رواية عود ثقاب الفصل الثاني والثلاثون 32 بقلم ندا سليمان

رواية عود ثقاب الفصل الثاني والثلاثون 32 بقلم ندا سليمان

الحلقه 32

وقفنا الحلقه إللي فاتت عند أما

توفيق كان قاعد في مكتبه مع عزيز بيسمع خطته الجايه في القضيه جاله اتصال رد وفجأه قام مفزوع .....

توفيق : إزاي وحصل امته الكلام ده انا جاي حالا !!!

وصل المستشفى بأقصى سرعه هو ومراته ومعاهم عزيز ولقوا مايا في أوضة العمليات وصحبتها منهاره جنب الأوضه

أم مايا : ايه إللي حصل يا هايدي

هايدي بتبصلهم ومش قادره ترد ولا عارفه هتقولهم إيه !!!

توفيق : ماتنطقي يا بنتي احنا اعصابنا مش مستحمله ايه اللي حصل ؟؟!!!

بصت لأم مايا : طنط ممكن اقول لحضرتك على انفراد ؟؟

زفر توفيق بعصبيه ومراته مسكت هايدي من ايديها وراحوا في جنب وأول ماقالتلها ان مايا كانت بتعمل اجهاض فقدت وعيها
جري توفيق وعزيز عليها سندوها ودخلوها اوضه في المستشفى

إلتفت توفيق لهايدي ومسكها من دراعها بعنف : بنتي قالت جايه تقعد عندك انطقي عملتوا في بنتي ايه

هايدي بـبذعر : والله يا اونكل ما انا مايا كدبت على حضرتك ماكنتش هتقعد عندي تذاكر

صرخ في وشها : امال ايه اللي حصل انطقي

قرب عزيز وفلت دراعها من ايديه : بالراحه يا توفيق بيه هايدي هتحكيلنا كل حاجه بهدوء

اول ماساب دراعها مسكته بألم وبدون تردد حكتلهم على كل حاجه حصلت من يوم ما مايا قابلت حسام لحد عملية الإجهاض ، توفيق بيسمعها بصدمه ومش قادر يتحمل قعد على اقرب كرسي وانفاسه بتخرج بصعوبه قلع الكرفته وفتح ازار القميص وبيحاول يتنفس

عزيز : توفيق باشا انت كويس ؟؟!

توفيق : عزيز انا عاوز الكلب اللي اسمه حسام ده عندي حي او ميت لو في بطن امه تجبهولي

عزيز : حاضر بس هدي نفسك يا توفيق بيه وانا هتصرف المهم نتطمن على مايا
.
.
.
وبعد ساعتين من الإنتظار والقلق خرجت مايا من اوضة العمليات وطمنهم الدكتور انها خرجت من مرحلة الخطر وكويس انها وصلت المستشفي في الوقت المناسب ، حطوها في اوضه لحد ما تفوق وامها قاعده جنبها ماسكه ايديها وبتبكي بحرقه على منظرها وهايدي بتربت على كتفها وتواسيها أما عن توفيق فواقف عند باب الأوضه بيتأمل بنته بألم :'((

فاقت بعد ساعه ومن وقت ما فاقت وهي مابتنطقش باصلهم بخوف وبتبكي وبس امها ضمتها في حضنها وبتحاول تطمنها وتوفيق ما استحملش يشوفها خرج بره لعزيز

توفيق : ايه الاخبار يا عزيز عرفت فين ؟

عزيز : لسه يا توفيق بيه انا بعمل محاولاتي

توفيق بعصبيه : اتصرف بسرعه

عزيز: امرك يا توفيق بيه حالاً هعمل اتصال تاني واحاول

طلع سيجار ولعه وهو بيتأمل بنته
كل حاجه حصلت لإبنه وفي حياته كلها ما كسرتهوش اد اللحظه دي
بيبص لبنته وحاسس انه مكسور اووي :'(( لأول مره مش عارف يتصرف إزاي مش عارف يقسى عليها ولا يضمها في حضنه ، غروره خلاه يفتكر ان ملهوش نقطة ضعف بس مايا اثبتتله انهارده انها نقطة ضعفه :'((

•••••••●••••••••●••••••••••●•••••••••●••••••••●•••••

شيماء : الو ، ازيك يا داليا ؟

داليا : بخير الحمدلله وانتي ؟

شيماء : كويسه بس متوتره شويه

داليا : ماتقلقيش الحلقه هتعدي على خير ان شاء الله

شيماء : انا بتصل أأكد عليكي الميعاد اوعي تنسي ولا تتأخري بالله عليكي يا داليا

داليا : شيماء انتي مش ملاحظه ان ده الاتصال رقم 4 اللي تقولي فيه نفس الكلام وتفكريني بالميعاد ! !!

شيماء : يوووه معلش بقى يا داليا استحمليني شويه الله يخليكي

داليا : ههههه يلا هخليها عليا واستحملك

شيماء : ولا تزعلي اهه سيبهالم وهقوم اراجع الحوار

داليا : الله معك بس لو اتصلتي تأكدي ع الميعاد تاني انا مش هاجي هه

شيماء : لا خلاص آخر مره مع السلامه

داليا : مع السلامه

قفلت معاها وبصت لمامتها : أمال خالو فين يا ماما بقاله ساعتين بره ومارجعش هو راح لخالتو ولا ايه ؟؟

خديجه قاعده وحاطه ايديها على خدها : لأ مارحش لخالتك نزل يتمشي شويه

بصت على لارا ولقتها بتلعب بالمكعبات في الأرض قعدت جنبها بتلاعبها وملاحظه شرود امها فقامت وقعدت جنبها ربتت على كتفها : مالك يا ماما ؟؟!

