رواية كفي والمنجمة الفصل الثاني والثلاثون 32 بقلم الكاتبة Leo alfatlawi

رواية كفي والمنجمة الفصل الثاني والثلاثون 32 بقلم الكاتبة Leo alfatlawi

كفي والمنجمه

للكاتبه leo Alfatlawi

بارت الثاني والثلاثون

الباب انفتحت انداريت اشوف احمد ويا الابنيه الخطبناها

دخل يبتسم وكامش ايدها دفعتني رجاء وصاحت ولك احمد منهو هاييي

احمد. حرمتي

--شنهو حرمت منهو اكيد اتسودنت ولك اتزوجت عليه

--عليش اكو اعتراض حالي حالي العالم الباقيه اتزوجت ماعملت شي غلط شو بعدي عن وجهي اريد اروح لجدتي

--يبووو ولكم الحكونييي ولك مؤتمنننن تعال شوف اشعمل بختك الماعنده رجوله

--منهو ولج الماعنده رجوله من انعل اصلج اليوم شنو تعاي اريد اراويج الرجوله اشلونها

جنت واكفه على صفحه اباوعهم هيه تصرخ وهو اتولاها كتل

حيل بعد اختك حيل هيج كون اتبرد كلبي كل ضربه يضربها يصلخ جلدها وهيه كل صرخه اتكعد الميت من كبره

طلعو على صوتها من غرفهم يردون يفكوها من ايد احمد محد كدر طلع ضيم اسنين بيها لمن نزل مؤتمن شال احمد وشمره على جهه

كعد يم اخته شال راسها جان امنهيها احمد كالب خلقتها بنفسجي الكاع انملت دم وهيه كامت اتصيح الحكني يخوي راح اموتن

صاح السويج فوك غززززل ركضي جيبي كالها

وشالها طلع يركض بيها

علماصعدت جبت المفتاح ونزلت لكيته ماكو ماخذيها بسياره احمد وعمتي تلطم ماخذوها مالحكت تلبس عبايتها

الابنيه واكفه على جهه ضحكت رحت يمها سلمت عليها خطيه واكفه خايفه ذكرتني ابنفسي اول يوم ادخل هذا البيت اشلون غريبه واريد احد يكمش ايدي ضحكت كلتلها لاتخافين راح تتعودين

--خطيه ضربها حيل مو

--تستاهل تره هاي حيه لاتكسر خاطرج راح تتعرفين عليها واتخليج اطفرين من الخبث مالتها

--اخافن صار بيها شي ابسببي

--كون الله صدك ويصير شي بس هم لاتخافين عار هسه ترجع تعالي وياي لغرفتي لان الاجواء ماراح اتعجبج

اخذتها صعدنه فوك لكيت تهاني استوها اتريد تنزل كالت شكو شنهو هالصياح وهاي منهو

--الصياح ياحبيبتي احمد كتل رجاء لمن طلع الطفل منها

--يمه اصخام وينها هسه

--ماتت خطيه اخذوها يدفنوها وهاي مرت مؤتمن الجديده لان طلكج من البارحه بس مارضينه انكول كدامج خفنه عليج بس بعد منكدر انضم اكثر الابنيه جابوها اهلها كالو اتريد رجلها

--شنهو يبوووو لحكوني ولج يمممممه تعالي لييييه

--عززا صوتج شنو اول وحده تطلكين

--ولج غزززل لحكي اجتني الطلوكه يبووو

--عززا خطيه انصدمتي شوف كلتله المؤتمن مو وكتهه هسه خليه يلا بالله هسه هم اتموتين مثل رجاء

--يمه بعد ماكدر دخيلكم كالها وطاحت

--تعالي هداوي حبيبتي انروح لغرفتنه بين متموت حتى احضرلج غرفتها

هدى. غززل اخاف اتموت

--كون الله اثنينهم نخلص منهن فد ساعه

اسمع عمتي انخبصت صعدت على صوتها سحبت هدى وركضت للغرفه دخلت تضحك كالت منهو مؤتمن هذا

--زوجي

--چاهاي اشريجتج يعني متزوج عليج

--متزوج عليه 3

--يمه اصخام يعني ماخذ 4 هذا اشلون شكله

--اي حبي 4 احنه وعوفج منه اشوكت اتزوجتو

--صار اسبوع سويناها سكتاوي جابني اليوم يعرفني على اهله وهم انشكرج

--على شنو اتشكروني تره هذا اخوي وانتي لوجنتي مكاني هم هيج حتسوين شفتي مرته اشلون عرمه وموحلوه

--اي بس اكلج هذا الولد الشالها منهو

--امم لويش

--لاهيج بس سالت امبين عصبي اشلون ضرب احمد كف طيره

--حبيبتي هذا امقبط بعد حتى نضره مامسموحله بيها

--شنهو مافهمت

--عوفج منه كوليلي اشلونه احمد وياج وين كعدتي ياغرفه

--اخذت غرفه عمتي الجوه وعمتي وسمر انتقلو للغرفه الصغيره علما يبني غرفه بس عمتي اتكول كافي علينه لاتبنون واحمد امدللني ماكو مثله

--لعد لاتباوعين لواحد لخ ماطول هيج وياج

--لاوالله لاتفهميني غلط تره بس سالت لان كتلني الفضول اشلون خايف عليها يعني اكيد اخوها مصطفى مو

--اي اخوها بس مومصطفى هذا مؤتمن

--اشو صغير جا كال احمد رجل اختي اكبر منها اهواي

--موجبيره لان بالعمر متقدم لاجبير لان اني اصغر منه بالحجم هيج جان يقصد وبعدين زوجج جان اول واحد يضلمني هو الزوجني اله

--اي هو كال جانت غلطه

--لاموغلطه لعد راد يزوجني لواحد ابكد جدو من اطلكت قبل لايرجعني مؤتمن خلي اكوم اجيبلج شي اتشربي

طلعت واني متعجبه على صلافتها عزا بعدها مادخلت خليت عينها على زوجي اشلون ابنيه هذا مؤتمن وين اضمه. حضي يشوفن بس شكله محد تعرف اخلاقه استغفر الله همزين اخذ الرابعه جان ضليت بقلق دوم اقلها هسه استقريت

نزلت لكيت سماح تبجي خوفتني لبالي صار شي هبطتني ركضتلها كلتلها شكو ولج منو مات

--يمه برد شرج بس تهاني ولادتها متعسره

--استغفر الله موتيني رعب يعني وين قابل راح يضل هو هسه اشويه ويطلع الطفل زين ورجاء

