رواية كفي والمنجمة الفصل السابع 7 بقلم الكاتبة Leo alfatlawi

رواية كفي والمنجمة الفصل السابع 7 بقلم الكاتبة Leo alfatlawi

بارت السابع

دفعهن واجه اتجاهي ماحسيت غير سحبني من شعري صاك على اسنونه كال صح موش زلمه لان خليت وحده مثلج بااسمي

ركضت عمتي كمشت ايده وتتوسل يعوفني باست حتى ايده دفعني حيل انلطشت بالكنتور كال يلا طلكتج ارتاحي خلي اشوف تشلون راح اتعيشين وياهم كالها وندار راد يطلع

مااسمع غير صوت عمتي وهيه اتصيح الحك امريتك راحت

راسي صاير طبل اريد افتح اعيوني مااكدر غواش عليهن كوه فتحتهن اشوف عمه كاعده يمي ومؤتمن منتجي عالحايط امجتف بس واكف على اعصابه يباوعلي بكره

--عمه وين اني

--ها يعمه بالمستشفى هسه جيك وضعج الطبيب وكال مابيها شي بس امتانين التحاليل ويخلص السيروم

--شنو الصار اشجابني اهنا

--الله يهديج بسج يعمه سكتي

مؤتمن. عمه حضريها رايح اجيب التحاليل واجي اشوفجن حاضرات نطلع لبسيها حجابها عدل

--اي يعمه

--يلا يمه غزل كومي لبسي الشال عدل

كمت بس شنو راسي دايخ كوه امسيطره هيه ساعدتني البس الدنيا اتروح يمي وترجع كوه كملت لبس كعدنه امتاني يرجع

اتذكرت صدك هوه طلكني يعني اني هسه حره اي الحمد الله واخيرا

دخل مؤتمن شلت راسي جان بيده ورقه ويضحك اشر لعمتي

--شنو يمه

--هههه واخيرا راح يشرف ولي العهد

--يمه صلوت على محمد گرت عينك ييمه صدك ولك راح انشوف بزرك دخيلك يابو الحسن ماگصرت

--هههههه يعمه لاتطيحين يمعوده

--يبعد عمتك ولك ماامصدكه بعد السنين هاي كلها وهيج يجي ويفرحنه بشوفته كالتها وبجت ضحك باسها من راسها وحضنها صارت عينه بعيني راحت ضحكته كالها يلا حضريها خلي نطلع

رجعت اليه هيه اتبارك واني كلبي طفر من مكانه اشلون حامل عزا ابعيني معقوله من ليله وحده اشلون صار لو هذه حظي كلما اكول انعدل يمل اكثر حسيت الدنيا ضلمت ابعيني يعني انتهيت راح ابقه عمري كله اهنا ماراح اخلص منهم ادموعي غصبا عني نزلت

--يمه اسم الله عليش تبجين

--وخري عمه خليني اكوم

--ياوين اتكومين غير تجي وحده اتشيلج السيروم

مؤتمن. بعدي اني اشيله اجه يمي بس جان ميباوعلي وفوكاها كالب خلقته راد يشيله كمشت ايده بيدي الثانيه كلتله على كيفك بدون لايندارلي صاح شيلي ايدج

وخرتها شال السيروم وكال العمتي لفيها زين قبل لاتطلعين عافنه وطلع

عمه. كومي يعمه شهالفال عليش البيجي يايمه

--انتهيت عمه ادمرت حياتي ومستقبلي يعني راح اضل وياكم عايشه بكابوس ماراح اصحى منه

--يااسم الله وشبينه احنه وهيج متردينه

--عمه مستقبلي مثلج احلامي كلها راحت ادمرت دااشوف روحي بيج هيج حكون

--ماراح اتصيرين مثلي لاتخافين يجي يوم وتشيخين عالبيت بت فريال محد يتجرء يگرب صوبج

--مااريد كلشي مااريد لااشيخ ولااريدكم من الاصل الطفل انزله لو اعرف اموت وراه هم مااخلي

--يبوو لايسمعج يعمي والله يذبحج سكتي بروح ابوج غير يكتلج ويكتل روحه ولج اسنين متاني يشم ريحه الطفل وانتي بكل برود هيج تحجين

دخل مؤتمن كال وين صرتن فضنها شافني ابجي مسحت ادموعي وكمت حسيت الدنيا افترت ردت ارجع اكعد كمشني

--وخر مؤتمن عني دفعته وعدلت روحي

عمه. استندي عليه يعمه لاتطيحين

مابيه شي اكدر امشي بس وخرو

طلعنه رحت وياهم للسياره جان ليل وضلمه وصلنه صعدت هوه شغل ومشى ابكد مااشوفه فرحان وطاير ابكد مااني محترك كلبي واحس رايحه للضيم والتعاسه ابرجليه علي طول الطريق ضلت ادموعي تنزل جان كلما يباوعلى بالمرايه الاماميه يشوفني بعدني ابجي يستغفر ياخذ نفس ويدير وجهه

عمتي جانت فرحانه اكثر منه كل اشويه و اتگله يمه على كيفك سوق ديربالك طسات

هوه يرد سهلا عمه اخفف

فرحانين راح يجيهم حفيد من الثوله الوراهم الله يحركم بنار جهنم ويدمركم مثل ما دمرتوني بس والله اذا مانزلته وخليتكم اتلطمون ورا مااطلع بت فريال

وصلنه نزل اجه فتح باب السياره كال لفي شعرج عدل

مؤتمن وخر فدوه مابيه احجي

دنك نزل الشال ولفه عدل وسحبني طلعت من السياره كال صيري وراي منا العالم

مدااشوف ضلمه

لحضه لاتتحركين لاتوكعين هسه اشغلج النقال لزميني من ضهري

جانو الناس بعدها دخلنه اني وعمتي اول مادخلنه للصاله عمتي هلهلت

مكرم. خيرر ان شاء الله

--ولك غير راح اتصير خال

--كولي والله ايييييي واخيرررا كالها وضحك راح حضن مؤتمن اشوف الكل فرحانه وتهوس اتباركله وهوه على وكفته اديه داخل اجيوبه ولااتكول هوه صاحب هاي الفرحه همه فرحانين اكثر اشكد ثگيل يفت الكلب

