رواية الهجرس الفصل الخامس والعشرين 25 بقلم رواء هادي
_أنت ليش تباوعلي ؟
أبتسمت بوجهها وأخذت نفس طويل من الجكارة ورجعت نفخت الدخان عليها جانت بعيده
عني بعد أمتار قليلة
_ لتلومين نظراتي لومي جمالج
_الله ينتقم منك شرايد مني ؟
_اريدج من راسج لحد صبع رجلج تصيرين لي
_من صخام براسك هاي شنوو ؟!
_يعني اريدج
_تريدك القبور السودة وخرر من كداميييي
سكتت مارديت ردت الزمها.... من ايدها من
شافتني مديت ايدي بعدت بسرعة
ونزلت على الكاع ...
_شتريد مني بس فهمني شتريد؟
_موگتلج اريدج
_انت موصاحي ابد
_سلي تعاي اريد احجي وياج
_ماعندي شي ينحجي وي واحد متحرش مثلك
بعدت عني ومشت بسرعة طلعت للمضيف تخاف تجي للبيت وانه واكف بالطرمة هسه تأكدت خافت مني وبعد مستحيل تقترب صوبي رحت للمضيف
شفتها كاعدة بالحديقة يم ابوها وابوي وعمي ايهم من شافتني طفرت كتمت ضحكتي ورحت يهمم كعدت ربع ساعة راحوا أهلها
وانا هم بوجهي للبيت تلكني عماتي انه وامشي حجيت وياهم تعبان تعباان اريد انام الصبح عود نكمل كلام عاد أعذرني دخلت غرفتي
شوي احسن صرت
والحرارة انخفضت شمرت الدشداشة ونمت ماريد استحر جسمي بعده حار كعدت الصبح جسمي مكسر تكسر خمول عندي وتعب مابي حيل
ارفع راسي من. المخدة ولمارفعت راسي وكمت راح اعيق زواج امي وابوي وراح ينشتلون وياي وينسون الزواج عاد خل اكمل الزواج وراها الله كريم .
كمت سبحت واخذت علاج ونزلت عماتي حايرات بي وحايرات شيسولي ريوك بي مابي اكلت وياهن على
الواهس بارق يلعب بسيفو
هجرس_جيبه خل ابوس
بارق_روح لعمو بوس
نزله بالكاع اجاني يركض مثل البطة يتكلب سمين وابو خدود طالع على مناوي وامه مومثل بارق مكرسع اخذته بوسته بخدودة وعضعضت
خديداته لايحجي ولايگول رجع هو بوسني وعنده عادة يبوس من الشفايف معلمه بارق 'عمتي
عذراء صاحت من مكانها
عذراء_بارق هذا ابنك رومانسي من هسه ههههه
بارق_طالع على عمه فرقد ههههه
هجرس_ كلب ابن الكلب شايفني هذا كله تعلومك
عذراء_ ميله رومانسي فرقد اشو من صغرة مزنجر كوه عليه يطلع كلمة حلوة لو الضحكة يبيعها بفلوس
بارق_ متأكدة عمه
عذراء_طبعا متأكدة
بارق_هذا الكدامج يصدمج بافعاله
ترى ماتعرفي شبي مابي
هجرس_بي نعل مكطعة فوك راسك روح سيفو كايم ابدل هم يلا اروح للدوام
بارق_اعصابك
عذراء_مو تروح وي اهلك
هجرس_ ماعندي مجال والله انتِ روحي وياهم
عذراء_ هو اروح بارق تجي
بارق_كبلج تلكيني بالسيارة
عذراء _ياريت لو الكل مثلك روحهم حلوة
بارق_الكل مزنجرة وروحهم مرة علكم هههه
عذارء_اي والله مدري شلون عايشين
هجرس_ عايشين والحمدالله والشكر..تردون شي ؟
عذراء_سلامتك عمه شرايدين قابل
هجرس_الله يسلمج
كمت لغرفتي بدلت توني ردت افتح باب واطلع لزمتني دوخة وظلمت الدنيا كدام عيوني بسرعة كعدت فوك الجرباية لازم راسي بألم
احسه راح ينفجر
وصدري ضاق عليًّ شوي وراحت الدوخة وكمت ضرب الم من ركبتي لقلبي حسيت نفسي انجلطت لزمت صدري مكان قلبي قوي بكف ايدي
بعد ماتحمل الوجع 'غمضت عيوني كل قوتي اريد أكتم الألم لصار بي وماطلع صوت اريد اجرلي نسمة
هوى مابي من الألم لصار
ماكو لحظات واختفى الألم كله وكدرت اجر النفس "
اففففف ... اليوم عدت باجر ماتعدي
استعجل بزواج اهلك ...
بس ألم بركبتي هو هو كل يوم .... جاي يزود الألم بيها واحس جاي ينزل على صدري الألم يوم بعد يوم نزلت جوه سلمت عليهم وطلعت لكيت فاروق
ينتظرني بره شمرتله سويج السيارة مابي حيل اسوق" سوق بدالي
_صاير ماتسوق شعجب ؟
_تعبان والله واخاف نسوي حادث
_سم الله عليك شبيك
_انفلونزا وصايرة عندي دوخة فجأة
_روح للدكتور
_من أرجع العصر اروح
_مابيك غير العافية
_الله يعافيك .
توه صعد بالسيارة طلعت سلسبيل تركض"
فاروق ناسي محفظتك
فاروق _شلون نسيتها جيبيها يابة
انطتها له وانه واكف اباوعلها مارفعت راسها وباوعتلي راحت دخلت جوه وسدت الباب بعدم أهمية أبتسمت وصعدت بالسيارة هو صعد وراي
طول الطريق مضايق اريد الزم ركبتي ماكدر اخاف يشك بي مريض بقيت بس ابلع بريجي واحس بيها كبرانه اليوم اريد اتحسسها
وصلنا المركز عدل لمكتبي وكفت كدام المراية بلعت ريجي واباوعلها حجمها صاير بكد بيضة الدجاجة لمسها بايدي صايرة صلبه مثل الصخرة ...
لمستها لو ابتليت على عمري انفجار وصار بداخلها سندت ظهري للحايط من شدة الالم لنزل بيها شاهدت على روحي كلت هاهية راح اموت هسه
والدوخة اجتني وقلبي صار يخفق سريع بدل الدكة الوحدة صار يدك عشر دكات بي رحت كعدت بالكرسي ورفعت راسي ليفوك
ساد عيوني اريد الوجع يهدي ربع ساعة وانه بنفس الحالة الالم مايخف أبد امي وجهالها صاروا بين عيوني عاد بي مابي عدلت كعتي وشلت التلفون
بيدي اتصلت بعمي ايهم ...
گلتله هسه ... يروح يشتري غرفه لأمي اليوم اريد امي بالبيت گال تدلل هسه رايح اشتريها وانصبها
وتلكاها جاهزة من تترجع ...
بسرعة فصلت الاتصال دزيت رسالة لجدي وگلتله من تكطعون مهر جيبوا غراضها كلهن اليوم اكون من ارجع الكه امي عدنه بالبيت هي وجهالها.
نص ساعة اتصل بي جدي كوه احجي ويا مابي حيل احجي احس الساني مشلول عاد گلتله نحجي بالرسائل حجيت ويا رسائل عن موضوع امي
شك بي تعبان ومريض
گال هسه أتصل بالمسؤول خل يدزك للبيت ..