خديجه : مليش

داليا : من امته بتخبي على دولّي ان شاء الله ؟؟

زفرت خديجه وردت : يعني انتي شايفه فيه حاجه تفرح رجعت من عند أبوكي ولقيته زي ما هو والدكتور قالي ادعيله ، قلقانه على قضيتك وعليكي نفسي اطمن على عادل واعرف راح فين بس نفسي يرجعلي عادل ابني اللي خلفته وربيته مش اللي المخدرات شقلبت حاله وفوق كل ده حال ناصر وحـ

وقبل ما تكمل بترت جملتها فرفعت داليا احد حاجبيها وردت بهدوء : بابا ان شاء الله هيقوم بالسلامه ماتقلقيش عليه ، قضيتي وماشيه تمام جدا والحمدلله عادل احب اطمنك انه في مكان آمن وان شاء الله هيرجعلك عادل ابنك اللي كان زمان واحسن

بصتلها ومستغربه : وانتي عرفتي منين؟ انتي تعرفي مكان عادل ؟؟!

داليا : تقريبا يعني بس مش ده المهم دلوقتي المهم هو جملتك اللي مارضيتيش تكمليها مال ناصر وايه اللي قالقك عليه ؟؟!

بلعت ريقها وردت : يعني جوازته اللي طلعت فشينك دي وبنته اللي هتتربي من غير ام وحياته ملغبطه كده ربنا يعينه ويعينكم كلكم

وقبل ما داليا تسأل عن حاجه تاني : خدي بالك من لارا بقى انا هقوم اريح شويه

مطت داليا شفايفها وهي حاسه ان فيه حاجه مش طبيعيه امها مخبياها عنها دخلت المطبخ عملت كوباية نسكافيه وساندوتشين ودخلت اتطمنت على أحمد ومذاكرته ، خرجت من عنده وقعدت في الأرض جنب لارا بتلاعبها في إنتظار وصول خالها ....
~
~
~
~
ناصر فضل يتمشي في الشوارع بلا هدف ولقى رجله ودته لأكتر مكان كان بيروحه زمان ، إتأمل الجنينه وعلى شفايفه شبح ابتسامه :"))
كل ركن فيها شايل ذكرى ليهم ، المكان زي ما هو بكل ملامحه القديمه
لمح مرجيحه مصديه في ركن بعيد قرب منها واول ما لمسها كإنه رجع بآلة زمن لنفس اللمسه دي من سنين بس زمان كانت قاعده هنا وهو بيمرجحها وصوت ضحكتها بيخلي قلبه يطير مع ضفاير شعرها اللي بتطير بفرحه في الهوا مع كل دفعه :"))
سامع دلوقتي في ودانه صوت ضحكتها كل ما يبص في اتجاه يشوفها وهي قاعده معاه فيه
قعد ع المرجيحه وشرد مع ذكرياته افتكر أول مره شافها فيها ، كان في نفس المكان ده لسه يا دوب 11 سنه بيطيّر مع اصحابه طيارات ورق ويتسابقوا وهناك بعيد في السما لفتت انتباهه طياره لوحدها فقد تركيزه في المسابقه وبعد ما كان هو الكسبان بدأ يتقهقر وبدل ما يغلبهم فضل ماشي بطيارته ورا الطياره اللي سحرته وحتى مش سامع نِدا اصحابه ،، وفجأه اتقطع خيط الطياره ووقعت فوق شجره بص على صاحبتها وعيونه لمعت مع ابتسامه بريئه اترسمت على شفايفه
بنوته بفستان اخضر رقيق زي لون قلبها وضفيرتين بيتمايلوا وياها ملامحها لفتت انتباهه فضل يتأملها وما انتبهش لطيارته اللي نزلت ع الارض ، قربت من الشجره وحاولت تجيب الطياره بس ما قدرتش فقدت الأمل كشرت وقعدت ع المرجيحه وعلى طول طلع ع الشجره جاب طيارتها وربط الخيط ، صلحها وراحلها

ناصر : مش دي طيارتك ؟؟

عيونها لمعت بفرحه وابتسمت : ايوه هي شكرا عشان جبتها

صوتها الطفولي وفرحتها خلوه يبتسم

ناصر : تحبي امرجحك ؟

كشرت مره واحده وردت بحده : لأ بابا قالي ما ألعبش مع ولاد

قالت جملتها وجريت وهو جري وراها ولما لقاها خافت منه وقف واختفت من قدامه من غير ما يعرف حتى اسمها ، لحد ما شافها بتلعب ع السلم وهو رايح بيت صاحبه اللي ساكن في منطقه جنب الجنينه وطلعت جارتهم ماكنش فاهم هو ليه بيبقي فرحان لما يشوفها عرف إسمها #شيرين !

بسرعه اوي اتكونت صداقه بينهم وبقت بتكبر قدام عينيه لحظه بلحظه وبيزيد حبه ليها اكتر واكتر

افتكر اول مره اعترفلها بحبه كانوا لسه اطفال وضحك من قلبه لما افتكر ردها يومها ، احمرت خدودها من الخجل وردت : عيب تقولي كده تعالى اطلبني من بابا زي ابله نعمة اللي في الدور الخامس عريسها قال لباباها وخطبها

فاكر يومها رده كويس اوي : بس أنا مش معايا فلوس يا شيرين عشان اتجوزك دلوقتي

شيرين : خلاص وانا هستناك لما يبقى معاك فلوس وتيجي تتجوزني

والاميره الصغيره وفت بوعدها واستنته واستحملت معاه كتير وهو كان بينحت في الصخر عشان يفوز بيها وفي النهايه ابوها كان عاوز واحد غني فرفضه بعد ما كان رايحله وكله امل وفرحه وبكلمة #لأ اتحطمت آمالها وآماله

نزلت دموعه دلوقتي لما افتكر كسرت قلبه اول مره اترفض فيها وما يأسش حاول تاني وتالت اصله حاسس إنه مربيها ومش قادر يتخيلها لراجل غيره

