادري وراي تهاني دتغل قهر ادري عينها بينه واني ضليت كل اشويه حايصه شكل ساعه اخلي راسي على صدره ساعه على متنه هوه على نومته عضيته من صدره فتح اعيونه متعجب كال شنو غزل بويه اشبيج

--مااكدر انام وجوعانه

--استغفر الله ماضل نص ساعه ونوصل

--لعد وخر خلي اروح يم عمه ضجت

-- ركدي بويه وخزرني بطلت خفت لان يمكن زودتها اندريت على تهاني اممم بعد نص ساعه وحصيرين مرته مبروك مقدمه

--شكرا

-- شوف مؤتمن اتكولي بس شكرا واني انطيتها زوجي والله عالم صدك ماعدها ذوق

--جاشنو تردين اكولج

مديت ايدي وكلتلها بوسيها ابسرعه سحبها مؤتمن وخزرني

رجعت كعدت عدل وخليت راسي بحضنه اكتشفت اشكد عنده صبر ومتحملني

الجبه خنكتني وهاي عطر تهاني ابخور تره عيع

سحب نفس وغمض اعيونه مارد

--انته لويش اتعاملني هالشكل

--بويه حجيت شي هسه استغفر الله يعلة كلبي استجني اشويه راح نوصل

سمعتها وراي كالت مؤتمن اني ابسرعه سحبت ايده وصرت ابحضنه كلتله لادير وجهك عوفها هوه ابتسم وسكت مارد

واخيرا وصلنه نزلنه كربله اتجنن اول مره ادخلها بحياتي امشي ومتعجبه منضرها يجنن احنه عائله جبيره الولد جانو كدامنه يمشون واحنه كومه نسوان وراهم

رجاء تمشي وتتنعوص وكلش ملايكلها وكامشه ايد احمد ذوله شنو حيخلفون

ام مؤتمن وكفتنه اشترت جكليت للعقد وحلكها شاكته من الاذن للاذن وسماح على طول الطريق تبجي بطرانه هذه ماانزل على دمعه مو ابجي

تهاني ميته طايره متمشي عالكاع اتريد تاكله لمؤتمن جان يمشي كدامنه وهيه يمنه تمشي صحيح هوه حلو بس مومال وحده هيج تكتل روحها عليه هاي فاضحه روحها وانوب اتباوعلي صفح ومؤتمن هيج كلي اسويلج وهيج كلي اجيبلج ووووو اشكد لغت

وعمتي اتكمل وراها يمه واخيرا مؤتمن اخذ الرادها كلبه هسه صدك عريس انحسب وكفت كدام الامام ورفعت اديها كون يسعده وياها ويشوف الذريه الصالحه

اشلون مقتنعه صالحه وهيه ببيتهم حتصير

قبل لاندخل وكفو يم صايغ اشترو الحلقات موحبآ بي بس حزت النفسي ذني كلهن ماسويتهن درت وجهي مااريدها اتشوفني وتتشمت طلعو وهيه ماقصرت ابسرعه اجت يمي جنت واكفه يم هيفاء كالت شوفو شنو اشترلي كلتله عندي بس هوه اصر كال لااريدلج من يم الامام علمود يتبارك زواجنه

--الف مبروك تتهنون ان شاء الله وين الشفيه رجلج شنو حنبات اهنا

--هسه يجي واكله ونشوف رد فعله على هاي قله ادبج

--حتى اخذه وارجع للبصره وخلي اشوف اشلون اتعقدين ويينه لج

--اووف كلها دقايق واصير بااسمه واعلمج وقتها اشلون تحجين

عمه. غزل يمه تعالي نزعي حذائج بين ميجي مؤتمن

--هوه وينه

مكرم. اهنا هسه دقايق ويجي بس فضنها

خلصنه نزع الاحذيه انتضرنه اشويه اجه مؤتمن بيده جادر لبالنه لتهاني للعقد تالي من فتحه لبسنيا وعدله من فوك كال يلا دخلو وعينكم بيها مواتضيعنها

دخلنه اول مره ادخل هيج مكان جان يقشعر البدن اول مره اشوف هيج مكان مااعرف اوصفه لان شي ميوضع بوصف عابر واكفه اباوع مندهشه بالمكان

دخلنه جوه هيفاء كمشت ايدي كالت لاتيهين تعالي وياي تهاني بقت هيه وعمتي وامها يم مكرم ومرتمن حتى يعقدون