_تسوي فضل والله
_ديريت بيك من البارحة وضعك مخربط
وتشرد من يمي جايك مسافة الطريق
_لا تجي انت انه اجي
_جايك انه وعباس مسافة الطريق يمك
_جدي لا تجي مابي شي بس أنفلونزا
وراسي يوجعني
_اخذك للدكتور
_مومال دكتور ثلاث ايام اصير زين
_ليش تعاند؟
_مو مال عناد مابي شي مجرد أنفلونزا من اطلع
امر للصيدلية اشتري علاج ماكو
داعي تجون
_ماشي انتظرك
_مسافة الطريق بالبيت
اخذت إجازة وطلعت بوجهي للبيت الطريق ثولني ثول وكل دقيقة وضعي يتخربط ويصير سواد كدام اعيوني اخاف اسوي حادث حرارتي ارتفعت فول ...
كمت النفس من أجره عبالك ....نار ويدخل بصدري وكفت السيارة ونزلت بيدي بطل ماي غسلت وجهي ورشيت ماي بصدري اريد حرارتي تنزل ماتنزل ...
حسيت وضعي تخربط أكثر رجعت للسيارة بسرعة سقت سريع بس اريد اوصل للبيت ساعة الساعة اتخربط وتكوم بمكاني ماصدكت وصلت
للبيت نزلت شفت البنات
جاي يغسلون بالطرمة سلي وياهم ترش ماي بالصوندة من شافتني رمت الصوندة من ايدها وگالت" شوي وارجع
رحاب_ماشي
مشيت كم خطوة وحسيت الدنيا افترت بي بسرعة كعدت خليت ايدي على راسي سمعت
صوت رحاب "
رحاب_شبيك فرقد ؟
هجرس_دخت جيبيلي ماي
رحاب_ كوم ادخل جوه حارة هنا
هجرس_مابي جيبيلي ماي بسرعة متت من العطش
راحت بسرعة رجع الألم بركبتي لزمت اركبتي قوي بيدي من ودي اخنك نفسي واكطع النفس
...اااخخخ يمة ...
رجعت رحاب جايبتلي كلاص ماي عفت اركبتي واخذته من ايدها بدون ماباوعلها شربت ماي وعساني ماشارب حسيت نذبحت ذبح هناك
وين شمرت كلاص الماي
ولزمت ركبتي بأثنين ايديه "
اااااخخخخ اففففف بعد
ماتحمل رحاااب
كعدت كدامي خايفة ...
فرقد شبيك ؟
هجرس_الماي حار وحرك زردومي
رحاب_والله بارد هاي انت مسخن كوم
جوه وين كاعد هنا
عفت ركبتي وجلبت بايدها "
انطيني ايدج
_يلا كوم ..ادري شجاج ماتگلي شجاك
_هذا حظي الحلو
كومتني عفت ايدها من شفت سلي تباوع النه بنظرات الشك " منو بالبيت ؟
رحاب_كلهم بره
هجرس_جدي
رحاب_هم بره راح وي عمي علمود كطعان المهر
هجرس_عماتي
رحاب_عمتي سناء راحت لبيت رجلها وعمتي عذراء راحت ويه عمي وبارق علمود كطعان المهر
ويجيبون الجهاز ...
هجرس_اممم
رحاب_فرقد شبيك تعبان ومسخن
هجرس_ماعرف من البارحة هذا وضعي
سخونه هدت حيلي هد
رحاب_مارحت للدكتور
هجرس_لا
مشيت هي تمشي بصفي "
ليش مارحت
_يموتني الدكتور مثل ماموتوني الشيوخ
_هاي جابها على هاي فرقد لا تهمل صحتك
_ عوفيني رحاب
_دومك مهمل
_احسن
عفتهن ودخلت جوه شفت جديتي خديجة وجوري كاعدات سلمت عليهن وصعدت فوك نزعت من رجلي ونزعت ملابسي بسرعة للحمام رحت
سبحت بماي بارد
اريد اخلص من الحرارة كتلتني كتل .
سبحت وطلعت نفس الشي. حرارتي عدل للكنتور طلعت العلاج أخذت علاج وتمددت فوك الفراش سمعت صوت رحاب وسلي يتهامسن يم الباب
اريد اصيح بيهن مابي حيل اصيح ولزمتني الكحة كمت اكح بصوت عالي ومن اكح حس بلعومي ينشال شيل من الألم صرت اكح واضرب
بايدي فوك الفراش .
وعيوني يكدن دموع اندك الباب "
هجرس شبيك ؟
رحاب_ هذا شبي مايرد بس لا ختنك
ختنكت خنك بالكحة فتحن الباب ودخلن اريد اوكف كحة ماكدر والألم لصار موطبيعي عيوني كاموا يكدون دموع الهن والكيفهن ...
سلي_ياربي شجاه رحاب
رحاب_مادري هاك اشرب ماي
دفعت ايد رحاب قوي ماكدر اشرب ماي "
ماريد اطلعووووا
رحاب_بس اشرب ماي شوف الحالتك شلوت صارت
سلي_شربي غصب عنه راح يموووت
هجرس_ امووت بسطعش قبررر طلعوووا بررره
من شافوني تعصبت طلعوا بسرعة ماكو دقائق وجت امي وجداتي جوري وخديجة نمت على ظهري متوجع رأسي انسطر سطر مابي حيل ابلع ريجي
صعوبة عندي صارت هاي ثلاث ايام صارلي على هاي الحالة وضعي متخربط خلولي كمادات بجسمي وكعدت امي بصفي على الجرباية تخلي
كمادة من قماش وماي
بارد بي ثلج تريد تنزل حرارتي الكل مخبوص بي نص ساعة وحرارتي شوي انخفضت كدرت افتح اعيوني شفت سلي ورحاب وهباوي
وامي عندي بالغرفة
سلي_شلون صرت ؟
هجرس_احسن
امي_شجاك وتخربطت ؟
هجرس_ أنفلونزا
سلي_ أنفلونزا ماتسوي هيج وتوكع واحد بطوله روح للدكتور وافحص اخاف بيك شي لاسامح الله
هباوي_فال الله ولافالج بيش طالبته
سلي_مو طالبته بس هاي دنيانا مو أمان حرارته كلش مرتفعة ويكح بصوت عالي حتى صوته صاير بي بحه انتو مركزين على صوته شلون مبحوح ؟!
هجرس_هو هذا صوتي بي بحه من صغري مابي شي تعب وإرهاق وحارة وطريق طويل
سلي_تعلمني بصوتك هذا موصوتك بالاخص بهاي الفترة صوتك فدمرة بي بحه روح لدكتور اختصاص
حنجره خل يكشف عن حالتك
هجرس_كوه تمرضيني شرشبيل
سلي_انت مريض شنو كوه امرضك
امي_حجيها صدك فدمرة صاير بالاخص هاي
الثلاث ايام وضعك ماخربط
هجرس_ مابي شي ليش تلحون رحاب
طلعيلي ملابس اريد اسبح
رحاب_ماشي
كعدت هباوي طلعت طلعت وراها امي وسلي بقت واكفه تنتظر رحاب باوعتلها تباوعلي مبين عليها مقهورة رفعت راسي ليفوك صار
عندي تشنج بركبتي
بلعت ريجي بصعوبة .... احس بيها صعدت ونزلت من بلعت ريجي نزلت رأسي أتنفس سريع قلبي يخفق بسرعة رحاب دخلت للحمام كمت
احس رجليه يونون
من التعب والحرارة الي بجسمي وكفت على صوت سلي "عندك غدة بركبتك ؟
باوعتلها مبتسم "
بيش طالبتني ؟
_تره واضحة مثل عين الشمس بركبتك
_ كوه تجيبيلي السوء شرشبيل
_ارفع راسك ليفوك وابلع ريجك وشوف بكد بيضة الدجاجة تصعد وتنزل من تبلع ريجك واني شايفتها من قبل عد خالي الله يرحمه هم صارت
بي هيج ومات
من وراها طلعت سرطان بس لابيك
سرطان وماتگول .؟!
