رواية قصة امي الفصل الخامس 5 بقلم جمانه السعيدي
اسيل....كعدنا كولنا والحديث كان ممتع وحلو
أسئلة عمي كلها حرص وتفهم الموضوع امي
ابد ماحاول يدخل بموضوع الطلاق لو يسئلها عن هذا الموضوع
بلعكس حديثه كان لطيف جدا
اخر شي ووعدها راح يساعدها تحصل عمل مناسب
الوضعها شغل بسيط وغير متعب
من طلع عمو من البيت حسيت امي تحسنت حالتها النفسيه
وصار مودها عالي مزاجها تحسن
اسيل...ياربي فدوه الك هذا رجال وابوي رجال
امي...هذا انسان مثقف واعي
ابوج واحد همجي متخلف عباله صحته وفلوسه
دايمات جاي يتقوى عليه بيهن
مايدري ممكن كلشي يروح منه بلحظه
اسيل...اني منتظره هذا اليوم اريد اشوف ابوي
شلون راح تكون نهايته
اسيل.....هو شهر واحد بعد طلاك امي
اتصلت مريم....هلو اسوله شلونج
اسيل...الحمد الله
مريم...امي يمج
اسيل...اي موجوده شكوووو
مريم...افتحي مكبر الصوت خل تسمع
مريم شلونج امي حبيبتي
امي...الحمد لله شكووو اليوم
مريم...اسمعو الكلام الحلوووو
البارحه عمي يسولف على ابوي يكول يبجي من العروسه الجديده
امي. .ياستار هو شهر واحد لحك يبجي منها
مريم...يشكي العمي يكول تعاند والسانها شطوله
الصبح ما تقبل تكعد تحضرلي الريوك
وملابسي تخليهن بلغساله يومين اتلاثه
من اللح عليها تكول انت روح اغسلهن ليش اني اغسلهن
طبخها يلعب النفس
عود كتلها طبخج موطيب حتى تتعلم
تالي عافت الطبخ تكول بعد مااطبخ شلون تقلد على طبخي كمت اجيب اكل جاهز
اني ما متعود على الاكل الجاهز مااحبه
البيت وصخ كلما احجي وياها تصيح عليه
تكلب البيت
ماعدها غير لازمه التليفون ٢٤ ساعه لو تتصل بامها
تحجي وياها
لو اتصلت على امها ما يخلص الحديث لا ساعه ولا ثنيين
اريد اعرف عليمن هلكد يحجن
يعني يوميه اتصال مرتين وتلاثه
شيحجن مااعرف
شلون بيه جبتها بكل الطرق مايفيد بيها
كمت اكره البيت بسببها حتى نظافه شخصيه ماكوووو
ما معتنبه بنفسها
قبل ام بناتي غير ريحتها تخبل حتلو طالعه من المطبخ
ريحتها اتخبل
لو تشتغل من الصبح لليل ريحته تعط مدري ريحة ورد مدري عنير مدري مسك
والبيت نظيف والطبخ اطيب اكل اكل بس اني اتبطرت على نعمتي
مااعرف شلون اتصرف ويا هاي المصيبه العندي
جمانه السعيدي
عمي يكول كتله اصبر عليها تتعدل
يكول لا ما تتعدل اني عرفت طبعها زين
بس احجي وياها كلمتين يجون ابوها وامها للبيت
ويبقون يحجون عليه
موزين قبلت بيك انت شايب انت منو يتحملك
بنيه زغيره اصبر عليها لحد ما تتعود عليك
شنو تتعود عليه وشنو زغيره
عمرها ٣٨ سنه الي بعمرها بناتهن ازوجن
اذا شهر وبعدها ما متعوده عليه شكد يله تتعود
هو اني يمتى كاعد بلبيت
الصبح بلدوام والعصر انام وبليل اطلع
يعني كل الوقت وحدها بلبيت
لا عدها عيال ولا احد يطلب منها شي
ليش ما تنظف بيتها وتنظف نفسها
ملابسي ليش ما تغسلهن ولله خبلتني اني ما متعود
على هيج وضع
ام اسيل جانت مدللتني دلال واني ماراضي عليها
راح ارجع ام اسيل قبل لا تخلص العده
لان مااكدر اتحمل هاي المصيبه اكثر من هيج
مريم...عمي يكول سئلته شنو يعني اطلكها ترا صار بس شهر واحد من ازوجتها
ابوي مجاوبه لا مااطلكها يمعود كتبت على نفسي غايب يكسر الضهر واهلها أصحاب مشاكل
شيخلصني منهم لا مااطلكها بس ارجع ام اسيل
اريدها تخدمني تشوف طلباتي
كمت اكره البيت اكره ارجعله