دخلت جوه العطر جان يدخل بالكلب استنشق العطر اتكول عطر جنه

رحنه للضريح اشوف العالم الي يندعي والي تبجي والي يصلي ويقره قران

زرنه وكفت هيفاء اتصلي وكفت يمها خلصت سلمنه وطلعنه رحنه للصحن شفنه عمه اطش جكليت ومؤتمن يضحك واكف ابصف تهاني رحنه باركنالهم

انداريت اباوع للعالم علما يخلصون شغلهم ام تهاني جانت اتوزع جكليت انطتني وحده وحجت همس صارت مرته هسه احجايه وحده تحاجيها اشلع اعيونج كالتها ورجعت اتوزع جكليت

عزا شنو من عالم ذوله اخاف امعوزين بيت جدو هسه كملت

عمه. غزل يلا ويانا تعالي انروح يم البنات

--ؤك جايه

مؤتمن. لاخليج لاترحين

عمتي. يمه شسوي ضاله وياكم راح اخذها يم اخياتها خليكم على راحتكم

--لاماعدنه شي خلصنه شغل وهاي اخاف اتضيعوها خليها وياي

--لايمه مااعوفها اني اكمشها

--تهاني روحي وياهم وسحب ايدي كمشها واخذني ويا

اباوع لتهاني وجها صار احمر يمكن اي واحد كلها بخ تنفجر

رحنه مقابيل الضريح كال كعدي خلي اصلي كعدت وهوه صله اجت امريه عجوزه كعدت اول ضلت اتباوعلي وبعدين سالتني كالت --انتي نازحه

--شنو مااعرف شنو نازحه

--يعني من الشمال انتي

--لامن بغداد وهسه بالبصره

--يااا وشوداج للبصره يمه

--بيت جدو عشت عدهم

--ليش عشتي عدهم وين اهلج

--بابا متوفي وماما اتزوجت اخذوني همه يمهم

--بيت منو انتم من ياعشيره

--بيت ----من عشيرة------

--عندج اخوه لوبس انتي

--عندي اخو وثنين خوات

--ادرسين يخاله

--امم بالخامس

--ويامن جايه للزياره

--ويه اهلي هذه اليصلي ابن عمي اليوم العقد مالته واجينه ويا

--الله يسعدهم ان شاءالله

--شكرا

خلص مؤتمن اجه كعد يمي ليش متكومين اتصلين

--مااعرف

-ماامصليه بحياتج غزل

--هئ

--يلا سهلا تتعلمين ان شاءالله هاج اقري زياره

--مااعرف اقره عربي

--ولاطكه

--لااعرف اشويه بس مومال اقره زياره اخاف اغلط وحرام

--راح اقره وانتي اقري وراي

بده يقره واني ويا بس كل اشويه كاطعها ويعدل الجادر لان يصعد ويطلع شعري ويرجع يكمل خلصنه

انتجه وباوعلي كال غزل شنو تردين طلب من الامام

--مااعرف بس عندي امنيه وحده

--ابروح ابوج لاتدعين عليه

--مم شعرفك هذه الطلب كلتها وعضيت شفتي

ابسرعه كز على اسنونه وكال خره بلشتج بالامام لاتسوين هيج حركات

--امم وانته بسلا عندك بعد طلب اشو حبيبتك واخذتها

باوعلي صفن ابوجهي ديحجي وكاطعته العجوز الجانت تحجي وياي من اشويه كالتله يخاله جايتك بطلب

--امري من اعيوني تاخذي

--ابني والله ماامدح بي خوش ولد وخريج وجاي ادورله على بت الحلال شفت هاي البنيه دخلت كلبي تنطينياها اذا اجيتكم

-- هاي حرمتي

--يااا جااسالتها منو هذه كالت ابن عمي وجايين للعقد

--اي عقدي على حرمه ثانيه

رديت قصده ثالثه خاله والله صرنه 3

--الله يزيدهن وينطك الصحي صدك عالم متعافيه عنده هيج مره وياخذ عليها كامت ضايجه

اباوع لمؤتمن كوه كاتمه ضحكتي لان وجها انطعن عاگد حاجبه كال ديري بالج اتكولين رجلي تره ينكص عمرج

سكتت مرديت هوه اتمدد وخله راسه بحضني ضليت العب بشعره الهي روحي هوه نام دقايق واجه مكرم كعد يمنه