وفجأه رن موبايله وكانت داليا مسح دموعه ورد : ايوه يا داليا

داليا : إتأخرت كده ليه يا خالو ؟؟

ناصر : معلش كنت بتمشي شويه والظاهر كده الوقت سرقني انا جاي اهه

قفل معاها وبص نظره اخيره على المكان ، مشي وماخدش باله من اللي واقفه ورا الشجره هناك وبتراقبه من بعيد من لحظة دخوله المكان دموعها سايله وبتتأمله ونفسها تترمي في حضنه وتبكي بحرقه على كل لحظه ضاعت من عمرهم وهم بعيد عن بعض

بعد ما إتأكدت إنه مشي جريت ع المرجيحه ولمست مكان ايديه قعدت عليها ووشها رسم لوحه فنيه عن صراع مابين بسمه بريئه ودمعة حزن حيرانه :"))

زادن دموعها وعلىَ صوت نحيبها لحد ما انتبهت للأطفال اللي اتلموا حوليها

_انتي بتعيطي يا ابله ثيرين ؟

ابتسمت ومسحت على شعر الطفل اللي سأل : لأ يا حبيبي أنا كويسه :"))

قامت وهي بتمسح دموعها اتأملت المكان بنظره اخيره قبل ما ترجع البيت .....

•••••••●••••••••●••••••••••●•••••••••●••••••••●••••••

وجه ميعاد الحلقه ، وصلت داليا الاستوديو قبل الميعاد بربع ساعه وبتحاول تتغلب على توترها وخالها جنبها بيبتسملها بود وصلت نهال

نهال : اسفه ع التأخير

داليا : ولا تأخير ولا حاجه لسه باقي ربع ساعه وحاسه شيماء من كتر التوتر محتاجالك اكتر مني !!

نهال: ههههههه هي رهبة أول ظهور كده هروح لشيماء حاضر بس خلينا معاكي الأول ايه الاخبار ؟؟

دالبا : امممم متوتره شويه !

نهال: ده توتر طبيعي المهم وانتي في الحلقه انسي ان فيه كاميرات بتصورك اتكلمي براحتك وتأكدي ان كل ما هتتكلمي بثقه كل ما الناس هيوصلها صوتك ورسالتك اسرع واصدق

ابتسمت داليا : ان شاء الله

ربتت على كتف داليا وهي مبتسمه بعدين راحت طمنت شيماء شويه لحد ما حان الموعد ....الأول بدأ المذيع الأساسي للبرنامج ،،،رحب بالساده المشاهدين وبدأ يتكلم عن القضيه :
قضيه شغلت الرأي العام وأصبحت حديث كل الناس قضية داليا والذئاب البشريه والمفاجئه ان داليا مش بس قبلت تظهر في برنامجنا هي كمان رفضت يتم التشويش على صوتها ووشها وأصرت تظهر بهيئتها الحقيقيه وتتكلم على طبيعتها بس قبل ماتشرفنا داليا فيه شخصيه لازم تتعرفوا عليها انهارده هي أمل الصحفية إللي حولت قضية داليا لرأي عام والحقيقه هي مش اسمها امل حان الوقت لظهور الشخصيه الحقيقيه بنرحب معانا بالأستاذه شيماء

_أهلا بحضرتك

شيماء : أهلا بحضرتك

بدأ يحاورها ويسألها عن سبب اختيارها اسم مستعار وازاي عرفت بالقضيه ، في الأول كانت مرتبكه شويه ولكن لما انطلقت في الاجابات نسيت الكاميرات وبدأ توترها يتلاشى
.
.
المذيع : سعدنا بالتشرف بحضرتك ونتمني لكي حياه ناجحه وموفقه
اعزائي المشاهدين طال انتظاركم لداليا وخلاص جه الوقت هسيبكم مع الاستاذه شيماء وداليا ولكن بعد الفاصل ان شاء الله ... ابقوا معنا فاصل ونواصل

انتهى الفاصل وبدأت شيماء :
اهلا بحضراتكم مره أخرى انهارده بنستضيف أنثي سمت نفسها #عود_ثقاب شجاعه وجريئه طالبت بحقها واتحملت كل التهديدات اللي اتوجهتلها وشجاعتها خلتها ترفض نعمل تشويش على وشها يا ترى ليه ؟؟! ده اللي هنعرفه من داليا

بصت لداليا : اهلا بيكي معانا يا داليا

داليا : اهلا يا شيماء

شيماء : خلينا نبدأ بأول سؤال نهيت بيه المقدمه رغم ان كل الناس وخاصه اللي بنفس قضيتك لما نستضيفهم هم اللي بيطلبوا تشويش على وشهم وصوتهم فـ ليه يا ترى طلبتي تظهري بطبيعتك رغم ان ده ممكن يعنى ف مجتمع زي مجتمعنا يسببلك متاعب كتير ؟؟!

داليا :
خليني أبدأ بسم الله الأول وبعدين اقولك ان من وجهة نظري اللي المفروض يخاف هو المجرم او المذنب واللي خايف معروف بيخبي وشه طيب وليه انا اخبي وشي بما اني ماغلطش في حاجه ولا مجرمه بالعكس انا صاحبة حق وصاحب الحق لازم يكون قوى كفايه عشان يقدر يجيب حقه ثم في نهاية سؤالك قولتي ان ممكن ده يسببلي متاعب في مجتمعي طيب ما انا جايه انهارده عشان ازيل المتاعب دي وامحي كلمة فضيحه عشان اقول لكل مغتصبه أو تم التحرش بيها ماتخافيش ولا تحسي انك عار انتي صاحبة حق ماتسمحيلهمش يكسروكي او يذلوكي

شيماء : بحييكي على شجاعتك يا داليا ولما كنت عندك في البيت بنعمل حوار للجريده اطلقتي يومها على نفسك لقب عود ثقاب اكيد كتير من الناس حابيين يعرفوا ليه اخترتي الاسم ده ؟؟!