جمانه السعيدي
مريم...اسمعو هاي الاقوى
عمي راد علي خاف ام اسيل ما تقبل ترجع
ابوي راد علي بكل اريحيه لا تكيف بس اكوللها ارجعي
لان كاعده بيت النسيب ماعدها مكان تكعود بي
وحسره عليها الالف
بكلمه مني ترجع ركض وخاصه هسه صارلها شهر
ماتعرف مصيرها شنو
مريم....هااا شنو رائيكم
امي...ماارجع لو يبقى اخر واحد بلدنيا
لو اكعود اكدي بلشارع لو ابقى بدون اكل وشرب
ابوج ماارجعله
هسه يله حس بقيمتي من جنت خدامه جوه رجلي
اتعافى عليه
حجايه والثانيه اني رجال بحيلي واكدر ازوج عشره
مايعرف النسوان مو كلهن سوه
اكو ما تتحمل لو ماتصبر لو ثرثاره صاحبت مشاكل
لو وصخه لو مبذره
يعني بس اسمها مره
اسيل...اي ماما عفيه لا ترجعين ابوي ما يستاهلج
امي....خلاص بعد انفتح القفص وأخذت حريتي
مستحيل ارجعله
اسيل للعصر اتصل عليه بابا
اسيل...ماما ابوي جاي يتصل
امي...اي عادي ردي علي
اسيل....اني زعلانه منه لان طردنا من البيت
خلص الاتصال ورجع بابا اتصل مره ثانيه
امي...جاوبي كوليله امي ما ترجع ابد
اسيل....الوووو
ابوي...هلو بابا شلونج
اسيل...الحمد لله اليوم شو مذكرنا انت ماتريدنا
ابوي...لحظة عصبيه لا ازعلين مني حبيبتي شلونج
ابنج شلونه
اسيل...الحمد لله
ابوي...امج يمج
اسيل....اي موجوده
ابوي...اريد احجي وياها
اسيل...ماما ابوي يريد يحجي وياج
( ابوي متوقع بمكالمة تليفونيه امي ترجع لان ماعدهامكان )
امي....بصوت عالي حتى يسمع ماكو اي كلام وياااا
كلشي بينا خلاص انتهى
اسيل...اعتقد سمعت امي
ابوي....شنو كلشي انتهى بعد عدة الطلاق ما خلصت
كولليلها ابوي يريد يرجعج
اسيل...ما تقبل تحجي وياك
ابوي....انت بس كولي ابوي يريد يحجي وياج
اسيل...ماما ابوي يريد يحجي وياج يكول ارجعها
امي....بصوت عالي
ضحكني يريد يرجعني خاف ما يرضا اني ارجعله
ليش ارجعله تخبلت
ابوي......انطيها التليفون .اريد احجي وياها
امي...مالك اي كلام وياي اطلع من حياتي اني ما صدكت خلصت منك
ابوي...هااا هيج الحجي
اسيل.....سمعت مو
ابوي....اي ضلي بلبيوت تشتغلين خدامه النسيبج
امي...اني مو خدامه هنا ملكه عايشه عيشت الملوك ولا حياة الذل الي جنت عايشتها وياك
ابوي...هااا جنتي عايشه وياي بذل
اسيل...بابا لا اتعب نفسك امي ماترجع
ابوي...اي انتي مشجعتها جان استحيتي مره مزوجه
ومخلفه وامج مطلقه
اسيل...وشبيها المطلقه مره بزعت منك وشردت على عمرها
بعدين انت موكلت اني ما مرتاح وياها
واريد ازوج وهي عافتلك البيت حتى ترتاح وتزوج
ليش تريد ترجعها بس فهمني
ابوي...اني مراح احجي وياج اليه كلام ويا زوجج
هو الي يكدر يردج
كولي الامج ترجع وغصبا ما عليها
جمانه السعيدي
اسيل...طبك التليفون بعصبيه
امي....هههه ابوج هذا مسكين مايعرف يتصرف
ضيع كلشي من ايده
تعرفين هاي زوجته ثوب ومفصل على كده ابوج ماتفيد ويا وحده فقيره وبسيطه وراضيه بلضيم مثلي
تفيده وحده مثل هاي تشوفه نجوم الضهر
الحمد لله ياربي اخذت حقي منه
اسيل......من رجع منذر حجيتله كلشي من باب العلم بلشي
لازم يعرف شجاي يصير
اولا هو أبو بيتي ثانيا خاف ابوي يصادفه ويحجي عليه
على الاقل يكون يعرف تفاصيل الموضوع
منذز...هاي المشاكل عائليه واني ماادخل بيها ابد
امج حره تريد ترجع تريد تبقى
هي اعرف بوضعها ووين ترتاح وين تريد تعيش
وتكدر تختار الشي الأنسب الها
