رواية عشق الثأر الفصل الثالث 3 بقلم مينة طلال

رواية عشق الثأر الفصل الثالث 3 بقلم مينة طلال

_وشلون تگدر تمسَح مَن عيوني

فَي رمشك المتغاوي الچفن وتگفه الايد؟

وليش ماخليتلِك دمعة بضرف

حته تعَرف ليلي شگثر لأجلك بچيته

وليش ماصدكت من كتلي البعد يأذي الگلب

ريت البعد نهجم بيته...

..أسحاق..

<_________________________>

مُروج: شعندك هنا؟

أسحاق: المفروض اني الي اسألج شجابج هنا الأستاذ يدري بيج طالعة لاتورطين روحج وتورطيني وياج شجابج..

_ كلك انت وأستاذك ماتهموني روح أيوب

_ انا محد استاذي ، وصدكي حتى انتي ما تهميني ولو ذرة بس شغلي ومجبور الحكج امشي طلعي كدامي ماريد ننفضح..

_روح ايوب مالك علاقة بية كولة ضيعتها ..

دموع : أسحاق شجاي يصير..

مُروج: دُموع منين تعرفينة؟ اسمك الحقيقي أسحاق؟ منين تعرفون بعض!

غمضت عيوني بنفاذ صبر اذا ابقى هنا تفضح كلشي يخصني دموع جريت مُروج من ايدها ، طلعت من المطعم ركضت وراية دموع ومُروج تسحب ايدها مني..

_ عووف ايدي عوفها ، مااروح

أسحاق: اتفاهمي ويا عمج ماعدي حجي وياج..

دموع: بس كولي منين تعرفها، شعليك انت أسحاق فهمني لا تعوفني هيج راح اتخبل ولله تعال

_ رجعي للمطعم بليل نحجي دموع

_ بس أسحاق..

صحت بيها هاي تسحبني من ايدها وهاي تركض وراي وناس تباوع فضحوني : رجعي كتلج

دمعت عيونها جريت مُروج وصعدت بسيارة شغلتها بسرعة وعفت دموع بصدمتها بـﻋـَدين افهمها..

مُروج: أسحاق عوفني ليش تجبرني أذيك !

_ هه ، ولله ضحكتيني ومو بمزاجي اضحك اليوم ولله ..

_ شسويتك اني ليش تأذيني انت هم؟

_ ماعدي شي وياج شغلي اخليج جوة عيون عمج ، هوة حتى ما مأذيج ليش كلساع طافرة بمكان جنج عتوي ، خالتني اركض وراج.. ماعدي شغل غيرج يومية الكاج رايحة لمكان عيب بابا..

كامت تبجي وتمسح وجهها وتحجي بسرعة تشهك كلشي مافهمت منها كتلها : عيدي بدون بجي..

_ عمي جذاب هوة كتل اهلي ، ولله هوة وكال حادث مروري..

_ شلون عرفتي؟

_ جنت اسمع حجي منا ومنا ومن دورت ورا وسحبت حجي من مساعدة عرفت هوة الي دز سيارة تدعم بابا وماما حتى ياخذ كل الورث الة بس وسوة كل هاي القصص الناس يعرفوها..

_ المن حجيتي؟

_ كلت لخوالي وكالو بس طلعي فيزا ، واحنا نسويلج لم شمل وتعالي يمنا..

_ وهسة؟

_ ما اريد منك شي بس تساعدني اشرد منهم ، سوي روحك ما تدري وين رحت واني اروح للمطار.. مناك اروح لخوالي ..

_ مخاطرة هاي قبل حياتي ، حياتج تعرفين عمج منو صح؟

_مو مهم انت تساعدني

_ ليش تثقين بية؟

_ مجبورة..

_ بس اكبر غلط تثقين بشخص يشتغل ويا ناس ضدج

_ اني اعرفك انت مو مثلهم ،انت حباب ولله..

ابتسمت صفح اباوع عليها : شنو حباب بابا احنا مافيا ، عمج اكبر مافيا بالعراق هية مال حباب

_ يعني مراح تساعدني؟

_ شنو الي استفادة اذا اساعدج ،واني عمج حاط خاشوكة ذهب بحلكي

_ فضلك يضل بركبتي لاخر يوم بعمري ، اني راح ارجع بس ارجع اقوة واغنى ذاك اليوم اردلك فضلك اضعاف..