--لارجاء جابت مؤتمن الزغير

--عيع بسلا يطلع مثل خاله انوب الله يكون ابعون بنات العالم اكولج مرة احمد فوك شنو اقدملها

--تعالي عدنه ميرندا خلي انطيج

اخذت الميرندا وصعدت دخلت لكيتها اتكلب بغراضي استحت ردت كعدت خليتلها الميرندا شربتها وكالت منيلج هيج اشياء شو ماشفت منهن حلوات

--كومي اخذي الي يعجبج

--لالااني اشتري بس كولي منين اخذتيهن

--لاذني ماما جابتهن من امريكا كومي شوفي شنو يعجبج اخذي

كامت خطيه امبينه ماشايفه لان تصرفاتها جانت تكسر الخاطر اتشيل الحاجه وتضحك وتباوعلي خجلانه تاخذها بس شجعتها ماخليت شي ماانطيتها اني ماما رايحه جايه على امريكا اتجيبلي الاشياء الاعتازها

انوب فتحت كنتوري عندي اتراكات مامستعمله ملابس نوم هم اخذتهن كم كلبيه هم

بس وصلت للعطور كلتلها كولشي ولاالعطور ذني اني ومؤتمن ياكاتل يامكتول عليهن دوم اترزل ابسببهن

--عليش تتعاركون على عطور؟

--اي حبيبتي اني من نوع استعمل اهواي عطور واذا وصلت يمي حتى اشرب منه

--يمه صدك تحجين

--لادااتشاقه ولج تعالي عندي ستوتات حلوه

--ياع منيلي كم شعراي جامثلج اتكول باروكه

--استغفر الله انتي دااتحسدين لو فطيره مافهمت دتعالي اخذي ذني حلوات

لمتلها عندي كومه ستوتات كرستال وعاديات هم خليتهن الها هيه طايره من الفرح طلعت افلوس من كنتور مؤتمن هم كلتلها ذني واجب

--لالااحمد مايقبل

--ولي ولج اخذي عيب اتردين ايدي

--جا خوش انطيهن لمي هيه ابعازه

--ابكيفج بعد تعالي يلا ننزل جوه لان ملينه صارت هدوء يمكن ماكو احد بعد

دننزل دخل مصطفي يغني امك طاغيه يازين الاوصاف تتباها بجمالك

--عوف امها بشر منو مات منو عاش

--ماكو ولد مصطفى وغزل

--شنو مصطفى وغزل منو ذوله

-- جا غير اني العملت البيانات مال الاطفال- واسميهم الج مصطفى وغزيلان وين يحصلون هيج اسماء ابربج اشلوني

--ههههههه عزا هسه تنتحر رجاء

--عوفج من رجاء شوفي وجه تهاني من كلت لمؤتمن خليتلك اسمها لزك بسمك حتى من تطلع اخاف اتفكر اتروح من بالك الثوله راح يصيحولك ابو غزل يذكروك يابه غير شالت روحها ودكتها بالكاع متكول استوها والده ابعلي جنها ثور كامت اتناطح انوب اتشوف مؤتمن يضحك فرحان بالاسم اتسودنت

--ورجاء شنو شعورها

--خلي اتولي هالجحيشه تاكل تبن وتسكت موزين من اتنازلت ونطيت اسمي لبنها الاحلج على كولتج

اجت سماح تركض كالت بشرو شنو الاخبار

مصطفى. شرفو غزل ومصطفى ينورون بيت صبوحه

-- اصخام ولك مصطفى متجوز من اسوالفك شخلصكم اليوم هاي ابجفه وابو غزل بجفه يبووو اخاف يخلص الزلمه يطلع اشويه لخاطر يرتاح من خبالاتها راح يذكرو بس الله حلو صار عدنه غزالتين

نحجي ودخلت خالتي وسمر هلهلت بعدين شافتنه انباوعلها صفح عرفت لان زواج احمد سكتاوي محد يدري

--والله يعمه هو مارضه اكول يلا هاي يمكم بعد شوفوها وشبعو منها وينهم مااجو

--مصطفى هسه بس يكتبولهم خروج يجون ماعدهم شي

ضلينه كاعدين امتانيهم كل اشويه وجاي احد

جدو حضر الذبابح للعصر واجو دخل مؤتمن طشو جكليت على راسه صاح يابه تره متوهمين الفروخ وراي

بس عمتي جانت طايره بي اتهلهل وتطش جكليت واخيرا مؤتمن صار ابو

دخلت الحبابات كلمن طفلها بيدها طبك مؤتمن اردان قميصه دنك راد يذبح بعدين شال راسه اشرلي دخلي جوه

--لابعد مااخاف اتعودت

جاب السجينه واجه هاد يضحك كال يلا لج جوه

--تره مااخاف اشبيك فدوه عوفني

--غزيلان يعلة كلبي لاتعطليني الجهال بره خلي اندخلهم

--لالا هسه اتشوف بعد صرت مثلكم مااخاف هسه حتشوف

استسلم لان اتعطل والجهال بره اطر يذبح دنك جان عين يذبح وعين بيه بس صدك ماخفت اباوعلي واضحك مصطفى واكف يمه يحد بالسجينه الثانيه يريد يصلخ اول مابده يذبح شفته اشلون نحرها وهيه ترفس مااعرف شنو الصار افترت الدنيا وبعد ماادري

فتحت اعيوني مؤتمن كاعد واني بحضنه يغسل ابوجهي ومصطفى متمدد ميت ضحك مكرم صاح هايالنجره مااخاف صرت منكم دكومي فشلتينه

غسل وجهي مؤتمن صحصحت هو يضحك ويغسل كومني

ذابح بس واحد ردت اشوف كمش وجهي كال عدل جوه لاتطلعين لمن انخلص احسن مااخليج مكانهم

دخلت جوه اتمددت بغرفه سماح جابتلي عطر اشتميته كال ولج هبط ضغطج يمكن

--يمكن خلصو لوبعد

--لادخلو الجهال بدون ذبايح حضرتج شدهتيهم مؤتمن احتار بيج يكول عمي اشوكحها اشكد عين صلفه كلمتها وحده ومصطفى كمشته نوبه ضحك تالي جدي كلهن دخلو سالفتهم امطوله