اسيل...لليل ابوي اجا على منذر
دك الباب منذر من فتح الباب وشافه استغرب
لان هو ابد ما واصل بيتنا بعد زواجي
منذر. اهلا سهلا تفضل
ابوي.. اني جاي وعندي عتب عليك
منذر...ليش الله يستر
ابوي.......تقبل زوجتك تحرض امها حتى ماترجع
منذر...هاي مشاكل عائليه اني ماادخل بيها
ابوي...شلون ما تدخل احكم زوجتك وكفها عد حدها
هي الي جاي ازود المشاكل بيني وبين امها
هي تحرض امها ماترجع
خليها تحجي على امها حتى ترجع
منذر...هاي امها وهي اعرف بحالها
ابوي....اطردها من البيت اي اطرد ام اسيل من البيت
هي ماعدها مكان تروح علي
اطردها وهي ترجعلي
منذر...صدك تحجي اطردها شلون تقبل انت اطردها من بيتي
عمي...اي اني زوجها واكولك اطردها هذا الحل الوحيد
حتى ترجعلي
منذر...مستحيل اطردها شنو هذا الحجي
ابوي...زين اريد احجي وياها اريد ارجعها بعد العده ما خلصت ومن حقي ارجعها
منذر...اني راح اروح اشوف تقبل تجي تشوفك لو لا
ابوي...شنو ما تقبل
اسيل...اني سمعت كل الحديث الي دار بينهم
لان جنت واكفه بصف الباب
منذر...روحي خل تجي عمتي عمي يريدها يريد يحجي وياها
اسيل...دقيقه
دخلت للغرفه ماما بابا هنا
امي...اعرف جاي اسمع صوته وهو يهوس ويصيح عباله
اذا سمعت صوته راح اطير من الفرح
صدكي صار عندي جالي صعدت الحموضه بمعدتي
من سمعت صوته
اسيل .....يريد يحجي وياج
امي...ماله اي كلام وياي وماارجعله حتلو انتم طردتوني من هذا البيت اروح أقدم بدار السنيين اكعد
ولا ارجع الابوج
اسيل...زين تعاي احجي وياااا
امي..مااريد اشوف وجها هو مو طلكني وبعد مايريدني
شنو حليت بعينه
هسه صرت زينه قبل جان ما يطيق يشوف وجهي
هسه صرت عزيزه وجاي يرجعني
هيج اني ماعندي كرامه بكلمه يطلك وبكلمه يرجع
اسيل...زين تعاي احجي ويا هذا الكلام
امي...اي احجي وياا شنو قابل خايفه منه زمن الخوف راح
بعد مااخاف منه ابد
لبست امي ثوب طويل وحجاب وطلعت علي
بس شافها ابتسم
ابوي...هله هله بأم اسيل شلونج
امي...شتريد
ابوي...ردي السلام قابل متعارك وياج
امي....خلصني شتريد
ابوي.. اكعدي نتفاهم
امي...مابينا شي نتفاهم علي كول شتريد
ابوي...اريد ارجعج على ذمتي بعد شهور العده ما خلصت
امي...ماارجع بعد عندك شي ثاني
ابوي...اي اكعدي نتفاهم
امي.. ..مابينا اي تفاهم ماارجعلك وبعد لا ترجع هنا مره ثانيه لاتزعجني وتزعج منذر
ابوي...شنو يعني ما ترجعين راح تبقين عايشه بيت هذا الرجال الغريب
امي...منذر مثل ابني وبعمري ماحسيت بيته اني غريبه
احسن منك خلصت عمري بخدمتك وانت تعاملني
اسوء معامله اني جنت غريبه بيتك
ومالي مكان بدليل من قررت تزوج طردتني من البيت
لو بيتي وحاسه بلامان مجان طلعت منه
ماارجعلك لو تموت لو تبقى اخر واحد بلدنيا
لو اعيش بلشارع مشرده ماارجعلك
ماشفت بحياتي وياك يوم حلوووو
ليش ارجعلك انت اختاريت حياتك واني اختاريت حياتي
الله وياك بعد مااريد اشوف وجهك
فهمت لو لا
ابوي...مو تتندمين على هذا الكلام
امي...اني اريد اتندم واني بعيده عنك
احسن مااكون راضيه وياك بعد لاترجع ابد
فهمت لو لا
ابوي....هذا المكان مادايم اللج هذا مو بيتج
امي...وبيتك مو بيتي على الاقل هنا يعاملوني معامله حلوه بس بيتك جنت ذليله
الله وياك بعد لا ترجع هنا ولا تخليني اشوف وجهك
انتظرونا
السادس من هنا