_اعوذ بالله منج بيش طالبتني بالسرطان
_لعد هاي شنو بركبتك ؟
_مجرد ورم بسيط لأن اصيح هواي لا اكثر ولا أقل
_جذاب الا اگول لجدو عليك مريض وماتگول
رادت تطلع جلبت بايدها جريتها لعندي توها رادت تصيح سديت حلكها بيدي "شعليج أنتِ؟ .
صارت تقاوم بي طلعت رجاب من الحمام شافتني حاضنها من وره ظهرها وساد حلكها
بقت مصدومة "
رحاب_عوفها فرقد
فرقد_ اسمعي ولج إذا جبتي رطاري الكائن مايكون عتبري نفسج في عداد الأموات فعذر من
انذر شرشبيل
رحاب_شكو صاير فرقد عوفها تخنكت فرقد عوفها
فرقد_اخر انذار الج بعدي عن طريقي
عفتها صارت تكح بصوت عالي راحتلها رحاب خايفة عليها تدري بي اعصاب وماتحمل احد يتدخل
بحياتي مهما كان
رحاب_خوما بيج شي
سلي_موصوجك صوجي اني الماكله همك
هجرس_ماجبرتج تاكلين همي يله بره اطلعيييي
صحت بيها دموع نزلوا من عيونها وطلعت بسرعة طلعت وراها رحاب بوجهي للحمام سبحت وطلعت باوعت عالساعة صارت بال١٢ شوي
حالتي احسن صارت
نزلت جوه .ويه نزلتي اجوي اهلي امي وياهم وجايبين اغراضها وعمال عدنه جاي يشدون بغرفه النوم وانه مادري سلمت عليهم شفت سلي بالمطبخ
جاي تساعد هباوي ورحاب لاجازت ولا راحت لبيت اهلها هاي لو اشنقها واذبحها واشرب من دمها قطرة قطرة ماتجوز ولا تتأثر بالكلام
دخلت المطبخ عطشان "
اريد ماي
راحت رحاب للثلاجة صاحت بيها سلي "
انطي ماي دافي موماي بارد
رحاب_حارة
سلي_هو شحاله مو مريض انطي ماي دافي
هباوي جابتلي .... ماي لزمته دافي عاد شربت صح عندي صعوبة بس شربت رجعت الها الكلاص اخذته اباوع لسلي تشتغل منه وتشتغل منا جنها مصراع ...
هجرس_هيي شرشبيل
بدون ماتباوعلي ردت"
شكو هجيرس ؟
هجرس_انتِ ماتتأثرين بالكلام
اندارت عليًّ وگالت "
اعرفك واعرف طباكاتك شنو عليش اتاثر بالكلام
معتاز شي جوعان اصبلك غدا
هجرس_هه عمري كله مشايف بنية
مثلج عديمة الإحساس
سلي_ومثلك ماراح اشوف
هجرس_غير نادر
سلي_واني هم نادرة واشباهي كلهن مقروضات
هباوي_قصف متبادل ههههه
سلي_لعد بس هو يقصف
هجرس_ لا اله الا الله
خليت وطلعت مبتسم هل البنية ماتجوز .... من دربي لو شسويلها عمي خل اجوز منها احسلي ماكو فايدة وياها رحت كعدت يم جدي موسى
وابوي كملوا شد الغرفة
وراها اذن صلينا صبوا الغدا ..وغسلوا المواعين سلي وهباوي وراها رجعوا نظفوا الغرفة هم وهباوي عمتي عذراء واكفة بصفي وتحجي على شطارة سلي
عذراء_ شوف جنها مهفة ريح ماتكعدولا تتعب من الصبح عدنه تساعد بشغل البيت وسوت الغدا ويه هباوي وغسلت المواعين وهسه جاي تنظف بغرفه امك ولك وين جنت منها هجيرس ؟
هجرس_جنت معمي العيون
عذراء_وهسه فتح عيونك وصيدها وخلها بقفصك
ولاتخليها تطير من ايدك
هجرس_ادري طير واصيدها ياعمه
عذراء_طير نادر هاي والله لو عندي ولد جبير ماخليها تطلع حلك الباب وسوي دم للركب عليها هم حلوة وهم شاطرة وهم اخلاق وهم دارسة
من كل النواحي كاملة
مكملة وين الكه هيج بنية بهذا الزمن
هجرس_منو المادارس ومنو الموشاطر ...
عذراء_حنين هم دارسه دسكت عمه مو كل اصابعك سوه مو كل بنية بنية اكو بنات تخليهن على الجرح يطيب واكو تخليها على الجرح يلتهب
ويصير سرطان
هجرس_وسلي تنخله على الجرح
يطيب مو هذا كلامج
عذراء_اي والله وادعي الليل والنهار
تصير من نصيبك
هجرس_لا تدعين وتعذبين بروحج ماراح أخذها..علاوي تعال حبيبي
عذارء_مالومك أعمى العيون وماتلفت انتباهك غير هذيج الزركة اللي انت وياها تصيرون رقم عشرة تفوو عليك وعلى اختيارك ...
بارق_عطر من الدوز ههههههه
عذارء_موتني شاع قلبي مدري
عليمن طالع عور دجال
هجرس_خلف الله عليج سويتيني عور دجال
بارق_عمه عوردجال احسن منه عنده عين وحدة مو مثله اعمى العيون هههههه
عذارء_ولك من يمك انت شبيك شوي حسسه
بارق_كوم حجار بلا احساس شسويله عمه تعبت ويا والله العظيم دباعيها جنها حورية بحر
امداك امداك
هباوي_عمه عوفوا شتردون منه هي
كوه هسه ياخذها
عمتي_انجبي انتِ الثانية ..لعد ياخذ منو ماتگليلي لاهاي اريدها ولاهذيج اريدها وهاي جنها لعابة كدامه ومايشوف ادري الله من خلقك ماخله
بيك احساس الحب
اصخام براسك وبراس الخلفوك
بارق_بعد بيتي نزلتي دوسة ونص عمه ههههه
عذارء_مو شلع قلبي كلما اباوعلها اشبع قهر واگول حرامات تفوت وتروح لغيره غير احبه واريدله الخير لوماحبه ماحجي وارزل وتعب روحي واحرك بدمي
هجرس_تحبيني اسكتي
عذارء_امداك أعمى العيون وماتلفت انتباهك غير الزركة ..عيوني الاثنين لعابتي
ماكملتي شغلج
ردت سلي من الغرفة"
هههه لابعد عمه تعاي
عذارء _جاية بعد روحي .. أبقى ابو الزركات والبرغي
بارق_وياج جاي ههههه
راح بارق وياها يضحك هباوي راحت وراهم علاوي اخوي جاء يمي كعدنا فوك الدرج احجي ويا وراها فاطمة اجت يمي سلي شحطت الجنطة امي شحط
ودخلتها للغرفه ترتب بالاغراض هي وامي وامي الثانية والكل وياهم مادخلت بقيت كاعد فوك الدرج يم اخواتي ساعة زمان طلعت سلي تباوعلي ...