--دروحي شوفيهم خلصو خلي نطلع

طلعت دخل مؤتمن راح للحمام سبح وطلع اجه يمي كال ها يالفاهيه اشلون صرتي

--مؤتمن

--عمري كولي

--ياهيه اتحبها اكثر اني لوبتك

--خره ابعشيرتج ماصار دقايق من اجت لج غزل لاطلعيلي بسالفه جديده اتخليني اشمرج

--يعني اتحبها اكثر مني راح تشمرني مو

--استغفر الله اشلون شغله جنت خلصان منين طلعت هاي

شافني برطمت ضحك واجه يمي حضني كال ولج اشلون احب احد اكثر منج حتى اسمها على اسمج هيج سالفه مصطفى راح اتضلين لاطشتلي وين مااروح

--بس اكيد اتحبها اهواي

--بويه الابنيه خطار مااكلج مااحبها اول ماشفتها حسيتها دخلت كلبي لان اكيد بتي ولازم احس بهيج شعور بس انتي من شفتج حسيته ينبض دخلتي بي وحييتي بس لواتبطلين غيره جان هسه اني اسعد بشر

--لعد اشلون اتريد اخليك ابكيفك

--لابويه منهو كال ابكيفي تحت امرج صدك جذب امري واني انفذ

--مؤتمنننن

--فدوه يروحلج مؤتمن وعشيرته كولي

--متحب غيري

--تم بعيد اهلي

--متشوف غيري اعيونك ابززهن اذا شفت غيري ابداخلهن

--اعيوني الج فداوي هنه وصاحبهن بعد شرايده

--يلا خلي انكوم لان الجو حمه اشتعل جهاز الانذار

--وين تردين غير اشعل عشيرتج

دفعتي وفلتت من جوا طلعت ركض خبل عادي عنده حتلو بغرفه سماح ميهمه لكيت مصطفى ومكرم يكصون باللحم كعدت يمهم فصخ الادين كال ذني ميذكرنج ابشي

--مم رجلين صبوحه

--هههههه خره بيج ولج موهيج قصدت بس هم صدك دشوفي الراس جنه راس شعشبونه نفس الشعفه

مكرم وكف يشتغل ويضحك ماحجه واحنه ماخلينه شي ماشبهنا الريحه اتلعب النفس راحو يغسلون رحت للغرفه مالت سماح جبت عطر ورشيت الراس والرجلين واسمع كاظم صاح ولججج غزززل شعملتيييي

كمت كمزت من صوته صفنت وكف مسح وجها كال شنهو عملتي يخوي

--ماكو شي داارش عطر لان ريحه مطيبه هيج صار احسن

--استغفر الله ولك مصطففففى

--عزا لويش دتصيح

على صوته طلع مؤتمن صاح غزل ومصيبه جديده طربونه شنهو عملت

--تعال يخوي مرتك راشه الباجه عطر ماعاجبها عطرهن هههههههه

--خرب ابليس اهلج ولج بعد متستوي هاي لاياثوله

عفتهم ورحت للغرفه مالت بيبي يم الاطفال ضوجوني بس يضحكونه عليه

كعدت يم خالتي بيدها ابن احمد يجنن يشبه مؤتمن عززا خاله من هسه عاكد حاجبه ضايج يمه فدوه يشبه خاله مخبل من هسه

--سكتي يخاله تالي يسمعج ويعلمج على الاخبال اشلون

--حياخذ اربع نسوان من هسه اكلج الله يكون بعونهن خطيه عمتهن رجاء عيع

--غزل يمه لمي روحج و عوفج من الفرخ شوفي بت رجلج احسن

رحت يم بت مؤتمن سمره بس هم دنفوشه خليت ايدي اتلمس خدها ناعم دنكت بستها ناعمه ضليت اتلمس اخذها فدوه اتجنن

جانت تهاني اتباوعلي بغضب بس ماحجت اتعجبت لمن حسيت احد كعد يمي لنه مؤتمن من هيج ساكته جان واكف

شال الطفله وباسها وبعدين شال راسه باوعلي كال مسموحلي لا تره نسيت اخذ اذنج

--هههه لاعادي هاي بتك

--يابه الحمد الله هم نعمه

كعدت يمه خالها ابين ادي ويبتسم فرحان واني امرر ايدي على خدها اجت عمتي ام مكرم اخذتها كالت شجاي اتسوون ولكم هاي فرخ انفاس

--فدوه خاله بس اشويه اشيلها والله مااوكعها

-- عمه مؤتمن اخذ الجاهله مالتك وطلع لاتخليها اهنا هاي متكعد ساعه وغافلتنه ومتنت الفرخه

مر اليل سهرانين ويه الاطفال بس رجاء اليل كله تبجي حتى ابنها مارضعته كالت مااريدنه

وانوب تهاني هم عجبتنه متريد بتها اتكول بت ومؤتمن يريدله ولد اخذوها واجيبله غيرها

تالي عمتي ام مكرم ضلت مبتليه بت مؤتمن وخالتي بصافو الزغير

اتاجل الطبخ لثاني يوم للغده علمود يعزمون اهلهم

مؤتمن نام بغرفه سماح واني نامت يمي هيفاء

متمددين اني وياها انسولف واتصل مكرم اخذت الفون من هيفاء رديت مكانها كال انطينياها

--ماكو مالك مره يمنه بعد

--عليش يابه من شنهو متعاركه واتطلعيها بيه يبه رايد مريتي

--لعد اني هم اريد زوجي

--ورجلج وين ضامه ابجيبي خايبه مسكتين يلا بنيتي صيري حبابه ورجعي النقال لهيفاء

--اجيبلي مؤتمن من اختك وانطيك زوجتك

--خره بيج وبمرتي واختي ولي مااريدنها خليها يمج انعل ابو الي يحجي وياج بعد

سد الجهاز ضايج متت ضحك خطيه يريدج هذا مومثل مؤتمن عنده احتياط يحمه ويطفه وحده

--جيبي خيه خلي اخابره

--ولج هسه ياخذج لان متوازي يخابر ويهوس

--بطلت هم صدك عوفه يطفي وحده على سالفتج

ضلينه سهرانين انسولف ماخلينه احد ماكصيناه كالت

غزل هم اتغارين من مؤتمن هسه رايح يم سماح

--لاعادي بس اذا يم تهاني لا اموت غيره

--اشمعنه عليش سماح وحد

--لان سماح ماحاسبته هيج زوج واشي مااعرف بس يعني متباوعله مثل زوج لااتباوعله سند مواكثر