_ احاول اساعدج بس مااوعدج ،لان حيل مشدد علينا هل فترة نحط عيونة عليج ، خاصتًا خالد يلحكج وراية، باعي بالمراية سيارتة ورانا..

رفعت عينها شافتة طابك لزمت راسها تبجي

هزيت ايدي مسحت وجهها : لا خوش صرتي قوية، ابسط شي يبجيج..

مُروج: تعبت ولله أسحاق ، تحس بية؟ صار سنين من دريت عمي سبب موت اهلي وعايشة ويا بيت واحد وياكل وياي بسفرة وحدة! لا فوكاها يتحكم بحياتي..

_ كلشي وارد بهاي الدنيا

_ هسه شنسوي

_راح ارجعج لفيلا افكر وارجعلج خبر بس انتي حاولي تكونين طبيعية ويا عمج، واذا تكدرين مثلي انو انتي حيل تحبي مثلي علية..

من تختفين راح نسوي علية تمثيلية ،انو اعدائة خطفوج وقتلوج

راح نستدرجة ناخذ منة فلوس احولج ٨٠٪؜ والي الباقي..

اني مو طماع واخر شي اتمنى بالحياة اخذ من مرة فلوس، بس اني مثلج محتاج القوة والفلوس هواي..

_ ليش؟

_ ما يعنيج الموضوع..

فريت السيارة واتجهت لطريق الخضراء ،وصلت للبوابة شوفتهم الباج مالتي طببوني داخل المنطقة..

من اجمل مناطق بغداد اهم موقع بيها ، مطلع على المطار والزوراء الخضار بكل مكان والبيوت تحسها غير دولة

وصلت كبال فيلا عمها فتحولنا السكرتيرية الباب ،طبيت لكراج البيت طبكت طفيت السيارة وباوعتلها عيونها، راح اطك من القهر..

_ على وضعج صدكيني راح تضيعيني ،واني عدي شغلة مهم ملازم اموت قبل لا اسويها...

_ صعب تعيش ويا شخص كتال اهلك ، وتسوي روحك تحبه..

_ مثلي هنة دقايق ضحكي علية، كل ماضحكتي علية وخليتي يصدكج كل ما اخذتي بثارج اكثر..

_ احاول !، شلون اتواصل وياك؟

_ من تطلعين مرة الجاية نتفق، هسه راح اكول لعمج جنت بالسوك تشترين غراض اي شي وانتي كملي الجذبة

نزلت فتحتلها باب السيارة نزلت تفرك ايديها، نزل استاذ قاسم من درج الفيلا لابس زي الرسمي ونظاراتة الماركة ،رفع النظارات على راسة يباوع لمُروج..

_ ها عمو حبيبتي ، ضل بالي يمج الحرس كالو مارحتي لكُليتج..

مُروج: عمو جنت بسواك اختارلك هدية ، بس الحرس خربوها علية.. جنت حابة أسويها مفاجأة الك

قاسم: اني دزيتهم حبيبتي ، اخاف عليج اعدائي هواي ..ميصير تفترين هيج وحدج..

_ عمو بعد مااعيدها

حضنها واني اراقب تصرفاتهم من وراة النظارات ، هوة يمثل احسن منها اي شخص مايعرف الحقيقة راح يصدك هوة يحبها وخايف عليها ، عكسها تحاول تبتسم بس شفايفها تتراجف وجهها مبين هية خايفة ، نزلت اركب السيارة صاحني قاسم..

قاسم: ايوب شكراً تعبتك ،تكدر تروح هسه شوف الجماعة وروح ارتاح بيتك..

_ أستاذ البضاعة وصلت للمخزن!

_ فرغوها لعد وروح ..

_ ماشي استاذ تدلل

صعدت بسيارة طلعت من كراجهم افتر بالمنطقة، اريد اطلع لاكتني سيارة سليم طبك كبالي ماتحرك ، دكيت هورن نزل من سيارتة نزلت ويا..

_ خير استاذ سليم ، ليش وكفت كدامي؟

سليم: شعدك ويا ست مُروج؟ لزمت ايدها وطول الطريق تحجون؟ تمسح دموعها وتضحكون . اكو شي لازم استاذ قاسم يعرفة ؟

_ ما يخصك! سليم لانحط راسك براسي حتى لا امحيك من الوجود، احسلك روح من طريقي...