سلي_هاي جمعت اهلك ماناوي تعترف
بمرضك وتفض الشغلة
هجرس_ولج لا تدخلين بي
سلي_والله ادخل وافكس عيونك الاثنين
هجرس_تفكسين عيون منو ؟
سلي_عيونك .. فطومة يلا تعاي اسبحي وبدلي
هجرس_ماعندج كرامة
سلي_خلي الكرامه الك اوليدي يلا تعااي
فطومة_جاية سلي
كامت فطومة راحت يمها اخوي يباوعلي "
هاي وكحة
هجرس_لاقملة
اخذت فطومة وراحت لغرفة جديتي حلوة اجه بصفي عمي ايهم " متت من التعب
_الله يساعدك عمي
_ويساعدك لعد شبيك يگولون مريض ؟
_ أنفلونزا وحارة بالدوام ومحترك اهل اهلي
_اي والله حارة نار ...علاوي روح يم الولد
علاوي_ماشي عمي
كام علاوي باوعتله مبين عنده شي وياي "
من شوكت بيك غدة بركبتك ؟
_منو گالك ؟
_سلي گالتلي وگالت شفتها بركبته صايرة بكد بيضة الدجاجة من بلع ريجه صعدت ورجعت نزلت
وهاي كلها أعراضها لجاي يصير ويا
_شنو هاي ماتضم سالفة
_زين تسوي ماتضم سالفة شلون تضم علينه هيج مرض فهمني شلووون العصر اخذك للدكتور واشوف
شنو هاي طالعتلك
_هوجاي اراجع دكتور صارلي ٨ اشهر
_شنوووو ؟ ٨ اشهر بيك وماتكول ؟!!
_ماحبيت اقلق الكل بي
_شنو ماتقلق والك هذا مرض مولعب جهال ؟
_حميدة مو سرطانية
_متأكد ؟
_اي سويت خزعة قبل ٣ أشهر وكال هوائية ماتأثر
تروح بالعلاج
_وهسه راحت ؟
_لا
_ كبرت بالزايد مو
_اي حجمها زاد عن قبل ٦ درجات وصار عندي
أعراض سرطانية
_بالخير عليك ضحكوا عليك وكالولك حميدة وهي بالاصل سرطان والك بس فهمني انت شنو زمال خوما زمال وين اكو حميدة بيها هيج أعراض وتكبر بدل ماتصغر
وتروح بالعلاج ؟
_متحوله
_هملتها وتحولت مو
_اي تركت العلاج مدة ٣ أشهر ورحت للدكتور بغداد كال لازم تسوي تحاليل بأسرع وقت كان
وتسوي خزعة ثانية
_العصر اكول لابوي ويأخذك لبغداد
_هسه لا تكله خل نتأكد منها يله
_العصر يعني العصر وكلمة وحدة منك ماريد احمد الله واشكره مو سرطان يطلع بيك
_مايهمني
_اهفك هسه بطراك اشمرك هناك ويييين ؟
_مو اليوم باجر ميتين عليش اخاف واكل هم مرض بي وهذا المرض من الله نزله بي والحمدالله
والشكر على كل حال
_شكد سهلة بلسانك كلمة الموت وعايف وراك عالم تحبك هسه بس يسمع ابوي يشرب من دمك وعلي ...منين اجتك منين بس فهمني منين ماعدنه ورثه
حتى تجيك
_من القهر
_قهر الساقطة..$#% البربوك العاهرة والله إذا طلع بيك سرطان محد مايخلصها من بين ايديه اله اجرها
واذبحها على قبله اليهوووود ...
_عمي أعصابك
_هي بقت اعصاب بعد ماسمعت لمرض البيك هسه فرحانين ابوك رجع امك وراح ينقلب البيت من فرح العزة بعد مايسمعون المرض البيك
_أمر الله
_فدوة العينك ربي من صغرة ماشاف الراحة ليش
هيج تسوي بي
_هذا امتحان من ربك وانا قابل بأمر الله
_وانت تكيف على هيج سوالف كووم ارتاح
والعصر نطلع لبغداد
_اروحلك فدوة لا تجيب طاري لأحد لما نسوي التحاليل
_ماشي يله كوم
رجعت سلي مسبحه اختي ومشطتلها باوعتلنه وكالت "
هاا عمو بشر ؟
ايهم_مصخمها المصخم
سلي_ هسه شلون عمو ؟
ايهم _اندري شلون حرت بزماني
هجرس_منو كالج تكولين
سلي_انت كلتلي لا تسكتين أبد وشيصير وياج وصلي واني دا اطبق كلامك عليك ...عمي سفره
للخارج وعالجه
ايهم_ خل اسويله تحاليل وإذا كلام غير شي اطلع بي للهند
سلي_ان شاء الله مابي شي
هجرس_بي والمابي انتي شعليج
سلي_طبك طوب انت بس اهلك وجدو وجداتي خطية
هجرس_ماعليج
سلي_مالي دخل بيك لعلي سويته وخلص
عافتنه ومشت صايرة قوية ماتخاف مني ولا تتأثر دخلت جوه عمي يباوعلي بشفقة تالي عمري اقرب الناس لي يباوعولي بشفقة خليت وكمت متعصب منها
انا ادري بروحي سرطان بي وابو السرطان مايعيش ومايفيد ويا العلاج وبالاخص إذا جان بالركبه راح يسوولي عملية ويشيلون جهاز الحنجرة بالكامل واصير اخرس
وهم مايفيد وياي وره فترة يلكو بصدري وراح يعلعلوني بالعمليات والدكاترة خلوني اموت بهدوء بدون شلعان قلب تحلفت بيها بس الزمها له اسويها عبرة
لنفسها علمود ماتدخل بي .
نزلت الظهر لبيت ... هدوء كلت اكيد عدنه يم البنات دورت عليها ماكو طلعت بره سمعت صوتها بيت أهلها "
والله اروح وابات عدهم عشر ايام
مليت هنا مليت
امها_مو تكولين ديالى حلوة وبغداد موحلوة
سلي_موحلوة صارت بعد
امها_شختلف ولج
سلي_ماحبها بعد اريد اروح لبغداد يم بيت اخوي
امها_هو باجر الصبح جاي روحي ويا منو لازمج
سلي_مو تتصلين بي وتكوليلي تعاي
امها_فلا اتصل بيج
سلي_اي احسن...اريد ورد
امها_ماطلعت وياج كل ساعة اريد شي
سلي_ماا اريد ورد تدرين بي احب الورد
امها_منين اجيباج ورد
سلي_ليش مازرعتوا ورد بالحديقة
امها_موزارعين
سلي_محلو هذا اريد ورد جوري مثل ورد بيت جدو موسى
امها_روحي جيبي منهم جم شتله واشتلي
سلي_اخاف من هجرس
امها_الله اكبر نايم وتجيك التهايم فرقد شعلي بيج
سلي_والله كلما يشوفني احوش ورد يطردني
امها_يشاقه وياج العصر روحي جيبي
سلي_اي من يروح اروح
بوجهي للحديقة مجان بيها هواي ورد جم وردة الجهال كله حايشينه عاد حشتهن كلهن وخليتهن بعلاكة سودة
وشمرتهن بنص حاوية الزبالة ..
_خوش خليتلج ورد شرشبيل.
رجعت للبيت العصر رحت انا وعمي ايهم وعمي فواز كايله عمي ايهم هو يعرف دكتور زين وصلنا العيادة سوالي خزعة وكال أسبوع وتعالوا اخذوها دفعوله فلوس
وكالوله باجر الظهر نجي ناخذها مستعجلين كال تمام ..
وراها رحنه للدكتور حجزنه وماوصل الحجز لي لحد ال٩ بالليل وماجاي رقمي تعبت وكتلهم نمشي
باجر العصر نمر بي
والله رجعنا واجرنا فندق لفيت راسي ونمت اسمع بعمامي يسولفون يكولون إذا بي شي هاليومين نطلع للهند
مانبقى بالعراق .
كعدت الصبح ريجي يابس مابي حيل ابلع ريجي من الوجه واحس الوجع بكل اركبتي وصدري صاير بي مابي
اكلت ريوك وشربت جاي
وراها طلعنا زرنه الأمام الكاظم (ع)
واتصل عمي ايهم بالدكتور ابو الخزعة كال طلعت النتيجة تعالوا أخذوها اباوعلهم لازمين قلوبهم بديهم من الخوف الا انا مامهتم أبد لأن أعرف النتيجة شنو سرطان
الغدة الدرقية .
