رواية قصة امي الفصل الثالث 3 بقلم جمانه السعيدي
اسيل...ابوي فعلا لكه عروس بنيه مامزوجه
عمرها ٣٨ سنه راسبه سادس اعدادي ٣ مرات وتاركه الدراسه
من طبقه اقل من متوسطه
والبنيه شكلها جدا عادي لا قبيحه ولا حلوه
أقارب موظفه ويا بلدوام
هي الي سعت بهاي الخطبه لان ابوي يلح عليها هي والموظفات حتى يدورن عروسه
طبعا اهلها بس سمعو عنده راتب محترم وبيت
راسا وافقو علي
من سئلو عن امي
كان رده عجيب يكول عن امي
مره مريضه وجبيره بلعمر كلشي ماتكدر تشتغل بلبيت
اني بعدني قوي اريد ازوج اريد اطفال
واني مراح اقصر ويا بتكم بشي
هي الي راح تصير ام البيت زوجتي مالها علاقه بيها ابد
اكيد اهل العروس من سمعو زوجته الأولى جبيره بلعمر ومريضه
وافقو باعتبار زوجته منتهيه وبعد ما منها فايده
وبتهم راح تصير الكل بلكل بلبيت
طلبو مهر عالي
وطلبو غرفه جديده وعرس لان بتهم هذا اول زواج الها
وتريد عرس وحفله
جمانه السعيدي
كل طلباتهم ابوي وافق عليها
بس كون يزوج ويقهر امي
يريد امي تحس بلنقص يريد يدمرها ليش يكرها بهاي الطريقه مااعرف
اني من احجي عن امي لان هاي حقيقه
مو جاي اقلل من العروس
بس امي ما ناقصها شي حلوه و زغيره ومرتبه
يعني ماكو اي سبب للزواج
بلنسبه الامي من يوم ابوي ضربها راشدي
عازله فراشها بغرفتنا ولاتروح يم ابوي ابد
حتى ماتكعد ويا بنفس المكان
ولا ياكلون سوه
بنفس الوقت ابد ما مقصره وياا بشي
الصبح تكعد قبل لا يكعد تحضر الريوك
هو يكعد يتريك وهي تدخل الغرفة النوم اترتبها
وطلع الملابس الي راح يلبسهن للدوام
قاط وقميص وجوراب وحذاء تلمع حتى العطر
تحضره اله
والفرجه الي يمشط بيها شعره
كلشي ماناقص تطلع من الغرفه هو يدخل يبدل ملابسه
يشمر الملابس الي جان لابسهن بلكاع ويطلع
من يطلع هي تأخذ ملابسه تغسلهن وتشرهن
وتحضر الغده وتنظف البيت
واذا بقه عدها وقت تتصل عليه نحجي اني وياها شويه
لمن يرجع ابوي من الدوام الساعه ثنيين الضهر
بس يدخل تحضر الاكل
علما يبدل ويطلع من الغرفه
تاخذ ملابسه تغسلهن وترجع تحضر الجاي
يشرب الجاي ويدخل ينام
بعدين هي تتغده وتنظف المطبخ من جديد
تحضر العشى وتبقى منتظرته يكعد على راحته
يتعشى ويطلع يعوفها وحدها بلبيت
اسيل.. مرات اني اروح اكعد وياها منا لمن يرجع
لو مريم تجي يمها
لو نحجي مكالمه فديو
هذا روتينها اليومي كل يوم ويااا
ماتحجي ويا اي كلمه اله هو يسئلها على شغله
اجاوبه
بطلت تكعد ويا بنفس المكان لو تاكل وياااا
لان بس تكعد كباله راسا يخترع مشكله اهم شي يغثها
ابوي كمل الخطبه وعقد عقد شيخ امي ما تعرف
لان لا تطلع ولا تدخل
وهو ما يحجي وياها
بس مريم كانت تعرف
لان عمها صديقه يداوم ويا بنفس الدائره
عم مريم كان من ضمن الزلم الي راحو بلمشيه
يخطبون العروس
جمانه السعيدي
اتصلت عليه مريم
مريم...هلو اسوله شلونج
اسيل...الحمد لله انتي شلونج
مريم.. الحمد لله
اسيل...شبي صوتج تعبانه ضايجه حزينه
مريم.. مااعرف شكووول
اسيل...احجي شبيج احد مضوجج زوجج بي شي
مريم...لا مابي شي بس.........