--شنهو هذه نايم

--امم نام ضايج خطيه

--عليش شصار لازم مصيبه من مصايبج بت فريال

--خطبوني منه كلتها وضحكت

كعد على صوت ضحكنه شاف مكرم كله من يجون كعدني عدل راسه ورجع نام

--مؤتمن تره رجلي خدرت فدوه وخر

--انكتمي ولاتتحركين

عفته وضليت اسولف ويه مكرم علما اجن خلصن زياره كالن يالله اباوع لسماح كل عين صايره اشكبرها منفوخات من البجي وتهاني حلكها شاكته من الضحك بس من شافته نايم بحضني راحت ضحكتها

--مؤتمن مؤتمن كوم يلا

كعد فرك وجها وكام انطاني ايده كمشتها وكمت طلعنه بره فرشن البنات وصبو الاكل كعده اتخبل

تهاني. مؤتمن كومنه خلي انكمل نشتري كم حاجه منا ماطولنه اجينه

--انطي صبر خلي نتغده ونروح

نزعت الجادر لان اختنكت وكعدنه ناكل اشويه وكام مؤتمن كال خلصي وتعالي لحكيني راح وكف يم السياج اني هم ماجذبت خبر خلصت عالسريع وكمت

مكرم. خره بغيرتجن يالنسوان بس اتحبن الخباثه

--شنو دتقصد

--من اشوكت اتسمعين حجي وهيج طفرتي

--عفيه عليك موكلنا اختك همم

--لاوالله الله يطيح حظ اختي اذا وصلت ربع تفكيرج

ضحكت ورحت يم مؤتمن رحنه للسوك وصلنه للصايغ دخل كال اختاريلج حلقه

--لويش

--غزل انكتمي ولاطلعين صوتي اخذيلج حلقه خلي انولي

--انته موراح اطلكني شسوي بعد بيها

--استغفر الله اشلون راح اطكها بنص المحل الزلمه راح ينتبه غزل اخذيلج وحده خلي اولي ذيج امتانيتي

--تمام

اجه الصايغ كال اتفضلو

كلناله على طلبنه طلع اشكال بس موحلوات اشكد ضلينه اندور يالله حصلت وحده حلوه قبل لايدفع افلوس كلتله اريد ذيج المداليه

نزلنه الولد بس مااخذتها موحلوه رجعتها

-- شنو تردين فضيها

--انتضر خلي اشوف لوبس مرتك ساعه واكف وياها

عكد احواجبه بس ماحجه

اني اصلا ماارايده شي بس حبيت اعطله اريد ادق ذيج

الصايغ اشكد طلعنه اشياء بس ابد مونازكه اخر شي عجبني مداليه جانت بيها كلب ازغير بس كلش نازكه لمعتها اتجنن اشرتله عليها

كال هاي موذهب كلها

--لعد شنو

--الفص الماس بس راح اراعيكم بالسعر

--امم حلو اخذها

مؤتمن. من شيب امج تاخذيها

--لعد حتى الحلقه مااريدها رجعها يلا هاي لو تهاني جان انته ومغمض كلت بالعافيه اخذيها

--خره بيج وبتهاني اخذيها وفضبني

الولد حسبها حتى مبلغ ماعرفته اشكد لان دفع بالكارت

انطاني العلبه طلعنه كلتله اريد اشياء اخذ منا لاترجع فدوه

--غزل متشوفين روحج زوتيها

--هئ

--نرجع واشتري مناك

--لااريد منا بس كم حاجه ابسرعه

كمش ايدي بس حيل مال واحد ضايج ميخالف اتحمل لعيون تهاني

حاجه اجر حاجه وماخليت شي لمن شفت مؤتمن ورث من صدك كلتله يلا خلصت

رجعنه صاير الغروب وصلنه لكيت الوجوه مكلوبه اول مصار مكرم كدامي غمزلي كوه كمشت الضحكه

كعدنه اول شي فتحت العلبه وكلتله مكرم شنو رايك بيها اشرلي ؤك ذوق

-- هاي الماس تره

--اعرف بت خالي تشتغل عالثكيل ماادري عليمن طالعه

--تره هديه منه ماطلب اني تعرف مااحب الذهب

ام مؤتمن. يااا وانتي وين شايفه الالماس وتتطلبين

--والله تردين الصدك اني مجنت اطلب الهدايه تجيني وفوكاها هوه يتوسل لخاطر اقبل البسهن مره اشترالي ساعه بعيد ميلادي بسعر بيتج

