رواية تبديل عريس الفصل السابع 7 بقلم جمانه السعيدي
سلسبيل....بعد سقوط النظام واستقرار الأمن شويه
امي صار راتبها محترم
قررت تسحب قرض وتبني قطعة الأرض الي تملكها
امي محتاجه تستقر ويكون عدها بيت ملك خاص الها
لان عائلة خالي اركان جاي تكبر وبيت جدي زغير
يعني اني وامي وبيبي محشورين بغرفه
وغرفه الخالي اركان هو وعائلته
واستقبال وهول ومطبخ زغير
مرات الصبح نكعد نلكه خالي نايم بلاستقبال
يشرد من الجهال
صار عنده اتلث اطفال والمكان مايكفيهم
المهم امي سحبت قرض على راتبها وبدت تبني بيتها
باقي الراتب على الفلوس الي توصلنا من بابا كل شهر
كانن مشياتنا
امي اساهم بنص مصرف البيت والنص الثاني على خالي
خلال سنتين كدرت امي تكمل بناء بيتنا
بهاي الفتره اني صار عمري ٩ سنوات
كل زياره من بابا اليه كان يسئلني عن امي
شلونها شلون صحتها
طبعا هو كان مطمن بعد كل هاي الفتره امي ماازوجت
ولا تفكر بلارتباط
وهذا الشي كان يفرحه لان يعرف هيه شكد تحبه
ومستحيل ترتبط بواحد غيره
سلسبيل...بابا بيتنا كمل تكول ماما بعد شهر ننتقل
محمد...زين راح يصير عدكم بيت
سلسبيل...اي بيتنا حلو اني رحت وياا ماما نشوفه
بس هو بعيد
هواي نبقى بلسياره يله نوصل
محمد...اني راح اجيبلكم هديه من تنتقلون للبيت الجديد
سلسبيل....اكول الماما راح اجيبلنا هديه
محمد..اي كولي شوفي شنو تريد هديه واني اجيبلها
سلسبيل....اي شي
محمد...اي شي اطلبه اجيبه الها
سلسبيل...من رجعت للبيت وامي شافتني شايله
علاليك
سميره....اليوم اجاج ابوج
سلسبيل....اي وجابلي كلشي
سميره.. هم سئلج عني
سلسبيل...اي سئلني ويكول راح اجيبلكم هديه على البيت الجديد
سميره.. مانريد منه شي
سلسبيل....لا كال اي هديه تطلبها ماما اجيبها
سميره....بعديش
سلسبيل....شنو يعني ماتردين هديته
سميره....العمر خلص ياماما بعد مايفيد شي ضاعت الايام الحلوه
سلسبيل...ماما ليش ما بابا يجي يعيش ويانا هنا
مو خالو اركان عايش ويا زوجته واطفاله
ليش عايفنا وحدنا
سميره....لان عنده عائله زوجه واطفال هناك بغير محافظه
جمانه السعيدي
سلسبيل...عندا بعد جهال غيري
سميره...اي عنده وعنده زوجه عايش وياهم
سلسبيل...يصير واحد عنده عائلات ثنيين
سميره...اي يصير واحد عنده عائلات ثنيين هو يحب ذولاك اكثر من عدنا
عايش وياهم وعايفنا
سلسبيل...لا ماما بابا يحبني وانتي هم يحبج
دائما يسئلني عنج ويجيبلي هدايه
سميره.. لو يحبنا جان اجا عاش ويانا
سلسبيل...اني اخذت كلام امي وضميته بكلبي
منتظره ابوي يجي واسئله ليش ما يحبنا اني وامي
بقيت منتظرته هلمره شهر كامل يله اجاني للمدرسه
حضني حيل وباسني
محمد...يابابا لو تدرين شكد مشتاقلج
سلسبيل....لا انت ماتحبني
محمد...ليش مااحبج غير اموت عليج
سلسبيل...امي تكول ما تحبنا عايش ويا عائلتك ذيج وعايفنا
محمد...امج هيج تكول
سلسبيل...اي
محمد...زين كوليلها بابا يسلم عليج يكووول لو ما راسها اليابس
جان هسه احنا عايشين سوه