المهم رحناله وكال .. النتيجة الغدة سرطانية عمامي انشمروا هناك وين كالوله نعيد التحليل اخاف بي خطأ كال ماكو اي خطأ هاي النتيجة وإذا ماتصدكون بي
اعرضوا لغير دكتور وشوفوا نفس النتيجة .
اخذوا التحليل وطلعنا للدكتور حالنه على ابو المختبر تحاليل دم وسونار ملون وناظور ذني كلهن اسويهن اليوم والله سويت تحليل الدم كالوا ساعة ونص تعالوا اخذوا وسونار هم مكالوا النتيجة كالوا ودوهن للدكتور
الناظور كذالك كال ضاربه ... بالحبال الصوتية ومن انطانه حجمها كبران درجتين عن قبل بس مابارزة خارجين داخلين جانت بس من ارفع اركبتي وابلع ريجي
يله تبرز .
رجعنا على ابو تحليل الدم فيروس بالدم صاير يعني منتشر بجسمي المرض عمامي صاروا يبجون وانا المريض مامهتم ولاداير بال لنفسي وهم موتوا روحهم
كعدت اهدي بيهم رادوا يكومون يكتلوني بالعيادة شلون اسكت كل هاي الفترة وانا بالحقيقة صارلي سنة كاملة من صارت بي وكتلهم ٨ أشهر خفت منهم .
هدوا شوي ...واخذوني للدكتور شافت الناظور والتحاليل وسونار كال عملية بسرع وقت كان نشيل الجهاز الحنجرة بالكامل وراها تأخذ .
العلاج الكيماوي.
إيست من كلامه أيامي صارت معدودة عمامي ماقبلوا كالوا نسفرة خارج العراق عاد رجعنا سوو الطريق مناحة بس يبجون وانا كاعد بالسيارة مخلي ايدي
على خدي وصافن بزماني ...ماشفت يوم حلو بحياتي ومن القهر والحزن صار بي سرطان كل ساعة واحد متصل من الأهل يريد يطمن عن حالتي .
هم يكولون من نوصل للبيت نحجي ...
وصلنا لبيت جدي وجديتي حلوة وابوي وامي ينتظرونه بره بحديقة المضيف من شفتهم مانقهرت على حالي انقهرت عليهم نزلنا كاللهم ايهم هو ويبجي
بي سرطان الغدة الدرقية ومنتشر بجسمه ..
هو كال .... هيج لو جدي تخربط بطوله لاايد ولا رجل رحتله أركض مدري شلون شلته بحضني وطلعت بي للسيارة جاء ويانه ابوي وعمي ايهم وبارق
طول الطريق اصحي بجدي هو مايصحى تعاركت ويه عمي ايهم لان كالها بوجههم وجدي تخربط وصلنا المستشفى اخذوه من عدنه ادعي الله مامجلوط
بارق وابوي وعمي بصفي ....كاعدين شوي وجوي عمامي ولدهم كلهم مخطوف لونهم مبينين يدرون بي سرطان كمت اروح وارجع اريد احد يطمني على جدي ماكو
عاد طلع الدكتور وكال السكر .... مرتفع واصل ٤٠٠ الا شوي مجلوط انطيناه علاج شوي وتكدرون تشوفونه فتحوا موضوعي سفرة بهذا الأسبوع
للهند لاتبقو بالعراق شهر ويقضون على حياته بس تبقو .
صحى جدي رحتله من شافتي ... صار يبجي هو يبجي وانا ابجي على حاله مابجي على حالي صار يعاتب بي ليش ماكلت ليش ماحجيت ليش خليته
ينتشر بجسمك ...
ومن هذا الكلام الكاع ترد وانا .....مارد ادري بروحي بيدي دمرت نفسي وعفت المرض ياكل بي اكل "فترة وطلعوا جدي للبيت اباوع بوجوه الكل مكلوبه
كلاب عبالك عدهم فاتحة .
جداتي وامي يبجون هاي شلون ورطة ياربي تتمرض تبتلي على عمرك تموت هم تبتلي على موتك كلها تدك وتلطم وراك هسه عايش ماميت بعدني واشم الهوى
منو يكول اموت ...
حلوة_باجر من الصبح أحنه بضريح شريفة واريد امرادي منها واثقة ماراح تفشلني وتردني خايبة ...
ايهم _هاهية روح ..بارق عباس روحوا جيبوا عنوان الدكتور لراحله عمي سعيد بالهند علمود
نسافر هذا الأسبوع
بارق_ماشي امشي عباس
اجوي اهلي سلي هي ماكو مالها لاحس ولاطك اكيد راحت لبغداد ملت من ديالى ومن شوفه وجي المزنجر والمريض قسمة اجت وجرتني على صفحة وكالت
قسمة_هاي حوبه بتي حنين حلفتها كلام الله باطل
طلعت بيك
هجرس_بتج لو شريفة ماحلفت كلام الله باطل وماراحت كو.. ويه غيري وهي على ذمتي لاتفرحون بمرضي حسبة اشهر واصير زين وارجع احاسب بتج
والكو.. مالتها على السوو بي .
قسمة_من كل عقلك جاي تحجي بيج سرطان ومنتشر حتى بدمك بس توصل للهند يكصبوك كصابة ويرجعوك بس
غلوف وايام ونشمرك بقبرك
هجرس _ ولا تيأسوا من روح الله إنه لاييأس من روح الله إلا القوم الكافرون ..وانا مسلم ومايأس من رحمة الله واهل البيت (ع) واثق من نفسي أرجع كما انا
واشوفكم الويل انتي وبتج
الساقطة ام الولد $#@%&&
نزلت عليها بالفشار ماكدرت الزم الساني عاد فلتت من يمي وراحت كعدت يم جديتي خديجة بالعمدة كعدت كدامها هم يحجون البعض مايس والبعض عنده يقين
بس اوصل الشريفة اصير زين وجديتي حلوة تحجيها بكل ثقه بس اوصل لهناك اطيب المهم راحوا الخطار جديتي حلوة نومتني بحضنها الليل كله تبجي
وتدعي الله وتطلب من شريفه تشافيني .