--ياومنهو هذه اليشتريلج هيج اشياء

--هااا اءء

قبل لااحجي مؤتمن كام وكال يلا فضنها كومن عافنه ومشي كمنه ورا على السريع المن بغراضي واني كلبي معصور هسه اني اشلون فلتت هيج شي كدامه امداي علمود احرك تهاني راح احترك اني شلت الغراض وساعدتني هيفاء رحنه للسياره سمعت تهاني وراي تبجي يطبها مرض هسه واذا بجت اشو نسوان مؤتمن اليوم كضنها مناحه ياربي دخيلك بسلا اني وراهم يوصلني السره

وصلنه بالشافعات للسياره متت تعب شمرت العلاليك وكعدت ميته تعب مؤتمن غير مكانه كعد يم تهاني لان شافها تبجي

كلبي نغزني عزه لويش هيج دااحس شنو بسلا غرت ولويش اغار قابل ياربي دخيلك

حركت السياره خليت راسي على الكشن جانو وراي مباشر كاعدين اسمع ضحكها ويا بس صوته مااسمعه

اشكد ردت انام بس صوت ضحكتها بأاذاني ميخليني

فتحت الشال حسيت روحي مختنكه منه انضربت من وره انداريت لكيت مؤتمن خازرني كال ردي لفي عدل

--تره اختنكت

--غزل عليش اكوم اسحلج وشمرج من الجامه

--على شنو مؤتمن تره مسويت شي

--استغفر الله كلت لفي

--ماراح الفه كلتها ودرت وجهي حسيت جرني من شعري وكام اجي يمي انشلع راسي همس يم اذني شنو لغيت

--هدني فدوه تره كطعت شعري

--غزل اشوكت تنعدلين

--تره مسويت شي يعني هاي كولها لان اخرتك اشويه وشفت تهاني تبجي هيج انكلبت خلقتك لو لان خسرت

--اي عفيه لوخسارتي على وحده تسوه ميخالف بس انتي متسوين قندره

دفعت ايده ولفيت الشال عدل بس الشهكه تطلع من كلبي ابجي بحركه شنو هالاهانات ولازم ماارد واسكت اسمعه يستغفر

اتذكرت سيف من جان يتوسل اشتري ويكلي بدون لاتفكرين اخذي لاتخلين شي ابنفسج وهذه اشلون يذل بيه اتكول ماخذني فصليه

نزعت الحلقه وطلعت المداليه من الجنطه مسحت ادموعي وسحب ايده خليتهن بي كلتله مااريدهن تره والله مجنت اريدهن ولاردت اخسرك بس مااعرف اشلون هيج سويت اسفه

--غزل بويه انتي خبله لو شنو منهو كلج ابحال افلوسهن

--مااريدهن والله مؤتمن اصلا اني مااحب البس اشياء انطيهن لتهاني

--استغفر الله اخذيهن وسدي حلكج

--والله مؤتمن اشمرهن من الجامه لااتلح

خليتهن بيده ودرت وجهي للجامه

-- ادري ما خال شي ابنفسج وادري جان يريد بس رضاتج وادري جايبلج الدنيا كلها لخاطر ضحكتج تره خبلتيني غززززل كرهتيني بعيشتي من خره باليوم الفكرت اخذج دفر الكرسي وكام جان يحجي بحركه كال للسايق اووووكف

وكفت السياره نزل واشرله يكمل اتحركت السياره

احمد. شكو عليمن اتعاركتو

مكرم. خويه رجال ومرته عليش ادخل روحك

--غير نعرف هذه وين نزل

--شنهو طفل وخايف علي هوه يرجع اشوكت ماريد

عمتي. يبووو حتى الطلعه ماخلتنه نتهنه بيها بت فريال طفش الزلمه

تهاني. وجه الفكر اشسويتيله ووخبلتي

بيبي. دخيلك يالحسين چااجيتك بطلب تردني مكسور نذر عليه بس يصير البراسي لجيبكم اهنا وياي الذبابح

خفت من حجيهم كلهم التمو صفو عليه لميت روحي على الكرسي ودموعي مترضه توكف ادري بروحي اشمر حجي بس مجنت قاصده