داليا : لإن بعد ما الحادثه حصلتلي افتكرت جمله كان دايماً والدي الحاج عمران ربنا يقومه بالسلامه ويحفظه من كل سوء بيقولهالي وهي اظن كتير مننا عارفينها
(( شرف البنت زي عود الكبريت مايولعش غير مره واحده )) الجمله دي هي اللي خلتني اختار لقب عود ثقاب هو عود بس بلاش نستهون بالعود ده لإنه ممكن يحرق بلد بحالها بس في حالتي عود الثقاب ده اتولع بس مش هينطفي ابداً غير لما يحرق إللى ولعوه Smile)
~
~
~
~
هاله كانت بتكتب في اوضتها وخرجت تقعد مع امها وابوها ولقتهم مشغليين التليفزيون ع الحلقه ومندمجيين قعدت جنب ابوها واتسعت عنيها أول ما شافت داليا افتكرت لما شافتها في العياده وكانت بتشبه عليها وافتكرت زمان لما شافتها بس الهم غيرها اوي عشان كده ما قدرتش تعرفها بسهوله
افتكرت نظراتها لما كانت في العياده وقدرت دلوقتي تفسرها خرجت من شرودها على خبطه من بطنها ظهرت منها انّه خفيفه طبطبت على بطنها وهي مبتسمه واندمجت زي اهلها مع الحوار
~
~
~
الشقه كلها مكركبه ومليانه ورق وهدوم في كل حته وهناك ممد ع الكنبه وسرحان في السقف لحيته كثيفه وشعره أشعث وأثر التعب واضح في ملامحه وعينيه جاله تليفون رد من رابع اتصال

علي : ايوه يا بابا خير ؟

_اخيراً عبرتني ورديت يا بشمهندس عموماً حبيت اوريك الاستاذه اللي كنت عاوز تتجوزها وتبلينا بيها اهه بتفضحنا ع التليفزيون

انتفض من مكانه : داليا ؟؟؟ فين ؟؟!

_طالعه على قناة (....) ولا كإنها عامله حاجه جتها البلا فضحت العيله

قفل السكه من غير ما يرد على ابوه وبسرعه فتح التليفزيون وشافها قصاده قرب وقعد في الارض قريب اوي من الشاشه لمسها بإيدين مرتعشه ومررها على وش داليا ، سالت دموعه فتركلها العنان وبدأ يتابع وهو مبتسم :")) علّىَ الصوت ع الآخر عشان صوتها يغذي روحه ويملا شقته بالحياه
~
~
~
خديجه قاعده ونايمه لارا في حضنها واحمد جنبها بيتفرجوا على الحلقه وعيونها ملياها الدموع وبتدعي ربنا يحفظ بنتها ويفرح قلبها
~
~
زي طارق اللي قاعد هو وامه بيسمعوا

ام طارق : مالك يا حبيبي مش على بعضك كده ليه ؟؟!

طارق : امي انا هغير واروح عند داليا عشان لما تخرج من الاستديو اكون مأمنلها المكان

_يا حبيبي مش قولتلها وقالتلك ماتتعبش نفسك خالي هيكون معايا هو انت غاوي وجع قلب وخلاص ثم ماتتحركش من البيت مش عاوزه اقعد لوحدي ده انا ماصدقت مش وراك حاجه دلوقتي وقاعد بتسمع معايا

قبل إيديها : خلاص يا أمي اللي تشوفيه

بص للتليفزيون بتركيز وهو مبسوط من تألق داليا وشجاعتها
~
~
~
شيماء : تقدري تحكيلنا تفاصيل الحادثه ؟؟!

داليا : يعني اختصارا ًللوقت واظن الناس قرأت التفاصيل في مقالاتك بس هقول ان اللي حصل يومها كنت راجعه البيت وبدري يعني و المتهمين الاول وجهولي معاكسات بعدين مضايقات بعربيتهم وتحولت للمس وتهديد بالسلاح وقاومت فضربوني لحد ما فقدت الوعي وصحيت لقيت نفسي في فيلا و و تم ضربي وسحلي والاعتداء عليا جنسيا وبعدين رموني في الشارع مكان ما اخدوني ولولا ستر ربنا ان اخويا الصغير احمد لحقني في الوقت المناسب وقدروا يوقفوا النزيف في المستشفى

لمعت عيون داليا وسكتت ، ماقدرتش تكمل تاني ، لاحظت شيماء ولحقت الموقف

شيماء : معانا اتصال تليفوني الو

_سلام عليكم

شيماء : وعليكم السلام اهلا بحضرتك

_حابب اشكرك يا استاذه شيماء على مجهودك ومقالاتك الرائعه واحب كمان اقول للأستاذه داليا ماتخافيش ربنا معاكي ثم احنا كمان معاكي تابعنا قضيتك وهنفضل جنبك لحد ما تاخدي حقك

ابتسمت داليا : متشكره جدا لحضرتك ربنا يحفظك

توالت الاتصالات المشجعه لداليا لحد ما جه اتصال هجومي

_وهو فيه واحده محترمه تطلع ع التليفزيون وتقول اغتصبوني وتفضح نفسها الا اذا كانت هي لا مؤاخذه يعني

ردت داليا بهدوء : اولاً ده رأي حضرتك مجرد رأي والآراء ليست حقيقه حتى تُدعم بدليل اهه انا جايه انهارده عشان احاول امحي العفن المجتمعي والتفكير الرجعي اللي بالضبط زي تفكير حضرتك وكتير في مجتمعنا للأسف بيفكروا بالشكل ده وانا مش حاسه بالخجل ولا حاجه ولا حاسه بكلمة فضيحه اللي بتتكلموا عنها دي لإني ماعملتش حاجه غلط اخاف منها