--همه زواجهم جان اكبر غلط انضلمو اثنينهم لان سماح اهواي اكبر من مؤتمن واحد ماراد الثاني بس جبروهم يلا الله عوضه هسه بيج هو مقسم بينكم الايام مو

--لا بليل يمي بس الضهر يمهن مرات اتصير زغل اشويه بس اروح اسحله وارده لغرفتي

--هههههه خرب ابليسج وطبعا الضهر عادي من يجيج

--طبعا هذا حقي تره فنه يكول لا

--لامبين ماكو لا من اثار الي بيج ولج فوك هذا قبل اسبوع جان يمنه وعمتي نزلت عليه كالتله يمؤتمن خذيت البيت زغيره وعلقتها بيك اذا شفت بيوم امزعلها لو امنزل دمعتها تراني موش عمتك ولااعرفك غزل اتعودت عليك لاتشلع كلبها بيك

--شنو رد

--والله بس ضحك مارد بس امبين طار من سمع عمتي كلتله اتعلقت بيك ولج مؤتمن لسه مامتاكد انتي اتحبي مرات يكلي مراهقه وسمعت كم كلمه حلوه يجي يوم وتكبر وتشوف فرق العمر راح يتغير كلشي

--لويش ديحس هيج تره مواهواي اكبر مني هنه 15 سنه وهو مامبين عليه اصلا

--مويشوفج جنج زوريه وخباله كلك هاي طفله ويلا ورانا كعده الصبح نامي خلي انشوف اشلون انستو الباجه الترستيها عطر

خليت راسي بس كلما ردت انام ماكدرت اشكد اتكلبت ماكو لمن هيفاء كالت انزل واصعدلج رجلج تره قلقتيني غزيلان نامي

--مديجيني نوم

--اي عيني اتعودتي عالدفو نامي حبيبتي

ضليت فتره ماادري اشوكت نمت

كعدت على عطره وبوساته بخدومي فتحت اعيوني ضحكت اشوكت اجيت

--ولج كدرتي اتنامين بدوني لايابذات

--والله مكدرت استوني نمت

--يلا كومي ولي وبطلي جذب نزلي البنات منتضراتج

جان يحجي وهو ضايج كمت كعدت كلتله لويش ضايج تره والله دااحجي صدك

مارد عافني ونزل هسه اني اشسويت يعني هو عافني البارحه وانوب زعلان اليوم استغفر الله

كمت غسلت ونزلت لكيت العالم كولها جايه رحت للمطبخ اتريك

دخل مكرم سحبت الغتره من متنه بدون لااحجي خليتها على راسي لان ناسيه الشال باوعلى مارد بس هز ايده كعد كال لهيفاء سويلي اكل اندار كال اشبيج لج عليش كالبه خلقتج

--مؤتمن زعلان لان نام يم اختك

--هم كالت اختك بالعباس اكوم اكتلج غزيلان اتعلمي تحجين وعادي همه ذوله عائله مكوكه بالعكس موهاي اخته نايمه يمج وزعلانه صبحت عوفج منهم همه رادلهم تغير

--اي والله خلي انعوفهم

--مرض صدكت هسه يجي رجلج يغط روسنه بالماعون خايبه متولين تردين تبليني كالها وكام طلع

اتريكت كعدت هيفاء كالت تره مؤتمن ناصب عليج لان سولفتله الصبح كلتله للصبح تتكلب لان مويمها

--عزا واني صدكت بسيطه مؤتمن ولج شوفي منو اجه عزا ابعينهن

--منو ولج ---يبو جنه امعوزين ذوله اجابهم

--انتضري خلي اطفر للغرفه واجي

--غزيلان لاتسويلنه شغله

--لاع بس انتضري

صعدت غرفتي على السريع للحمام سبحت طلعت سويت ميكب امرتب لبست كلبيه امفتحه من الجوانب حلوه امخصره لبست حجل وشحاطه عاليه نزلت بيدي الغتره اريد احد يلفها ماكو كلمن ملتهي بشغله رحت لمصطفى اتوسلت كال ردي للغرفه مالت جدتي لان ولد اهنا هسه اجي اسويها الج

رجعت لغرفه بيبي دخلت سلمت عليهن مرت الشيخ الجبيره كالت شهالعطر يمه خنكتينه شدعواج

مارديت سلمت على ريم باستني وضحكت كالت خيعون مؤتمن على نعومت هالخد

ضحكت سلمت على دعاء الي باستني من وره خشمها

كعدنه انسولف اشويه وصاح يالله مؤتمن

بيبي. تعال يجده ماكو احد بس انسابتك

دخل كالب خلقته وبعدين سلم وهو مدنك اباوع دعاء اتريد تاكله هالكد مافاتحه حلكها عليه خلص سلام راد يروح كلتله مؤتمن فدوه بس لفلي هاي

وكف باوعلي وضحك كال جيبيها رحت يمه وكفت لفها يباوعلي ويضحك ضبها حيل همس اهم شي ترتاحين خره بغيرتج غمز وراح

انداريت اتفاجىت من لكيتهن يباوعلي بحقاره كعدت ريم كال عين الله تحرسكم اثنينكم اتخبلون

--شكرا باجي

--يمه فدوه لعوجه السان ولج كزكزت عليج الله يساعده اشلون يتحمل يعوفج وينام بعيد

--هئ هو مينام بعيد يوميه يمي

--والله حقه اني المره وكزكزت عليج حقه من يترك حريمه ويكابلج

--ماعرفتي سمه بته على اسمي كلتها واني فاتحه اعيوني فرحانه

--صدقه لمحمد يخاله حتى ضحكتج اتخبل عليش ميسمي بته بأاسمج اني منا حتى حلالي اسجلهن

--امم لعد هو حلاله هم سجلهن بأاسمي

اني كلتها وهيه طكتها ضحكه اشعلاتها واتباوع لدعاء لمن دمعت اعيونها عفتهن دعاء تحمس هيه وامها وهاي ميته ضحك طلعت لكيت مصطفى مد ايده كال ورقي