الطريق صار اشطوله ماضلت احجايه ماسمعتها منهن كل اشويه ومكرم يكلهن كافي بس هنه مستمرات بالحجي والغلط لمن روحي طلعنها

اجت عمتي كعدت يمي خليت راسي على متنها وبجيت

--يعمه عليس اتسودين عيشتج بيدج

--عمه ماقصدت بس هوه ضاج وحده هسه وين راح

--ماعليه يفتر ويرجع بس يمه بطلي اسوالفج تره مؤتمن يغار وانتي كلمه والثانيه ذاكره ذاك

--عمه ماذكرته بس مااعرف اشلون هيج فلتت احجايه

--ولج غزل اتعلميني بسوالفج ولج راح يموت الزلمه وراح من الحركه انتي شفتي من جنه كاعدين وكلتي جابلي ساعه خليتي الزلمه وجها يصير اسود اكو وحده تحجي هيج كدام رجلها غير ابن اوادم ومارد واتحملج لو وحده غيرج جان دفنها بس يخاف عليج مريضه يمه غزل مؤتمن خوش ولد لاتضيعي من ايدج

--خوش ولد على نفسه اني مااحبه عمه ولاااريده ومابقى شي نطلك كافي عنده اثنين نسوان

--خلي اكلج من الاخير تره ماراح يطلكج لاتخليها ابالج ماراح يجي هذه اليوم وحتى من طلكج هيج من حركت كلبي كالها بدون شعور ندري بس يبرد يردج غصبا عنج

--لاهوه وعدني بس يزوج يطلكني

--امم هاي ينطيج تخدير حتى يسد حلكج عن الغوه مثل مايعمل ويه ويه جدتج وامه

--صدك انتي اشلون ساكته واتشوفين بتج هيج تبجي وهوه اتزوج

--مينقص منه شي اذا اتزوج اشويه وتتعود اقلها اموت واني مرتاحه بتي بيد زلمه يحافظ عليها ويصونها ماراح تنضلم ماطول عنده

--عمه تره اتزوج عليها مرتين بعد اكو اكبر من هذه الضلم

--هاي تهاني قبلها رايدها من همه وازغار وكلنه نعرف وبتي مامقصر وياها جاي اشوف بعيني بس هاي من حركه كلبها تبجي راح تتعود مو هسه اتشوفج كدامها ومتحجي عادي بس ياخوفي من ناس غيرها اذا كلبه اتحرك راح تحرك الوراها والكدامها

جانت تحجي واتباوعلي عرفتها تقصدني

-- عمه امني ماراح يجي هذه اليوم واخاف اتشوفيني اتشاقه ويا تره بس اريد تهاني تنقهر

--ايي يعمه تالي ينكلب السحر عالساحر ديري بالج على ارويحتج

سكتت خليت راسي على متنها ونمت اول ماوصلنه كعدتني

نزلتنه دخل الغرفتي ابسرعه وسديت الباب وقفلته مااريد احد يدخل ويلومني بعد ماعندي طاقه اتحمل

غيرت ملابسي ورحت لفراشي احس راسي يريد ينفجر خليت راسي على المخده ونمت حتى تفكير بعد مافكرت تعب وارهاق نمت مثل الجثه

كعدت وجه الصبح على صوت الفون طفرت اشلون ناسيته ماقافلته عزا الحمد الله ماشافه مؤتمن كمت فتحت شفت ماما متصله

ضلينه انسولف وسولفتلها على الصار كله وضلت كالعاده تدعي على مؤتمن حارمج من كلشي اني صوجي سمعت كلام قتيبه وجبتج لهنا لو باقين جان هسه مرت سيف اول مذكرت اسمعه اقشعريت حسيت احساس موحلوه مااتخيلت روحي ويا الحمد الله ماصرت اله صح جان امداريني بس مااتقبله كزوج

ضلينه للصبح انسولف لمن سمعت عمتي بوق الصباح صاحت يلا وينجن نايمات للضاهري هيه الساعه 7 بعدها سلمت على ماما ونهيت الاتصال