سليم: راح ابلغ استاذ قاسم

دنكت ادفع التراب برجلي رفعت راسي الة بحركة سريعة جريتة وركعتة بمقدمة سيارتة : سليم لا تلعب بالنار

_ شعدك وياها؟

_ نفس الي عدك

_ اني احبها وانت تعرف

_ سليم سليم شتحب؟ ولك عصابة هذول عمها يمحيك بس يعرفك تلعب ورة ظهرة ، ياحب هذول عدهم حب ولك اني وياك لاشيء عدهم بأي لحظة ممكن يتخلون عنا..

سليم: لعد شجنتو تسون

_ ضحكت عليها بكلمتين حتى ترجع ويانة ، عدنا شغل ليوم نفرغ البضاعة..

_ ماكالي الاستاذ

_ شوف لهل درجة ما معبرك ، تريد تحب بنت اخو الوحيدة عمي عوف عل سوالف واصعد لسيارتك ، خل نروح للمخزن..

_ يعني انت ماتحبها

_ شحب سليم شحب ، اني وين وانت وين شـَڪد مرتاح ، امشي افتحلي الطريق..

صعدت بسيارة مشة كدامي واني وراة كساع يخفف يباوعلي من سيارة ويسرع واني على نفس سرعتي، افكر شلون راح اساعدها؟

_ زين هوة عمها عصابة شلون راح تشرد واسمها بس يدخل المطار يكلولة

دك مبايلي سليم تأفأفت بملل حطني براسة اليوم : ها سليم؟

_ نيالة الشاغل بالك

_ سليم سد سد ..

سديتة بوجهه شمرت المبايل دست بانزين وصلنا للمخزن ، لكيتهم يرتبون الوضع

سليم: أيوب شـَڪد جايبين مخدرات هذول

سديت حلكة اسكتة: اش سليم ناوي موتك اليوم ، الف مرة كالولك كول بضاعة حتى بعقلك لا تجيب غير اسم

سليم: ولله هاي بس تتوزع بيدنا الله راح يحير شلون يسلكنا يوم القيامة..

_ بسيطة سليم غفور رحيم

_ وشديد العقاب يخوي

_ ها انصبلك جادر ومشاية هنا؟ امشي سليم اجرد وياهم خل نخلص هل لعبان نفس..

راح يجرد ويا العمال البضاعة القديمة الوزعوها ويكتبون الصناديك الجديدة وين راح تروح..

لزمت جيس المخدرات بيدي واني اذكر..

جامعة بغداد / قسم تقنيات الحاسوب

ال٢ ظهراً

سليم: يولد

أسحاق: ها خوية

_ البارحة سمعتك ادور شغل

_ صح ليش عدك شغل

_ عدي شغل اطلع من ذهب مو فلوس

ابتسمت بوجهة : شنو نبيع اعضاء

_ شي قريب

_ لاخوية اعفيني ، اني عدي عائلة وماشي ويا الحايط ومخلصان..

سليم: يولي ثول اكلك ذهب ذهب سنة وحدة، يصير عدك بيت وسيارة وخدم وفلوس

_ واطب للنار!؟

_ يمعود منو ضامن الجنة ، هسه شكلت؟

_ شنو شغلك؟

_ مااكدر احجيلك اي شي تريد تعرف انتضرني، ورا المحاضرة الاخيرة نطلع اني وياك واخذك للأستاذ،،

_ حلو بيها استاذ وين تريد توديني سليم

_ لجنة الارض وعيونك

ضحك حط ايدة على جتفي وطبينا للمحاضر ، كعدنا واحد بصف الثاني وطول المحاضرة اني افكر اروح لو لا ، سليم ماوكف دز رسايل ومراسلة اخر شي طردنا الدكتور اثنينا..

سليم: اجت منهم بعد امشي نروح..

_ سليم وين ماخذني ؟

_ لاتخاف أسحاق انت الزلمة الخشن..

_ مخايف على روحي بس اني عدي ناس بركبتي

_ امشي واذا معجبك عوفة...