--شكو على شنو

--جادزيتلج مؤتمن بلاش بس عليج الحمزه اشلوني

--هههههه غير ماتت العالم اهناك

احنه نحجي واجه كاظم صاح غزل بعدي عن الاكل دخيل ربج شنهو غاطه بالعطر اشبيج يبويه

اجت حبيبه وكفت تضحك وتخوط التمن ويه مصطفى كال استلم بالله شوفو منهو اجه

--منو

--الزمال ابوي هذا منهو فتحله الحبل وهدا

--لويش وين جان مربوط

--بحديقه الحيوانات ويه جماعته غزل بعدي لااشمرج بالجدر

دخل سلم وهاي يمكن المره الثالثه اشوفه ميجي من الديوانيه ويرجع لام مصطفى لان متعارك ويه عمتي

الكل مخبوص اجونه اهواي عالم مؤتمن بعد مادخل ضل يم بالديوانيه بس الولد وكفو على الطبخ

واحنه بين اماعين وتحضرات الباقيه للعصر وعلى الوكفه متنه تعب فضت العالم طلعو دخلت اتمددت يم بيبي صاحت هايلفاهيه جنج تعبتي

--اي والله بيبي متت تعب كلتها ونگلبت نمت على بطني خليت راسي بالمخده

وذني اشكد يسولفن نسوان الشيخ الناس فضت وذني ماكو لاطشات كعدن البنات يمنه كل وحده تحجي شكل مرت احمد الجديده هم اجت اليوم بس رجاء نيموها بغرفه هيفاء ماشافتها وتهاني صعدت فوك لغرفتها

حبيبه. ياوالله اليوم الزلمه على هذا التعب بعد اسبوع ماكو اطبك مخدتي وانام

هيفاء. والله اني هم اضن اذا كلش شغله على كده الحال تسقيط فرض وينام

هدى. لاالحمد الله بعدنه عرسان جااحنه بعدنه بي امل اني احسنكم

ريم. وانتي غزل شتكولين

مارديت رفعت الكلبيه اني وانايمه اشويه من يم رجليه لحد الركبه ورجعتها كلتلها هذا حالي

--هههههه لاانتي شغلتج تعبانه اذا حاجزته بغرفتج خيه اتحملي الزلمه بي صحه مال اربعه نسوان طبعا يسوي بيج هالشكل ابرج هم يتعب بداعت امج غزل

--والله لايتعب ولايمل يشوفني المسيح الحي لمن اتشاهد و ابجي يالله يعوفني

--ههههههههه والله يخيه حقه جنج تفاح لبناني معذور هذا

حبيبه. والله صار عدنه حلم انشوف غزل مامطكعه صدك جا ولج عليش ماحبلتي

--ميقبل يكول كملي دراستج بعد وكت الجهال خلي اكبرج وافكر بغيرج اربي

اني رحت بالنوم تعبانه عفتهن مستمرات يسولفن حسيت ايد مؤتمن يوخر شعري عن اعيوني فتحت اعيوني لكيته امدنك كال عليش نايمه اهنا بويه صعدي غرفتج

دفعت ايده عني صحت مؤتمن تره تعبانه فدوه لاتلطش

اسمع صوت ضحك كمزت استحه ضحك وحك گصته كال لايابه على راحتج اخذ من بيبي السلاح جان خاله يمها وطلع

كعدت لكيتهن بعدهن كاعدات عزا اشلون استحيت دخل مصطفى سمعهن يضحكن واني كاعده امبرطمه اشرلي شكو سلم واجه باس راسي بيبي كاللها اريد الفلوس وين

--روح يجده بالكنتور يمك

--دكومي جده حشه خلقه الله متشوفين شنو يم الكنتور

جان يحجي وقرفانه روحه لان دعاء منتجيه اخذ الفلوس وطلع يهز براسه منقرف

بيبي. اشكد مصكوعه عليش خجلتي الزلمه

-- بيبي والله يعني يعرفني من اكعد اشكد يالله استوعب اني وين - المفروض ميكعدني

--امداج عبنج ناگصه تربيه زلمه اشكبره تصرخ ابوجهه مال اتفل ابنص وجهج اني اعرفن اشلون هيج ساكتلج مايشيلج ويدكج بالكاع

لميت شعري وطلعت بعد مااكعد وياهن على الموقف الصار طلعت على غرفتي جان وكت ليل سديت الباب غيرت ملابسي بعد ماانزل اتمددت اندكت الباب كمت فتحتها لكيت ريم ودعاء وهيفاء واكفات

هيفاء. ولج زلم اجونه جوه خلينه ابغرفتج

--تعالو هلابيكم

ريم. من اشوكت ردت اروح هاي ادعيوه جلبت هسه بعد شيطلعنه البيت انترس زلم

--عادي ياعيني خليكم لحد مايرحون اتفضلو افرشلكم بالكاع لو اتكعدن هيج على القنفه

--لاعيني خلينه على قنفتج بس صلوات على محمد غرفتج حلوه جثير

--شكرا

هيفاء. هاي 3 غرفه يبدلها للخانم ياله استقرت

--اي عيني تستاهل ولج تعالي منين جايبه هذا الابسته

--ماما جابتهن الي من بغداد ذني اذا عجبج اكولها اتجيبلج منه

--اي والله وصيلي كل الالوان بلكي الشيخ هم يكعد بغرفتي بعد ميطلع

--ههههههه لالعد وفري لان متجيب نتيجه ابشرج ذني من اول ثانيه يتشمرن

--ولج شنو هاي القنفه ويه الاخشاب لوحدهن

--لاذني جابهن مؤتمن وحد بس نفس اللون اختارهن علمود يبينن نفس الشي

--عاد نسوانه نفس الشي لو بس انتي

--لاكل وحده غرفتها احلا من الخ نفس الشي مامقصر شي وياهن

--الله يخلي الج ويحفظكم من اعيوان العالم

احنه انسولف وهيه عينها بالغرفه حاجه حاجه انوب دخلت هدى وهاي هدى ولاتشبع كومه اخذت غراض وبعدها تفتر وكل دقيقه كالت غزل راح اخذ هاي اشرلها اخذيها

هيفاء تخزرني بس خطيه اني اشتري غيرهن احمد حالته تعبانه ميكدر وهاي عروس اتريد اشياء هم لمت كومه غراض واجت كعدت

ريم جانت اتباوعلي وتتحسر حسيتها ضامه شي لان كل اشويه تسالني نفس الموضوع اذا جاب مره على راسج راح اتضلين ويا لواتركي