طلعت وياهن للمطبخ شفتهن كلهن قبلي موجودات كالوحده كامشه شغله صبحت عليهن

سماح. يمج الاماعين حضريهن

--تمام لعد وين رجاء موعليها الاماعين

--اي اهواي احمد يخليها اتمد ايدها كملي وسكتي

--لويش عيني وين التحفه رجلج ميحجي موخدام يم اخته احنه

--غزل انكتمي بالعباس بس يسمعج يفصم راسج بسج مشاكل

وكفت يم السنكي اغسل الاماعين دخل احمد

اجه يمي كال بعدي خلي اغسل اديه

وخرت عنه غسل اديه ونكثهن ابوجهي حضرته يتهزل بالبرد اشكد ماصخ

اخذت الاماعين ورحت بره اسفطهن شفت جدو كاعد

--صباحوو جدو

--هلايبويه صباح الخيرات اشلون صرتي

--تمام جدو

--تعالي كعدي يمي لاتضلين تفترين

--لاوالله جدو مابيه شي

--ميخالف تعالي يمي خلي اشوفج عن كريب

رحت كعدت يمه حضني وباسني كال اشوكت تتحجبين بويه وليش متلبسين مثل خواتج كلبيه

--هااا والله نسيت جدو هسه اكوم ابدل

--يلا خليج ماعدنه احد بس مرة ثانيه ازعل عليج

--مم والله جدو نسيت لاتزعل خلي اكوم قبل لاينزل مؤتمن هسه يضل يعيط عليه

--اشحده غير اجسر اسنونه

--على سالفه مؤتمن جدو اسكت تره نزل

--يابه سكتنه من البارحه اجه خلقته مكلوبه ماعرفت اشبي

سكتت سويت روحي ماادري اشبي اجه يمنه صبح على جدو وكعد ولااتكول اني كدامه اصلا مااعبرني

جدو. اليوم عدنه مشيه وفصل حضرت امورك

-- اي سحبت من الصندوك عشره

--خوش اتكمل ريوكك وتطلع اتمر على كاظم تاخذه وترحون لسعد وتخبر شيخ علوان على المشيه

اشر ابراسه لجدو ايي وهوه مدنك مجان يباوع لجدو يمكن لان اني يمه كاره وجودي

مر اسبوع واحنه واحد ميحجي ويه الثاني يجي يدخل يم بيبي اشويه ويصعد فوك لغرفته بعد حتى اشلون عايش مااعرف بس الحمد الله ماما جابتلي الفون همه معاقبيني مينطوني اخابر همزين عندي واحد اقلها اخلص وقت بي

عمتي شانه حرب ويانه متخلينه ساعه نكعد اتريد بس اتشوف طولنه حتى لوماعدنه شغل هيج كون نفتر كدامها بس اكثر الاوقات اني بالغرفه لان عدنه ولد كرايبهم يجون علمود يشوفون بيبي واني مانعني مؤتمن اطلع كدامهم واني هم فرحانه اخلص من الشغل

موعد دكتورتي صار يومين فايت بس ماكلت اخاف اكله يسطرني دفره

خليني ساكته احسن لمن اجتني عمتي كالت غزل يمه موعندج مراجعه

--يي عمه بس منو يوديني

--اني اوديج العصر نحجز ونروح

--تمام بس مؤتمن اشلون

--عوفج منه اخلي مكرم يودينه

حجزنه رقم وعالاساس مكرم يوصلنه لبست وطلعنه بس اتفاجئت من شفت مؤتمن يم السياره واكف قبل لااصعد اشرلي رجعي

--لويش ارجع لعد منو حيروح مكاني تره اني المريضه

--وانتي من بيج قزالقرط ومريضه اشلون طالعه بهالبس

--تره جبه اسلاميه لعد شنو البس

--غزل اترجعين واتلبيسن غيره ليش اجي واطلع روحج والمرض سوه

-- والله معندي بس وحده ومغسوله وبعدين محد حيشوفني هيه دكتوره ومراجعات يعني من السياره للباب عدل

عمتي. يعمه اتعطلنه وحاجزين رقم هسه ياخذون سرانه وتالي يتأجل غير يوم

--عمه صدك تحجين شوفيها اشلون طالعه

--والله يعمه مابي شي لبسها ييمه من الباب محد يشوفه يلا لخاطري وانوب جيبلها عبايه تلبسها من تطلع

ضلت اشكد يحجي وهوه يباوعلي يريد ياكلني قبل بطلاع الروح بس الطريق كله ينافخ وروحه بخشمه وكل مااريد احجي يسكتني بغلطه لذالك التزمت السكوت