عفتهم ودخلت غرفتي اشويه اسمع حس الضرب عرفت علمود مؤتمن هذه جدي والولد من فرحتهم

خليت ايدي على بطني اتحسس الطفل شنو ذنبك واتكوين بين اهل ماعدهم غير الضلم والحرمان حتى راح تنحرم من امك مثل ماحرموني من ماما

حتلو كانت هيه الغلطانه ماكو بشر يغلط اذا ماشاف الضلم وعجز عن اخذ حقى

عذرتها بعد ماعشت وياهم وشفت ابعيني شنو من عالم

متاكده راح ياخذون الطفل ويسجلو بااسم سماح ومن راح يكبر راح يكلوله امك انهزمت وتركتك

بس ماراح اخليهم يوصلون لليفكرون بي مستحيل اخليهم ياخذو

الاحساس متخربط يمي وحتى تفكير بعد مااعرف افكر لان شغله مفاجئه صارتلي مااحاسبه هيج احساب

الباب تندك ودخلت سماح كالت صدك ولج حامل

--امم

--ولج ماامصدكه كلبي راح ينط من الفرح هيج واشوف ابن مؤتمن ابحضنه

--ان شاء الله متشوفي

--يمه اسم الله على ابنيه ربي يجيبه سالم ويكمل فرحته ولج غزل وروح خالي يكول مااصدك هيج اصير ابو حلم هالكد ماقديم نسيته

--ههه اخاف لبالكم صدك راح اجيبه الكم اذا ماحركت كلبه مثل ماحرك كلبي وارجعله السواه بيه

--غزل عقلي وتعالي يلا جدي يريدج

--مابيه حيل اريد انام وبعدين الولد كلهم اهنا استحي اطلع كدامهم دااحس كلهم عرفو اشلون صار الطفل

--هههههه استغفر الله ولج غير رجلج على شنهو مستحيه

--سماح فدوه والله تعبانه

--نامي خيه كلشي ولاتعبج اني اكله نايمه خلي امباركتها للصبح صدك ورانا كعده من الصبح باجر يذبحون الذبابح لخاطر الشيخ الزغير

--اكلج فدوه طلعي كملي فرحتكم واحلامكم بره بعيد عني

طلعت واني غيرت ملابس واتمددت نمت لليل واحس مؤتمن يمي عرفته من العطر احسه دخل بنفاسي عطره موتني مااعرف من كرهي لمؤتمن لو ابسبب الحمل كعدت معصبه علي كلتله شسوي اهنا

--شنهو شسوي نامي بويه

--انته موطلكتني بعد شنو

--طلاكنه باطل جنت بحاله عصبيه وبعدين موبحالج لوماالنسوان تارسه البيت ماادخل ولااباوع بجهرتج

--تره حتى زواجنه جان باطل

--غزل رجعنه لنفس اللغوه انطمري بويه مااريد اطگج

--مااكدر انام تره كاره وجودك اهنا خاصتا عطرك موتني

استغفر وكام طلع من الغرفه الحمد الله طلع خلصت منه رجعت ردت انام اشويه وشفته دخل مره لخ بس بيده ملابس اصلا ماعبرني ولاحجه وياي كبل دخل للحمام اشويه وطلع سابح ومغير ملابسه باوعلي كال بعد شنهو تردين نكث شعره واجه وخر الغطه قبل لااحجي كال اذا هيست حسج افلش جهرتج انطمري ابسرعه

--ادنه للطرف مالت الجربايه اريد انام ابراحتي

--استغفر الله اشلون اطلابه هاي بويه انطمررري

اني هم غمضت ابسرعه مالي خلك اتجادل ويا وادري هوه التمشي حجايته غصبآ عني وخاصتا هسه بعده مابرد من العركه مال العصر مستعد يسحلني لايعرف طفل ولامريضه شنو

بعدني مانايمه واسمع جهازه يرن اول شي رفضه بعدين ضلت مستمر امبين المتصل يلح كام يم الشباج فتحه ورد عرفتها تهاني من كال شصايرلج موهسه عفتج مابيج شي

امم لانايم جنت.-- الصبح الله كريم

والله يابويه نايم .-- اي الله يبارك بيج

ماكو فرق منج من غيرج نفس الشي. ههههه لايابه اهم شي انتي كالها وباعلي مستهزء بيه

هوه يحجي واني افور طير النومه وماحاسب اي احساب كمت صحت مؤتمن تره اكو احماره وياك بالغرفه

عاف الفون وصفن كال اي والمطلوب شنو

--تره طيرت نومتي واني تعبانه شنو متحس اتريد اتخابر اطلع خابر بره امبين شغلتك امطوله واني نعسانه

--غزل نامي بنيتي الله يهديج

--شنو مخبله والله يهديني

عافني ورجع يخابر وانوب اطور كام يسولف ويضحك بصوت عالي يعني من صدك دقني خلاني اطفر من القهر

ردت انام ماكدرت واني اسمعه اشلون يحاجيها ويتغزل اشكد ميستحي

اتذكرت اني بدون عشه كمت كلت خلي اكل علما يخلص تفاهتهم قبل لااطلع صاح ويين اموليه

--اروح اكل جوعانه

--لبسيلج شي الولد بالبيت

--امم هسه

رجعت لبست بشت على ملابسي وطلعت رحت للمطبخ فتحت الثلاجه سويتلي لفه اكلت اشويه حسيت معدتي كلبت يمكن من البرد عفت الاكل غسلت اديه ورجعت للغرفه بس ردت تستقر لان احس روحي تطلع من تجيني هاي الحاله لوادري ماطالعه وماكله فتحت باب الغرفه لكيته على وضعه بعد يخابر وبغير عالم رايح وياها ميحس شنو يمه