--طبعا لا ومستحيل مؤتمن يسويها يحبني واذا سواها معناتها يطلكني قبل لايفوتها لهنا

--واذا بس هيج بالاسم بس يدخلها بيته ويضل وياج نفس الوضع هم اتركي

--والله بس يفكر من الصبح اطفر لماما وهو وعدني كال اذا سويت شي الج حق اتركيني

--الله يهديكم ويبعد عنكم العالم السوء اتحسرت وسكتت

اتعطل الوقت مرتين خابرت الشيخ يكلها نطريني عدنه عالم

خطيه استحت ونعست حتى اسوالفنه خلصت هدى اتمددت على القنفه ودعاء شمرت حجابها هيه وهيفاء

ريم كعدت بالكاع مدت رجلها كالت اتكسرت جربايتج عاليه كلمن راسها بجهازها اتباوع امتانين يخلصون كعدتهم ويصيحولهن

انفتحت باب الغرفه هيه فتحه وهيه جفته ليجوه منطلق يسولف غزاله ابنيتي طلعيلي--- اتصنم مكانه وكال اعتذر خويه ابسرعه دنك وطلع سواها طفار كلمن لبست عباتها

طلعت يمه اضحك وهو عاض شفته رجع همس اشدخلهن اهنا

--عزا صوتك حبيبي لعد ماكو مكان جوه رايد شي

--اي طلعيلي اوراق من كنتور

--بس لحضه اسويلك مجال مااعرف شنو هنه

دخلت كلتلهن ميخالف يدخل يطلع اشياء من كنتوره

ريم. ياجاماكو غريب خلي يدخل خيه فوك مامحتلين غريفته

اشرتله كال يالله و دخل بس جنت مو يمه صافنه على دعاء مالبست عجابها ضلت كاعده على الجربايه وفاتحه شعرها وتباوعله انداريت امنت من شفته امدنك على كنتور اخذ الورق وطلع طلعت ورا ركض يم الدرج لحكت كمشت تشيرته اندار خزرته

--لويش هاي مالابسه حجاب شفتها

ضحك رد مد ايده عصر بطني حيل و كال اشوكت اخلص من غيرتج عالعموم امني ماشفت غيرج غزل وروح عمي اذا صعدت ولكيتج نايمه اشمرج من الشباج اشويه وجاي

--ماشفتها مؤتمن موو

--بويه ششوف عبده معوز اصخام بالبيت اشبيج لخاطر ربج كالها ونزل

دخلت للغرفه اافرك ابطني امبرطمه وجعتني صاحت هيفاء تستاهلين شكو لاحكته انتي عليش متركدين

--بس سالته على شغله والله

هدى. اكلج غزل هاي اشلون امرهميها وانتم فرق الطول بينكم اشكد

والله سؤالها خلتني صافنه هاي اشبيها خبله لو شنو دتتخيل حتى هيفاء عوجت حلكها وباوعتلي

هيفاء. لاتخافين خيه سهله الشغله خفيفه يشيلها بيد وحده وبعدين عيب هيج اشياء تنجحي

--لاوالله موقصدي بس ضخم رجلها وهيه ناعمه صدك خيه هذا داخل نادي شو ضخم وماعنده كرش عكس احمد رفيع ومكرش

هيفاء. اكول موبسج عوفي الزلمه لاطكي عين

--عين الله تحرسه لاتخافين مااحسد

هنه يحجن ودعاء صافنه تبتسم ماعرف وين من صدك قلقتني مجرد حسيت دتتخيل مؤتمن متت غيره ياربي ابعدها عني غير اموت اذا صارت صدك

بقن للوحده خابرها الشيخ طلعن استوني فكرت اغمض دخل مؤتمن وبدى الصراعات اليوميه عفيه رجال لايتعبه لاشغل ولاوكفه لكاني صافنه كال شمالج بويه تعبانه

مرت الايام رجاء ماقبلت ترجع ضلت يمنه بس اربعه وعشرين ساعه تبجي

واحمد فكر يبني قاط فوك بيته لخاطر يعزللها عن مرته الثانيه راح يجيب اهله يمنه

بت مؤتمن يم سماح اكثر الاوقات لان امها مونضيفه اول الايام بهذلت الطفله عفنتها

كم مره اتعارك مؤتمن وياها اخر شي كلتله ماطول بت واسمها غزل مارايدتها

اخذها اجيب غيرها شالها انطاها لسماح وهيه بدت مشاكلها اليوميه اتريده يرجع يسويلها ايام متقبل بالضهر

العام الدراسي بلش خبرت ماما جهزتلي مناك ملابس وحضرتهن باقي مؤتمن يوديني اجيبهن واشوف ماما بس مافارغ يشمرها على مصطفى ومصطفى يشمرها علي واني باقيه اتوسل

كوه فرغ مصطفى وكال حضري روحج نطلع الفجر

طلعنه الساعه 5 الصبح بعد ماوصاه مؤتمن الف مره سوق على كيف ولاتتعطلون بس مسافه الطريق ماكو طلعه منا منا من بيت امها لبيتنه

هو يهز ابراسه ويكله على امرك يخوي ودعنا وانطلقنه

واحلى سفره ويه مصطفى جانت بس عبرنه المنطقه مالتنه وشغل الاغاني بعلو صوتهن وانطربنا احلى طريق صار اشكد اتونست اشكد حلو مصطفى فد واحد اسبورت صافوووو

--شكووو احجي حيييل مااسمع

--اذب النقااااب

--شمري انعل اصلك مؤتمن صدك جذب اكو ازمال ياامن مرته بيدي انطلقي خويه

انخلص اغنيه ونطلع غيرها

اخر شي اتصل مؤتمن سدت الاغاني وصار جدي رد كله مرتك نايمه بس تكعد انطيكياها.-- لاعلى كيفي اسوق امن.-- لالاامن افا غير بيد اخوك لاتخاف ههههه لا وداعت الخوه يلا الله وياك ---

--شنو

--كال لاتخلها اتكمز رگدو

--لعد منو گمز

--اني ادري غير احنه اثكل اثنين بالبيت بس جيب الي يفتهم ويقدرك

--هسه شنو

--ههه نطلقي يلااااا كالها ورجع شغل الغنه وعله صوته ونغني ويا

وصلنه مطعم نزلنه اكلنه وشربنه عصير

مارجعنه للسياره افترينه المكان حلو وين مؤتمن جان شلع روسنه

مرت ساعه ماخلينه مكان اخذنه صور ولقطات فيديو

اشكد شبعنه ضحك حتى على مؤتمن حجه وصورته رجعنه للسياره الطريق موذاك الطويل الممل لاصار يخبل اتحسه خلص بثواني