صلينا صلاة الفجر وطلعنا انا وامي وابوي وجديتي وعمي ايهم زيارة الشريفة (ع) مسافرة الطريق وصلنا نزلنا توضينه ودخلنا زرنه جديتي كالت نبات بشريفة
واريدها تنطيني مرادي ماطلع إذا مابشرتني وانطتني مرادي اريد حفيدي ومن الله ومنج ياشريفة وره صلاة العشاء ربطني عمي ايهم بشباك العلوية شريفة (ع)
ساعة وحل ربط ايدي حسيت بدوخة وحرارتي ارتفعت كتله تعبت اريد أنام عاد جابلي افراش من الأمانات ونمت وابوي بصفي نام بسرعة نمت ماحسيت على نفسي
بعد كعدت مستغرب انا وين ؟ غرفة العمليات وداخل الغرفة وياي ابنية صغيرة وجهها مامبين مثل النور الشمس وينور بالكامل وياها مره ثانية ضخمة
تقريبآ بضخامة أمي لابسة عباية سودة وجهها كذالك ينور اريد احجي ماكدر احجي جسمي مثل المخدر لااكدر ارفع ايدي لا اكدر اسوي شي اجت يم اركبتي
بيدها شفرة والمره الثانية بيدها صينية بيها أدوات العملية من خلتها على اركبتي حسيت بيها نحرتني بس ماحسيت بالالم أبد كامت تشتغل طلعت
شي على شكل بيضة بكد حجم بيضة الدجاجة واكبر لونه على بياض وزراق خلته بالصينية ورجعت تطلع أشياء غريبة من اركبتي كملت رجعت خيطت الجرح
والمره الثانية جابتلها بلاستر لزكته على جرك اركبتي
كدرت ارفع ايدي ولزمتها من ايدها للطفلة "
انتي منو وسويتي بي ؟
_انا السيدة شريفة وهاي السيدة ام البنين الله سبحانه وتعالى دزنه عليك نسويلك العملية
من كالت هيج ...رأسن عفت ايدها ردت احجي وياها ختفوا بعد بسرعة كعدت بفراشي مرعوب خايف ارجف من الخوف خليت ايدي على اركبتي والصدمة لي
بلاستر على اركبتي موجود جريت ايدي اريد استوعب لصار وياي حقيقة لو بعدنه داخل الحلم رجعت تلمست اركبتي البلاستر موجود فعلآ طلعت تلفوني بسرعة
فتحت الكاميرا الاماميه اباوع والصدمة لي بلاستر موجود وقميصي الأبيض كله بقع دم بلعت ريجي اتحسي الغدة ماكو مختفيه رجعت تلمست مكان البلاستر
تألمت كلش ندهت عمي ايهم جان نايم بصفي "
عمي عمي اكعد عميييي ولك عمي
اكعد شبيك نايم
كعد مرتعب "
شكو شكو فرقد؟
هجرس_العلوية شريفة وام البنين عليهم السلام
سوولي عملية باوع
شوفته مكان العملية فك اعيونه بصدمة "
انا بحلم لو بعلم
هجرس_عمي شبيك مصدوم والله سوولي عملية
ايهم _اضربني راشدي خل أصحى
ماكلت باطل جبت عمي براشدي فريت وجه لزم خدة وعاط "هاااي صدددك ..اللهم صل على محمد وآل محمد مشكورة ياشريفة ماقصرتيييييييي
صار يصيح بصوت عالي ابوي كعد مخترش والعالم هم كعدت مخترشة ماتعرف شسالفة كلت لابوي صار يبجي ويتشكر الله وشريفة صارت وياي معجزة
العالم كلها التمت والاغلبية جانت تصور جديتي شافتنه هي وامي وجوي يركضون مامصدكين صارت وياي
معجزة وشفيت من المرض .
دخلنا جوه بالضريح تشكرناها وشمرت شكو فلوس بالمحفظه داخل ضريحها الشريف العالم صاروا كوم علية حسيت نار وشتغلت بركبتي جاي احس أشياء
مشيوله من اركبتي عاد كملنا الزيارة وطلعنا بسرعة رجعنا للبيت هذا الحجي الساعة بال٢ بالليل كمت اون من الوجع عبالك جنت مخدر وراح إثر التخدير عني .
من الوجع لبي نمت على فخذ جديتي ساد اعيوني ماكدرت اسيطر عليهن نزلوا دموعي من الألم خلت كف ايدها على راسي وتصلي على محمد وآل محمد ...
ماتصلوا بأحد ولاجابوا طاري كالوا نخليها مفاجأة للكل جانوا فرحانين ومامصدكين صارت وياي معجزة من الوجع نمت ماحسيت على نفسي بعد الا جديتي تنهد بي
حلوة_فرقد جدة اكعد وصلنا
فتحت اعيوني ولوجع لبي موطبيعي كوه حجيه بصوت ناصي "متوجع جدة
حلوة_بي ولابيك جدة يله كوم ارتاح وصلنا
كعدت فتحلي الباب ابوي ... نزلني ويه نزلتي جرني الحضنه يبجي مثل الطفل مامصدك بي صرت زين والله رزقني من كرامات العلوية شريفة بت الحسن عليها السلام .
عافني رجع حضني عمي ايهم نفس الشي يبجي هسه تأكدت الكل تحبني حتى هذا ليحجي بكفاي بس من عده قسيمة البربوك تموت مني وفرحانة صار بي
سرطان هسه تجي الصدمة الها الصبح من تسمع بي صايرة وياي معجزة من معاجز الله سبحانه وتعالى
وكرامات العلوية شريفة ...
دخلنا لبيت والكل نايم لاحس ولاصوت واحنه هم ماكعدنه أحد عدلولي جرباية جديتي حلوة نمت عليها وامي وابوي وعمي ايهم فرشوا افراش يمي بالغرفة
الكل نامت يمي جديتي حلوة تباوعلي وتبجي مسحت دموعها بيدي "اريد احجي مابي حيل احجي
من الالم لبي كتفيت بالصمت
_انا جنت واثقة بالله وشريفة بت الحسن عليها السلام مراح يخجلوني وينطوني مرادي نذر عليه اذبح قربان لوجه الله والعلوية شريفة ٤ طليان واوزعهن على الفقراء
والايتام وشكو فقير ادزله فلوس
لصار وياك معجزة من معاجز الله سبحانه وتعالى
من التعب نمت بسرعة كعدت الصبح جدي يمي وجداتي وامي والكل عندي بالغرفة مامصدكين صايرة
وياي معجزة جدي حاضني ويبجي
نكسر قلبي عليك جدي لو ادري هيج ... يصير بيكم منورة مرضي جان داريت نفسي من البداية وماهملت صحتي وره شوي طلعوا ردت اسبح وابدل جسمي بي دم
وتعبان عاد سبحتني جديتي وامي كتلهم انا اسبح مابي شي والله وماخلي ماي يروح على العملية ماكو ماقبلوا عناد حسيت نفسي طفل صغيرون مو رجال
جبير للظهر وعمامي وعماتي ولدهم ومناوي واهل ياسر كلها عدنه الأغلبية مصدومة ومامصدكة يكولون لا انتو سويتوا عملية هيج كتوا هذا الحجي من قسمة وربعها
جديتي ردت وكالت "
الله سبحانه وتعالى دزنه العلوية شريفة بت الحسن عليها السلام وام البنين عليها السلام سووله العملية
يادكاترة بعد تحجون انتو
ولما يصدك طبه الف طب لايصدك المهم .... عندي انطوني مرادي وشفولي حفيدي الواحيد العصر ودوني للدكتور شاف العملية تعجب من الشغل العملية وخلالي جهاز يسحب
الدم والماي الي داخل العملية
من خلالي الجهاز شاغت روحي وصار ألم موطبيعي انطاني مسكنات وابر علمود تطيب العملية بسرعة وراها رجعنا بوجهي لغرفة جديتي حلوة
مابي أرفع رأسي ماي كوه اشربه ...
وره مدرة وشوي صرت احسن وخف الآلام واكدر احجي بس مو هواي احجي واحجي بصوت ناصي جدي سوه عزيمة شكران لوجه الله وللعلوية شريفة عليها السلام
وام البنين عليها السلام .