رجعت للفراش بس احس روحي اتريد تطلع كوه كاعده اخر شي مااتحملت ركضت للحمام اتقيئ اجه وراي كال شصارلج

--كله من وراك كعدتني وخر مؤتمن كلتها وبجيت

--اعصابج تعالي رجعي لفراشج هسه اصيحلج عمتي

--شسوي بعمتك بس وخر هسه اصير زينه

--يلايابه بس هدي مويمج

رجعت لفراشي وهوه غلق جهازه بس الحقيره ضلت تتصل وهوه يفصله اخر شي كلتله مؤتمن اطلع خابر بره فدوه والله تعبانه حجيتها بتوسل ويا لان حسيت من صدك ماعندي طاقه بعد اتجادل

غلق جهازه نهائيآ وكال نامي بويه على راحتج ماراح ازعجج اتحمليني بس هاليله

استوني اغمض اعيوني حسيت ايده على بطني ردت اوخره كمش ايدي كال ابروح ابوج بس خلي اتلمسه هم اتحسين بي

--هئ

--غزل اتكتري عن اهلي خليج بعيده لاتگربين صوب احد

--لويش

--من غير لاتسالين

--اتخاف على ابنك

باوعلي وصفن ورجع اندار انطاني ضهره كال نامي بويه

غمضت اعيوني وماحسيت بعد للصبح لان نمت بتعب

كعدت على صوت الضرب عرفت كعدو العرسان كمت بس عندي خمول جان كوه رحت للحمام غسلت وغيرت ملابسي دااطلع اتذكرت راح تجي تهاني مااريدها اتشوفني بهذه منضري رجعت للمرايه خليت ميكب وعدلت رجعت غيرت ملابسي وشلت شعري طلعت شفتها صاير ملحمه من الناس ذوله منين ولاواحد اعرفه صايره هوسه

رحت لغرفه بيبي دخلت سلمت ردن السلام ام مؤتمن ماردت كالعاده كامت اجت يمي جنت بعدني بالباب دفعتني اجيت اطيح كمشتني عمتي ام مكرم واشرتلي اشش

دخلت جانت الاوجوه مگلوبه حتى العجوز نفس الشي نزلت سماح من فوك شافتني كاعده اجت تضحك دخلت كالت اشلونه النونو

--تمام

--اجيبلج حليب

--هئ مااكدر من الصبح اشرب شي

العجوز. كره عينج ييمه والله صبرت واجاج الفرج

سماح. مشكوره يجده ربي يجيبه سالم ويفرح كلبنه كالتها و راحت شبكتها وباست ايدها

ذوله من كل عقلهم يحجون راح انطي ابني عفتهن ورحت للمطبخ اريد اتريك دخلت سمعت وحده اتكول يااا هاي ام غزل الاجت

حسيت كلبي وكع بالكاع من سمعت ماما ركضت طلعت لكيتها واكفه تتوسل ومكرم يمها مانعها من الدخول ويكلها بلا صوت العالم اهنا رجعي منين مااجيتي لاتفضحينه اتعرفين روحج غير مرحب بيج ليش اتذلين ابنفسج هالكد

ركضت وصلت يمها حضنتها وابجي اشكد مشتاقتلها حضنتها وبجيت من كل خاطري لمن مكرم سحبني منها كال رجعي لغرفتج غزل وانتي يلا اتوكلي

بس اشويه اشوفها فدوه لخاطري حباب مكرم خليها والله حموت لشوفتها بس هالمره فدوه

بس

غزززل خويه دخلي جوه وانتي يلا بلامشاكل ابروح اهلج هسه يجون واتصير مصيبه

ماما. ولك بس اشوفها لويش تحرمني منها هاي اوحيدتي

دفعني وسحبها يطلع بيها يكلها انطاج جدي انذار بس امبين انتي بعدج جنج ابليس متمشين غير الابراسج

اباوع ماما كدامي تتوسل وهوه يدفع بيها واحمد جان واكف انوب هذه يباوع لماما بس يريد يفترسها اشكد عائله حقيره لمن طلعها من البيت بدمعتها

رجعت كمشت مكرم احجاي بتوسل فدوه مكرم لاتوجع كلبي خليني اشوفها اشويه انته ضل واكف يمنه بس اشويه فدوه اروحلك اني اكول اجدو مراح يزعل منك فدوه

ضليت اشكد الجي واتوسل شفتها راحت واني انهاريت لان بعد مااشوفها متاكده راح يحرموني منها اباوعها صعدت السياره واني متت

راحت ماما ومالحكت حتى اسولف وياها واشبع من حضنها اشكد كرهتهم وحقدت عليهم حلفت ماراح اخليهم يرتاحون

رجعت للغرفه واني كلبي يفور عليها من شفتها ادموعها تنزل وتتوسل وهوه يدفع بيها الله ينتقم منهم ماعدهم لاذمه ولاضمير

بعد ماطلعت اسمع ضحكهن واسوالفهم كلما يمر يوم حقدي يزيد اكثر للمغرب واني على حالتي حسيت كلبي تعب هالكد مابجيت