ابوي خطب وعقد لوشايفه المهر لو ووحده تسوه ميخالف
وشارطه علي غرفه تركيه احدث موديل
اسيل...يااا تحجين صدك عقد
مريم...اي اليوم عقد اني هم ماادري بس عمي من رجع
من برا كعد يسولف على عمتي
واني سمعتهم من سئلته كال اي ابوج اليوم عقد
والبنات بلدائره يكولن العروس موحلوه وعمرها ٣٨
وطالبين مهر خيالي وهو موافق
اسيل...اذا سمعت امي تتخبل
مريم...خليها تخلص منه ومن مشاكله خلي يزوج
اسيل.. امي حلفت اذا ازوج تطلك
مريم...تكوليلها
اسيل...لا طبعا مراح احجي خاف تصير مشكله
خليها تعرف من احد غيري
بلكت تقبل بلامر الواقع وتكعد وتسكت
مريم...شلون تسكت اكو وحده تقبل زوجها يزوج عليها
لا ويريد يعيشها بنفس البيت وياا امي
اسيل...اروح احجي وياها شنو رائيج
مريم...اي روحي خليها تعرف راسها من رجليها
اسيل...زين خل نتفق اني وياج انروح عليها باجر ونحجي وياها
مريم...لا مو باجر باجر احنا معزومين بيت خال مهند
خليها بعد باجر العصر نروح عليها ونحجي وياها بهدوء
بلكت تقتنع
اسيل...ادعي وين الله تعدي على خير
اني كلش خايفه على امي ولو ابوي البعد عنه غنيمه
عفيه رجال ماكو صفه حلوه بي
امي لازم تاخذ جائزة الصبر والتفاني على هاي الزواجه
التعيسه
مااعرف شلون متحملته صابره علي
مريم...بسلا تعرف قبل لا نحجي وياها
اسيل...منيين تعرف لا تطلع ولا تدخل محبوسه بلبيت
مريم ....اتمنى تعرف لان اني مراح اكدر اتحمل
منظرها من تعرف ابوي راح يزوج عليها
اسيل ..ثاني يوم اتصلت عليها مرتين وجرجرته بلحجي
اريد اشوف تعرف ابوي راح يزوج عليها لو لا
طلعت ماتعرف ولا على بالها هذا الموضوع
اليوم الي بعده رحنا البيت اهلي اني ومريم
امي بس شافتنا حست اكو شي
امي...اليوم ثلاثاء ليش جايات ثنيبنجن سوه
انتن متعودات تجن يوم الجمعه سوه
اسيل...اشتاقيلنالج مايصير نشتاق
مريم....وحشتينا ياست الكل
امي...ولله هاي جيتجن بيها سر ماتجن نص الأسبوع ثنيبنجن سوه
اسيل...نرجع لا خل نرجع ولج مريم الزمي ثوبي
لا خل نرجع عوفيني لازم نرجع
امي...لا ليش ترجعن تعالن الله جابجن غسلت الفراش وماتكدر اشره وحدي
مريم...يبوووو اجينا نكرب
اسيل...هو هذا الخطار لو يكرب لو يهرب
مريم...اا احنا نكرب ما نهرب
اسيل....تعاي اكعدي اكو موضوع مهم لازم نحجي بي
امي...اي بناتي واعرفجن
من دخلتن سويه عرفت اكو شي
كعدت يله احجن اسمعجن
اسيل...اكو موضوع بس مو مهم انريد نحجي وياج
بس ابد لا اضوجين
لان ما يستاهل ابد
مريم...اي ولله مايستاهل ابد اصلا يمكن رب العالمين
يحبج وخله هاي الشغله تصير
امي...اي طلعن الدره خل افهم
اسيل..بعدنا ما حجينا بهذا الموضوع
راسا دخل ابوي من برا وهو يصيح تفضلو تفضلو
كلنا وكفنا نريد نعرف منو ذوله الي راح يتفضلون
احنا كاعدين بلمطبخ
دخلو ولد ثنيين شايلين ميز مرايه ميز غرفه نوم
دخلو من باب الهول على الغرفه الجوه
ابوي...دقيقه نزلو الميز خل نطلع ذني الغراض من الغرفه
يقصد على غرفتنا اني ومريم
يريد يطلع الجرابي ولكنتور منها
شالو الجرابي طلعوهم بلهول
الكنتور فارغ لان بعد زواجنا أخذنا ملابسنا
امي خلت بي مناشف وجراجف ووجوه مخاد
ابوي دخل فتح الكنتور وبدا يطلع بلجراجف
والمناشف ويشمر بلهول هيج يشمر شلون مجان
امي...شنو هذا ابوجن شكاعد يسوي
العمال فصخو كنتورنا وطلعو برا
ورجعو يدخلون قطع الغرفه الجديده
طلعنا من المطبخ احنا وامي
اسيل...شنو هذا بابا
ابوي.. هلو بابا انتي ومريم هنا اي همزين حتى ترتبن غرفة ابوجن
مريم...شنو غرفة ابونا ليش طلعت غراضنا ليش تأخذ غرفتنا