شيماء : معانا اتصال تاني الو

_عاوزه اكلم داليا لو سمحتي

شيماء : اتفضلي يا فندم داليا سامعه حضرتك

_انا مصدقاكي انهم اغتصبوكي ومصدقه البنات اللي بيقولوا اتعرضوا لتحرش بس انتوا اللي بتعملوا في نفسكم كده بصوا للـ بسكم والمناظر اللي بتطلعوا بيها من بيوتكم كإنكم بتقولوا للرجاله اتحرشوا بيا قبل ماتيجوا تتكلموا عن تصرفات الرجاله استروا نفسكوا الاول 

المكالمه دي حرقت دم داليا فردت بإنفعال :
للمدام اللي اتصلت تعرفي المشكله مش في كلامك المشكله في إنك تعادي انثي زيك ممكن تتعرضي لمعاناتها انثي المفروض تحسي بيها وتسانديها لكن للأسف جايه تبرري لمجرم جريمه بشعه زي دي ، بس حضرتك دلوقتي المشكله ملهاش علاقه بلبس بتبقى منتقبه ماشيه في الشارع وبرده بتتعاكس المشكله في العقول والاخلاقيات والتربيه اللي اتعدموا في مجتمعنا حتي وان كانت فيه بنات بتبالغ فعلا في لبسها الايام دي ولكن ده برده مايديش الحق للراجل انه يتحول لحيوان ينهش لحمها سواء بكلامه او نظراته او لمسه
هخصص كلام حضرتك بقى واقيسه عليا ليلة الحادثه الاول انا كل لبسي اما فساتين محتشمه وجيب واسعه واما عبايات زي العبايه اللي لبساها دلوقتي وليلة الحادثه كنت لابسه محتشم وحقيقه كان نفسي اجي الحلقه وانا لابسه نفس لبسي في ليلة الحادثه لكن للأسف اللبس ليلتها اتقطع وبقى مجرد خرقه غرقانه بدمي بس انا كنت عامله حسابي ان فيه ناس هتتصل وتبرر لذلك جبت الهدوم معايا 

اتناولت شنطه بلاستيك جنب شنطتها وطلعت منها هدوم متقطعه وغرقانه دم ، مسكتها داليا بإيدين مرتعشه ووجهتها ناحية الكاميرا وهي بترد بصوت مرتعش :
ا اظن حضرتك شايفه منظر الهدوم او اللي كانت هدوم تخيلي بقى قطع هدوم ودم بالشكل ده وبالبشاعه دي يديلك الحق تبرري  ؟؟؟!!!!
الحادثه دي عذبتني كتير اوي نفسيا وجسديا واتعرضت لتهديدات كتيره اوي وضغط عشان اتنازل عن القضيه بالاضافه لان اهلي كمان إتأذوا وابويا لحد دلوقتي في غيبوبه ما ما فاقش منها :'((

فجأه داليا حست بألم في جرح من اللي في جسمها وجرح قلبها بيألمها وقعت الهدوم من ايديها وحست ان عندها هبوط لاحظت شيماء واعلنت :
اعزائي المشاهدين فاصل وهنرجعلكم من تاني ابقوا معانا فاصل ونواصل

قالت جملتها وجريت على داليا ومعاها نهال وناصر

نهال: داليا انتي كويسه ؟؟

داليا بوهن : ايوه بس جالي هبوط 

قرب ناصر وضمها في حضنه فإتفتحت في العياط وهو بيربت على كتفها
ونهال بتهديها هي وشيماء 
~
~
~
علياء متابعه ولاحظت داليا وقت ماتعبت بعد تعقيبها على آخر سؤال وعيونها دمعت كان نفسها تكون جنبها اوووي في اللحظات دي كلها 
كلمت خالها ناصر عشان يديلها داليا بس ماردش لانه عامل الموبايل صامت ومشغول مع داليا والحاله اللي وصلتلها ورا الكواليس :"((
~
~
~
على متعصب من بعد آخر اتصاليين ومتضايق اوووي لضيق داليا وانفعالها شرد وتخيل لو ما كنش احمق وسابها لوحدها تواجه كل ده كان ممكن شكل حياتهم يبقى ازاي !!
زفر بضيق قفل التليفزيون ، غير هدومه ونزل يتوه في الشوارع ....
~
~
~
مريم بتتفرج ع الحلقه وهي بتبكي  اول ما شافت هدوم داليا المقطعه سرت قشعريره في جسمها المنظر بشع بيقول ان اللي هاجمها حيوان مفترس مش بشر  افتكرت مقابلتها مع خالد وبكت بحرقه على الغفله اللي عايش فيها 
~
~
~
مايا نايمه في سريرها وامها بتأكلها لسه لحد دلوقتي مانطقتش والدكتور نصحهم يعرضوها على دكتور نفسي ، اكلت وادتلها امها دواها وسابتها تنام ، نزلت لقت توفيق بيتفرج ع التليفزيون بعصبيه : شايفه الفضايح !

_هو مش عزيز قالك مش مهم اي حاجه المهم الجلسه !!