انفتحت الباب دخلت سماح كالت غزل سويتلج حليب كومي شربي

--مااحبه وطلعي يلا منا سماح لاتجين غرفتي بعد

--موابكيفج هسه يجي مؤتمن وهو يتصرف وياج

--تره انتو مامشتريني سماح طلعي ولي

--غزل انتي امخبله شنو ذنب الطفل اتموتي جوع

--وانتي شكو ابني ابكيفي اموته اخلي عايش ميخصكم

--هسه اروح لجدتي وهيه تتصرف وياج لان الضاهر موش بعگلج انتي تردين واحد يعقلج

عافتني وطلعت ضايجه يطبج مرض نفس الطينه همها كله بس الطفل

بعد ماطلعت دقايق ودخلت هيفاء كالت كومي جدي يصيحج

--شيريد جدج

--يريدج يكول خلي تجي

--لويش لازم سماح فتنت تره مااشتهي موحتى الاكل اتغصبوني علي

--مااعرف غزل فدوه كومي هسه يضل يعيط عليه

كمت طلعت وياها لان خطيه اعرف اهنا الضعيف ينوكل عدهم وهيه الراح تترزل جانو كلهم مجتمعين بغرفه جدو دخلت شافني اشرلي اجي يمه

رحت وصلت يمي كال كعدي بويه عندي حجي وياج

--اي جدو كول اسمعك

--اول شي شايفه الخير واتكومين بالسلامه يبويه

--شكرا

--وثانيا انتي طلاكج اتأجل هسه ميصير لان حامل لمن تولدين يالله تطلكين ولو اني ماراضي بس هاي رغبتكم اثنينكم

--مم جدو شنو الجديد

--انعدلي من احجي ولاتعلين صوتج

--تمام اسفه

--عليش متاكلين وانتي مريضه

--مومريضه اني حامل والطفل مااريده اريده يموت

--عليش يبويه اتموتين روح

--مااريده جدو موراح اتطلك بعد شكو خالته

--غزل شوفي بويه خلي اكلج شي خلي ابراسج تردين اتشوفين امج واترجع تدخل لهنا مثل قبل حفيدي اشوفه كدامي

--اجيبلكم الطفل بس خلوني ارجع لماما

--رجعه مترجعين بس راح ترجع امج تدخل وانتي ترحيلها كل فتره

--تمام راح اجيبه ميخالف بس خليني اشوف ماما هسه والله جدو حموت مشتاقتلها لاتكول بعد تسع اشهر فدوه جدو

--لاراح اخلي مؤتمن كل فتره ينطيج نقال خابريها ومن اتكومين بالسلامه هديتج شوفتها

--تمام مسحت ادموعي حسيت اخدودي تحركني هالكد مابجيت اليوم دااكوم شفت مؤتمن صافن ابوجهي حس دنك عفتهم وكمت للمطبخ اكل لان سلامة الطفل مقابل ترجع ماما تجي لهنا بلكي تكدر ادبرلي شغله وتاخذني منهم واخلص بس هسه لازم احافظ عليه

مرت الايام واني مخلصتها بين الحمام والنوم جان وحامي كلش صعب صايره اكره كلشي بالاخص مؤتمن اشوف ابليس ولااشوفه لواشتم عطره حتى هوه بطل بعد ميخلي عطر بس مااعرف حتلو شفته احس معدتي تكلب بالحمام واكفه عالمغسله ودخل للغرفه جاب اشياء اموصيته عنهن شافني اجه كال اشصابج بويه

-- بس ذني العطور اليمك فدوه شيلهن مااكدر اشوفهن

--سهلا هسه اصيح سماح اتشيلهن كالها واجه كمشني من ضهري يمسح عليه غسل وجهي شلت راسي الدنيا تفتر

--شتحسين

--راح اموت

--استغفر الله ربي تعالي بويه ردي لفراشج ولاتضلين بالحمام راح تنتهين

--وخر ذني الشامبوات والصابون مااريد شي اهنا كوله شيله ولااتكول سماح بيها بخور مااكدر اشوفها

--بس ردي مچانج لاتطيحين واني اشيلهن

رجعت اتمددت غطاني وسحب وحده من العلاكات اني خاله ايدي على خشمي واشرله وهوه يخليهن لمن صفينه الغرفه فتح الباب شمرهن وسده اجه يمي كعد كال متخليني اخذج للمستشفى بلكي ينطوج شي تخلصين من الوحام

--هئ ميروح عمه اتكول 3 اشهر ويروح وحده

--يلا الله كريم ماضل شي

--مؤتمن

--ها بويه

--راح تاخذه وتنطي لسماح مثل ماكال جدو مو

خله ايده على بطني كال موش كل الحجي ينگال يتنفذ

--يعني ماراح يجي يوم وتاخذه مني

--ماصارت يوم وضلمت احد واخذت تعبه

--لعد اشلون اخذتني من ماما

--ههههه يجي يوم تعرفين عليش هيج عملت

هوه يحجي وحسبت معدتي كلبت دفعت الغطه وركضت للحمام اجه وراي وخر شعري وغسل وجهي دفعته كلتله اطلع فدوه كارهتك اكثر من العطور

--والله ماحاط شي

--حتى لو مؤتمن فدوه اطلع مدااكدر اباوعلك حموت

اتحسر وطلع ضايج سد الباب وره رجعت لفراشي

كل يوم احسه من عمري هوه بعد مادخل لان كل مااشوفه تكلب معدتي مااعرف لويش بس صدك كرهته

وهوه هم صايره اخلاقه مزفته يفوت ويطلع يتعارك متعرفه شنو يريد حتى جدو كام يشكي من عصبيته ومحتار بي يخاف علي يتمرض لان اعصابه مفوله مرات اسمعه يتعارك ويه تهاني ويغلق جهازه حتى هاي صاير ميحملها عود حبيبته هوه نفسه محاملها يحمل حبيبته

جنت كاعده على الدرج علمود شمس كمت ادور دفو ساعه بروده اني بنفسي مااعرف شنو اريد امخربطه اوضاعي وصايره اتنرفز من كلشي

اجه راد يصعد غرفته كمت وخرت عنه صعد كم درجه رجع نزل انطاني الفون كال خبري امج بسلا اتطولين