سليم: أيوب ، أيوب خلصنا لازم بليل نرجع ونوزعهن

أيووب! يمعووود

_ ها ها ، سليم ميصر واحد يصفن..

_ اصفن بالبيت امشي نرجع

_ خلصت؟

_ اي خلصنا امشي

_تروح بسيارتك؟

_ لا راح يوزعون بيها، وصلني بطريقك!

_ امشي..

اخذتة لبيتة رجعت للبيت باوعت للباب ، اذكرت دموع وعمتي يارب وين نروح ونرتاح ، اول مافتحت لباب شفت دموع ترش الحديقة شافتني سدت المي واجتني..

دموع: الله يساعدك خوية..

_ ويسااعدج يروحي

_ عدي هواي اسألة ومراح انام اذا معرفت جوابهن ، بس اكيد انت تعبان تتعشى؟ قبل لا تحجي عمة طلعت لبيت غايب واني طبخت حميسة لحم..

_ أكل حبيبتي ، بس خل افوت اسبح..

_ ماشي

طبيت للبيت صعدت لغرفتي طلعت المسدس من ظهري ، ضميتة جوة الفراش حطيت العينة بين الملابس ، رحت اسبح طول ما اني بالحمام عقلي وكلبي يكولولي لاتحجي

اسحاق اختك نظيفة مراح تتقبل الوسخ الي تفكر بي ، ولا تتقبل الوضع الي دخلت نفسك الة انت بحلك الموت شلون تكللها؟

خلصت سبح طلعت من الحمام، بدلت ونزلت للمطبخ ..

دموع تحمي الاكل والجاي

دموع: نعيماً حبيبي

_ يروحي الله ينعم عليج ، الله شـَڪد حلو البيت وحدنا..

_ الله يسامح عمامك شمروها براسنا ، شنسوي الله كريم

اكل حبيبي لاتغث روحك..

كعدت اكل بهدوء وهية منطتني ظهرها، تغسل المواعين وترتب المطبخ اكل لكمة وعيني عليها شراح احجي..

مااشتهيت الاكل جبرت روحي اكلت شوية ، كمت شلت المواعين هية بسرعة اخذتهن من ايدي

دموع: ليش حبيبي اني جان شلتهن ، بس مااكلت سودة علية مو راح تموت من الضعف

_ صحة الرشاقة حبيبتي ..

_ ياصحة هاي أسحاق راح تموت من الضعف ، مدري القهر ياكل بيك! لو تحب اصيح أيوب؟

_ سكتي دموع لاطب عمتج فوك نحجي..

_ بس اني اسحاق بالكوة خلصت اليوم منتضرتك

من الصبح تحجيلي

كفاح: شيحجي ؟

خير اللهم اجعله خير ولد زيد واخلاص مجمعين، يبسبسون شمخطّين ولكم طلعت كم ساعة كمت تخططون علية..

دموع : عمة بروح اهلجج احنا لا يمج ولا بسيرتج

_ غشيمة اني

أسحاق: غشيمة وثلث ارباع لو ما مضحكة جان اخوانج مكتلو اهلج واخوج واخذو كلشي وعافوج يمنا، لا رجل ولا فلس تباوعين لحلكنا

كفاح: شهل حجي شجاي تتهم عمامك شعليهم بموت اهلنا ..

كله قضاء الله

_ ضلي ضلي طمطمي الهم وهمة يركبون عليج ، مسويج جسر لغاياتهم

كفاح: تعال اسحاق لاتصعد تولي تعال حاجيني

اسحاق: مشغول صفني ويا روحج ، وفكري بكلامي

كفاح: الله لا يطيك ، كل مااشوفك تسممني..

دموع: عمة سمعتي اسحاق

_ سمعت سمعت ، هذا اخوج تخبل من كعدات السطح

كام يخرف من وكت..

_ حتى بيبي كالتلج هذول اخوت يوسف اخوانج

بس انتي متصدكين..

_ امشي ولي صعدي من خلقتي انتي هم

لاتخليني اسويلج شي ميعجبج

_ صاعدة

صعدت الدرج واباوع عليها نزعت شالها ذبتة ولزمت راسها تبجي

_ سفلة سفلة

_ عمة؟

_ وغمة صعدي كتلج ساقطة

هزيت ايدي وصعدت لغرفة اسحاق مرتبة ومعطرة كالعادة ، ماامد ايدي عليها لان ما يوم طبيت ولكيت بيها نقطة تراب ..