توفيق : ايوه بس ده هيقلب الناس علينا زياده ولا انا خايف على ايه ما خلاص سمعتنا بقت زي الزفت لا خلفتي ابن عدل ولا حتى بنت عدله

_يا سلام بتلومني انا وكإني المسؤله لوحدي هم مش ولادك زي ما هم ولادي

توفيق: انا مشغول في الزفت الشغل عشان أجيبلكم فلوس وتعيشوا حياه كريمه كان لازم حضرتك تربي عدل والا ماكناش وصلنا لكده 

_مش من حقك تلومني لإنك كمان قصرت في تربيتهم

وقبل ما يكمل حواره معاها رن موبايله بصتله بغضب وسابته ومشيت

توفيق : أيوه يا عزيز ؟؟ لقتوه ؟ ......يعني إيه سافر إعرفلي سافر فين وجيبه أنا مش هرتاح غير والواد ده مذلول قصادي 
خلص تليفونه بإنفعال قفل التليفزيون وخرج من البيت ...
~
~
~
هنادي عرفت ميعاد الحلقه من الاعلانات وماصدقت ان ابوها مش في البيت شغلتها واول ما شافت داليا جسمها ارتجف بتسمع كل كلمه طالعه من داليا ودموعها نازله 
دخلت اوضتها وفتحت الدولاب طلعت علبه مستخبيه تحت هدومها فتحتها وفضلت تتأمل اللي فيها ولسه بتبكي  سمعت امها بتنده فشالت العلبه بسرعه ، خبتها في الهدوم وطلعتلها وهي بتمسح دموعها :'((
~
~
~
داليا بقت كويسه وشيماء رجعت من تاني تحاورها وجالهم اتصال فرح قلب داليا

من امها : انا عاوزه اقول اني فخوره ببنتي وهفضل جنبها لحد ماتجيب حقها مايهمكيش يا قلب امك كل اللي بيقولوه ربنا شايف كل حاجه والديّان لا بيغفل ولا بينام ابدا وحقك هيرجعلك يا نور عيني

لمعت عيون داليا وابتسمت ربنا ما يحرمني منك يا أمي انا بستمد قوتي من وقوفك جنبي ومساندتك ليا يا اعظم ام في الدنيا

بعد اتصال امها جه اتصال غريب صاحبه قال كلمه واحده بس كلمه كانت بمثابة قصه في عيون داليا المتصل قال : انا آسف 

عرفت ان هو من صوته سرت قشعريره في جسمها واطرافها بردت تمالكت نفسها وشيماء ماحبتش تعلق على الاتصال لما شافت تغير ملامحها وبعد اتصاله رفضوا يستقبلوا اتصالات تاني لحد آخر الحلقه توالت الاسئله وداليا بتحاوب بكل شجاعه

وجه ميعاد آخر سؤال : وفي نهاية حلقتنا تحبي تقولي ايه لمجتمعك ؟؟!

داليا : أحب اقول كفايه
كفايه كلمة فضيحه وكلمة عار ،، لكل راجل كفايه بقى تحقر من شأن المرأه لإنها لو كانت عار ماكنش الاسلام كرمها ماكنش برها هيبقى سبب في دخولك الجنه سواء كانت امك او اختك او بنتك او زوجتك اياً كانت ماكنش رسولنا الكريم صلوات الله وسلامه عليه وصي عليها قبل وفاته
كفايه مجتمعنا يقيس الشرف بغشاء !!
كفايه كل اب يلوم بنته لما تتعرض لاي حادث اغتصاب او تحرش ويسكت عن حقها وكفايه كل واحد يتخلى عن خطيبته ولا زوجته ولا الانسانه اللي بيحبها لما تتعرض لموقف زي ده ويتهمها لإن مش هي المذنبه ولو بتحبها بجد ماكنتش هتتخلي عنها وتسيبها تواجه الموقف لوحدها خذلانك ليها هيكسر قلبها ويزود وجعها اضعاف  ، كفايه تلوموا الفرخه لما اتدبحت وتسيبوا اللي ماسك السكينه غرقانه بدمها كفايه تعاقبوا البرئ وتشجعوا كل مجرم على جريمته وتبرروا
وارجوكم ربوا ولادكم على الاخلاق والدين من صغرهم ربوا جيل يحرر الأقصي جيل أحفاد صلاح الدين مش جيل كل هوايته التحرش وإنتهاك الأعراض !!!
ربوهم لإنكم هتتسألوا عنهم يوم الدين

وشكراً للقائمين ع البرنامج لإنهم سمحولي اعبر عن رأيي واوصل صوتي وشكرا ليكي يا شيماء
شيماء : احنا اللي بنشكرك يا داليا على شجاعتك وموافقتك انك تظهري معانا انهارده وحقيقي سعدنا بوجودك ونتمنالك التوفيق واكيد ان شاء الله ربنا هينصرك وتاخدي حقك مهما كان حجم المجرم في البلد في النهايه هو مجرم ولازم يتعاقب

اعزائي المشاهدين شكرا لكم على حسن متابعتكم ومنتظريين استفساراتكم وتعليقاتكم ع اليوتيوب والفيس بوك اللينك موجود ع الشاشه لحضراتكم شكرا لكم مره اخرى والسلام عليكم ورحمة الله وبركاته
.
.
.
هنوا داليا وشيماء ع الحلقه ومشيت داليا مع خالها ، اول ما وصلوا البيت امها كانت في انتظارها استقبلتها بابتسامة ود وضمتها في حضنها
قبلت داليا ايد امها وراسها : ربنا مايحرمني منك ابدا يا أمي

كلمها طارق هناها ع الحلقه ووراه مريم وعلياء قفلت موبايلها ودخلت ترتاح شويه ولقت النوم مجافيها لسه كلمة انا اسف بتتردد بصوته في ودنها  الم قلبها اشتد فقامت اتوضت وبدأت تقرا في المصحف عشان تطبطب على قلبها الموجوع :'((

•••••••●••••••••●••••••••••●•••••••••●••••••••●•••••

امتحانات مريم بدأت وخلصت وداليا جنبها لحظه بلحظه وطول فترة الامتحانات وهي بتهرب من عمرو وهو سايبها براحتها لحد ماتهدي وتكون حابه تتكلم واقف جنبها من بعيد لبعيد ومش حابب يضغط عليها لإنه مقدر إللي هي فيه ...