اخذته ورحت للغرفه دخلت قفلت الباب صح محد يفهم لغتنه بس ردت ابراحتي احجي

اتصلت بيها فيديو اول مكالت اهاماما بجيت اشكد مشتاقه لصوتج فدوه

--حبيبت امج غزوله والله يماما اتمرضت وراج اشلونج

--الحمد الله ماما بس مشتاقتلج

--فدوه لعمرج ولج لويش ماما صايره جنج عجوز ليش هيج امبهذله وجهج اصفر

--لان حامل

--عزا ابعينج غزل اشحبلج

--مؤتمن

--ادري اصخام مؤتمن ماخذتي مانع اصخام اشلون اتسوين هيج شي بروحج

--والله ماما هيه ليله وحده مااعرف اشلون صار

--يداده وينج وين الحباله يماما انتي طفله ومريضه

--لاماما حياخذو وينطو لسماح

--عزا راح يعيدون الماضي من رادو ياخذوج وينطوج لم احمد لج غزل ماما لاتوافقين

--لعد شنو اسوي هوه اني مااريده بعد احسن بس جدو واعدني كال من تولدين اخلي امج تدخل واني وافقت خلي ياخذو بس ارجع الج

--والله يماما اتموتين ورا هسه اتكولين مااريده بعدين يصير اعز من روحج ديري بالج اتوافقين

--لعد ماما شنو اسوي اني مااكدرلهم بس بلكي مؤتمن ميخليهم ياخذو لان هوه ماراضي

--غزل ماما سمعيني اني داامشي بالمعامله بس اسدد المطلوبتهن واسقط الدعوات اخذج حبيبتي مااخليج يمهم بعت شقتنه والذهب وعمج قتيبه راح يدبرلي الباقي بس اريدج اتسوين شي

--شنو اسوي

--اتنزلين الطفل حبيبتي هذه يدمر مستقبلج وانتي بعدج ازغيره ومؤتمن مومال مره ويقدرها ولاانتي اتكدرين اتعيشين وياهم بعدج متعرفين شنو من بشر همه

--لاماما عرفت ومؤتمن اصلا حيتزوج

--عزا ابعينه ماعنده مانع يخليج بس اتجيبيله اطفال واتخدمين والله كلشي يطلع منه

--ماما اعرف هوه ناوي يسوي هالشكل وياي بس مااعرف شنو اسوي مطايح بيدي شي اهم شي هسه اريد ارجع يمج اذا على الطفل مومشكله اجيبه وانطي بلكي يعوفوني

-- لج ماما غزل ميعوفوج لاتخبليني متعرفين شنو من بشر ذوله دمروني اني وابوج ولج ابوج جان ميت عليه وماكدرلهم موانوب هذه هوه يريد يدمرج

ضلت باساعتين اتعلمني ماما طرق انزل الطفل بيهن وتنصحني شنو اسوي لمن اقتنعت اسويهن لان من صدك مااكدر اضل وياهم وخاصتا اذا اتزوج مؤتمن هوه هسه اشلونه انوب يجيب وحده لخ ويا ومكايد قنتعتني بس غلقت الفون خليت ايدي على بطني حسيت كلبي وجعني اشلون اكتله خطيه شنو ذنبه يعني لان ابو مؤتمن لعد شنو افرق عنه اني واحجي علي اذا اريد اسوي نفسه

مااعرف بس جان شعور يخوف من اجه ابالي افقده اتراجعت عن فكرت الاسقاط مستحيل اكدر اكتل روح ماله ذنب

كمت اريد ارجع الفون شفت مسج اجه اني موتمام بالعربي بس اعرف اقره فتحت المسج شفته من تهاني حجي يفشل مو ينكال عيع لعبت نفسي هاي اشلون تحجي ويا هالشكل راح اجيب منه طفل ولحد الان استحي اباوع ابوجها مو اتجرء واحجي ويا

الفضول خلاني ادخل عالرسائله كلها هيه دازتله اشعار حب وغزل واكثر الرسائل توسل اشكد ساحله روحها وهوه ولامسج داز بي شي كله مجرد كلام عادي اشكد غثه هذه اذا حبيبته هيج يحجي وياها بجمود لعد شو من يوكف يمي ويخبرها يختلف الحجي يصير

موطبيعي هالبشر هسه اشدخلني اشكد فضوليه

كمت رجعت باوعت وجهي بالمرايه صدك صايره امبهذله رحت للحمام اخذت دوش بس صابون ركي لان مااتحمل غيره طلعت عدلت وجهي وشلت شعري شفت حتى نفسيتي استعدلت

اخذت الفون وطلعت شفت سماح صارت كدامي كالت وين طالعه

--اريد ارجع الفون لمؤتمن وافتر اشويه لان مليت من النوم

-- ردي نامي اتحملي هالاشهر اني اوديله النقال

--سماح تره زوتيها وخري عني مالج شغل انام اكعد لاتدخلين

--هسه اصيح مؤتمن واشوف الحجي اشلون يصير

--اني رايحتله لويش اتعبين نفسج وينه هوه

--بالبستان

طلعت للبستان لكيت احمد ورجاء ويمهم سمر كاعدين يسولفون وهاي سمر رجع الامل الها من عرفت راح اطلك اشكد عيع ونفسها وصخه