سلسبيل....زين اني اكوللها
سلسبيل...ماما يكول بابا لو ماراسها اليابس جان هسا احنا عايشين سوه
سميره...كوليله لو يحبنا جان عبر البحر علمودنا
سلسبيل...كلما التقي بابا يدز بيد رساله ولازم امي ترد علي
و ماتقصر بلرد
واني باقيه حشاكم مثل الحمار اجيب كلام منا وارجع منا
بدون ماافتهم شنو اللغز بينهم
انتقلنا البيتنا الجديد واخذنا بيبي ويانا
لان امي ماتكدر تستغني عن بيبي ابد وبيبي هم
روحها باامي
بعد ما نتقلنا للبيت الجديد بشهر واحد
بابا دزلنا طخم هديه البيت الجديد ودزلي غرفه نوم
ام النفر لونها وردي
دزهن بيد السايق
ما تتخيلون امي شلون فرحت بلهديه
رغم هيه كلما أكلها بابا راح يدزلنا هديه تكووول
مانريد هديته
من خلصت ابتدائيه ابوي جابلي تليفون هديه النجاح
التليفونات كانت توها منتشره بلعراق بس بدون نت
وخله بي خط بااسمي كلما احتاج رصيد يدزلي
كلما يتصل يطمن عليه
امي تكول افتحي الصوت
تريد تسمع صوته وهو يحجي وياي
تبقى كاعده بصفي منا لمن تخلص المكالمه
من يسئلني عنها راسا تضحك وعيونها تلمع
وكانما كانت كاعده تريد بس تسمع شلون يسئل عنها
جمانه السعيدي
سلسبيل...ماما انتي تحبي
سميره...منو
سلسبيل...بابا اكو واحد غيره
سميره...لا مااحبه
سلسبيل...ليش تسئلين عنه ليش من تسمعين اسمج
تضحكين اذا تحبي هيج ليش اطلكتي
سميره...لان هو ما يحبني لو يحبني جان عاف الدنيا كلها واجاني
سلسبيل...ليش ماانتي رحتي ويااا
سميره...مااكدر
سلسبيل...انتي ماتكدرين وهو مايكدر واضالين
وواحد.يدور اخبار الثاني اي انجمعو بهذا البيت
وخلينا نعيش سوه
سميره...صعب بعد هذا العمر ننجمع سوه
بلعطله بابا جان يتصل على خالو اركان حتى يشوفني
يجي خالي ياخذني البيته نكعد اني وبابا ساعه تقريبا
وبعدين يرجعني للبيت
بعد ماعرف بابا مكان بيتنا
بعدها اذا يجي البغداد يتصل عليه
وابقى منتظرته من يوصل البابنه يتصل اطلعله برا
نكعد اني ويا بلسياره نسولف ويسألني عن احوالي
بعدين ينطيني مصرف
ويروح من ادخل الكا ماما مكابله الكامره وتباوع علي
امي هاي مشكلتها مشكله تحبه وما تقبل تتنازل
حتى تعيش وياااا
صدك خشمها يابس وعنوديه
مرت السنيين وكبرت وصرت بلاعداديه
وبابا ابد ما نساني دائما يجيني ويذكرني
امتحنت سادس ونقبلت كلية صيدله بغداد
بابا هو الي بشرني بلنجاح والقبول
كان متابع اخباري وهو بين اهله
اتصل عليه وهو يكمز ويهوس ما مصدك نفسه
من طلع قبولي هو الي اخذني حتى اقدم جامعه
بيوم التقديم اعترفلي اعتراف حلوووو تحمست اكثر من سمعت كلامه
محمد...تعرفين ولدي الكبار واحد مدرس وواحد
تحليلات بس مافرحتلهم بكد فرحتي بيج
انتي فرحت عمري
احلى شي صار بحياتي انتي
سلسبيل...انت الي ماكو منك مااعرف شلون امي كدرت تتحمل فراكك
محمد...امج اخ من امج
طبعا اني الحد مادخلت جامعه واني ماشايفهةاي احد من اهلي ولا اخواني ولا عمامي ولا اعرف اخبار عنهم
مااشوف غير بابا
وهو الي يجي حتى يشوفني
جمانه السعيدي