وبعدها بأسبوع بدأ الضغط في بيت داليا وكتير من البيوت المصريه حيث بداية امتحانات الثانويه العامه ، داليا ماكنتش بتنام طول الوقت جنب احمد بتساعده ع المذاكره وتسانده وخلصت امتحاناته وهو راضي عن اجاباته وحاسس انه ادي كويس جداً

وحصلت مفاجأه محدش كان متوقعها بعد مافقدوا الأمل فاق عمران من غيبوبته وكانت فرحة داليا وامها لا توصف دبت الحياه في قلوبهم من تاني رغم ان الشلل اصبح رباعي ومابقاش بينطق بس كل ده مش مهم المهم ان نَفَسه لسه في الدنيا بيطمن قلبهم ويمدهم بالأمان  :"))
~
~
~
على من يوم حلقة داليا وهو منزلها من ع اليوتيوب ويوميا لازم يسمعها ملامحها وحشاه اوي دايما بيقف عند تعابير وشها بعد اتصاله ، يومها كان نفسه يقولها كلام كتييير اوي جواه كان نفسه يطلب منها فرصه تانيه وبعد ما اتشجع واتصل لقى نفسه مش قادر يقول غير كلمة واحده انا اسف :'(( ، كل مايسمع جملتها ((وكفايه كل واحد يتخلى عن خطيبته ولا زوجته ولا الانسانه اللي بيحبها لما تتعرض لموقف زي ده ويتهمها لإن مش هي المذنبه ولو بتحبها بجد ماكنتش هتتخلي عنها وتسيبها تواجه الموقف لوحدها خذلانك ليها هيكسر قلبها ويزود وجعها اضعاف  )) يحس انها بتقوله هو الكلام ده وتوصله الرساله يحس اد ايه وجعها وظلمها  ويكره نفسه اكتر :'(( ..
~
~
~
هاله من وقت ما شافت داليا وهي متعاطفه معاها اووي لما شافت الحلقه وسمعت الاتصال بتاع على عرفت ان هو لإنها حافظه نبرة صوته لحظتها قلبها وجعها لإنها حست بالالم والوجع اللي كان في صوته وكالعاده فرغت الطاقه اللي جواها في رسايلها لطفلها اللي خلاص وصوله قرب وهي في انتظاره على احر من الجمر :'))

•••••••●••••••••●••••••••••●•••••••••●••••••••●••••••

ناصر ممد ع السرير وشارد في ذكرياته رن موبايله ولقاها داليا

ناصر : ايوه يا داليا

داليا : انت روحت عند خالتو ولا لسه ؟؟

ناصر : لسه هقوم دلوقتي اهه

داليا : طاب معلش يا خالو ابقى روح انت هات لارا واظن انت فاكر العنوان لإن المحامي هيطول معانا في اجراءات بنعملها ومش هرجع بعد اقل من ساعتين

ناصر : خلاص يا داليا ماتشغليش بالك انا هروح اجيبها

من وقت ما بنته بدأت دروس عند شيرين وهو ما بيروحش هناك بيخلي داليا هي اللي توديها وتجيبها مش متخيل المواجهه هتكون ازاي !
وفي نفس الوقت مش عاوز يقتحم حياتها من تاني لإن دلوقتي بقت زوجه وأم حتى مابقاش ينفع يسلم عليها بس المره دي قرر يروح ، نفسه يشوف ردة فعلها لما تشوفه بعد السنين دي كلها

غير هدومه وقبل ما يخرج حط برفيوم ، بيحبه اوي لإنه كان اول هديه من شيرين ومن يومها وهو مابيستخدمش غيره وصل المنطقه وطلع العماره ودقات قلبه بتتصارع رن الجرس وخرجتله بنتها : مين حضرتك وعاوز مين ؟

ناصر : مش ده بيت ابله شيرين ؟؟

_ايوه هو ثانيه وحدها هندهلها

جريت البنت على جوه وهي بتنده ماما شيرين يا ماما كلمي واحد عاوزك بره

لبست حجابها وخرجت واول ما شافته واقف قصادها وقع القلم من ايديها ولمعت عيونها :')) دقايق ووقفت كل الاصوات الا صوت انفاسهم ودقات قلوبهم سكت الكلام لكن عيونهم كانت بتتكلم وعيونه هو كانت بتضمها بقوه  ،، خرجوا من شرودهم على صوت لارا وهي جايه من جوه وبتجري على ابوها : Dadyyy 

انحنت شيرين قبلت راسها احنا اتفقنا على ايه يا لارا ؟؟!
Your father in Arabic is ???

ضحكت لارا ببرائه : أ بي ابي

شيرين : Excellent   

ناصر : متشكر جدا لمجهود حضرتك مع لارا

ردت من غير ما تبصله : ده واجبي ربنا يحفظهالك من كل سوء

مش عاوز يمشي بس مش لاقي كلام يقوله اخد بنته ومشي ، مر من قصاد الجنينه ولمح شيرين داخله وفي ايديها بنتها فاخد لارا ودخل الجنينه هو كمان ، قعدت شيرين ع المرجيحه وبنتها بتلعب بالكوره حوليها ، اول ما شافت لارا اخدتها يلعبوا مع بعض وهو قرب من شيرين وكانت شارده ومش حاسه بوجوده :'))

ناصر : يا ترى لو قلت امرجحك هتتعصبي وتقوليلي بابا قالي ما العبش مع ولاد :")) ؟؟

انتفضت وقامت مفزوعه

ناصر : اسف اني خضيتك

شيرين وهي باصه في الارض : و ولايهمك

ناصر : فاتت السنين دي كلها ولسه زي ما انتي :")) ازيك يا شيرين ؟؟!

شيرين : الحمدلله :'))

ناصر : عامله ايه في حياتك وليه عايشه عند اهلك انتي وبنتك فين جوزك ؟

شيرين : يعني ا امال فين مراتك ؟

ناصر : طلقتها

شيرين : .................