احمد. وييين هوششش وين حجابج

--مؤتمن صاحلي هياته دااردله الفون وارجع

-- ابسرعه لاتضلين اتسرحين

رحت للجهه الثانيه لكيته واكف امجتف يباوع للزرع وصلت يمه كلتله شكرا

--اندار كال على شنهو

--الفون

--اها العفو يابه عليش بلا حجاب

--ماكو احد غريب والبستان امسيج

--ميخالف غزل اشوكت تتعلمين عيب اطلعين هالشكل وليش شعرج ينكط مي هسه

تتمرضين

--خايف على ابنك مو

--عوفج من ابني هاج هاي الغتره خليها على راسج

خليت ايدي على خشمي كلتله اخاف بيها عطر

--لايابه مابيها كطعنه العطور لبسيها

خلاها على راسي وضحك كال صايره اتلبسيها اكثر منه

--امم غير انته لاطشلي بيها صدك لفها الي مثل متلفها انته

--گربي صوبي

لفها على راسي وبتسم كال والله جايه وياج تمام خره بوجهج بطلت نزعيها لايشوفج احد

--لالاعوفها خليها خلي اخذ صوره

اخذت الفون وضليت اطك صور بس والله طلعت الفه اتجنن دزيتهن لماما

جان واكف يباوعلي ساكت رجعتله الفون انداريت للزرع كلتله يجنن الخظار

--جنتي تنهزمين من اهلج وتجيني وكت الضهاري اتكعدني من اعز نومه حتى اجيبج اهنا اتلعبين

--اكيد تضربني وترجعني مو

--ههه لااجيبج وانجلف ابسبتج

--منو يضربك

--مااتذكرين شي غزل

--هئ اصلا مااعرف عندي اهل

--ماسالتي امج ماخطر ابالج عليش عايشه بروحج

--امم ماما كالت متزوجه واحد بالعراق ومات ماعنده اهل واجينا لمريكا وخلص بس

--عايشين بيت واحد كلكم

--هئ احنه شقه وسيف من صار عمره 18 طلع شقه وحده اني هم جنت امقرره اطلع وحدي بس ادخل بالسن القانوني امم ماكلت منو يضربك

اخذ صفنه - تعالي نكعد لاتعبين كالها وطلع كدامي يريد يشرد من الماضي حسيته اختنك واني هم مالحيت من شفته اتغير رحت وراه وصلنه

يم احمد شفنه مكرم جاي شافني ضحك كال كملت بعد اهواي ضلت الغتر اتعلمتي اتلفيها

--هههه هذه مؤتمن سوالياها

--اهاااا وصلت للفه لاهواي طلكج اي اليوم اشوفج طالعه اشعجب طلقو صراحج

--اختنكت جوه واليوم صحتي احسن وخبرت ماما

--لاابربج -الله اليستر من الجاي

--لويش هيج دتحجي

--لاسلامتج ماكو شي خويه روحي كعدي لاتضلين اطفرين

انداريت شفت سمر عينها بمؤتمن ويه كل حركه هيه ويا

وين عنج تهاني اتشوف اشلون اتباوعيله كلت خلي العب على اعصابها رحت يمه كلتله ادنه خلي اكعود يمك

--تعالي بويه

كعدت عدل كعدته انتجيت على زنده

اشوفه صار وجها اسود من ماهوه هسه استغفر الله هاي عاقله اتفكر برجل اختها دخل كاظم هوه واختي الشفيه الثانيه وهاي ثاني مره التقي وياها اجت سلمت من وره خشمها وكعدت يم اختها الجميله يمكن شمس البصره متخصصه بس لحرك اوجوه خواتي

مؤتمن. همس غزل فتحي الغتره ولبسيها عدل

حبيبه. اي مؤتمن اشوكت نفرح بيك شوطولت

--قريب ان شاء الله

--هالمره انريد حفله لان العروس تستاهل خوموهم سكتاوي

--الله كريم

--جبتو الاخشاب اكيد اتخبل خو ذوق تهاني معروف

قبل لايرد مؤتمن كلتلها لامبين ذوقها من حبت مؤتمن محترك وطكيتها ضحكه اول شي رفع حاجبه ماعجبه و بعدين ضحك على ضحكتي وضربني على راسي خفيف كال عندج سماري وتقلدين

استلمه مكرم تصنيف من الله لكاها وطبكت ويا وضلينه نضحك اشكد ماهوه جان ثكيل وميرد لان ميهتم لهيج حجي بس جان يضحك لان مكرم صنفه تصنيف متت اخر شي كال كافي ولج لايوكف كلبج

سماح. مؤتمن جدي يريدك

--هوه اووو نسيته اليوم عدنه مشيه اتروح مكرم ويانا

--لايخوي اني ابقى اهنا اخاف احد يجينه

--خوش كاظم يروح ويانه

كام شلت راسي كلتله مؤتمن اتريد الغتره

--لاخليها بس لاطولين اهنا دخلي جوه

--تمام هسه اشويه وادخل

همه راحو اجت سماح كعدت يمي تسالني عالحمل وهذه السؤال اسمعه الف مره باليوم كرهتني بالحمل اكثر مااني كارهته مرات ينكسر خاطري عليها من اشوفها اشلون متلهفه لشوفه الطفل بس ارجع واكول اخاف اتعلق بي وياخذو مني وتالي اموت ورا ضليت بحيره شنو اسوي احس روحي بدوامه وياهم

حبيبه. والله وجبر خاطرج يسماح وراح يجيج طفل صدك بسمن راح يسجل

--الحمدالله خلي يجي بالسلامه هسه وبعدين انفكر بسمن يسجل

--اكيد بأاسمج انتي ومؤتمن

رديت لويش امه ميته واتبرعتي بي

--لابس جدتي سمعتها كالت كل طفل يصير ننطي لسماح

--موابكيف جدتج هوه

--چاخلي اتسمعج

--وشنو تره مخايفه اني

عفتهن وكمت رجعت للغرفه لان كعدتهن صايره كولش مزعجه واني منا كوه حامله نفسي وذني حتى بخور بيهن عطرهن خرافي مطايح بيها غير ارجولتهن خطيه اشلون حامليهن ردت ادخل وكمزني صوت عمتي ام مؤتمن صاحت وييين وموليه

--عمه للغرفه تعبت دااريد انام

--وشنهو بس انتي حبلتي اشوكت ناويه حضرتج اطلعين تشتغلين لوعجبتج النومه والخدم مدايرج