من بعدها بابا بدا يجيني للكليه حتى يطمن عليه
صدكو البنات صديقاتي من يشوفنه يكولون هذا ابوج شكد حلو وانيق
ما تخطبينا اله
سلسبيل...بابا ترا صديقاتي معجبات بيك يكولن ما يخطبنا
محمد...هااا اي اني بعدني شباب
سلسبيل...غير تخبل انت وين اكو واحد بلخمسين وهلكد حلو
محمد...الله يبشرج بلخير هاي بنتي الي كلبها على كلبي
سلسبيل...من رجعت للبيت وحجيت الامي
انهدت عليه بعصبيه
سميره...بنات مستهترات رجال بكد ابوهن خلن عينهن علي
صدك بعد ماكو اخلاق واحترام
سلسبيل.. اني كلت البابا شو فرح من سمع البنات يكولن علي حلووو
سميره....اي هو منطيهن عين رجال شايب وبعد عينه على البنات
سلسبيل...يمه ليش انتي عصبيه ترا يتشاقا
سميره...لا مو عصبيه منو كال عصبيه بس كلمة الحق تنكال
ذني البنات ماربايات وابوج عوينجي
سلسبيل...وانتي بعدج تحبي كلمة الحق تنكال
سميره.. شنو احبه لا طبعا مااحبه
سلسبيل....يمه ترا انتي فاضحه نفسج ومن يجي طاري بابا ماتكدرين تسيطرين على مشاعرج
سميره...لا مااحبه بس احترم العشره القديمه بينا
سلسبيل .....حلوه حياة الجامعه حلو التغير الي يصير بهاي المرحله
سلسبيل...من اول سنه اليه جامعه اكو ولد ويانا
كان مسؤل عنا مسؤل الكروب بلجامعه
ولد مؤدب ومحترم وراقي
دائما احس مهتم بيه دون باقي البنات
اول وحده ينطيني خبر إذا اكو امتحان واذا اجت النتائج
يذكرني
اذا تغير موعد الامتحان يتصل عليه
كلامه محترم مايحاول يطفل عليه لو يفرض نفسه
كلامه على كد الشغل ما يحاول يسئل
لو يحجي زايد كمية الاحترام الي يحجي وياي بيها
واكثر شي احترامه النفسه
هذا الشي خلاني انشد اله واصير اهتم باخباره
هذا الولد من محافظة كربلا
طبعا هو بدأ يحس الاهتمام متبادل بينا
اني ادوره واهتم بي مثل ماهو يهتم بااخباري
خلصت السنه الأولى بدون مايكون بينا شي خاص
الكلام بينا على الدراسه
أثناء العطله لكيته دازلي رساله
مثنى...هلو سلسبيل شلونج
اسف اذا جاي ازعجج بس حبيت اطمن عليج
سلسبيل...اني اول يوم ماشفت الرساله
ثاني يوم يله شفتها
شكد فرحت بيها
سلسبيل...اعذرني ما انتبهت على الرساله توني يله شفتها
الحمد لله انت شلونك
مارد عليه لان ماشاف ردي علي
بليل دزلي....حبيت اطمن عليج
سلسبيل...الحمد لله تمام وانت
مثنى....تمام
سلسبيل...سكت عبالك الكلام ضاع منه
سلسبيل....شنو آخر اخبارك
مثنى....جاي اشتغل ويا ولد صديقي
اليوم اجيتي على بالي
سلسبيل....شكرا لان اجيت على بالك
مثني...اريد اصارحج بشغله بس خايف من ردج
سلسبيل...اي كول ليش خايف
مثنى...اني معجب بيج بس خايف اصارحج وترفضين
سلسبيل...معجب بيه
مثنى.. اي معجب اذا تنطيني مجال حتى أبين
مشاعري اتجاهج
ممكن نكون اصدقاء بلبدايه وبعدين نشوف هاي العلاقه وين توصل
شوفي من الاخير اني مااعرف اعبر عن احساسي
خليج وياي الحد مااشرحلج وضعي
سلسبيل...ولا يهمك اني وياك
مثنى...يعني تقبلين نحجي ونتعرف على بعض
سلسبيل.. اي اقبل ليش لا انت انسان محترم