وصلنه نزلنه لكينه ممنا امتانيتنه سلم دخلنه ارتاحينه اشويه لبالي نرجع كال كومي انفر بغداد يارجعه

--لعد مؤتمن

--يابه خلي يطير هيه رزاله عادي اتعدي كومي ماطول فاتحلنه الحساب امشو ارقه المولات والمطاعم على احسابه

--ههههه يلا بعد احس بس اغير ملابسي

--بس لبسي شي طويل ابروح ابوج لاتطلعين مثل قبل

--لالا ابد اني احترمك وراح ارفع راسك

--خره ابراسي اذا متانيج انتي اترفعي اذلفي لج ابسرعه راح الوقت

صدك لبست قميص طويل للركبه وبنطرون وشوز لفيت حجاب ازغير وشفقه

طلعنه ماما ويانه دااصعد واشفت مريم حيل اشكد صار ماشايفتها ركضت شبكتها بجينه هالكد ماوحده مشتاقه للثانيه تعالي وياي مريوم فدوه ناخذ فره ونرجع

--لاولج بابا ميقبل

--شنو بابا بسلا صار هم من ذوله الي اهنا متعجرف

--لاولج بس زوجج فشله

--ولج ماعندي وقت ومشتاقتلج

--هياته بابا اجه كوليله

--هلوو عمو اشلونك

--هلا بابا غزاله كالها واجه راد يبوسني صاح مصطفى خايببببه وييين

ضحك ابو مريم وراح سلم على مصطفى لباله زوجي بعدين كله لااخوها

اتوسلت بي اخذ مريم وياي وماما هم اتوسلت كوه قبل كال بس لاتتعطلون

صعدنه واني ميته فرح بس مصطفى كل اشويه يستغفر ماعاجبه ملابسها لان لابسه شورت طويل وقميص طافر هو شي عادي جنت اشوفه والبس هيج بس هسه مااعرف من صدك اشوفه اوفر

نزلنه يم مول همزين شاف البنات بعد لبسهن اكثر فك اشويه رد يسولف ويضحك

عزمنه وصار كريم ابراس مؤتمن هو ينزل اكل ويصور كال وهاي تم الارسال

--شنو صافو شنو دزيت

--سلامتج كالها ودار الفون لكيت داز لمؤتمن صورت الاكل وكاتب اكلو ماطول اخوكم عايش

--عززا مصطفى ديتصل هذا

--لاتردين خلي يحرك شحوم اشويه يلا كومي نختار ملابس

مريم ميته ضحك على اسوالف اشترينه كومه اشياء

كام يشتري ويهدي لمريم بلا وجع كلب وهيه فرحانه

ماما تضحك تدري من احساب مؤتمن ديسحب ماخليت لاقرطاسيه ولاجنط كله ماركات اتخبل اخذت

ترسنه السياره ترس حتى صداري كم نوع اخذت واحذيه قمصان اخر شي شفت تنانير كولش حلوه

--صافوو

--اعيونه

--اريد من ذني

--لاهيج نختلف هاي مؤتمن يشنقنه بيهن

--يلا بطلت كلتها بكسره لان صدك نفسي بيهن

--انعل ابو مؤتمن هيه كتله كتله اخذي شنو ابنفسج خويه لاتبجين

مريم. اني هم اريد

يبوووي جنج على تنوره غير انطيج مؤتمن هديه وياها

عزا مصطفى اترك مؤتمن لاتجامل بحاجه غيرك

دشوفيها دخيل ربها انوب اتريد تنور صدك جذب بويه شيلي المحل كله اعتبري عربون صداقه

--اني اكول مؤتمن راح يشيل راسك لان صرفنه اهواي

--خايبه انكتمي كالها واندار لمريم كالها شرايده بعد بويه كولي

مريم. هاي الصدريه هم

--مررريم هاي اني ردتها قبلج حجزتها

--لعد اني هم عيني بيها فدوه غزوله خلي اخذها وانتي اخوج يجيبلج

--لاعيني اخوي بس حجي كلشي مااحصل منه

مصطفى. عليش تتجادلن اخوي ابو المحل بيش الوحده رد بس ابسعر خيالي لان مكان راقي كله نزلهن اثنينهن لايهمك السعر اغله شي عندك نزللنهن

ماما. هيج راح تجلط الرجال مصطفى ابني على كيفك

--يلايابه على شنو ينجلط افلوسه قليله يابه افلوس صبوحه متخلص اخذو التردو

لليل ياله خلصنه دنرجع واحد ذبله احجايه احنه ونمشي جان مصطفى وماما ورانا يمشون واني ومريم كدام سمعه مصطفى اجه جهت الولد رفعه ودكه بالكاع

وين التوجعه كوه فكوهم اشكد التمو ناس كام مصطفى انطه المفتاح لماما كلها اخذيهن ورحو للسياره واني جاي وراكم

جان عصبي ماعارضنه صدك رحنه للسياره مرت نص ساعه اجه ماكله بوكسي بعينه مبين راجع متعارك مره ثانيه صعد اول جان كالب خلقته

بعدين شافني اضحك هو هم ضحك مريم خايفه خطيه متعرف السوادين العد زلمنه شنو رجعناهم للبيت ودعتهن ورجعنه نص الطريق وكف كلتله هاا بعد شنو

--ولج خلي اشتري قميص هسه رجلج يلكفنه ويعرف امدحمين

--جيب وياك لفات وعصير حتى مننزل للمطعم بعد

اشويه واجه مغير ملابسه صعد كعدنه ناكل اجه ولد ازغير يبيع كلنس كال عمو تشتري

--يبعد عمك تعال وين اهلك عليش يابه بهالوكت بالشارع

--على باب الله هسه تشتري

--هاك بويه هاي 100 شغل اليوم ورد لهلك ومره ثانيه لاتطلع بليل

--مصطفى تره اهواي

--انكتمي صبوحه جوه التبريد وهذا يستعطي خره بلشتك مؤتمن وانتي ماضل شي ونوصل لبسي اسلاباتج

انطلقنه هم اخذنه جوله بالطريق ويه الغنه والهوسه وصلنه طفه ورجعنه عقال

نزلنه نزل الغراض هو يشمر على الدرج واني اصعد جان وجه الصبح

الكل نايم بس مؤتمن واكف متجتف يباوعلنه اني كوه كاتمه الضحكه صعدت الغراض رجع الكارت لمؤتمن وراح لغرفته