لزمت قسيمة بالعزيمة "
هاا قسيمة متت جابوني غلوف راح يشمروني
بالقبر مو كلتلج اطيب وارجعلج
_أعوذ بالله منك أعوذ بالله انت مو انسان أعوذ بالله
كامت تتعوذ وطفرت من يمي شفتها راحت كعدت يم خيرية وبيدها السبحة تسبح هاي شبيها ؟
هباوي_ماعرف شبيهم هذولة
هجرس_ماعدهم يقين بالله واهل البيت (ع) لتلومين هم
هباوي_اي والله شلون صرت
هجرس_الحمدالله والشكر خير من الله بس ماكدر
اكل ومن اشرب توجع
هباوي_هو هاي العملية أيام وتصير زين
هجرس_ان شاء الله اكلج وين شرشبيل اشو ماكو ماله طك
هباوي_بيت اخوها بغداد
هجرس_اخوها هنا
هباوي_شوكت اجه ؟
هجرس_قبل ربع ساعة شنو عافوها بغداد ؟
هباوي_والله مادري هسه اروح اسأل عنها
راحت تسأل اجت بصفي اختي فطومة "
فرقد هذولة يكولون عليك جني مو بشر وحتى
المرض يشرد منك مايركد بجسمك
_منو كال هذا الكلام ؟
اشرت على بنات عمي جاسم وبنات عمي جدوع "
هذولة كالوا
_هذولة عبده الشيطان مو عبده الله لو عبده الله مكالوا هذا الكلام وشككو بقدرة الله وعظمته وجلالته
فطومة_اي الله سبحانه وتعالى هو الخلقنه وخلق الكون كله شنو مايكدر يشافي عبد من عباده الصالحين وانت خوش أنسان وطيب وجبتنه عندك بيتك
وتحبنه وتدارينه وحتى خليت ابوك يحبنه وكاللنه كولولي بابا منا وجاي والله باوع الأعمالك الصالحة ودزلك العلوية شريفة وام البنين عليهم السلام يسوولك العملية
_ونعم بالله وبأهل البيت (ع)
فطومة_اجت الحلوة
هجرس_منو ؟
فطومة_هاي الحلوة سلي بت عمو ابو محمد أحبها
رفعت رأسي شفتها اجت لابسة فستان أسود وحجاب بيجي سلمت على النسوان وحدة وحدة راحتلها فطومة مامصدكه بيها حضنتها حيل وتبوس بيها
بارق مادري منين طلعلي "
المحبة من الله باع اختك تخرب على لعابتك
هجرس_اعوذ بالله منين طلعت انت
بارق_تعاركت وجيت
هجرس_ويامن ؟
بارق_ويه عبده الشيطان ويامن قابل
هجرس_شبيهم ؟
بارق_يكولون انتو سويتوله العملية وتكولون شريفة سوتها له حشاك عالم ماعدها يقين بالله وقدرتها ويسخر
من يشاء لقضاء حوائج الناس
هجرس_وضرب لنا مثلا ونسي خلقه قال من يحيي العظام وهي رميم استعبد إعادة الله تعالى.. ذو القدرة العظيمة التي خلقت السماوات والأرض وللأجساد العظام الرميمة ونسي نفسه وان الله خلقه من العظم وفعلم من نفسه ماهو أعظم مما استبعده وأنكره وجحده .
هاي الآية تفسر كلشي ...
بارق_عالم جاهلة وبس كدام السحورة تفتح وكدام قدرة الله وبركة اهل البيت عليهم السلام يعمون
هجرس_مالك شغل بيهم
بارق_كتلني القهر هلاو هلاو لابسة اسود يالعروسة وبجمال مسويه هوسه ولابسة اسود يالعروسة
هجرس_ولك انجب فضحتنه
بارق_بالقران عروس ولابسة اسود بعد شتريد هجيرس ههه
هجرس_كلشي ماكولك طاح حظك
بارق_حظي طاح من زمان اجت لعندك اجت اضحك لاتكلب خلقتك بوجهها يله طلع اسنونك شبيك مكشر جنك فرس زعلان اضحك ولك اضحك
طكيتها بضحكه عالية وطلعت صوت حسيت اركبتي انشلت من الألم من وراه لزمت اركبتي متوجع "
هجرس_خررر...بيك بارق ذبحتني
بارق_اوووي فدوة ذبحته ههههه هلأ سلي شلونج يابة اخبارج عاش من شاف هذا الطول الحلو وينج
مختفيه كل هاي الفترة
سلي_هلابيك بارق والله بيت اخوي ... حمدالله على
سلامة فرقد
هجرس _الله يسلمج
نبزني بارق"
رب الكعبة لاتبيع ثكل ... لابسة أسود؟
سلي_اي موجنت بالفاتحة
بارق_فاتحة منو ؟
سلي_بيبي دلشاد توفت ورحنالهم اني وامي وابوي بطريقنا
بارق_الله يرحمها خوما حجيتي وياه
سلي_اي شكو بيها عزيته واجينه لهناه
بارق_عفية ماتجنين قلب انتي ؟
سلي_هو شكو واجني قلب فرقد هم متوجع
هجرس_لا
سلي_تكدر تأكل
بارق_لامايكدر عفية عليج وكلي بيدج بلكت الله يأكل
هجرس_شايفني زعطوط
سلي_واني شعلي اوكله ماتوكله انت
بارق_انا ايدي خشنة انتي ايدج ناعمة مثل ريش
النعام بلكت يحس شوي وياكل
ردت اضربه طفر من يمي "
اياناقص على هاي الدكة
بارق_والله عروس ولابسة اسود بس ناقصج العريس بس للاسف العريس مسوي عملية هههههه
سلي_بارق عيب عليك شنو هاي ماتخجل
هجرس _تعال ناقص تعال
عفتها ومشيت وراه هو طلع بره عدل للمضيف الساقط دومه لسانه يفلت بالكلام ومن يوصل يم سلي يعمى ومايندل حلكه وين صاير راح كعد بصف عمي ايهم
خله رجل فوك رجل ويغمزلي ويدزلي بوسات بالهوى .
سلي جنت مقهورة على فرقد كلش وكل فرض من صلاتي ادعيله بالشفاء العاجل وعيني ماتجابس ابقى هنا واشوفه يتعذب ويه المرض عاد رحت بيت اخوي بغداد .
وكل يوم اتواصل ويه هباوي واعرف أخباره من كالتلي بي سرطان ومنتشر وراح يسوولة عملية ويتعالج علاج كيماوي
قلبي انقبض قبض عليه وحزنت كلش
كلشي حسبتله حساب الا المرض الخبيث يلفي عليه صح اضوج من أفعاله القذرة وياي بس ابد ماكرهته وشلت بقلبي عليه احجي واكول اكرهه ماحبه كله جذب
بعدني أحبه داخل قلبي وماطلع الحب لأن هو مايريدني ولا يحبني عليش افشل نفسي واظهر حبي له واقبل بي في حيث اهله رادوني له ودمر حياتي
بنفسي المهم حبست كل حبي داخل قلبي وسكتت.
رجعت اتصلت بارق وكالي صارت ويامعجزة بضريح شريفة بت الحسن عليها السلام مسويته عملية
من فرحتي كمت ابجي وسديت الخط بوجها رأسن فرشت سجادة الصلاة وصليت ركعتين شكران لوجه الله وللعلوية شريفة عليها السلام وام البنين عليها السلام .
رحت خبرت اهلي ...فرحوله كلش كالوا هواي قلبه طيب ويساعد العالم المحتاجة وفاروق كال البارحة جانه شايب للمركز يسأل عنه سامع بي مريض
يكول مخصص الهم راتب كل شهر ينطيهم ٣٠٠ الف من راتبه ومن عده المسواك ليجيبه الهم كل شهر الشايب يحجي ويبجي ويدعيله بالشفاء العاجل
صدك كبر بعيني وكبر بعيون الكل .
اني فطيرة شكلت بقلبي ...بس من يمي عاميها كلما اجي اكحلها بيناتنه يصخمها بالزايد "توبت منه ومن حبه بعد بعد هاهية اشوف حياتي وإذا اجتني قسمة
زينة أقبل واتزوج على امل اكدر أنسى حب الطفولة .