وصلنه دخلينه للعياده وصدك جانن مراجعات بس ماكو رياجيل انتضرنه سرانه وكلما يقرب احس روحي اتروح اتذكر الصارلي كمشتني الرجفه من الخوف انفتحت باب الدكتوره كدامي واني جمدت من شفت البرده والسديه متت ابدمي

غزل معتصم

عمه. يلا يمه صاحو اسمج

--لاعمه بطلت خلي نرجع مابيه شي كلتها ونزلت ادموعي

--يااغزل يمه اشبيج كولي يالله ليش وجهج اصفر مااتسويلج شي بس فحص

--لاعمه فدوه مااريد خلي نرجع

--يااع صدك تحجين نعلي الشيطان وكومي

--مااا عمه ماادخل والله اخاف عزاا يمه ولاادخل لواموت

ماردت عافتني وطلعت اشويه ودخلت هيه ومؤتمن كال شكو عليش متدخلين

--فدوه مؤتمن خلي نرجع مابيه شي

حجيتها بتوسل وادموعي تنزل خفت يغصبني وادخل

--بوبه عليش خايفه قابل اتكلتج يلاعمه اخذيها فضنها ورانا طريق

شهكت بالبجي اتوسل يرجعوني ماافوت هوه شافني بهالشكل اجه يمي مسح ادموعي وحضن راسي كال عليش خايفه بويه

--فدوه مؤتمن الله يخليج خلي نرجع والله مابيه شي حباب

--اشلون نرجع غير اتشوفين اشبيج اخاف تعتازين علاج بعد لواتغيره الج

وخر راسي من حضنه يباوعلي كال دخلي واذا شفتيها اذتج افلش العياده على راسها يلا بنيتي لاتخافين صيري سباعيه

اني اتوسل وابجي وهوه يقنع بيه تالي امريه يمنه كالت يمه وين امها هاي خطيه طفله وتخاف على كيفكم وياها اني سمعتها وزادت شهكتي ذكرتني بماما وهوه اندارعلى المره خزرها كالها كلش وكتج هسه جبتها ضبط

اخذ حسره واندار رجع يتوسل بيه ادخل لمن شجعني وخلاني اقنع ادخل كال واكف اهنا منتضرج

دخلنه بس ميته خوف ضلت الدكتور تسال كومه اسئله بعدها كالت صعدي خلي افحصج

صعدت واول مفحصتني صوت صرختي رجع العياده حتى هيه طفرت

صفنت كالت شنو انتي رجال ميدنالج

--هئ

--يلا احسن خليج هيج لمن تتحسنين

رجعت كتبت على علاج وطلعنه امسح بدموعي شفت مؤتمن مدنك وخال اديه بجيوبه امتانينه

وصلنه رفع راسه وكال الحمد الله على سلامتج وره هالصرخه انعل ابو ومه اليحبلج بعد

اشكد استحيت طلعت ورا وكاتلني المستحى هسه اله اصرخ مااعرفت اصم حلكي اخذ الوصفه وجاب عليها رجعنه للبيت

دخلت للغرفه وسديتها رجعت للفون اخبر ماما لان لازم اخباري توصل لحضه بلحضه

بدلت وفتحت كام وياها هيه تسال واني اجاوب جنت خاله الفون عالميز واسرح بشعري اسمع سيف كال اشلونج غزل انداريت اباوعله اشكد متغير وضعفان مااعرف ارد عليه مااعرف خفت من مؤتمن مااعرف مااريد اذكر الماضي اشرتله تمام دااشيل شعري

-- كصي شعرج ليش خالته يتعبج

-- مااكصه سيف نسيت اشلون احب شعري

ماحسيت غير مؤتمن فتح الباب وصار كدامي متفاجى

للتوضيح":

اكثر البنات تسال اشلون غزل اتكول احجي عربي مكسر وجاي نقره لغتها عدله؟

اذا اريد اكتب على طريقه كلامها راح اتلاقون صعوبه بالقرائه

لهجتها بغداديه حلوه بس اشويه الاحرف تعوجهن (واكثر المصطلحات بدت تتعلمها منهم )

تحلف بالمسيح وهيه مسلمه ؟

تره عادي اكثر العايشين بره يحلفون بالمسيح ابسبب اختلاطهم بالاديان

باقي الاساله قريتها بس مااكدر اجاوب عنها لان تحرق احداث القصه بالبارتات الجايه راح تلكون الاجابه

التاسع من هنا

تعديل المقال