واني شمرت ملابسي وللصبح من التعب ماادري بروحي

كعدت تالي وقت اباوع الغرفه صايره هوسه شلت هم اشلون ارتب

نزلت لكيت مصطفى متمدد بالصاله وتهاني يم رجاء اتلكف اباابن رجاء الغبره وبتها متعرفها وين والله شنو اسمها غزل اشكد ثوله ورجاء امخاطها ويه دمعتها سوه يخرن

بيبي كاعده كعدت يمها متكسره سماح انطتني الطفله وراحت اتكمل الغده

يمه اتجنن سمره واعيونها اكبار ابوس بيها وتهاني اتباوعلي وعاوجه حلكها ولااتكول بتها اشلون بشر ولااتحن عجيبه احس سماح امها موهاي

الكل كاعدين نتغده وسماح اتنطي ممه لبت مؤتمن اتصلو بمؤتمن رد يجاوب ويباوعلنه كال تمام مشكور وسده

--وين وصرفتو الفلوس؟

مصطفى. تره ماصرفنه اهواي اخاف انته صارف ومتدري

--مصطفى لاتخبلني يوم واحد صارفيلكم مبلغ مال سنه ولكم وين صرفتوهننن

--عزا مؤتمن ديكولك ماصرفنه بس كم حاجه يعني شنو لعبنه اقمار قابل

--ولج حتى لولاعبين اقمار هم متلحكون اتصرفون هالكد والله هو مو صوجكم صوت الزمال الدزكم سوه

جدي. شنهو بويه اشكد صارفين

مؤتمن. مواهواي بس افلوس العرصه الي بعتها صار 4 اشهر امتاني احصل سعر زين بيها طاح حظي يالله بعتها بالسعر الاريده وحضرت جنابهم طيروهن بيوم

جدي. انه ابوك صدك تحجي ولك وين رحتو صدك موكفو واحد يعتمد عليك انته هم حاسب روحك زلمه وعندك مسؤليه واحد ياامن بيك

بلش جدو يرزل بمصطفى بس والله عجبني ولااتكول ويا ابد مستمر ياكل ولايمه اني اسمع وكوه كامشه ضحكتي اشكد كلتله هذا المول غالي بس هو اصر ياخذ اشياء اسعار خياليه حتى بالمطعم نزل كومه اشياء وعفناهن مااكلنه بس صورنه

كاعده ارتب ملابس بالكنتور دخل مؤتمن شمر ملابسه دخل للحمام سبح بين ماكملت

طلع اتمدد ماحجه عرفته ضايج لان حقه والله صدك هو يجيبهن بتعب واحنه بدون عقل طشرناهن هسه مريم من بقيت اهلي وهيج اخذنالها اشياء كومه افلوس بتعب هذا المكرود

حبيت اعوضه طلعت واحد من القمصان النوم الي جبتهن رحت سبحت ولبسته كعدت مشطت سمعته نام ون سوده عليه اشكد تعبان اشكد كسر خاطري

رحت يمه بوسه من خده نزلت اشويه دفعني كال تعبان وخري بويه عرفته زعلان

--اي لعد بعد احسن خليك وتعال بعدين كول لويش اتباوعين غيري

فتح اعيونه باوعلي كال شنهو لج عيدي

--هم جبير مابيك حيل وهم متسمع اعرف حضي

--هاا غزل ناويتها دتعالي اذا ماتوبتجج

--تره دااتشاقه اشبيك مؤتمننن لاااا فدوه

جانت نيتي اعوضه بس صار العكس

اتورطت اريد اخلص ماكو اني الجبتها لنفسي لمن شافني بجيت يالله تركني

سحبت روحي من يمه وامسح بدموعي واتحلف بعد مااسويها وهو يضحك شال القميص كال ابربج هذا بكم مليون صار عليه

--تستاهل لبالك بلاش تذكر القطعه البعتها صارت قمصان نوم موت قهر

--دمسحي ادموعج ولبسي غيري خلي اشوف يسوه لا

--لواتموت بعد ماانام يمك انزل يم سماح

--يلا ولي وطفي الضوه وراج عندي غيرج 3 هسه من زينج وتتمندلين

--طبعا اتكيف تره الي ابكدك نايمين بالكبر وانته بعدك ادور نسوان بابا فشله التفت للزيارات بطل اسوالف المراهقه تره امبين عليك الكبر لاتضل اتزغر ابروحك

--انتي لاتوبين ولااتبطلين لغوه كالها وكام اريد اندل باب الحمام ادخل بي مااندل هيه ركضه وهيه لكفه انلكفت و---------

--مؤتمن

--همم

--شنو نمت

--امم رايده شي

--لابس احمد حيجي اهنا هو واهلا تقبل

--هلابي عليش حتى اعترض

--مورجاء كالت ميوصل لهنامؤتمن يكسر رجله

--ابكيف رجاء هو شسوه وهيج اكسر رجله اتزوج حاله حال العالم

--اي والله اذا انته القدوه مالته لعد اشيطلع

--يطلع على ابوه موشرط عليه وكافي انكتمي

--يعني شنو انته هم تتزوج على فكره انته ماخذ 3 تره بس اذا حبيت اتبدلني يعني عادي ابكيفك

--محد يبدل روحه ولاواحد يعرف النصيب اشكاتبله كالها واتحسر نامي بويه وحك علي تعبان كالها ضمني حيل وباسني

--لادااريد اسبح وخر عني

بعدته سحبت روحي من حضنه استوني كمت اتكول داس دكمه رااسن غفه من التعب

يعني من تعرف روحك هالكد تعبان لويش هلكد تجهد روحك والله عجيبه هذا

اخذت ملابس من الكنتور دااندرا شفت الفون مالت مؤتمن يضوي شلت راسي الساعه1 الصبح عجيب منو يتصل هالوكت رحت يمه قبل لااشيله انكطع الاتصال مالحكت اشوف منو

ردت ارجع اجه مسج من بنت الشيخ مكتوب وينك عليش مترد

قريته احس كلبي وكف اريد اكمش الفون ايدي ترجف

شلت الجهاز اجه مسج ثاني اسويت بالشغله

يمعود گاعده على نار --

الثالث والثلاثون من هنا

تعديل المقال