ابوي.. اريد انصب غرفة عرسي هنا
امي.. غرفة عرسك تحجي صدك
ابوي...انتي مالج شغل لا تدخلين فهمتي لو لا
دخلو العمال شايلين خشب الكنتور دخلو بلغرفه
امي... راح تزوج
ابوي.. عقدت وخلاص الاسبوع الجاي العرس
اسيل...ليش بابا ليش هيج
ابوي...شنو بابا اريد ازوج قابل سويت جريمه
اسيل...ردت علي امي بعصبيه
امي...طلكني اني اتفقت وياك اطلكني واطلع من هذا البيت قبل لا تدخل المسعده هنا
ابوي...بس هاي بسيطه باجر اروح للشيخ واطلكج
مو تدللين
اول مره تطلببن مني طلب حلو
صار من هاي العين وهاي باجر توصلج ورقة طلاكج
مريم.. انت شكاعد تكول
ابوي.. انتن ثنيبنجن اذا ما عاجبجن الكلام
اطلعن وياا امجن كل وحده مزوجه وعايشه بيتها سعيده
اني محد حاس بيه اني مامرتاح اريد ازوج اريد اشوف حياتي
جمانه السعيدي
اسيل...وامي
ابوي...امج هي تريد تطلك ما سمعتيها شلون
شرطت تطلك قبل لا ازوج
اسيل...يعني هيج كل هاي سنيين العشره
سهله عليك اضيعها علمود نزوه
ابوي...ااااي نزوه بابا زواج على سنة الله ورسوله
انتي شايفتني مراهق
رجال وافتهم ومسؤل عن تصرفاتي
انتن اكثر ثنيين تعرفن حقيقة العلاقه بيني وبين امجن
وتعرفن هذا الزواج فاشل من البدايه
اسيل...هسه يله اذكرت بعد هذا العمر كله
توك عرفت هذا الزواج فاشل
ابوي...لا تدوخن راسي خلني فرحان بعرسي
اسيل...اذا طلعت امي نطلع وياها وبعد مانرجع الهذا البيت ابد
ابوي...الله وياجن الي يريد يروح الله وياااا
مراح اجبر احد يبقى وياي
كلمن بكيفه
امي...خلي البيت الك اشبع بي اني بلنسبه اليه راح اخذ ملابسي واطلع وبعد ما تشوف وجهي
ابوي....لو اعرف اهلهل جان هلهلت همزين واخيرا راح اخلص منج
اسيل...دخلت امي الغرفتها ونزلت الجنطه وبدت اجمع ملابسها
كل قطعة ملابس تدخل للجنطه يدخلن قبلها دموع حارات
الدموع اكثر من كل الكلام الي حجينا
واكثر من الملابس دموع وحسره وقهر على السنيين الضاعت ويا ابوي
ابوي الي ماعنده ذرة تقدير التعب امي
باعها بكل سهوله
اسيل ...متت قهر على امي
طلعت على ابوي
اسيل....بابا شوف اني جاي اكولك راح تنندم
صدكني راح تتندم على امي وراح يجي اليوم الي اذكرك بكلامي هذا
ابوي...شكرا ما محتاج نصيحه من اي احد
امج دزتج تتوسلين تريد تبقى هنا
لان ماعدها مكان تروح علي
ميخالف موافق تبقى بس خدامه اليه اني وزوجتي
تسكن وتاكل من بقايا اكلنا
ومااريد اسمع صوتها بلبيت نهائيا
اسيل...لا ولله لو اموت مااعوف امي هنا هي بأيام الخير شافت منك
اله تزوج وتعيش انتي وزوجتك هنا
امي اخذها وياي واعيشها ملكه واني اخدمها
بس اذكر للمره الاخيره راح تندم
وساعتها مراح تكدر تتراجع
لان كلشي يضيع منك
ابوي....اطلعي اخذي امج واختج واطلعي من البيت
مااريد اشوف اي وحده منجن
يله درب الصد مارد
مااريدكم ولا اريد اشوف اي احد.بيكم
حتلو متت لا تجون تكوفون على كبري
يله عصابه نسوان ماتجي من وراهن بس المشاكل
اسيل...رجعت لكيت امي جامعه كل ملابسها وشغلاتها
المهمه بلجنط
بس عيونها حمر من البجي
طلعنا من بيتنا هذا البيت الي عشنا بي سنيين من التعاسه والمشاكل والتعب النفسي
امي...اروح الاختي زهراء بلكوت
اسيل...لا ترحين وياي وتعيشين بيتي
امي...عيب زوجج غريب
اسيل.. زوجي هذا الإنسان الغريب احسن من ابوي الف مره
تعاي وياي اخليج بعيوني
مريم...جان كتلج تعاي وياي بس اني ساكنه بيت عيالي
مو بيتي
امي.. ما تقصرين حبيبتي
اسيل.. اخذت امي البيتي بلاخير احنا الثلاثه مالنا غير بعض لازم ننسند وحده على الثانيه
حتى نكدر نعدي الصعب بحياتنا