طلعت من غرفتة سديت الباب وصعدت للسطح، لكيتة بيدة دفتر يشخط ويكتب وحاط الجكارة بجانب شفتة ..

دموع: شجاي تكتب؟

_ اصفي حسابات الشغل

_ شجاي تشتغل ، وشغلك يتعلق بمُروج؟

_ عصابة ، مهرب ، قاتل مأجور

شتريدين تعرفين اكثر..

صفنت هذا جاي يشاقة يحجي صدك

باوعتلة مكمل كتابة، مشيت بصفة كاعد على السياج يدخن ويكتب

_ اسحاق جاي تتشاقة وياي مو؟

_ مااضن فد يوم مازح وياج هيج مزح قوي!

_ شلون يعني قاتل أسحاق انت ماتأذي نملة..

شلون تقتل مااصدكك ولله!!

_ من رجعت لهسه افكر شنو اجذب عليج!

بس كلت من اجذب صدمتج بية من تعرفيني تصير اقوى

فااحسن احجيلج الصدك من هسة..

لان اكيد راح يجي يوم وتعرفين...

دموع: مااصدك اجذب علية ولله اجذب مو؟

كمت ابجي واضرب بي بصدرة لزم ايدية وحضني

_ مجبور نار تاكل بكلبي صار ١٥ سنة لابية اعيش وانسى، ولابية اضل ساكت مااتحمل عايشين حياتهم واحنا دمرونا وشمرونا، ماارتاح اذا ماادمرهم دموع..

_ أسحاق وتصير مثلهم ، تصير قاتل ، تصير مافيا ، اسحاق

_ الي ماعدة سلطة وقوة، يضل مديوس علية طول عمرة

_ كم شخص بريئ دمة بركبتك هسه ها؟ كم واحد؟

اذا عمامك كتلو ٣ انت شـَڪد ؟

_ هه ، مكمت احسب ولله الي كاتلهم بيدي ماينحسبون

كد الي جاي يموتون بالمخدرات!

_ اسحاق شسويت بروحك وبينا شسويت؟ ليش هيج ليش

شنو ذنب هاي الناس ها شنو ذنبهم بشنو ورطت روحك!؟

عوف كلشي اسحاق عوف الانتقام ، عوف هذا الشغل ارجع اسحاق الاعرفة الطيب الي ميرضى بالغلط..

_ تأخر الوكت هواااي هواي دموع ، اني اشتغل بااكبر مافيات العراق بس انسحب لو اترجع يقتلوني ، واني مخايف من الموت بس مااريد اموت واني ما ماخذ ثاري من عمامج الكواو**

_ شحجي هسه أسحاق شحجي؟

اخوي الي افتخر بي وبأسمة قاتل

وينك يابة وتشوف ابنك التحطة على صدرك، شسوة وينك

كمت الطم على وجهي وابجي دنك يلزم ايدية

_ اش ، لاتسوين هيج بروحج

اني طبيت لهل مكان وسويت هيج بس حتى اخلي ابوية يرتاح بكبرة

_ مايرتاح ولله مايرتاح ودم ناس بركبتك

عوف الشغل خوية عوفة

_ شعوف دموع صدك تحجين ، ماضلي بس شوية واوصل لعمامج

من يموتون ذاك الوكت اعوف الشغل ، لو اموت لو اعيش براحة وهمة ميتين..

_ أسحاق ، عليك الله اذا متفكر بروحك فكر بية اني منو الي غيرك..

اذا صار بيك شي اموت ، انت ريحة ابوية وجدي انت اخر شي باقيلي بدنيا ، اني عايشة لخاطر عيونك حبيبي، لخاطري لخاطر الله عوف هل شغل..

أسحاق: دموع ليش ماتفهمين ، اني مو عامل مطعم مثلج واعوف الشغل اني مافيا مافيا..

دك المبايل باوعتلها امسح دموعها جاوبت

_ ها سليم

هسه؟

مو كال بليل نوزع؟

جايك..

دموع : وين رايح اسحاق

_ للموت ..

_____

يُتبع

الرابع من هنا

تعديل المقال