--مااعرف مؤتمن ميرضه اطلع حتى هسه كال يلا دخلي

--شوفي لج مالج غير 3اشهر اتنامين بيهن انوب اتكمشين نوبه ويه البنات بس يثبت الطفل

--تمام كلتها ورحت للغرفه واسمع دعاويها كون الله ياخذها بيوم الولاده واطش جكايت بحضرت العباس

عفتها مارديت رجعت لفراشي اتعودت على الحجي مالتهم اهم شي عندي هسه النوم اشكد انام مااشبع مااعرف اشبيه مرت ايامي سحل بسحل وكلمااخبر ماما نفس الموضوع نزلي الطفل لاتورطين روحج وانتي زغيره وراح دراسه لاتضيعين مستقبلج

كمت حتى اضوج اخابر لان نفس الحجي ينعاد

امامؤتمن يوميه ينزلي كومه حلويات وفواكه وعصاير ميخلي شي ميجيبه ويخلي بالثلاجه ودوم يسالني شنو مشتهيه اجيبلج حتى نص اليل يكعدوني اكل

صرت صدك بطه من الاكل والنوم مر الشهر الثالث عمتي اصرت ناخذ سونار بس اخاف ادخل للدكتوره صار عندي فوبيا منها اشكد اتوسلو كلتلهم والله فلااوصل وخاصتا بالعياده ريحه ديتول لواموت مااوصل شنو يريد يجي خلي يجي

مؤتمن بده يجهز الغرفه مالته اجت شافت جهازها اباوعلهم يخبلون وكفتهم واشلون واحد يباوع للثاني اتحسها اتريد تاكله هالكد مااتحبه طلعو جابو الذهب وجهزو ومابقى شي للعقد

صعدن البنات يعدلن الغرفه صار عندي فضول اشوفها صعدت رحت صايره مقابيل غرفه سماح غرفته شفت سماح واكفه باب غرفته وعيونها حمر كسرت خاطري رحت يمها كلتلها تره تتعودين موهسه اتشوفيني وعادي هم اتصير عادي عندج

--اشفايتلي لو مثلج وهيج كلبي بارد ولج جاي اشتعل نار

--هذه كلبج اذا بقه وره مؤتمن اتموتين بنتي ميسوه تره اتضوجين علموده

--ولج غزل راح اموت من اشوفه سهران وياها للصبح يسولف وهيه تتطلب وهوه يكله تامرين ولج مااتخلي ينام لاطشتله وهيه يم اهلها هاي اذا اجت بعد مااشوفه

--يلا هم يجيبها ويمل منها ويسفطها ويانا ويدور الرابعه

--هههه هم صدك مؤتمن مزاجي

--اشوفها اتحبه اكثر ماهوه يحبها

--متحبه خيه اتعبده هاي صدك اصعدج درج

--عزا عفتي مؤتمن رجعتيلي ولج رجلج راح يتزوج وانتي امجلبه بيه تعالي خلي انشوف شنو جايب للمسعده

دخلنه للغرفه ماخال شي مجايبه وهيفاء اترتب اباوع امسويها موغرفه متحف صاحتلي سماح كالت تعالي شوفي شنو بالميز رحت شفت علبه متروسه ذهب اشكد يحبون هالاشياء جنت شايله الابتوت بيدي دااباوعهن دخل اتفاجى شافنه انكلب بغراضه ابسرعه رجعتهن لمكانهن استحيت هسه احنه اشكد فضوليات انفوت غرفه الرجال

--خير شكو اهنا

سماح. انساعد هيفاء بتعزيل الغرفه

--همم يلا اذا كملتن طلعن روحي حضريلي الحمام عندي واجب

طلعت سماح دااطلع كمش ايدي شلت راسي باوعتله كال شنو تردين اجيبلج

-- كلشي عندي مامعتازه شي

--لاماجبتلج ذهب شنو اتحبين اجيبلج

--مااريد اصلا مااحب البسه ذهب

--جاشنو اجيبلج هذه حقج كولي واني حاضر

--والله مااريد تره بس هيج جنت حبيت اشوفهن موقصدي شي ثاني وبعدين مجان خال شي بنفسي

--منو هذه المخال شي بنفسج

شفته انكلب وجها خفت هسه اني اشخربطت بالحجي اريد يجي شي ابراسي ينقذني من الصخمته ماكو كلتله ها اء

سحبني فتح الباب وشمرني كال ولي لغرفتج غزل لاابتلي بيج

نزلت ركض تالي صدك انسحل هوه مكسور خاطره عليه والله هادي واني اكله ذاك مخال شي ابنفسي اشكد ثوله الحمد الله كمش اعصابه وماضربني

نزلت رحت للمطبخ لكيت امه واكفه عالطبخ اول مشافتني كال ايدج وياي بت فريال

--ايي عمه شنو تردين اسوي

--غسلي هالماعين الوصخات

--وكفت اغسل اماعين دخل احمد يركض صاح مؤتمن وين

عمتي. يمه اسمه الله ولك اشصاير

عمه مؤتمن ابسرعه اطلابه

ابغرفته فوك صعد يركض دخل مكرم ورا نفس الشي هم صعد يركض سمعنه فوك صار اصياح ركضنه انشوف شنو نزل مكرم واحمد يسحبون مؤتمن يمنعو ينزل وهوه يدفع بيهم يريد ينزل مكرم يكله والله يكتلوك لاتنزل

--والك هيه يكتلوها ياناقص وبن زنه السواها وحق الكعبه انعل عشيرته اليوم

دفعهم وطلع يركض مكرم رجع اخذ سلاح وطلع يركض ورا مافهمنه شنو الصار عمتي وسماح كعدن يلطمن خافن ينكتل مؤتمن للعصر وهمه ماكو خبر عنهم كلمااتخابر عمه ينطوها رفض

لمن دخل احمد رضكت عمتي ام مؤتمن تسال كاللها واصله ورسايل لهل تهاني عن مؤتمن وتهاني اكو علاقه بينهم قبل الخطبه وهسه صايره اطلابه اخوتها يردون دم