ناصر : ليه يا شيرين ؟؟! ليه يحصلنا كل ده وليه نتفرق !!
بعد ما ابوكي رفضني للمره التالته حسيت ان مليش مكان هنا لإنك كنتي وطني بعدت اتغربت كتير وتعبت قابلت كارولين واتجوزتها لإن كان لازم اتجوز وانتي خلاص اتجوزتي وبعد سفري بأسبوع عرفت ان اتكتب كتابك وقررت في نفس الاسبوع اتجوز :"(( كانت حياتنا من البدايه كلها برود وملل مفيش مكان للحب حاولت كتير احبها وخصوصا بعد ماجت لارا للدنيا بس ماقدرتش :"((

شيرين بتسمعه ودموعها سايله ، باصه في الأرض ومابتنطقش 

مسح دموعه : وانا بقولك ليه الكلام ده !! مش عارف ! اساسا خلاص مابقاش ينفع اقوله دلوقتي انتي ست متجوزه وعندك اسره وبنتك انا اسف اني تعديت حدودي ما اقصدش :"(( بعد اذنك

ادلها ضهره ولسه هينده على لارا عشان يمشي صدمته بجملتها : انا ما اتجوزتش يا ناصر :"(

التفتلها وهو مصدوم ، قرب منها : مش فاهم وبنتك و كتب كتابك و

شيرين : دي بنت اختي سماح انا اللي مربياها عشان كده بتقولي ماما وامها وابوها في عمره وسايبنها معايا لحد ما يرجعوا ان شاء الله
اما بقى عن كتب كتابي فأنا فعلا اتكتب كتابي بس ماكنتش قادره احبه ولا كنت قادره ابقى خاينه  معاه بس بفكر في حد تاني قررت ارتاح واريحه صارحته بكل حاجه وطلقني عرفت بعدها انك سافرت ، فقررت اعيش لوحدي وكنت برفض كل عريس يجي فضلت عايشه مع ابويا وامي لحد ما ماتوا وانا فضلت عايشه في البيت وحيده واختي سماح على طول عندي عشان ما ابقاش لوحدي بس هي ماتعرفش ان انا عايشه في وحده ويُتم وسط كل الناس من بعد ما افترقنا كان دايما عندي امل اني هشوفك تاني لحد ماجيت انت وداليا بنت اختك انت استخبيت ورا داليا بس انا شفتك بعين قلبي وشفت ملامحك في وش بنتك :")) بالإضافه لإني شميت ريحتك في المكان :"(( والحمدلله اني قدرت أتحكم في انفعالاتي وقتها وأشواقي ما فضحتنيش وجيت هنا كتير وكنت بتأملك من ورا الشجره اللي هناك دي :"(( لو انت تعبت في بعدي يا ناصر فأنا تعبت اكتر منك :"((

قرب منها وهو مزهول : طاب عشان خاطري كفايه عياط  :'(( يااااااه وليه ضيعتي كل السنين دي من حياتنا ماحاولتيش توصليلي لييييه

شيرين : حاولت بس ماقدرتش :"((

فضلوا يبكوا سوا وصوت نحيبهم يعلى ، مسح دموعه وسأل : تتجوزيني يا شيرين :")) ؟؟!

هزت راسها بالموافقه وهي بتضحك والدموع في عنيها :"))

ناصر : عارفه نفسي دلوقتي حالاً اضمك بس هستني بعد ما اسمع بارك الله لكما وبارك عليكما وجمع بينكما في خير وإسمعى أما أقولك مفيش خطوبه جواز على طول مش محتاجين سنين تانيه نضيعها ونتعرف فيها :'))

ضحكت بفرحه :"))

ناصر : ايوه كده وحشتني اوووي الضحكه دي يا الله ما اكرمك :"))
بحبك يا شيرين

شيرين ببراءة طفله لسه 10 سنين : عيب تقولي كده تعالى اطلبني من بابا زي ابله نعمة اللي في الدور الخامس عريسها قال لباباها وخطبها 

ناصر : بس أنا مش معايا فلوس يا شيرين عشان اتجوزك دلوقتي

شيرين : خلاص وانا هستناك لما يبقى معاك فلوس وتيجي تتجوزني هههههههههههههه

ضحكوا سوا وقلوبهم بترقص من الفرحه :")) ولسه مش مصدقيين انهم بعد الفراق هيجتمعوا ويوفوا لبعض بوعد الطفوله ووعد الحب :")) ...
~
~
~
~
رجع ناصر البيت وفرّح خديجه ، حكالها عن كل حاجه حصلت وقالها انه رايح يتقدملها أول ما ترجع اختها من العمره :"))
وخديجه بكت من فرحتها زي داليا اللي كانت مزهوله وهي بتسمع القصه وبتردد : سبحان الله شفت القدر ربنا اراد تجتمعوا بعد فراق السنين دي كلها :"))

استأذنت منهم ودخلت اوضتها قصة خالها فكرتها اوي بيها هي وعلي 
افتكرت ((انا اسف)) ولقت نفسها مش قادره تديله فرصه تانيه اتوجعت منه اوي حتى حبه بقى مصدر وجعها :'((
وقفت جنب الشباك وفضلت باصه للسما وشارده في النجوم والقمر وسكون الليل :"(( بتفضفض وياهم وتحكيلهم عن وجعها :"((

•••••••●••••••••●••••••••••●•••••••••●••••••••●••••••

خرج عمران من المستشفى وداليا راحت مع طارق إتطمنت على أخوها عادل فى المصحه من غير ما تقابله مرت الايام وزاد ضغط الاعصاب وجه ميعاد الجلسه التالته

الثالث والثلاثون من هنا 

تعديل المقال