بنفس اليوم الصبح عزمونه بيت جدو موسى وابوي كال نروح نأخذ من خاطر ام دلشاد خطية امها متوفية وعيب مانروح نعزيها هي بكلشي تجينه
وخوش ادمية أحنه ... ماعلينا بسوالف ابنها دلشاد ويه سلي رحت وياهم للبيت سلمت وكعدت دلشاد نزل سلم وكعد كدامي ابوي يخزر بي علمود سوالي سحر
هو ولا هامه صاحتلي اخته الصغيرة ماردت اروح عاد ابوي اشرلي اروح وياها رحنا للمطبخ وكالت "
_ دلشاد وزهراء تعاركوا
_عليش تعاركوا؟
_هي مغشمرته ومخليته يسويلج سحورة
_هو عقل ماكو براسه
_عاشق ومثول مايعرف شلون يخليج تحبي وتقبلين بي
_هذا موعذر يمشي بدرب السحورة
_صار الي صار بعد شنسوي
_حسبي الله ونعم الوكيل بيه وبزهيرة الخاينة
_خايبة هي تحب دلشاد طلعت
_شنووو؟
_اي تحبه ومعترفه له بحبها هو من سمع هيج صاروا ملخ وطردها من البيت ونزلت عليج دوسة ونص وتكول انتي موخوش ابنية وعندج علاقة ويه هذا الضابط ابن اقاربج بديالى وطلعت حجي ماينحجي عليج
_انا مانكر احب فرقد من جنت طفلة صغيرة بس هسه نسيت حبي له وابد مابادلته الحب جان حب من طرف واحد مثل ماخوج يحبني حب من طرفه هو
واني ماعندي سوالف مكسرة لو عندي هيج سوالف مجان تحجبت ولبست حجاب وتقيت الله جان بقيت مثلها
من بيت لبيت ويه الولد امشي
_والله ادري حتى امي ضربتها ودزت على أهلها وهسه راح يشيلون بغير منطقة وسمعت راح تسوي
عملية قص معدة
_ طاح حظها ابد ماتوقعت منها هيج تسوي بي وطعنتني بظهري جنت اثق بيها ثقه عمياء
_مو كل العالم مثلي ومثلج حبابين
_اي والله
_حمدي الله كشفها الج وبين حقيقتها
_الحمدلله والشكر
_صدك سمعت الضابط ابن قاربج بي سرطان
_اي خطية
_سفروه خارج العراق علمود يتعالج
_لاوالله اكون يسفره بهذا الأسبوع بس جديتي حلوة اخذته للعلوية شريفة بت الحسن عليها السلام وصايرة وياه معجزة ومسويتله عملية هي وام البنين عليهم السلام
_صدك والله
_اي والله كل العالم تحجي بي
_سلام الله عليها ابد ماترد طالب الحاجات ...هاي وحدة من قارب ابوي هم صارت وياها معجزة بضريح شريفة بت الحسن عليها السلام قبل كم سنة
_ليش شبيها جان ؟
_ جان بيها مرض خبيث بصدرها بس زارت شريفة ورجعت سوت تحاليل ثانية طلع كلشي مابيها ومرضها حميد صار سوت العملية وهسه كلشي مابيها
_أهل البيت عليهم السلام أبواب الرحمة بينه وبين الله سبحانه وتعالى
_ونعم بيهم مبين هذا الضابط خوش ادمي ومسوي اعمال زينة والله شكفله مرضه
_اي كلش محترم ويساعد هواي عالم محتاجة
_ربي يحمي من كل شر
_آمين
انتبهت على صوت دلشاد "
سلي عادي احجي وياج ؟
انداريت علية "
اي احجي شعندك ابو السحورة
دلشاد_اووف بالوجه
سلي_هاي حقيقتك شكلت النفسك بله من سويتلي سحر
دلشاد_غشمرتني الحقيرة
سلي_وانت زعطوط تغشمرك
دلشاد_تغشمرت بعد واني آسف أعذريني والله بعد ماكررها أبد ولا ازعجج ولا اقهرج
سلي_ ياريت والله
دلشاد _وعد مني سلي ماراح ازعجج وهسه عتذرت
من اهلج وعترفت بعملتي
سلي_الحمدالله الله هداك
دلشاد_اي وأتمنى تسامحيني
سلي_مسامحتك بس اتمنى ماتكرر أخطائك
دلشاد_وعد ماتتكرر
سلي_هاهية مرخصتكم
دلشاد_انتظري سلي
سلي_نعم ؟
دلشاد_ أتمنى نرجع أصدقاء مثل قبل
سلي_ماثق بيك
دلشاد_راح أتغير
سلي_تغييرك لنفسك مو لي
دلشاد_صح
عفته ومشيت كعدت يم اهلي دقائق قليله ورجع كعد كدامي مبين مثل المذلول والمقهور امه جانت تبجي ماعرف عليش امي كاعدة بصفها وتحجي وياها .
باوعلي وتنهد بحسرة وراها كام طلع
وره ماطلعنا شفته صاعد فوك الموطور ولابس الخوذة حرك الموطور سريع وطلع اخته جانت
بصفي وهمست لي "
_أسوء شعور هو شعور حب من طرف واحد
_اي موجع
_كلش والله يعين العاشق
_اي مرخصتج حياتي
_مرخوصة يقلبي ديري بالج على نفسج وأتمنى نبقى على تواصل دائم
_ان شاءالله يقلبي .
امها بوستني وبقت حاضنتني وكالت بصوت ناصي "
ابني راح يموت منوراج ياريت
تقبلين بي ِ
مارديت بقيت ساكته بعدت عني بسرعة صعدت بالسيارة مقهورة على حال دلشاد وامه وأخواته يتوسلون بي تواسيل علمود اقبل بي رجعوا اهلي بالسيارة
حرك ابوي طول الطريق افكر بي وصلنا ديالى بوجهنا بيت جدو موسى سلمت على الكل ورحت سلمت على هجرس نفس الشي ونفس الكبرياء والغرور
على ملامح وجه ولاهامه شي ولا مأثر بي المرض هو هو واكف وشامخ مثل الجبل .رد برود تام حسيت
طلقه وفاتت بصدري مجاهلني جان
مثل ما اني اتجاهل دلشاد هسه يله حسيت بي وبمعاناته بارق كالعادة يحجي كلام ماله داعي ويضحك طلع وراه متحلف بي بقيت اباوعلهم والدمعة بطرف
عيني صايرة مسحتها بسرعة من اجت خاله حنان وبتها فطومة" شلونج خاله
سلي_الحمدالله زينة انتي شلونج
حنان_على الله فطومة خبصتني بيج خبص هههه
سلي_ حبيبتي هي
حنان _فدوة رحتلج خليها يمج اخاف عليها من البنات
سلي_بعيوني الاثنين أخليها
حنان_تسلم اعيونج
اخذتها ورحت كعدت فوك الدرج... شفت ابنية لابسة نفنوف قصير يادوب مقطي ركبة رجليها واليدين طالعة متر والحجاب اسم حجاب فوك راسها
ياربي شكد انغث من هيج بنات لاهي محجبة ولاهي سافرة هسه اني من جنت سافرة ماجنت البس حجاب بهذا الشكل من جنت البسه البسه بشكل محترم واحترمه
الحجاب لبس محترم ومقدس للمرأة ليش اجي البسه بهاي الطريقة واخرب قدسيته .
ختام _انتي سلي ؟
سلي_اي نعم أني تفضلي
ختام _اممم اريد احجي وياج ممكن تكومين فطومة
فطومة_ماشي
جلبت بيها امها عافتها أمانه عندي لايروح يسوون بيها شي وابتلي "اكعدي ..احجي كدامها
ختام_حجي خاص
سلي_وان يكن هاي مثل اختي عادي كدامها تحجين
ختام_الحجي خاص باخوها مايصير تبقى وتسمع خل تكوم وإذا تخافين عليها خل تصعد فوك لما نكمل كلام وتنزلَ