--يمه اصخام ابوجهي منو وصلهن

--مااعرف يمكن واحد مهكر صفحته والله مانعرف احنه هم محتارين

--ولك هسه وينهم

--مؤتمن وجدي اخذو ولدنه وراحولهم يردون يحلوها

--ولك هسه يچتلو اشلون يروح برجلي

--ابكيفهم يچتلو جامكمشو بتهم هسه الشرف نزل عدهم غير انسويها دمايه وياهم

راح لغرفته يجيب سلاحه واني من الهبطه بعد مااكدر اوكف سماح اندارت باوعتلي عرفت ماما السوتها اني دزيتلها السكرينات مالته عزا ابعيني اسويت بسلا يكتلو لو يكتلوها

اشلون ماما اتسوي هيج مكالت واحد ينكتل ذوله عرب ميسكتون هاي شنو ناويه اتسوي ماما من فكرت بهيج فكره

سماح. غزل تعالي وياي

صعدت رحت وراها دخلنه لغرفتها

--موانتي غزل

--لاوالله مواني بس يمكن ماما

--غزل تدرين شنو راح يصير هسه

--والله ماادري هيج اتسوي ردت بس اخوف تهاني من دزيت السكرين لماما خفت يمسح مؤتمن يضلن ذني اهددها بيهن ماادري ماما هيج اتسوي

--هسه شنو يفيد الحجي لويكتلوها لويكتلو وابالاثنين مؤتمن راح يروح بيها

--هسه اشدعوه واذا عدها علاقه بي اشصار

--ولج انتي وين عايشه غزل هاي بيها اركاب اخوتها ميسكتون

--مااعرف سماح ماادري فدوه عوفيني راح اموت من التفكير

رحت كعدت على جربايتها وافكر بمؤتمن اخاف يكتلو صدك خطيه بعد زغير يموت ابسببي خليت ايدي على بطني يموت وهوه مشايف ابنه كلبي وجعني اني اشسويت صح اذاني بس متوصل ابسببي يموت

ضلينه لليل عالكعدتنه بس صوت عمتي ليفوك واصل بالطم والنوح احس بعد مااكدر حتى اكعد روحي اتلوب من اتخيل مؤتمن يفوت بتابوت يمه عزا اسم الله

راسي انسطر دخت خليت راسي على المخده اجه عطره بخشمي هاي مخدته عرفتها من عطره نزلت ادموعي ياربي رجعه سالم خطيه امه وابنه ماشايفه بعده لااتخلي يموت وهذه يصير يتيم

--غزل بيج شي يمعوده مابينه حيل حبابه لايصيرلج شي مووكتها

--هئ مابيه شي بس دخت اشويه

دنحجي وسمعنه صعدن الدرج سريعه ودفرت الباب طفرت من شفت مؤتمن كدامي سد الباب واجه كال منو سوتها منجن الرسائل القديمه ماسحها اشلون وصلن لديجن

اني بهيج اوقات اجبن مني ماكو انشل سماح تتوسل اتكله مواحنه

--محد يعرف الرقم السري غيرج اشلون دزيتنهن لبوها

--والله مؤتمن مواني

اشوفه نزع الحزام واجه يمها اول ماضربها شفتها شالت روحها وركعتها بالكاع من الالم كاللها منو العملتها

--والله مواني رجع ضربها صرخت كالتله اني بس فتحت النقال وغزل حجت وياها بس ماحجيت ويه ابوها

انداري رجع ليورا

--والله مسويت شي مو اني راسلتهم اصلا مااعرف اكتب عربي اشلون ادزلهم

--اشوصلج لنقالي ليش هيج سويتي

--والله مسويت شي مؤتمن بس اتصلت بيها

--لااتخبلنيييي منو دزلت لبوها منهن تحجن لاوحق الكعبه انهيجن سوه

رجع شال سماح من شعرها وهيه صرخت بصوت عالي واتكله موااني تعرفني مااسوي هيج

--اشلون وصلن ااااالهم

--هاي ام غزل دزتهن لان غزل دزت شكو شي بنقالك لمها ابيوم العركه

اندارلي قبل لايحجي ركضت للباب فتحتها ونهزمت بس جان اسرع مني مالحكت انزل اول درجه خليت رجلي سحبني من شعري مااعرف اشلون سحبت شعري منه وفلتت من ايده ورجلي راحت بالخالي ماحسيت غير طحت من الدرج اريد اكمش بشي ماكو لمن وصلت للكاع حسيت ضهري نصين صاير الدم من خشمي وحلكي سو يطلع وصل نزل مؤتمن يركض شال راسي جان يباوعلي بخوف اول مارفعني حسيت ضهري طك

عمتي صاحت ولك ماتت البيت اصخام بوجهك مؤتمن كتلتها

--مكرممم شغل السياره كالها وشالني قبل لايطلع عمتي كمشت بيده كالتله لاتوديها بس تطلع يچتلوكم

--بعدددددي عمه

--ولك مؤتمن اتروحون بيها يعمه يحركون السياره بيكم اتروح حتى امريتك

هيه تتوسل وهوه شايلني ومكمل طريقه ميسمعلها بعد مااحس بشي فقدت

حسيت احد يمسح بوجهي بالمي فتحت عيني لكيت عمتي ومره يمي واكفه عجوز بس بعدني بغرفتي مااموديني حسيت وجع ابطني موطبيعي احسها تتملخ صرخت عمتي كالت هسه ترتاحين بس تحملي اشويه

--عمه حموت لحكيني

--ولج هسه اتنزله الج وترتاحين جاي اتسقطين يملطمه

---عممممممه حموت

ويه صرختي سمعنه رمي وصوت عمتي ام مؤتمن صاحت يبووووو

الثامن من هنا

تعديل المقال